Anciano ni̱xi̱yo yivái̱ ti̱xin iin veʼe-ñu̱ʼu ña̱ naní Unida de Canadá. Ndiʼi domingo xi̱ta̱an xi̱chindaʼá yivái̱ miíi̱ xíʼin iin ku̱ʼvai̱ ña̱ ku̱ʼu̱ndi̱ iin lugar ña̱ sakúaʼandi̱ xa̱ʼa̱ Biblia. Ta ka̱a u̱xu̱ iin mií ki̱vi̱ kán xi̱xa̱ʼa̱nndi̱ xíʼin yivándi̱ veʼe-ñu̱ʼu nu̱ú xi̱xa̱ʼa̱nra. Soo tá xi̱ku̱aá xi̱xa̱ʼa̱nndi̱ xíʼin siʼíndi̱ nu̱ú xi̱ndakutáʼan na̱ testigo Jehová. Ta xa̱ʼa̱ na̱kán ki̱ʼi̱nndi̱ kuenta ña̱ síín sánáʼa̱ na̱ veʼe-ñu̱ʼu nu̱ú xi̱xaʼa̱n yivándi̱ ta síín sánáʼa̱na nu̱ú xi̱xaʼa̱n siʼíndi̱.

Va̱ʼaní xi̱kitáʼan siʼíi̱ xíʼin ta̱ Bob xíʼin ñá Marion Hutcheson, ña̱kán na̱túʼunñá xíʼinna xa̱ʼa̱ Ndióxi̱, ta saátu na̱yóʼo ni̱xa̱a̱na ndu̱una testigo Jehová. Ku̱i̱ya̱ 1958 ta̱ Bob xíʼin ñá Marion Hutcheson ni̱xa̱ʼa̱nna Asamblea Internacional ña̱ xi̱naní “Voluntad Divina” ta nda̱a̱ yi̱ʼi̱ ni̱xa̱ʼa̱n xíʼinna xíʼin u̱ni̱ se̱ʼena, ta sana i̱xayo̱ʼvi̱vaña xíʼinna soo tíxa̱ʼvi na̱yóʼo ku̱a̱ʼání ña̱ʼa sa̱kúaʼi̱ ki̱vi̱ saá, ta u̱na̱ ki̱vi̱ ni̱xi̱yo asamblea chí ñuu Nueva York.

Tá ni̱xi̱yo loʼi̱ ni̱xi̱yoi̱ iin ñuu loʼo nu̱ú ni̱xi̱yo ku̱a̱ʼání kití ta xi̱kutóoníi̱ kundai̱ tíyóʼo. Xa̱ʼa̱ ña̱kán xi̱kunii̱ koi̱ Veterinario, soo siʼíi̱ na̱túʼunñá xíʼin iin ta̱ anciano xa̱ʼa̱ ña̱ xi̱kuni̱i̱ keʼíi̱. Ta̱kán sa̱ndákaʼánra yi̱ʼi̱ ña̱ íyoyó tiempo nu̱ú ndíʼi, ta ni̱ka̱ʼa̱nra xíʼi̱n ña̱ sana kuxíkái̱ nu̱ú Jehová tá ná ku̱ʼi̱n kaʼvii̱ ña̱ universidad saáchi ku̱a̱ʼá ku̱i̱ya̱ kaʼvii̱ kán (2 Tim. 3:1). Nda̱kaniníxi̱níi̱  xa̱ʼa̱ ña̱ ni̱ka̱ʼa̱nra xíʼi̱n tasaá kǒo níxa̱ʼa̱nkai̱ universidad.

Kǒo níxikunda̱a̱-inii̱ ndáaña keʼíi̱ tá ná sandíʼi̱ kaʼvii̱ secundaria. Ndiʼi sábado xíʼin domingo xi̱xaʼi̱n xi̱natúʼi̱n xíʼin na̱ yiví xa̱ʼa̱ Ndióxi̱, soo kǒo níxi̱kutói̱ keʼíi̱ ña̱yóʼo, ta saátu kǒo níxi̱kutói̱ koi̱ precursor. Yivái̱ xíʼin xitoi̱ va̱ása níxi̱kuuna testigo Jehová, xa̱ʼa̱ ña̱kán xi̱kuni̱na ña̱ ná kachiñui̱ ndiʼi tiempo ti̱xin iin empresa ña̱ íyo chí Toronto. Xitoi̱ xi̱kuumiíra iin chiñu ña̱ va̱ʼaní ti̱xin empresa kán, ta nda̱a̱ yi̱ʼi̱ ki̱xáʼa káchíñu kán.

