1. ¿Ama kúú ña̱ xíniñúʼu kooyó nda̱a̱ táki̱ʼva íyo tú palma? (Koto na̱ʼná).

 “YITU̱N tú si̱i á xi̱i va̱ása táʼnu̱nú ni ndeéní káni ta̱chí”. Tá kúú tú palma, ni ndeéní ná kani ta̱chí xa̱ʼa̱ ki̱ʼva ña̱ na̱kuva̱ʼa túyóʼo va̱ása ta̱ʼnu̱nú. Ta saátu miíyó, tá kúni̱yó viíka kutáʼanyó xíʼin Ndióxi̱ xíniñúʼu kundeé-iniyó tá yáʼayó nu̱ú tu̱ndóʼo soo saátu xíniñúʼu vitá koo iniyó ta nasamayó ña̱ ndákanixi̱níyó. Ta kivi keʼéyó ña̱yóʼo tá nása̱ma ña̱ ndóʼoyó á tá xíniñúʼu ixato̱ʼóyó ña̱ ndákanixi̱ní inkana xíʼin ña̱ ndáka̱xinna keʼéna.

2. ¿Ndáaña kivi chindeétáʼan xíʼinyó tá nása̱ma ña̱ ndóʼoyó, ta ndáaña sakúaʼayó nu̱ú artículo yóʼo?

² Ndiʼi miíyó na̱ ndásakáʼnu Jehová xíniñúʼu chika̱a̱yó ndee̱ ña̱ ndakani vií xi̱níyó, vitá koo-iniyó ta kundáʼvi-iniyó kuniyó inkana. Nu̱ú artículo yóʼo kotoyó ndáa ki̱ʼva chi̱ndeétáʼan ña̱ xa̱a̱ ni̱ka̱ʼa̱nyó xa̱ʼa̱ yóʼo xíʼin sava na̱ hermano tá ni̱ya̱ʼana nu̱ú tu̱ndóʼo, ta ná kotoyó ndáa ki̱ʼva kundiku̱nyó yichi̱na. Soo siʼnaka ná sakúaʼayó xa̱ʼa̱ Jehová xíʼin ta̱ Jesús chi na̱yóʼo kúú mií na̱ va̱ʼaníka kúnda̱a̱-ini xíʼin ña̱ ndóʼoyó.

3. ¿Nda̱chun va̱ʼa xíni̱yó ña̱ viíní ndákanixi̱ní Jehová?

³ Biblia káʼa̱nña xa̱ʼa̱ Jehová ña̱ íyora nda̱a̱ táki̱ʼva íyo iin “Yu̱u̱” saáchi íyora ndiʼi tiempo ta kǒo nása̱mara (Deut. 32:4). Soo saátu viíní ndákanixi̱níra á kúnda̱a̱-inira xíʼin ña̱ ndóʼoyó, ¿nda̱chun va̱ʼa xíni̱yó ña̱yóʼo? Saáchi tá nása̱ma ña̱ʼa nu̱ú ñuʼú yóʼo, saátu Jehová násamara ki̱ʼva ña̱ kéʼéra sava ña̱ʼa ña̱ va̱ʼa xi̱nu ña̱ kúni̱ra koo chí nu̱únínu. Xa̱ʼa̱ ña̱ i̱xava̱ʼa Jehová miíyó nda̱a̱ táki̱ʼva íyora va̱ása íxayo̱ʼvi̱ña xíʼinyó nasamayó ña̱ ndákanixi̱níyó. Nu̱ú tu̱ʼunra va̱xi consejo ña̱ kivi chindeétáʼan xíʼinyó ña̱ ndaka̱xin viíyó ña̱ keʼéyó tá yáʼayó nu̱ú tu̱ndóʼo. Ña̱ kéʼé Jehová xíʼin ña̱ káʼa̱nra xíʼinyó nu̱ú tu̱ʼunra náʼa̱ña ña̱ va̱ása násamara  ki̱ʼva ña̱ íyora, soo kúnda̱a̱va-inira xíʼin ña̱ ndóʼoyó.

