1, 2. a) ¿Ndáaña ni̱ka̱ʼa̱n ta̱ Jesús? b)¿Nda̱chun ni̱ki̱ʼvi na̱ discípulo nu̱ú ku̱a̱chi? (Koto na̱ʼná).

 “NA̱ YIVÍ kúni̱vana keʼéna ña̱ va̱ʼa, soo vitánína” (Mat. 26:41b). Kúnda̱a̱va-ini ta̱ Jesús ña̱ kúúyó na̱ yiví ku̱a̱chi ta sava yichi̱ kéʼéyó ña̱ va̱ása va̱ʼa. Soo, saátu ni̱ka̱ʼa̱nra xíʼinyó ña̱ ná kiʼinníyó kuenta saáchi kivi xa̱a̱yó ndakanixi̱níyó ña̱ kǒo ndakavavíyó ndaʼa̱ ku̱a̱chi. Tá kúma̱níka ka̱ʼa̱n ta̱ Jesús tu̱ʼun yóʼo, na̱ discípulo ni̱ka̱ʼa̱nna ña̱ kǒo sandákoonara (Mat. 26:35). Ña̱ va̱ʼaníva kúú ña̱ xi̱kuni̱na keʼéna ña̱ kǒo sandákoona ta̱ Jesús, soo kǒo níndakanixi̱nína ndáaña kúú ña̱ ndaka̱xinna keʼéna tá ná ya̱ʼana nu̱ú tu̱ndóʼo. Ña̱kán, ta̱ Jesús ni̱ka̱ʼa̱nra xíʼinna: “Kundito va̱ʼa nu̱úndó ta ka̱ʼa̱nníndó xíʼin Ndióxi̱ ña̱ va̱ʼa ná kǒo ndakavandó ndaʼa̱ ku̱a̱chi” (Mat. 26:41a).

² ¿Ndáaña ke̱ʼé na̱ discípulo tá ti̱inna ta̱ Jesús? Xa̱ʼa̱ ña̱ kǒo níxi̱ndito va̱ʼa nu̱úna ni̱ki̱ʼvina nu̱ú ku̱a̱chi. Kǒo níndakanixi̱nína kuu ña̱yóʼo, ña̱kán ni̱yi̱ʼvína ta sa̱ndákoo miína ta̱ Jesús ta nda̱kiʼinna ku̱a̱ʼa̱nna (Mat. 26:56).

3. a) ¿Ndáaña xíniñúʼu keʼéyó tá kúni̱yó nda̱kú koo iniyó xíʼin Jehová? b) ¿Ndáaña sakúaʼayó nu̱ú artículo yóʼo?

³ Ña̱kán, ná kǒo ndakanixi̱níyó ña̱ nda̱a̱ ni iin ki̱vi̱ kǒo ki̱ʼviyó ku̱a̱chi nu̱ú Ndióxi̱. Ni iinyó kǒo kúni̱ kuxíká nu̱ú Jehová,  ña̱kán chíkaa̱níyó ndee̱ ña̱ kǒo keʼéyó ña̱ʼa ña̱ kúndasíra xínira. Soo, xa̱ʼa̱ ña̱ kúúyó na̱ yiví ku̱a̱chi kuni̱yó keʼéyó ña̱ kini (Rom. 5:12; 7:​21-23). Sana iin kama ya̱ʼayó nu̱ú iin tentación ta ixayo̱ʼvi̱ña xíʼinyó ña̱ nda̱kú koo iniyó xíʼin Jehová, soo tá kúni̱yó nda̱kú koo iniyó xíʼin Jehová ta saátu xíʼin ta̱ Jesús xíniñúʼu kuniso̱ʼoyó ndiʼi ña̱ va̱xi nu̱ú tu̱ʼunra. Nu̱ú artículo yóʼo sakúaʼayó xa̱ʼa̱ ña̱ kivi chindeétáʼan xíʼinyó. Siʼna sakúaʼayó ndáaña xíniñúʼu kiʼinníyó kuenta xíʼin. Saátu sakúaʼayó ndáaña kivi chindeétáʼan xíʼinyó tasaá kǒo keʼéyó ña̱ kini. Tándi̱ʼi sakúaʼayó ndáaña kivi keʼéyó tasaá kǒo ndakavayó ndaʼa̱ ku̱a̱chi.