Ndiʼi ki̱vi̱ xi̱kachíñui̱ lugar kán ta nda̱a̱ ñuú xi̱kitai̱, ta saátu xi̱kitáʼi̱n xíʼin na̱ yiví na̱ kǒo níxindasakáʼnu Jehová. Xa̱ʼa̱ ña̱yóʼo va̱ása viíka níxi̱kachíñui̱ nu̱ú Jehová. Tiempo saá ni̱xi̱yoi̱ xíʼin xi̱íi̱, soo ta̱yóʼo va̱ása níxi̱yora testigo Jehová, ta tá ni̱xi̱ʼi̱ra xi̱niñúʼu ndukúi̱ veʼe nu̱ú koi̱.

Ta̱ Bob xíʼin ñá Marion na̱ ni̱xa̱ʼi̱n xíʼin iin asamblea ku̱i̱ya̱ 1958, nda̱a̱ táki̱ʼva ni̱xi̱yo na̱ veʼi̱ saá ni̱xi̱yona. Ni̱ka̱ʼa̱nna xíʼi̱n ña̱ ku̱ʼi̱n koi̱ xíʼinna, ta va̱ʼaní chi̱ndeétáʼanna xíʼi̱n ña̱ sakúaʼakai̱ xa̱ʼa̱ Ndióxi̱. Ku̱i̱ya̱ 1960 inkáchi ndakuchii̱ xíʼin se̱ʼena ta̱ John. Ta xa̱ʼa̱ ña̱ ndu̱u ta̱yóʼo precursor regular nda̱a̱ yi̱ʼi̱ ki̱xáʼa chíkaa̱ka nde̱e̱ ña̱ natúʼi̱n xa̱ʼa̱ Ndióxi̱. Tá ni̱ya̱ʼa tiempo ki̱ʼin na̱ hermano kuenta ña̱ chíkaa̱níi̱ ndee̱ ña̱ káchíñui̱ nu̱ú Ndióxi̱, xa̱ʼa̱ ña̱kán ta̱xina ña̱ koi̱ siervo ti̱xin Escuela del Ministerio Teocrático. a

Ku̱i̱ya̱ 1966 ti̱ndaʼíi̱ xíʼin iin ñá precursora ñá naní Randi Berge, ñáyóʼo xi̱kutóoníñá chindeétáʼanñá xíʼin congregación nu̱ú xi̱kuma̱ní na̱ natúʼun xa̱ʼa̱ Ndióxi̱. Ta̱ superintendente ña̱ circuito ni̱ka̱ʼa̱nra xíʼinndi̱ ña̱ ná ku̱ʼu̱nndi̱ chindeétáʼanndi̱ xíʼin congregación ña̱ Orillia (Ontario). Ta̱án va̱ʼandi̱ ndiʼi ña̱ʼa ña̱ xi̱kuumiíndi̱ ta nda̱kiʼinndi̱ ku̱a̱ʼa̱nndi̱.

Xa̱ʼa̱ ña̱ xi̱kutóoní ñá Randi sanáʼa̱ñá na̱ yiví, ña̱yóʼo chi̱ndeétáʼanníña xíʼi̱n ña̱ ni̱xa̱i̱ ku̱i̱ precursor tá sa̱kán ni̱xaa̱ndi̱ chí Orillia. Xa̱ʼa̱ ña̱ chi̱ndeéi̱ na̱ yiví ña̱ sakúaʼana ña̱ nda̱a̱ xa̱ʼa̱ Jehová, ña̱yóʼo sa̱kúsi̱íníña inii̱. Ni̱kusi̱íní-inindi̱ ña̱ chi̱ndeétáʼanndi̱  xíʼin iin matrimonio na̱ ni̱xi̱yo chí Orillia ña̱ ni̱xaa̱na sa̱kúaʼana xa̱ʼa̱ Ndióxi̱ ta nda̱kuchina.

