1, 2. ¿Á kivi kooyó migo Jehová?

 JEHOVÁ kúúra Ndióxi̱yó, migoyó xíʼin yiváyó. Soo, ¿á xíni̱ún ña̱ kánara yóʼó ku̱ʼún veʼera?

² Ná kachiyó ña̱ iin na̱ yiví ka̱nana yóʼó ña̱ ku̱ʼún veʼena ta va̱ʼaní nda̱kiʼinna yóʼó. Ta̱ rey David ni̱ka̱ʼa̱nra ña̱ ki̱ʼva saá kéʼé Jehová xíʼin na̱ káchíñu nu̱úra chi va̱ʼaní-inira xíʼinna. Ta̱ David ni̱nda̱ka̱tu̱ʼunrara: “Jehová Ndióxi̱ miíi̱, ¿ndáana kúú na̱ kivi koo veʼún? Ta, ¿ndáana kivi koo yuku̱ ña̱ yi̱i̱ní nu̱ú íyoún?” (Sal. 15:1). Xíʼin tu̱ʼun ña̱ ni̱ka̱ʼa̱n ta̱ David kúnda̱a̱-iniyó ña̱ kiviva kooyó veʼe Jehová ta ña̱yóʼo kúni̱ kachiña ña̱ kooyó migora, ta kúsi̱íní-iniyó xa̱ʼa̱ ña̱yóʼo.

JEHOVÁ KÁNARA MIÍYÓ ÑA̱ KU̱ʼU̱NYÓ VEʼERA

3. ¿Ndáa ta̱ kúú ta̱ nu̱ú ni̱xa̱a̱ veʼe Jehová, ta ndáa ki̱ʼva ku̱ni Jehová xíʼin ta̱ Jesús?

³ Tá kúma̱ní ixava̱ʼa Jehová ndiʼi ña̱ʼa mitúʼun miíra ni̱xi̱yo. Soo, saá i̱xava̱ʼara ta̱ Jesús tasaá kǒo níxi̱yo mitúʼunkara. Ta nda̱a̱ táki̱ʼva íyo ta̱ ka̱nara ni̱xa̱a̱ veʼera saá ni̱xi̱yo ta̱ Jesús. Ni̱kusi̱íní-ini Jehová nda̱kiʼinrara. Ña̱ Biblia káʼa̱nña ña̱ kúsi̱íní-ini Jehová xíʼin ta̱ Jesús, ta saátu ta̱ Jesús kúsi̱íní-inira ña̱ íyora xíʼin yivára (Prov. 8:30).

4. ¿Ndáakana ka̱na Jehová ña̱ ku̱ʼu̱nna veʼera?

 ⁴ Tá ni̱ya̱ʼa tiempo Jehová i̱xava̱ʼara na̱ ángel, ta saátu ka̱narana ña̱ ku̱ʼu̱nna veʼera. Ña̱ Biblia káʼa̱nña ña̱ kúúna se̱ʼe Ndióxi̱, ta kúsi̱íní-inina ña̱ íyona xíʼinra (Job 38:7; Dan. 7:10). Ku̱a̱ʼání ku̱i̱ya̱ iinlá ta̱ Jesús xíʼin na̱ ángel xi̱kuu migo Jehová, soo tá ni̱ya̱ʼa tiempo ka̱nara sava na̱ yiví ña̱ ku̱ʼu̱nna veʼera á ña̱ koona migora. Sava na̱yóʼo xi̱kuu ta̱ Enoc, ta̱ Noé, ta̱ Abrahán, xíʼin ta̱ Job. Ña̱ Biblia káʼa̱nña xa̱ʼa̱ na̱yóʼo ña̱ va̱ʼaní xi̱kitáʼanna xíʼin Ndióxi̱ ta xi̱kuuna migora (Gén. 5:24; 6:9; Job 29:4; Is. 41:8).

5. ¿Ndáaña sákuaʼayó xíʼin profecía ña̱ va̱xi nu̱ú Ezequiel 37:26 xíʼin 27?

