ARTÍCULO ÑA̱ KAʼVIYÓ 31
Chindayáʼvi ña̱ káʼún xíʼin Jehová
“Ña̱ káʼi̱n xíʼún ná kooña nda̱a̱ táki̱ʼva íyo ña̱ʼa ña̱ chíʼmána nu̱ún” (SAL. 141:2).
YAA 47 Ná ka̱ʼa̱nyó xíʼin Jehová ndiʼi ki̱vi̱
ÑA̱ KA̱ʼA̱NYÓ XA̱ʼA̱ *
1. ¿Ndáa ki̱ʼva kúniyó xa̱ʼa̱ ña̱ va̱ʼa káʼa̱nyó xíʼin Ndióxi̱?
JEHOVÁ ta̱ i̱xava̱ʼa ndiví xíʼin ñuʼú, ta̱xira iin ña̱ ndáyáʼviní ndaʼa̱yó, ta ña̱yóʼo kúú ña̱ va̱ʼa ka̱ʼa̱nyó xíʼinra. ¿Ndáaña kúni̱ kachi ña̱yóʼo? Kivi ka̱ʼa̱nyó xíʼin Jehová xa̱ʼa̱ ndiʼi ña̱ ndóʼoyó ta kivi keʼéyóña nda̱a̱ ndáaka hora á nda̱a̱ ndáaka tu̱ʼun káʼa̱nyó. Kivi ka̱ʼa̱nyó xíʼin yiváyó Jehová ni ndeéní ndóʼoyó ndíka̱a̱yó ini iin hospital ta saátu kivi ka̱ʼa̱nyó xíʼinra tá ndíka̱a̱yó veʼeka̱a, ta ná va̱ása kaka-iniyó chi xíniso̱ʼovara ña̱ káʼa̱nyó xíʼinra. Ta táxiníyó tíxa̱ʼvi xa̱ʼa̱ ña̱yóʼo.
2. ¿Ndáa ki̱ʼva ni̱na̱ʼa̱ ta̱ rey David ña̱ xi̱chindayáʼviníra ña̱ xi̱ka̱ʼa̱nra xíʼin Ndióxi̱?
2 Nu̱ú ta̱ rey David xi̱ndayáʼviní ña̱ ka̱ʼa̱nra xíʼin Jehová. Saáchi tá xi̱tara iin yaa nu̱úra, ni̱ka̱ʼa̱nra ña̱yóʼo xíʼinra: “Ña̱ káʼi̱n xíʼún ná kooña nda̱a̱ táki̱ʼva íyo ña̱ʼa ña̱ chíʼmána nu̱ún” (Sal. 141:1, 2). Tá tiempo ña̱ ni̱xi̱yo ta̱ David xi̱xiniñúʼuna iin ña̱ʼa ña̱ yi̱i̱ ña̱ xi̱chiʼmána nu̱ú Jehová ña̱ va̱ʼa ndasakáʼnunara, ta na̱ su̱tu̱ na̱ xi̱ ixava̱ʼa ña̱yóʼo viíní xi̱ ixava̱ʼanaña (Éx. 30:34, 35). Xa̱ʼa̱ ña̱kán, tá ni̱ka̱ʼa̱n ta̱ David xa̱ʼa̱ ña̱ʼa ña̱ xíniñúʼuna ña̱ chíʼmána nu̱ú Ndióxi̱, ña̱ xi̱kuni̱ kachira kúú ña̱ viíní ndakanixi̱níra xa̱ʼa̱ ña̱ ka̱ʼa̱nra xíʼin yivára ta̱ íyo chí ndiví. Ta saátu kúni̱ miíyó keʼéyó, chi kúni̱yó ña̱ ná kusi̱í-ini Jehová xíʼin ña̱ káʼa̱nyó xíʼinra.
3. ¿Ndáa ki̱ʼva xíniñúʼu ka̱ʼa̱nyó xíʼin Jehová, ta nda̱chun?
