1. ¿Ndáaña sa̱kuaʼún tá ki̱xáʼún káʼviún Biblia?

 ¿Á NDÁKAʼÚN xa̱ʼa̱ ndiʼi ña̱ sa̱kuaʼún tá ki̱xáʼún káʼviún Biblia? Sana nda̱kanda̱ní-iniún tá sa̱kuaʼún ña̱ íyova ki̱vi̱ Ndióxi̱. Saátu nda̱kanda̱ní-iniún tá ku̱ndaa̱-iniún ña̱ va̱ása xáʼmi Ndióxi̱ na̱ yiví chí ndayá á infierno. Ta ni̱kusi̱íní-iniún tá sa̱kuaʼún ña̱ sandátaku Ndióxi̱ na̱ ni̱xi̱ʼi̱ ta koún xíʼinna nu̱ú ñuʼú livi.

2. ¿Ndáaka ña̱ ke̱ʼún ña̱ va̱ʼa na̱ʼún ña̱ kúni̱ún kachíñún nu̱ú Ndióxi̱? (Efesios 5:1, 2).

² Tá xa̱a̱ ni̱ya̱ʼa loʼo tiempo ña̱ káʼviún Biblia saá ki̱xáʼún kúʼvi̱-iniún xíniún Jehová. Ta xa̱ʼa̱ ña̱ kúʼvi̱-iniún xíniúnra ki̱xáʼún kéʼún ña̱ kútóora. Biblia kúú ña̱ chi̱ndeétáʼan xíʼún ña̱ vií koo ña̱ ndaka̱xiún keʼún. Nda̱a̱ táki̱ʼva kéʼé iin ta̱ loʼo ña̱ xítora ña̱ kéʼé yivára tasaá kíxáʼara kéʼéra, saátu ke̱ʼé miíún chi ki̱xáʼún kéʼún ña̱ kútóo yiváún Jehová (kaʼvi Efesios 5:1, 2).

3. ¿Ndáa pregunta kúú ña̱ kivi ndakanixi̱níyó xa̱ʼa̱?

³ Kivi ndakanixi̱níyó xa̱ʼa̱ ña̱yóʼo: “¿Á kúʼvi̱ka-inii̱ xínii̱ Jehová nda̱a̱ táki̱ʼva xi̱keʼíi̱ tá sa̱kán nda̱kuchii̱? ¿Á kítáʼan ña̱ ndákanixi̱níi̱ xíʼin ki̱ʼva ña̱ ndákanixi̱ní Jehová, tá kúú ña̱ kuʼvi̱-inii̱ kunii̱ na̱ hermano?”. Tá va̱ása kúʼvi̱ka-iniyó xíniyó na̱ hermanoyó nda̱a̱ táki̱ʼva xi̱keʼéyó tá ya̱chi̱ ná va̱ása ndakava-iniyó, saáchi ña̱yóʼo kúú ña̱ ndo̱ʼo na̱ cristiano na̱ ni̱xi̱yo tá siglo nu̱ú. Soo ta̱ Jesús kǒo níndakanixi̱níra ña̱ va̱ása kuchiñukana na̱ʼa̱na ña̱yóʼo, ta ki̱ʼva saá íyo ña̱ ndákanixi̱níra xa̱ʼa̱ miíyó tiempo vitin (Apoc. 2:4, 7). Ta̱ Jesús kúnda̱a̱-inira ña̱ kivi kixáʼa tukuyó ku̱ʼvi̱-iniyó kuniyó Jehová nda̱a̱ táki̱ʼva ke̱ʼéyó tá sa̱kán ki̱xáʼayó sákuaʼayó xa̱ʼa̱ra.

4. ¿Ndáaña sakúaʼayó nu̱ú artículo yóʼo?

