1. ¿Ndáaña ke̱ʼé Jehová xa̱ʼa̱ iin tá iinyó?

JEHOVÁ kúú ta̱ ka̱na iin tá iinyó ña̱ va̱ʼa kooyó táʼan na̱ ñuura (Juan 6:44). Ná ndakanixi̱níyó xa̱ʼa̱ ña̱ kúni̱ kachi ña̱yóʼo. Tá ki̱xáʼa Jehová nda̱kaxinra miíyó tañu na̱ yiví na̱ íyo nu̱ú ñuʼú yóʼo, xi̱nira ña̱ ndíka̱a̱ iin ña̱ ndáyáʼviní níma̱yó: ña̱ kivi xa̱a̱yó kuʼvi̱-iniyó kuniyóra (1 Crón. 28:9). Jehová xíni̱ra miíyó, kúnda̱a̱-inira xíʼin ña̱ ndóʼoyó ta kúʼvi̱-inira xínira miíyó ta ña̱yóʼo sándi̱koníña-iniyó.

2. ¿Ndáa ejemplo xi̱niñúʼu ta̱ Jesús ña̱ va̱ʼa kunda̱a̱-iniyó ña̱ kúʼvi̱ní-ini Jehová xínira iin tá iinyó?

² Jehová kúʼvi̱ní-inira xínira yóʼó, ta saátu kúʼvi̱ní-inira xínira iin tá iin na̱ hermano. Ta ña̱ va̱ʼa kunda̱a̱-iniyó xíʼin ña̱yóʼo ná ka̱ʼa̱nyó xa̱ʼa̱ iin ejemplo ña̱ xi̱niñúʼu ta̱ Jesús, ka̱chira: “Tá iin ta̱a kúúmiíra 100 ndikachi ta iin tíkán nda̱ñúʼu”. ¿Ndáaña keʼéra? “Sandákoora 99 tíyóʼo yuku̱ ta ku̱ʼu̱nra nandukúra tí nda̱ñúʼu”. Ta tá nda̱ni̱ʼíra tíyóʼo va̱ása sa̱a̱ra xíʼinrí, chi ta̱ kusi̱í-iniva kúúra. ¿Ndáaña sákuaʼayó xíʼin ña̱yóʼo? Nu̱ú Jehová ndáyáʼviní iin tá iinyó. Ta̱ Jesús ka̱chira: “Yivái̱ ta̱ íyo chí ndiví kǒo kúni̱ra ña̱ ná ndañúʼu ni iin na̱ va̱lí yóʼo” (Mat. 18:12-14).

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

³ Va̱ása kúni̱yó keʼéyó á ka̱ʼa̱nyó ña̱ʼa ña̱ kivi sandákava-ini na̱ hermanoyó. Nu̱ú artículo yóʼo ndakuiinyó pregunta yóʼo: ¿ndáaña xíniñúʼu keʼéyó ña̱ va̱ása sándakavayó-ini inkana? ta, ¿ndáaña kivi keʼéyó tá ke̱ʼéna iin ña̱ va̱ása va̱ʼa xíʼinyó? Soo síʼina ná ka̱ʼa̱nyó xa̱ʼa̱ “na̱ va̱lí yóʼo” na̱ káʼa̱n Mateo capítulo 18 xa̱ʼa̱.

4. ¿Ndáana kúú “na̱ va̱lí yóʼo”?

⁴ “Na̱ va̱lí yóʼo” kúú ndiʼi na̱ discípulo ta̱ Jesús. Ni válína á ni xa̱a̱  chéena, íyona táki̱ʼva íyo na̱ va̱lí saáchi táxina ña̱ ná sanáʼa̱rana (Mat. 18:3). Ni xa̱a̱ síín ñuuna, xa̱a̱ síín costumbre kúúmiína, xa̱a̱ síín ña̱ kútóona ta ni xa̱a̱ síín íyo iin tá iinna, soo ndiʼina kándíxana ta̱ Jesús. Ta ta̱yóʼo kúʼvi̱ní-inira xínirana (Mat. 18:6; Juan 1:12).

5. ¿Ndáaña ndóʼo Jehová tá kéʼéna iin ña̱ va̱ása va̱ʼa xíʼin na̱ káchíñu nu̱úra á sándakavana-inina?