⁵ Tá ni̱ya̱ʼa ku̱a̱ʼá ku̱i̱ya̱, Jehová ka̱nara inkakana ña̱ ku̱ʼu̱nna veʼera. Ná ka̱ʼa̱nyó xa̱ʼa̱ profecía ña̱ va̱xi nu̱ú Ezequiel 37:​26, 27 (kaʼviña). a Ndióxi̱ kúni̱níra ña̱ ndiʼi na̱ ndásakáʼnu miíra ná xa̱a̱na koona migora, ta ña̱yóʼo kúú ña̱ sákuaʼayó xíʼin profecía yóʼo. Jehová ni̱ka̱ʼa̱nra keʼéra iin trato xíʼin na̱ ñuura ña̱ viíní kutáʼanra xíʼinna. Ña̱ profecía yóʼo xi̱nuña tá inkáchi ná ndakutáʼan na̱ ungido xíʼin na̱ yiví na̱ kundoo nu̱ú ñuʼú yóʼo ña̱ ndasakáʼnuna Jehová ta nda̱a̱ táki̱ʼva íyo na̱ ndi̱ʼvi ini veʼera saá koona (Juan 10:16). Ta ña̱yóʼo kúú ña̱ kúu tiempo vitin.

NI NDA̱A̱ NDÁAKA LUGAR NDÓOYÓ NDÁAVA JEHOVÁ MIÍYÓ

6. ¿Ama kúú ña̱ kíʼviyó veʼe Jehová, ta ndáa mií íyoña?

⁶ Tá tiempo xi̱naʼá, ni̱xi̱yo veʼe válí ña̱ xi̱ ixava̱ʼana xíʼin tela, ta ini ña̱yóʼo kivi ndakindee̱na á koo sávína. Tá iin na̱ yiví xi̱kiʼvina ini veʼe yóʼo va̱ʼaní xi̱kuni̱na saáchi xi̱taxina ña̱ xi̱xixina. Ta tiempo vitin, kíʼviyó ini veʼe Jehová tá ndákuchiyó (Sal. 61:4). Yóʼo kúú nu̱ú sákuaʼayó xa̱ʼa̱ Jehová, ta saátu va̱ʼaní kítáʼanyó xíʼin na̱ ñaniyó xíʼin ku̱ʼvayó na̱ ñúʼu ti̱xin ñuura. Soo, ¿ndáa mií íyo veʼe Jehová? Su̱ví iin veʼe ndixa kúú ña̱yóʼo ta kǒo iin lugar nu̱ú íyoña, soo ndiʼi na̱ xíniso̱ʼo ña̱ káʼa̱n Jehová ta ndásakáʼnunara nda̱a̱ táki̱ʼva íyo na̱ ñúʼu veʼera saá íyona. Ta ndiʼiyó xa̱a̱ xítoyó ña̱yóʼo tá xáʼa̱nyó inka ñuu á tá xáʼa̱nyó asamblea chi kán kúú nu̱ú xíniyó ku̱a̱ʼání na̱ ñaniyó xíʼin ku̱ʼvayó na̱ ndásakáʼnu Ndióxi̱ (Apoc. 21:3).

7. Na̱ xi̱ndasakáʼnu Jehová tá ya̱chi̱, ¿á íyokana veʼera? (Koto na̱ʼná).

⁷ ¿Ndáaña ku̱u xíʼin na̱ xi̱ndasakáʼnu  Jehová tiempo xi̱naʼá? ¿Á íyokana veʼe Jehová? Íyovana. ¿Nda̱chun káʼa̱nyó ña̱yóʼo? Saáchi ña̱ Biblia káʼa̱nña ña̱ ni xa̱a̱ ni̱xi̱ʼi̱na nda̱a̱ táki̱ʼva íyo na̱ táku saá íyona nu̱ú Jehová chi ndákaʼánkavara xa̱ʼa̱na. Ta̱ Jesús ni̱ka̱ʼa̱nra ña̱ ndatakuva na̱ ni̱xi̱ʼi̱: “Nda̱a̱ ta̱ Moisés ni̱ka̱ʼa̱n [...] xa̱ʼa̱ña tá ni̱ka̱ʼa̱nra xa̱ʼa̱ yitu̱n tú iñú, ta saátu tá ni̱ka̱ʼa̱nra xa̱ʼa̱ Jehová ña̱ kúúra, ‘Ndióxi̱ ta̱ Abrahán, Ndióxi̱ ta̱ Isaac, Ndióxi̱ ta̱ Jacob.’ Ta̱yóʼo su̱ví Ndióxi̱ na̱ ni̱xi̱ʼi̱ kúúra, chi Ndióxi̱ na̱ táku kúúra, saáchi nu̱ú ta̱yóʼo ndiʼi na̱kán na̱ táku kúúna nu̱úra” (Luc. 20:​37, 38).

