1, 2. ¿Nda̱chun nda̱a̱ táki̱ʼva íyo iin veʼe ña̱ súkunní ña̱ níndichi chí Tokio saá íyoyó? (1 Corintios 15:58).

 KU̱I̱YA̱ 1978 ki̱xáʼana íxava̱ʼana iin veʼe ña̱ súkunní ña̱ 60 piso chí ñuu Tokio, Japón. Na̱ yiví na̱ xi̱xito ña̱yóʼo xi̱ndakanixi̱nína á kǒo ndakavaña tá xa̱a̱ ná ta̱an, saáchi táanní ñuu kán. ¿Ndáaña ke̱ʼé na̱ ingeniero ña̱ va̱ʼa kǒo ndakavaña? Viíní i̱xava̱ʼana xa̱ʼa̱ña, ta ni ná kanda̱ña kǒo ndakavavíña. Miíyó na̱ ndásakáʼnu Ndióxi̱ íyoyó nda̱a̱ táki̱ʼva íyo veʼe yóʼo. ¿Nda̱chun?

² Saáchi kǒo táxiyó ña̱ nasama na̱ yiví ña̱ ndákanixi̱níyó. Ta xíniñúʼu kuniso̱ʼoyó ndiʼi ley ña̱ káʼa̱n Jehová xíʼinyó nu̱ú tu̱ʼunra (kaʼvi 1 Corintios 15:58). Ná koo tu̱ʼvayó ña̱ kandíxayó ndiʼi ña̱ káʼa̱n Jehová xíʼinyó, ta ná kǒo keʼéyó ña̱ va̱ása kútóora. Soo tá kǒo kítáʼan ña̱ ndákanixi̱níyó xíʼin ña̱ ndákanixi̱ní Jehová xíniñúʼu nasamayóña (Sant. 3:17). Tá va̱ʼaní íyo ña̱ ndákanixi̱níyó xa̱ʼa̱ sava ña̱ʼa, ña̱yóʼo chindeétáʼanña xíʼinyó ña̱ viíní koo ña̱ ndaka̱xinyó keʼéyó. Nu̱ú artículo yóʼo kotoyó ama kúú ña̱ xíniñúʼu ndakú koo iniyó ta kǒo taxiyó ña̱ nasamana ña̱ ndákanixi̱níyó. Saátu ka̱ʼa̱nyó xa̱ʼa̱ u̱ʼu̱n ña̱ʼa ña̱ xíniñúʼu ta̱ Ndi̱va̱ʼa ña̱ sakúxíkara miíyó nu̱ú Jehová, ta kotoyó ndáaña kivi keʼéyó ña̱ va̱ʼa ya̱ʼayó nu̱ú ña̱yóʼo.

3. ¿Ndáa ley táxi Jehová ndaʼa̱yó nu̱ú Hechos 15:28, 29?

³ Jehová kúú ta̱ íxava̱ʼa ley, ta káxiní káʼa̱nra xíʼin na̱ ñuura ndáaña xíniñúʼu keʼéna (Is. 33:22). Tá kúú, na̱ Cuerpo Gobernante na̱ ni̱xi̱yo tá siglo nu̱ú ni̱ka̱ʼa̱nna ndáa u̱ni̱ ña̱ʼa kúú ña̱ xíniñúʼu kiʼinníyó kuenta xíʼin. Ña̱ nu̱ú, ña̱ kǒo xíniñúʼu ndasakáʼnuyó ndióxi̱ vatá chi iinlá Jehová kúú ta̱ xíniñúʼu ndukáʼnu. Ña̱ u̱vi̱, ña̱ ixato̱ʼóyó ni̱i̱ chi ña̱ yi̱i̱ kúú ña̱yóʼo. Ña̱ u̱ni̱, ná kǒo keʼéyó ku̱a̱chi kini, tá kúú ña̱ ku̱su̱nyó xíʼin na̱ kǒo nítindaʼa̱  xíʼinyó (kaʼvi Hechos 15:28, 29). ¿Ndáaña kivi keʼéyó tiempo vitin tasaá kǒo taxiyó nasamana ña̱ ndákanixi̱níyó?

4. ¿Ndáaña kúni̱ kachi ña̱ iinlá mií Jehová ndasakáʼnuyó? (Apocalipsis 4:11).

