1. ¿Nda̱chun kúú ña̱ kúsi̱íní-iniyó?

KÚSI̱ÍNÍ-INIYÓ ña̱ ku̱a̱ʼáníka ku̱a̱ʼa̱n ndúu na̱ ndásakáʼnu Jehová. Ta xíʼin ña̱yóʼo kúnda̱a̱-iniyó nda̱a̱ táki̱ʼva íyo na̱ sándáye̱ʼe̱ ñuʼu̱ saá íyona xíʼin ña̱ kéʼéna. Tá ku̱i̱ya̱ ni̱ya̱ʼa ki̱ʼva u̱xu̱ millón na̱ yiví ka̱ʼvina xíʼin. Ta saátu ku̱a̱ʼání na̱ yiví ni̱xa̱ʼa̱nna tá ni̱xi̱yo ña̱ conmemoración ta sa̱kuaʼana xa̱ʼa ña̱ kúʼvi̱ní-ini Ndióxi̱ xínira miíyó ta̱xira se̱ʼera ña̱ nda̱tavára miíyó ndaʼa̱ ku̱a̱chi (1 Juan 4:9).

2, 3. a) ¿Ndáa ki̱ʼva íyo na̱ ñuu Ndióxi̱? b) ¿Ndáaña sakuaʼayó nu̱ú artículo yóʼo?

² Ti̱xin ñuu Jehová ku̱a̱ʼání nu̱ú tu̱ʼun káʼa̱n na̱ ñúʼu yóʼo. Ta ni saáví va̱ʼava inkáchi kítáʼan ndiʼiyó ndásakáʼnuyó yiváyó Jehová (Rev. 7:9). Nda̱a̱ ndáaka tu̱ʼun káʼa̱nyó á nda̱a̱ ndáaka ñuu ndóoyó, va̱ʼava ndasakáʼnuyó Jehová (Filip. 2:15).

³ Xa̱ʼa ña̱ ku̱a̱ʼání ku̱a̱ʼa̱n ndúuyó ta inkáchi kítáʼan ndiʼiyó ta ndíʼi̱ní-iniyó xa̱ʼa chiñu Ndióxi̱, xa̱ʼa ndiʼi ña̱yóʼo ndúkáʼnu Jehová íxaayó. Ta na̱ yiví na̱ xíto ña̱ kéʼéyó kíxaʼá kútóona sakuaʼana xa̱ʼa Jehová. Nu̱ú artículo yóʼo sakuaʼayó ndáa ki̱ʼva keʼéyó u̱ni̱  saá ña̱yóʼo, tasaá nda̱a̱ táki̱ʼva koo na̱ sándaye̱ʼe̱ ñuʼu̱ nu̱ú inkana saá kooyó (kaʼvi Mateo 5:16). *

4, 5. a) Su̱ví iinlá ña̱ natúʼunyó xa̱ʼa Ndióxi̱, ¿ndáa inka ña̱ʼa xíniñúʼu keʼéyó ña̱ va̱ʼa ndukáʼnu Jehová? b) ¿Ndáaña va̱ʼa ndákiʼinyó tá va̱ʼa iniyó xíʼin inka na̱ yiví? (Koto na̱ʼná ña̱ va̱xi chí xa̱ʼa).

⁴ Nu̱ú ña̱ naní Tutu Ña̱ Nátúʼun xíʼinyó ña̱ tu̱ʼun inglés ña̱ 1 tí junio ña̱ ku̱i̱ya̱ 1925 nu̱ú artículo “Luz en la oscuridad” káchiña: “Ni iinna kǒo kivi koo nda̱kú-inina xíʼin tátayó tiempo ña̱ ndóoyó vitin. Ña̱ va̱ʼa koo nda̱kú-inina xíniñúʼu sandáye̱ʼe̱na ñuʼu̱ nu̱ú inkana”. Ta káchikaña: “Ña̱ va̱ʼa keʼéna ña̱yóʼo xíniñúʼu ku̱ʼu̱nna natúʼunna xa̱ʼa Ndióxi̱ ndiʼi ñuu ña̱ íyo ñuyǐví yóʼo ta xíniñúʼu keʼétuna ña̱ káʼa̱n Ndióxi̱”. Xíʼin ña̱yóʼo kúnda̱a̱-iniyó tá nátúʼunyó xa̱ʼa Ndióxi̱ xíʼin inkana ta sánáʼa̱yóna xa̱ʼa Ndióxi̱ nda̱a̱ táki̱ʼva íyo na̱ sándáye̱ʼe̱ ñuʼu̱ nu̱ú inkana saá íyoyó (Mat. 28:19, 20). Ta saátu xíʼin ña̱ kéʼéyó kivi ndasakáʼnuyó Jehová. Tá nátúʼunyó xa̱ʼa Ndióxi̱, na̱ yiví xítona ndáa ki̱ʼva íyoyó. Tá xáku̱yó xíʼinna á chíndeéyóna, ka̱ʼa̱n va̱ʼana xa̱ʼayó ta ka̱ʼa̱n va̱ʼatuna xa̱ʼa Ndióxi̱ ta̱ ndásakáʼnuyó.

