1. ¿Ndáaña chindeétáʼan xíʼinyó ña̱ kǒo sandákooyó ña̱ ndasakáʼnuyó Jehová ni yáʼayó nu̱ú ku̱a̱ʼání tu̱ndóʼo?

 BIBLIA káʼa̱nña ña̱ yo̱ʼvi̱ní tiempo ña̱ ndóoyó vitin (2 Tim. 3:1). Ndiʼi na̱ yiví yáʼa nu̱ú tu̱ndóʼo tiempo vitin, ta saátu miíyó na̱ testigo Jehová yáʼayó nu̱ú tu̱ndóʼo, soo su̱ví ña̱yóʼo kuití ndóʼoyó chi saátu íxandi̱va̱ʼana xíʼinyó xa̱ʼa̱ ña̱ ndásakáʼnuyó Ndióxi̱. Ña̱kán, ¿ndáaña kivi chindeétáʼan xíʼinyó ña̱ kǒo sandákooyó ña̱ ndasakáʼnuyó Jehová? Iin ña̱ chindeétáʼan xíʼinyó kúú ña̱ ndakaʼányó ña̱ ndásakáʼnuyó Ndióxi̱ ta̱ táku (Jer. 10:10; 2 Tim. 1:12).

2. ¿Ndáa ki̱ʼva náʼa̱ Jehová ña̱ kúúra Ndióxi̱ táku?

² Ndióxi̱ ta̱ táku kúú Jehová, ña̱kán kíʼinra kuenta xíʼinyó tá yáʼayó nu̱ú tu̱ndóʼo ta ndúkúra ki̱ʼva ña̱ chindeétáʼanra xíʼinyó (2 Crón. 16:9; Sal. 23:4). Xa̱ʼa̱ ña̱ kúnda̱a̱-iniyó ña̱ kúúra Ndióxi̱ táku, ña̱yóʼo chíndeétáʼan xíʼinyó ña̱ kundeé-iniyó ya̱ʼayó nu̱ú tu̱ndóʼo. Ná kotoyó ndáa ki̱ʼva chi̱ndeétáʼanra xíʼin ta̱ rey David.

3. ¿Ndáaña xi̱kuni̱ kachi ta̱ rey David tá ni̱ka̱ʼa̱nra “ta̱ táku kúú Jehová”?

³ Ta̱ rey David xi̱ndaaní-inira Jehová, ña̱kán ni̱ka̱ʼa̱nra xíʼinra ña̱ chindeétáʼanra xíʼinra tá xi̱kuni̱ ta̱ rey Saúl xíʼin inkaka na̱ yiví kaʼnínara (Sal. 18:6). Tá xi̱nira ña̱ chi̱ndeétáʼan Jehová xíʼinra saá ni̱ka̱ʼa̱nra: “Ta̱ táku kúú Jehová” (Sal. 18: 46). Iin tutu káʼa̱nña xa̱ʼa̱ ña̱ ni̱ka̱ʼa̱n ta̱ David, ña̱yóʼo káchiña: “Tá ni̱ka̱ʼa̱n ta̱ David tu̱ʼun yóʼo ni̱na̱ʼa̱ra ña̱ kándíxaníra ña̱ chíndeétáʼan Ndióxi̱ xíʼin na̱ ñuura chi iin Ndióxi̱ táku kúúra”. Ta̱ David xi̱tora ña̱ chi̱ndeétáʼan Jehová xíʼinra ta xi̱kandíxaníra ña̱ iin Ndióxi̱ táku kúú Jehová, ta ta̱xira ndee̱ ndaʼa̱ra ña̱ ndasakáʼnurara ta saátu ña̱ kachíñura nu̱úra (Sal. 18:​28, 29, 49).

4. ¿Ndáaña va̱ʼa ndákiʼinyó xa̱ʼa̱ ña̱ ndásakáʼnuyó Ndióxi̱ ta̱ táku?

⁴ Ña̱ chindeétáʼan xíʼinyó ña̱ kusi̱í-iniyó ndasakáʼnuyó Jehová kúú ña̱ ndakaʼányó ña̱ kúúra Ndióxi̱ ta̱ táku. Miíra taxi ndee̱ ndaʼa̱yó ña̱ ya̱ʼayó nu̱ú nda̱a̱ ndáaka tu̱ndóʼo ta chindeétáʼanra xíʼinyó ña̱ kachíñuyó nu̱úra, ta saátu chindeétáʼanra xíʼinyó ña̱ kǒo kuxíkayó nu̱úra.