 ⁴ Ti̱xin artículo yóʼo sakúaʼayó ndáaña kivi keʼéyó tasaá kuʼvi̱ka-iniyó kuniyó Jehová xíʼin inka na̱ yiví. Ta saátu kotoyó ndáaña va̱ʼa ndakiʼinyó xíʼin ña̱ ndakiʼin inkana tá ná keʼéyó ña̱yóʼo.

5, 6. a) ¿Ndáa tu̱ndóʼo kúú ña̱ ni̱ya̱ʼa ta̱ Pablo tá xi̱natúʼunra xa̱ʼa̱ Ndióxi̱? b) ¿Ndáaña chi̱ndeétáʼan xíʼinra ña̱ kachíñukara nu̱ú Jehová?

⁵ Ta̱ apóstol Pablo xi̱kusi̱íní-inira tá xi̱natúʼunra xa̱ʼa̱ Ndióxi̱, soo ni̱ya̱ʼara nu̱ú ku̱a̱ʼání tu̱ndóʼo. Sava yichi̱ xi̱niñúʼu xíkaní ku̱ʼu̱nra ña̱ va̱ʼa natúʼunra xa̱ʼa̱ Ndióxi̱ xíʼin na̱ yiví, ta xi̱ ixayo̱ʼvi̱ní ña̱yóʼo xíʼinra. Tá kúú, xi̱niñúʼu ya̱ʼara yu̱ta náʼnu ta saátu nu̱ú íyo na̱ kui̱ʼná. Ta na̱ yiví na̱ xi̱saa̱ní-ini xi̱xiniñaʼá xi̱ ixandi̱va̱ʼanína xíʼinra (2 Cor. 11:23-27). Ku̱a̱ʼání chiñu ke̱ʼé ta̱ apóstol Pablo ña̱ va̱ʼa chindeétáʼanra xíʼin na̱ hermano, soo sava yichi̱ kǒo níxi̱ndayáʼviña nu̱úna (2 Cor. 10:10; Filip. 4:15).   

⁶ ¿Ndáaña chi̱ndeétáʼan xíʼin ta̱ apóstol Pablo ña̱ kǒo nísandákoora ña̱ kachíñura nu̱ú Jehová? Ku̱a̱ʼání ña̱ sa̱kúaʼara xa̱ʼa̱ Jehová tá xi̱kaʼvira tu̱ʼunra, ta saátu ku̱a̱ʼání ña̱ sa̱kúaʼara xíʼin ña̱ ndo̱ʼora. Ta xi̱kandíxara ña̱ xi̱kuʼvi̱ní-ini Jehová xi̱xinirara (Rom. 8:38, 39; Efes. 2:4, 5). Ña̱yóʼo chi̱ndeétáʼan xíʼin ta̱ apóstol Pablo ña̱ kuʼvi̱ka-inira kunira Jehová, ta ni̱na̱ʼa̱ra ña̱yóʼo tá ka̱chíñura nu̱ú na̱ nda̱kaxin Ndióxi̱ ku̱ʼu̱n chí ndiví ta chi̱ndeétáʼanra xíʼinna (Heb. 6:10).

7. ¿Ndáaña chindeétáʼan xíʼinyó ña̱ kuʼvi̱níka-iniyó kuniyó Jehová?

⁷ Ña̱ va̱ʼa kuʼvi̱ka-iniyó kuniyó Jehová xíniñúʼu viíní kaʼviyó Biblia. Ta tá káʼviyóña xíniñúʼu kotoyó ndáaña sánáʼa̱ ña̱yóʼo miíyó xa̱ʼa̱ Jehová. Saátu kivi ndakanixi̱níyó xa̱ʼa̱ pregunta yóʼo: “¿Ndáa ki̱ʼva náʼa̱ versículo ña̱ ka̱ʼvii̱ yóʼo ña̱ kúʼvi̱ní-ini Jehová xínira yi̱ʼi̱? ¿Ndáa ki̱ʼva chíndeétáʼanña xíʼi̱n ña̱ kuʼvi̱ka-inii̱ kunii̱ra?”.