⁴ Kǒo ndásakáʼnuyó ndióxi̱ vatá chi iinlá mií Jehová ndásakáʼnuyó. Jehová ni̱ka̱ʼa̱nra xíʼin na̱ ñuu Israel ña̱ iinlá miíra xi̱niñúʼu ndasakáʼnuna (Deut. 5:6-10). Tá ni̱ka̱ʼa̱n ta̱ Ndi̱va̱ʼa xíʼin ta̱ Jesús ña̱ ná ndasakáʼnurara, ta̱ Jesús ni̱ka̱ʼa̱nra ña̱ iinlá Jehová kúú ta̱ xíniñúʼu ndukáʼnu (Mat. 4:8-10). Xa̱ʼa̱ ña̱kán kǒo ndásakáʼnuyó santo á imagen ña̱ ñúʼu veʼe-ñu̱ʼu, ta ni kǒo ndásakáʼnuyó na̱ político, na̱ chíñu á na̱ sísikí, saáchi iinlá Jehová ta̱ i̱xava̱ʼa ndiʼi ña̱ʼa kúú ta̱ ndásakáʼnuyó (kaʼvi Apocalipsis 4:11).

5. ¿Nda̱chun íxato̱ʼóyó ña̱ tákuyó xíʼin ni̱i̱?

⁵ Íxato̱ʼóyó ña̱ tákuyó xíʼin ni̱i̱ saáchi ña̱ yi̱i̱ kúú ña̱yóʼo. ¿Nda̱chun? Saáchi ni̱i̱ kúú ña̱ chíndeétáʼan xíʼinyó ña̱ kutakuyó, ta mií Jehová kúú ta̱ i̱xava̱ʼa miíyó ta táxira ña̱ tákuyó (Lev. 17:14). Tá xa̱a̱ ni̱ka̱ʼa̱n Jehová xíʼin na̱ yiví ña̱ kivi kuxuna kití xa̱ʼndara chiñu nu̱úna ña̱ ná kǒo kuxuna ni̱i̱rí (Gén. 9:4). Saátu ni̱ka̱ʼa̱nra xíʼin na̱ ñuu Israel ña̱ ná kǒo kuxuna ni̱i̱ (Lev. 17:10). Tá siglo nu̱ú ni̱ka̱ʼa̱nra xíʼin na̱ Cuerpo Gobernante ña̱ ná ka̱ʼa̱nna xíʼin na̱ ñuura ña̱ ná kǒo kuniñúʼuna ni̱i̱ (Hech. 15:28, 29). Miíyó kándíxaníyó ña̱ ni̱ka̱ʼa̱n Jehová ña̱ kǒo nde̱e ni̱i̱ miíyó tá kúúmiíyó iin kue̱ʼe̱. b

6. ¿Ndáaña chindeétáʼan xíʼinyó ña̱ kuniso̱ʼoyó ña̱ káʼa̱n Jehová?

⁶ Chíkaa̱níyó ndee̱ ña̱ kuniso̱ʼoyó ndiʼi ña̱ káʼa̱n Jehová ta kǒo kéʼéyó ña̱ kini (Heb. 13:4). Ta̱ apóstol Pablo táxira consejo yóʼo ndaʼa̱yó: “Sandíʼi-xa̱ʼa̱ndó ndiʼi ña̱ kútóo ku̱ñundó keʼéña”. Ña̱ ni̱ka̱ʼa̱n ta̱ Pablo chíndeétáʼanña xíʼinyó ña̱ ndakú koo iniyó ta kǒo keʼéyó ña̱ kini ña̱ kivi sakúxíka miíyó nu̱ú Jehová. Tá kúú, kǒo xítoyó á kǒo kéʼéyó ni iin ña̱ʼa ña̱ kivi sandákava miíyó ña̱ ku̱su̱nyó xíʼin na̱ kǒo nítindaʼa̱ xíʼinyó (Col. 3:5; Job 31:1). Tá xa̱a̱ íyo iin ña̱ kivi sandákava miíyó ña̱ keʼéyó ña̱ kini, ndi̱ku̱n kama ná ndakanixi̱níyó xa̱ʼa̱ inka ña̱ʼa chi kǒo kúni̱yó sakúxíka ña̱yóʼo miíyó nu̱ú Jehová.   

7. ¿Ndáaña xíniñúʼu chikaa̱-iniyó keʼéyó, ta nda̱chun?

