Ta̱ Jesús ni̱ka̱ʼa̱nra ña̱ xíniñúʼu viíní kutáʼanyó xíʼin inkana. Iin yichi̱ ni̱ka̱ʼa̱nra xíʼin na̱ apóstolra: “Va̱ása ndakanixi̱níndó ña̱ ki̱xai̱ ña̱ va̱ʼa viíní kutáʼan ndiʼi na̱ yiví, chi ki̱xai̱ xíʼin iin espada ta xa̱ʼa̱ ña̱yóʼo ndiʼi na̱ yiví xa̱a̱ síín ndakanixi̱nína xa̱ʼíi̱. Saáchi va̱xii̱ ña̱ ndataʼvíi̱ na̱ yiví. Iin ta̱ loʼo koora contra yivára, ta iin ñá loʼo kooñá contra siʼíñá, ta ñá íyo si̱so kooñá contra ñá si̱soñá” (Mat. 10:34, 35). ¿Ndáaña kúni̱ kachi ña̱yóʼo?

Ta̱ Jesús va̱ása níxikuni̱ra ndataʼvíra na̱ familia, soo xi̱kunda̱a̱va-inira ña̱ sava yichi̱ kundoʼona ña̱yóʼo xa̱ʼa̱ ña̱ sa̱náʼa̱ra. Ta na̱ kúni̱ koo discípulo ta̱ Jesús xíniñúʼu kunda̱a̱-inina ña̱ sana na̱ veʼena va̱ása kutóona ña̱yóʼo. Tá na̱ ti̱ndaʼa̱ xíʼinna á inka na̱ veʼena sásina nu̱úna ña̱ ndasakáʼnuna Ndióxi̱, sana ixayo̱ʼvi̱ña xíʼinna ña̱ kundiku̱nna yichi̱ ta̱ Cristo.

Biblia káʼa̱nña xíʼin na̱ ndásakáʼnu Ndióxi̱: “Vií kutáʼanndó xíʼin ndiʼi na̱ yiví” (Rom. 12:18). Soo ña̱ sa̱náʼa̱ ta̱ Jesús nda̱a̱ táki̱ʼva íyo iin espada saá íyoña nu̱ú inkana. Ta ña̱yóʼo xínu nu̱úña tá iinna kíxáʼana ndíku̱nna ña̱ sa̱náʼa̱ ta̱ Jesús, ta inkana kǒo kútóona sakúaʼana xa̱ʼa̱ ña̱yóʼo, ta nda̱a̱ sásina nu̱úna ña̱ kundiku̱nna ta̱ Jesús. Ta mií na̱ veʼena kúú na̱ kíxáʼa sáa̱-ini xíniñaʼá xa̱ʼa̱ ña̱ sákuaʼana xa̱ʼa̱ Ndióxi̱ (Mat. 10:36).

Sava na̱ ndásakáʼnu Ndióxi̱ íyona xíʼin na̱ veʼena na̱ kúúmií inka religión. Xa̱ʼa̱ ña̱yóʼo sava yichi̱ íxayo̱ʼvi̱ña xíʼinna ña̱ na̱ʼa̱na ña̱ kúʼvi̱-inina xínina Jehová xíʼin ta̱ Jesús. Sana na̱ veʼena íxandúxana xíʼinna ña̱ keʼéna vikó ña̱ kéʼé na̱ veʼe-ñu̱ʼu vatá. Saá kúú ña̱ xíniñúʼu na̱ʼa̱na ndáana kúni̱na sakúsi̱ína-ini. Ta̱ Jesús ni̱ka̱ʼa̱nra: “Na̱ kúʼvi̱níka-ini xíni yivána á siʼína nu̱úka yi̱ʼi̱ va̱ása kivi xa̱a̱na koona discípuloi̱” (Mat. 10:37). Ta̱ Jesús va̱ása níxikuni̱ kachira ña̱ tá iinna kúni̱na xa̱a̱na koona discípulora va̱ása xíniñúʼu kuʼvi̱-inina kunina na̱ yivána. Chi ña̱ xi̱kuni̱ra kachira kúú ña̱ ná kunda̱a̱-inina ndáaña kúú ña̱ ndáyáʼvika. Tá iin na̱ veʼeyó na̱ va̱ása kúú testigo Jehová, va̱ása kúni̱na ña̱ ndasakáʼnuyóra, soo ni kúʼvi̱va-iniyó xíniyó na̱yóʼo, soo kúnda̱a̱-iniyó ña̱ ndáyáʼvika kúú ña̱ kuʼvi̱-iniyó kuniyó Ndióxi̱.

Tá va̱ása xíín na̱ veʼeyó taxina ndasakáʼnuyó Ndióxi̱ xóʼvi̱ní-iniyó xíʼin ña̱yóʼo. Soo ná ndákaʼányó xa̱ʼa̱ ña̱ ni̱ka̱ʼa̱n ta̱ Jesús tá ka̱chira: “Na̱ va̱ása xíín kundiku̱n yi̱ʼi̱ ta kundisona yitu̱n tú sáxo̱ʼvi̱ miína va̱ása kivi xa̱a̱na koona discípuloi̱” (Mat. 10:38). Miíyó na̱ ndásakáʼnu Ndióxi̱ kúnda̱a̱-iniyó, ña̱ kundiku̱nyó ta̱ Jesús xo̱ʼvi̱vayó chi kivi kasi na̱ veʼeyó nu̱úyó ña̱ ndasakáʼnuyó Ndióxi̱. Ta tá chíka̱a̱yó ndee̱ ña̱ vií ná koo ña̱ keʼéyó, sana ña̱yóʼo chindeétáʼanña xíʼin na̱ veʼeyó ña̱ nasamana ña̱ ndákanixi̱nína ta kuni̱na sakúaʼana xa̱ʼa̱ Ndióxi̱ (1 Ped. 3:1, 2).