ÑA̱ VA̱ʼA NDÁKIʼINYÓ XÍʼIN ÑA̱ XÍNIÑÚʼU KEʼÉYÓ

8. ¿Ndáaña va̱ʼa ndákiʼinyó xa̱ʼa̱ ña̱ ñúʼuyó ti̱xin veʼe Jehová?

⁸ Veʼe válí ña̱ xi̱ ixava̱ʼana tiempo xi̱naʼá xi̱chindeétáʼanña xíʼin na̱ yiví ña̱ koo sávína. Ki̱ʼva saá íyo veʼe Jehová chi chindeétáʼanña xíʼinyó ña̱ kǒo keʼéyó ña̱ʼa ña̱ kúndasíra xínira ta saátu sándakaʼánña miíyó xa̱ʼa̱ ña̱ ndátuyó koo chí nu̱únínu. Tá va̱ʼaní kítáʼanyó xíʼin Jehová kǒo kuchiñu ta̱ Ndi̱va̱ʼa sandáʼvira miíyó ña̱ keʼéyó ña̱ kini (Sal. 31:23; 1 Juan 3:8). Ta nu̱ú ñuyǐví xa̱á kundaa Jehová na̱ ndásakáʼnu miíra ta chindeétáʼanra xíʼinna ña̱ viíní kutáʼanna xíʼinra ta kǒo taxikara ña̱ kuvina (Apoc. 21:4).

9. ¿Ndáaña xíniñúʼu keʼé na̱ ñúʼu veʼe Jehová?

⁹ Jehová táxira ña̱ kooyó veʼera ta yóʼo kúú nu̱ú va̱ʼaní kítáʼanyó xíʼinra. Soo, ¿ndáaña xíniñúʼu keʼéyó ña̱ va̱ʼa kookayó veʼera? Tá iin na̱ yiví kánana miíyó ña̱ ku̱ʼu̱nyó veʼena, kúni̱yó kunda̱a̱-iniyó ndáaña kúni̱na keʼéyó. Sana kivi ka̱ʼa̱nna xíʼinyó ña̱ ya̱kúnyó ndu̱xanyó tasaá va̱ʼa ki̱ʼviyó veʼena, ta keʼévayó ña̱ káʼa̱nna xíʼinyó. Ta saátu íyo veʼe Jehová, chi kúni̱yó ka̱ʼa̱nra xíʼinyó ndáaña xíniñúʼu keʼéyó ña̱ va̱ʼa kooyó veʼera. Xa̱ʼa̱ ña̱ kúni̱níyó xíniyó Jehová kúni̱yó keʼéyó ña̱ sakúsi̱í-inira (Col. 1:10). Jehová kúúra migoyó, soo saátu kúúra Ndióxi̱yó xíʼin yiváyó, xa̱ʼa̱ ña̱kán xíniñúʼu ixato̱ʼóníyóra (Sal. 25:14). Xa̱ʼa̱ ña̱ kǒo kúni̱yó sakúsuchíyó-ini Jehová kǒo kúni̱yó keʼéyó ña̱ kini. Ta ña̱ va̱ʼa kutáʼanyó xíʼinra ndiʼi tiempo xíniñúʼu vitá koo iniyó (Miq. 6:8).

VIÍNÍ XI̱NDAARA NDIʼINA TÁ NI̱XI̱YONA NU̱Ú ÑUʼÚ YI̱CHÍ

10, 11. ¿Ndáa ejemplo náʼa̱ nu̱úyó ña̱ va̱ʼa ndiʼi na̱ yiví nu̱ú Jehová?

¹⁰ Viíní ndákiʼin Jehová ndiʼi na̱ kíʼvi veʼera ta kǒo ndáka̱xinrana (Rom. 2:11). Vitin sakúaʼayó ndáa ki̱ʼva xi̱ndaa Jehová na̱ ñuu Israel tá xi̱ndoona nu̱ú ñuʼú yi̱chí ña̱ Sinaí.