⁵ Ta̱ Jesús ni̱ka̱ʼa̱nra xíʼin na̱ discípulora: “Tá ni̱ki̱ʼvindó veʼena chindeéndóna” (Mat. 10:12). Ñuu nu̱ú xi̱xikana xi̱natúʼunna, na̱ yiví na̱ xi̱xiyo kán xi̱ka̱ʼa̱nna xíʼin nda̱a̱ ndáaka na̱ yiví ña̱ ya̱ʼana veʼena. Soo sana va̱ása kéʼéna ña̱yóʼo ñuu nu̱ú ndóo miíyó. Ku̱a̱ʼání na̱ yiví yíʼvina á nda̱a̱ sáa̱na tá xáa̱ iin na̱ yiví na̱ kǒo xíni̱na veʼena. Soo tá vií káʼa̱nyó xíʼinna, si̱í kúniyó xáa̱yó á xáku̱yó xíʼinna, sana kuni̱na kuniso̱ʼona ña̱ ka̱ʼa̱nyó. Saátu ná keʼéyó tá ku̱a̱ʼa̱nyó xíʼin tú carro válí. Na̱ xáʼa̱n xíʼin tú carro válí xínina ña̱ va̱ʼaka ndákuiin na̱ yiví yuʼúna tá chíndeénana ta xáku̱na xíʼinna. Savana nda̱a̱ kúyatinna, kíʼinna iin tutu ta kíxaʼána nátúʼunna xíʼinna.

6. ¿Ndáaña kéʼé iin ta̱ hermano xíʼin ñá síʼíra ña̱ va̱ʼa ndásakáʼnuna Ndióxi̱?

⁶ Iin ta̱ hermano xíʼin ñá síʼíra na̱ xa̱a̱ chée kúúna ta ndóona chí ñuu Inglaterra, va̱ása kívi keekana natúʼunna xa̱ʼa Ndióxi̱ saáchi kúúmiína kue̱ʼe̱. Soo xa̱ʼa ña̱ va̱ása kúni̱na sandákoona ña̱ ndasakáʼnuna Ndióxi̱, ki̱xaʼána nátúʼunna yatin chí yéʼéna. Xa̱ʼa ña̱yóʼo kánindichina iin mesa ta chíndoona tutu tu̱ʼun Ndióxi̱ nu̱únú, ta kéʼéna ña̱yóʼo mií hora ña̱ yáʼa na̱ yiví ku̱a̱ʼa̱nna ndákiʼinna se̱ʼena escuela ña̱ íyo yatin kán. Ta na̱ yáʼa yóʼo kíxaʼána kúni̱na kunda̱a̱-inina ta kíʼinna u̱vi̱ saá tutu ña̱ naní Los jóvenes preguntan xíʼin savaka folleto. Iin ñá precursora ñá ku̱a̱ʼa̱n congregación nu̱ú xáʼa̱n na̱ hermano yóʼo, ki̱xaʼáñá xáʼa̱nñá nu̱ú ndóona ña̱ chíndeéñána. Xa̱ʼa ña̱ va̱ʼaní ini ñá hermana yóʼo ta saátu xa̱ʼa ña̱ chíka̱a̱ní na̱ hermano yóʼo ndée, iin ta̱a ta̱ xáʼa̱n ndákiʼin se̱ʼe ki̱xaʼára sákuaʼara xa̱ʼa Ndióxi̱.

7. ¿Ndáaña kivi keʼéyó ña̱ chindeétáʼanyó xíʼin na̱ ke̱e inka ñuu?