KIʼIN KUENTA ÑA̱ VA̱ʼA KǑO NDAKAVAÚN NDAʼA̱ KU̱A̱CHI

4, 5. ¿Nda̱chun xíniñúʼu kiʼinníyó kuenta ña̱ va̱ʼa kǒo ki̱ʼviyó ku̱a̱chi nu̱ú Jehová?

⁴ Sana túviyó ña̱ sava ku̱a̱chi su̱ví ña̱ ndeéví kúúña, soo ña̱yóʼo kivi sakúxíkaña miíyó nu̱ú Jehová ta sana xa̱a̱yó keʼéyó iin ku̱a̱chi ña̱ ndeéka nu̱úra.

⁵ Ndiʼivayó yáʼa nu̱ú tentación, soo savayó kúchiñuyó yáʼayó nu̱ú savaña ta savayó kǒo kúchiñuyó saáchi xa̱a̱ síín síín íyo ña̱ yáʼa iin tá iinyó nu̱ú. Tá kúú, sana sava na̱ ti̱ndaʼa̱ kúni̱na ku̱su̱nna xíʼin na̱ kǒo níti̱ndaʼa̱ xíʼinna á na̱ kúa̱an kúni̱na ku̱su̱nna xíʼin na̱ ta̱ʼán tindaʼa̱ xíʼinna. Ta savana íxayo̱ʼvi̱níña xíʼinna chi kúni̱na kusíkindaʼa̱na xíʼin kaʼána á kotondeʼéna pornografía. Inkatuna íxayo̱ʼvi̱níña xíʼinna ña̱ nasamana ki̱ʼva ña̱ íyona saáchi kamaní sáa̱na, ni̱nuní kúnina, á yíʼvina xínina na̱ yiví. Xa̱ʼa̱ ña̱kán, ta̱ Santiago ni̱ka̱ʼa̱nra: “Saáchi iin tá iin na̱ yiví ña̱ kútóona kúú ña̱ sándaʼvi miína ta sándakavañana” (Sant. 1:14).

6. ¿Ndáaña xíniñúʼu ndakuniyó?

⁶ ¿Á xíni̱ún ndáa tentación kúú ña̱ kivi sandákava yóʼó? Ná kǒo ndakanixi̱níyó ña̱ nda̱a̱ ni iin ki̱vi̱ kǒo ki̱ʼviyó ku̱a̱chi (1 Juan 1:8). Ta̱ apóstol Pablo ni̱ka̱ʼa̱nra ña̱ nda̱a̱ na̱ va̱ʼaní ndásakáʼnu Jehová xíniñúʼu kiʼinna kuenta ña̱ va̱ʼa kǒo ndakavana ndaʼa̱ ku̱a̱chi (Gál. 6:1). Ña̱kán, xíniñúʼu vitá koo iniyó ta ndakuniyó ndáa ña̱ʼa kúú ña̱ íxayo̱ʼvi̱ xíʼinyó (2 Cor. 13:5).

7. ¿Ndáaña xíniñúʼu kiʼinníyó kuenta xíʼin? Ka̱ʼa̱n xa̱ʼa̱ iin ejemplo.

⁷ Tá xa̱a̱ xíni̱yó tentación ña̱ kivi sandákava miíyó, ¿ndáaña kivi keʼéyó? Xíniñúʼu ndakú koo iniyó ta kǒo keʼéyó ña̱yóʼo. Ná ndakanixi̱níyó xa̱ʼa̱ ña̱yóʼo, tiempo xi̱naʼá súkunní ni̱xi̱yo sava nama̱ ña̱ ni̱xi̱yo sa̱tá sava ñuu,  soo ni súkunní ni̱xi̱yoña kiviva ki̱ʼvina chí yéʼé ta kaʼnína na̱ yiví. Ña̱kán, nu̱ú xi̱niñúʼu kundaanína kúú yéʼé. Ki̱ʼva saá xíniñúʼu keʼéyó, tá kúni̱yó keʼéyó iin ña̱ʼa soo kúnda̱a̱-iniyó ña̱ su̱ví ña̱ va̱ʼa kúúña ná kundaaníyó níma̱yó chi kivi sandákava miíyó ndaʼa̱ ku̱a̱chi (1 Cor. 9:27).