Iin yichi̱ tá ni̱xa̱ʼi̱n Toronto saá xi̱nitáʼi̱n xíʼin ta̱ hermano Arnold MacNamara, ta̱yóʼo xi̱kiʼinra kuenta xíʼin Betel. Iin ki̱vi̱ ni̱nda̱ka̱tu̱ʼunra ndi̱ʼi̱ á kúni̱ndi̱ koondi̱ precursor especial. Ta ndi̱ku̱n kama ni̱ka̱ʼi̱n xíʼinra: “Kúni̱vandi̱ koondi̱ precursor especial soo kǒo kúni̱ndi̱ ku̱ʼu̱nndi̱ chí Quebec”. Ki̱xáʼi̱ ndákanixi̱níi̱ nda̱a̱ táki̱ʼva ndákanixi̱ní na̱ yiví na̱ káʼa̱n inglés na̱ íyo chí Canadá, xa̱ʼa̱ ña̱kán kǒo níxi̱kuni̱ kitáʼi̱n xíʼin na̱ ni̱xi̱yo chí Quebec chi̱ tu̱ʼun francés xi̱ka̱ʼa̱nna. Tiempo kán na̱ yiví na̱ ni̱xi̱yo chí Quebec xi̱ka̱ʼa̱nna xíʼin na̱ chíñu ña̱ kǒo kúni̱kana ña̱ ná kaʼndachíñuna nu̱úna.

Ta̱ Arnold ni̱ka̱ʼa̱nra xíʼi̱n: “Na̱ hermano na̱ káchíñu Betel nda̱saa ñuu Quebec chíndaʼána na̱ precursor especial”. Ka̱ndíxavai̱ ku̱ʼi̱n saáchi ki̱ʼi̱n kuenta ña̱ xi̱kuni̱va ñá Randi ku̱ʼu̱nñá lugar kán. Tá ni̱ya̱ʼa tiempo ki̱ʼi̱n kuenta ña̱ va̱ʼaníva ña̱ nda̱kaxinndi̱.

U̱ʼu̱n semana sa̱náʼa̱na ndi̱ʼi̱ ña̱ ka̱ʼa̱nndi̱ tu̱ʼun francés, ta tándi̱ʼi chi̱ndaʼána ndi̱ʼi̱ xíʼin iin na̱ matrimonio iin ñuu ña̱ naní Rimouski, ta ki̱ʼva 540 kilómetro (336 millas) chí noreste ña̱ Montreal xi̱kindo̱oña. Ta̱ʼán sakúaʼa viíi̱ ka̱ʼi̱n tu̱ʼun francés, saáchi tá ka̱ʼvii̱ iin anuncio ti̱xin reunión ña̱ káʼa̱n xa̱ʼa̱ ña̱ koo asamblea, ña̱yóʼo ni̱ka̱ʼi̱n “ku̱a̱ʼání na̱ hemano avestruz ku̱ʼu̱n asamblea”, nu̱úka ña̱ ka̱ʼi̱n “ku̱a̱ʼání na̱ hermano austriaco ku̱ʼu̱n asamblea”.

Tá ni̱xi̱yondi̱ chí Rimouski, iin veʼe ni̱xi̱yondi̱ xíʼin iin na̱ matrimonio xíʼin ku̱mí ná hermana kúa̱an. Ta saátu ni̱xi̱yo na̱ matrimonio Huberdeau xíʼinndi̱ xíʼin u̱vi̱ na̱ se̱ʼena, ta na̱ familia yóʼo ndu̱kúna iin veʼe ña̱ kúúmií 7 cuarto ña̱ va̱ʼa koondi̱, ta ndiʼindi̱ xi̱chaʼvi renta xa̱ʼa̱ veʼe yóʼo. “Veʼe Yaa” xi̱kaʼa̱nndi̱ xíʼinña, saáchi color yaa nda̱kaʼyínaña, ta sava yichi̱ doce á nda̱a̱ catorcendi̱ ni̱xi̱yo iniña. Xa̱ʼa̱ ña̱ ni̱xi̱yoi̱ precursor especial xíʼin ñá síʼi̱, nda̱a̱ xi̱ta̱an iin saá nda̱a̱ xi̱kuaá xi̱keendi̱ xi̱natúʼunndi̱ xíʼin na̱ yiví. Xa̱ʼa̱ ña̱kán xi̱kuni̱níndi̱ ña̱ ndiʼi tiempo koo na̱ ku̱ʼu̱n natúʼun xíʼinndi̱ xa̱ʼa̱ tu̱ʼun Ndióxi̱ ni tiempo kaxin kúúña á ni kúún nieve.