3 Tá káʼa̱nyó xíʼin Jehová, xíʼin ña̱ to̱ʼó ná keʼéyóña. Ná ndakanixi̱níyó xa̱ʼa̱ visión ña̱ xi̱ni ta̱ Isaías, ta̱ Ezequiel, ta̱ Daniel xíʼin ta̱ Juan. Ni xa̱a̱ síín ni̱xi̱yo visión ña̱ xi̱nina, soo iin kítáʼanva ña̱ káʼa̱nña xa̱ʼa̱. Ndiʼiña káʼa̱nña xa̱ʼa̱ Jehová ña̱ kúúra iin Rey ta̱ káʼnuní. Ta̱ Isaías xi̱nira Jehová ña̱ íyora nu̱ú iin trono tú súkunní (Is. 6:1-3). Ta̱ Ezequiel xi̱nira ña̱ íyo Jehová nu̱ú carrora tú íyo chí ndiví, ta nu̱ú íyora ndeéní yéʼe̱ña ta nda̱a̱ táki̱ʼva íyo iin arcoíris saá káaña (Ezeq. 1:26-28). Ta̱ Daniel xi̱nira iin ta̱ xi̱ku̱a̱ʼa̱ ta̱ xa̱a̱ íyo ku̱a̱ʼání tiempo, ta ndíxira ti̱ko̱to̱ yaa ta íyora nu̱ú trono nu̱ú kée ñuʼu̱ (Dan. 7:9, 10). Ta̱ Juan xi̱nira Jehová ña̱ íyora nu̱ú iin trono, “ta iníísaá nu̱ú níndúʼura xi̱ndika̱a̱ iin arcoíris, tí náʼa̱ nda̱a̱ táki̱ʼva náʼa̱ yu̱u̱ livi ña̱ naní esmeralda” (Apoc. 4:2-4). Tá ndákanixi̱níyó xa̱ʼa̱ ña̱ káʼnuní Jehová, sándakaʼánña miíyó ña̱ iin ña̱ ndáyáʼviní kúú ña̱ káʼa̱nyó xíʼinra, ta xa̱ʼa̱ ña̱yóʼo xíniñúʼu keʼéyóña xíʼin ña̱ to̱ʼó. Soo, ¿ndáaña kivi ka̱ʼa̱nyó xa̱ʼa̱ tá káʼa̱nyó xíʼin Jehová?
“SIAʼA XÍNIÑÚʼU KA̱ʼA̱NNDÓ XÍʼINRA”
4. ¿Ndáaña sákuaʼayó xíʼin ña̱ ni̱ka̱ʼa̱n ta̱ Jesús nu̱ú Mateo 6:9, 10?
4 (Kaʼvi Mateo 6:9, 10). Tá ni̱ka̱ʼa̱nndosó ta̱ Jesús chí yuku̱, sa̱náʼa̱ra na̱ discípulora ndáa ki̱ʼva kúni̱ Ndióxi̱ ná ka̱ʼa̱nna xíʼinra. Ña̱ nu̱ú ña̱ ni̱ka̱ʼa̱nra xa̱ʼa̱ kúú: ña̱ ná nduyi̱i̱ ki̱vi̱ yivára, ña̱ ná kixaa̱ ki̱vi̱ ña̱ kaʼndachíñu Reinora, chi ña̱yóʼo kúú ña̱ sandíʼi-xa̱ʼa̱ ndiʼi na̱ sáa̱-ini xíni Ndióxi̱, ta ná xi̱nu ndiʼi ña̱ káʼa̱nra keʼéra nu̱ú ñuʼú yóʼo ta saátu ña̱ káʼa̱nra taxira ndaʼa̱ na̱ yiví. Tá káʼa̱nyó xa̱ʼa̱ ña̱yóʼo xíʼin Jehová, saá náʼa̱yó ña̱ ndáyáʼviní ña̱yóʼo nu̱úyó.
5. ¿Nda̱chun va̱ʼa kúnda̱a̱-iniyó ña̱ kiviva ka̱ʼa̱nyó xíʼin Jehová xa̱ʼa̱ ña̱ʼa ña̱ xíniñúʼuyó?
5 Ta saátu ni̱ka̱ʼa̱n ta̱ Jesús ña̱ kiviva ka̱ʼa̱nyó xíʼin Ndióxi̱ xa̱ʼa̱ ña̱ʼa ña̱ xíniñúʼuyó. Kivi ka̱ʼa̱nyó xíʼin Jehová ña̱ ná taxira ña̱ kuxuyó ndiʼi ki̱vi̱, ña̱ ná koo káʼnu-inira xa̱ʼa̱ ku̱a̱chiyó, ña̱ ná kǒo taxira ndakavayó ndaʼa̱ ku̱a̱chi ta ná sakǎkura miíyó nu̱ú ta̱ Ndi̱va̱ʼa (Mat. 6:11-13). Tá ndúkúyó ña̱yóʼo nu̱ú Jehová, náʼa̱yó ña̱ ndáa-iniyóra ta saátu náʼa̱yó ña̱ kúni̱yó ná kusi̱í-inira xíʼin ña̱ kéʼéyó.