¹¹ Tá ta̱vá Jehová na̱ ñuu Israel ti̱xin ñuu Egipto nda̱kaxinra sava na̱ koo su̱tu̱ ña̱ kachíñuna ti̱xin tabernáculo. Saátu ni̱ka̱ʼa̱nra xíʼin na̱ levita ña̱ kachíñuna ti̱xin tabernáculo. ¿Á nda̱saa na̱ xi̱kachíñu ti̱xin tabernáculo á na̱ ni̱xi̱yo yatin nu̱ú xi̱ndikaa̱ña kúú na̱ va̱ʼaní xi̱ndaa Jehová? Va̱ásaví, saáchi va̱ʼaní xi̱ndaara ndiʼina.

12. ¿Ndáa ki̱ʼva ni̱na̱ʼa̱ Jehová ña̱ inkáchi ni̱xi̱yo ndiʼi na̱ ñuu Israel nu̱úra? (Éxodo 40:38; koto na̱ʼná).

¹² Ndiʼi na̱ israelita inkáchi ni̱xi̱yona nu̱ú Jehová ta kivi xa̱a̱na kutáʼanna xíʼinra ta koona migora ni nda̱a̱ ndáaka chiñu xi̱kuumiína á yatin á xíka xi̱ndoona nu̱ú xi̱ndikaa̱ ña̱ tabernáculo. Tá kúú, tá káʼñu xi̱taxi Jehová ña̱ koto ndiʼi na̱ israelita vi̱kó sa̱tá tabernáculo, ta tá ñuú xi̱xinina iin ñuʼu̱ sa̱táña (kaʼvi Éxodo 40:38). b Ña̱kán, nda̱a̱ na̱ xi̱ndoo xíká xi̱xini tá xi̱kanda̱ vi̱kó, tasaá  ndi̱ku̱n kama xi̱ndakayana ña̱ʼana, xi̱xanina veʼena ña̱ tela ta xi̱ndakiʼinna ku̱a̱ʼa̱nna ña̱ va̱ʼa kundiku̱nna vi̱kó yóʼo (Núm. 9:​15-23). Saátu, ndiʼina va̱ʼa xi̱xiniso̱ʼona tá xi̱tivina u̱vi̱ tú trompeta tú plata, chi ña̱yóʼo xi̱kuu seña ña̱ xa̱a̱ xi̱xiniñúʼu ku̱ʼu̱nna (Núm. 10:2). Ña̱kán, ni yatinníva ni̱xi̱yo savana síi̱n ña̱ tabernáculo, soo su̱ví ña̱yóʼo níxi̱kuni̱ kachiña ña̱ nda̱saa na̱yóʼo xi̱kuu migo Jehová, saáchi ndiʼi na̱ ñuu Israel kivi xa̱a̱na vií kutáʼanna xíʼin Jehová ta kundaarana. Ta saátu kúu tiempo vitin, ni nda̱a̱ ndáaka ñuu íyoyó kúʼvi̱ní-ini Jehová xínira miíyó, ndáara miíyó ta kíʼinra kuenta xíʼinyó.

NI TIEMPO VITIN KǑO NDÁKA̱XIN JEHOVÁ NA̱ YIVÍ

13. ¿Ndáa ki̱ʼva náʼa̱ Jehová ña̱ kǒo ndáka̱xinra na̱ yiví?

¹³ Sava na̱ ñaniyó xíʼin ku̱ʼvayó ndóona nu̱ú níndichi Betel ña̱ Estados Unidos á savatuna íyona yatin nu̱ú íyo Betel ña̱ íyo inkaka ñuu. Ta savana káchíñuna Betel ta ku̱a̱ʼání chiñu kéʼéna, savana nda̱a̱ chíndeétáʼanna xíʼin na̱ Cuerpo Gobernante. Íyotu na̱ kúú superintendente ña̱ circuito á kéʼéna inkaka chiñu nu̱ú Jehová. Soo, ku̱a̱ʼání na̱ ñaniyó xíʼin ku̱ʼvayó kǒo kéʼéna táʼan chiñu yóʼo. Tá kǒo káchíñún Betel, á kǒo káchíñún nu̱ú Jehová ndiʼi tiempo kǒo kundi̱ʼi̱-iniún saáchi kúʼvi̱-inira xínira yóʼó, ndákiʼinra yóʼó ti̱xin veʼera ta saátu ndáara yóʼó (1 Ped. 5:7). Ndiʼi tiempo kundaa Jehová ndiʼi na̱ ñuura, taxira ña̱ sakúaʼana xa̱ʼa̱ra ta kuniʼira yichi̱ nu̱úna.

