1, 2. ¿Ndáaña káʼa̱n Biblia xa̱ʼa̱ sava na̱ rey na̱ ni̱xi̱yo ñuu Israel?

 YÁʼAKA 40 na̱ rey xa̱ʼndachíñu ñuu Israel. Ta Biblia káʼa̱nña xa̱ʼa̱ ndiʼi ña̱ ke̱ʼéna. a Tá kúú káʼa̱nña xa̱ʼa̱ na̱ rey na̱ va̱ʼaní xi̱ndasakáʼnu Jehová soo tá ni̱ya̱ʼa tiempo ke̱ʼéna ña̱ va̱ása va̱ʼa. Ná ka̱ʼa̱nyó xa̱ʼa̱ ta̱ David, miíyó kúnda̱a̱-iniyó ña̱ xi̱kuura iin rey ta̱ va̱ʼa. Ña̱kán, ni̱ka̱ʼa̱n Jehová ña̱yóʼo xa̱ʼa̱ra: “Ta̱kán ka̱ndíxara ndiʼi chiñu ña̱ xáʼndai̱ ta xíʼin ndiʼi níma̱ra xi̱ndiku̱nra yi̱ʼi̱ ta ke̱ʼéra ña̱ kútói̱” (1 Rey. 14:8). Soo, ta̱ David ni̱ki̱si̱ra xíʼin iin ñaʼá ñá xa̱a̱ ni̱xi̱yo yii̱, ta chi̱ndaʼára yii̱ñá ña̱ ku̱ʼu̱nra nu̱ú ku̱a̱chi ta kán xa̱ʼnínara (2 Sam. 11:​4, 14, 15).

² Soo, saátu Biblia káʼa̱nña xa̱ʼa̱ na̱ rey na̱ kǒo níxi̱xiniso̱ʼo ña̱ xi̱kaʼa̱n Jehová, soo ni saá ke̱ʼévana ña̱ va̱ʼa. Ná ka̱ʼa̱nyó xa̱ʼa̱ ta̱ rey Rehoboam. Jehová ni̱ka̱ʼa̱nra xa̱ʼa̱ ta̱ Rehoboam ña̱ ke̱ʼéra “ña̱ va̱ása va̱ʼa” (2 Crón. 12:14). Soo, ka̱ndíxavara ña̱ ni̱ka̱ʼa̱n Jehová xíʼinra ta kǒo níxa̱ʼa̱nkara kanitáʼanra xíʼin na̱ 10 tribu ña̱ Israel, ta ni̱ka̱ʼa̱nra xíʼinra ña̱ ná taxira ña̱ ndaka̱xin mií na̱ ñuu na̱ rey na̱ kaʼndachíñu nu̱úna. Ta saátu chi̱ndeétáʼan ta̱ Rehoboam xíʼin na̱ ñuu ña̱ va̱ʼa kundaana miína nu̱ú na̱ sáa̱-ini xíni miína (1 Rey. 12:​21-24; 2 Crón. 11:​5-12).

3. ¿Ndáa pregunta kivi ndakanixi̱níyó xa̱ʼa̱ ta ndáaña sakúaʼayó nu̱ú artículo yóʼo?