⁷ Tiempo vitin ku̱a̱ʼání na̱ yiví na̱ kée inka ñuu ku̱a̱ʼa̱nna inka país xa̱ʼa ña̱ íyo ku̱a̱chi ñuuna. ¿Ndáaña kivi keʼéyó ña̱ va̱ʼa chindeétáʼanyó xíʼinna ña̱ sakuaʼana xa̱ʼa Jehová xíʼin xa̱ʼa ña̱ kúni̱ra keʼéra? Ña̱ nu̱ú kúúña kivi sakuaʼayó chindeéyóna tu̱ʼun miína. Ta ña̱ kivi chindeétáʼan xíʼinyó kúú ña̱ JW Language. Saátu kivi sakuaʼayó sava tu̱ʼun ña̱ ka̱ʼa̱nyó xíʼinna ta kutóokana natúʼunyó xíʼinna. Ta kivitu ka̱ʼa̱nyó xíʼinna xa̱ʼa ña̱ página ña̱ Internet jw.org ta na̱ʼa̱yó nu̱úna sava video á tutu ña̱ íyo tu̱ʼun miína (Deut. 10:19).

8, 9. a) ¿Nda̱saa chíndeétáʼan reunión ña̱ xíyo ma̱ʼñú semana xíʼinyó? b) ¿Ndáaña kivi keʼé na̱ íyo se̱ʼe ña̱ chindeétáʼanna xíʼinna ña̱ taxina comentario ti̱xin reunión?

 ⁸ Jehová táxira ña̱ koo reunión nu̱ú ndátakayó ña̱ naní Ña̱ Kéʼé na̱ Ndásakáʼnu Ndióxi̱, ña̱ va̱ʼa sakuaʼakayó natúʼunyó xa̱ʼara. Ndiʼi ña̱ sákuaʼayó ti̱xin reunión yóʼo chíndeéña miíyó ña̱ va̱ása yi̱ʼvíní-iniyó tá ku̱a̱ʼa̱nyó kéʼéyó revisita á ku̱a̱ʼa̱nyó káʼviyó xíʼin na̱ yiví.

⁹ Ku̱a̱ʼání na̱ yiví na̱ va̱xi veʼe nu̱ú ndátakayó ndákanda̱-inina ña̱ xítona va̱ʼaní ndákuiin na̱ va̱lí ti̱xin reunión. Ta va̱ʼaní kéʼé na̱ íyo se̱ʼe ña̱ sánáʼa̱na se̱ʼena ña̱ ndakuiinna tu̱ʼun miína ti̱xin reunión chi tá kéʼé na̱ va̱lí ña̱yóʼo xáa̱na ndásakáʼnuna Ndióxi̱. Ña̱ káʼa̱n na̱ va̱lí xíʼin ndiʼi níma̱na chíndeétáʼanña xíʼin na̱ yiví na̱ xáa̱ kán, ña̱ kunda̱a̱-inina ña̱ vitin kúú ña̱ nda̱ni̱ʼína ña̱ nda̱a̱ (1 Cor. 14:25).

10. Na̱ íyo se̱ʼe, ¿ndáa ki̱ʼva chíndeétáʼan ña̱ kaʼvina xíʼin na̱ veʼena ña̱ va̱ʼaka kitáʼanna?

¹⁰ Inka ña̱ kivi keʼéyó kúúña, ná chika̱a̱yó ndée ña̱ va̱ʼa kutáʼanyó xíʼin ndiʼi na̱ veʼeyó ta saátu xíʼin na̱ congregación. Ná íyo se̱ʼe ná chika̱a̱na ndée ña̱ kaʼvi ni̱ʼina xíʼin na̱ veʼena. Ku̱a̱ʼánína xítona ña̱ JW Broadcasting. Tá xa̱a̱ ndi̱ʼi xi̱tonaña xíniñúʼu ka̱ʼa̱nna ndáaña kivi keʼéna xíʼin ña̱ sa̱kuaʼana. Ta̱a ta̱ káʼvi xíʼin na̱ veʼera xíniñúʼu kíʼinra kuenta chi xa̱a̱ síín ña̱ xíniñúʼu na̱ va̱lí ta xa̱a̱ síín ña̱ xíniñúʼu na̱ náʼnu. Xa̱ʼa ña̱yóʼo xíniñúʼu viíní ndakanixi̱níra ña̱ va̱ʼa keʼéra á ka̱ʼa̱nra xa̱ʼa ña̱ kivi chindeétáʼan xíʼin ndiʼina kúúna na̱ va̱lí á na̱ náʼnu (Sal. 148:12, 13).

11-13. ¿Ndáaña kivi keʼé ndiʼiyó ña̱ chindeéyó na̱ congregación ña̱ inkáchi kutáʼan ndiʼiyó ndasakáʼnuyó Ndióxi̱?