8. ¿Ndáa ki̱ʼva chíndeétáʼan oración xíʼinyó ña̱ kuʼvi̱ka-iniyó kuniyó Jehová?

⁸ Iin ña̱ chindeétáʼan xíʼinyó ña̱ kuʼvi̱ka-iniyó kuniyó Jehová kúú ña̱ ka̱ʼa̱nyó xíʼinra ndiʼi saá ki̱vi̱ (Sal. 25:4, 5). Ta miíra ndákuiinvara ña̱ káʼa̱nyó xíʼinra (1 Juan 3:21, 22). Iin ñá hermana ñá íyo chí Asia ñá naní Khanh, b káchiñá: “Tá ya̱chi̱, xi̱kuʼvi̱-inii̱ xi̱xinii̱ Jehová xa̱ʼa̱ ña̱ xi̱kunda̱a̱-inii̱ xa̱ʼa̱ra. Soo tá ki̱ʼi̱n kuenta ña̱ ndákuiinra oración ña̱ kéʼíi̱ nu̱úra saá ki̱xáʼíi̱ kúʼvi̱níka-inii̱ xínii̱ra, ta ña̱yóʼo chi̱ndeétáʼanña xíʼi̱n ña̱ keʼíi̱ ña̱ kútóora”.

9. ¿Ndáa ki̱ʼva ni̱na̱ʼa̱ ta̱ Timoteo ña̱ xi̱kuʼvi̱ní-inira xi̱xinira na̱ hermano?

⁹ Tá ni̱ya̱ʼa loʼo ku̱i̱ya̱ ña̱ ki̱xáʼa ta̱ Pablo ndásakáʼnura Ndióxi̱, saá xi̱nitáʼanra xíʼin ta̱ Timoteo. Ta̱ loʼo yóʼo xi̱kuʼvi̱ní-inira xi̱nira Jehová xíʼin na̱ yiví. Tá ni̱ya̱ʼa tiempo, ña̱yóʼo ni̱ka̱ʼa̱n ta̱ Pablo xíʼin na̱ Filipenses xa̱ʼa̱ ta̱ Timoteo: “Kǒo nda̱a̱ ni iinna íyo nda̱a̱ táki̱ʼva íyo ta̱yóʼo, chi ta̱yóʼo ndixaní ndíʼi̱-inira xa̱ʼa̱ndó” (Filip. 2:20). Soo ta̱ Pablo va̱ása níka̱ʼa̱nra xa̱ʼa̱ ña̱ va̱ʼaní xi̱kachíñu ta̱ Timoteo ti̱xin congregación á ña̱ va̱ʼaní xi̱taxira discurso. Chi ña̱ ni̱ka̱ʼa̱nra xa̱ʼa̱ kúú ña̱ xi̱ndi̱ʼi̱ní-inira xa̱ʼa̱ na̱ hermano ta xi̱kuʼvi̱ní-inira xi̱xinirana. Xa̱ʼa̱ ña̱yóʼo, xi̱kuni̱ní na̱ hermano ña̱ ku̱ʼu̱nra kotorana (1 Cor. 4:17).

10. ¿Ndáa ki̱ʼva ni̱na̱ʼa̱ ñá Anna xíʼin yii̱ñá ña̱ kúʼvi̱ní-inina xínina na̱ hermano?

