ARTÍCULO ÑA̱ KAʼVIYÓ 29
Ná chindeétáʼanyó xíʼin ta̱ Jesucristo, ta̱ níʼi yichi̱ nu̱úyó
“Ndióxi̱ ta̱xi chiñu ndaʼíi̱ ña̱ kiʼi̱n kuenta xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo” (MAT. 28:18).
YAA 13 Ta̱ Jesús sa̱ndákoora yichi̱ nu̱úyó
ÑA̱ KA̱ʼA̱NYÓ XA̱ʼA̱ *
1. ¿Ndáaña kúni̱ Ndióxi̱ keʼéyó tiempo vitin?
ÑA̱ KÚNI̱ Ndióxi̱ keʼéyó tiempo vitin kúú ña̱ natúʼunyó tu̱ʼun va̱ʼa ña̱ káʼa̱n xa̱ʼa̱ Reinora iníísaá ñuyǐví (Mar. 13:10; 1 Tim. 2:3, 4). Chiñu mií Jehová kúú ña̱yóʼo, ta xa̱ʼa̱ ña̱ ndáyáʼviníña nda̱kaxinra se̱ʼera ta̱ kúʼvi̱ní-inira xínira ña̱ kiʼinra kuenta xíʼinña. Ta xa̱ʼa̱ ña̱ kíʼin ta̱ Jesús kuenta xíʼin ña̱ predicación, kivi kandíxayó ña̱ tá ná kixaa̱ ña̱ Armagedón kusi̱íníva-ini Jehová xíʼin ndiʼi chiñu yóʼo (Mat. 24:14).
2. ¿Ndáaña sakúaʼayó nu̱ú artículo yóʼo?
2 Nu̱ú artículo yóʼo sakúaʼayó ña̱ xíniñúʼu ta̱ Jesús ta̱ “esclavo ta̱ nda̱kúní-ini ta̱ ndíchiní”, ña̱ taxira ña̱ xíniñúʼuyó ña̱ sakúaʼayó xa̱ʼa̱ Ndióxi̱, ta saátu chíndeétáʼanra xíʼinyó ña̱ natúʼunyó xíʼin ndiʼi na̱ yiví na̱ íyo iníísaá ñuyǐví (Mat. 24:45). Ta sakúaʼatuyó ndáaña kivi keʼéyó ña̱ va̱ʼa chindeétáʼanyó xíʼin ta̱ Jesús ta saátu xíʼin ta̱ “esclavo ta̱ nda̱kúní-ini ta̱ ndíchiní”.
TA̱ JESÚS KÚÚ TA̱ KÍʼIN KUENTA XÍʼIN ÑA̱ PREDICACIÓN
3. ¿Ndáa chiñu kúú ña̱ ta̱xi Ndióxi̱ ndaʼa̱ ta̱ Jesús?
3 Ta̱ Jesús kúú ta̱ kíʼin kuenta xíʼin ña̱ predicación. ¿Nda̱chun va̱ʼa xíni̱yó ña̱yóʼo? Tá si̱lóʼo kúma̱ní ku̱ʼu̱n ta̱ Jesús chí ndiví, nda̱kutáʼanra xíʼin sava na̱ discípulora iin yuku̱ chí Galilea ta ni̱ka̱ʼa̱nra xíʼinna: “Ndióxi̱ ta̱xi chiñu ndaʼíi̱ ña̱ kiʼi̱n kuenta xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo”. Ta saátu ni̱ka̱ʼa̱nkara ña̱yóʼo: “Kúáʼanndó nu̱ú ndiʼi na̱ yiví ña̱ iníísaá ñuyǐví ta sanáʼa̱ndóna ña̱ ná kundiku̱nna yi̱ʼi̱” (Mat. 28:18, 19). Xíʼin ña̱yóʼo kúnda̱a̱-iniyó ña̱ mií ta̱ Jesús kúú ta̱ kíʼin kuenta xíʼin ña̱ predicación.
4. ¿Nda̱chun kándíxayó ña̱ kíʼin ta̱ Jesús kuenta xíʼin ña̱ predicación nda̱a̱ tiempo vitin?