⁷ Jehová kúni̱ra ña̱ xíʼin ndiʼi níma̱yó ná kuniso̱ʼoyó ndiʼi ña̱ káʼa̱nra xíʼinyó (Rom. 6:17). Ndiʼi ley ña̱ va̱xi nu̱ú tu̱ʼunra xíʼin ndiʼi ña̱ káʼa̱nra xíʼinyó ña̱ va̱ʼa miíyó kúúña ta kúni̱ra ná kuniso̱ʼoyó ña̱yóʼo (Isa. 48:17, 18; 1 Cor. 6:9, 10). Ná chika̱a̱yó ndee̱ ña̱ keʼéyó ña̱ kútóo Jehová ta ná ndakanixi̱níyó nda̱a̱ táki̱ʼva íyo ña̱ ni̱ka̱ʼa̱n ta̱ salmista tá ka̱chira: “Ndiʼi tiempo ña̱ tákui̱ kunii̱ kuniso̱ʼi̱ ña̱ káʼún xíʼi̱n” (Sal. 119:112). Soo, ta̱ Ndi̱va̱ʼa kǒo kúni̱ra ña̱ nda̱kú koo iniyó xíʼin Ndióxi̱, ña̱kán, ¿ndáaña xíniñúʼura ña̱ sandákavara miíyó?

8. ¿Nda̱chun sáxo̱ʼvi̱ ta̱ Ndi̱va̱ʼa miíyó?

⁸ Tá íxandi̱va̱ʼa na̱ yiví xíʼinyó. Ta̱ Ndi̱va̱ʼa va̱ása kúni̱ra ña̱ nda̱kú koo iniyó xíʼin Jehová. Xa̱ʼa̱ ña̱kán xíniñúʼura na̱ yiví ña̱ sayíʼvina miíyó ta ixandi̱va̱ʼana xíʼinyó, saáchi ña̱ kúni̱ra kúú ña̱ sakúxíkara miíyó nu̱ú Jehová (1 Ped. 5:8). Na̱ cristiano na̱ xi̱ndoo tá siglo nu̱ú i̱xandi̱va̱ʼanína xíʼinna, ka̱ninana ta nda̱a̱ xa̱ʼnína savana xa̱ʼa̱ ña̱ nda̱kú ni̱xi̱yo inina xíʼin Ndióxi̱ (Hech. 5:27, 28, 40; 7:54-60). Ki̱ʼva saá íyo ña̱ kéʼé ta̱ Ndi̱va̱ʼa tiempo vitin, saáchi xíniñúʼura na̱ yiví ña̱ sáxo̱ʼvi̱na miíyó. Iníísaá ñuyǐví íxandi̱va̱ʼara xíʼin na̱ hermano, ta xa̱a̱ síín síín ña̱ʼa xíniñúʼura ña̱ keʼéra ña̱yóʼo, tá kúú na̱ hermanoyó na̱ ñuu Rusia xíʼin na̱ ndóo inka ñuu ndeéní xóʼvi̱na.

9. ¿Ndáaña xíniñúʼu kiʼinníyó kuenta xíʼin tá yáʼayó nu̱ú iin tu̱ndóʼo? Ka̱ʼa̱n xa̱ʼa̱ iin ejemplo.

 ⁹ Ná kǒo taxiyó sáxi̱nuna-iniyó ña̱ keʼéyó ña̱ʼa ña̱ kǒo kútóo Jehová. Sava yichi̱ mií ta̱ Ndi̱va̱ʼa kúú ta̱ sáxo̱ʼvi̱ miíyó, soo sava yichi̱ xíniñúʼura inka ña̱ʼa ña̱ sandáʼvira miíyó (Efes. 6:11). Ná ka̱ʼa̱nyó xa̱ʼa̱ ña̱ ndo̱ʼo ta̱ Bob, ta̱yóʼo ni̱xa̱ʼa̱nra hospital chi xi̱niñúʼu ndatánara. Káxiní ni̱ka̱ʼa̱nra xíʼin na̱ doctor ña̱ va̱ása ndee̱ ni̱i̱ miíra ni nda̱a̱ ndáaka ña̱ʼa ná kundoʼora. Ta xa̱ʼa̱ ña̱ xi̱ñuʼu na̱ veʼera xíʼinra, na̱ doctor ni̱ka̱ʼa̱nna ña̱ va̱ása taánna ni̱i̱ miíra. Soo ñuú tá kúma̱ní ndatánara iin ta̱ doctor ni̱ka̱ʼa̱nra xíʼinra ña̱ koo tu̱ʼva ni̱i̱ ña̱ taánnara tá xa̱a̱ ná nda̱ta̱ra, saáchi ta̱ doctor kán nda̱kanixi̱níra ña̱ kuni̱va ta̱ Bob ndee̱ ni̱i̱ miíra xa̱ʼa̱ ña̱ kǒoka na̱ veʼera íyo xíʼinra. Soo ta̱yóʼo nda̱kúní ni̱xi̱yo inira xíʼin Ndióxi̱ ta ni̱ka̱ʼa̱nra xíʼinra ña̱ va̱ása nde̱e ni̱i̱ miíra ni ná kuvira.