⁵ Ndiʼi “na̱ va̱lí yóʼo” ndáyáʼvinína nu̱ú Jehová. Ña̱ va̱ʼa kunda̱a̱-iniyó ndáaña kéʼéra xíʼinna, ná ndakanixi̱níyó xa̱ʼa̱ ña̱ kéʼéyó xíʼin na̱ va̱lí. Ndáyáʼviní na̱ va̱lí nu̱úyó ta kúni̱yó kundaayóna chi va̱ása íyo ndee̱na ta ni va̱ása xíni̱nína nda̱a̱ táki̱ʼva xíni̱ iin na̱ xa̱a̱ chée. Ña̱ nda̱a̱ kúúña va̱ása kútóoyó keʼéna ña̱ va̱ása va̱ʼa xíʼin na̱ yiví. Soo tá íxandi̱va̱ʼana xíʼin na̱ va̱lí, va̱ása kútóoyó ña̱yóʼo ta nda̱a̱ sáa̱yó. Ta ki̱ʼva saá íyo ña̱ ndóʼo Jehová, chi kúni̱ra kundaara na̱ káchíñu nu̱úra. Ta tá kéʼéna ña̱ va̱ása va̱ʼa xíʼin na̱yóʼo á sándakavana-inina, Jehová va̱ása kútóora ña̱yóʼo ta nda̱a̱ sáa̱ra (Is. 63:9; Mar. 9:42).

6. Nda̱a̱ táki̱ʼva káchi 1 Corintios 1:26-29, ¿ndáa ki̱ʼva íyo na̱ discípulo ta̱ Jesús nu̱ú na̱ ñuyǐví yóʼo?

⁶ ¿Nda̱chun káʼa̱nyó ña̱ nda̱a̱ táki̱ʼva íyo na̱ va̱lí saá íyo na̱ discípulo ta̱ Jesús? Ná ndakanixi̱níyó xa̱ʼa̱ na̱ yiví na̱ ndáyáʼvi nu̱ú na̱ ñuyǐví yóʼo. Tá kúú na̱ ku̱i̱ká, na̱ xíni̱ní na̱ yiví á na̱ kúúmií iin chiñu ña̱ ndáyáʼviní. Soo su̱ví saá íyo na̱ discípulo ta̱ Jesús. Ña̱kán nda̱a̱ táki̱ʼva íyo na̱ va̱lí saá íyona nu̱ú na̱ ñuyǐví yóʼo ta ni va̱ása ndáyáʼvina nu̱úna (kaʼvi 1 Corintios 1:26-29). * Soo su̱ví saá ndákanixi̱ní Jehová xa̱ʼa̱ na̱yóʼo.

7. ¿Ndáaña kúni̱ Jehová keʼéyó xíʼin na̱ hermanoyó?

⁷ Jehová kúʼvi̱-inira xínira ndiʼi na̱ káchíñu nu̱úra ni loʼo á ku̱a̱ʼá ku̱i̱ya̱ ndásakáʼnunara. Tá ndiʼi na̱ hermano ndáyáʼvina nu̱ú Jehová, saátu xíniñúʼu kundayáʼvina nu̱ú miívayó. Ta su̱ví loʼo kuitína xíniñúʼu kuʼvi̱-iniyó kuniyó chi ndiʼivana xíniñúʼu kuʼvi̱-iniyó kuniyó (1 Ped. 2:17). Xíniñúʼu chika̱a̱-iniyó keʼéyó nda̱a̱ ndáaka ña̱ʼa ña̱ va̱ʼa kundaayó na̱ hermanoyó. Tá ku̱ndaa̱-iniyó ña̱ va̱ása va̱ʼa níkuni iin na̱ hermano xíʼin ña̱ ke̱ʼéyó, ná va̱ása ndakanixi̱níyó ña̱ su̱ví ña̱ ndeéví kúú ña̱ ke̱ʼéyó xíʼinna ta ka̱ʼa̱nyó ña̱ xa̱a̱ saá inivana, ta xíniñúʼu nandósó-inina xa̱ʼa̱ ña̱ ku̱u. ¿Nda̱chun va̱ása va̱ʼa kúni savana xíʼin ña̱ kéʼéyó? Saáchi xa̱ʼa̱ ki̱ʼva ña̱ xa̱ʼnuna túvina ña̱ va̱ása ndáyáʼvina nu̱ú inkana. Á sana sa̱kán loʼo tiempo ki̱xáʼana ndásakáʼnuna Ndióxi̱, ta ta̱ʼán sákuaʼana ixakáʼnu-inina xa̱ʼa̱ inkana tá kéʼéna ña̱ va̱ása va̱ʼa xíʼinna. Soo ni nda̱a̱ ndáaka xa̱ʼa̱ kúúña, xíniñúʼu chika̱a̱yó ndee̱ ña̱ ndasaviíyó ku̱a̱chi yóʼo xíʼinna. Ta saátu tá kamaní sáa̱ iin na̱ hermano xíniñúʼu chika̱a̱na ndee̱ ña̱ nasamana ki̱ʼva ña̱ íyona. Ta ndáyáʼviní keʼéna ña̱yóʼo, chi saá kúú ña̱ kivi xa̱a̱na si̱í koona ta vií kutáʼanna xíʼin ndiʼi na̱ hermano.