4 Ta̱ Jesús ni̱ka̱ʼa̱nra ña̱ natúʼunyó xa̱ʼa̱ Ndióxi̱ xíʼin ndiʼi na̱ yiví ta sanáʼa̱yóna ña̱ kundiku̱nnara, ta ni̱ka̱ʼa̱ntura ña̱ koora xíʼinyó “nda̱a̱ ná ndiʼi-xa̱ʼa̱ ñuyǐví” (Mat. 28:20). Xíʼin tu̱ʼun ña̱ ni̱ka̱ʼa̱nra yóʼo, kúnda̱a̱-iniyó ña̱ kíʼinra kuenta xíʼin ña̱ predicación nda̱a̱ tiempo vitin.
5. ¿Ndáa ki̱ʼva sáxi̱nuyó ña̱ káʼa̱n Salmo 110:3?
5 Ta̱ Jesús xi̱kunda̱a̱-inira ña̱ tiempo nu̱ú ndíʼi vitin, koo ku̱a̱ʼání na̱ natúʼun xa̱ʼa̱ Ndióxi̱. Xi̱kunda̱a̱-inira ña̱ xi̱nu ña̱ káʼa̱n profecía yóʼo: “Ki̱vi̱ tá ná kitaún ku̱ʼún kanitáʼún, na̱ ñuún kuni̱na chindeétáʼanna xíʼún” (Sal. 110:3). Tá nátúʼún tu̱ʼun va̱ʼa xa̱ʼa̱ Reino Ndióxi̱, chíndeétáʼún xíʼin ta̱ Jesús ta saátu xíʼin ta̱ “esclavo ta̱ nda̱kúní-ini ta̱ ndíchiní”, tasaá kúú ña̱ sáxi̱nún ña̱ káʼa̱n salmo yóʼo. Xa̱a̱ nátúʼunvayó xa̱ʼa̱ Ndióxi̱, soo íyo sava ña̱ íxayo̱ʼvi̱ xíʼinyó.
6. ¿Ndáaña kúú iin ña̱ íxayo̱ʼvi̱ xíʼinyó?
6 Ña̱ íxayo̱ʼvi̱ xíʼinyó ndasakáʼnuyó Ndióxi̱ kúú ña̱ kéʼé na̱ apóstata, na̱ político xíʼin na̱ níʼi yichi̱ nu̱ú na̱ veʼe-ñu̱ʼu, saáchi káʼa̱nna ku̱a̱ʼání ña̱ vatá xa̱ʼa̱ na̱ ñuu Ndióxi̱ ta sásina nu̱úyó ña̱ ndasakáʼnuyó Ndióxi̱. Tá na̱ veʼeyó, na̱ migoyó ta saátu na̱ káchíñu xíʼinyó kándíxana ña̱ vatá yóʼo, kivi kixáʼana ka̱ʼa̱nna xíʼinyó ña̱ ná sandákooyó ña̱ ndasakáʼnuyó Jehová ta saátu ña̱ natúʼunyó xíʼin na̱ yiví xa̱ʼa̱ra. Sava país, na̱ sáa̱-ini xíni miíyó íxandi̱va̱ʼana xíʼin na̱ hermanoyó ta nda̱a̱ chíka̱a̱na na̱yóʼo veʼeka̱a. Ta va̱ása ndákanda̱-iniyó xíʼin ña̱yóʼo saáchi ta̱ Jesús ni̱ka̱ʼa̱nra: “Sa̱a̱-inina kunina ndóʼó xa̱ʼa̱ ña̱ kándíxandó yi̱ʼi̱” (Mat. 24:9). Xa̱ʼa̱ ña̱ sáa̱-inina xínina miíyó, kúnda̱a̱-iniyó ña̱ ndíku̱nyó yichi̱ ta̱ Jesús ta kúsi̱íva-ini Jehová xíʼin ña̱ kéʼéyó (Mat. 5:11, 12). Ta̱ Ndi̱va̱ʼa kúú ta̱ chíka̱a̱-ini na̱ yiví ña̱ kasina nu̱úyó ta ixandi̱va̱ʼana xíʼinyó, soo va̱ása kuchiñura chi ndakúníkava ta̱ Jesús nu̱úra. Ta xa̱ʼa̱ ña̱ chíndeétáʼan ta̱ Jesús xíʼinyó, xa̱a̱ iníísaá ñuyǐví nátúʼunyó tu̱ʼun va̱ʼa ña̱ káʼa̱n xa̱ʼa̱ Reino Ndióxi̱ xíʼin na̱ yiví.