³ Ndiʼi na̱ rey yóʼo xi̱keʼéna ña̱ va̱ʼa ta saátu ña̱ va̱ása va̱ʼa. Ña̱kán, ¿nda̱chun ni̱ka̱ʼa̱n Jehová ña̱ savana nda̱kú ni̱xi̱yo inina xíʼinra ta inkana kǒo níxi̱yo nda̱kú-inina xíʼinra? Ña̱ va̱ʼa kunda̱a̱-iniyó ndáaña keʼéyó ña̱ va̱ʼa sakúsi̱íyó ini Jehová xíniñúʼu kunda̱a̱-iniyó nda̱chun xi̱kaʼa̱n Jehová ña̱yóʼo xa̱ʼa̱ na̱ rey  kán, tasaá kunda̱a̱-iniyó ndáaña kivi keʼéyó ña̱ va̱ʼa sakúsi̱íyó-inira. Nu̱ú artículo yóʼo sakúaʼayó ña̱ tá nda̱tiin Jehová ku̱a̱chi xíʼin na̱ rey na̱ ñuu Israel, ki̱ʼinra kuenta xíʼin u̱ni̱ ña̱ʼa. Ña̱ nu̱ú, ¿á xíʼin ndiʼi níma̱na xi̱kuʼvi̱-inina xi̱ninara? Ña̱ u̱vi̱, ¿á xi̱ndandikó-inina xa̱ʼa̱ ku̱a̱chi ña̱ xi̱kiʼvina? Ta ña̱ u̱ni̱, ¿á xi̱kañúʼuna á xi̱ndaño̱ʼona iinlá miíra?

XÍʼIN NDIʼI NÍMA̱NA XI̱KUʼVI̱-ININA XI̱XININA JEHOVÁ

4. ¿Ndáaña káʼa̱n Biblia xa̱ʼa̱ na̱ rey na̱ nda̱kú ni̱xi̱yo ini xíʼin Jehová, ta ndáaña káʼa̱nña xa̱ʼa̱ na̱ va̱ása ni̱xi̱yo nda̱kú-ini xíʼinra?

⁴ Jehová ni̱ka̱ʼa̱nra ña̱ sava na̱ rey nda̱kú ni̱xi̱yo inina xíʼinra saáchi xíʼin ndiʼi níma̱na xi̱kuʼvi̱-inina xi̱xininara. b Ta̱ rey Jehosafat na̱ndukúra Jehová xíʼin ndiʼi níma̱ra (2 Crón. 22:9). Siaʼa káchi ña̱ Biblia xa̱ʼa̱ ta̱ Josías: “Kǒo nda̱a̱ ni iinka na̱ rey níxi̱yo nda̱a̱ táki̱ʼva ni̱xi̱yo ta̱yóʼo, chi ndi̱kóra nu̱ú Jehová xíʼin ndiʼi níma̱ra” (2 Rey. 23:25). Soo ta̱ Salomón tá xa̱a̱ ku̱chéera ke̱ʼéra ña̱ va̱ása va̱ʼa ta kǒo níndasakáʼnura Jehová xíʼin ndiʼi níma̱ra (1 Rey. 11:4). Ta saátu Biblia káʼa̱nña xa̱ʼa̱ ta̱ Abiyam ña̱ su̱ví xíʼin ndiʼi níma̱ra níkachíñura nu̱ú Jehová (1 Rey. 15:3).

5. ¿Ndáaña kúni̱ kachi ña̱ kachíñuyó nu̱ú Jehová xíʼin ndiʼi níma̱yó?

⁵ ¿Ndáaña kúni̱ kachi ña̱ kachíñuyó nu̱ú Jehová xíʼin ndiʼi níma̱yó? Kúni̱ kachiña ña̱ iinlá miíra kañúʼuyó á kondaño̱ʼoyó ta xíʼin ndiʼi níma̱yó xíniñúʼu keʼéyóña, ta kǒo íxandúxana xíʼinyó ña̱ ndasakáʼnuyóra. Saátu ndiʼi tiempo xíniñúʼu kuʼvi̱-iniyó kuniyóra

6. ¿Ndáaña keʼéyó tasaá kuʼvi̱-iniyó kuniyó Jehová xíʼin ndiʼi níma̱yó? (Proverbios 4:23; Mateo 5:​29, 30).