Iin ta̱ hermano íyora xíʼin ñá síʼira ta káʼa̱nra xíʼin Ndióxi̱, ¿ndáaña xíniñúʼu ka̱ʼa̱nra xa̱ʼa̱? (Koto párrafo 6). *
6. ¿Ndáa inka ña̱ʼa kivi ka̱ʼa̱nyó xa̱ʼa̱ tá káʼa̱nyó xíʼin Ndióxi̱?
6 Tá sa̱náʼa̱ ta̱ Jesús na̱ discípulora ndáa ki̱ʼva ka̱ʼa̱nna xíʼin Ndióxi̱, va̱ása níka̱ʼa̱nra xíʼinna ña̱ nda̱saa ña̱yóʼo kuití ka̱ʼa̱nna xa̱ʼa̱. Chi saátu sa̱náʼa̱rana ña̱ ná ka̱ʼa̱nna xíʼin Ndióxi̱ xa̱ʼa̱ ña̱ sándi̱ʼi̱-inina chi saá ke̱ʼé miíra (Mat. 26:39, 42; Juan 17:1-26). Saátu miíyó kivi ka̱ʼa̱nyó xíʼin Jehová xa̱ʼa̱ nda̱a̱ ndáaka ña̱ sándi̱ʼi̱-iniyó. Tá kúú, tá xíniñúʼu ndaka̱xinyó iin ña̱ keʼéyó, kivi ka̱ʼa̱nyó xíʼinra ña̱ ná taxira ña̱ ndíchi ndaʼa̱yó ña̱ vií koo ña̱ ndaka̱xinyó keʼéyó (Sal. 119:33, 34). Tá nda̱kiʼinyó iin chiñu ña̱ íxayo̱ʼvi̱ xíʼinyó keʼéyó, kivi ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ va̱ʼa kunda̱a̱-iniyó ndáa ki̱ʼva keʼéyóña (Prov. 2:6). Na̱ íyo se̱ʼe kivi ka̱ʼa̱nna xíʼin Ndióxi̱ xa̱ʼa̱ se̱ʼena, ta na̱ va̱lí kivi ka̱ʼa̱nna xíʼin Ndióxi̱ xa̱ʼa̱ na̱ yivána. Ta saátu ndiʼiyó xíniñúʼu ka̱ʼa̱nyó xíʼin Ndióxi̱ xa̱ʼa̱ na̱ yiví na̱ sánáʼa̱yó xa̱ʼa̱ Biblia ta saátu na̱ nátúʼunyó xíʼin. Soo tá káʼa̱nyó xíʼin Ndióxi̱ va̱ása xíniñúʼu ndukú kuitíyó ña̱ʼa nu̱úra.
Tá káʼa̱nyó xíʼin Jehová ná taxiyó tíxa̱ʼvi ndaʼa̱ra ta saátu ná ndasakáʼnuyóra. (Koto párrafo 7 nda̱a̱ 9). *
7. ¿Nda̱chun xíniñúʼu ndasakáʼnuyó Jehová tá káʼa̱nyó xíʼinra?
7 Tá káʼa̱nyó xíʼin Jehová, saátu xíniñúʼu ndakaʼányó ña̱ ndasakáʼnuyóra. Iinlá miíra kúú ta̱ xíniñúʼu ndasakáʼnuyó. Ta̱ ka̱ʼyí iin salmo ni̱ka̱ʼa̱nra: “Va̱ʼaní-iniún ta íyo tu̱ʼvaún ña̱ koo káʼnu-iniún xa̱ʼa̱ na̱ yiví”. Ta ni̱ka̱ʼa̱nkara: “Kúún iin Ndióxi̱ ta̱ kúndáʼvi-ini xíni inkana ta va̱ʼaní-iniún, kúee íyo iniún ta kúʼvi̱ní-iniún xíniún na̱ yiví ta nda̱kúní-iniún” (Sal. 86:5, 15). Va̱ʼaní-ini Jehová ta ku̱a̱ʼání ña̱ kéʼéra xa̱ʼa̱yó, xa̱ʼa̱ ña̱kán xíniñúʼu ndasakáʼnuyóra.
8. ¿Ndáaña kivi taxiyó tíxa̱ʼvi xa̱ʼa̱ tá káʼa̱nyó xíʼin Ndióxi̱? (Salmo 104:12-15, 24).