7. ¿Ndáaña náʼa̱ nu̱úyó ña̱ xa̱a̱ ku̱a̱ʼa̱n xínu ña̱ káʼa̱n Apocalipsis 14:6, 7?
7 Inka ña̱ íxayo̱ʼvi̱ xíʼinyó kúú ña̱ ku̱a̱ʼání nu̱ú tu̱ʼun káʼa̱n na̱ yiví. Nu̱ú visión ña̱ ta̱xi ta̱ Jesús xi̱ni ta̱ apóstol Juan, ni̱ka̱ʼa̱nra ña̱ va̱ása kasi ña̱yóʼo nu̱úyó ña̱ natúʼunyó tu̱ʼun va̱ʼa xa̱ʼa̱ Reino Ndióxi̱ (kaʼvi Apocalipsis 14:6, 7). Ta, ¿ndáaña xa̱a̱ kéʼéyó ña̱ va̱ʼa natúʼunyó xa̱ʼa̱ Ndióxi̱ xíʼin na̱ yiví na̱ káʼa̱n inka nu̱ú tu̱ʼun? Kúúmiíyó iin sitio nu̱ú Internet ña̱ naní jw.org ta yóʼo kána ku̱a̱ʼání tutu ña̱ káʼa̱n xa̱ʼa̱ Biblia, ta xa̱a̱ yáʼaka 1,000 nu̱ú tu̱ʼun íyoña. Ta saátu, na̱ Cuerpo Gobernante ta̱xina ña̱ ná sandáya̱ʼana libro ña̱ naní Kivi koo si̱íún vitin ta saátu chí nu̱únínu nu̱ú ku̱a̱ʼání tu̱ʼun, ta xa̱a̱ yáʼaka 700 nu̱ú tu̱ʼun távána tutu yóʼo ta ña̱yóʼo kúú ña̱ xíniñúʼuyó ña̱ sanáʼa̱yó na̱ yiví xa̱ʼa̱ Ndióxi̱. Ta saátu íyo video ña̱ kivi koto na̱ sóʼó ta saátu tutu ña̱ íyo tu̱ʼun braille ña̱ kivi kaʼvi na̱ kúáa. Xa̱ʼa̱ ña̱yóʼo, ku̱a̱ʼáníka na̱ yiví kúnda̱a̱-ini xa̱ʼa̱ tu̱ʼun va̱ʼa ña̱ káʼa̱n xa̱ʼa̱ Reino Ndióxi̱. Kúnda̱a̱ káxi iniyó ña̱ xínu profecía yóʼo tiempo vitin, saáchi ndiʼi na̱ yiví na̱ káʼa̱n inka tu̱ʼun ki̱xáʼana sákuaʼana xa̱ʼa̱ ña̱ nda̱a̱ ña̱ va̱xi nu̱ú Biblia (Zac. 8:23; Sof. 3:9). Ta ndiʼi ña̱yóʼo xínuña xa̱ʼa̱ ña̱ va̱ʼaní níʼi ta̱ Jesucristo yichi̱ nu̱úyó.
8. ¿Ndáaña kúu xa̱ʼa̱ ña̱ nátúʼunyó xíʼin na̱ yiví nda̱a̱ tiempo vitin?
8 Tiempo vitin, xa̱a̱ yáʼaka 8 millón na̱ yiví na̱ íyo nu̱ú 240 país xíʼin ñuu válí kúúna táʼan na̱ ñuu Jehová. Ta ndiʼi ku̱i̱ya̱ ku̱a̱ʼání na̱ yiví ndákuchina, ta iin ña̱ va̱ʼaní kúú ña̱yóʼo, soo iin ña̱ ndáyáʼviníka kúú ña̱ násamana ña̱ kéʼéna ta kíxáʼana kéʼéna ña̱ va̱ʼa (Col. 3:8-10). Ku̱a̱ʼání na̱yóʼo va̱ása kéʼékana ku̱a̱chi kini, va̱ása kánitáʼankana, kǒo káʼa̱nna ña̱ va̱ása va̱ʼa xa̱ʼa̱ inkana ta va̱ása káʼa̱nna ña̱ ndáyáʼvika ñuuna nu̱ú inkana. Xa̱a̱ ku̱a̱ʼa̱n xínu profecía ña̱ káʼa̱n Isaías 2:4, ña̱ kǒoka guerra koo. Ña̱kán xa̱ʼa̱ ña̱ chíka̱a̱níyó ndee̱ ña̱ nasamayó ki̱ʼva ña̱ kéʼéyó, chíndeétáʼanyó xíʼin na̱ yiví ña̱ kuni̱na kuyatinna nu̱ú na̱ ñuu Ndióxi̱ tasaá náʼa̱yó ña̱ ndíku̱nyó ta̱ Jesucristo ta̱ níʼi yichi̱ nu̱úyó (Juan 13:35; 1 Ped. 2:12). Ta va̱ʼa kéʼéyó ndiʼi ña̱yóʼo chi ta̱ Jesús kúú ta̱ chíndeétáʼan xíʼinyó.