¹⁰ Saátu miíyó ndúkúyó ki̱ʼva ña̱ chindeétáʼanyó xíʼin na̱ hermano (Heb. 13:16).  ¿Á ndákaʼánndó xa̱ʼa̱ ñá Anna ñá ni̱ka̱ʼa̱nyó xa̱ʼa̱ nu̱ú artículo ña̱ ni̱ya̱ʼa? Tá ndi̱ʼi ku̱un sa̱vi̱, ñáyóʼo ni̱xa̱ʼa̱nñá xíʼin yii̱ñá ña̱ xi̱tona iin familia na̱ kúú testigo Jehová, ta xi̱nina ña̱ nda̱kava xi̱ní veʼe na̱yóʼo. Xa̱ʼa̱ ña̱kán, ku̱yaku̱a̱ ndiʼi ti̱ko̱to̱ na̱ familia kán. Ñá Anna nátúʼunñá ndáa ki̱ʼva chi̱ndeétáʼanna xíʼin na̱ familia yóʼo: “Nda̱kiʼinndi̱ ti̱ko̱to̱na ni̱xa̱ʼa̱n xíʼinndi̱ ta nda̱katandi̱ña, tándi̱ʼi i̱xaa planchandi̱ña ta nda̱kaʼnu̱ndi̱ña tasaá ta̱xindi̱ña ndaʼa̱na. Su̱ví ña̱ ndeéví kúú ña̱ ke̱ʼéndi̱ xa̱ʼa̱ na̱ hermano yóʼo, soo chi̱ndeétáʼanña xíʼinndi̱ ña̱ viíka kutáʼanndi̱ xíʼinna”. Xa̱ʼa̱ ña̱ kúʼvi̱-ini ñá Anna xíʼin yii̱ñá xínina na̱ hermano kúú ña̱ chi̱ndeétáʼanna xíʼinna (1 Juan 3:17, 18).

11. a) ¿Ndáaña ndákanixi̱ní inkana tá kúʼvi̱-iniyó xíniyóna? b) Nda̱a̱ táki̱ʼva káʼa̱n Proverbios 19:17, ¿ndáaña kéʼé Jehová tá kúʼvi̱-iniyó xíniyó inkana?

¹¹ Tá vií kéʼéyó xíʼin inkana ta va̱ʼa-iniyó xíʼinna, saá kéʼéyó nda̱a̱ táki̱ʼva kéʼé mií Jehová. Ta ndiʼi ña̱ kéʼéyó kíʼinva inkana kuenta xíʼinña. Ta sana miíyó kǒo kíʼinyó kuenta ndáa ki̱ʼva chíndeétáʼan ña̱ kéʼéyó xíʼin inkana. Ñá Khanh ñá ni̱ka̱ʼa̱nyó xa̱ʼa̱ nu̱ú párrafo 8, ndákaʼánñá xa̱ʼa̱ ndiʼi na̱ chi̱ndeétáʼan xíʼinñá. Ñáyóʼo káchiñá: “Táxiníi̱ tíxa̱ʼvi ndaʼa̱ ndiʼi ná hermana ná chi̱ndeétáʼan xíʼi̱n tá xi̱xaʼi̱n xi̱natúʼi̱n xa̱ʼa̱ Ndióxi̱. Saáchi xi̱kixiná xa̱ʼíi̱ nda̱a̱ veʼi̱, xi̱taxiná ña̱ xi̱xixii̱, tándi̱ʼi xi̱xa̱ʼa̱nná xi̱ndakaná yi̱ʼi̱ veʼi̱. Vitin xítoi̱ ña̱ sana i̱xayo̱ʼvi̱vaña xíʼin náyóʼo, soo xíʼin ndiʼi níma̱ná xi̱keʼénáña”. Soo su̱ví ndiʼiví na̱ chíndeétáʼanyó xíʼin taxina tíxa̱ʼvi ndaʼa̱yó, ña̱yóʼo káʼa̱n ñá Khanh xa̱ʼa̱ na̱ chi̱ndeétáʼan xíʼinñá: “Kúni̱i̱ keʼíi̱ ña̱ va̱ʼa xa̱ʼa̱ iin tá iin na̱ chi̱ndeétáʼan xíʼi̱n, soo kǒo xíni̱i̱ ndáamíí ndóona. Ña̱kán káʼi̱n xíʼin Jehová ná chindeétáʼanra xíʼinna”. Ni loʼoní ña̱ kéʼéyó xa̱ʼa̱ na̱ hermano, soo Jehová kíʼinvara kuenta xíʼinña. Tá xíto Jehová ña̱ chíndeétáʼanyó xíʼin inkana,  nda̱a̱ táki̱ʼva íyo ña̱ níkára nu̱úyó saá íyoña ta kúni̱ra chaʼviraña nu̱úyó (kaʼvi Proverbios 19:17). c