NDIÓXI̱ TAXI NDEE̱ NDAʼÚN

5. ¿Ndáaña chindeétáʼan xíʼinyó ya̱ʼayó nu̱ú tu̱ndóʼo? (Filipenses 4:13).

⁵ Kivi ya̱ʼayó nu̱ú nda̱a̱ ndáaka tu̱ndóʼo chi ndásakáʼnuyó Ndióxi̱ ta̱ táku. Jehová kúú ta̱ kúúmií ndiʼi ndee̱, ña̱kán kǒo ña̱ kivi kasi nu̱úra ña̱ chindeétáʼanra xíʼinyó (kaʼvi Filipenses 4:13). Kándíxayó ña̱ chindeétáʼanra xíʼinyó ya̱ʼayó nu̱ú tu̱ndóʼo. Tá xítoyó ña̱ chíndeétáʼan Jehová xíʼinyó tá yáʼayó nu̱ú tu̱ndóʼo, ña̱yóʼo chindeétáʼan xíʼinyó ña̱ kǒo kaka-iniyó ña̱ chindeétáʼanvara xíʼinyó tá ná kixi tu̱ndóʼo ña̱ ndeéka nu̱úyó.

6. ¿Ndáaña chi̱ndeétáʼan xíʼin ta̱ David ña̱ kandíxakara Jehová?

⁶ Ná ka̱ʼa̱nyó xa̱ʼa̱ u̱vi̱ ña̱ʼa ña̱ ndo̱ʼo ta̱ rey David ta ña̱yóʼo chi̱ndeétáʼan xíʼinra ña̱ ka̱ndíxakara Jehová. Tá ni̱xi̱yo loʼo ta̱ David xi̱ndaara ndikachi sa̱na̱ yivára, soo iin yichi̱ ni̱xa̱a̱ iin tí león ta ki̱ʼinrí tíyóʼo ku̱a̱ʼa̱n xíʼinrí, inka yichi̱ ni̱xa̱a̱ iin tí oso ta ki̱ʼinrí iin ndikachi ku̱a̱ʼa̱n xíʼinrí. Ndakúní ni̱xi̱yo ini ta̱ David ta xa̱ʼníra tí león ta saátu tí oso tasaá sa̱kǎkura ndikachi válí sa̱na̱ra. Xi̱kunda̱a̱-inira ña̱ mií Jehová chi̱ndeétáʼan xíʼinra ña̱ xa̱ʼníra tíyóʼo, ña̱kán nda̱sakáʼnura Jehová (1 Sam. 17:​34-37). Kǒo nínandósó-ini ta̱ David xa̱ʼa̱ ña̱ ndo̱ʼora, ña̱kán xi̱kandíxaníra ña̱ chindeétáʼanva Jehová xíʼinra tá ná ya̱ʼara nu̱ú inkaka tu̱ndóʼo.

7. ¿Ndáaña nda̱kanixi̱ní ta̱ David xa̱ʼa̱, ta ndáa ki̱ʼva chi̱ndeétáʼanña xíʼinra?

⁷ Tá ni̱xi̱yo loʼo ta̱ David ni̱xa̱ʼa̱nra nu̱ú xi̱ndoo na̱ soldado na̱ ñuu Israel ta xi̱nira ña̱ ndeéní yíʼvina saáchi ta̱ Goliat ndeéní xi̱ka̱ʼa̱nra: “Chindaʼándó iin ta̱a ta ná kixira kanitáʼanra xíʼi̱n” (1 Sam. 17:​10, 11). Na̱ soldado kán xi̱yiʼvína saáchi xi̱nina ña̱ súkunní ta̱ Goliat, ta saátu ku̱a̱ʼání ña̱ va̱ása va̱ʼa xi̱ka̱ʼa̱nra xíʼinna (1 Sam. 17:​24, 25). Soo ta̱ David kǒo níyi̱ʼvíra saáchi nda̱kanixi̱níra ña̱ xíʼin mií Jehová xi̱ka̱ʼa̱n ta̱ Goliat tu̱ʼun kán (1 Sam. 17:26). Ta̱ David xi̱ndakanixi̱níra xa̱ʼa̱ Jehová ta ka̱ndíxara ña̱ chindeétáʼanra xíʼinra nda̱a̱ táki̱ʼva ke̱ʼéra tá xa̱ʼníra tí oso ta saátu tí león. Xi̱ndaaní-inira Jehová ta ni̱xa̱ʼa̱nra ka̱nitáʼanra xíʼin ta̱ Goliat ta ku̱chiñuvara xa̱ʼnírara (1 Sam. 17:​45-51).

