1. ¿Nda̱chun kúni mitúʼun sava na̱ ndásakáʼnu Ndióxi̱?

NDIʼIVAYÓ kúni mitúʼunyó sava yichi̱. Savana loʼova tiempo kúni mitúʼunna, soo inkana ku̱a̱ʼání tiempo ndóʼona ña̱yóʼo. Íyo savana kúni mitúʼunna ni ku̱a̱ʼání kúú na̱ yiví na̱ íyo xíʼinna. Ta inkana íxayo̱ʼvi̱ña xíʼinna ka̱anna iin congregación ña̱ xa̱á. Savana kúni mitúʼunna tá ku̱a̱ʼa̱nna koona inka ñuu, saáchi viíní xi̱kitáʼanna xíʼin na̱ veʼena. Ta savana kúni mitúʼunna saáchi ni̱xi̱ʼi̱ iin na̱ veʼena ta ndákaʼánnína xa̱ʼa̱ na̱yóʼo. Ta sava na̱ hermano na̱ sa̱kán loʼo tiempo sákuaʼa xa̱ʼa̱ Ndióxi̱, kúni mitúʼunna saáchi na̱ veʼena á na̱ migona na̱ va̱ása kúú testigo Jehová kúndasína xínina na̱yóʼo.

2. ¿Ndáa pregunta ndakuiinyó nu̱ú artículo yóʼo?

² Xíni̱níva Jehová ndáa ki̱ʼva íyoyó, ta kúnda̱a̱-inira xíʼin ña̱ ndóʼoyó. Ña̱kán kúnda̱a̱va-inira ama kúni mitúʼunyó, ta kúni̱ra chindeétáʼanra xíʼinyó. Nu̱ú artículo yóʼo ndakuiinyó pregunta yóʼo: ¿ndáa ki̱ʼva chíndeétáʼan Jehová xíʼinyó ña̱ va̱ása kuni mitúʼunyó?, ¿ndáaña kivi keʼéyó tá kúni mitúʼunyó?, ta ¿ndáaña kivi keʼéyó ña̱ va̱ʼa chindeétáʼanyó xíʼin na̱ hermano na̱ kúni mitúʼun na̱ íyo ti̱xin congregación?

3. ¿Ndáa ki̱ʼva ni̱na̱ʼa̱ Jehová ña̱ xi̱kiʼinra kuenta xíʼin ta̱ Elías?

³ Jehová ndíʼi̱ní-inira xa̱ʼa̱ miíyó na̱ káchíñu nu̱úra. Ta íyo yatinra xíʼin iin tá iinyó, ta kúnda̱a̱-inira ama kúú ña̱ ndákavaní-iniyó (Sal. 145:18, 19). Ná kotoyó ndáa ki̱ʼva xi̱ndaa Jehová ta̱ profeta Elías. Ta̱ profeta yóʼo ni̱xi̱yora tá tiempo ña̱ ni̱xo̱ʼvi̱ní na̱ ñuu Israel. Saáchi na̱ xi̱sa̱a̱-ini xi̱xini Ndióxi̱ xi̱ ixandi̱va̱ʼanína xíʼin na̱ ñuura, ta nda̱a̱ xi̱kuni̱na kaʼnína ta̱ Elías (1 Rey. 19:1, 2). Ta̱ Elías xi̱ndakanixi̱níra ña̱ iinlá miíra kúú profeta  ta̱ xi̱ndasakáʼnu Ndióxi̱, ta ña̱yóʼo sa̱ndíʼi̱níña-inira (1 Rey. 19:10). Soo kama chi̱ndeétáʼan Jehová xíʼinra: chi̱ndaʼára iin ta̱ ángel nu̱ú ta̱ Elías ña̱ ka̱ʼa̱nra xíʼinra ña̱ va̱ása íyo mitúʼunra, chi ni̱xi̱yokava inka na̱ ñuu Israel na̱ xi̱ndasakáʼnu Ndióxi̱ (1 Rey. 19:5, 18).