8 Xíniñúʼu ndasakáʼnuyó Jehová tá káʼa̱nyó xíʼinra ta saátu xíniñúʼu taxiyó tíxa̱ʼvi ndaʼa̱ra xa̱ʼa̱ ndiʼi ña̱ va̱ʼa ña̱ táxira ndaʼa̱yó, tá kúú ña̱ liviní color yita, ta ku̱a̱ʼání nu̱ú ña̱ʼa táxira xíxiyó ta ya̱si̱nníña, ta saátu ña̱ táxira na̱ migoyó na̱ va̱ʼaní kítáʼan xíʼinyó. Jehová táxira ndiʼi ña̱yóʼo ndaʼa̱yó xa̱ʼa̱ ña̱ kúʼvi̱-inira xínira miíyó ta kúni̱ra ña̱ si̱íní ná kooyó (kaʼvi Salmo 104:12-15, * 24). * Saátu táxiyó tíxa̱ʼvi ndaʼa̱ra xa̱ʼa̱ ña̱ táxira ndiʼi ña̱ xíniñúʼuyó ña̱ sakúaʼayó xa̱ʼa̱ra, ta saátu xa̱ʼa̱ ña̱ va̱ʼaní ndátuyó ndakiʼinyó chí nu̱únínu.
9. ¿Ndáaña kivi keʼéyó ña̱ va̱ása nandósóyó taxiyó tíxa̱ʼvi ndaʼa̱ Jehová? (1 Tesalonicenses 5:17, 18).
9 Kamaníva nándósóyó taxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ kéʼéra xa̱ʼa̱yó. ¿Ndáaña kivi keʼéyó ña̱ va̱ása kundoʼoyó ña̱yóʼo? Kivi kaʼyíyó nu̱ú iin tutu ndiʼi ña̱ʼa ña̱ ndúkúyó nu̱ú Jehová ta tá xa̱a̱ ni̱ya̱ʼa tiempo kotoyó ndáa ki̱ʼva xa̱a̱ táxira ña̱ ndúkúyó nu̱úra. Tasaá kivi ka̱ʼa̱nyó xíʼinra ña̱ taxiyó tíxa̱ʼvi ndaʼa̱ra xa̱ʼa̱ ndiʼi ña̱ kéʼéra xa̱ʼa̱yó (kaʼvi 1 Tesalonicenses 5:17, 18). ¿Á su̱ví kúsi̱íní-iniyó tá táxina tíxa̱ʼvi ndaʼa̱yó xa̱ʼa̱ ña̱ kéʼéyó xa̱ʼa̱na, ta saátu tá náʼa̱na ña̱ kúʼvi̱ní-inina xínina miíyó? Saátu Jehová kúsi̱íní-inira tá táxiyó tíxa̱ʼvi ndaʼa̱ra xa̱ʼa̱ ña̱ ndákuiinra ña̱ káʼa̱nyó xíʼinra (Col. 3:15). Soo su̱ví nda̱saa xa̱ʼa̱ ña̱yóʼo kivi taxiyó tíxa̱ʼvi ndaʼa̱ Jehová, chi íyo inkaña ta ndáyáʼviní ña̱yóʼo. Ná kotoyó ndáaña kúúña.
NÁ TAXIYÓ TÍXA̱ʼVI NDAʼA̱ JEHOVÁ XA̱ʼA̱ SE̱ʼERA
10. ¿Nda̱chun xíniñúʼu taxiyó tíxa̱ʼvi ndaʼa̱ Jehová xa̱ʼa̱ ña̱ chi̱ndaʼára se̱ʼera nu̱ú ñuʼú yóʼo? (1 Pedro 2:21).
10 (Kaʼvi 1 Pedro 2:21). Jehová chi̱ndaʼára se̱ʼera ta̱ kúʼvi̱ní-inira xínira ña̱ ki̱xira nu̱ú ñuʼú yóʼo ña̱ va̱ʼa sanáʼa̱ra miíyó, xa̱ʼa̱ ña̱kán xíniñúʼu taxiníyó tíxa̱ʼvi ndaʼa̱ Jehová. Ña̱kán tá káʼviyó xa̱ʼa̱ ña̱ ke̱ʼé ta̱ Jesús, ku̱a̱ʼání ña̱ʼa sákuaʼayó xa̱ʼa̱ Jehová ta saátu sákuaʼayó xa̱ʼa̱ ndáaña xíniñúʼu keʼéyó ña̱ va̱ʼa sakúsi̱íyó-inira. Tá kándíxayó ña̱ ni̱xi̱ʼi̱ ta̱ Jesús xa̱ʼa̱yó, va̱ʼaní xa̱a̱yó kutáʼanyó xíʼin Jehová (Rom. 5:1).