8. ¿Ndáaña chindeétáʼan xíʼinyó ña̱ kandíxakayó Jehová tá yáʼayó nu̱ú tu̱ndóʼo ña̱ yo̱ʼvi̱ní? (Koto na̱ʼná).

⁸ Iin ña̱ chindeétáʼan xíʼinyó ña̱ kundeé-iniyó ya̱ʼayó nu̱ú tu̱ndóʼo kúú ña̱ ndakaʼányó xa̱ʼa̱ ña̱ ke̱ʼé ta̱ David. Xíniñúʼu ndakaʼányó ña̱ ndásakáʼnuyó Ndióxi̱ ta̱ táku (Sal. 118:6). Ta kivi keʼéyó ña̱yóʼo tá ná ndakaʼányó xa̱ʼa̱ ki̱ʼva ña̱ xa̱a̱ chi̱ndeétáʼan Jehová xíʼinyó tá ya̱chi̱, tá kúú kaʼvi ña̱ káʼa̱n ndáa ki̱ʼva sa̱káku Jehová na̱ ñuura tá ya̱chi̱ (Is. 37:​17, 33-37). Ta saátu kaʼvi ña̱ kána nu̱ú jw.org ña̱ káʼa̱n ndáa ki̱ʼva chíndeétáʼan Jehová xíʼin na̱ ñuura, saátu ndakaʼán ndáa ki̱ʼva  xa̱a̱ chíndeétáʼan Jehová xíʼún tá yáʼún nu̱ú tu̱ndóʼo. Sana miíyó kǒo níndoʼoyó nda̱a̱ táki̱ʼva ndo̱ʼo ta̱ David, soo sana xa̱a̱ ku̱a̱ʼáníva ki̱ʼva chíndeétáʼan Jehová xíʼinyó ta saátu kúúyó migora (Juan 6:44). Miíra ka̱na yóʼó ña̱ kundika̱ún ñuura, ña̱kán ka̱ʼa̱n xíʼinra ná chindeétáʼanra xíʼún ña̱ ndakaʼún xa̱ʼa̱ ki̱vi̱ ña̱ nda̱kuiinra oración ña̱ ke̱ʼún nu̱úra tá ni̱ya̱ʼún nu̱ú tu̱ndóʼo ña̱ yo̱ʼvi̱ní. Tá ná ndakanixi̱níún xa̱ʼa̱ ndiʼi ña̱ kéʼé Jehová xa̱ʼún, ña̱yóʼo chindeétáʼan xíʼún ña̱ kandíxaníkaúnra.

9. ¿Ndáaña kivi keʼéyó tá yáʼayó nu̱ú tu̱ndóʼo? (Proverbios 27:11).

⁹ Tá yáʼayó nu̱ú tu̱ndóʼo xíniñúʼu ndakaʼányó ndáaña kúú ña̱ ndáyáʼvika. Ta̱ Ndi̱va̱ʼa káʼa̱nra ña̱ tá ná ya̱ʼayó nu̱ú tu̱ndóʼo saá kúú ña̱ sandákooyó ña̱ ndasakáʼnuyó Jehová. Ña̱kán, tá kúndeé-iniyó yáʼayó nu̱ú iin tu̱ndóʼo saá kúú ña̱ sákusi̱íníyó-ini Jehová (Job 1:​10, 11; kaʼvi Proverbios 27:11). a Tá nda̱kú íyo iniyó xíʼin Jehová saá kúú ña̱ kúʼvi̱-iniyó xíniyóra ta saátu náʼa̱yó nu̱ú ta̱ Ndi̱va̱ʼa ña̱ su̱ví ña̱ ndixa kúú ña̱ káʼa̱nra. Soo, ¿á sási na̱ chíñu nu̱ún ña̱ natúʼún xa̱ʼa̱ Ndióxi̱? ¿Á kúma̱ní xu̱ʼún nu̱ún? ¿Á kǒo xíín na̱ yiví kuniso̱ʼona ña̱ nátúʼún tá ku̱a̱ʼún predicación? ¿Á yáʼún nu̱ú inkaka tu̱ndóʼo? Tá yáʼún nu̱ú ndiʼi ña̱yóʼo kivi nda̱kú koo iniún xíʼin Jehová tasaá sakúsi̱íún-inira, saáchi chindeétáʼanvara xíʼinyó ya̱ʼayó nu̱ú tu̱ndóʼo (1 Cor. 10:13). Mií Jehová taxi ndee̱ ndaʼún ña̱ kundeé-iniún.