14. ¿Nda̱chun káʼa̱nyó ña̱ kǒo ndáka̱xin Jehová na̱ yiví?

¹⁴ Inka ki̱ʼva ña̱ náʼa̱ Jehová ña̱ kǒo ndáka̱xinra na̱ yiví kúú ña̱ xa̱a̱ ku̱a̱ʼání nu̱ú tu̱ʼun íyo ña̱ Biblia ña̱ va̱ʼa kunda̱a̱-ini ndiʼi na̱ yiví xa̱ʼa̱ra. Tá tiempo xi̱naʼá tu̱ʼun Ndióxi̱ ni̱ka̱ʼyi̱ña tu̱ʼun hebreo, arameo xíʼin griego. Soo, ¿á nda̱saa na̱ xíni̱ kaʼvi tu̱ʼun hebreo, arameo xíʼin griego kúú na̱ kivi kuyatin nu̱ú Jehová? Va̱ásaví (Mat. 11:25).

15. Ka̱ʼa̱n xa̱ʼa̱ inka ki̱ʼva ña̱ kǒo ndáka̱xin Jehová na̱ yiví (Koto na̱ʼná).

 ¹⁵ Kúsi̱íva-ini Jehová xíʼinyó ni kǒo níkaʼvi va̱ʼayó escuela á ni kǒo xíni̱yó ka̱ʼa̱nyó tu̱ʼun ña̱ ni̱ka̱ʼyi̱ Biblia xi̱naʼá. Su̱ví iinlá na̱ yiví na̱ ka̱ʼvi va̱ʼa táxi Jehová ña̱ ndíchi ndaʼa̱ chi saátu táxiraña ndaʼa̱ ndiʼi na̱ yiví na̱ íyo nu̱ú ñuʼú yóʼo, ni ka̱ʼvina á kǒo níkaʼvi va̱ʼana. Xa̱a̱ ku̱a̱ʼání nu̱ú tu̱ʼun kána ña̱ Biblia, ña̱kán ndiʼi na̱ yiví kivi xa̱a̱na sakúaʼana ña̱ va̱xi nu̱ú ña̱ Biblia ta koona migo Ndióxi̱ (2 Tim. 3:​16, 17).

NÁ KǑO SANDÁKOOYÓ ÑA̱ KOOYÓ MIGO JEHOVÁ

16. ¿Ndáana ndákiʼin Jehová veʼera? (Hechos 10:​34, 35).

¹⁶ Kúsi̱íní-iniyó xa̱ʼa̱ ña̱ kúúyó migo Jehová. Kǒo nda̱a̱ ni iin Ndióxi̱ íyo nda̱a̱ táki̱ʼva íyo Jehová, saáchi kúʼvi̱ní-inira xínira miíyó, va̱ʼaní-inira xíʼinyó ta va̱ʼa ndákiʼinra ndiʼina veʼera chi kǒo ndáka̱xinrana, kúúna ta̱a, ñaʼá, na̱ va̱lí, na̱ xa̱a̱ chée, na̱ ndáʼvi á na̱ ku̱i̱ká, na̱ ka̱ʼvi va̱ʼa á na̱ kǒo níkaʼvi va̱ʼa, ni ndóona ñuu sáʼán á ñuu ndáʼvi. Iinlá ña̱ káʼa̱nra xíʼin na̱ kíʼvi veʼera kúú ña̱ kuniso̱ʼona ta keʼéna ña̱ káʼa̱nra xíʼinna (kaʼvi Hechos 10:​34, 35).

17. ¿Ndáaña sakúaʼayó nu̱ú inka artículo?

¹⁷ Nu̱ú ña̱ Salmo 15:​1, ta̱ David ni̱ka̱ʼa̱nra: “Jehová Ndióxi̱ miíi̱, ¿ndáana kúú na̱ kivi koo veʼún? Ta, ¿ndáana kivi koo yuku̱ ña̱ yi̱i̱ní nu̱ú íyoún?”. Tándi̱ʼi, Jehová xi̱niñúʼura espíritu santora ña̱ va̱ʼa chindeétáʼanra xíʼin ta̱ David ña̱ kunda̱a̱-inira ndáana kivi koo veʼera. Nu̱ú inka artículo sakúaʼayó ndáaña xíniñúʼu keʼéyó ña̱ va̱ʼa kooyó veʼe Jehová.