12. ¿Ndáa ki̱ʼva na̱ʼa̱ iin ta̱ hermano ña̱ kúʼvi̱-inira xínira ndiʼi na̱ congregación? (Koto na̱ʼná).

¹² Tá iin ta̱ hermano kúún, ¿ndáa ki̱ʼva náʼún ña̱ kúʼvi̱-iniún xíniún na̱ congregación? Ña̱ chindeétáʼún xíʼinna. Iin ta̱ loʼo ta̱ naní Jordan ni̱nda̱ka̱tu̱ʼunra iin ta̱ anciano ndáaña xíniñúʼu keʼéra ña̱ va̱ʼa chindeétáʼankara xíʼin na̱ hermano. Ta̱ anciano ni̱ka̱ʼa̱nra xíʼinra ña̱ va̱ʼaní chíñu kéʼéra, soo saátu ni̱ka̱ʼa̱nra xíʼinra ndáaka ña̱ kivi keʼéra. Tá kúú, ña̱ ya̱chi̱ka xa̱a̱ra salón ta chindeéra na̱ hermano, ña̱ taxira comentario ti̱xin reunión, ña̱ kee ni̱ʼira natúʼunra xa̱ʼa̱ Ndióxi̱ xíʼin na̱ hermano grupo nu̱ú ndíkaa̱ra ta ndukúra ndáa ki̱ʼva chindeétáʼankara xíʼin na̱ hermano. Ña̱yóʼo chi̱ndeétáʼanña xíʼin ta̱ Jordan ña̱ nda̱kiʼinra inkaka chiñu ta saátu sa̱kúaʼara ña̱ kuʼvi̱ka-inira kunira na̱ hermano. Saátu ki̱ʼinra kuenta ña̱ ndiʼi tiempo xíniñúʼu chindeétáʼan na̱ siervo ministerial xíʼin na̱ hermano su̱ví tá ndákiʼin kuitína chiñu yóʼo (1 Tim. 3:8-10, 13).

13. ¿Ndáaña chi̱ndeétáʼan xíʼin ta̱ Christian ña̱ va̱ʼa ndikó tukura koora anciano?

¹³ ¿Á ni̱xi̱yoún anciano á siervo ministerial tá ya̱chi̱? Jehová va̱ása nándósó-inira xa̱ʼa̱ chiñu ña̱ ke̱ʼún xa̱ʼa̱ra xíʼin ña̱ ni̱ku̱ʼvi̱-iniún xi̱niúnra (1 Cor. 15:58). Ta kíʼinníra kuenta ña̱ chíkaa̱níún ndee̱ ña̱ kúʼvi̱ní-iniún xíniúnra. Iin ta̱ hermano ta̱ naní Christian ku̱suchíní-inira tá sa̱ndákoora ña̱ kúúra anciano. Soo ta̱yóʼo kǒo nísandákoora ña̱ ndasakáʼnura Ndióxi̱, ta̱yóʼo káchira: “Ni va̱ása níxi̱kuukai̱ anciano, soo ni saá chi̱kaa̱nívai̱ ndee̱ ña̱ kachíñui̱ nu̱ú Jehová ta kuʼvi̱-inii̱ kunii̱ra”. Tá ni̱ya̱ʼa  tiempo ki̱xáʼa tukura kúúra anciano. Ta̱yóʼo káchira: “Tá ni̱ka̱ʼa̱nna xíʼi̱n ña̱ ndikó tukui̱ koi̱ anciano nda̱kanixi̱níi̱ ña̱ va̱ása kuchiñui̱ keʼíi̱ chiñu yóʼo, soo tá Jehová táxi tukura chiñu yóʼo ndaʼíi̱ keʼévai̱ña xa̱ʼa̱ ña̱ kúʼvi̱-inii̱ xínii̱ra xíʼin ña̱ kúʼvi̱-inii̱ xínii̱ na̱ hermano”.