10. ¿Ndáaña kivi kundoʼoyó tá ndákanixi̱níyó nda̱a̱ táki̱ʼva ndákanixi̱ní na̱ yiví na̱ kǒo ndásakáʼnu Jehová? (1 Corintios 3:19, 20).

¹⁰ Ña̱ ndákanixi̱ní na̱ yiví na̱ kǒo ndásakáʼnu Ndióxi̱. Tá ná kixáʼayó ndakanixi̱níyó nda̱a̱ táki̱ʼva ndákanixi̱ní na̱ yiví kivi sandákooyó ña̱ ndásakáʼnuyó Jehová ta va̱ása kuniso̱ʼokayó ña̱ káʼa̱nra (kaʼvi 1 Corintios 3:19, 20). “Ña̱ ndíchi ña̱ íyo ñuyǐví yóʼo” chíkaa̱ña-iniyó ña̱ keʼéyó ña̱ʼa ña̱ kútóo miíyó. Ná ka̱ʼa̱nyó xa̱ʼa̱ ña̱ ndo̱ʼo na̱ congregación ña̱ Pérgamo xíʼin ña̱ Tiatira. Sava na̱ cristiano ki̱xáʼana kéʼéna nda̱a̱ táki̱ʼva xi̱keʼé na̱ yiví na̱ xi̱ndoo ñuu kán, saáchi na̱ yiví kán xi̱kisi̱na xíʼin na̱ kǒo nítindaʼa̱ xíʼinna ta xi̱ndasakáʼnuna ndióxi̱ vatá. Káxiní íyo ña̱ ni̱ka̱ʼa̱n ta̱ Jesús xíʼin na̱ cristiano, saáchi xi̱taxina ña̱ xi̱keʼéna ña̱ kini ti̱xin u̱vi̱ saá congregación kán (Apoc. 2:14, 20). Tiempo vitin, sava na̱ yiví kúni̱na ña̱ ná ndakanixi̱níyó nda̱a̱ táki̱ʼva ndákanixi̱nína ta kúni̱na ña̱ ná keʼéyó nda̱a̱ táki̱ʼva kéʼé miína, ña̱ kǒo kuniso̱ʼoyó ña̱ káʼa̱n Jehová xíʼinyó. Ta sava na̱yóʼo kúú na̱ veʼeyó á na̱ xíni̱táʼanyó xíʼin. Sana kivi ka̱ʼa̱nna xíʼinyó ña̱ kiviva keʼéyó ña̱ kúni̱ miíyó ta saátu ña̱ kǒo chíndeétáʼanví ña̱ va̱xi nu̱ú Biblia xíʼinyó saáchi xa̱a̱ yatáníña.

11. ¿Ndáaña va̱ása xíniñúʼu keʼéyó?

¹¹ Sava yichi̱ kúni̱yó ña̱ káxiní ka̱ʼa̱n Jehová xíʼinyó nu̱ú tu̱ʼunra ndáaña kúú ña̱ xíniñúʼu keʼéyó. Ta nda̱a̱ sava yichi̱ kúni̱yó kunda̱a̱-iniyó xa̱ʼa̱ ña̱ kǒo va̱xi nu̱ú Biblia (1 Cor. 4:6). Tá tiempo ña̱ ni̱xi̱yo ta̱ Jesús nu̱ú ñuʼú yóʼo, na̱ xi̱niʼi yichi̱ nu̱ú na̱ veʼe-ñu̱ʼu ni̱ki̱ʼvina ku̱a̱chi nu̱ú Ndióxi̱, saáchi chiñu ña̱ xi̱xaʼndana nu̱ú na̱ yiví kǒo ña̱yóʼo níxi̱kixi nu̱ú Ley, xa̱ʼa̱ ña̱kán xi̱ ixayo̱ʼvi̱níña xíʼin na̱ yiví ña̱ kandíxanaña (Mat. 23:4). Jehová xíniñúʼura Biblia xíʼin na̱ ñuura ña̱ ka̱ʼa̱nra xíʼinyó ndáaña xíniñúʼu keʼéyó. Xa̱ʼa̱ ña̱kán kéʼéyó nda̱a̱ táki̱ʼva íyo ña̱ káʼa̱n miíra (Prov. 3:5-7). Ta kǒo násamayó ña̱ káʼa̱nra xíʼinyó, ni kǒo káʼa̱nyó xíʼin inkana ndáaña xíniñúʼu keʼéna saáchi nina ña̱ va̱xi nu̱ú Biblia ndíku̱nyó.