NDIÓXI̱ TA̱ TÁKU TAXIRA KU̱A̱ʼÁNÍ BENDICIÓN NDAʼÚN

10. ¿Ndáaña keʼé Ndióxi̱ ta̱ táku xa̱ʼa̱ na̱ ndásakáʼnu miíra?

¹⁰ Jehová táxira bendición ndaʼa̱ na̱ ndásakáʼnu miíra (Heb. 11:6). Ndióxi̱ chindeétáʼanra xíʼinyó ña̱ kǒo ndi̱ʼi̱-iniyó, ta saátu ña̱ kusi̱í-iniyó, ta chí nu̱únínu taxira kutakuyó ndiʼi tiempo. Kúnda̱a̱-iniyó ña̱ kúni̱ra taxira bendición ndaʼa̱yó, ta kúúmiívara ndee̱ ña̱ keʼéraña. Ña̱yóʼo chíndeétáʼan xíʼinyó ña̱ kachíñuyó nu̱ú Jehová nda̱a̱ táki̱ʼva ke̱ʼé na̱ xi̱ndasakáʼnu  miíra tá xi̱naʼá. Ná ka̱ʼa̱nyó xa̱ʼa̱ ña̱ ndo̱ʼo ta̱ Timoteo (Heb. 6:​10-12).

11. ¿Ndáana chi̱ndeétáʼan xíʼin ta̱ Timoteo ña̱ viíní ke̱ʼéra chiñu ña̱ ta̱xina ndaʼa̱ra? (1 Timoteo 4:10).

¹¹ (Kaʼvi 1 Timoteo 4:10). Ta̱ Timoteo ka̱ndíxara ña̱ káʼa̱n Jehová ta saátu kǒo níxi̱ka-inira ña̱ taxira ku̱a̱ʼání bendición ndaʼa̱ra. Ña̱kán va̱ʼaní ka̱chíñura nu̱ú Jehová ta va̱ʼaní chi̱ndeétáʼanra xíʼin na̱ hermano. ¿Ndáaña ke̱ʼéra? Ta̱ apóstol Pablo ni̱ka̱ʼa̱nra xíʼinra ña̱ viíka sanáʼa̱ra na̱ yiví ta viíka taxira discurso, ni̱ka̱ʼa̱ntura xíʼinra ña̱ chinúura iin ejemplo ña̱ va̱ʼaní nu̱ú na̱ va̱lí xíʼin nu̱ú na̱ xa̱a̱ chée. Saátu ni̱ka̱ʼa̱nra xíʼinra ña̱ xi̱niñúʼu viíní taxira consejo ndaʼa̱ na̱ hermano soo xi̱niñúʼu káxiní ka̱ʼa̱nra xíʼinna (1 Tim. 4:​11-16; 2 Tim. 4:​1-5). Ni kǒo níxi̱xito inkana chiñu ña̱ xi̱keʼé ta̱ Timoteo, soo xi̱kunda̱a̱va-inira ña̱ xi̱kiʼinva Jehová kuenta xíʼin ña̱yóʼo (Rom. 2:​6, 7).

12. ¿Ndáaña chindeétáʼan xíʼin na̱ anciano ña̱ va̱ʼaní keʼéna chiñu ña̱ ta̱xi Ndióxi̱ ndaʼa̱na? (Koto na̱ʼná).