TA̱ JESÚS NDA̱KAXINRA IIN TA̱ KOO ESCLAVO
9. Nda̱a̱ táki̱ʼva káchi Mateo 24:45-47, ¿ndáaña ni̱ka̱ʼa̱n ta̱ Jesús kuu tiempo nu̱ú ndíʼi?
9 (Kaʼvi Mateo 24:45-47). Ta̱ Jesús ni̱ka̱ʼa̱nra ña̱ tiempo nu̱ú ndíʼi vitin, taxira chiñu ndaʼa̱ ta̱ “esclavo ta̱ nda̱kúní-ini ta̱ ndíchiní” ña̱ taxira ña̱ xíniñúʼuyó ña̱ sakúaʼayó xa̱ʼa̱ Ndióxi̱. Xa̱ʼa̱ ña̱kán, ndeéní káchíñu ta̱ esclavo yóʼo tiempo vitin. Ta̱ Jesús xíniñúʼura iin tiʼvi loʼo na̱ hermano na̱ ku̱ʼu̱n chí ndiví ña̱ taxina ña̱ xíniñúʼuyó mií tiempo ña̱ xíniñúʼuyóña, ta saátu taxina ña̱ xíniñúʼu na̱ yiví na̱ kúni̱ sakúaʼa xa̱ʼa̱ Ndióxi̱. Ta na̱yóʼo chíndeétáʼanna xíʼinyó ña̱ kandíxakayó Ndióxi̱ (2 Cor. 1:24). Ta ndákunina ña̱ mií ta̱ Jesucristo kúú ta̱ níʼi yichi̱ nu̱ú na̱ ñuu Ndióxi̱ (Is. 55:4).
10. ¿Ndáa libro kúú ña̱ chi̱ndeétáʼan xíʼún ña̱ sa̱kuaʼún xa̱ʼa̱ Ndióxi̱?
10 Nda̱a̱ tá ku̱i̱ya̱ 1919, ta̱ esclavo ta̱ nda̱kúní-ini távára ku̱a̱ʼání tutu ña̱ kivi chindeétáʼan xíʼin na̱ yiví ña̱ sakúaʼana ña̱ nda̱a̱ xa̱ʼa̱ Ndióxi̱. Tá ku̱i̱ya̱ 1921, ka̱na libro ña̱ naní El Arpa de Dios tu̱ʼun inglés ña̱ va̱ʼa sakúaʼa na̱ yiví ña̱ nda̱a̱ xa̱ʼa̱ Ndióxi̱. Tá ni̱ya̱ʼa tiempo ki̱xáʼa kána inkaka libro. ¿Ndáa libro kúú ña̱ chi̱ndeétáʼan xíʼún ña̱ ni̱xa̱ún ku̱nda̱a̱-iniún xa̱ʼa̱ Ndióxi̱ ta kuʼvi̱-iniún kuniúnra? Sana iin libro yóʼo kúú ña̱ chi̱ndeétáʼan xíʼún: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Ndáaña kúú míí ña̱ ndixa sánáʼa̱ Biblia? á ¿Ndáaña sánáʼa̱ Biblia miíyó? Á sanatu káʼviún libro ña̱ naní Kivi koo si̱íún vitin ta saátu chí nu̱únínu. Libro yóʼo ka̱naña ña̱ va̱ʼa chindeétáʼanña xíʼinyó ña̱ sanáʼa̱yó na̱ yiví ña̱ kundiku̱nna ta̱ Jesús, ta ka̱naña mií tiempo ña̱ xíniñúʼuyóña.