¹¹ Kúúyó na̱ va̱lí á na̱ náʼnu kivi chindeétáʼanyó xíʼin na̱ congregación ña̱ va̱ʼa inkáchi kutáʼan ndiʼiyó, ta saá ndiʼiyó kivi xa̱a̱yó sandáye̱ʼe̱yó ñuʼu̱ ña̱ kúúmiíyó á ña̱ ndasakáʼnuyó Ndióxi̱. Na̱ va̱lí kivi chika̱a̱-inina ña̱ kundi̱ʼi̱ka-inina xa̱ʼa na̱ hermano na̱ xa̱a̱ chée. Kivi ka̱ʼa̱nna xíʼin na̱ hermano na̱ xa̱a̱ chée ña̱ ná natúʼunna xíʼinna xa̱ʼa ndáa ki̱ʼva ka̱chíñuna nu̱ú Ndióxi̱. Tá ná keʼéna ña̱yóʼo u̱vi̱ saána va̱ʼaní kunina ta va̱ʼaka ndasakáʼnuna Ndióxi̱. Xa̱ʼa ña̱yóʼo ndiʼivayó kivi ndakiʼin na̱ xáʼa̱n reunión ta chindeéyóna. Kivi ku̱a̱ku̱yó xíʼinna ta chindeéyóna ña̱ ná ndani̱ʼína nu̱ú koona á kivitu na̱ʼa̱yó sava na̱ hermano nu̱úna ta ka̱ʼa̱nyó xíʼinna nda̱saa nanína. Tá ná keʼéyó ña̱yóʼo va̱ʼaní kunina.

 ¹² Na̱ kíʼin kuenta xíʼin ña̱ kéeyó nátúʼunyó xa̱ʼa Ndióxi̱ kivi chindeétáʼanna xíʼin na̱ hermano na̱ xa̱a̱ chée ña̱ va̱ʼaka ndasakáʼnuna Ndióxi̱. Xa̱ʼa ña̱yóʼo xíniñúʼu kíʼinna kuenta á kúúmií na̱ hermano yóʼo iin territorio nu̱ú kivi natúʼunna. Ta kivitu ka̱ʼa̱nna xíʼin na̱ hermano na̱ válíka ña̱ ná chindeéna na̱ hermano na̱ xa̱a̱ chée ña̱ keena natúʼunna. Ta xíniñúʼu viíní keʼéna xíʼin na̱ hermano na̱ va̱ása kívi kee ku̱a̱ʼá hora natúʼunna xa̱ʼa Ndióxi̱ chi kúúmiína kue̱ʼe̱ á inkaka tu̱ndóʼo. Tá kéʼéna ña̱yóʼo saá kúú ña̱ chíndeétáʼanna xíʼin ndiʼi na̱ hermano kúúna na̱ va̱lí á na̱ xa̱a̱ chée á na̱ sa̱kán sákuaʼa (Lev. 19:32).

¹³ Iin ta̱ ka̱ʼyí ña̱ Salmo káchira: “Iin ña̱ va̱ʼaní kúúña ña̱ inkáchi kítáʼan na̱ ndásakáʼnu Ndióxi̱” (kaʼvi Salmo 133:1, 2). * Va̱ʼaní xi̱ndoo na̱ ñuu Israel tá inkáchi xi̱ndasakáʼnuna Ndióxi̱. Ta̱ ka̱ʼyí ña̱ Salmo chi̱táʼanra ña̱yóʼo xíʼin iin aceite, chi táyóʼo va̱ʼaní sándi̱kora nu̱ú tukue̱ʼe̱yó ta va̱ʼaní xáʼa̱nra. Saátu miíyó kivi sandi̱koyó-ini na̱ hermano na̱ yáʼa nu̱ú tu̱ndóʼo. Ta ña̱yóʼo kúú ña̱ chindeétáʼan xíʼinyó ña̱ va̱ʼa inkáchi kutáʼan ndiʼiyó. Ta tá xa̱a̱ kéʼéyó ña̱yóʼo, iin ña̱ va̱ʼaní kúúña. Soo ¿á kivi chika̱a̱yó ndée ña̱ xa̱a̱yó kuxini̱ va̱ʼakayó ndiʼi na̱ hermano? (2 Cor. 6:11-13).

14. ¿Ndáaña kivi keʼéyó ña̱ ka̱ʼa̱n va̱ʼana xa̱ʼayó chí nu̱ú ndóoyó?