⁶ ¿Ndáaña keʼéyó ña̱ va̱ʼa kooyó nda̱a̱ táki̱ʼva ni̱xi̱yo na̱ rey na̱ nda̱kúní ni̱xi̱yo ini xíʼin Jehová ta saátu ña̱ kuʼvi̱-iniyó kuniyóra xíʼin ndiʼi níma̱yó? Kǒo xíniñúʼu keʼéyó ni iin ña̱ʼa ña̱ kivi sakúxíka miíyó nu̱ú Jehová. Tá kúú ña̱ kusíkíyó nu̱ú va̱xi ña̱ kini, ña̱ kuni̱níyó kuumiíyó ku̱a̱ʼá xu̱ʼún á ña̱ kutáʼanyó xíʼin na̱ kǒo ndásakáʼnu Jehová. Tá xa̱a̱ ndóʼoyó ña̱yóʼo ndi̱ku̱n kama ná nasamayó ña̱ kéʼéyó (kaʼvi Proverbios 4:23; c Mateo 5:​29, 30).

7. ¿Nda̱chun xíniñúʼu kiʼinyó kuenta xíʼin ña̱ʼa ña̱ kivi sakúxíka miíyó nu̱ú Jehová?

⁷ Níma̱yó kivi sandáʼviña miíyó, ña̱kán kǒo xíniñúʼu ndakanixi̱níyó ña̱ xa̱ʼa̱ ña̱ kéʼéyó ku̱a̱ʼá chiñu nu̱ú Jehová kǒo ni iin ña̱ʼa kivi sakúxíka miíyó nu̱úra. Ndakanixi̱ní ña̱ ndíka̱ún iin yuku̱ ta niʼníní, ña̱kán ña̱ va̱ʼa ndi̱ko-iniún xíʼún ti̱kui̱í. Soo, ¿ndáaña kundoʼún tá ndivíyaa ná kundika̱ún nu̱ú kaʼní? Sana kixáʼa yi̱chi̱ tuku iniún ta kuni̱ún koʼún ti̱kui̱í. ¿Ndáaña sákuaʼayó xíʼin ña̱yóʼo? Kǒo xíniñúʼu keʼé kuitíyó ña̱ʼa ña̱ kivi sakúyatin miíyó nu̱ú Jehová. Tá iníí ki̱vi̱ ná kundika̱a̱yó nu̱ú kaʼni̱ kuvitávayó, ña̱kán xíniñúʼu ndukúyó nu̱ú kivi kusa̱ʼviyó. Ta saátu xíniñúʼu keʼéyó xíʼin ña̱ ndásakáʼnuyó Jehová, ná kundaayó miíyó nu̱ú ña̱ʼa ña̱ kivi sakúxíka miíyó nu̱úra (Efes. 2:2).

NDA̱NDIKÓ-ININA XA̱ʼA̱ KU̱A̱CHINA

8, 9. ¿Ndáaña ke̱ʼé ta̱ rey David xíʼin ta̱ rey Ezequías tá ta̱xina consejo ndaʼa̱na? (Koto na̱ʼná ña̱ va̱xi chí ).

⁸ Nda̱a̱ táki̱ʼva xa̱a̱ sa̱kúaʼayó iin ku̱a̱chi ña̱ ndeéní ni̱ki̱ʼvi ta̱ rey David, soo tá ni̱ka̱ʼa̱n ta̱ Natán xíʼinra xa̱ʼa̱ ña̱ ke̱ʼéra, vitá ni̱xi̱yo inira ta nda̱ndikó-inira (2 Sam. 12:13). Tu̱ʼun ña̱ ka̱ʼyí ta̱ David nu̱ú Salmo 51 náʼa̱ña ña̱ ndixa nda̱ndikó-inira. Soo, kǒo níndandikó-inira xa̱ʼa̱ ña̱ kindo̱o va̱ʼa kuitíra nu̱ú ta̱ Natán á xa̱ʼa̱  ña̱ kǒo ndakiʼinra castigo (Sal. 51:​3, 4, 17, encabezamiento).