¿NDÁAÑA CHINDEÉTÁʼAN XÍʼINYÓ ÑA̱ VA̱ʼA KǑO KI̱ʼVIYÓ KU̱A̱CHI?

8, 9. ¿Ndáaña xi̱niñúʼu keʼé ta̱ loʼo ta̱ káʼa̱n ña̱ Proverbios capítulo 7 xa̱ʼa̱, tasaá kǒo ki̱ʼvira ku̱a̱chi? (Proverbios 7:​8, 9, 13, 14, 21).

⁸ ¿Ndáaña kivi keʼéyó ña̱ va̱ʼa kǒo ki̱ʼviyó ku̱a̱chi? Ná kotoyó ndáaña kivi sakúaʼayó xíʼin ña̱ va̱xi nu̱ú Proverbios capítulo 7. Yóʼo káʼa̱nña xa̱ʼa̱ iin ta̱ loʼo ta̱ ni̱ki̱ʼvi ku̱a̱chi kini saáchi ni̱ki̱si̱ra xíʼin iin ñaʼá ñá kísi̱ xíʼin ku̱a̱ʼá ta̱a. Versículo 22 káʼa̱nña ña̱ iin kama ni̱xa̱ʼa̱nra nu̱ú íyoña. Tá ná kaʼviyó ndiʼi versículo saá kunda̱a̱-iniyó ña̱ ke̱ʼévara ku̱a̱ʼá ña̱ʼa tasaáví ni̱xa̱a̱ra veʼeñá.

⁹ ¿Ndáaña ke̱ʼéra? Tá xa̱a̱ ku̱ñuú ni̱ya̱ʼara chí calle nu̱ú íyoñá, tasaá nda̱kiʼinra ku̱a̱ʼa̱nra chí nu̱ú níndichi veʼeñá (kaʼvi Proverbios 7:​8, 9). a Tá xi̱nirañá kǒo níxinura nu̱úñá chi ta̱xira ña̱ chi̱tóñá yuʼu̱ra ta ni̱ka̱ʼa̱nñá xíʼinra ña̱ xa̱a̱ ni̱so̱kóñá ña̱ʼa nu̱ú Ndióxi̱, saáchi xi̱kuni̱ñá sáxi̱nuñá-inira ña̱ kúúñá iin ñaʼá ñá va̱ʼa (kaʼvi Proverbios 7:​13, 14, b 21). c Tá kǒo níxa̱ʼa̱n ta̱ loʼo yóʼo nu̱ú íyoñá, sana kǒo ki̱ʼvivíra ku̱a̱chi xíʼinñá.

10. Nda̱a̱ táki̱ʼva ndo̱ʼo ta̱ loʼo ta̱ káʼa̱n ña̱ Proverbios xa̱ʼa̱, ¿ndáaña kivi kundoʼoyó?

¹⁰ Ndiʼivayó na̱ ndásakáʼnu Jehová kivi kundoʼo táʼan ña̱yóʼo. Sana ni̱ki̱ʼviyó iin ku̱a̱chi ndeé ta káʼa̱nyó ña̱ kǒo xíni̱yó nda̱chun ndo̱ʼoyó ña̱yóʼo. Soo tá xa̱a̱ ya̱chi̱ví ki̱xáʼún ndákanixi̱níún xa̱ʼa̱ ña̱ kini ña̱kán ni̱xa̱ún ke̱ʼúnña. Sana ki̱xáʼún kítáʼún xíʼin na̱ kǒo ndásakáʼnu Ndióxi̱, xi̱xitonde̱ʼún ña̱ kini. Sanatu ni̱ki̱ʼviún nu̱ú internet ta xi̱toún ña̱ kúndasí Jehová xínira, á ni̱xa̱ʼún iin lugar nu̱ú kǒo xíniñúʼu ku̱ʼún. Á sana kǒo níxi̱kaʼvikaún Biblia, kǒo níxi̱kaʼa̱nkaún xíʼin Jehová, ta kǒo níxi̱xaʼa̱nkaún reunión ni predicación. Ña̱kán, su̱ví iin sanaví níki̱ʼviún nu̱ú tu̱ndóʼo chi ya̱chi̱ví ki̱xáʼún kéʼún ku̱a̱ʼání ña̱ va̱ása va̱ʼa.