12. ¿Ndáaña xíniñúʼu ta̱ Ndi̱va̱ʼa ña̱ xaxára ña̱ vatá?

¹² Tu̱ʼun vatá ña̱ káʼa̱n na̱ ñuyǐví. Ta̱ Ndi̱va̱ʼa xíniñúʼura tu̱ʼun vatá ña̱ sandáʼvira na̱ yiví ta saátu ña̱ ndataʼvírana (Col. 2:8). Tá siglo nu̱ú, ta̱ Ndi̱va̱ʼa xi̱niñúʼura tu̱ʼun ndíchi ña̱ xi̱ka̱ʼa̱n na̱ yiví xíʼin ña̱ xi̱ndakanixi̱nína ña̱ sandáʼvira na̱ cristiano na̱ xi̱ndoo tiempo kán, saátu xi̱niñúʼura ña̱ xi̱kandíxa na̱ judío ña̱ kǒo va̱xi nu̱ú Biblia, ta xi̱kuni̱ra ña̱ kundiku̱nkana ña̱ xi̱ka̱ʼa̱n Ley ta̱ Moisés. Soo, ndiʼi ña̱yóʼo ña̱ vatá xi̱kuuña ta xi̱sasiña nu̱ú na̱ yiví ña̱ sakúaʼana ña̱ nda̱a̱ xa̱ʼa̱ Jehová. Tiempo vitin ta̱ Ndi̱va̱ʼa xíniñúʼura ña̱ vatá ña̱ káʼa̱n na̱ político ña̱ sandáʼvira miíyó, ta xíniñúʼura noticia á Internet ña̱ xaxára ña̱yóʼo. Tá xi̱ndikaa̱ ña̱ COVID-19 ku̱a̱ʼání na̱ yiví ni̱ka̱ʼa̱nna ña̱ vatá xa̱ʼa̱ ña̱yóʼo. c Soo na̱ testigo Jehová na̱ xi̱niso̱ʼo ña̱ ni̱ka̱ʼa̱n  na̱ ñuu Ndióxi̱, va̱ása níkandíxana ña̱ vatá ña̱ xi̱ka̱ʼa̱n na̱ yiví, ña̱kán va̱ása níndi̱ʼi̱-inina. Soo na̱ ka̱ndíxa ña̱ vatá ña̱ xi̱ka̱ʼa̱n inkana ni̱ndi̱ʼi̱ní-inina (Mat. 24:45).

13. ¿Nda̱chun va̱ása xíniñúʼu taxiyó ña̱ kasi nda̱a̱ ni iin ña̱ʼa nu̱úyó?

¹³ Ña̱ʼa ña̱ kivi kasi nu̱úyó. Ná kǒo nandósó-iniyó ndáa ña̱ʼa kúúmií ña̱ ndáyáʼvi va̱ʼaka (Filip. 1:9, 10). Ña̱ kuxuyó, ña̱ koʼoyó, ña̱ koo si̱í-iniyó, ña̱ kachíñuyó, ña̱yóʼo kúú ña̱ kéʼéyó ndiʼi saá ki̱vi̱, soo tá va̱ása kíʼinyó kuenta xíʼin ña̱yóʼo kivi kasiña nu̱úyó ña̱ keʼéyó ña̱ ndáyáʼvika (Luc. 21:34, 35). Ta saátu ndiʼi tiempo káʼa̱n na̱ yiví xa̱ʼa̱ ña̱ kéʼé na̱ chíñu á xa̱ʼa̱ inkaka ña̱ʼa. Tá ná kuniso̱ʼoyó ña̱ káʼa̱n na̱yóʼo kixáʼa kundi̱ʼi̱-iniyó ta kasiña nu̱úyó ña̱ keʼéyó ña̱ʼa ña̱ ndáyáʼvika. Tá va̱ása kíʼinyó kuenta nda̱a̱ kivi kixáʼayó ndakanixi̱níyó nda̱a̱ táki̱ʼva ndákanixi̱ní na̱yóʼo. Ta̱ Ndi̱va̱ʼa xíniñúʼura ña̱ xa̱a̱ ni̱ka̱ʼa̱nyó xa̱ʼa̱ yóʼo ña̱ kasira nu̱úyó tasaá kǒo keʼéyó ña̱ kútóo Jehová. Soo vitin ná kotoyó ndáaña chindeétáʼan xíʼinyó ña̱ kǒo keʼéyó ña̱yóʼo tasaá nda̱kú koo iniyó xíʼin Jehová.