4. Ka̱ʼa̱n xa̱ʼa̱ iin ejemplo ña̱ náʼa̱ ña̱ va̱ʼaní kúnda̱a̱-ini Jehová xíʼin ña̱ ndóʼoyó (Levítico 5:7, 11).

⁴ Ndiʼi ña̱ káʼa̱n Jehová xíʼinyó va̱ʼaníña ta nda̱kúníña. Ta kǒo íxandúxara xíʼinyó ña̱ keʼéyó iin ña̱ʼa. Ná kotoyó ndáa ki̱ʼva ke̱ʼéra xíʼin na̱ ñuu Israel. Tá kúú, kǒo ní ixandúxara xíʼin na̱ nda̱ʼví ni xíʼin na̱ ku̱i̱ká ña̱ inkáchi sacrificio taxina ndaʼa̱ra. Ley xi̱ka̱ʼa̱nña xa̱ʼa̱ ku̱a̱ʼá nu̱ú ña̱ʼa ña̱ kivi taxi na̱ yiví ndaʼa̱ Jehová, chi savana xi̱kuuna na̱ nda̱ʼví ta savana xi̱kuuna na̱ ku̱i̱ká (kaʼvi Levítico 5:7, b 11). c

5. Ka̱ʼa̱n xa̱ʼa̱ iin ejemplo ña̱ náʼa̱ ña̱ vitání-ini Jehová ta saátu ña̱ kúndáʼvi-inira xínira na̱ yiví.

⁵ Va̱ʼaní ndákanixi̱ní Jehová saáchi va̱ʼaní-inira ta kúndáʼvi-inira xínina na̱ yiví, tá kúú ni̱na̱ʼa̱ra ña̱ vitá-inira tá xa̱a̱ ku̱nu̱mí sandíʼi-xa̱ʼa̱ra na̱ yiví na̱ ni̱xi̱yo Sodoma. Jehová xi̱niñúʼura na̱ ángel ña̱ ku̱ʼu̱nna ka̱ʼa̱nna xíʼin ta̱ Lot ña̱ ná kunura ku̱ʼu̱nra chí yuku̱ saáchi sandíʼi-xa̱ʼa̱na ñuu nu̱ú íyora. Soo ta̱ Lot ni̱yi̱ʼvíra ku̱ʼu̱nra chí yuku̱, xa̱ʼa̱ ña̱kán xa̱kundáʼvira nu̱ú Jehová, ña̱ ná taxira ku̱ʼu̱nra xíʼin na̱ veʼera chí ñuu Zóar, iin ñuu loʼo ña̱ nda̱kanixi̱ní Jehová sandíʼi-xa̱ʼa̱ra. Kiviva ka̱ʼa̱n Jehová xíʼin ta̱ Lot ña̱ keʼéra nda̱a̱ táki̱ʼva íyo ña̱ ni̱ka̱ʼa̱nra xíʼinra, soo va̱ása ní ixandúxa̱víra xíʼinra, chi xi̱niso̱ʼora ña̱ ni̱ka̱ʼa̱n ta̱ Lot ta va̱ása nísandíʼi-xa̱ʼa̱ra ñuu Zóar (Gén. 19:18-22). Tá ni̱ya̱ʼa ku̱a̱ʼá ku̱i̱ya̱ saátu ni̱na̱ʼa̱ra ña̱ ku̱ndáʼvi-inira xi̱nira na̱ ñuu Nínive. Xa̱ʼa̱ ña̱kán chi̱ndaʼára ta̱ profeta Jonás ña̱ ka̱ʼa̱nra xíʼin na̱ ñuu kán ña̱ sandíʼi-xa̱ʼa̱ra ndiʼina xa̱ʼa̱ ña̱ kininí xi̱keʼéna. Soo xa̱ʼa̱ ña̱ ndi̱kó-inina, Jehová i̱xakáʼnu-inira xa̱ʼa̱na ta kǒo nísandíʼi-xa̱ʼa̱rana (Jon. 3:1, 10; 4:10, 11).

6. ¿Ndáaña náʼa̱ ña̱ va̱ʼaní ndákanixi̱ní ta̱ Jesús nda̱a̱ táki̱ʼva ndákanixi̱ní yivára?