⁹ Saátu ta̱ rey Ezequías ni̱ki̱ʼvira ku̱a̱chi nu̱ú Jehová. Biblia káʼa̱nña ña̱ ki̱xáʼa ni̱nu kúnira “xa̱ʼa̱ ña̱yóʼo ni̱sa̱a̱ Ndióxi̱ xíʼinra ta saátu xíʼin na̱ ñuu Judá xíʼin na̱ ñuu Jerusalén” (2 Crón. 32:25). ¿Nda̱chun ki̱xáʼa ni̱nu kúnira? Sana xa̱ʼa̱ ña̱ ta̱xi Jehová ña̱ ku̱i̱ká ndaʼa̱ra, á xa̱ʼa̱ ña̱ chi̱ndeétáʼanra xíʼinra ña̱ xa̱ʼníra na̱ asirio, á xa̱ʼa̱ ña̱ sa̱ndáʼarara chi xi̱ndoʼora iin kue̱ʼe̱ ña̱ ndeéní. Sana xa̱ʼa̱ ña̱yóʼo ni̱nuní ku̱nira ta ni̱ka̱ʼa̱nra xíʼin na̱ ñuu Babilonia ña̱ kúíkáníra. Xa̱ʼa̱ ña̱kán ta̱ profeta Isaías ta̱xira consejo ndaʼa̱ra (2 Rey. 20:​12-18). Nda̱a̱ táki̱ʼva ke̱ʼé ta̱ David saátu ke̱ʼé ta̱ rey Ezequías chi vitá ni̱xi̱yo inira ta nda̱ndikó-inira (2 Crón. 32:26). Tándi̱ʼi Jehová ni̱ka̱ʼa̱nra xa̱ʼa̱ra ña̱ nda̱kúní ni̱xi̱yo-inira xíʼinra. Ña̱ Biblia káʼa̱nña: “Ta̱yóʼo ke̱ʼéra ña̱ va̱ʼa nu̱ú Jehová” (2 Rey. 18:3).

10. ¿Ndáaña ke̱ʼé ta̱ rey Amasías tá ta̱xina consejo ndaʼa̱ra?

¹⁰ Soo, ta rey Amasías ta̱ ñuu Judá “ke̱ʼéra ña̱ va̱ʼa nu̱ú Jehová, soo kǒo níkeʼéraña xíʼin ndiʼi níma̱ra” (2 Crón. 25:2). ¿Ndáaña ke̱ʼéra? Jehová chi̱ndeétáʼan xíʼinra ña̱ ka̱nitáʼanra xíʼin na̱ edomita. Soo tándi̱ʼi ki̱xáʼara káñúʼura á ndáño̱ʼora ndióxi̱ vatá ña̱ ni̱xi̱yo ñuu ña̱ sa̱ndíʼi-xa̱ʼa̱ra. d Jehová chi̱ndaʼára iin profeta ta̱ ni̱xa̱ʼa̱n ni̱ka̱ʼa̱n xíʼinra, soo kǒo níxiinra kuniso̱ʼorara chi ni̱sa̱a̱ra (2 Crón. 25:​14-16).

11. Nda̱a̱ táki̱ʼva káchi 2 Corintios 7:​9, 11, ¿ndáaña xíniñúʼu keʼéyó ña̱ va̱ʼa ixakáʼnu-ini Jehová xa̱ʼa̱yó? (Koto na̱’ná).