14. ¿Ndáaña chindeétáʼan xíʼinyó ña̱ nda̱kú koo iniyó xíʼin Jehová?

¹⁴ Ná ndakanixi̱níyó ndáa xa̱ʼa̱ kúú ña̱ nda̱taxiyó miíyó ndaʼa̱ Jehová ta nda̱kuchiyó. Ke̱ʼéyó ña̱yóʼo saáchi kúni̱yó ndasakáʼnuyóra. Ndakaʼán ndáaña chi̱ndeétáʼan xíʼún ña̱ ku̱ndaa̱-iniún ña̱ nda̱a̱ kúú ña̱ sákuaʼún. Ku̱ndaa̱-iniún xa̱ʼa̱ Jehová ta ki̱xáʼún kúʼvi̱-iniún xíniúnra ta íxato̱ʼúnra saáchi kúúra yiváún. Ki̱xáʼún kándíxaúnra ta ña̱yóʼo chi̱ndeétáʼan xíʼún ña̱ ndikó-iniún xa̱ʼa̱ ña̱ va̱ása va̱ʼa xi̱keʼún. Ta sa̱ndákoún kéʼún ña̱ʼa ña̱ kúndasíra xínira. Saátu ni̱kusi̱íní-iniún tá ku̱ndaa̱-iniún ña̱ xa̱a̱ i̱xakáʼnuva-inira xa̱ʼún (Sal. 32:1, 2). Ki̱xáʼún xáʼún reunión ta saátu ki̱xáʼún nátúʼun xíʼin na̱ yiví xa̱ʼa̱ ndiʼi ña̱ va̱ʼa ña̱ káʼa̱n Ndióxi̱ keʼéra chí nu̱únínu. Vitin ña̱ xa̱a̱ nda̱taxiún miíún ndaʼa̱ Ndióxi̱ ta xa̱a̱ nda̱kuchiún chi̱kaa̱-iniún ña̱ iinlá nu̱ú miíra kachíñún ta nda̱a̱ ni iin ki̱vi̱ kǒo kúni̱ún sandákoún ña̱ ndasakáʼnúnra (Mat. 7:13, 14).   

15. ¿Ndáa ki̱ʼva chíndeétáʼan tu̱ʼun Ndióxi̱ xíʼinyó tá káʼviyóña ta ndákanixi̱níyó xa̱ʼa̱ña?

 ¹⁵ Ná kaʼviyó tu̱ʼun Ndióxi̱ ta ndakanixi̱níyó xa̱ʼa̱ña. Ña̱ chíndeétáʼan xíʼin iin yitu̱n ña̱ va̱ása ndi̱vanú kúú ña̱ kúnu ñúʼu yoʼo̱nú á ti̱oʼonú. Ta saátu miíyó tá kúni̱yó nda̱kú koo iniyó xíʼin Ndióxi̱ xíniñúʼu kandíxaníyó ña̱ káʼa̱n tu̱ʼunra. Nani xáʼnu iin yitu̱n saátu xáʼnu ti̱oʼonú ta kúnuka ku̱a̱kiʼviña ti̱xin ñuʼú. Ta saátu ndóʼo miíyó saáchi tá káʼviyó Biblia ta ndákanixi̱níyó xa̱ʼa̱ña saá kúú ña̱ xáa̱yó kándíxaníkayó Ndióxi̱ ta kúnda̱a̱-iniyó ña̱ va̱ʼaní íyo ndiʼi ña̱ sánáʼa̱ra (Col. 2:6, 7). Ná ndakanixi̱níyó ndáa ki̱ʼva xi̱ndaa Jehová na̱ xi̱ndasakáʼnu miíra tiempo xi̱naʼá xa̱ʼa̱ ña̱ xi̱ndiku̱nna consejo ña̱ ta̱xira ndaʼa̱na. Tá kúú, nu̱ú iin visión ta̱ Ezequiel xi̱nira iin ta̱ ángel ña̱ viíní ta̱vára ki̱ʼva ña̱ templo. Visión ña̱ xi̱ni ta̱ Ezequiel chi̱ndeétáʼanña xíʼinra ña̱ kandíxakara Ndióxi̱, ta saátu chíndeétáʼanña xíʼinyó tiempo vitin ña̱ kuniso̱ʼoyó ndiʼi ña̱ káʼa̱n Jehová xíʼinyó, xa̱ʼa̱ ndáa ki̱ʼva xíniñúʼu ndasakáʼnuyóra (Ezeq. 40:1-4; 43:10-12). Nu̱ú Biblia va̱xi sava ña̱ʼa ña̱ íxayo̱ʼvi̱ní xíʼinyó kunda̱a̱-iniyó xíʼin, ña̱kán ná taváyó tiempo ña̱ kaʼviyó xa̱ʼa̱ ña̱yóʼo ta ndakanixi̱níyó xa̱ʼa̱ña. d