⁶ Nda̱a̱ táki̱ʼva ndákanixi̱ní Jehová saá ndákanixi̱ní ta̱ Jesús, ta ni̱na̱ʼa̱ra ña̱yóʼo tá ki̱xira nu̱ú ñuʼú. Ña̱ nda̱a̱, nda̱saa xíʼin na̱ ñuu Israel xi̱niñúʼu natúʼun ta̱ Jesús xa̱ʼa̱ Ndióxi̱, soo nisaá iin yichi̱ chi̱ndeétáʼanra xíʼin iin ñaʼá ñá inka ñuu. Ñá ñaʼá yóʼo xa̱ku-ndáʼviñá nu̱ú ta̱ Jesús, ña̱ ná sandáʼara se̱ʼeñá saáchi xi̱kuumiíñá ta̱chí ndi̱va̱ʼa. Ta̱ Jesús ku̱ndáʼviní-inira xi̱nira ñá ñaʼá yóʼo, xa̱ʼa̱ ña̱kán sa̱ndáʼara ñá loʼo se̱ʼeñá (Mat. 15:21-28). Ná ka̱ʼa̱nyó xa̱ʼa̱ inka ejemplo, tá sa̱kán ki̱xáʼa ta̱ Jesús nátúʼunra xíʼin na̱ yiví xa̱ʼa̱ Ndióxi̱, ña̱yóʼo ni̱ka̱ʼa̱nra: “Tá iinna káʼa̱nna ña̱ va̱ása xíni̱na yi̱ʼi̱ nu̱ú na̱ yiví, saátu yi̱ʼi̱ ka̱ʼi̱n ña̱ va̱ása xíni̱i̱na” (Mat. 10:33). U̱ni̱ yichi̱ ni̱ka̱ʼa̱n ta̱ Pedro ña̱ va̱ása xíni̱ra ta̱ Jesús, xa̱ʼa̱ ña̱kán, ¿á xi̱kuni̱ka ta̱ Jesús kutáʼanra xíʼin ta̱ Pedro? Xi̱kuni̱vara kutáʼanra xíʼinra, saáchi xi̱kunda̱a̱va-inira ña̱ ndi̱kó-inira xa̱ʼa̱ ña̱ va̱ása va̱ʼa ke̱ʼéra ta nda̱kú ni̱xi̱yo inira xíʼin Ndióxi̱. Tá nda̱taku ta̱ Jesús, ki̱tara nu̱ú ta̱ Pedro ta̱ ni̱ka̱ʼa̱nra xíʼinra ña̱ xa̱a̱  i̱xakáʼnu-inira xa̱ʼa̱ra ta saátu ña̱ kúʼvi̱-inira xínirara (Luc. 24:33, 34).

7. Nda̱a̱ táki̱ʼva káchi Filipenses 4:5, ¿ndáa ki̱ʼva kúni̱yó ña̱ ná ndakanixi̱ní inkana xa̱ʼa̱yó?

⁷ Xa̱a̱ sa̱kúaʼayó xa̱ʼa̱ Jehová xíʼin xa̱ʼa̱ ta̱ Jesús ña̱ viíní ndákanixi̱nína, ta saátu kúni̱ Jehová ña̱ ná ndakanixi̱níyó (kaʼvi Filipenses 4:5). Kivi ndaka̱tu̱ʼúnyó miíyó: “¿Á xíto inkana ña̱ vií ndákanixi̱níi̱, ña̱ va̱ása kama sái̱, ta su̱ví ndiʼi tiempo kéʼíi̱ ña̱ kúni̱ miíi̱? ¿Á ndákanixi̱nína ña̱ nina ña̱ kúni̱ miíi̱ kéʼíi̱, ta kǒo kúnda̱a̱-inii̱ xíʼin ña̱ ndóʼo inkana, ta so̱ʼoníi̱? ¿Á ndiʼi tiempo kúnii̱ ña̱ ná keʼéna nda̱a̱ táki̱ʼva kúni̱ miíi̱? ¿Á xíniso̱ʼi̱ ña̱ káʼa̱n inkana ta kǒo íxandúxai̱ xíʼinna ña̱ keʼéna ña̱ kúni̱ miíi̱?”. Tá kúnda̱a̱-iniyó xíʼin ña̱ ndóʼo inkana saá kúú ña̱ keʼéyó nda̱a̱ táki̱ʼva kéʼé Jehová xíʼin ta̱ Jesús. Soo, ¿ama kúú ña̱ xíniñúʼu vií ndakanixi̱níyó? Tá kúú, tá nása̱ma ña̱ ndóʼoyó, á tá va̱ása inkáchi íyo ña̱ ndákanixi̱níyó xíʼin ña̱ ndáka̱xin inkana keʼéna.

8. ¿Ndáaña kivi chindeétáʼan xíʼinyó ña̱ vií ndakanixi̱níyó tá nása̱ma ña̱ ndóʼoyó? (Koto ña̱ káʼa̱n nota).