8. ¿Ndáa ki̱ʼva xi̱ndakanixi̱ní na̱ judío ta nda̱a̱ na̱ discípulo ta̱ Jesús nda̱kanixi̱ní saá?

⁸ ¿Nda̱chun ni̱ka̱ʼa̱n ta̱ Jesús xa̱ʼa̱ “na̱ va̱lí yóʼo”? Saáchi ña̱yóʼo ni̱nda̱ka̱tu̱ʼun na̱ discípulora: “¿Ndáana kúú na̱ káʼnuka ti̱xin Reino Ndióxi̱ ña̱ íyo chí ndiví?” (Mat. 18:1). Tá tiempo saá na̱ judío xi̱kuni̱nína kundayáʼvina nu̱ú inkana ta ka̱ʼa̱n va̱ʼana xa̱ʼa̱na. Iin ta̱ xíni̱ va̱ʼa xa̱ʼa̱ na̱yóʼo káchira: “Ndiʼi tiempo ña̱ xi̱taku na̱ ta̱a, ña̱ ni̱ndi̱ʼi̱níka-inina xa̱ʼa̱ kúú ña̱ kundayáʼvina nu̱ú inkana, kindo̱o va̱ʼana nu̱ú inkana ta ixato̱ʼónana”.

9. ¿Ndáaña xi̱niñúʼu keʼé na̱ discípulo ta̱ Jesús?

⁹ Ta̱ Jesús xi̱kunda̱a̱-inira ña̱ ku̱a̱ʼání na̱ judío xi̱kuni̱na kundayáʼvikana nu̱ú inkana, ña̱kán xi̱niñúʼu chika̱a̱ní na̱ discípulo ta̱ Jesús ndee̱ ña̱ nasamana ki̱ʼva ña̱ xi̱ndakanixi̱nína. Ña̱yóʼo ni̱ka̱ʼa̱nra xíʼinna: “Na̱ káʼnuka nu̱ú ndóʼó, va̱ʼaka ná nduuna táki̱ʼva íyo na̱ válíka, ta na̱ níʼi yichi̱ nu̱úndó  va̱ʼaka ná nduuna táki̱ʼva íyo na̱ káchíñu nu̱ú inkana” (Luc. 22:26). Ta ña̱ va̱ʼa keʼéyó nda̱a̱ táki̱ʼva kéʼé na̱ válíka, xíniñúʼu ndakanixi̱níyó ña̱ ndáyáʼvika inkana nu̱úyó (Filip. 2:3). Ta tá chíka̱a̱yó ndee̱ ña̱ saá ndakanixi̱níyó va̱ása xa̱a̱yó sandákavayó-ini inkana.

10. ¿Ndáa consejo ta̱xi ta̱ Pablo xíniñúʼu kundiku̱nyó?

