XA̱A̱ ku̱a̱ʼání millón ndo̱ʼo ndátava na̱ arqueólogo ña̱ xi̱niñúʼuna tá na̱kuva̱ʼa ñuu Babilonia. Ta̱ arqueólogo Robert Koldewey káʼa̱nra ña̱ xi̱ ixava̱ʼana ndo̱ʼo yóʼo “chí sa̱tá ñuu, saáchi va̱ʼaní ñuʼú ni̱xi̱yo” ta ku̱a̱ʼání ndaʼa̱ yitu̱n yichi̱ ni̱xi̱yo, ña̱kán xi̱xaʼminaña ini horno ña̱ ni̱xi̱yo chí sa̱tá ñuu.

Tutu ña̱ ni̱ka̱ʼyi̱ xi̱naʼá ña̱ káʼa̱n xa̱ʼa̱ ñuu Babilonia káʼa̱nña xa̱ʼa̱ na̱ chíñu na̱ ni̱xi̱yo ñuu kán ña̱ xi̱xiniñúʼuna horno xa̱ʼa̱ inkava ña̱ʼa. Ta̱ Paul-Alain Beaulieu, ta̱ kúú profesor ña̱ Asiriología ña̱ Universidad ña̱ Toronto káchira: “Tutu ña̱ káʼa̱n xa̱ʼa̱ ñuu Babilonia káʼa̱nña ña̱ ta̱ rey xi̱xaʼndara chiñu ña̱ ná kaʼmina na̱ yiví na̱ kǒo ní xi̱ ixato̱ʼó miíra ta saátu na̱ kǒo ní xi̱ ixato̱ʼó ndióxi̱ ña̱ xi̱ndasakáʼnura. Iin tutu ña̱ káʼa̱n xa̱ʼa̱ tá tiempo ña̱ ni̱xi̱yo ta̱ rey Nabucodonosor káʼa̱nña ña̱yóʼo: “Sandíʼi-xa̱ʼa̱ndóna, kaʼmindóna, sayátandóna ti̱xin horno nu̱ú íxava̱ʼana ña̱ʼa nda̱a̱ ná kana yi̱ʼma̱na. Ta ná koko ndiʼina xíʼin ñuʼu̱”

Ndiʼi na̱ káʼvi Biblia ndákaʼánna xa̱ʼa̱ ña̱ va̱xi nu̱ú capítulo 3 ña̱ libro ta̱ Daniel tá káʼvina xa̱ʼa̱ ña̱yóʼo. Nu̱ú Biblia káʼa̱nña xa̱ʼa̱ ta̱ rey Nabucodonosor ña̱ i̱xava̱ʼara iin estatua ña̱ oro chí sa̱tá ñuu Babilonia chí yoso̱ ña̱ Dura. Ta ni̱ka̱ʼa̱nna xíʼin u̱ni̱ ta̱ va̱lí hebreo ta̱ naní Sadrac, Mesac xíʼin Abednego ña̱ ndasakáʼnuna ña̱yóʼo, soo na̱ va̱lí yóʼo kǒo níxiinna kuxítina nu̱úña, ña̱kán ni̱sa̱a̱ní ta̱ rey kán, ta xa̱ʼndara chiñu ña̱ u̱xa̱ yichi̱ka ná sasáa̱na horno kán ta taánna na̱ va̱lí kán iniña. Soo iin ángel sa̱káku na̱yóʼo ta va̱ása níxi̱ʼi̱na (Dan. 3:1-6, 19-28).

Ndo̱ʼo ña̱ ndani̱ʼína ñuu Babilonia náʼa̱ña ña̱ nda̱a̱ kúú ña̱ káʼa̱n Biblia ta xíniñúʼu kandíxaníyóña. Ku̱a̱ʼání nu̱ú ndo̱ʼo yóʼo ni̱ka̱ʼyi̱ ña̱ káʼa̱n ña̱ ná ndasakáʼnuna ta̱ rey, iin nu̱ú ndo̱ʼo yóʼo káchiña: “Yi̱ʼi̱ ta̱ rey Nabucodonosor ta̱ ñuu Babilonia, i̱xava̱ʼi̱ veʼe káʼnú nu̱ú xáʼndachíñui̱, veʼe nu̱ú íyoi̱, ndiʼi na̱ se̱ʼi̱ ná kaʼndachíñuna ndiʼi tiempo ti̱xinña”. Ta ña̱yóʼo kítáʼanníña xíʼin ña̱ va̱xi nu̱ú Daniel 4:30, nu̱ú káʼa̱n ta̱ Nabucodonosor ña̱yóʼo: “¿Á su̱ví yi̱ʼi̱ kúú ta̱ i̱xava̱ʼa Babilonia ña̱ káʼnu, ña̱ liviní, ña̱ va̱ʼa ndukáʼnu ki̱víi̱?”