⁸ Ná ndakani vií xi̱níyó tá nása̱ma ña̱ ndóʼoyó, ta ná chikaa̱yó ndee̱ ña̱ keʼéyó ña̱ kivi keʼéyó. Sana iin kama nasa̱ma ña̱ ndóʼoyó tá kúú ña̱ kiʼin kue̱ʼe̱ miíyó, ña̱ kuma̱ní xu̱ʼún nu̱úyó á ña̱ ixandi̱va̱ʼa na̱ chíñu xíʼinyó. Tá iin kama ná kundoʼoyó ña̱yóʼo ixayo̱ʼvi̱níña xíʼinyó (Ecl. 9:11; 1 Cor. 7:31). Ta saátu nda̱a̱ chiñu ña̱ kéʼéyó ti̱xin ñuu Ndióxi̱ kivi nasa̱maña, xa̱ʼa̱ ña̱kán kivi ixayo̱ʼvi̱ña xíʼinyó ña̱ nda̱kú koo iniyó xíʼin Ndióxi̱. Ni nda̱a̱ ndáaka ña̱ ná kundoʼoyó ná chika̱a̱yó ndee̱ ña̱ keʼéyó ña̱ kivi keʼéyó, ta ku̱mí ña̱ va̱xi yóʼo kúú ña̱ kivi chindeétáʼan xíʼinyó. Ña̱ nu̱ú, ná chikaa̱yó ndee̱ ña̱ kusi̱í-iniyó tá nása̱ma ña̱ ndóʼoyó. Ña̱ u̱vi̱, ná ndakanixi̱níyó xa̱ʼa̱ ña̱ koo chí nu̱únínu. Ña̱ u̱ni̱, nina ña̱ va̱ʼa ná ndakanixi̱níyó xa̱ʼa̱. Ta ña̱ ku̱mí, ná chindeétáʼanyó xíʼin inkana. d Ná kotoyó ndáa ki̱ʼva xa̱a̱ chíndeétáʼan ña̱ xa̱a̱ ni̱ka̱ʼa̱nyó xa̱ʼa̱ yóʼo xíʼin na̱ xa̱a̱ yáʼa nu̱ú tu̱ndóʼo.

9. ¿Ndáaña ke̱ʼé iin na̱ matrimonio tá ki̱xi tu̱ndóʼo nu̱úna?

⁹ Ná chika̱a̱yó ndee̱ ña̱ kusi̱í-iniyó tá nása̱ma ña̱ ndóʼoyó. Ta̱ Emanuele xíʼin ñá Francesca misionero kúúna ta chi̱ndaʼánana ku̱a̱ʼa̱nna inka país. Ta tá ni̱xa̱a̱na ñuu kán, ki̱xáʼana sákuaʼana tu̱ʼun ña̱ káʼa̱nna ñuu kán, saátu ki̱xáʼana kítáʼanna xíʼin na̱ hermano na̱ ku̱a̱ʼa̱n congregación nu̱ú ni̱xa̱a̱na. Ta xa̱ʼa̱ ña̱ ki̱xáʼa kue̱ʼe̱ COVID-19 va̱ása níkivika kitáʼanna xíʼin na̱ hermano ta saátu iin kama ni̱xi̱ʼi̱ siʼí ñá Francesca. Xa̱ʼa̱ ña̱yóʼo xi̱kuni̱ ñá Francesca ndikóñá veʼeñá, soo kǒo níkivi ndikóñá saáchi ndeéní xi̱ndika̱a̱ kue̱ʼe̱. ¿Ndáaña chi̱ndeétáʼan xíʼinñá ña̱ ya̱ʼañá nu̱ú tu̱ndóʼo yóʼo? Ta̱ Emanuele xíʼin ñá Francesca ni̱ka̱ʼa̱nna xíʼin Jehová, ña̱ ná taxira ña̱ ndíchi ndaʼa̱na ña̱ kundeé-inina ya̱ʼana nu̱ú tu̱ndóʼo yóʼo. Jehová xi̱niñúʼura na̱ ñuura ña̱ chindeétáʼanna xíʼinna ndiʼi tiempo kán. Tá kúú, nu̱ú iin video xi̱nina iin ta̱ hermano ña̱ ni̱ka̱ʼa̱nra ña̱yóʼo: “Kiviva kusi̱í-iniyó kachíñuyó nu̱ú Jehová ni nása̱ma ña̱ ndóʼoyó”. e Saátu chi̱kaa̱na ndee̱ ña̱ natúʼunna xíʼin na̱ yiví xíʼin teléfono, ta nda̱a̱ ki̱xáʼana káʼvina xíʼin iin na̱yóʼo. Tándi̱ʼi, ta̱xina ña̱ chindeétáʼan na̱ hermano xíʼinna ta sandíkona inina. Ti̱xin iin ku̱i̱ya̱, iin ñá hermana chi̱ndaʼáñá mensaje nu̱ú na̱ hermano yóʼo ña̱ va̱ʼa sandíkoñá-inina. ¿Ndáaña sákuaʼayó xíʼin ña̱yóʼo? Ni nása̱ma ña̱ ndóʼoyó kiviva chikaa̱yó ndee̱ ña̱ kusi̱í-iniyó tá ku̱a̱yaʼayó nu̱ú tu̱ndóʼo.