11. ¿Nda̱chun ndáyáʼviní taxina ña̱ xíniñúʼuyó ña̱ va̱ʼa sakúaʼayó xa̱ʼa̱ Ndióxi̱?
11 Su̱ví nda̱saa kuití na̱ káʼviyó xíʼin kúú na̱ xíniñúʼu sakúaʼa va̱ʼa xa̱ʼa̱ Ndióxi̱ chi saátu xíniñúʼu keʼé ndiʼi miívayó. Ta̱ apóstol Pablo ka̱ʼyíra: “Na̱ yiví na̱ xa̱a̱ xu̱xa, ña̱ʼa ña̱ téʼé kúú ña̱ xíxina”. Ta saátu ni̱ka̱ʼa̱nra ña̱ tá kéʼéyó ña̱ sákuaʼayó, chindeétáʼanña xíʼinyó ña̱ ndakuniyó “ndáaña kúú ña̱ va̱ʼa ta ndáaña kúú ña̱ va̱ása va̱ʼa” (Heb. 5:14). Xa̱ʼa̱ ña̱ kéʼé ku̱a̱ʼání na̱ yiví ku̱a̱chi kini, kivi ixayo̱ʼvi̱ña xíʼinyó ña̱ kandíxayó ña̱ káʼa̱n Jehová xíʼinyó. Soo ta̱ Jesús táxira ku̱a̱ʼání ña̱ chíndeétáʼan xíʼinyó ña̱ kandíxakayó Ndióxi̱ ta ña̱yóʼo nu̱ú Biblia va̱xiña. Ta̱ esclavo ta̱ nda̱kúní-ini kúú ta̱ táxi ndiʼi ña̱yóʼo ndaʼa̱yó ta ta̱ Jesús kúú ta̱ níʼi yichi̱ nu̱úra.
12. ¿Ndáa ki̱ʼva náʼa̱yó ña̱ íxato̱ʼóyó ki̱vi̱ Ndióxi̱ nda̱a̱ táki̱ʼva ke̱ʼé ta̱ Jesús?
12 Nda̱a̱ táki̱ʼva ke̱ʼé ta̱ Jesús, saátu miíyó íxato̱ʼóníyó ki̱vi̱ Ndióxi̱ (Juan 17:6, 26). Tá kúú, ku̱i̱ya̱ 1931 nda̱kunaníyó testigo Jehová ta ña̱yóʼo nu̱ú Biblia ka̱naña. Tá nda̱kiʼinyó ki̱vi̱ yóʼo, ni̱na̱ʼa̱yó ña̱ kúni̱yó kuumiíyó ki̱vi̱ yiváyó ta̱ íyo chí ndiví saáchi ndáyáʼviní ña̱yóʼo nu̱úyó (Is. 43:10-12). Tá octubre ña̱ ku̱i̱ya̱ 1931 ki̱xáʼa kána ki̱vi̱ Ndióxi̱ chí portada á chí sa̱tá tutu La Atalaya tu̱ʼun inglés. Ta saátu nu̱ú ña̱ Traducción del Nuevo Mundo, va̱xi ki̱vi̱ Ndióxi̱ nu̱ú xíniñúʼu kixiña. Ta na̱ veʼe-ñu̱ʼu vatá va̱ása kéʼéna ña̱yóʼo chi na̱yóʼo sáku̱taʼana ki̱vi̱ Jehová nu̱ú Biblia ña̱ kúúmiína.
TA̱ JESÚS VA̱ʼANÍ NÍʼIRA YICHI̱ NU̱Ú NA̱ NDÍKU̱N MIÍRA
13. ¿Nda̱chun kándíxaún ña̱ mií ta̱ Jesús kúú ta̱ níʼi yichi̱ nu̱ú ta̱ “esclavo ta̱ nda̱kúní-ini ta̱ ndíchiní”? (Juan 6:68).