Va̱ʼaní xi̱kitáʼandi̱ xíʼin na̱ precursor kán, nda̱a̱ táki̱ʼva ni̱xi̱yo na̱ veʼendi̱ saá ni̱xi̱yona. Sava yichi̱ xi̱ndakaʼmindi̱ ñuʼu̱ ña̱ va̱ʼa ndasa̱ándi̱ ta xi̱natúʼunndi̱ kuento. Ta saátu ni̱xi̱yo ki̱vi̱ ña̱ xi̱keʼénndi̱ ña̱ naní pierogis, ta ña̱yóʼo xi̱kuuña empanada ña̱ xi̱taándi̱ ña̱ʼa ti̱xin. Ku̱a̱ʼání yichi̱, tá xi̱kuaá sábado xi̱xitandi̱ ta xi̱tixáʼandi̱ yaa ña̱ xi̱sakáʼa sava na̱ hermano kán.

Na̱ yiví na̱ íyo Rimouski va̱ʼaní ki̱xáʼana sákuaʼana xa̱ʼa̱ Ndióxi̱, ta ti̱xin 5 ku̱i̱ya̱ ku̱a̱ʼání na̱ xi̱sanáʼa̱ndi̱ nda̱kuchi, xa̱ʼa̱ ña̱yóʼo ni̱kusi̱íní-inindi̱. Ta ki̱ʼva 35 na̱ publicador ki̱xáʼa íyo ti̱xin congregación kán.

Ku̱a̱ʼání ña̱ʼa sa̱kuaʼandi̱ tá ni̱xi̱yondi̱ chí Quebec saáchi sa̱kuaʼandi̱ ndáa ki̱ʼva sanáʼa̱ndi̱ na̱ yiví. Ki̱ʼinndi̱ kuenta ña̱ va̱ʼaní chi̱ndeétáʼan Jehová xíʼinndi̱ ña̱ natúʼunndi̱ xíʼin na̱ yiví xa̱ʼa̱ra, ta kǒo ña̱ʼa ní ixama̱ní nu̱úndi̱ tá ni̱xi̱yondi̱ ñuu kán. Va̱ʼaní ni̱xa̱a̱ndi̱ ku̱ndaa̱-inindi̱ ndáa ki̱ʼva íyo na̱ yiví na̱ káʼa̱n tu̱ʼun francés, sa̱kuaʼandi̱ tu̱ʼunna ta ku̱tóoníndi̱ costumbrena. Ña̱yóʼo chi̱ndeétáʼanña xíʼinndi̱ ña̱ kutóondi̱ costumbre ña̱ kúúmií inkana (2 Cor. 6:13).

Tá ni̱ya̱ʼa tiempo na̱ hermano na̱ káchíñu Betel ni̱nda̱ka̱tu̱ʼunna ndi̱ʼi̱ á kúni̱ndi̱ ku̱ʼu̱nndi̱ kachíñundi̱ iin ñuu loʼo ña̱ naní Tracadie, ñuu yóʼo xi̱kindo̱oña chí este ña̱ Nueva Brunswick. Kǒo nínda̱kanixi̱níndi̱ ña̱ ka̱ʼa̱nna ña̱yóʼo xíʼinndi̱, saáchi sa̱kán cha̱ʼvindi̱  xa̱ʼa̱ iin veʼe nu̱ú koondi̱ ta xi̱kachíñui̱ ti̱xin iin escuela sava ki̱vi̱ chi̱ maestro xi̱kui̱, ta saátu na̱ yiví na̱ xi̱kaʼvindi̱ xíʼin ki̱xáʼana kúúna publicador. Saátu sa̱kán ki̱xáʼana íxava̱ʼana iin salón ñuu nu̱ú ni̱xi̱yondi̱. Xa̱ʼa̱ ña̱kán, i̱xayo̱ʼvi̱níña xíʼinndi̱ ña̱ ndaka̱xinndi̱ ña̱ keʼéndi̱.