10. ¿Ndáaña ke̱ʼé iin ñá hermana tá na̱sama ña̱ ndo̱ʼoñá?

¹⁰ Ná ndakanixi̱níyó xa̱ʼa̱ ña̱ va̱ʼa xíʼin ña̱ ndátuyó koo chí nu̱únínu. Iin ñá hermana ñá naní  Christina ñá ñuu Rumania, ñá íyo chí Japón, ku̱suchíní-iniñá saáchi congregación nu̱ú xi̱xa̱ʼa̱nñá nda̱kooña ña̱ kúúña congregación, ta ña̱yóʼo ña̱ tu̱ʼun inglés xi̱kuuña. Soo va̱ása nítaxiñá kasi ña̱yóʼo nu̱úñá ña̱ ndasakáʼnuñá Jehová. Chi̱kaa̱ñá ndee̱ ña̱ chindeétáʼanñá xíʼin iin congregación nu̱ú káʼa̱nna tu̱ʼun japonés xíʼin ña̱ kusi̱í-iniñá natúʼunñá xa̱ʼa̱ Ndióxi̱. Ni̱ka̱ʼa̱nñá xíʼin iin ñá xi̱kachíñu xíʼinñá ña̱ chindeétáʼanñá xíʼinñá ña̱ sakúaʼañá tu̱ʼun japonés, ta kuniñúʼuná Biblia xíʼin folleto ña̱ naní Kivi koo si̱íún vitin ta saátu chí nu̱únínu, ña̱ va̱ʼa sakúaʼañá tu̱ʼun yóʼo, ta ñá ñaʼá kán ka̱ndíxavañá. Va̱ʼaní sa̱kúaʼa ñá Christina ka̱ʼa̱nñá tu̱ʼun japonés, ta ñá ñaʼá ñá sa̱náʼa̱ miíñá xi̱kuni̱kañá sakúaʼañá xa̱ʼa̱ Jehová. ¿Ndáaña sákuaʼayó xíʼin ña̱yóʼo? Tá ndákanixi̱níyó xa̱ʼa̱ ña̱ va̱ʼa ña̱ ndakiʼinyó chí nu̱únínu, ni nása̱ma ña̱ ndóʼoyó kivi kusi̱í-iniyó ta ku̱a̱ʼání ña̱ va̱ʼa ndakiʼinyó.

11. ¿Ndáaña ke̱ʼé iin na̱ matrimonio tá ndi̱ʼi xu̱ʼúnna?

¹¹ Ná chindeétáʼanyó xíʼin inkana. Iin na̱ matrimonio na̱ ni̱xi̱yo iin lugar nu̱ú va̱ása táxika na̱ chíñu natúʼunyó xa̱ʼa̱ Ndióxi̱, ni̱ya̱ʼana nu̱ú iin tu̱ndóʼo ña̱ i̱xayo̱ʼvi̱ní xíʼinna, saáchi país nu̱ú ni̱xi̱yona ndi̱ʼi xu̱ʼún ña̱kán kǒoka xu̱ʼúnna níxi̱yo, ¿ndáaña ke̱ʼéna tá ki̱xi tu̱ndóʼo yóʼo nu̱úna? Ña̱ nu̱ú, chi̱kaa̱na ndee̱ ña̱ loʼo ña̱ʼa kuumiína. Ña̱ u̱vi̱, nu̱úka ña̱ ndakaniníxi̱nína xa̱ʼa̱ tu̱ndóʼo ña̱ xi̱kuumiína, chi̱kaa̱na ndee̱ ña̱ natúʼunkana xíʼin na̱ yiví xa̱ʼa̱ Ndióxi̱ (Hech. 20:35). Yií ñá hermana yóʼo ni̱ka̱ʼa̱nra: “Xa̱ʼa̱ ña̱ ku̱a̱ʼáka tiempo xi̱natúʼunndi̱ xíʼin na̱ yiví xa̱ʼa̱ Ndióxi̱, kǒo níndakaniníxi̱níndi̱ xa̱ʼa̱ tu̱ndóʼo ña̱ ni̱ya̱ʼandi̱”. ¿Ndáaña sákuaʼayó xíʼin ña̱yóʼo? Tá nása̱ma ña̱ ndóʼoyó ná chikaa̱yó ndee̱ ña̱ chindeétáʼanyó xíʼin inkana, tá kúú ña̱ natúʼunyó xíʼin na̱ yiví xa̱ʼa̱ Ndióxi̱.