¹¹ ¿Ndáaña sákuaʼayó xíʼin ejemplo yóʼo? Ña̱ xíniñúʼu ndandikó-iniyó xa̱ʼa̱ ku̱a̱chi ña̱ kéʼéyó ta kǒo xíniñúʼu keʼékayóña. Tá táxi na̱ anciano consejo ndaʼa̱yó, ¿ndáaña kǒo xíniñúʼu keʼéyó? Ná kǒo ndakanixi̱níyó ña̱ kǒo kúsi̱íka-ini Jehová xíʼinyó á ña̱ sáa̱-ini na̱ anciano xínina miíyó. Ná ndakaʼányó chi nda̱a̱ na̱ rey na̱ xi̱ndasakáʼnu Jehová na̱ ni̱xi̱yo ñuu Israel ta̱xina consejo ndaʼa̱na tá xi̱keʼéna ña̱ va̱ása va̱ʼa (Heb. 12:6). Ña̱kán tá táxina consejo ndaʼa̱yó, ¿ndáaña xíniñúʼu keʼéyó? 1) Xíniñúʼu vitá koo iniyó, 2) nasamayó ña̱ kéʼéyó, ta 3) kǒo sandákooyó ña̱ ndasakáʼnuyó Jehová xíʼin ndiʼi níma̱yó. Tá ndixa ndándikó-iniyó xa̱ʼa̱ ña̱ va̱ása va̱ʼa ke̱ʼéyó ixakáʼnuva-ini Jehová xa̱ʼa̱yó (kaʼvi 2 Corintios 7:​9, 11).

IINLÁ JEHOVÁ XI̱KAÑÚ’UNA Á XI̱NDAÑO̱ʼONA

12. ¿Ndáaña xi̱keʼé na̱ rey na̱ xi̱xiniso̱ʼo ña̱ xi̱kaʼa̱n Jehová ta ndáaña xi̱keʼé na̱ kǒo níxi̱xiniso̱ʼo ña̱ xi̱kaʼa̱nra?

¹² Na̱ rey na̱ xi̱kaʼa̱n Jehová ña̱ nda̱kú ni̱xi̱yo inina xíʼinra kúú na̱ xi̱ndasakáʼnu miíra ta xi̱chindeétáʼanna xíʼin inkana ña̱ ndasakáʼnunara. Sava yichi̱ xi̱keʼévana ña̱ va̱ása va̱ʼa soo iinlá Jehová xi̱ndasakáʼnuna. Ta xi̱chikaa̱nína ndee̱ ña̱ sandíʼi-xa̱ʼa̱na na̱ ndióxi̱ vatá na̱ ni̱xi̱yo ñuu nu̱ú xi̱xaʼndachíñuna. e

13. ¿Nda̱chun ni̱ka̱ʼa̱n Jehová ña̱ kǒo nda̱kú níxi̱yo ini ta̱ rey Acab xíʼinra?

¹³ Jehová ni̱ka̱ʼa̱nra ña̱ ni̱xi̱yo sava na̱ rey na̱ kǒo níxi̱yo nda̱kú-ini xíʼinra soo sava yichi̱ su̱ví nina ña̱ kiniví níxi̱keʼéna. Tá kúú ta̱ rey Acab ta̱ ndi̱va̱ʼaní ni̱xi̱yo ini va̱ása va̱ʼa níkunira tá na̱kunda̱a̱-inira ña̱ xa̱ʼnína ta̱ Nabot xa̱ʼa̱ ku̱a̱chi miíra (1 Rey. 21:​27-29). Saátu i̱xava̱ʼara ku̱a̱ʼá ñuu ta sa̱ndíʼi-xa̱ʼa̱ra na̱ xi̱saa̱-ini xi̱xini na̱ ñuu Israel (1 Rey. 20:​21, 29; 22:39). Soo ta̱ Acab xi̱niso̱ʼora ña̱ ni̱ka̱ʼa̱n ñá síʼíra ta ke̱ʼéra iin ña̱ kininí chi ki̱xáʼara ndásakáʼnura ndióxi̱ vatá, ta nda̱a̱ ni̱ka̱ʼa̱nra xíʼin na̱ ñuu ña̱ keʼéna  ña̱yóʼo ta kǒo níndándikó-inira xa̱ʼa̱ ña̱ ke̱ʼéra (1 Rey. 21:​25, 26).