11. ¿Nda̱chun xíniñúʼuyó ki̱vi̱ ta̱ Jesús tá káʼa̱nyó xíʼin Ndióxi̱?
11 Xa̱ʼa̱ ña̱ ki̱xi ta̱ Jesús ni̱xi̱ʼi̱ra xa̱ʼa̱yó, kivi ka̱ʼa̱nyó xíʼin Jehová ta taxiyó tíxa̱ʼvi ndaʼa̱ra xa̱ʼa̱ ña̱yóʼo. Jehová xíniñúʼura ta̱ Jesús ña̱ va̱ʼa taxira ña̱ ndúkúyó nu̱úra. Ña̱kán tá xíniñúʼuyó ki̱vi̱ se̱ʼera ña̱ ka̱ʼa̱nyó xíʼinra, xíniso̱ʼovara ña̱ káʼa̱nyó ta ndákuiinra ña̱ káʼa̱nyó xíʼinra. Ta̱ Jesús ni̱ka̱ʼa̱nra: “Nda̱a̱ ndáaka ña̱ ná ndukúndó xa̱ʼa̱ ki̱víi̱, keʼévai̱ña ña̱kán va̱ʼa ndasakáʼnundó Ndióxi̱” (Juan 14:13, 14).
12. ¿Nda̱chun kúú ña̱ táxiníyó tíxa̱ʼvi ndaʼa̱ Jehová xa̱ʼa̱ se̱ʼera?
12 Va̱ʼa íxakáʼnu-ini Jehová xa̱ʼa̱ ku̱a̱chiyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Biblia káʼa̱nña xa̱ʼa̱ ta̱ Jesús ña̱ kúúra ta̱ “su̱tu̱ káʼnu” ta níndúʼura “chí ndaʼa̱ kúaʼa Ndióxi̱ ta̱ káʼnu ta̱ íyo chí ndiví” (Heb. 8:1). Saátu káʼa̱nkaña xa̱ʼa̱ ta̱ Jesús ña̱ íyora chí ndiví ta chíndeétáʼanra xíʼin yivára (1 Juan 2:1). Táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira iin su̱tu̱ káʼnu ta̱ kúndáʼvi-ini xíni miíyó, kúnda̱a̱-inira xíʼin ña̱ ndóʼoyó ta xákundáʼvira xa̱ʼa̱yó nu̱ú Ndióxi̱ (Rom. 8:34; Heb. 4:15). Tá va̱ása níxi̱ʼi̱ ta̱ Jesús xa̱ʼa̱ miíyó na̱ yiví ku̱a̱chi, va̱ása kiviví ka̱ʼa̱nyó xíʼin Jehová. Táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ta̱ kúʼvi̱ní-inira xínira ña̱ ni̱xi̱ʼi̱ra xa̱ʼa̱yó.
NÁ KA̱ʼA̱NYÓ XÍʼIN JEHOVÁ XA̱ʼA̱ NA̱ HERMANOYÓ
13. ¿Ndáa ki̱ʼva ni̱na̱ʼa̱ ta̱ Jesús ña̱ kúʼvi̱ní-inira xínira na̱ discípulora ñuú tá kúma̱ní kuvira?
13 Ñuú tá ku̱ma̱ní kuvi ta̱ Jesús, ku̱a̱ʼání tiempo ni̱ka̱ʼa̱nra xíʼin yivára xa̱ʼa̱ na̱ discípulora ña̱ ná kundaarana nu̱ú ta̱ Ndi̱va̱ʼa (Juan 17:15). Xíʼin ña̱yóʼo ni̱na̱ʼa̱ra ña̱ kúʼvi̱ní-inira xínirana. Ni xa̱a̱ ku̱nu̱mí ña̱ ndeéní xo̱ʼvi̱ra, soo ni saá ni̱ndi̱ʼi̱-inira xa̱ʼa̱na.
¿Ndáaña kivi ka̱ʼa̱nyó xa̱ʼa̱ tá káʼa̱nyó xíʼin Ndióxi̱ xa̱ʼa̱ na̱ hermanoyó? (Koto párrafo 14 nda̱a̱ 16). *
14. ¿Ndáa ki̱ʼva náʼa̱yó ña̱ kúʼvi̱-iniyó xíniyó na̱ hermanoyó?