11. Tá kǒo kúni̱yó keʼéyó ña̱ kini, ¿ndáaña xíniñúʼu keʼéyó?

¹¹ ¿Ndáaña sákuaʼayó? Ña̱ kǒo xíniñúʼu keʼéyó ña̱ kini, soo saátu kǒo xíniñúʼu keʼéyó ña̱ʼa ña̱ kivi sandákava miíyó keʼéyóña. Ña̱yóʼo kúú ña̱ ni̱ka̱ʼa̱n ta̱ Salomón tá ni̱ka̱ʼa̱nra xa̱ʼa̱ ta loʼo ta̱ ni̱ki̱ʼvi ku̱a̱chi xíʼin ñaʼá ñá kísi̱ xíʼin ku̱a̱ʼá ta̱a. Siaʼa ni̱ka̱ʼa̱n ta Salomón: “Kǒo ku̱ʼún yichi̱ nu̱ú xíkañá” (Prov. 7:25). Ta saátu ni̱ka̱ʼa̱nra: “Kǒo kuyatiún nu̱úñá ta kǒo ku̱ʼún veʼeñá” (Prov. 5:​3, 8). Ña̱kán, tá kǒo kúni̱yó ki̱ʼviyó ku̱a̱chi nu̱ú Ndióxi̱ ná kǒo keʼéyó ña̱ʼa ña̱ kivi sandákava miíyó. d Íyo sava ña̱ʼa ña̱ kiviva keʼéyó, tá kúú ña̱ ku̱ʼu̱n si̱íyó á ña̱ kusíkíyó, soo tá ná kǒo kiʼinyó kuenta savaña kivi sandákavaña miíyó ta keʼéyó ña̱ kini (Mat. 5: 29, 30).

12. ¿Ndáaña ke̱ʼé ta̱ Job, ta ndáa ki̱ʼva chi̱ndeétáʼanña xíʼinra ña̱ kǒo ki̱ʼvira ku̱a̱chi? (Job 31:1).

¹² Tá kǒo kúni̱yó keʼéyó ña̱ʼa ña̱ kivi sandákava miíyó ndaʼa̱ ku̱a̱chi, kivi keʼéyó táʼan ña̱ ke̱ʼé ta̱ Job. Ta̱ Job kǒo níxi̱kuni̱ra sandáʼvira  ñá síʼira, ña̱kán chi̱kaa̱-inira ña̱ kǒo ndakanixi̱níra xa̱ʼa̱ inka ná ñaʼá. Ta̱ Job ni̱ka̱ʼa̱nra: “Ke̱ʼíi̱ iin trato xíʼin nduchúnu̱úi̱” (kaʼvi Job 31:1). e Ña̱ nda̱kaʼánra xa̱ʼa̱ trato ña̱ ke̱ʼéra, ña̱yóʼo chi̱ndeétáʼan xíʼinra ña̱ kǒo ku̱su̱nra xíʼin inka ná si̱ʼí. Saátu miíyó kivi chikaa̱-iniyó ña̱ kǒo keʼéyó ni iin ña̱ kini nu̱ú Ndióxi̱.

13. ¿Nda̱chun xíniñúʼu kiʼinyó kuenta xíʼin ña̱ ndákanixi̱níyó? (Koto na̱ʼná).