¹⁰ Ndiʼi na̱ hermano va̱ʼaníka kéʼéna sava ña̱ʼa nu̱ú miíyó. Ta va̱ása íxayo̱ʼvi̱ña xíʼinyó ndakuniyó ña̱ ndáyáʼvikana nu̱úyó, tá ná chika̱a̱yó ndee̱ ña̱ kotoyó ndáaña kúú ña̱ va̱ʼa kéʼéna. Xíniñúʼu kundiku̱nyó consejo ña̱ ta̱xi ta̱ apóstol Pablo ndaʼa̱ na̱ ñuu Corinto, ña̱ káchi: “¿Ndáaña kúúmiíún ña̱ ndákanixi̱níún ña̱ ndáyáʼvikaún nu̱ú inkana? ¿Á su̱ví Ndióxi̱ kúú ta̱ nítaxi ndiʼi ña̱ʼa ndaʼún? Tá ta̱kán kúú ta̱ ta̱xi ndiʼiña ndaʼún, ¿nda̱chun kúú ña̱ ni̱nuní kúniún ta ndákanixi̱níún ña̱ xíʼin ndee̱ miíún nda̱kiʼúnña?” (1 Cor. 4:7). Ña̱kán ná va̱ása ndukúyó ki̱ʼva ña̱ ka̱ʼa̱n va̱ʼaní inkana xa̱ʼa̱yó, ta ná va̱ása ndakanixi̱níyó ña̱ ndáyáʼviníkayó nu̱ú inkana. Tá va̱ʼaní táxi iin ta̱ hermano discurso á tá ku̱a̱ʼání na̱ yiví káʼvi iin ñá hermana xíʼin, Jehová kúú ta̱ xíniñúʼu ndukáʼnu xa̱ʼa̱ ña̱yóʼo.

11. ¿Ndáaña sákuaʼayó xíʼin ña̱ ni̱ka̱ʼa̱n ta̱ Jesús xa̱ʼa̱ iin ta̱ rey xíʼin iin ta̱ xi̱kachíñu ndáʼvi nu̱ú ta̱ rey yóʼo?

¹¹ Tándi̱ʼi ni̱ka̱ʼa̱n ta̱ Jesús xíʼin na̱ discípulora ña̱ va̱ása sandákavana-ini inkana, saá na̱túʼunra xíʼinna xa̱ʼa̱ iin ta̱ rey xíʼin xa̱ʼa̱ iin ta̱ xi̱kachíñu ndáʼvi nu̱úra. Ta̱ ta̱a yóʼo ku̱a̱ʼání xu̱ʼún xi̱níkára nu̱ú ta̱ rey yóʼo ta va̱ása níkuchiñura chaʼviraña, soo i̱xakáʼnuva-ini ta̱ rey yóʼo xa̱ʼa̱ra. Tasaá, mií ta̱ xi̱níká nu̱ú ta̱ rey yóʼo va̱ása níxiinra ixakáʼnu-inira xa̱ʼa̱ iin ta̱ xi̱níká nu̱úra, ni loʼoníva kúú xu̱ʼún yóʼo. Tándi̱ʼi, ta̱ rey yóʼo chi̱ka̱a̱ra ta̱ ta̱a yóʼo veʼeka̱a, saáchi va̱ása níxiinra ixakáʼnu-inira xa̱ʼa̱ ta̱ xi̱níká nu̱úra. ¿Ndáaña sákuaʼayó xíʼin ña̱yóʼo? Ta̱ Jesús ka̱chira: “Ta ki̱ʼva saá keʼé yivái̱ ta̱ íyo chí ndiví xíʼinndó tá va̱ása íxakáʼnu-inindó xíʼin ndiʼi níma̱ndó xa̱ʼa̱ na̱ ñanindó” (Mat. 18:21-35).