4. Sava na̱ ndásakáʼnu Jehová va̱ása chíndeétáʼanka na̱ veʼena xíʼinna ni na̱ migona, ¿ndáa ki̱ʼva náʼa̱ Marcos 10:29, 30 ña̱ ndíʼi̱-ini Jehová xa̱ʼa̱na?

⁴ Jehová kúnda̱a̱-inira ña̱ ku̱a̱ʼání ña̱ʼa sa̱ndákooyó ña̱ va̱ʼa kachíñuyó nu̱úra. Sana na̱ veʼeyó á na̱ migoyó na̱ va̱ása ndásakáʼnu Jehová, va̱ása xíínkana kutáʼanna xíʼinyó á chindeétáʼanna xíʼinyó. Iin yichi̱ ndíʼi̱ní-ini ta̱ apóstol Pedro tá ni̱ka̱ʼa̱nra ña̱yóʼo xíʼin ta̱ Jesús: “Ndi̱ʼi̱ sa̱ndákoondi̱ ndiʼi ña̱ʼa ña̱ va̱ʼa kundiku̱nndi̱ yóʼó. ¿Ndáa ña̱ va̱ʼa ndakiʼinndi̱?” (Mat. 19:27). Ta̱ Jesús ni̱ka̱ʼa̱nra xíʼin na̱ discípulora ña̱ na̱ ñuu Ndióxi̱ koo na̱ veʼena (kaʼvi Marcos 10:29, 30). * Ta yiváyó Jehová káʼa̱nra ña̱ chindeétáʼanra xíʼin ndiʼi na̱ káchíñu nu̱úra (Sal. 9:10). Ná kotoyó ndáa ki̱ʼva chíndeétáʼan Jehová xíʼinyó ña̱ va̱ása kuni mitúʼunyó.

5. ¿Nda̱chun iin ña̱ va̱ʼa kúú ña̱ ndakanixi̱níyó xa̱ʼa̱ ki̱ʼva ña̱ chíndeétáʼan Jehová xíʼinyó?

⁵ Ná ndakanixi̱níyó ndáa ki̱ʼva chíndeétáʼan Jehová xíʼinyó (Sal. 55:22). Ña̱yóʼo chindeétáʼan xíʼinyó ña̱ va̱ása ndakanixi̱níyó ña̱ íyo mitúʼunyó. Iin ñá hermana ñá ta̱ʼán tindaʼa̱, ñá naní Carol, * iinlá miíñá ndásakáʼnu Jehová ti̱xin veʼeñá, káchiñá: “Tá ndákanixi̱níi̱ ndáa ki̱ʼva xa̱a̱ chíndeétáʼan Jehová xíʼi̱n tá yáʼi̱ nu̱ú tu̱ndóʼo, ña̱yóʼo chíndeétáʼanña xíʼi̱n ña̱ va̱ása kuni mitúʼíi̱n. Ta ña̱yóʼo náʼa̱ña nu̱úi̱ ña̱ va̱ása sandákoondaʼa̱ Jehová yi̱ʼi̱ chí nu̱únínu”.

6. ¿Ndáa ki̱ʼva chindeétáʼan 1 Pedro 5:9, 10 xíʼin na̱ kúni mitúʼun?

⁶ Ná ndakanixi̱níyó ndáa ki̱ʼva xa̱a̱ chíndeétáʼan Jehová xíʼin na̱ hermano na̱ kúni mitúʼun  (kaʼvi 1 Pedro 5:9, 10). * Iin ta̱ hermano ta̱ naní Hiroshi, iinlá miíra ndásakáʼnu Jehová ti̱xin veʼera, káchira: “Ti̱xin congregación ndiʼiva na̱ hermano íyo tu̱ndóʼo nu̱úna, ta ndiʼivana chíka̱a̱ ndee̱ ña̱ kachíñuna nu̱ú Jehová. Ta ña̱yóʼo chíka̱a̱níña ndee̱ xíʼin ndi̱ʼi̱ na̱ ndásakáʼnu iinlá mií Ndióxi̱, saáchi na̱ veʼendi̱ va̱ása kúúna testigo Jehová”.

7. ¿Ndáa ki̱ʼva chíndeétáʼan oración xíʼún?