¹⁴ ¿Á kivi chika̱a̱yó ndée ña̱ vií ná koo ña̱ keʼéyó ña̱ va̱ʼa ná kuni ndiʼina nu̱ú ndóoyó ña̱ ndásakáʼnuyó Ndióxi̱? Tá vií-iniyó xíʼin na̱ ndóo yatin xíʼinyó sana kuni̱na sakuaʼana xa̱ʼa Ndióxi̱. Ná nda̱ka̱tu̱ʼunyó miíyó: “¿Ndáaña ndákanixi̱ní na̱ ndóo yatin xíʼi̱n xa̱ʼíi̱? ¿Á vií íyo veʼi̱ ta á limpio íyoña? ¿Á káʼa̱n va̱ʼana xa̱ʼa veʼe nu̱ú íyoi̱? ¿Á chíndeé táʼi̱n xíʼin inkana?”. Tá nátúʼunyó xíʼin inka na̱ hermano ná nda̱ka̱tu̱ʼunyóna nda̱saa chíndeéña miína xa̱ʼa ña̱ vií-inina xíʼin na̱ ndóo yatin xíʼinna, xíʼin na̱ táʼanna, á na̱ káchíñuna xíʼin á na̱ káʼvina xíʼin escuela. Sana ku̱a̱ʼání ña̱ va̱ʼa natúʼunna xíʼinyó xa̱ʼa ña̱yóʼo (Efes. 5:9).

15. ¿Nda̱chun xíniñúʼuní koo tu̱ʼvayó?

¹⁵ Tá kuniyó ndasakáʼnukayó Ndióxi̱ xíʼin ña̱ kéʼéyó, xíniñúʼu ndakanixi̱níyó xa̱ʼa tiempo ña̱ ndóoyó. Ku̱a̱ʼání yichi̱ ni̱ka̱ʼa̱n ta̱ Jesús xa̱ʼa ña̱yóʼo xíʼin na̱ discípulo: “Koo tu̱ʼvandó” (Mat. 24:42; 25:13; 26:41). Tá ndákanixi̱níyó ña̱ kúma̱ní ku̱a̱ʼáka tiempo kixa̱a̱ ña̱ “gran tribulación” á sana kixa̱a̱ña iin ki̱vi̱ soo miíyó va̱ása kunikayóña, tá saá ndákanixi̱níyó va̱ása kundi̱ʼi̱-iniyó natúʼunyó xa̱ʼa Ndióxi̱ (Mat. 24:21). Ta nda̱a̱ kivi xa̱a̱yó sandákooyó chiñu ña̱ kéʼéyó nu̱úra.

16, 17. ¿Ndáaña kivi keʼéyó ña̱ va̱ʼa koo tu̱ʼvayó?

¹⁶ Kinika ku̱a̱ʼa̱n ndúu ña̱ ñuyǐví yóʼo ta xíniñúʼu koo tu̱ʼvaníyó. Xa̱a̱ nda̱ka̱xin Ndióxi̱ ki̱vi̱ ña̱ sandiʼi-xa̱ʼara ña̱ kini (Mat. 24:42-44). Xa̱ʼa ña̱yóʼo xíniñúʼu kundatuyó ta ndiʼi tiempo koo tu̱ʼvayó. Ná kaʼviyó tu̱ʼun Ndióxi̱ ndiʼi ki̱vi̱ tá ná keʼéníyó oración (1 Ped. 4:7). Ná kundiku̱nyó yichi̱ sava na̱ hermano na̱ xa̱a̱ ku̱a̱ʼání ku̱i̱ya̱ káchíñu nu̱ú Jehová. Kivitu nandukúyó ña̱ káʼa̱n xa̱ʼana nu̱ú tutu ña̱ tává na̱ ñuu Ndióxi̱.

¹⁷ Ná kundi̱ʼi̱ní-iniyó ña̱ keʼéyó chiñu nu̱ú Jehová, ná chindeétáʼanyó xíʼin inkana ta ná taváyó tiempo ña̱ kundooyó xíʼin na̱ hermano. Tá ná keʼéyó ña̱yóʼo si̱íka kooyó ta ni va̱ása kuniyó ya̱ʼa tiempo (Efes. 5:16). Tá ya̱chi̱ na̱ hermano xa̱a̱ ku̱a̱ʼání chiñu ke̱ʼéna nu̱ú Jehová. Soo vitin táxiníkara yichi̱ nu̱úyó ndáa ki̱ʼva ku̱a̱ʼáka chiñu keʼéyó nu̱úra. Ta saá va̱ʼaka sáxi̱nuyó chiñura.