12. Tá va̱ása xíínyó ixakáʼnu-iniyó xa̱ʼa̱ inkana, ¿ndáaña ndóʼo inkana xíʼin ña̱yóʼo?

¹² Ta̱ xi̱kachíñu nu̱ú ta̱ rey yóʼo su̱ví nda̱saa iinlá miíra níxo̱ʼvi̱ chi saátu ni̱xo̱ʼvi̱ inkana xíʼin ña̱ ke̱ʼéra. Saáchi i̱xandi̱va̱ʼara xíʼin ta̱ xi̱níká nu̱úra, ta chi̱ka̱a̱rara veʼeka̱a nda̱a̱ ná ndachaʼvira ndiʼi ña̱ xi̱níkára nu̱úra. Na̱ xi̱ni ña̱ ke̱ʼéra va̱ása va̱ʼa níkunina xíʼin ña̱yóʼo. Ta̱ Jesús ka̱chira: “Tá na̱kunda̱a̱-ini inka na̱ kítáʼan káchíñu xíʼinra ni̱sa̱a̱nína”. Ta ki̱ʼva saá ndóʼo inkana xíʼin ña̱ kéʼéyó. Tá ke̱ʼé na̱ hermano iin ña̱ va̱ása va̱ʼa xíʼinyó, ta va̱ása xíínyó ixakáʼnu-iniyó xa̱ʼa̱na ¿ndáaña kuu? Saxóʼvi̱yóna saáchi va̱ása xíínyó ixakáʼnu-iniyó xa̱ʼa̱na, ta xíʼin ña̱yóʼo na̱ʼa̱yó ña̱ va̱ása kúʼvi̱ka-iniyó xíniyóna, ta va̱ása kuni̱kayó ka̱ʼa̱nyó xíʼinna. Ta nda̱a̱ na̱ hermano na̱ íyo ti̱xin congregación, va̱ása va̱ʼa kunina tá va̱ása va̱ʼa kítáʼanyó xíʼin na̱ hermano kán.

13. ¿Ndáaña sákuaʼún xíʼin ña̱ ndo̱ʼo iin ñá precursora?

¹³ Tá íxakáʼnu-iniyó xa̱ʼa̱ na̱ hermanoyó ku̱a̱ʼání ña̱ va̱ʼa ndákiʼinyó, ta saátu va̱ʼa kúni inkana xíʼin ña̱yóʼo. Ta ña̱yóʼo kúú ña̱ ndo̱ʼo iin ñá precursora ñá naní Crystal. * Ñáyóʼo ndákaʼánñá ña̱ va̱ása va̱ʼa níxi̱kuniñá xíʼin ña̱ xi̱keʼé iin ñá hermana xíʼinñá, káchiñá: “Ni̱xo̱ʼvi̱níi̱ xíʼin tu̱ʼun ña̱ xi̱ka̱ʼa̱nñá xíʼi̱n. Tá xi̱keendi̱ xi̱natúʼunndi̱ xa̱ʼa̱ Ndióxi̱ ni loʼoví va̱ása níxi̱kuni̱i̱ kitáʼi̱n xíʼinñá, ta nda̱a̱ carro tú xi̱xa̱ʼa̱nñá xíʼin va̱ása níxi̱kutói̱ ku̱ʼi̱n. Ta xa̱ʼa̱ ña̱yóʼo va̱ása níxi̱kusi̱íka-inii̱ natúʼi̱n xa̱ʼa̱ Ndióxi̱”. Ñá Crystal xi̱ndakanixi̱níñá ña̱ xi̱niñúʼu sa̱a̱vañá xíʼin ñá hermana kán. Soo chi̱kaa̱-iniñá ña̱ va̱ása sa̱a̱-iniñá kuniñá ñá hermana kán, ta saátu va̱ása kundi̱ʼi̱níka-iniñá xa̱ʼa̱ iinlá miíñá. Vitá ni̱xi̱yo iniñá ta xi̱ndiku̱nñá consejo ña̱ va̱xi nu̱ú artículo “Perdonemos de corazón”, ña̱ va̱xi nu̱ú ña̱ La Atalaya 15 tí octubre ña̱ ku̱i̱ya̱ 1999. Ñá Crystal i̱xakáʼnuva-iniñá xa̱ʼa̱ ñá hermana kán, ta ñáyóʼo káchiñá: “Vitin kúnda̱a̱-inii̱ ña̱ ndiʼivayó chíka̱a̱níyó ndee̱ ña̱ nasamayó ki̱ʼva ña̱ íyoyó, ta xa̱ʼa̱ ña̱ va̱ʼa-ini Jehová ndiʼi ki̱vi̱ íxakáʼnu-inira xa̱ʼa̱yó. Vitin  kúsi̱íní-inii̱ ña̱ kǒo nda̱a̱ ni iin ña̱ʼa sási nu̱úi̱ ña̱ kachíñui̱ nu̱ú Ndióxi̱”.