14 Nda̱a̱ táki̱ʼva ke̱ʼé ta̱ Jesús, saátu kéʼé miíyó va̱ása ndíʼi̱-iniyó xa̱ʼa̱ ña̱ xíniñúʼu mií kuitíyó, chi saátu káʼa̱nyó xíʼin Jehová xa̱ʼa̱ na̱ hermanoyó. Saá kúú ña̱ náʼa̱yó ña̱ ndíku̱nyó ña̱ ni̱ka̱ʼa̱n ta̱ Jesús tá ka̱chira: “Kuʼvi̱-inindó kunitáʼanndó”, ta saátu náʼa̱yó nu̱ú Jehová ña̱ kúʼvi̱ní-iniyó xíniyó na̱ hermanoyó (Juan 13:34). Tá káʼa̱nyó xíʼin Jehová xa̱ʼa̱ na̱ hermanoyó saá kúúña náʼa̱yó ña̱ ndáyáʼvinína nu̱úyó. Saáchi Biblia káchiña “tá káʼa̱n iin na̱ yiví na̱ nda̱kúní-ini xíʼin Ndióxi̱, ña̱ káʼa̱n na̱yóʼo kúúmiíníña ndee̱” (Sant. 5:16).
15. ¿Nda̱chun xíniñúʼu ka̱ʼa̱nyó xíʼin Jehová xa̱ʼa̱ na̱ hermanoyó?
15 Xíniñúʼu ka̱ʼa̱nyó xíʼin Ndióxi̱ xa̱ʼa̱ na̱ hermanoyó chi yo̱ʼvi̱ní tu̱ndóʼo yáʼana nu̱ú. Ná ka̱ʼa̱nyó xíʼinra ña̱ chindeétáʼanra xíʼin na̱ hermanoyó tá kúúmiína kue̱ʼe̱, tá yáʼana nu̱ú iin tu̱ndóʼo, tá íyo ku̱a̱chi á tá íxandi̱va̱ʼana xíʼinna. Saátu xíniñúʼu ka̱ʼa̱nyó xíʼin Jehová ña̱ ná chindeétáʼanra xíʼin na̱ hermano na̱ chíndeétáʼan xíʼin na̱ ndóo nu̱ú ku̱u iin tu̱ndóʼo tá kúú tá kúun sa̱vi̱ á tá ndeéní táan á tá kúu inkaka ña̱ʼa. Sana xíni̱yó iin na̱ hermano na̱ ndóʼo táʼan ña̱yóʼo. Tá kéʼéyó oración nu̱ú Ndióxi̱, kivi ka̱ʼa̱nyó ki̱vi̱ na̱ hermanoyó xíʼinra, ta tá káʼa̱nyó xíʼinra ña̱ ná chindeétáʼanra xíʼin na̱ hermanoyó ña̱ ya̱ʼana nu̱ú tu̱ndóʼo ña̱ kúúmiína, saá na̱ʼa̱yó ña̱ ndixaní kúʼvi̱-iniyó xíniyóna.
16. ¿Nda̱chun xíniñúʼu ka̱ʼa̱nyó xíʼin Ndióxi̱ xa̱ʼa̱ na̱ níʼi yichi̱ nu̱úyó?
16 Na̱ hermano na̱ níʼi yichi̱ nu̱ú na̱ congregación táxinína tíxa̱ʼvi tá káʼa̱nyó xíʼin Ndióxi̱ xa̱ʼa̱na, ta ña̱yóʼo chíndeétáʼanníña xíʼinna. Saá ndo̱ʼo ta̱ apóstol Pablo tá ka̱ʼyíra ña̱yóʼo: “Ka̱ʼa̱nndó xíʼin Ndióxi̱ xa̱ʼíi̱, ña̱ va̱ʼa ná chindeétáʼanra xíʼi̱n ña̱ va̱ása yi̱ʼvíi̱ natúʼi̱n xa̱ʼa̱ tu̱ʼun va̱ʼa, ta ña̱yóʼo kúú ña̱ yi̱i̱ ña̱ íyo se̱ʼé xa̱ʼa̱” (Efes. 6:19). Tiempo vitin íyotu na̱ hermano na̱ chíka̱a̱ní ndee̱ ña̱ va̱ʼa kuniʼina yichi̱ nu̱úyó. Tá ka̱ʼa̱nyó xíʼin Jehová ña̱ ná chindeétáʼanra xíʼinna ña̱ vií kana ndiʼi ña̱ kéʼéna, saá náʼa̱yó ña̱ kúʼvi̱-iniyó xíniyóna.