¹³ Saátu xíniñúʼu kiʼinyó kuenta xíʼin ña̱ ndákanixi̱níyó (Éx. 20:17). Savana káʼa̱nna ña̱ kiviva ndakanixi̱nína xa̱ʼa̱ ña̱ kini chi su̱ví ña̱ kéʼévína kúúña, soo su̱ví ña̱ ndixa kúú ña̱ káʼa̱nna chi tá ndákanixi̱nína xa̱ʼa̱ ña̱ kini xa̱a̱na keʼévanaña. Tá ndákanixi̱níún saá ixayo̱ʼvi̱níña xíʼún ña̱ ya̱ʼún nu̱ú iin tentación. Sava yichi̱ kǒo kúni̱víyó ndakanixi̱níyó xa̱ʼa̱ ña̱ kini, soo iin kama kíxaa̱ña xi̱níyó. ¿Ndáaña keʼéyó tá xa̱a̱ ndóʼoyó ña̱yóʼo? Ndi̱ku̱n kama ná ndakanixi̱níyó xa̱ʼa̱ ña̱ kivi chindeétáʼan xíʼinyó chi saá kúú ña̱ ndáayó miíyó ta kǒo ndákanixi̱níyó xa̱ʼa̱ ña̱ kivi sandákava miíyó ndaʼa̱ ku̱a̱chi (Filip. 4:8; Col.3:2; Sant. 1:​13-15).

14. ¿Ndáaka ña̱ kivi chindeétáʼan xíʼinyó ña̱ va̱ʼa kǒo ndakavayó ndaʼa̱ ku̱a̱chi?

¹⁴ ¿Ndáaka ña̱ kivi chindeétáʼan xíʼinyó ña̱ koo tu̱ʼvayó tasaá kǒo ndakavayó ndaʼa̱ ku̱a̱chi? Ná ndakaʼányó chi ndiʼi ña̱ káʼa̱n Jehová xíʼinyó ña̱ va̱ʼa miívayó kúúña, ña̱kán ná kandíxayóra. Sava yichi̱ íxayo̱ʼvi̱ña xíʼinyó keʼéyó á ndakanixi̱níyó nda̱a̱ táki̱ʼva kúni̱ mií Jehová. Soo, tá ná keʼéyó ña̱ kúni̱ Jehová kusi̱íní-iniyó.

15. ¿Ndáaña va̱ʼa ndákiʼinyó tá ndákanixi̱níyó xa̱ʼa̱ ña̱ va̱ʼa?

¹⁵ Xíniñúʼu sakúaʼayó ndakanixi̱níyó xa̱ʼa̱ ña̱ va̱ʼa ta kundasíyó kuniyó ña̱ kini (Amós 5:15). Tá saá ná keʼéyó ña̱yóʼo chindeétáʼan xíʼinyó ña̱ keʼéyó nina ña̱ va̱ʼa ta kǒo ndakavayó ndaʼa̱ ku̱a̱chi. Saátu chindeétáʼanña xíʼinyó ña̱ koo tu̱ʼvayó tá xa̱a̱ va̱xi iin tentación nu̱úyó ña̱ sana kǒo níndakanixi̱níyó kixi nu̱úyó.