⁷ Ná ka̱ʼa̱n ni̱ʼiyó xíʼin Ndióxi̱, ná kaʼviyó tu̱ʼunra ta ná ku̱ʼu̱nyó reunión. Ndáyáʼviní ka̱ʼa̱nyó xíʼin Jehová xíʼin ndiʼi níma̱yó xa̱ʼa̱ ndiʼi ña̱ ndóʼoyó (1 Ped. 5:7). Ná ka̱ʼa̱nyó xa̱ʼa̱ ña̱ ndo̱ʼo ñá Massiel, tá ki̱xáʼañá ndásakáʼnuñá Jehová, na̱ veʼeñá va̱ása níxiinkana ndasakáʼnunara xíʼinñá, soo ñáyóʼo káʼa̱nñá ndáaña chi̱ndeétáʼan xíʼinñá: “Ndiʼi ki̱vi̱ xi̱ka̱ʼi̱n xíʼin Jehová xíʼin ndiʼi níma̱i̱, ta ña̱yóʼo chi̱ndeétáʼan xíʼi̱n ña̱ va̱ása kuni mitúʼíi̱n. Nda̱a̱ táki̱ʼva íyo yivái̱ saá ni̱xi̱yora chi ku̱a̱ʼání yichi̱ xi̱ka̱ʼi̱n xíʼinra ndiʼi ki̱vi̱, ta xi̱natúʼi̱n xíʼinra xa̱ʼa̱ ndiʼi ña̱ xi̱ndoʼi̱”.

8. ¿Ndáa ki̱ʼva chíndeétáʼan tu̱ʼun Ndióxi̱ xíʼún tá káʼviúnña ta ndákanixi̱níún xa̱ʼa̱ña?

⁸ Ta saátu ndáyáʼviní kaʼviyó tu̱ʼun Ndióxi̱ ndiʼi ki̱vi̱, ta ndakanixi̱níyó xa̱ʼa̱ relato ña̱ sándakaʼán miíyó ña̱ kúʼvi̱ní-ini Jehová xínira miíyó. Iin ñá hermana ñá naní Bianca xíniñúʼu kundeé-iniñá nu̱ú ña̱ va̱ása va̱ʼa káʼa̱n na̱ veʼeñá xíʼinñá, káchiñá: “Ña̱ chíndeétáʼanní xíʼi̱n kúú ña̱ káʼvii̱ relato ña̱ va̱xi nu̱ú Biblia, ta saátu ña̱ nátúʼun xa̱ʼa̱ na̱ hermano na̱ ni̱ya̱ʼa nu̱ú táʼan tu̱ndóʼo ña̱ kúúmiíi̱ ta ndákanixi̱níi̱ xa̱ʼa̱ ña̱ káʼvii̱”. Sava na̱ hermano sákuaʼa xíʼin xi̱nína texto ña̱ chíka̱a̱ní ndee̱ xíʼinna, tá kúú Salmo 27:10 xíʼin Isaías 41:10. Ta inkana, tá káʼvi kúeena ña̱ va̱ʼa ku̱ʼu̱nna reunión á tá káʼvina tu̱ʼun Ndióxi̱, xíniso̱ʼona audio ña̱ kúúmií tutu yóʼo. Ta káʼa̱nna ña̱ va̱ʼaní chíndeétáʼan ña̱yóʼo xíʼinna ña̱ va̱ása kuni mitúʼunna.

9. ¿Ndáaña va̱ʼa ndákiʼún tá xáʼún reunión?

⁹ Xíniñúʼu chika̱a̱yó ndee̱ ña̱ ku̱ʼu̱n ni̱ʼiyó reunión. Saáchi yóʼo kivi ndakiʼinyó ndee̱ ta saátu kivi kuxini̱kayó na̱ hermanoyó (Heb. 10:24, 25). Ñá Massiel ñá ni̱ka̱ʼa̱nyó xa̱ʼa̱ nu̱ú párrafo 7, káchiñá: “Ni xi̱kukaʼan nu̱úi̱ chi̱ka̱a̱-inii̱ ku̱ʼi̱n ndiʼi reunión, ta saátu taxii̱ iin comentario. Ña̱yóʼo chi̱ndeétáʼan xíʼi̱n ña̱ va̱ʼa kunii̱ ti̱xin congregación”.