¹² Nda̱a̱ táki̱ʼva ke̱ʼé ta̱ Timoteo saátu kéʼé na̱ anciano tiempo vitin, chi kúnda̱a̱-inina ña̱ ndáyáʼviní chiñu ña̱ kéʼéna nu̱ú Jehová. Ku̱a̱ʼání chiñu kéʼé na̱ anciano saáchi sánáʼa̱na ti̱xin congregación, kéena predicación, ta saátu savana chíndeétáʼan nu̱ú kúva̱ʼa veʼe nu̱ú ndásakáʼnuyó Ndióxi̱. Savana chíndeétáʼanna xíʼin na̱ hermano na̱ yáʼa nu̱ú tu̱ndóʼo, savana ñúʼuna ti̱xin grupo na̱ xáʼa̱n xíto na̱ ki̱ʼin kue̱ʼe̱, ta inkatuna ñúʼuna xíʼin na̱ Comité ña̱ Enlace xíʼin ña̱ Hospital. Na̱ anciano xíni̱na ña̱ kuenta Jehová kúú ndiʼi na̱ ñaniyó xíʼin ku̱ʼvayó, xa̱ʼa̱ ña̱kán chíkaa̱na ndee̱ ña̱ viíní keʼéna chiñu ña̱ ta̱xi Jehová ndaʼa̱na. Ta kúnda̱a̱-inina ña̱ ku̱a̱ʼání ña̱ va̱ʼa taxira ndaʼa̱na chí nu̱únínu (Col. 3:​23, 24).

13. ¿Ndáa ki̱ʼva kúni Jehová tá chíkaa̱yó ndee̱ ña̱ ndasakáʼnuyóra?

¹³ Su̱ví ndiʼivíyó kivi koo anciano, soo ndiʼivayó kivi kachíñu nu̱ú Jehová. Ndáyáʼviní ña̱ kéʼún nu̱ú Jehová ta kúsi̱íní-inira tá táxiún donación ni túviún ña̱ loʼoní kúúña. Sana  yíʼviníún taxiún comentario soo kúsi̱íní-inira tá xítora ña̱ ndániʼún ndaʼún ña̱ taxiúnña, ta saátu kúsi̱íní-inira tá íxakáʼnu-iniún xa̱ʼa̱ na̱ ke̱ʼé ña̱ va̱ása va̱ʼa xíʼún. Ni túviún ña̱ loʼoní ña̱ kéʼún xa̱ʼa̱ Jehová, soo nu̱ú miíra ndáyaʼvíniña. Kúni̱níra xínira yóʼó ta ku̱a̱ʼání bendición taxira ndaʼún xa̱ʼa̱ ña̱yóʼo (Luc. 21:​1-4).

KǑO KUXIKAYÓ NU̱Ú NDIÓXI̱ TA̱ TÁKU

14. ¿Ndáaña chindeétáʼan xíʼinyó ña̱ nda̱kú koo iniyó xíʼin Jehová? (Koto na̱ʼná).

¹⁴ Tá kándíxayó ña̱ kúú Jehová iin Ndióxi̱ ta̱ táku, saá kǒo ixayo̱ʼvi̱ña xíʼinyó nda̱kú koo iniyó xíʼinra. Ña̱yóʼo kúú ña̱ ke̱ʼé ta̱ José chi nda̱kaʼánra ña̱ ndásakáʼnura Ndióxi̱ ta̱ táku ta ña̱yóʼo chi̱ndeétáʼan xíʼinra ña̱ kǒo níkeʼéra ña̱ kini (Gén. 39:9). Ña̱ va̱ʼa ndakaʼányó ña̱ ndásakáʼnuyó Ndióxi̱ ta̱ táku xíniñúʼu taváyó tiempo ña̱ ka̱ʼa̱nyó xíʼinra ta saátu ña̱ kaʼviyó tu̱ʼunra, tasaá va̱ʼaníka kitáʼanyó xíʼinra. Ña̱kán, tá viíní kítáʼanyó xíʼin Jehová nda̱a̱ táki̱ʼva ke̱ʼé ta̱ José saá kúú ña̱ kǒo keʼéyó ni iin ña̱ʼa ña̱ kǒo kútóora (Sant. 4:8).

15. ¿Ndáaña sákuaʼayó xíʼin ña̱ ke̱ʼé na̱ israelita na̱ ni̱xi̱yo nu̱ú ñuʼú yi̱chí? (Hebreos 3:12).

¹⁵ Na̱ nándósó-ini ña̱ kúú Jehová iin Ndióxi̱ ta̱ táku kivi xa̱a̱na kuxíkána nu̱úra. Ná ka̱ʼa̱nyó xa̱ʼa̱ ña̱ ndo̱ʼo na̱ israelita tá ni̱xi̱yona nu̱ú ñuʼú yi̱chí. Xi̱kunda̱a̱va-inina ña̱ iin Ndióxi̱ táku kúú Jehová, soo ki̱xáʼa xíka-inina chi nda̱kanixi̱nína ña̱ kǒo taxira ña̱ xíniñúʼuna, ña̱kán ni̱ka̱ʼa̱nna ña̱yóʼo: “¿Á íyo Jehová xíʼinyó á kǒovira íyo xíʼinyó?” (Éx. 17:​2, 7). Tándi̱ʼi, kǒo níxiinkana kuniso̱ʼona ña̱ xi̱kaʼa̱n Jehová xíʼinna. Ña̱kán, miíyó kǒo kúni̱yó keʼéyó nda̱a̱ táki̱ʼva ke̱ʼé na̱kán (kaʼvi Hebreos 3:12).