16. ¿Ndáaña ke̱ʼé ta̱ Bob xa̱ʼa̱ ña̱ nda̱kú íyo inira xíʼin Ndióxi̱? (Salmo 112:7).

¹⁶ Nda̱kú ná koo iniyó xíʼin Ndióxi̱. Iin yaa ña̱ xi̱ta ta̱ rey David nu̱ú Jehová ni̱ka̱ʼa̱nra xíʼinra ña̱ ndiʼi tiempo kuʼvi̱-inira kunirara. Ta̱yóʼo ka̱chira: “Ndióxi̱, nda̱kú íyo inii̱ xíʼún” (Sal. 57:7). Saátu miíyó kivi nda̱kú koo iniyó xíʼin Jehová ta ndiʼi tiempo kandíxayóra (kaʼvi Salmo 112:7). e Ná ka̱ʼa̱n tukuyó xa̱ʼa̱ ta̱ Bob ta̱ ni̱ka̱ʼa̱nyó xa̱ʼa̱ nu̱ú párrafo 9. ¿Ndáaña ke̱ʼéra xa̱ʼa̱ ña̱ nda̱kú íyo inira xíʼin Ndióxi̱? Tá ni̱ka̱ʼa̱n na̱ doctor xíʼinra ña̱ koo tu̱ʼva ni̱i̱ ña̱ taánnara, ta̱yóʼo ni̱ka̱ʼa̱nra ña̱ tá ná ixandúxana xíʼinra ña̱ ndee̱ ni̱i̱ miíra ndi̱ku̱n kama sandákoora ña̱ hospital. Ta̱yóʼo káchira: “Ni loʼo kǒo níxi̱ka-inii̱ xa̱ʼa̱ ña̱ nda̱kaxii̱n keʼíi̱, ta ni kǒo níndi̱ʼi̱-inii̱ xa̱ʼa̱ ña̱ kivi kundoʼi̱”.

17. ¿Ndáaña sákuaʼayó xíʼin ña̱ ndo̱ʼo ta̱ Bob? (Koto na̱ʼná).

 ¹⁷ Ta̱ Bob xa̱a̱ ya̱chi̱kaví nda̱kaxinra ña̱ nda̱kú koo inira xíʼin Ndióxi̱ ta va̱ása ndee̱ ni̱i̱ miíra tá ná ku̱ʼu̱nra hospital ña̱ ndatánara, ná kotoyó ndáaña chi̱ndeétáʼan xíʼinra. Ña̱ nu̱ú, xi̱kuni̱ra sákusi̱íra-ini Jehová. Ña̱ u̱vi̱, ka̱ʼvira Biblia ta saátu ka̱ʼvira tutu ña̱ tává na̱ ñuu Ndióxi̱ ña̱ káʼa̱n xa̱ʼa̱ ña̱ tákuyó xíʼin ña̱ káʼa̱n xa̱ʼa̱ ni̱i̱. Ta ña̱ u̱ni̱, xi̱kandíxara ña̱ ku̱a̱ʼání ña̱ va̱ʼa taxi Jehová ndaʼa̱ra tá ná kuniso̱ʼora ndiʼi ña̱ káʼa̱nra xíʼinra. Nda̱a̱ táki̱ʼva ke̱ʼé ta̱ Bob, miíyó kivi nda̱kú koo iniyó xíʼin Ndióxi̱ ni nda̱a̱ ndáaka tu̱ndóʼo ná kixi nu̱úyó.

18. ¿Ndáaña sákuaʼayó xíʼin ña̱ ke̱ʼé ta̱ Barac? (Koto na̱ʼná ña̱ va̱xi nu̱ú kíxáʼa tutu yóʼo).