Ni̱ka̱ʼa̱nníndi̱ xíʼin Jehová xa̱ʼa̱ ña̱yóʼo. Ni̱xa̱ʼa̱nndi̱ ñuu Tracadie, soo síínníva ni̱xi̱yo ñuu yóʼo nu̱ú ñuu Rimouski. Soo, mií Jehová xi̱kuni̱ ña̱ ku̱ʼu̱nndi̱ ñuu kán ña̱kán ni̱xa̱ʼa̱nvandi̱. Xi̱tondosóndi̱ Jehová ta ki̱ʼinndi̱ kuenta ña̱ va̱ʼaní chi̱ndeétáʼanra xíʼinndi̱ ña̱ ke̱ʼéndi̱ chiñu yóʼo (Mal. 3:10). Ñá Randi va̱ʼaní chi̱ndeétáʼanñá xíʼi̱n saáchi xa̱ʼa̱ ña̱ kándíxaníñá Ndióxi̱ kǒo ní ixayo̱ʼvi̱ña xíʼinñá ku̱ʼunñá nu̱ú xi̱ka̱ʼa̱nna xíʼinndi̱.

Ti̱xin congregación ña̱ ni̱xi̱yo Tracadie iin kuití ta̱ anciano ni̱xi̱yo ta̱ naní Robert Ross. Miíra xíʼin ñá síʼira ñá naní Linda xi̱kuuna precursor ta ki̱ndoona ñuu kán tá ka̱ku se̱ʼena. Ni ni̱xi̱yoní chiñu nu̱úna ña̱ sakúaʼnuna ta̱ loʼo se̱ʼena, soo chi̱kaa̱nína ndee̱ xíʼinndi̱ saáchi va̱ʼaní ni̱xi̱yo inina ta va̱ʼaní xi̱kachíñuna nu̱ú Ndióxi̱.

Sa̱kán u̱vi̱ ku̱i̱ya̱ kúúndi̱ precursor ti̱xin congregación Tracadie tá ni̱ka̱ʼa̱nna xíʼi̱n ña̱ koi̱ superintendente ña̱ circuito. U̱xa̱ ku̱i̱ya̱ ni̱xa̱ʼa̱nndi̱ xi̱tondi̱ congregación nu̱ú káʼa̱nna nda̱saa tu̱ʼun inglés, tándi̱ʼi chi̱ndaʼána ndi̱ʼi̱ iin circuito nu̱ú káʼa̱nna tu̱ʼun francés chí Quebec. Ñuu kán iin ta̱ superintendente ña̱ distrito ta̱ naní Léonce Crépeault, xi̱chikaa̱níra ndee̱ xíʼi̱n tá xi̱taxii̱ discurso. b Tá ndi̱ʼi xi̱ka̱ʼa̱nra xíʼi̱n ndáaña kivi keʼíi̱ ña̱ va̱ʼa viíka taxii̱ discurso ña̱ va̱ʼa chindeétáʼanña xíʼin na̱ hermano, xa̱ʼa̱ ña̱ va̱ʼaní chi̱ndeétáʼan ta̱ hermano yóʼo xíʼi̱n, discurso ña̱ xi̱taxii̱ va̱ʼaní xi̱chindeétáʼanña xíʼin na̱ hermano.