10. ¿Nda̱chun ndáyáʼviní kutáʼanyó xíʼin na̱ hermano na̱ nda̱kúní káchíñu nu̱ú Ndióxi̱?

¹⁰ Ná kutáʼanyó xíʼin na̱ hermano na̱ nda̱kúní káchíñu nu̱ú Jehová. Ná kutáʼanyó xíʼin na̱ va̱ʼaní yichi̱ chínúu nu̱úyó, ni su̱ví inkáchi íyo  ku̱i̱ya̱yó xíʼinna á ni inka ñuu ke̱ena. Tu̱ʼun Ndióxi̱ sándakaʼánña miíyó ña̱ ku̱a̱ʼání ña̱ ndíchi kúúmií na̱ xa̱a̱ ku̱chée (Job 12:12). Soo saátu na̱ xa̱a̱ ku̱chée kivi sákuaʼana ku̱a̱ʼání ña̱ʼa xíʼin ña̱ kéʼé na̱ hermano na̱ válíka nu̱úna. Tá kúú, ta̱ David iin ta̱ loʼova xi̱kuura nu̱ú ta̱ Jonatán soo ni saá va̱ʼaníva ni̱xa̱a̱na xi̱táʼanna (1 Sam. 18:1). U̱vi̱ saána va̱ʼaní chi̱ndeétáʼanna xíʼin táʼanna ña̱ va̱ʼa ka̱chíñuna nu̱ú Jehová tá ni̱xi̱yo tu̱ndóʼo nu̱úna (1 Sam. 23:16-18). Ñá Irina, iin ñá hermana ñá ndásakáʼnu iinlá mií Jehová ti̱xin veʼeñá, káchiñá: “Na̱ hermanoyó kivi xa̱a̱na koona nda̱a̱ táki̱ʼva íyo na̱ yiváyó á ku̱ʼvayó. Jehová kivi kuniñúʼura na̱yóʼo ña̱ koona na̱ veʼeyó”.

11. ¿Ndáaña xíniñúʼu keʼéyó ña̱ va̱ʼa koo na̱ migoyó?

¹¹ Savayó kaʼanní nu̱úyó ta xa̱ʼa̱ ña̱yóʼo kivi ixayo̱ʼvi̱ña xíʼinyó kutáʼanyó xíʼin inkana. Ná kotoyó ndáaña káʼa̱n ñá Ratna, ñá hermana yóʼo kaʼanní nu̱úñá ta tá ki̱xáʼañá sákuaʼañá xa̱ʼa̱ Ndióxi̱ na̱ veʼeñá i̱xandi̱va̱ʼana xíʼinñá, káchiñá: “Xi̱niñúʼu ndakunii̱ ña̱ xi̱niñúʼu chindeétáʼan na̱ hermano xíʼi̱n”. Sana íxayo̱ʼvi̱ña xíʼinyó ña̱ natúʼunyó xíʼin inkana xa̱ʼa̱ ña̱ ndóʼoyó, soo ña̱yóʼo kúú ña̱ chindeétáʼan xíʼinyó ña̱ va̱ʼa kutáʼanyó xíʼinna. Na̱ migoyó kúni̱vana chindeétáʼanna xíʼinyó ta chika̱a̱na ndee̱ xíʼinyó, soo xíniñúʼu chindeétáʼanyó xíʼinna ña̱ kunda̱a̱-inina ndáa ki̱ʼva keʼéna ña̱yóʼo.

12. ¿Ndáa ki̱ʼva chíndeétáʼan predicación xíʼinyó ña̱ va̱ʼa koo na̱ migoyó?

