IIN ñá hermana ñá naní Lisa * káʼa̱nñá ndáaña ku̱tóokañá tá ki̱xáʼañá sákuaʼañá xa̱ʼa̱ Ndióxi̱. Káchiñá: “Ña̱ va̱ʼaní ni̱xi̱yo ini na̱ hermano kúú ña̱ nda̱kanda̱ní-inii̱ xíʼin”. Ki̱ʼva saátu ndo̱ʼo ñá Anne. Ñáyóʼo káchiñá: “Tá xi̱nitáʼi̱n xíʼin na̱ testigo Jehová, ña̱ ku̱tóokai̱ kúú ña̱ va̱ʼaní-inina, nu̱úka ña̱ sánáʼa̱na”. Ni vitin kúsi̱íníva-ini ná hermana yóʼo káʼviná Biblia ta ndákanixi̱níná xa̱ʼa̱ña, soo ña̱ va̱ʼaníka chi̱ndeétáʼan xíʼinná ña̱ ni̱xa̱a̱ná sa̱kuaʼaná xa̱ʼa̱ Ndióxi̱ kúú ña̱ va̱ʼaní ni̱xi̱yo ini na̱ hermano xíʼinná.

¿Ndáa ki̱ʼva na̱ʼa̱yó ña̱ va̱ʼa íyo iniyó xíʼin inkana tasaá kivi chindeétáʼanyó xíʼinna? Ná kotoyó u̱vi̱ ña̱ kivi keʼéyó: kivi keʼéyóña xíʼin ña̱ káʼa̱nyó ta saátu xíʼin ña̱ kéʼéyó. Tándi̱ʼi, sakúaʼayó ndáana xíniñúʼu va̱ʼa koo iniyó xíʼin.

Proverbios capítulo 31 káʼa̱nña xa̱ʼa̱ ña̱ viíní kéʼé iin ñaʼá ñá íyo yií, ta va̱ʼaní íyo tu̱ʼun ña̱ káʼa̱nñá (Prov. 31:26). Ta viíní ndáka̱xinñá tu̱ʼun ña̱ káʼa̱nñá ta saátu ki̱ʼva ña̱ káʼa̱nñáña. Saátu na̱ íyo se̱ʼe, xíniñúʼu viíní koo tu̱ʼun ña̱ ka̱ʼa̱nna xíʼin se̱ʼena. Ku̱a̱ʼání na̱ íyo se̱ʼe kúnda̱a̱-inina ña̱ tá ndáʼyi̱na nu̱ú se̱ʼena, kivi saxóʼvi̱na na̱yóʼo, ta sana va̱ása kandíxa na̱ va̱lí yóʼo kuniso̱ʼona ña̱ káʼa̱nna. Soo tá viíní íyo tu̱ʼun ña̱ káʼa̱nna xíʼin se̱ʼena, kuniso̱ʼova na̱yóʼo ña̱ káʼa̱nna.

Ni íyo se̱ʼeyó á va̱ása íyo se̱ʼeyó, ¿ndáaña kivi keʼéyó ña̱ va̱ʼaníka koo tu̱ʼun ña̱ káʼa̱nyó? Nu̱ú kíxáʼa Proverbios 31:26 káʼa̱nña xíʼinyó xa̱ʼa̱ ña̱yóʼo. Káchiña: “Viíní ndákanixi̱níñá tá káʼa̱nñá”. Ña̱yóʼo kúni̱ kachiña, ña̱ xíniñúʼu viíní ndaka̱xinyó tu̱ʼun ña̱ ka̱ʼa̱nyó ta ndáa ki̱ʼva ka̱ʼa̱nyóña. Tá sáa̱yó, xíniñúʼu ndakanixi̱níyó xa̱ʼa̱ ña̱yóʼo: “Tá ná ka̱ʼi̱n ña̱yóʼo, ¿á sa̱a̱kana á va̱ʼava kunina?” (Prov. 15:1). Ndáyáʼviní ndakanixi̱níyó tá kúma̱níka ka̱ʼa̱nyó.