14. a) Nda̱a̱ táki̱ʼva káchi Mateo 18:21, 22, ¿ndáaña xi̱ ixayo̱ʼvi̱ xíʼin ta̱ apóstol Pedro, ta ndáaña sákuaʼún xíʼin ña̱ ni̱ka̱ʼa̱n ta̱ Jesús xíʼinra? b) ¿Ndáaña chindeétáʼan xíʼinyó tá saá ndóʼoyó?

¹⁴ Kúnda̱a̱-iniyó ña̱ xíniñúʼu ixakáʼnu-iniyó xa̱ʼa̱ inkana, soo ni saá íxayo̱ʼvi̱vaña xíʼinyó. Ta sana ña̱yóʼo kúú ña̱ ndo̱ʼo ta̱ apóstol Pedro (kaʼvi Mateo 18:21, 22). * ¿Ndáaña chindeétáʼan xíʼinyó ixakáʼnu-iniyó xa̱ʼa̱ inkana? Ña̱ nu̱ú, ná ndakanixi̱níyó xa̱ʼa̱ ndiʼi yichi̱ ña̱ íxakáʼnu-ini Jehová xa̱ʼa̱yó (Mat. 18:32, 33). Va̱ása xíniñúʼu ixakáʼnuví-ini Jehová xa̱ʼa̱yó, soo kéʼéraña xa̱ʼa̱ ña̱ va̱ʼa-inira (Sal. 103:8-10). Ta saátu xíniñúʼu kuʼvi̱-iniyó kunitáʼanyó. Va̱ása xíniñúʼu ndakanixi̱níyó á ixakáʼnu-iniyó xa̱ʼa̱ na̱ hermanoyó á va̱ása, chi iin ña̱ xíniñúʼu keʼévayó kúú ña̱yóʼo (1 Juan 4:11). Ña̱ u̱vi̱, ná ndakanixi̱níyó ndáaña kuu tá íxakáʼnu-iniyó xa̱ʼa̱ inkana. Saáchi chíndeétáʼanyó xíʼin na̱ ke̱ʼé ña̱ va̱ása va̱ʼa xíʼinyó, ta chíndeétáʼanyó xíʼin na̱ congregación ña̱ vií kutáʼanna. Ta saátu ndáayó ña̱ vií kítáʼanyó xíʼin Jehová, ta kǒo nda̱a̱ ni iin ña̱ʼa kasi nu̱úyó ña̱ ndasakáʼnuyóra (2 Cor. 2:7; Col. 3:14). Ña̱ u̱ni̱, ná keʼéyó oración nu̱ú Jehová chi ta̱yóʼo kúú ta̱ káʼa̱n xíʼinyó ña̱ ixakáʼnu-iniyó xa̱ʼa̱ inkana. Ta ná va̱ása taxiyó sandíʼi-xa̱ʼa̱ ta̱ Ndi̱va̱ʼa ña̱ vií kítáʼanyó xíʼin na̱ hermanoyó (Efes. 4:26, 27). Ña̱kán xíniñúʼu chindeétáʼan Jehová xíʼinyó ña̱ va̱ása ko̱oyoyó nda̱ʼa ta̱ Ndi̱va̱ʼa.