14. ¿Ndáaña sákuaʼayó xíʼin ña̱ ni̱ka̱ʼa̱n ñá Elena?

¹⁴ Miíyó na̱ ndásakáʼnu Jehová xíniñúʼu na̱ʼa̱yó ña̱ kúʼvi̱-iniyó xíniyó na̱ kǒo ndásakáʼnu miíra (Mat. 22:37-39). Tá kúú iin ñá hermana ñá naní Elena ñá íyo chí Georgia, káchiñá: “Tá xa̱ʼa̱ xi̱natúʼi̱n xíʼin na̱ yiví xa̱ʼa̱ ña̱ kúʼvi̱-inii̱ xínii̱ Jehová, soo tá ni̱ya̱ʼa tiempo ki̱xáʼa kúʼvi̱níka-inii̱ xínii̱ra ta ña̱yóʼo chi̱ndeétáʼanña xíʼi̱n ña̱ kuʼvi̱-inii̱ kunii̱ na̱ yiví. Xi̱ndakanixi̱níi̱ ndáa tu̱ndóʼo kúú ña̱ xi̱ndoʼona ta xi̱nandukúi̱ ndáaña kivi chindeétáʼan xíʼinna. Vitin kúsi̱íní-inii̱ ña̱ chíndeétáʼi̱n xíʼinna” (Rom. 10:13-15).

15, 16. Nda̱a̱ táki̱ʼva xítoyó nu̱ú na̱ʼná ña̱ va̱xi yóʼo, ¿ndáaña va̱ʼa ndákiʼinyó xa̱ʼa̱ ña̱ kúʼvi̱-iniyó xíniyó inkana?

¹⁵ Tá náʼa̱yó ña̱ kúʼvi̱-iniyó xíniyó na̱ hermanoyó, nda̱a̱ inka na̱ yiví ndákiʼin ña̱ va̱ʼa xa̱ʼa̱ ña̱yóʼo. Tá xi̱ndikaa̱ ña̱ COVID-19, ta̱ Paolo xíʼin ñá síʼira sa̱náʼa̱na ku̱a̱ʼání ná hermana ná xa̱a̱ ku̱chée, ndáa ki̱ʼva kuniñúʼuná celularná á tabletaná ña̱ va̱ʼa natúʼunná xíʼin na̱ yiví xa̱ʼa̱ Ndióxi̱. Soo iin ñá hermana ñá xa̱a̱ chée va̱ása níkuchiñuñá kuniñúʼuñá teléfonoñá. Soo tá ni̱ya̱ʼa tiempo sa̱kúaʼavañá kuniñúʼuñáña ta ni̱ka̱ʼa̱nñá xíʼin na̱ veʼeñá ña̱ ná kotona Conmemoración. Ta 60 na̱yóʼo xi̱to Conmemoración  chí videoconferencia. Va̱ʼaní chiñu ke̱ʼé ta̱ Paolo xíʼin ñá síʼira xa̱ʼa̱ ña̱ va̱ʼaní sa̱náʼa̱na ñá hermana yóʼo. Ña̱yóʼo ni̱ka̱ʼa̱nñá xíʼin ta̱ Paolo: “Tíxa̱ʼviún ña̱ sa̱náʼún ndi̱ʼi̱, kíʼi̱n kuenta ña̱ ndíʼi̱ní-ini Jehová xa̱ʼa̱ndi̱, ta tíxa̱ʼvindó xa̱ʼa̱ ña̱ va̱ʼaní sa̱náʼa̱ndó ndi̱ʼi̱”.