Inka proverbio káchiña: “Na̱ kǒo ndákanixi̱ní xíʼin ña̱ káʼa̱nna, ña̱yóʼo íyoña nda̱a̱ táki̱ʼva íyo ña̱ kanina iinna xíʼin espada” (Prov. 12:18). Tá ná ndakanixi̱níyó xa̱ʼa̱ ndáa ki̱ʼva kivi kundoʼo inkana xíʼin ña̱ káʼa̱nyó ta saátu ndáa ki̱ʼva káʼa̱nyóña, sana kiʼinkavayó kuenta xíʼin ña̱ káʼa̱nyó. Tá va̱ʼa íyo iniyó va̱ása kuniñúʼuyó tu̱ʼun ña̱ sáxo̱ʼvi̱ inkana ta ni va̱ása nda̱ʼyi̱yó nu̱úna (Efes. 4:31, 32). Viíní ná koo ña̱ ndákanixi̱níyó ta saátu tu̱ʼun ña̱ káʼa̱nyó. Jehová kúú ta̱ sánáʼa̱ miíyó ndáa ki̱ʼva keʼéyó ña̱yóʼo. Tá ni̱yi̱ʼvíní ta̱ Elías, Jehová chi̱ndaʼára iin ángel ña̱ va̱ʼa chika̱a̱ra ndee̱ xíʼin ta̱yóʼo ta viíní ni̱xi̱yo tu̱ʼun ña̱ ni̱ka̱ʼa̱nra xíʼinra (1 Rey. 19:12). Ta su̱ví xíʼin tu̱ʼun kuití ña̱ káʼa̱nyó kivi na̱ʼa̱yó ña̱ va̱ʼa íyo iniyó. Chi saátu xíniñúʼu na̱ʼa̱yó ña̱yóʼo xíʼin ña̱ kéʼéyó. Ná kotoyó ndáa ki̱ʼva keʼéyóña.

Tá ndíku̱nyó yichi̱ Jehová, va̱ʼaní koo ña̱ ka̱ʼa̱nyó xíʼin inkana ta saátu ña̱ keʼéyó xíʼinna (Efes. 4:32; 5:1, 2). Ñá Lisa ñá ni̱ka̱ʼa̱nyó xa̱ʼa̱ nu̱ú párrafo ña̱ nu̱ú, ki̱ʼinñá kuenta ña̱ va̱ʼaní íyo ini na̱ testigo Jehová. Ñáyóʼo káchiñá: “Tá ku̱a̱ʼi̱n koi̱ xíʼin na̱ veʼi̱ inka lugar, u̱vi̱ na̱ matrimonio na̱ kúú testigo Jehová ndu̱kúna permiso nu̱ú káchíñuna  ña̱ va̱ʼa chindeétáʼanna xíʼinndi̱ ña̱ taán va̱ʼandi̱ ña̱ʼandi̱. Ta tá tiempo saá, ta̱ʼánví kixáʼíi̱ kaʼvii̱ Biblia”. Ña̱ ke̱ʼé na̱ hermano yóʼo, chi̱ndeétáʼanña xíʼin ñá Lisa ña̱ kuni̱kañá sakúaʼañá xa̱ʼa̱ Ndióxi̱.

Saátu ñá Anne, ñá xa̱a̱ ni̱ka̱ʼa̱nyó xa̱ʼa̱ nu̱ú párrafo ña̱ nu̱ú, káʼa̱nñá ña̱ chi̱ndeétáʼanní xíʼinñá kúú ña̱ va̱ʼaní ni̱xi̱yo ini na̱ hermano xíʼinñá. Ñáyóʼo káchiñá: “Xa̱ʼa̱ ña̱ ke̱ʼé na̱ yiví ña̱ va̱ása va̱ʼa xíʼi̱n tá ya̱chi̱, i̱xayo̱ʼvi̱ña xíʼi̱n kandíxai̱ ña̱ káʼa̱n inkana saátu ña̱ kéʼéna”. Káchikañá: “Tá xi̱nitáʼi̱n xíʼin na̱ testigo Jehová, ni̱xi̱ka loʼo inii̱ xíʼin ña̱ xi̱keʼéna. Ta xi̱ndakanixi̱níi̱ nda̱chun va̱ʼaní íyo inina xíʼi̱n. Soo tándi̱ʼi, va̱ʼaníva ki̱xáʼíi̱ kítáʼi̱n xíʼin ñá xi̱sanáʼa̱ yi̱ʼi̱ xa̱ʼa̱ Ndióxi̱ chi ki̱ʼi̱n kuenta ña̱ ndixa ndíʼi̱-iniñá xa̱ʼíi̱”. ¿Ndáa ki̱ʼva chi̱ndeétáʼan ña̱yóʼo xíʼinñá? Ñáyóʼo káchiñá: “Tá ni̱ya̱ʼa loʼo tiempo, ki̱xáʼíi̱ kúni̱kai̱ sakúaʼi̱ xa̱ʼa̱ ña̱ nda̱a̱”.