¹² Tá kéeyó predicación xíʼin na̱ hermanoyó, saá kúú ña̱ va̱ʼaní xáa̱yó kítáʼanyó xíʼinna. Ñá Carol, ñá ni̱ka̱ʼa̱nyó xa̱ʼa̱ nu̱ú párrafo 5 káchiñá: “Va̱ʼaní kítáʼi̱n xíʼin ku̱a̱ʼání ná hermana saáchi kéendi̱ predicación, ta saátu kéʼéndi̱ inkaka chiñu nu̱ú Jehová. Miíra kúú ta̱ xíniñúʼu náyóʼo ña̱ va̱ʼa chindeétáʼanra xíʼi̱n”. Ku̱a̱ʼání ña̱ va̱ʼa ndakiʼinyó tá ná chika̱a̱yó ndee̱ ña̱ kutáʼanyó xíʼin na̱ hermano. Jehová xíniñúʼura na̱yóʼo ña̱ va̱ʼa chindeétáʼanra xíʼinyó tá yáʼayó nu̱ú tu̱ndóʼo, tá kúú tá kúni mitúʼunyó (Prov. 17:17).

13. ¿Ndáaña xíniñúʼu keʼé ndiʼiyó?

¹³ Ndiʼiyó xíniñúʼu chika̱a̱yó ndee̱ ña̱ vií kutáʼanyó ti̱xin congregación ta kuʼvi̱-iniyó kuniyó na̱ hermano. Tasaá nda̱a̱ ni iinna va̱ása kuni mitúʼunna (Juan 13:35). Ña̱ kéʼéyó á ña̱ káʼa̱nyó kúú ña̱ kivi chindeétáʼan xíʼinna. Iin ñá hermana káchiñá: “Tá sa̱kán sa̱kuaʼi̱ xa̱ʼa̱ Ndióxi̱, na̱ congregación ni̱xa̱a̱na ndu̱una na̱ veʼi̱. Ta xa̱ʼa̱ ña̱ chi̱ndeétáʼanna xíʼi̱n ni̱xa̱i̱ ndu̱i̱ testigo Jehová”. Sava na̱ hermano kúni mitúʼunna saáchi na̱ veʼena va̱ása ndásakáʼnuna Jehová, ¿ndáa ki̱ʼva chindeétáʼanyó xíʼin na̱yóʼo?

14. ¿Ndáaña kivi keʼéyó ña̱ va̱ʼa kutáʼanyó xíʼin na̱ sa̱kán kíxaa̱ ti̱xin congregación á na̱ sa̱kán sákuaʼa xa̱ʼa̱ Ndióxi̱?

¹⁴ Siʼna miíyó ná chika̱a̱ ndee̱ ña̱ kutáʼanyó xíʼinna. Vií ná ndakiʼinyó na̱ hermano na̱ sa̱kán kíxaa̱ ti̱xin congregaciónyó á na̱ sa̱kán kíxáʼa sákuaʼa xa̱ʼa̱ Ndióxi̱ (Rom. 15:7). Soo va̱ása xíniñúʼu chindeé kuitíyóna chi kúni̱yó xa̱a̱yó kooyó migona. Ña̱kán viíní ná keʼéyó xíʼinna ta ná na̱ʼa̱yó ña̱ ndíʼi̱-iniyó xa̱ʼa̱na. Ná chika̱a̱yó ndee̱ ña̱ kunda̱a̱-iniyó xíʼin ña̱ ndóʼona, soo ná va̱ása sákukaʼanyó nu̱úna xíʼin ña̱ ndáka̱tu̱ʼunyóna. Sana savana íxayo̱ʼvi̱ña xíʼinna ña̱ natúʼunna ndáaña ndóʼona, ña̱kán ná kiʼinyó kuenta ña̱ va̱ása ixandúxayó xíʼinna ña̱ natúʼunna xíʼinyó xa̱ʼa̱ iin ña̱ʼa. Va̱ʼaka viíní ná nda̱ka̱tu̱ʼunyóna, kúee ná koo iniyó ta kuniso̱ʼoyó ña̱ káʼa̱nna. Tá kúú, kivi nda̱ka̱tu̱ʼunyóna ndáa ki̱ʼva ni̱xa̱a̱na sa̱kuaʼana xa̱ʼa̱ Jehová.