¹⁶ Íyo iin ña̱ ndáyáʼviní sa̱kúaʼa ta̱ Paolo xíʼin ña̱yóʼo. Sa̱kúaʼara ña̱ ndáyáʼviníka kuʼvi̱-inira kunira na̱ hermano nu̱úka ña̱ viíní keʼéra iin chiñu. Ta̱yóʼo káchira: “Sana va̱ása ndákaʼánkaví na̱ hermano xa̱ʼa̱ discurso ña̱ xi̱taxii̱ tá xi̱kui̱ superintendente ña̱ circuito, soo ndákaʼánvana ndáa ki̱ʼva chi̱ndeétáʼi̱n xíʼinna”.   

17. ¿Ndáaña va̱ʼa ndákiʼinyó tá chíndeétáʼanyó xíʼin inkana?

¹⁷ Tá kúʼvi̱-iniyó xíniyó inkana, ku̱a̱ʼání ña̱ va̱ʼa kivitu ndakiʼin miívayó. Ña̱yóʼo kúú ña̱ ndo̱o iin ta̱ hermano ta̱ ñuu Nueva Zelanda ta̱ naní Jonathan. Iin ki̱vi̱ sábado, ni niʼníní ta̱yóʼo xi̱nira ña̱ níndichi iinlá mií ta̱ precursor nátúʼunra xa̱ʼa̱ Ndióxi̱ xíʼin na̱ yiví. Tasaá chi̱kaa̱-inira ña̱ ku̱ʼu̱nra xíʼinra natúʼunra xíʼin na̱ yiví ndiʼi sábado tá xi̱kuaá. Soo kǒo níndakanixi̱ní ta̱ Jonathan ña̱ ku̱a̱ʼání ña̱ va̱ʼa ndakiʼinra xa̱ʼa̱ ña̱yóʼo. Ta̱yóʼo káchira: “Tiempo saá kǒo níxi̱kutói̱ natúʼi̱n xíʼin na̱ yiví xa̱ʼa̱ Ndióxi̱. Soo xa̱ʼa̱ ña̱ xi̱nii̱ ña̱ va̱ʼaní xi̱sanáʼa̱ ta̱ precursor kán ta va̱ʼaní xi̱xiniso̱ʼona ña̱ xi̱ka̱ʼa̱nra, nda̱a̱ miíi̱ ki̱xáʼa kutóo keʼé ña̱yóʼo. Va̱ʼaní ki̱xáʼíi̱ kítáʼi̱n xíʼin ta̱ hermano yóʼo ta va̱ʼaní chíndeétáʼanra xíʼi̱n koi̱ migo Jehová ta saátu ña̱ ku̱a̱ʼáka chiñu keʼíi̱ nu̱úra”.

18. ¿Ndáaña kúni̱ Jehová ná keʼéyó?

¹⁸ Jehová kúni̱ra ña̱ ná kuʼvi̱ní-iniyó kuniyóra ta saátu ña̱ kuʼvi̱-iniyó kuniyó inka na̱ yiví. Nda̱a̱ táki̱ʼva íyo ña̱ sa̱kúaʼayó, ña̱ va̱ʼa xa̱a̱yó kuʼvi̱-iniyó kuniyó Jehová, xíniñúʼu kaʼviyó tu̱ʼunra, ndakanixi̱níyó xa̱ʼa̱ña ta saátu ndiʼi ki̱vi̱ ka̱ʼa̱nyó xíʼinra. Ta ña̱ va̱ʼa na̱ʼa̱yó ña̱ kúʼvi̱-iniyó xíniyó na̱ hermanoyó xíniñúʼu chindeétáʼanyó xíʼinna. Tá ná kuʼvi̱ka-iniyó kuniyó Jehová xíʼin na̱ hermanoyó, saá kúú ña̱ va̱ʼaníka kutáʼanyó xíʼinna ndiʼi tiempo.