16. ¿Nda̱chun kivi kixáʼa kaka-iniyó?

¹⁶ Ndiʼi ña̱ íyo nu̱ú ñuʼú yóʼo kǒo chíndeétáʼanña xíʼinyó ña̱ kuyatinyó nu̱ú Jehová. Ku̱a̱ʼání na̱ yiví káʼa̱nna ña̱ kǒo Ndióxi̱ íyo, ta  saátu xítoyó ña̱ va̱ʼaní íyo na̱ kǒo ndásakáʼnu Jehová, ta xa̱ʼa̱ ña̱yóʼo sana kivi kixáʼa kaka-iniyó. Kándíxavayó ña̱ íyo Ndióxi̱, soo sana kivi ndakanixi̱níyó ña̱ kǒo chíndeétáʼanvíra xíʼinyó. Saá kúú ña̱ ndo̱ʼo ta̱ ka̱ʼyí ña̱ Salmo 73, saáchi xi̱nira ña̱ va̱ʼaní íyo na̱ kǒo ndásakáʼnu Jehová, ña̱kán nda̱kanixi̱níra ña̱ kǒo xíniñúʼuví nda̱kú koo inira xíʼin Jehová (Sal. 73:​11-13).

17. ¿Ndáaña chindeétáʼan xíʼinyó ña̱ nda̱kú koo iniyó xíʼin Jehová?

¹⁷ ¿Ndáaña chi̱ndeétáʼan xíʼin ta̱ salmista ña̱ kǒo ndakanikaxi̱níra táki̱ʼva xi̱ndakanixi̱níra tá ya̱chi̱? Ña̱ chi̱ndeétáʼan xíʼinra kúú ña̱ nda̱kaʼánra xa̱ʼa̱ ña̱ kundoʼo na̱ yiví na̱ kúxíká nu̱ú Jehová (Sal. 73:​18, 19, 27). Saátu nda̱kanixi̱níra xa̱ʼa̱ ña̱ va̱ʼa ña̱ ndákiʼinra xa̱ʼa̱ ña̱ ndásakáʼnura Jehová (Sal. 73:24). Ta saátu miíyó kivi ndakanixi̱níyó xa̱ʼa̱ ndiʼi bendición ña̱ xa̱a̱ táxi Jehová ndaʼa̱yó, saáchi kǒo nda̱a̱ ni iin ña̱yóʼo ndakiʼinyó tá kǒo ndásakáʼnuyóra. Tá ná keʼéyó ña̱yóʼo saá kúú ña̱ ndiʼi tiempo nda̱kú koo iniyó xíʼin Jehová ta saátu kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ salmista: “Soo nu̱ú miíi̱ ña̱ va̱ʼa kúú ña̱ kuyatii̱n nu̱ú Ndióxi̱” (Sal. 73:28).

18. ¿Nda̱chun kǒo xíniñúʼu yi̱ʼvíyó tá ná kixi ña̱ gran tribulación?

¹⁸ Kiviva ya̱ʼayó nu̱ú nda̱a̱ ndáaka tu̱ndóʼo ña̱ kixi nu̱úyó saáchi ndásakáʼnuyó Ndióxi̱ ta̱ táku (1 Tes. 1:9). Ndiʼi tiempo ndíʼi̱-ini Jehová xa̱ʼa̱yó ta kúni̱ra chindeétáʼanra xíʼinyó. Nu̱ú si̱lóʼoní tiempo kixi ña̱ gran tribulación soo chindeétáʼanva Jehová xíʼinyó (Is. 41:10). Ña̱kán kǒo xíniñúʼu kaka-iniyó, ta ná ka̱ʼa̱nyó tu̱ʼun yóʼo: “Jehová kúú ta̱ chindeétáʼan xíʼi̱n. Va̱ása yi̱ʼvíi̱” (Heb. 13:​5, 6).