13 Ta̱ Jesús xíniñúʼura ta̱ “esclavo ta̱ nda̱kúní-ini ta̱ ndíchiní”, ña̱ va̱ʼa chindeétáʼanra xíʼin na̱ ñuu Ndióxi̱ ña̱ keʼéna chiñura nu̱ú ñuʼú yóʼo tasaá ndukáʼnu iinlá mií Ndióxi̱ ta̱ nda̱a̱. ¿Ndáaña ndákanixi̱níún xa̱ʼa̱ na̱ ñuu Ndióxi̱? Sana ndóʼún nda̱a̱ táki̱ʼva ndo̱ʼo ta̱ Pedro tá ni̱ka̱ʼa̱nra xíʼin ta̱ Jesús: “¿Ndáana ku̱ʼu̱nndi̱ nu̱ú? Yóʼó níʼi tu̱ʼun ña̱ taxi kutakuna ndiʼi tiempo” (Juan 6:68). Tá kǒo níkunda̱a̱-iniyó xa̱ʼa̱ na̱ ñuu Jehová, ¿ndáaña kéʼévíyó vitin? Ta̱ Jesús xíniñúʼura ta̱ “esclavo ta̱ nda̱kúní-ini ta̱ ndíchiní” ña̱ taxira ndiʼi ña̱ xíniñúʼuyó ña̱ sakúaʼayó xa̱ʼa̱ Jehová ta saátu sánáʼa̱ra miíyó ña̱ va̱ʼaníka sanáʼa̱yó na̱ yiví. Saátu chíndeétáʼan na̱ ñuu Ndióxi̱ xíʼinyó ña̱ nasamayó ña̱ kéʼéyó tasaá va̱ʼa sakúsi̱íyó-ini Jehová (Efes. 4:24).
14. ¿Ndáa ki̱ʼva chíndeétáʼan na̱ ñuu Ndióxi̱ xíʼún xa̱ʼa̱ ña̱ ndíka̱a̱ ña̱ coronavirus?
14 Tá yáʼayó nu̱ú tu̱ndóʼo, viíní níʼi ta̱ Jesús yichi̱ nu̱úyó. Ta ki̱ʼinyó kuenta ña̱ saá íyo ña̱ ke̱ʼera tá ki̱xáʼa ña̱ coronavirus. Iníísaá ñuyǐví kǒo níkunda̱a̱-ini na̱ yiví ndáaña keʼéna, soo ta̱ Jesús va̱ʼaní xi̱niʼira yichi̱ nu̱úyó tasaá ku̱nda̱a̱-iniyó ndáaña keʼéyó ña̱ va̱ʼa kundaayó miíyó. Tá kúú ni̱ka̱ʼa̱nna xíʼinyó ña̱ ná kuniñúʼuyó cubreboca tá ku̱a̱ʼa̱nyó nu̱ú íyo ku̱a̱ʼá na̱ yiví ta saátu ña̱ ná va̱ása kuyatinníyó nu̱úna á ña̱ kuxíkáyó nu̱úna. Saátu ni̱ka̱ʼa̱nna xíʼin na̱ anciano ña̱ ná kiʼinnína kuenta xíʼin na̱ publicador ta ná kundi̱ʼi̱-inina xa̱ʼa̱ ña̱ xíniñúʼuna ta saátu ná chindeétáʼanna xíʼinna ña̱ va̱ʼa sakúaʼana xa̱ʼa̱ Ndióxi̱ (Is. 32:1, 2). Ta nu̱ú ña̱ informe na̱ Cuerpo Gobernante káʼa̱nna xíʼinyó ndáaña xíniñúʼu keʼéyó ña̱ va̱ʼa kundaayó miíyó ta saátu va̱ʼaní chíka̱a̱na ndee̱ xíʼinyó.
15. ¿Ndáa inkaka ña̱ ni̱ka̱ʼa̱nna xíʼinyó keʼéyó xa̱ʼa̱ ña̱ ndíka̱a̱ coronavirus, ta ndáaña va̱ʼa ndákiʼinyó xa̱ʼa̱ ña̱yóʼo?