15. Na̱ hermano na̱ nda̱kúní káchíñu nu̱ú Jehová, ¿ndáa ki̱ʼva chindeétáʼanna xíʼin inka na̱ hermano na̱ íyo ti̱xin congregación?

¹⁵ Ndiʼi na̱ íyo ti̱xin congregación va̱ʼaníka  xa̱a̱na kandíxana Jehová, tá ná na̱ʼa̱ na̱ anciano á inkaka na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ ña̱ ndíʼi̱-inina xa̱ʼa̱ na̱yóʼo. Iin ñá hermana ñá naní Melissa, iinlá miíñá xíʼin siʼíñá ndásakáʼnuná Jehová, káchiñá: “Táxiníi̱ tíxa̱ʼvi xa̱ʼa̱ ña̱ chíndeétáʼanní na̱ hermano xíʼi̱n ta nda̱a̱ táki̱ʼva íyo yivái̱ saá íyo na̱yóʼo, chi tá kúnii̱ natúʼi̱n xa̱ʼa̱ iin ña̱ʼa na̱yóʼo íyo tu̱ʼvana ña̱ kuniso̱ʼona ña̱ káʼi̱n”. Ná kotoyó ndáaña ndo̱ʼo inka ta̱ hermano ta̱ naní Mauricio tá ku̱xíka ta̱ xi̱kaʼvi xíʼinra nu̱ú na̱ ñuu Ndióxi̱, ta̱yóʼo káchira: “Iin ña̱ chi̱ndeétáʼanní xíʼi̱n kúú ña̱ ni̱ndi̱ʼi̱-ini na̱ anciano xa̱ʼíi̱. Xi̱tavána tiempo ña̱ va̱ʼa natúʼunna xíʼi̱n, xi̱keena predicación xíʼi̱n, xi̱natúʼunna xíʼi̱n xa̱ʼa̱ ña̱ xi̱ndani̱ʼína nu̱ú Biblia, ta nda̱a̱ xi̱sisíkina xíʼi̱n”. Ñá Melissa ta saátu ta̱ Mauricio káchíñuna nu̱ú Jehová ti̱xin Betel.

16, 17. ¿Ndáa ki̱ʼva chindeétáʼanyó xíʼin sava na̱ hermanoyó?

¹⁶ Ná chindeétáʼanyó xíʼinna (Gál. 6:10). Iin ta̱ misionero ta̱ naní Leo, xíkání íyora nu̱ú na̱ veʼera saáchi ndíka̱a̱ra inka ñuu káchíñura nu̱ú Jehová, káchira: “Ña̱ va̱ʼaníka chíndeétáʼan xíʼinyó kúú ña̱ va̱ʼa koo inina xíʼinyó. Ndákaʼíi̱n ña̱ ni̱yi̱ʼvíníi̱ tá ndo̱ʼi̱ iin tu̱ndóʼo xíʼin carroi̱. Ta ni xa̱a̱ nda̱ndikói̱ veʼi̱ táʼan yíʼvikai̱, soo iin na̱ matrimonio ka̱nana yi̱ʼi̱ ña̱ ku̱ʼi̱n kuxui̱ veʼena. Va̱ása ndákaʼíi̱n ndáa ña̱ʼa ta̱xina xi̱xii̱, soo ndákaʼánvai̱ ña̱ viíní xi̱niso̱ʼona ña̱ na̱túʼi̱n xíʼinna. Tándi̱ʼi, va̱ʼaní ku̱nii̱ xíʼin ña̱yóʼo”.