TÁ KÁʼA̱NYÓ XÍʼIN NDIÓXI̱ NU̱Ú ÍYO KU̱A̱ʼÁ NA̱ YIVÍ
17, 18. ¿Ama kivi ka̱ʼa̱nna xíʼinyó keʼéyó oración nu̱ú íyo ku̱a̱ʼána, ta ndáaña xíniñúʼu kiʼinyó kuenta xíʼin?
17 Sava yichi̱ káʼa̱nna xíʼinyó ña̱ ná keʼéyó oración nu̱ú íyo ku̱a̱ʼá na̱ yiví. Tá kúú iin ñá hermana ñá káʼvi Biblia xíʼin iin na̱ yiví, kivi ka̱ʼa̱nñá xíʼin ñá hermana ñá ku̱a̱ʼa̱n xíʼinñá ña̱ ná keʼéñá oración, ta sana ñáyóʼo va̱ása xíni̱ va̱ʼañá na̱ yiví na̱ káʼvi ñá hermana yóʼo xíʼin. Xa̱ʼa̱ ña̱kán sana kuni̱ñá keʼéñá oración nda̱a̱ tá ná ndiʼi kaʼviná xíʼin na̱ yiví yóʼo, chi saá kúú ña̱ kivi kunda̱a̱-iniñá ndáaña ka̱ʼa̱nñá xíʼin Ndióxi̱ xa̱ʼa̱ na̱ yiví yóʼo.
18 Soo, tá ná ka̱ʼa̱nna xíʼin iin ta̱ hermano ña̱ ná keʼéra oración tá kéena predicación á tá íyo reunión ti̱xin congregación. Xíniñúʼu kiʼinra kuenta ña̱ tá káʼa̱nra xíʼin Ndióxi̱, su̱ví tiempo ña̱ ka̱ʼa̱nra xíʼin na̱ congregación ndáaña xíniñúʼu keʼéna kúúña. Saáchi tá xíyo reunión, u̱ʼu̱n minuto íyo ña̱ katana yaa ta keʼéna oración. Xa̱ʼa̱ ña̱kán, na̱ hermano na̱ kéʼé oración va̱ása xíniñúʼu ku̱a̱ʼání ka̱ʼa̱nna, tá kúú tá sa̱kán kíxáʼa reunión (Mat. 6:7).
NÁ CHINDAYÁʼVINÍYÓ ÑA̱ KÁʼA̱NYÓ XÍʼIN NDIÓXI̱
19. ¿Ndáaña chindeétáʼan xíʼinyó ña̱ koo tu̱ʼvayó tá ná kixaa̱ ki̱vi̱ ña̱ ndatiin Jehová ku̱a̱chi xíʼin na̱ yiví?
19 Xa̱ʼa̱ ña̱ xa̱a̱ ku̱yatinní kixaa̱ ki̱vi̱ ña̱ ndatiin Jehová ku̱a̱chi xíʼin na̱ yiví, xíniñúʼu chindayáʼviníyó ña̱ káʼa̱nyó xíʼinra. Tá ni̱ka̱ʼa̱n ta̱ Jesús xa̱ʼa̱ ña̱yóʼo ka̱chira: “Ña̱kán, xíniñúʼu kundito va̱ʼa nu̱úndó ta ndiʼi tiempo ka̱ʼa̱n-ndáʼvindó xíʼin Ndióxi̱ ña̱ va̱ʼa ná ka̱kundó nu̱ú ndiʼi ña̱ʼa ña̱ xíniñúʼu kuu” (Luc. 21:36). Tá ná ka̱ʼa̱n ni̱ʼiyó xíʼin Ndióxi̱ saá kúú ña̱ koo tu̱ʼvayó tá na̱ kixaa̱ ki̱vi̱ Jehová.
20. ¿Ndáaña kivi keʼéyó ña̱ va̱ʼa viíní koo ña̱ káʼa̱nyó xíʼin Ndióxi̱?
