Ta̱ Pablo ka̱ʼyíra ña̱yóʼo: “Ña̱kán nda̱a̱ táki̱ʼva íyo ta̱ ni̱xi̱ʼi̱ saá íyoi̱ i̱xaa ley, ña̱ va̱ʼa kutakui̱ xa̱ʼa̱ Ndióxi̱” (Gál. 2:19).

Ta̱ Pablo ka̱ʼyíra ña̱yóʼo saáchi xi̱kuni̱ra ka̱ʼa̱nra xa̱ʼa̱ iin ña̱ ndáyáʼviní xíʼin na̱ congregación ña̱ Galacia. Sava na̱ hermano yóʼo ki̱xáʼana kándíxana ña̱ vatá ña̱ xi̱sanáʼa̱ na̱ yiví. Saáchi na̱yóʼo xi̱ka̱ʼa̱nna, ña̱ va̱ʼa ka̱kuna xíniñúʼu kandíxakana ndiʼi Ley ña̱ ta̱xi Jehová ndaʼa̱ ta̱ Moisés, tá kúú ña̱ ta̱ʼnda̱ nu̱ú yi̱i̱ na̱ ta̱a. Soo ta̱ Pablo xi̱kunda̱a̱-inira ña̱ va̱ása níxi̱ka̱ʼa̱nka Ndióxi̱ keʼéna táʼan ña̱yóʼo tiempo saá. Ta xíʼin ña̱ ni̱ka̱ʼa̱nra ni̱na̱ʼa̱ra ña̱ vatá kúú ña̱ xi̱sanáʼa̱ na̱ yiví yóʼo, ta chi̱ka̱a̱ra ndee̱ xíʼin na̱ hermano ña̱ kandíxakana ña̱ ni̱xi̱ʼi̱ ta̱ Jesús xa̱ʼa̱na (Gál. 2:4; 5:2).

Tu̱ʼun Ndióxi̱ káxi káʼa̱nña ña̱ tá xíʼi̱ iin na̱ yiví, kǒoka ña̱ xínitúni̱na ta ni va̱ása kúnda̱a̱ka-inina xa̱ʼa̱ ña̱ kúu (Ecl. 9:5). Tá ni̱ka̱ʼa̱n ta̱ Pablo ña̱ nda̱a̱ táki̱ʼva íyo ta̱ ni̱xi̱ʼi̱ saá íyora i̱xaa Ley, xi̱kuni̱ kachira ña̱ va̱ása ndíku̱nkara Ley ña̱ ta̱xi Jehová ndaʼa̱ ta̱ Moisés. Soo xi̱kunda̱a̱va-inira ña̱ xi̱takura xa̱ʼa̱ Ndióxi̱ saáchi xi̱kandíxara ña̱ ni̱xi̱ʼi̱ ta̱ Cristo xa̱ʼa̱ra.

Ley kúú ña̱ na̱sama ña̱ ndo̱ʼo ta̱ Pablo. ¿Ndáa ki̱ʼva na̱sama ña̱yóʼo ki̱ʼva ña̱ ni̱xi̱yora? Miíra ni̱ka̱ʼa̱n xa̱ʼa̱ ña̱yóʼo tá ka̱chira: “Kúnda̱a̱-iniyó ña̱ kandíxayó ta̱ Jesucristo kúú ña̱ chindeétáʼan xíʼinyó ña̱ xa̱a̱yó kooyó na̱ yiví va̱ʼa, ta su̱ví ña̱ kandíxayó ña̱ káʼa̱n ley” (Gál. 2:16). Íyo iin ña̱ ndáyáʼviní sa̱xínu ña̱ ley yóʼo. Ta̱ Pablo ni̱ka̱ʼa̱nra ña̱yóʼo xíʼin na̱ ñuu Galacia: “Ta̱xiraña, ña̱ va̱ʼa nani ndátuna kixaa̱ ta̱ chi̱ka̱a̱ Ndióxi̱ iin trato xa̱ʼa̱, ley yóʼo na̱ʼa̱ káxiña nu̱úna ña̱ kúúna na̱ yiví ku̱a̱chi” (Gál. 3:19). Ña̱ Ley ni̱na̱ʼa̱ña ña̱ na̱ yiví ku̱a̱chi va̱ása kivi viíní kundiku̱nna ña̱yóʼo ta xi̱niñúʼu kuvi iin na̱ kǒo ku̱a̱chi xa̱ʼa̱na. Ña̱kán ña̱ Ley yóʼo chi̱ndeétáʼanña xíʼin na̱ ñuu Ndióxi̱ ña̱ kiʼinna kuenta ña̱ ta̱ Jesús kúú “ta̱ chi̱ka̱a̱ Ndióxi̱ iin trato xa̱ʼa̱”, ta tá ná na̱ʼa̱na ña̱ kándíxana ta̱ Jesucristo, saá kúú ña̱ xa̱a̱na koona na̱ yiví va̱ʼa nu̱ú Ndióxi̱ (Gál. 3:24). Ta̱ Pablo ni̱xa̱a̱ra ku̱ura iin ta̱a va̱ʼa nu̱ú Jehová, saáchi Ley kúú ña̱ chi̱ndeétáʼan xíʼinra ña̱ ni̱xa̱a̱ra ka̱ndíxara ta̱ Jesús. Ta̱ Pablo nda̱a̱ táki̱ʼva íyo ta̱ ni̱xi̱ʼi̱ saá ni̱xi̱yora i̱xaa Ley, ta ki̱xáʼara tákura xa̱ʼa̱ Ndióxi̱. Ta̱yóʼo va̱ása níxi̱ndiku̱nkara ña̱ xi̱ka̱ʼa̱n Ley saáchi ña̱ xi̱ka̱ʼa̱n Jehová kúú ña̱ xi̱ndiku̱nra.

Ta ki̱ʼva saá íyo ña̱ ka̱ʼyí ta̱ Pablo nu̱ú carta ña̱ chi̱ndaʼára ku̱a̱ʼa̱n ndaʼa̱ na̱ ñuu Roma, ka̱chira: “Ña̱kán ñani miíi̱, ndóʼó xi̱ndiku̱nndó ña̱ Ley, soo xa̱ʼa̱ ña̱ ni̱xi̱ʼi̱ ta̱ Cristo [...]. Vitin xa̱a̱ ni̱sa̱ñáyó nu̱ú ña̱ ley, saáchi táki̱ʼva ni̱xi̱yo na̱ ni̱xi̱ʼi̱ saá ni̱xi̱yoyó nu̱ú ña̱ xi̱ndika̱a̱yó ndaʼa̱” (Rom. 7:4, 6). Nu̱ú versículo yóʼo ta saátu nu̱ú Gálatas 2:19, ta Pablo va̱ása níkuni̱ kachira ña̱ kuvira xa̱ʼa̱ ña̱ ni̱ya̱ʼandosóra ña̱ káʼa̱n Ley. Saáchi ña̱ xi̱kuni̱ kachira kúú ña̱ ni̱sa̱ñára nu̱ú ña̱yóʼo. Ta̱yóʼo va̱ása níxi̱ndiku̱nkara ña̱ káʼa̱n Ley ta saátu inkaka na̱ hermano va̱ása níxi̱ndiku̱nnaña. Saáchi tíxa̱ʼvi ña̱ xi̱kandíxana ña̱ ni̱xi̱ʼi̱ ta̱ Jesús xa̱ʼa̱na, ni̱sa̱ñána nu̱ú Ley yóʼo.