12. ¿Ndáaña kivi sakúaʼayó xíʼin ña̱ ke̱ʼé ta̱ Pablo?

¹² Xa̱a̱ síín síín ñuu na̱ yiví na̱ nátúʼunyó xíʼin xa̱ʼa̱ Ndióxi̱, ta xa̱ʼa̱ ña̱ su̱ví inkáchi íyo ña̱ kándíxana á ña̱ kéʼéna, xíniñúʼu kiʼinníyó kuenta ndáa ki̱ʼva natúʼunyó xíʼinna. ¿Nda̱chun xíniñúʼu chikaa̱yó ndee̱ ña̱ kundiku̱nyó yichi̱ ta̱ apóstol Pablo? Saáchi va̱ʼaní xi̱kunda̱a̱-inira xíʼin ña̱ xi̱ndoʼo na̱ yiví, ta va̱ʼaní xi̱natúʼunra xíʼinna. Ta̱ Jesús ta̱xira ña̱ ná koora “apóstol nu̱ú na̱ ñuu” (Rom. 11:13). Ta ña̱ va̱ʼa saxínu ta̱ Pablo chiñu ña̱ ta̱xi ta̱ Jesús nda̱ʼara, chi̱ka̱a̱ra ndee̱ ña̱ natúʼunra xíʼin na̱ judío, na̱ griego, na̱ ndíchi, na̱ káchíñu ndáʼvi, xíʼin na̱ xi̱kuumií chiñu ña̱ ndáyáʼviní nu̱ú na̱ chíñu xíʼin na̱ xi̱kuu rey. Ta xa̱ʼa̱ ña̱ xi̱kuni̱ra chindeétáʼanra xíʼin na̱ yiví ña̱ sakúaʼana xa̱ʼa̱ Ndióxi̱ ni̱ka̱ʼa̱nra ña̱ nda̱sara miíra nda̱a̱ táki̱ʼva íyo mií na̱ yiví kán (1 Cor. 9:19-23). Tá xi̱natúʼunra xíʼin na̱ yiví xi̱kiʼinra kuenta ndáa ñuu ke̱ena ta ndáaña xi̱kandíxana. ¿Ndáaña sákuaʼayó xíʼin ña̱yóʼo? Tá nátúʼunyó xíʼin na̱ yiví xa̱ʼa̱ Ndióxi̱, ná chikaa̱yó ndee̱ ña̱ kotoyó ndáaña xíniñúʼuna, ndáaña ndákanixi̱nína xa̱ʼa̱, tasaá chindeétáʼanyó xíʼinna ña̱ sakúaʼana xa̱ʼa̱ Ndióxi̱.

13. ¿Ndáaña kǒo keʼéyó tá kíʼinyó kuenta xíʼin ña̱ ndákanixi̱ní inkana? (1 Corintios 8:9).

¹³ Tá viíní ndákanixi̱níyó saá kúú ña̱ kiʼinníyó kuenta xíʼin ña̱ ndákanixi̱ní inkana. Tá kúú, sava ná hermana kútóoníná ndakaʼyi̱ nu̱úná ta savaná kǒo kútóoná nda̱kaʼyi̱ nu̱úná. Sava na̱ hermano kútóona koʼona loʼo ndixi ta savana va̱ása kútóona koʼonará. Ni iin na̱ hermano kǒo kúni̱na kiʼin kue̱ʼe̱ miína, soo tá xa̱a̱ kíʼin kue̱ʼe̱ miína xa̱a̱ síín síín ta̱tán ndáka̱xinna kuniñúʼuna. Tá ndákanixi̱níyó ña̱ iinlá ña̱ káʼa̱nyó kúú ña̱ va̱ʼaníka ta káʼa̱nyó xíʼin inkana ña̱ keʼéna ña̱yóʼo, kivi ndataʼvíyó na̱ hermano ti̱xin congregación. Ña̱kán ni iin yichi̱ ná kǒo keʼéyó ña̱yóʼo (kaʼvi 1 Corintios 8:9; 10:23, 24). Tá ná kuniso̱ʼoyó consejo ña̱ va̱xi nu̱ú tu̱ʼun Ndióxi̱, ña̱yóʼo chindeétáʼan xíʼinyó ña̱ ki̱ʼvaní koo ña̱  keʼéyó ta chindeétáʼanña xíʼin na̱ hermano ña̱ vií kitáʼanna. Ná kotoyó ndáa ki̱ʼva keʼéyóña.