20 ¿Ndáaña sa̱kuaʼayó nu̱ú artículo yóʼo? Sa̱kúaʼayó ña̱ xíniñúʼu chindayáʼviníyó ña̱ ka̱ʼa̱nyó xíʼin Jehová. Ta ndiʼi ña̱ káʼa̱nyó xíʼinra, ná kitáʼanña xíʼin ña̱ kúni̱ra. Tá káʼa̱nyó xíʼinra, táxiyó tíxa̱ʼvi ndaʼa̱ra xa̱ʼa̱ Reinora xíʼin xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó, ta saátu káʼa̱nyó xíʼinra xa̱ʼa̱ na̱ hermanoyó. Ta saátu kivi ka̱ʼa̱nyó xíʼin Jehová ña̱ ná taxira ndiʼi ña̱ xíniñúʼuyó xíʼin ña̱ sakúaʼayó xa̱ʼa̱ra. Tá viíní ná ndakanixi̱níyó xa̱ʼa̱ ña̱ ka̱ʼa̱nyó xíʼin Ndióxi̱, saá na̱ʼa̱yó ña̱ chíndayáʼviníyó ña̱yóʼo, tasaá tu̱ʼun ña̱ káʼa̱nyó xíʼinra kooña nda̱a̱ táki̱ʼva íyo ña̱ʼa ña̱ xáʼa̱n támi ña̱ chíʼmana nu̱úra ta kusi̱íní-inira xíʼinña (Prov. 15:8).
YAA 45 “Ña̱ ndákani-inii̱ xa̱ʼa”
^ Chíndayáʼviníyó ña̱ va̱ʼa káʼa̱nyó xíʼin Jehová, xa̱ʼa̱ ña̱kán kúni̱yó ña̱ ná kusi̱í-inira xíʼin ña̱ káʼa̱nyó xíʼinra ta ná kooña nda̱a̱ táki̱ʼva íyo iin ña̱ʼa ña̱ xáʼa̱n támi. Nu̱ú artículo yóʼo sakúaʼayó ndáaña kivi ka̱ʼa̱nyó xa̱ʼa̱ xíʼin Ndióxi̱, ta saátu ndáaña xíniñúʼu kiʼinyó kuenta xíʼin tá káʼa̱nyó xíʼinra nu̱ú íyo ku̱a̱ʼá na̱ yiví.
^ Salmo 104:12-15: “Chí yuʼú ti̱kui̱í ndóo tí saa yóʼo; ta chí nu̱ú íyo yu̱ku̱ ndóorí xitarí. 13 Kóso̱ra yuku̱ nda̱a̱ cuarto ña̱ íyo chí ni̱nu nu̱ú íyora. Ndiʼi na̱ ndóo nu̱ú ñuʼú, chútú-inina xíʼin ndiʼi ña̱ i̱xava̱ʼara. 14 Ta̱yóʼo sákuaʼnura yu̱ku̱ ña̱ kaxí kití, saátu sákuaʼnura yiva ña̱ kuxu na̱ yiví, ta saátu sákuaʼnura ña̱ʼa nu̱ú ñuʼú ña̱ va̱ʼa koo ña̱ kuxuna: 15 vino tá sákusi̱í-ini na̱ yiví, aceite tá sándaye̱ʼe̱ nu̱úna ta saátu si̱táva̱ʼa ña̱ sándi̱ko-ini na̱ yiví”.
^ Salmo 104:24: “Ku̱a̱ʼání kúú ña̱ʼa ña̱ ke̱ʼún Jehová. Ta xíʼin ña̱ ndíchi ke̱ʼún ndiʼiña. Iin chútú ña̱ ke̱ʼún nu̱ú ñuʼú yóʼo”.
^ ÑA̱ KÁʼA̱N XA̱ʼA̱ NA̱ʼNÁ: Iin ta̱ hermano xíʼin ñá síʼira káʼa̱nra xíʼin Jehová ña̱ ná kundaara ñá loʼo se̱ʼera ñá ku̱a̱ʼa̱n escuela, ña̱ ná chindeétáʼanra xíʼin si̱sora ta̱ ndeé ndóʼo ta saátu ná chindeétáʼanra xíʼin iin na̱ káʼvina Biblia xíʼin.
^ ÑA̱ KÁʼA̱N XA̱ʼA̱ NA̱ʼNÁ: Iin ta̱ hermano táxira tíxa̱ʼvi ndaʼa̱ Jehová xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, xa̱ʼa̱ ña̱ liviní káa ñuʼú nu̱ú ndóoyó ta saátu xa̱ʼa̱ ña̱ táxira ña̱ xíxiyó.
^ ÑA̱ KÁʼA̱N XA̱ʼA̱ NA̱ʼNÁ: Iin ñá hermana káʼa̱nñá xíʼin Jehová ña̱ ná taxira espíritu santo ndaʼa̱ na̱ Cuerpo Gobernante, ña̱ ná chindeétáʼanra xíʼin na̱ hermano na̱ yáʼa nu̱ú tu̱ndóʼo tá kúú, tá kúun sa̱vi̱ á ña̱ ndeéní táan ta saátu ná chindeétáʼanra xíʼin na̱ íxandi̱va̱ʼana xíʼin.