Ña̱ va̱ʼaní ni̱xi̱yo ini na̱ hermano kúú ña̱ chi̱ndeétáʼanní xíʼin u̱vi̱ saá ná hermana yóʼo. Ta saátu chi̱ndeétáʼanña xíʼinná ña̱ kuni̱kaná sakúaʼaná xa̱ʼa̱ ña̱ nda̱a̱. Xa̱ʼa̱ ña̱ va̱ʼaní ni̱xi̱yo ini na̱ congregación  xíʼinná, ki̱xáʼaná kándíxaná Jehová ta saátu na̱ ñuura.

Savana va̱ása íxayo̱ʼvi̱ña xíʼinna ña̱ ku̱a̱ku̱na xíʼin inkana ta vií keʼéna xíʼinna, chi saá sa̱náʼa̱nana tá válína. Ta iin ña̱ va̱ʼaníva kúú ña̱yóʼo. Soo tá kéʼéyóña xa̱ʼa̱ ña̱ saá sa̱náʼa̱na miíyó, va̱ása náʼa̱yó ña̱ ndíku̱nyó yichi̱ Ndióxi̱ ña̱ va̱ʼa koo iniyó xíʼin inkana (chitáʼanña xíʼin Hechos 28:2).

Ña̱ va̱ʼa ña̱ kúúmií espíritu santo Ndióxi̱ kúú ña̱ va̱ʼa koo iniyó xíʼin ña̱ vií koo iniyó (Gál. 5:22, 23). Ta ña̱ va̱ʼa kuumiíyó ña̱yóʼo tasaá kundiku̱nyó yichi̱ Jehová xíʼin ta̱ Jesús, xíniñúʼu taxiyó ña̱ chindeétáʼan espíritu santo xíʼinyó, tasaá vií koo ña̱ ndákanixi̱níyó xíʼin ña̱ kéʼéyó. Ta saátu xa̱ʼa̱ ña̱ ndíku̱nyó ta̱ Cristo, ndixa ndíʼi̱-iniyó xa̱ʼa̱ inkana chi kúʼvi̱-iniyó xíniyó Ndióxi̱ ta saátu na̱ yiví. Xa̱ʼa̱ ña̱kán, tá náʼa̱yó ña̱ va̱ʼa íyo iniyó ta vií íyo iniyó xíʼin inkana, saá kúú ña̱ sakusi̱íyó-ini Jehová.

Mií ña̱ nda̱a̱, va̱ása íxayo̱ʼvi̱ña xíʼinyó ña̱ va̱ʼa koo iniyó xíʼin na̱ va̱ʼa íyo ini xíʼinyó á na̱ xa̱a̱ xíni̱yó (2 Sam. 2:6). Iin ña̱ kéʼéyó kúú ña̱ táxiyó tíxa̱ʼvi ndaʼa̱na (Col. 3:15). Soo, ¿ndáaña kúu tá ndákanixi̱níyó ña̱ íyo iin na̱ va̱ása xíniñúʼu va̱ʼa koo iniyó xíʼin?

Ná ndakanixi̱níyó xa̱ʼa̱ ña̱yóʼo: Jehová va̱ʼaní-inira xíʼin ndiʼi na̱ yiví, ta nda̱a̱ ni iinna kǒo kéʼé táki̱ʼva kéʼéra. Biblia káʼa̱nña xíʼinyó iin ña̱ ndáyáʼviní xa̱ʼa̱ ña̱yóʼo. Nu̱ú ña̱ Escrituras Griegas Cristianas ku̱a̱ʼání yichi̱ va̱xi ña̱ tu̱ʼun va̱ʼaní-ini. ¿Ndáa ki̱ʼva náʼa̱ Ndióxi̱ ña̱yóʼo?