15 Tá ki̱xáʼa ña̱ coronavirus, ni̱ka̱ʼa̱nna xíʼinyó ndáa ki̱ʼva koo reunión ta saátu predicación. Tasaá ndi̱ku̱n ki̱xáʼayó xíniñúʼuyó videollamada ña̱ va̱ʼa kuumiíyó reunión xíʼin asamblea. Ta saátu ki̱xáʼayó kéʼéyó carta xíʼin llamada ña̱ natúʼunyó xa̱ʼa̱ Ndióxi̱, ta ku̱a̱ʼání ña̱ va̱ʼa táxi Jehová ndaʼa̱yó xa̱ʼa̱ ña̱ kéʼéyó ña̱yóʼo. Ku̱a̱ʼání na̱ sucursal káʼa̱nna ña̱ ku̱a̱ʼáníka ku̱a̱ʼa̱n ndúu na̱ publicador tiempo vitin. Ta saátu ku̱a̱ʼání na̱ hermano nátúʼunna ndáaña va̱ʼa xa̱a̱ ndákiʼinna xa̱ʼa̱ ña̱yóʼo, ta ña̱yóʼo chíka̱a̱níña ndee̱ xíʼinyó (koto recuadro ña̱ naní “ Jehová chíndeétáʼanra xíʼinyó ña̱ nátúʼunyó xa̱ʼa̱ra”).
16. ¿Ndáaña kándíxayó?
16 Sana sava na̱ hermano ndákanixi̱nína ña̱ ku̱a̱ʼání ña̱ káʼa̱n na̱ ñuu Ndióxi̱ xíʼinyó keʼéyó xa̱ʼa̱ ña̱ ndíka̱a̱ kue̱ʼe̱ yóʼo. Soo xa̱a̱ ku̱a̱ʼání yichi̱ kíʼinyó kuenta ña̱ va̱ʼaníva íyo ña̱ káʼa̱nna xíʼinyó keʼéyó (Mat. 11:19). Tá ná ndakanixi̱níyó xa̱ʼa̱ ña̱ viíní níʼi ta̱ Jesús yichi̱ nu̱úyó, kivi kandíxayó ña̱ ni nda̱a̱ ndáaka ña̱ ná kuu chí nu̱únínu, Jehová xíʼin se̱ʼera chindeétáʼanvana xíʼinyó (kaʼvi Hebreos 13:5, 6).
17. ¿Ndáa ki̱ʼva kúniún xa̱ʼa̱ ña̱ níʼi ta̱ Jesús yichi̱ nu̱ún?
17 Kúsi̱íní-iniyó xa̱ʼa̱ ña̱ níʼi ta̱ Jesús yichi̱ nu̱úyó. Ti̱xin ñuu Ndióxi̱, kǒo na̱ ndákanixi̱ní ña̱ ndáyáʼvikana nu̱ú inkana, ta ndiʼiyó va̱ʼaní kítáʼanyó ni xa̱a̱ síín tu̱ʼun káʼa̱nyó á xa̱a̱ síín costumbre kúúmiíyó. Íyo ndiʼi ña̱ xíniñúʼuyó ña̱ sákuaʼayó xa̱ʼa̱ Ndióxi̱ ta saátu íyo ndiʼi ña̱ xíniñúʼuyó ña̱ natúʼunyó xa̱ʼa̱ra. Ta iin tá iinyó chíka̱a̱yó ndee̱ ña̱ nasamayó ña̱ kéʼéyó ta saátu chíka̱a̱yó ndee̱ ña̱ kuʼvi̱-iniyó kuniyó inkana. Kúsi̱íní-iniyó xa̱ʼa̱ ña̱ viíní níʼi ta̱ Jesús yichi̱ nu̱úyó.
YAA 16 Ná ndasakáʼnuyó Jehová xa̱ʼa se̱ʼera
^ Tiempo vitin, ku̱a̱ʼání na̱ ta̱a, ná ñaʼá xíʼin na̱ va̱lí kúsi̱íní-inina nátúʼunna tu̱ʼun va̱ʼa ña̱ káʼa̱n xa̱ʼa̱ Reino Ndióxi̱. ¿Á kéʼún ña̱yóʼo? Tá saá íyoña, táxiún ña̱ níʼi ta̱ Jesucristo yichi̱ nu̱ún. Nu̱ú artículo yóʼo sakúaʼayó ña̱ mií ta̱ Jesús kúú ta̱ kíʼin kuenta xíʼin ña̱ predicación tiempo vitin. Tá ná ndakanixi̱níyó xa̱ʼa̱ ña̱yóʼo, kuni̱kayó kachíñuyó nu̱ú Jehová ta taxiyó ña̱ kuniʼi ta̱ Jesús yichi̱ nu̱úyó.