¹⁸ Ná kundaa-iniyó Jehová. Ná ka̱ʼa̱nyó xa̱ʼa̱ ña̱ ndo̱ʼo ta̱ juez Barac, ku̱a̱ʼání ña̱ va̱ʼa nda̱kiʼinra xa̱ʼa̱ ña̱ xi̱niso̱ʼora ña̱ ni̱ka̱ʼa̱n Jehová xíʼinra. Tá tiempo kán na̱ ñuu Israel va̱ása níxi̱yo tu̱ʼvana ña̱ ku̱ʼu̱nna nu̱ú ku̱a̱chi saáchi kǒo escudo ni lanza níxikuumiína. Soo na̱ yiví na̱ ku̱ʼu̱nna kanitáʼanna xíʼin, xi̱kuumiívana ndiʼi ña̱yóʼo. Nisaá Jehová ni̱ka̱ʼa̱nra xíʼin ta̱ Barac ña̱ ná ku̱ʼu̱nra kanitáʼanra xíʼin ta̱ Sísara xíʼin na̱ soldado cananeo na̱ ku̱a̱ʼa̱n xíʼinra (Juec. 5:8). Ñá profeta Débora ni̱ka̱ʼa̱nñá xíʼin ta̱ Barac ña̱ ná nuura yuku̱ á xi̱kí ña̱ Tabor tasaá xa̱a̱ra yoso̱ ña̱ kanitáʼanra xíʼin ta̱ Sísara xíʼin na̱ yiví na̱ ku̱a̱ʼa̱n xíʼin 900 carreta. Sana nda̱kanixi̱ní ta̱ Barac ña̱ kuchiñu na̱ yiví kán kanitáʼanna xíʼinna. Soo, nisaá xi̱niso̱ʼovara ña̱ ni̱ka̱ʼa̱n Jehová xíʼinra. Nani va̱xinuu ta̱ Barac chí yuku̱ xíʼin soldadora, ndeéní sa̱kúun Jehová sa̱vi̱. Xa̱ʼa̱ ña̱kán ni̱ti̱in ndiʼi carreta na̱ soldado na̱ ku̱a̱ʼa̱n xíʼin ta̱ Sísara nu̱ú nda̱ʼyi̱ ta ku̱chiñu ta̱ Barac sa̱ndiʼi-xa̱ʼa̱ra ndiʼina (Juec. 4:1-7, 10, 13-16). Saátu miíyó kuchiñuyó nu̱ú nda̱a̱ ndáaka tu̱ndóʼo ña̱ ná kixi nu̱úyó tá kándíxayó ña̱ káʼa̱n Jehová ta saátu tá xíniso̱ʼoyó ndiʼi ña̱ káʼa̱n na̱ ñuura xíʼinyó (Deut. 31:6).

19. ¿Nda̱chun kúni̱ún nda̱kú koo iniún xíʼin Ndióxi̱?

¹⁹ Nani íyoyó nu̱ú ñuyǐví yóʼo ná chikaa̱-iniyó ña̱ nda̱kú koo iniyó xíʼin Ndióxi̱ (1 Tim. 6:11, 12; 2 Ped. 3:17). Ná kǒo taxiyó sakúxika inka ña̱ʼa miíyó nu̱úra, tá kúú, tá íxandi̱va̱ʼana xíʼinyó, tá sáxi̱nu na̱ yiví iniyó ña̱ keʼéyó ña̱ va̱ása va̱ʼa, ki̱ʼva ña̱ ndákanixi̱ní na̱ yiví, ña̱ vatá ña̱ sánáʼa̱ na̱ yiví xíʼin ña̱ʼa ña̱ kivi kindaa tiempoyó (Efes. 4:14). Nda̱kú ná koo iniyó xíʼin Jehová, ndiʼi tiempo ná kuʼvi̱-iniyó kuniyóra ta ná kuniso̱ʼoyó ndiʼi ña̱ káʼa̱nra xíʼinyó, ta saátu va̱ʼaní ná ndakanixi̱níyó xa̱ʼa̱ ndiʼi ña̱ʼa. Nu̱ú inka artículo sakúaʼayó xa̱ʼa̱ Jehová xíʼin ta̱ Jesús, saáchi va̱ʼaní ndákanixi̱ní na̱yóʼo xa̱ʼa̱ ndiʼi ña̱ʼa, ta kotoyó ndáa ki̱ʼva kundiku̱nyó yichi̱na.