Jehová va̱ʼaní-inira xíʼin ndiʼi na̱ yiví chi táxira ña̱ xíniñúʼuna ña̱ va̱ʼa kutakuna (Mat. 5:45). Ta saátu, tá kúma̱ní kunda̱a̱-iniyó xa̱ʼa̱ra xa̱a̱ ni̱na̱ʼa̱vara ña̱ va̱ʼa-inira xíʼinyó (Efes. 2:4, 5, 8). Tá kúú, ta̱xira se̱ʼera ña̱ ni̱xi̱ʼi̱ra xa̱ʼa̱ ndiʼi na̱ yiví, ña̱yóʼo kúú ña̱ ndáyáʼviníka ke̱ʼéra. Ta̱ apóstol Pablo ni̱ka̱ʼa̱nra, ña̱ kivi ndakiʼinyó ña̱ va̱ʼa xa̱ʼa̱ ña̱ ni̱xi̱ʼi̱ ta̱ Jesús chi “va̱ʼaní-ini Ndióxi̱ xíʼinyó” (Efes. 1:7). Ta saátu, ni kíʼviyó ku̱a̱chi ta sákusuchíyó-ini Jehová, ndákundeévara chíndeétáʼanra xíʼinyó. Ña̱ sánáʼa̱ra xíʼin ña̱ káʼa̱nra va̱ʼaní íyoña ta íyoña nda̱a̱ táki̱ʼva íyo sa̱vi̱ yáá (Deut. 32:2). Nda̱a̱ ni loʼo va̱ása kivi chaʼviyó xa̱ʼa̱ ña̱ va̱ʼaní-ini Jehová xíʼinyó. Iinlá ta̱yóʼo kúú ta̱ taxi ña̱ va̱ʼa ndaʼa̱yó chí nu̱únínu (chitáʼanña xíʼin 1 Pedro 1:13).

¿Á su̱ví xa̱ʼa̱ ña̱ va̱ʼaní-ini Jehová kúú ña̱ kúni̱yó kuyatinyó nu̱úra ta kúni̱yó kundiku̱nyó yichi̱ra? Tá saá, su̱ví xíʼin loʼo kuitína xíniñúʼu va̱ʼa koo iniyó. Nu̱úka ña̱yóʼo, ná chika̱a̱níyó ndee̱ ña̱ va̱ʼa koo iniyó xíʼin ndiʼina nda̱a̱ táki̱ʼva kéʼé Jehová (1 Tes. 5:15). Tá ndiʼi tiempo va̱ʼa-iniyó xíʼin inkana, kooyó nda̱a̱ táki̱ʼva íyo iin ñuʼu̱ loʼo ña̱ sándasa̱á inkana tiempo vi̱xin. Tá saá ná keʼéyó, na̱ veʼeyó, na̱ hermano na̱ íyo ti̱xin congregación, na̱ káchíñu xíʼinyó, na̱ káʼvi xíʼinyó escuela xíʼin na̱ ndóo yatin xíʼinyó kusi̱íní-inina kutáʼanna xíʼinyó.

¿Á íyo iin na̱ veʼún á iin na̱ hermano ti̱xin congregación na̱ xíniñúʼu ka̱ʼún tu̱ʼun va̱ʼa xíʼin á va̱ʼa koo iniún xíʼinna? Sana íyo iin na̱ hermano ti̱xin congregación na̱ xíniñúʼu ña̱ kundaún veʼena, jardín ña̱ kúúmiína, ña̱ ku̱ʼún satáún ña̱ xíniñúʼuna á ña̱ keʼún inkaka ña̱ʼa xa̱ʼa̱na. ¿Ndáa ki̱ʼva kivi na̱ʼa̱yó ña̱ va̱ʼa iniyó tá nátúʼunyó xíʼin na̱ yiví xa̱ʼa̱ Ndióxi̱? Ña̱ kivi keʼéyó kúú ña̱ chindeétáʼanyó xíʼinna.

Ná kundiku̱nyó yichi̱ Jehová, ta ña̱ káʼa̱nyó xíʼin ña̱ kéʼéyó va̱ʼaní ná kooña.