16. Tá ku̱a̱ʼáka tiempo káchíñuyó nu̱ú Jehová, ¿ndáa ki̱ʼva chindeétáʼanña xíʼinyó? (Koto na̱ʼná).

 ¹⁶ ¿Ndáaña xíniñúʼu keʼéyó ña̱ va̱ʼa ndakanixi̱níyó xa̱ʼa̱ nina ña̱ va̱ʼa? Ná chikaa̱yó ndee̱ ña̱ kachíñu ku̱a̱ʼákayó nu̱ú Jehová. Tá xáʼa̱nyó reunión, tá kéeyó predicación saá kúú ña̱ kéʼéyó ña̱ kútóo Jehová, ta ña̱yóʼo chindeétáʼan xíʼinyó ya̱ʼayó nu̱ú tentación (Mat. 28:​19, 20; Heb. 10:​24, 25). Inka ña̱ chindeétáʼan xíʼinyó ña̱ kuni̱yó keʼéyó ña̱ va̱ʼa ta kundasíyó kuniyó ña̱ kini kúú ña̱ kaʼviyó Biblia ta ndakanixi̱níyó xa̱ʼa̱ ña̱ sákuaʼayó (Jos. 1:8; Sal. 1:​2, 3; 119:​97, 101). Ta ná ndakaʼányó xa̱ʼa̱ consejo ña̱ ta̱xi ta̱ Jesús: “Ka̱ʼa̱nníndó xíʼin Ndióxi̱ ña̱ va̱ʼa ná kǒo ndakavandó ndaʼa̱ ku̱a̱chi” (Mat. 26:41). Tá táváyó tiempo ña̱ ka̱ʼa̱nyó xíʼin Jehová, saá kúú ña̱ chindeétáʼanra xíʼinyó ta kuni̱níkayó keʼéyó ña̱ʼa ña̱ sákusi̱í-inira (Sant. 4:8).

NÁ CHIKA̱A̱YÓ NDEE̱ ÑA̱ VA̱ʼA KǑO NDAKAVAYÓ NDAʼA̱ KU̱A̱CHI

17. ¿Ndáaña xi̱ndoʼo ta̱ Pedro?

¹⁷ Sana kǒo ndikókavíyó keʼéyó ña̱ kini ña̱ xi̱keʼéyó tá ya̱chi̱, soo sana íyo sava ña̱ íxayo̱ʼvi̱ xíʼinyó sandákooyó keʼéyó. Ña̱yóʼo kúú ña̱ ndo̱ʼo ta̱ apóstol Pedro saáchi ni̱yi̱ʼvíra xi̱nira na̱ yiví. U̱ni̱ yichi̱ ni̱ka̱ʼa̱nra ña̱ kǒo xínira ta̱ Jesús (Mat. 26:​69-75). Tá ni̱ya̱ʼa tiempo ndakú ni̱xi̱yo inira ta ni̱ka̱ʼa̱nra xíʼin na̱ yiví na̱ ndóo sanedrín ta xíʼin ña̱yóʼo kivi ndakanixi̱níyó ña̱ kǒo níxi̱yiʼvíkara kunira na̱ yiví (Hech. 5:​27-29). Soo, tá ni̱ya̱ʼa ku̱i̱ya̱ xa̱ʼa̱ ña̱ yíʼvira xínira na̱ yiví na̱ ni̱ta̱ʼnda̱ nu̱ú yi̱i̱ kǒo níxiinkara kuxura xíʼin na̱ cristiano na̱ inka ñuu (Gál. 2:​11, 12). Xíʼin ña̱yóʼo kúnda̱a̱-iniyó ña̱ xi̱niñúʼu ndakúka koo inira chi xi̱yiʼvikavara xi̱xinira na̱ yiví.

18. Ni xa̱a̱ sa̱ndákooyó kéʼéyó sava ña̱ʼa, soo ¿ndáaña kivi kundoʼoyó?

¹⁸ Sana saá kivi kundoʼo miíyó. Sana ndákanixi̱níyó ña̱ kǒo ndakavakavíyó keʼéyó ña̱ kini ña̱ xi̱keʼéyó tá ya̱chi̱. Iin ta̱ hermano káʼa̱nra ña̱yóʼo: “Xa̱a̱ u̱xu̱ ku̱i̱ya̱ ni̱ya̱ʼa ña̱ kǒo níxi̱xitokai̱ pornografía, ta nda̱kanixi̱níi̱ ña̱ xa̱a̱ na̱ndósó-inii̱ xa̱ʼa̱ña. Soo, táki̱ʼva ni̱xi̱yo iin kití kue̱ʼe̱ tí xa̱a̱ ni̱xi̱yo tu̱ʼva ña̱ tiinrí saá ni̱xi̱yoña nu̱úi̱, saáchi xi̱kuniníi̱ koto tukui̱ña”. Ña̱ va̱ʼa kǒo kixáʼa tukura kotoraña, na̱kundaa̱-inira ña̱ xi̱niñúʼu chikaa̱ra ndee̱  ndiʼi ki̱vi̱ ña̱ va̱ʼa keʼéra ña̱ kútóo Jehová. Ñá síʼíra xíʼin na̱ anciano chíndeétáʼan xíʼinra ña̱ va̱ʼa kǒo koto tukura pornografía.