14. a) ¿Nda̱chun ni̱ka̱ʼa̱n Jehová ña̱ kǒo níxi̱yo nda̱kú-ini ta̱ Rehoboam xíʼinra? b) ¿Ndáaña ke̱ʼé ku̱a̱ʼání na̱ rey na̱ kǒo nda̱kú níxi̱yo ini xíʼin Jehová?

¹⁴ Ná ka̱ʼa̱nyó xa̱ʼa̱ ta̱ rey Rehoboam, ta̱yóʼo kǒo níxi̱yo nda̱kú-inira xíʼin Jehová. Soo, nda̱a̱ táki̱ʼva xa̱a̱ sa̱kúaʼayó ku̱a̱ʼáníva ña̱ va̱ʼa ke̱ʼéra. Soo, tá ki̱xáʼa ndu̱ndakúra chi va̱ʼaní xi̱xaʼndachíñura kǒo níxiniso̱ʼokara ley Jehová ta ki̱xáʼara ndásakáʼnura ndióxi̱ vatá (2 Crón. 12:1). Xa̱ʼa̱ ña̱yóʼo sava yichi̱ xi̱ndasakáʼnura Jehová ta sava yichi̱ xi̱ndasakáʼnura na̱ ndióxi̱ vatá (1 Rey. 14:​21-24). Su̱ví nda̱saa ta̱ Rehoboam xíʼin ta̱ Acab kúú ta̱ níkuxíká nu̱ú Jehová, chi ndiʼika na̱ rey na̱ kǒo níxi̱xiniso̱ʼo ña̱ xi̱kaʼa̱n Jehová, xi̱ndasakáʼnuna na̱ ndióxi̱ vatá. Ña̱kán tá iin na̱ rey xi̱ndasakáʼnuna iinlá mií Jehová, saá kúú ña̱ xi̱ka̱ʼa̱nra ña̱ nda̱kú ni̱xi̱yo inina xíʼinra.

15. ¿Nda̱chun kúni̱ Jehová ña̱ iinlá miíra ndasakáʼnuyó?

¹⁵ ¿Nda̱chun xi̱kuni̱ Jehová ña̱ iinlá miíra ndasakáʼnu na̱ rey? Saáchi na̱ rey kúú na̱ xi̱xiniñúʼu chindeétáʼan xíʼin na̱ ñuu ña̱ ndasakáʼnuna iinlá mií Jehová nda̱a̱ táki̱ʼva kúni̱ra. Soo tá xi̱kañúʼuna á xi̱ndaño̱ʼona ndióxi̱ vatá xi̱keʼéna ña̱ kini ta kǒo níxindatiin nda̱kúna ku̱a̱chi xíʼin na̱ ñuu (Os. 4:​1, 2). Ná ndakaʼányó chi na̱ rey xíʼin na̱ israelita na̱ ñuu Jehová xi̱kuuna chi miíra nda̱kaxinna. Xa̱ʼa̱ ña̱kán tá xi̱ndasakáʼnuna ndióxi̱ vatá, Biblia káʼa̱nña ña̱ nda̱a̱ táki̱ʼva íyo na̱ xi̱kisi̱ xíʼin inka na̱ yiví saá ni̱xi̱yona (Jer. 3:​8, 9). Tá iin na̱ xa̱a̱ ti̱ndaʼa̱ sándaʼvina na̱ ti̱ndaʼa̱ xíʼinna ta kísi̱na xíʼin inka na̱ yiví, sándákavanína-ini na̱ ti̱ndaʼa̱ xíʼinna saáchi su̱ví ña̱ va̱ʼa níkeʼéna. Saátu íyo na̱ ndásakáʼnu Jehová na̱ xa̱a̱ nda̱kuchi tá kíxáʼana ndásakáʼnuna ndióxi̱  vatá, sákusuchínína-inira ta xóʼvi̱níra (Deut. 4:​23, 24). f