14. ¿Ndáa texto ña̱ va̱xi nu̱ú Biblia kivi chindeétáʼan xíʼinyó ña̱ kiʼinníyó kuenta xíʼin ki̱ʼva ña̱ ndíxiyó xíʼin ña̱ ndásaviíyó miíyó?

¹⁴ Ti̱ko̱to̱yó xíʼin ki̱ʼva ña̱ ndásaviíyó miíyó. Nu̱úka ña̱ ka̱ʼa̱n káxi Jehová xíʼinyó ndáa ki̱ʼva kundixiyó, nu̱ú tu̱ʼunra va̱xi ña̱ chindeétáʼan xíʼinyó ña̱ ndaka̱xin viíyó ti̱ko̱to̱ kundixiyó. Xíniñúʼu na̱ʼa̱yó ña̱ íxato̱ʼóyó Jehová xíʼin ki̱ʼva ña̱ ndíxiyó, tasaá na̱ʼa̱yó ña̱ viíní ndákanixi̱níyó (1 Tim. 2:9, 10; 1 Ped. 3:3). Kǒo kúni̱yó ña̱ ndiʼi na̱ yiví ná kotona miíyó xa̱ʼa̱ ki̱ʼva ña̱ ndíxiyó. Consejo ña̱ va̱xi nu̱ú tu̱ʼun Ndióxi̱ kivi chindeétáʼanña xíʼin na̱ anciano ña̱ va̱ása ndaka̱xinna ndáa ti̱ko̱to̱ kúú ña̱ kundixi na̱ hermano á ndáa ki̱ʼva chuʼunna xi̱nína. Tá kúú, ti̱xin iin congregación sava na̱ va̱lí kúa̱an, válíní xi̱xaʼndana yixí xi̱nína, ta kǒo níxi̱chuʼunna xi̱nína saáchi saá xi̱keʼé na̱ yiví na̱ kǒo níxindasakáʼnu Ndióxi̱ ñuu kán. Na̱ anciano xi̱kuni̱na chindeétáʼanna xíʼin na̱ va̱lí kúa̱an yóʼo, soo kǒo níxi̱kuni̱na ka̱ʼa̱nna xíʼinna xa̱ʼa̱ ña̱ xi̱ndakanixi̱ní miína ndáa ki̱ʼva kaʼndana yixí xi̱nína á ña̱ chuʼunna xi̱nína. Ña̱kán, ¿ndáa ki̱ʼva chi̱ndeétáʼanna xíʼinna? Iin ta̱ superindentende ña̱ circuito ni̱ka̱ʼa̱nra xíʼin na̱ anciano ña̱ ná ka̱ʼa̱nna ña̱yóʼo xíʼin na̱ va̱lí kúa̱an: “Tá xa̱a̱ yáʼún nu̱ú plataforma na̱ hermano kíʼinkana kuenta xíʼin ki̱ʼva ña̱ ndíxiún nu̱úka ña̱ sánáʼún, ¿á va̱ása túviún ña̱ xíniñúʼu nasamaún ki̱ʼva ña̱ ndíxiún xíʼin ña̱ ndásaviíún miíún?”. Tá ni̱ka̱ʼa̱n na̱ anciano ña̱yóʼo xíʼin na̱ va̱lí kúa̱an, ña̱yóʼo va̱ʼaní chi̱ndeétáʼanña xíʼinna ña̱ na̱samana. f

15. ¿Ndáa ley xíʼin consejo ña̱ va̱xi nu̱ú Biblia kivi chindeétáʼan xíʼinyó ña̱ kundaayó miíyó? (Romanos 14:5).