Ndákaʼíi̱n ña̱ ku̱si̱íní-inii̱ tá ni̱xa̱ʼi̱n iin asamblea ña̱ ni̱xi̱yo chí Montreal ku̱i̱ya̱ 1978 ña̱ xi̱naní “Fe Victoriosa”. Nu̱ú xi̱ ixava̱ʼana ña̱ kuxu na̱ ku̱ʼu̱n asamblea xi̱kachíñui̱, ta 80,000 na̱ yiví xi̱ndátundi̱ ku̱ʼu̱n asamblea kán. Mií tiempo saá na̱samana ña̱ʼa ña̱ xíniñúʼundi̱ ña̱ ixava̱ʼandi̱ comida kuxu na̱ ku̱ʼu̱n asamblea, ta ni̱ka̱ʼa̱ntuna xíʼinndi̱ ña̱ inka comida ixava̱ʼandi̱ kuxuna. Ta 20 remolque xi̱kuumiíndi̱ ña̱ ni̱xi̱yo táki̱ʼva íyo refrigerador ta túyóʼo xi̱xiniñúʼundi̱ ña̱ taán va̱ʼandi̱ comida, soo sava yichi̱ xi̱tivínú. Iin ki̱vi̱ tá kúma̱ní koo asamblea xi̱niñúʼuna estadio kán ña̱ kusíkína, ta nda̱a̱ tá xa̱a̱ ñuú ni̱ki̱ʼvindi̱ ña̱ va̱ʼa ixava̱ʼandi̱ comida. Xa̱ʼa̱ ña̱ xa̱a̱ ñuúní ki̱xáʼandi̱ íxava̱ʼandi̱ comida xi̱niñúʼu chikaa̱níndi̱  ndee̱ ña̱ kama ixava̱ʼandi̱ña, saáchi̱ xi̱niñúʼu koo tu̱ʼvaña tá kúma̱níka tu̱vi. Ku̱naáníndi̱ ki̱vi̱ kán, soo ku̱a̱ʼání ña̱ʼa sa̱kúaʼi̱ xíʼin ña̱ ke̱ʼé na̱ hermano yóʼo saáchi va̱ʼaní xi̱kachíñuna ta si̱íní ni̱xi̱yona. Ña̱ ndo̱ʼondi̱ yóʼo va̱ʼaní chi̱ndeétáʼanña xíʼinndi̱ saáchi va̱ʼaní ni̱xaa̱ndi̱ ki̱táʼanndi̱, ta nda̱a̱ vitin viíní kítáʼan xíʼin táʼanndi̱. Ni̱kusi̱íní-inindi̱ ña̱ ni̱xa̱ʼa̱nndi̱ asamblea ñuu Quebec yóʼo. Saáchi tá ya̱chi̱, tá 1940 xíʼin 1950 na̱ chíñu xi̱ ixandi̱va̱ʼanína xíʼin na̱ hermano ñuu yóʼo xa̱ʼa̱ ña̱ ndásakáʼnuna Ndióxi̱.   

Ku̱a̱ʼání ña̱ sa̱kúaʼi̱ xíʼin ña̱ xi̱keʼé inka na̱ superintendente na̱ xi̱xaʼa̱n asamblea ñuu Montreal. Iin yichi̱, ta̱ David Splane ta̱ kúú Cuerpo Gobernante ni̱xi̱yora superintendente ña̱ asamblea. Tá ni̱ya̱ʼa tiempo ni̱xa̱i̱ ndu̱i̱ superintendente ña̱ asamblea, ta ta̱ David va̱ʼaní chi̱ndeétáʼanra xíʼi̱n.

Xi̱kui̱ superintendente ña̱ circuito 36 ku̱i̱ya̱, soo tá ku̱i̱ya̱ 2011 ni̱ka̱ʼa̱nna xíʼi̱n ña̱ koi̱ instructor ti̱xin escuela nu̱ú sánáʼa̱na na̱ anciano. Ta ti̱xin u̱vi̱ ku̱i̱ya̱ 75 veʼe na̱ hermano ni̱xi̱yondi̱. I̱xayo̱ʼvi̱vaña xíʼinndi̱ soo xi̱kusi̱íníva-inindi̱, chi tá xi̱ndiʼi iin tá iin semana xi̱kusi̱íní-ini na̱ anciano xa̱ʼa̱ ña̱ xi̱ndi̱ʼi̱ní-ini na̱ Cuerpo Gobernante xa̱ʼa̱na.

Tá ndi̱ʼi ni̱ka̱ʼa̱nna xíʼi̱n ña̱ koi̱ instructor ti̱xin escuela ña̱ naní Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱. Ku̱a̱ʼání yichi̱ xi̱kiʼi̱n kuenta ña̱ xi̱ndi̱ʼi̱ní-ini na̱ hermano na̱ xi̱xaʼa̱n clase yóʼo, saáchi u̱xa̱ hora xi̱kaʼvina iin tá iin ki̱vi̱ ta u̱ni̱ hora xi̱xiniñúʼu keʼéna tarea ña̱ xi̱kindo̱o ndaʼa̱na. Inka ta̱ instructor xíʼin yi̱ʼi̱ xi̱ka̱ʼa̱nndi̱ xíʼinna ña̱ kuchiñuvana keʼéna ña̱yóʼo chi Jehová chindeétáʼan xíʼinna. Ndiʼi tiempo ndakaʼíi̱n xa̱ʼa̱ ña̱ ku̱u xíʼin na̱yóʼo, saáchi tá xi̱kandíxana ña̱ mií Jehová chindeétáʼan xíʼinna va̱ʼaní xi̱kana ña̱ xi̱keʼéna.