16. Nu̱ú Jehová, ¿ndáana kúú na̱ kéʼé ña̱ va̱ʼa tá ndáana kúú na̱ kéʼé ña̱ va̱ása va̱ʼa?

¹⁶ ¿Ndáaña sákuaʼayó? Kǒo xíniñúʼu ndasakáʼnuyó ndióxi̱ vatá chi iinlá Jehová xíniñúʼu kañúʼuyó á kondaño̱ʼoyó. Ña̱kán xíniñúʼu chikaa̱yó ndee̱ ña̱ ndasakáʼnuyó Jehová soo saátu ña̱ kachíñuyó nu̱úra. Ta̱ profeta Malaquías ni̱ka̱ʼa̱nra ndáaña kéʼé iin na̱ yiví va̱ʼa ta ndáaña kéʼé iin na̱ yiví na̱ kéʼé ña̱ kini: “Kuni tukundó ña̱ síín íyo na̱ nda̱kú-ini nu̱ú na̱ ndi̱va̱ʼa-ini, ña̱ síín íyo na̱ káchíñu nu̱ú Ndióxi̱ nu̱ú na̱ va̱ása káchíñu nu̱úra” (Mal. 3:18). Xa̱ʼa̱ ña̱ kúúyó na̱ yiví ku̱a̱chi sava kéʼéyó ña̱ va̱ása va̱ʼa ña̱kán kivi ndakava-iniyó ta kǒo kandíxakayó ndasakáʼnuyó Jehová. Soo ná kǒo taxiyó ña̱ nda̱a̱ ni iin ña̱ʼa sakúxíka miíyó nu̱úra. Saáchi tá ná sandákooyó ña̱ ndasakáʼnuyó Jehová, iin ku̱a̱chi káʼnu ki̱ʼviyó nu̱úra.

17. ¿Nda̱chun xíniñúʼu viíní ndaka̱xiún na̱ tindaʼa̱ xíʼún?

¹⁷ Ta miíún sana íyo kúa̱ún soo ndákanixi̱níún ña̱ tindaʼún. Ña̱ ni̱ka̱ʼa̱n ta̱ Malaquías kivi chindeétáʼanña xíʼún ña̱ vií ndaka̱xiún na̱ tindaʼa̱ xíʼún. Ndakanixi̱ní xa̱ʼa̱ ña̱yóʼo; sana iin na̱ yiví, va̱ʼaníva-inina soo tá koo ndásakáʼnuna Jehová, ¿á na̱ yiví va̱ʼa kúúna nu̱úra? (2 Cor. 6:14). Tá ná tindaʼún xíʼinra, ¿á chindeétáʼanra xíʼún ña̱ ndasakáʼnún Ndióxi̱? Tá ná tindaʼún xíʼinñá, ¿á chindeétáʼanñá xíʼún ña̱ ndasakáʼnún Ndióxi̱? Sana va̱ʼava ni̱xi̱yo ini ná ñaʼá ná ti̱ndaʼa̱ xíʼin ta̱ Salomón soo kǒo níxi̱ndasakáʼnuná Jehová. Ta loʼo tá loʼo, sa̱xínuná-inira ta ki̱xáʼara ndásakáʼnura ndióxi̱ vatá (1 Rey. 11:​1, 4).

18. ¿Ndáaña xíniñúʼu sanáʼa̱ndó na̱ va̱lí se̱ʼendó?