¹⁷ Va̱ʼaní kúniyó tá xáʼa̱nyó asamblea á inkaka reunión ña̱ ndáyáʼviní, saáchi ndákutáʼanyó xíʼin na̱ hermanoyó ta nátúʼunyó xa̱ʼa̱ ña̱ sa̱kuaʼayó. Soo ná kotoyó ndáaña káʼa̱n ñá Carol ñá xa̱a̱ ni̱ka̱ʼa̱nyó xa̱ʼa̱, káchiñá: “Íxayo̱ʼvi̱níña xíʼi̱n tá xíyo asamblea chi ni ku̱a̱ʼání kúú na̱ hermano xáʼa̱n, soo na̱yóʼo xíʼin na̱ veʼevana ndákutáʼanna, ña̱kán kúni mitúʼunníi̱ tá xáʼi̱n asamblea”. Sava na̱ hermano íxayo̱ʼvi̱níña xíʼinna ku̱ʼu̱nna asamblea tá sa̱kán xíʼi̱ ñá síʼina á yiína. ¿Á xíni̱yó iin na̱ ndóʼo táʼan ña̱yóʼo? ¿Á kivi ndakiʼinyó na̱yóʼo ña̱ koona xíʼin na̱ veʼeyó tá xíyo reunión ña̱ ndáyáʼviní á asamblea?

18. Nda̱a̱ táki̱ʼva káchi 2 Corintios 6:11-13, ¿ndáa ki̱ʼva na̱ʼa̱yó ña̱ va̱ʼa-iniyó xíʼin inkana?

¹⁸ Ná taváyó tiempo ña̱ kutáʼanyó xíʼinna. Tá kéʼéyó iin ña̱ʼa ña̱ va̱ʼa koo si̱íyó ná kanayó xa̱a̱ síín síín na̱ hermano, tá kúú na̱ kúni mitúʼun.  Saáchi kúni̱yó na̱ʼa̱yó ña̱ kúʼvi̱-iniyó xíniyóna (kaʼvi 2 Corintios 6:11-13). * Ñá Melissa, ñá ni̱ka̱ʼa̱nyó xa̱ʼa̱ nu̱ú párrafo 15 káchiñá: “Xi̱kusi̱íní-inindi̱ tá xi̱kana sava na̱ familia ndi̱ʼi̱ ña̱ ku̱ʼu̱nndi̱ veʼena á ña̱ ku̱ʼu̱nndi̱ kotonde̱ʼéndi̱ inka ñuu xíʼinna”. ¿Á íyo sava na̱ hermano ti̱xin congregación na̱ xíniñúʼu chindeétáʼanyó xíʼin?

19. ¿Áma kúú ña̱ xíniñúʼuníka kutáʼanyó xíʼin sava na̱ hermano?

¹⁹ Íyo sava tiempo ña̱ va̱ʼaníka kuni na̱ hermano tá ná koo yatinyó xíʼinna. Tá kúú sava na̱ hermano na̱ ndásakáʼnu iinlá mií Ndióxi̱, kivi kuni mitúʼunna tá tává na̱ veʼena na̱ va̱ása kúú testigo Jehová vikó. Ta inkana xóʼvi̱nína tá xínu ku̱i̱ya̱ ña̱ ni̱xi̱ʼi̱ iin na̱ veʼena. Tá táváyó tiempo ña̱ kutáʼanyó xíʼin na̱ hermano yóʼo náʼa̱yó ña̱ ndixa ndíʼi̱-iniyó xa̱ʼa̱na (Filip. 2:20).

20. Ña̱ ni̱ka̱ʼa̱n ta̱ Jesús nu̱ú Mateo 12:48-50, ¿ndáa ki̱ʼva chindeétáʼanña xíʼinyó tá kúni mitúʼunyó?

²⁰ Ku̱a̱ʼáníva xa̱ʼa̱ kúú ña̱ kivi kuni mitúʼunyó sava yichi̱. Soo ná ndakaʼányó ña̱ kúnda̱a̱va-ini Jehová xíʼin ña̱ ndóʼoyó. Ta xíniñúʼura na̱ hermanoyó ña̱ va̱ʼa taxira ña̱ xíniñúʼuyó (kaʼvi Mateo 12:48-50). * Ta kivi na̱ʼa̱yó ña̱ táxiyó tíxa̱ʼvi ndaʼa̱ Jehová tá ná chika̱a̱yó ndee̱ ña̱ chindeétáʼanyó xíʼin na̱ hermanoyó. Ta ni nda̱a̱ ndáaka ña̱ ndóʼoyó ná ndakaʼányó chi va̱ása íyo mitúʼunyó, saáchi ndiʼi tiempo íyo Jehová xíʼinyó.