19. Tá íyo iin ña̱ʼa ña̱ kútóoyó keʼéyó soo su̱ví ña̱ va̱ʼa kúúña, ¿ndáaña kivi chindeétáʼan xíʼinyó ña̱ kǒo keʼéyóña?

¹⁹ Tá íyo iin ña̱ʼa ña̱ kúni̱yó keʼéyó soo su̱ví ña̱ va̱ʼa kúúña, ¿ndáaña chindeétáʼan xíʼinyó ña̱ va̱ʼa kǒo keʼéyó ña̱ kini? Ña̱ chindeétáʼan xíʼinyó kúú ña̱ keʼéyó ña̱ ni̱ka̱ʼa̱n ta̱ Jesús, ña̱ kundito va̱ʼa nu̱úyó. Ni túviyó ña̱ kǒo ndakavayó ndaʼa̱ ku̱a̱chi ná kiʼinníyó kuenta xíʼin ña̱ kivi sandákava miíyó keʼéyó ña̱ kini (1 Cor. 10:12). Kǒo sandákoún keʼún ña̱ chindeétáʼan xíʼún ña̱ va̱ʼa ya̱ʼún nu̱ú tentación. Proverbios 28:14 káchiña: “Na̱ yiví na̱ kíʼin kuenta xíʼin ña̱ kéʼéna si̱í íyona” (2 Ped. 3:14).

¿NDÁAÑA VA̱ʼA NDÁKIʼINYÓ TÁ KÉʼÉYÓ ÑA̱ VA̱ʼA?

20, 21. a) ¿Ndáaña va̱ʼa ndakiʼinyó tá chíkaa̱yó ndee̱ ña̱ kǒo keʼéyó ña̱ kini? b) Tá chíkaa̱yó ndee̱ ña̱ kǒo keʼéyó ña̱ kini, ¿ndáaña keʼé Jehová? (2 Corintios 4:7).

²⁰ ¿Á ndákiʼinyó ña̱ va̱ʼa tá chíkaa̱yó ndee̱ ña̱ kǒo keʼéyó ña̱ kini? Ndákiʼinvayóña. Na̱ kéʼé ña̱ kini loʼova tiempo kúsi̱í-inina, soo na̱ xíniso̱ʼo ña̱ káʼa̱n Jehová ndiʼi tiempo kúsi̱í-inina (Heb. 11:25; Sal. 19:8). Saáchi Jehová i̱xava̱ʼara miíyó ña̱ keʼéyó ña̱ kúni̱ra (Gén. 1:27). Kǒo ña̱ʼa sándi̱ʼi̱-iniyó tá xíniso̱ʼoyó ña̱ káʼa̱n Jehová ta saátu kivi kooyó ndiʼi tiempo (1 Tim. 6:12; 2 Tim. 1:3; Jud. 20, 21).

²¹ Na̱ yiví ku̱a̱chi kúúyó ta vitáníyó. Soo, Jehová káʼa̱nra ña̱ chindeétáʼanvara xíʼinyó (kaʼvi 2 Corintios 4:7). Taxiva Jehová ndee̱ ndaʼa̱yó ña̱ va̱ʼa kuchiñuyó ya̱ʼayó nu̱ú tentación, soo saátu miíyó ndiʼi ki̱vi̱ ná chika̱a̱yó ndee̱ keʼéyó ña̱ kútóora. Tá xítora ña̱ chíkaa̱níyó ndee̱ ña̱ kǒo kéʼéyó ña̱ kini ndakuiinvara oración ña̱ kéʼéyó ta chindeétáʼanvara xíʼinyó (1 Cor. 10:13). Jehová kúú ta̱ chindeétáʼan xíʼinyó ña̱ va̱ʼa kundito va̱ʼa nu̱úyó tasaá kǒo keʼéyó ña̱ kini.