¹⁸ Ndóʼó na̱ íyo se̱ʼe, kivi kuniñúʼundó ña̱ káʼa̱n xa̱ʼa̱ na̱ rey na̱ ni̱xi̱yo tiempo xi̱naʼá ña̱ va̱ʼa  sanáʼa̱ndó na̱ va̱lí se̱ʼendó ta ña̱yóʼo kivi chindeétáʼanña xíʼinna ña̱ kuni̱na ndasakáʼnuna Jehová. Xíniñúʼu kunda̱a̱-ini na̱ va̱lí se̱ʼendó ña̱ xi̱kaʼa̱n Jehová xa̱ʼa̱ na̱ rey na̱ ni̱xi̱yo tá ya̱chi̱. Tá iin na̱ rey yóʼo xi̱ndasakáʼnunara ta xi̱chindeétáʼanna xíʼin na̱ ñuu ña̱ sakúaʼana xa̱ʼa̱ra, na̱ va̱ʼa xi̱kuuna nu̱úra. Soo tá iin na̱ rey kǒo níxi̱ndasakáʼnunara ta kǒo níxi̱chindeétáʼanna xíʼin na̱ ñuu ña̱ sakúaʼana xa̱ʼa̱ra, na̱ kéʼé ña̱ kini xi̱kuuna nu̱úra. Iin yichi̱ va̱ʼa chinúundó nu̱úna ta na̱ʼa̱ndó nu̱úna ña̱ siʼna chiñu Jehová xíniñúʼu kundi̱ʼi̱-inina xa̱ʼa̱, tá kúú ña̱ kaʼvindó Biblia, ña̱ ku̱ʼu̱nndó reunión xíʼin ña̱ keendó predicación (Mat. 6:33). Soo tá kǒo kéʼéndó ña̱yóʼo, na̱ va̱lí se̱ʼendó kivi ka̱ʼa̱nna ña̱ kúúna testigo Jehová saáchi ndóʼó kúúndó testigo Jehová. Soo tá ná ya̱ʼa tiempo kǒo ndi̱ʼi̱ka-inina ña̱ keʼéna chiñu nu̱ú Jehová ta nda̱a̱ kivi kuxíkána nu̱úra.

19. Tá iin na̱ yiví ki̱tana ti̱xin ñuu Jehová, ¿á kivika ndikóna nu̱úra? (Koto recuadro ña̱ naní “ Kiviva ndikó tukún nu̱ú Jehová”).

¹⁹ Tá iin na̱ yiví ki̱tana ti̱xin ñuu Jehová, ¿á kivika ndikóna nu̱úra? Kiviva ndikóna nu̱úra tá ná ndandikó-inina xa̱ʼa̱ ña̱ ke̱ʼéna ta kivi xa̱a̱ tukuna koona migora, soo xíniñúʼu vitá koo inina ta taxina ña̱ chindeétáʼan na̱ anciano xíʼinna (Sant. 5:14). Ni ná ya̱ʼana nu̱ú ña̱ kaʼan nu̱ú, soo ña̱ ndáyáʼvika kúú ña̱ kixáʼana vií tuku kutáʼanna xíʼin Jehová.

20. Tá ná keʼéyó nda̱a̱ táki̱ʼva ke̱ʼé na̱ rey na̱ nda̱kú ni̱xi̱yo ini xíʼin Jehová, ¿ndáaña ka̱ʼa̱nra xa̱ʼa̱yó?

²⁰ Tá saá ¿ndáaña sákuaʼayó xíʼin ña̱ ke̱ʼé na̱ rey na̱ ni̱xi̱yo ñuu Israel? Kivi kooyó nda̱a̱ táki̱ʼva ni̱xi̱yo na̱ rey na̱ nda̱kú ni̱xi̱yo ini xíʼin Jehová tá xíʼin ndiʼi níma̱yó kúʼvi̱-iniyó xíniyóra. Ná kǒo keʼékayó ña̱ xi̱keʼéyó tá ya̱chi̱, ná ndandikó-iniyó xa̱ʼa̱ ku̱a̱chiyó tá ná keʼéyó ña̱ kútóo Jehová. Saátu ná ndakaʼányó ña̱ iinlá mií Ndióxi̱ Jehová xíniñúʼu ndasakáʼnuyó. Tá nda̱kú íyo iniún xíʼin Jehová, ka̱ʼa̱nra xa̱ʼún ña̱ kúún iin na̱ yiví va̱ʼa.