15. Nda̱a̱ táki̱ʼva káchi Colosenses 3:13, ¿ndáaña kivi keʼéyó tá kéʼé na̱ hermano iin ña̱ʼa ña̱ sása̱a̱ miíyó?

¹⁵ Ta, ¿ndáaña keʼéyó tá iin na̱ hermano kéʼéna iin ña̱ʼa ña̱ sása̱a̱ní miíyó? Xíniñúʼu chika̱a̱yó ndee̱ ña̱ vií kutáʼanyó xíʼinna. Ná keʼéyó oración nu̱ú Jehová ta ná natúʼunyó xíʼinra xa̱ʼa̱ ndiʼi ña̱ ndóʼoyó. Ná ka̱ʼa̱nyó xíʼinra ña̱ ná taxira bendición ndaʼa̱ na̱ ke̱ʼé ña̱ va̱ása va̱ʼa xíʼinyó. Ta ná chindeétáʼanra xíʼinyó kotoyó ta chindayáʼviyó ña̱ va̱ʼa ña̱  kúúmií na̱yóʼo, táʼan ña̱ xíto miíra (Luc. 6:28). Tá íxayo̱ʼvi̱ña xíʼinyó ña̱ ixakáʼnu-iniyó xa̱ʼa̱ na̱ ke̱ʼé ña̱ va̱ása va̱ʼa xíʼinyó, ná ndakanixi̱níyó ndáa ki̱ʼva viíní ka̱ʼa̱nyó xíʼinna. Ta ná ndakanixi̱níyó ña̱ su̱ví ña̱ kúni̱ miína kúú ña̱ ke̱ʼéna ña̱yóʼo xíʼinyó (Mat. 5:23, 24; 1 Cor. 13:7). Tá káʼa̱nyó xíʼinna ná va̱ása ka̱ʼa̱nyó ña̱ ku̱a̱china kúúña. Soo ¿ndáaña keʼéyó tá va̱ása xíínna ndakutáʼan viína xíʼinyó? Ña̱ Biblia káchiña: “Kǒo sandákoondó ña̱ kundeé-inindó xíʼin ña̱ kéʼé inkana xíʼinndó”. Ná chika̱a̱yó ndee̱ ña̱ kúee koo iniyó xíʼin na̱yóʼo (kaʼvi Colosenses 3:13). * Ta ña̱ ndáyáʼvika kúú ña̱ va̱ása sa̱a̱-iniyó kuniyóna, saáchi tá ná keʼéyó ña̱yóʼo va̱ása kutáʼan viíkayó xíʼin Jehová. Ná va̱ása taxiyó kasi nda̱a̱ ni iin ña̱ʼa nu̱úyó ña̱ kachíñuyó nu̱ú Jehová, chi saá na̱ʼa̱yó ña̱ kúʼvi̱ka-iniyó xíniyóra nu̱ú nda̱a̱ ndáaka ña̱ʼa (Sal. 119:165).

16. ¿Ndáa chiñu kúúmií iin tá iinyó?

¹⁶ Táxiníyó tíxa̱ʼvi ndaʼa̱ Jehová xa̱ʼa̱ ña̱ inkáchi kítáʼanyó ndásakáʼnuyóra, ta iinlá miíra kúú ta̱ níʼi yichi̱ nu̱úyó (Juan 10:16). Libro ña̱ naní Organizados para hacer la voluntad de Jehová, página 165 káchiña: “Chiñu ña̱ kúúmiíyó kúú ña̱ chindeétáʼanyó xíʼin na̱ congregación ña̱ vií kutáʼanna”. Ta káchikaña: “Ndiʼi tiempo vií kutáʼanyó xíʼin na̱ hermanoyó tá ná kotoyóna nda̱a̱ táki̱ʼva xíto Jehová na̱yóʼo”. Nu̱ú Jehová nda̱a̱ táki̱ʼva íyo “na̱ va̱lí” saá íyoyó ta ndáyáʼviníyó nu̱úra. Ta ki̱ʼva saá kúú ña̱ xíniñúʼu koo na̱ hermanoyó nu̱úyó. Ta̱kán xítora ta chíndayáʼvira ndiʼi ña̱ kéʼéyó ña̱ va̱ʼa chindeétáʼanyó xíʼin na̱ hermanoyó ta kundaayóna (Mat. 10:42).

17. ¿Ndáaña chíka̱a̱-iniyó keʼéyó?

¹⁷ Kúʼvi̱ní-iniyó xíniyó na̱ hermanoyó. Xa̱ʼa̱ ña̱yóʼo chíka̱a̱-iniyó ña̱ va̱ása keʼéyó nda̱a̱ ni iin ña̱ʼa ña̱ sandákava-inina (Rom. 14:13). Kúnda̱a̱-iniyó ña̱ ndáyáʼviníka na̱ hermanoyó nu̱ú miíyó, ta kúni̱yó ixakáʼnu-iniyó xa̱ʼa̱na xíʼin ndiʼi níma̱yó. Ña̱kán tá kéʼé na̱ hermanoyó iin ña̱ va̱ása kutóoyó, ná va̱ása taxiyó kasiña nu̱úyó ña̱ kachíñuyó nu̱ú Jehová. Va̱ʼaka “ná chika̱a̱níyó ndee̱ ña̱ vií kutáʼanyó xíʼin inkana ta chika̱a̱yó ndee̱ xíʼin táʼanyó ña̱ ndasandakúyó-ini táʼanyó” (Rom. 14:19).