Xa̱ʼa̱ ña̱ xi̱ndi̱ʼi̱ní-ini siʼíi̱ xa̱ʼa̱ na̱ xi̱kaʼviñá xíʼin, ña̱yóʼo va̱ʼaní chi̱ndeétáʼanña xíʼinna ña̱ ni̱xa̱a̱na sa̱kúaʼana xa̱ʼa̱ Jehová, ta saátu va̱ʼaní chi̱ndeétáʼanña xíʼin yivái̱, saáchi tá ni̱ya̱ʼa u̱ni̱ ki̱vi̱ ña̱ ni̱xi̱ʼi̱ siʼíi̱ ni̱xa̱ʼa̱nra xi̱niso̱ʼora discurso ti̱xin salón. Ta nani saá 26 ku̱i̱ya̱ ni̱xi̱kara reunión, kǒo níndakuchivíra, soo na̱ anciano ni̱ka̱ʼa̱nna xíʼi̱n ña̱ ya̱chi̱ní xi̱xa̱a̱ra reunión.

Va̱ʼaní yichi̱ chi̱núu siʼíndi̱ nu̱úndi̱, saáchi u̱ni̱ saá ná ku̱ʼvai̱ va̱ʼaní káchíñuna nu̱ú Jehová xíʼin yii̱ná. Iinñá ndíkaa̱ Betel ña̱ Portugal ta inkañá ndíkaa̱ Betel ña̱ Haití.

Ñá Randi xíʼin yi̱ʼi̱ kúúndi̱ precursor especial chí Hamilton (Ontario). Tá xi̱kui̱ superintendente ña̱ circuito xi̱kutóoníndi̱ ku̱ʼu̱nndi̱ xíʼin na̱ hermano ña̱ keʼéna estudio xíʼin revisitana. Kúsi̱íní-inindi̱ saáchi ki̱xáʼandi̱ sánáʼa̱ndi̱ na̱ yiví ta chíndeétáʼanndi̱ xíʼinna ña̱ kuyatinkana nu̱ú Jehová. Va̱ʼaní kítáʼanndi̱ xíʼin na̱ hermano ta xítondi̱ ña̱ va̱ʼaní chíndeétáʼan Jehová xíʼinna tá yáʼana nu̱ú tu̱ndóʼo.

Tá ndákaʼánndi̱ xa̱ʼa̱ ndiʼi na̱ hermano na̱ chi̱ndeétáʼan xíʼinndi̱, kúsi̱íní-inindi̱. Ta saátu miíndi̱, chíndeétáʼanndi̱ xíʼinna ña̱ ku̱a̱ʼáka chiñu keʼéna nu̱ú Jehová (2 Cor. 7:6, 7). Ti̱xin iin familia, iin ñá hermana xíʼin u̱vi̱ na̱ se̱ʼéñá xi̱kuuna precursor. Soo, ni̱nda̱ka̱tu̱ʼíi̱n yii̱ñá á va̱ása ndákanixi̱níra ña̱ koora precursor, ta ni̱ka̱ʼa̱nra xíʼi̱n ña̱ xa̱a̱ chíndeétáʼanra xíʼin na̱ veʼera ña̱ koona precursor, tasaá ni̱ka̱ʼi̱n xíʼinra: “¿Á va̱ása túviún ña̱ va̱ʼaka kundaa Jehová na̱yóʼo nu̱úka miíún?”. Chi̱kai̱ ndee̱ xíʼinra ña̱ koora precursor xíʼin na̱ veʼera, ta tá ni̱ya̱ʼa i̱ñu̱ yo̱o̱ ki̱xáʼara kúúra precursor.

Ñá Randi xíʼin yi̱ʼi̱ káʼa̱nndi̱ xíʼin na̱ va̱lí kúa̱an ña̱ ná chikaa̱na ndee̱ ña̱ kachíñuna nu̱ú Jehová ta ku̱a̱ʼání ña̱ va̱ʼa ndakiʼinna, chi kúni̱ndi̱ ña̱ ná kusi̱íní-inina ña̱ kachíñuna nu̱ú Jehová nda̱a̱ táki̱ʼva kéʼé ndi̱ʼi̱ (Sal. 71:17, 18).