18, 19. ¿Ndáaña kivi keʼé na̱ anciano ña̱ va̱ʼa chindeétáʼanna xíʼinyó ña̱ koo tu̱ʼvayó ta keʼékayó chiñu nu̱ú Jehová? Káʼa̱n xa̱ʼa iinña.

 ¹⁸ Ni ku̱a̱ʼání ku̱a̱chi kíʼviyó nu̱ú Jehová, táxivara káchíñuyó nu̱úra. Ta ña̱ va̱ʼa chindeétáʼanra xíʼinyó ña̱ koo tu̱ʼvayó táxira na̱ anciano ña̱ chindeétáʼanna xíʼinyó (kaʼvi Efesios 4:8b, 11, 12a). * Xa̱ʼa ña̱yóʼo tá ni̱xa̱a̱ na̱ anciano káʼa̱nna xíʼinyó ná kuniso̱ʼoyó consejo ña̱ táxina ndaʼa̱yó.

¹⁹ Chí ñuu Inglaterra, iin ta̱ hermano xíʼin ñá síʼíra ni̱ka̱ʼa̱nna xíʼin na̱ anciano ña̱ ná chindeétáʼanna xíʼinna. Ñákán ni̱ka̱ʼa̱nñá ña̱ va̱ása inkáchi ndásakáʼnuna Ndióxi̱ túviñá. Ta miíra káchira ña̱ va̱ása kúchiñu va̱ʼara sánáʼa̱ra na̱ veʼera xíʼin ña̱ kaʼvi ni̱ʼira xíʼinna. Na̱ anciano ni̱ka̱ʼa̱nna xíʼinna xa̱ʼa ta̱ Jesús ña̱ viíní xi̱ndaara na̱ discípulo ta xi̱kiʼinra kuenta xíʼin ña̱ xíniñúʼuna. Ni̱ka̱ʼa̱nna xíʼinra ña̱ ná kundiku̱nra yichi̱ ta̱ Jesús ta ñá síʼíra ni̱ka̱ʼa̱nna xíʼinñá ña̱ ná sakuaʼañá kundatuñá. Ta saátu ni̱ka̱ʼa̱nna xíʼinna ndáaña kivi keʼé u̱vi̱ saána ña̱ va̱ʼa kaʼvina xíʼin u̱vi̱ saá se̱ʼena (Efes. 5:21-29). Tá ni̱ya̱ʼa tiempo ni̱ka̱ʼa̱nna xíʼin ta̱ hermano kán ña̱ va̱ʼaní kéʼéra. Ni̱ka̱ʼa̱nna xíʼinra ña̱ ná kǒo sandákoora ña̱ keʼéraña ta ná kandíxara ña̱ chindeétáʼan espíritu santo xíʼinra keʼéraña. Ña̱ kúʼvi̱ní-ini na̱ anciano yóʼo xíninara xíʼin ña̱ ni̱ndi̱ʼi̱-inina xa̱ʼara ta chindeétáʼanna xíʼinra, ña̱ ke̱ʼéna ndiʼi ña̱yóʼo ki̱xaʼá na̱ hermano yóʼo va̱ʼaka ndásakáʼnuna Ndióxi̱.

20. ¿Ndáaña va̱ʼa ndakiʼinyó tá ná chika̱a̱yó ndée ndasakáʼnuyó Ndióxi̱?

²⁰ Salmo 128:1 káchiña: “Si̱íní íyo na̱ ndásakáʼnu Jehová tá kéʼéna ña̱ káʼa̱nra”. Nu̱ú ña̱ artículo yóʼo xi̱niyó ku̱a̱ʼá ña̱ kivi keʼéyó ña̱ va̱ʼa sandáye̱ʼe̱yó ñuʼu̱yó á ña̱ ndasakáʼnuyó Jehová, tá kúú ña̱yóʼo: ña̱ ka̱ʼa̱nyó xíʼin inkana ña̱ ndasakáʼnuna Jehová, ña̱ chika̱a̱yó ndée ña̱ inkáchi kutáʼanyó, xíʼin ña̱ koo tu̱ʼvayó. Tá ná keʼéyó ña̱yóʼo si̱íní kooyó, ta na̱ inka kunina ña̱ va̱ʼa kéʼéyó, ta ku̱a̱ʼáka na̱ yiví kutóona ndasakáʼnuna yiváyó Jehová (Mat. 5:16).