¹⁵ Ña̱ kundaayó miíyó. Iin tá iinyó kivi ndaka̱xinyó ndáaña keʼéyó tá kíʼin kue̱ʼe̱ miíyó (Gál.  6:5). Tá ndáka̱xinyó ndáa ta̱tán kúú ña̱ kuniñúʼuyó, xíniñúʼu kiʼinyó kuenta xíʼin ña̱ káʼa̱n Biblia ña̱ va̱ása nde̱e ni̱i̱ miíyó, ni ña̱ ku̱ʼu̱nyó nu̱ú na̱ tási á ña̱ kuniñúʼuyó ña̱ʼa ña̱ kítáʼan xíʼin ña̱yóʼo (Hech. 15:20; Gál. 5:19, 20). Savayó ndáka̱xinyó ña̱ kuniñúʼuyó ta̱tán natural ta savayó ndáka̱xinyó kuniñúʼuyó ta̱tán ña̱ táxi na̱ doctor ndaʼa̱yó. Ña̱kán, tá ndáka̱xin na̱ hermano ta̱tán ña̱ kuniñúʼuna, ná va̱ása ixandúxayó xíʼinna ña̱ kuniñúʼuna ta̱tán ña̱ kúni̱ miíyó, saáchi iin tá iinyó xíniñúʼu ndaka̱xin ndáa ta̱tán kúú ña̱ kuniñúʼuyó. Ña̱kán ndáyáʼviní ña̱ ndakanixi̱níyó xa̱ʼa̱ ña̱yóʼo. Ña̱ nu̱ú, iinlá Reino Ndióxi̱ kúú ña̱ sándiʼi-xa̱ʼa̱ ndiʼi kue̱ʼe̱ ña̱ kúúmiíyó (Is. 33:24). Ña̱ u̱vi̱, iin tá iinyó xíniñúʼu ndaka̱xin ndáa ta̱tán kúú ña̱ kivi kuniñúʼuyó (kaʼvi Romanos 14:5). Ña̱ u̱ni̱, kǒo káʼa̱nyó ña̱ va̱ása va̱ʼa xa̱ʼa̱ na̱ hermanoyó ta kǒo sásiyó nu̱úna ña̱ keʼéna ña̱ kúni̱na (Rom. 14:13). Ta ña̱ ku̱mí, miíyó na̱ ndásakáʼnu Jehová kúʼvi̱ní-iniyó xínitáʼanyó ta ña̱ ndáyáʼvika nu̱úyó kúú ña̱ kitáʼan viíyó ti̱xin congregación nu̱úka ña̱ keʼéyó ña̱ kúni̱ miíyó (Rom. 14:15, 19, 20). Tá kéʼéyó ña̱ xa̱a̱ ni̱ka̱ʼa̱nyó xa̱ʼa̱ yóʼo, saá kúú ña̱ va̱ʼaní kitáʼanyó xíʼin na̱ hermanoyó ta va̱ása koo ku̱a̱chi ti̱xin congregación.

16. ¿Ndáaña kivi keʼé na̱ anciano ña̱ ixato̱ʼó táʼanna? (Koto na̱ʼná).

¹⁶ Na̱ anciano xíniñúʼu chikaa̱na ndee̱ ña̱ viíní ndakanixi̱nína tasaá chinúuna iin yichi̱ va̱ʼaní nu̱ú ña̱ congregación (1 Tim. 3:2, 3). Tá kúú, iin ta̱ anciano ta xa̱a̱ chéeka kǒo ndákanixi̱níra ña̱ káʼa̱n miíra kúú ña̱ xíniñúʼu kuniso̱ʼona, saáchi kúnda̱a̱-inira ña̱ mií Jehová kivi kuniñúʼura inka ta̱ anciano ña̱ ka̱ʼa̱nra iin ña̱ʼa ña̱ chindeétáʼan xíʼin ndiʼina. Ta tá inka na̱ anciano kíʼinna kuenta ña̱ va̱ʼava íyo ña̱ ni̱ka̱ʼa̱n ta̱yóʼo, kéʼévanaña ni xa̱a̱ síín síín ndákanixi̱nína.

17. ¿Ndáaña va̱ʼa ndákiʼinyó tá vií ndákanixi̱níyó?

¹⁷ Tá vií ndákanixi̱níyó ku̱a̱ʼání ña̱ va̱ʼa ndakiʼinyó. Tá kúú, va̱ʼaka kítáʼanyó xíʼin na̱ hermanoyó ta kǒo ku̱a̱chi káku ti̱xin congregación. Xa̱a̱ síín íyo iin tá iinyó, ta xa̱a̱ síín costumbre kúúmiíyó, soo ña̱yóʼo chíndeétáʼanña xíʼinyó ña̱ va̱ʼaníka ndasakáʼnuyó Jehová. Ta saátu kúsi̱íní-iniyó chi kéʼéyó nda̱a̱ táki̱ʼva kéʼé Jehová, ña̱ viíní ndákanixi̱níyó ta kúnda̱a̱-iniyó xíʼin ña̱ ndóʼo inkana.