Pregunta ña̱ kéʼé na̱ káʼvi tutu yóʼo
Nu̱ú Salmo 12:7 káchiña: “Yóʼó kundaúnna”. ¿Ndáaña kúni̱ kachi tu̱ʼun yóʼo? ¿Á xa̱ʼa̱ na̱ xóʼvi̱ káʼa̱nña (versículo 5)? ¿Á xa̱ʼa̱ tu̱ʼun ña̱ ni̱ka̱ʼa̱n Jehová káʼa̱nña (versículo 6)?
Ña̱ káʼa̱nka xa̱ʼa̱ ña̱yóʼo chíndeétáʼanña xíʼinyó kunda̱a̱-iniyó ña̱ xa̱ʼa̱ na̱ yiví káʼa̱n versículo yóʼo.
Nu̱ú ña̱ Salmo 12:1-4 káʼa̱nña ña̱ kǒoka na̱ yiví va̱ʼa íyo. Ná ka̱ʼa̱nyó xa̱ʼa̱ sava versículo ña̱ kítáʼan xíʼin pregunta ña̱ xa̱a̱ ni̱ka̱ʼa̱nyó xa̱ʼa̱ ña̱ va̱xi nu̱ú Salmo 12:5-7.
“‘Xa̱’a̱ ña̱ xóʼvi̱ na̱ yiví,
xa̱ʼa̱ ña̱ kúsuchí-ini na̱ ndáʼvi,
chindeétáʼi̱n xíʼinna’, káchi Jehová.
‘Sakákui̱na nu̱ú na̱ íxandi̱va̱ʼa xíʼinna’.
Nina ña̱ nda̱a̱ káʼa̱n Jehová;
nda̱a̱ táki̱ʼva íyo plata ña̱ va̱ʼaní ña̱ chi̱kaa̱na 7 yichi̱ ini horno ña̱ ku̱vaʼa xíʼin nda̱ʼyi̱ saá íyona.
Yóʼó kundaúnna, Jehová;
yóʼó kixáʼún kundaún iin tá iin se̱ʼena tiempo vitin, ta ndiʼi tiempo kundaúnna”.
Nu̱ú versículo 5 káʼa̱nña xa̱ʼa̱ Jehová ña̱ sakákura na̱ yiví na̱ xóʼvi̱.
Ta versículo 6 káchiña: “Nina ña̱ nda̱a̱ káʼa̱n Jehová; nda̱a̱ táki̱ʼva íyo plata ña̱ va̱ʼaní saá íyo ña̱ káʼa̱nra”. Ta ndiʼi miíyó na̱ ndásakáʼnu Jehová kándíxayó ña̱ káʼa̱n tu̱ʼun yóʼo (Sal. 18:30; 119:140).
Ná kotoyó ña̱ káʼa̱n Salmo 12:7: “Yóʼó kundaúnna, Jehová; yóʼó kixáʼún kundaún iin tá iin se̱ʼena tiempo vitin, ta ndiʼi tiempo kundaúnna”.
Savana ká’a̱nna ña̱ nu̱ú versículo 7 káʼa̱nña xa̱ʼa̱ tu̱ʼun Jehová. Saáchi xíni̱yó ña̱ xa̱a̱ ku̱a̱ʼání tiempo kúni̱ na̱ sáa̱-ini xíni̱ Jehová sandíʼi-xa̱ʼa̱na Biblia, soo Jehová kǒo táxira keʼéna ña̱yóʼo chi sáka̱kura tu̱ʼunra (Is. 40:8; 1 Ped. 1:25).
Ta ña̱ versículo 5 káʼa̱nña xa̱ʼa̱ Jehová ña̱ xa̱a̱ “sa̱kákura na̱ xóʼvi̱” ta kǒo sandákoora keʼéraña (Job 36:15; Sal. 6:4; 31:1, 2; 54:7; 145:20).
Tásaá, ¿ndáaña káʼa̱n versículo 7 xa̱ʼa̱?
Versículo ña̱ kítáʼan xíʼin ña̱yóʼo chíndeétáʼanña xíʼinyó kunda̱a̱-iniyó ña̱ xa̱ʼa̱ na̱ yiví káʼa̱nña.
Nu̱ú ña̱ Salmo 12:1 xí’in 2 káʼa̱nña ña̱ ni̱xi̱yoní na̱ yiví na̱ xi̱kaʼa̱n ña̱ vatá xa̱ʼa̱ na̱ yiví na̱ kéʼé ña̱ va̱ʼa. Ña̱kán, Jehová ndatiinra ku̱a̱chi xíʼin na̱ káʼa̱n tu̱ʼun ña̱ va̱ása va̱ʼa. Ña̱ Salmo yóʼo chíndeétáʼanña xíʼinyó ña̱ kunda̱a̱-iniyó ña̱ mií Ndióxi̱ ndakiʼin tu̱ʼun na̱ ñuura, saáchi ndiʼi ña̱ káʼa̱nra ña̱ nda̱a̱ kúúña.
Ña̱kán, versículo 7 káchiña “yóʼó kundaúnna” ta “yóʼó kiʼún kuenta xíʼin iin tá iinna”, ña̱yóʼo káʼa̱nña xa̱ʼa̱ na̱ yiví na̱ xóʼvi̱ xa̱ʼa̱ ña̱ kéʼé na̱ ndi̱va̱ʼa-ini.
Nu̱ú Salmo 12:7 (11:8, Septuaginta) Ña̱ tu̱ʼun griego u̱vi̱ yichi̱ xíniñúʼuña ña̱ tu̱ʼun miíyó ña̱ ka̱ʼa̱nña xa̱ʼa̱ na̱ xóʼvi̱ xa̱ʼa̱ ña̱ kéʼé ña̱ va̱ʼa. Ta saátu versículo 7 xíʼin 8 káʼa̱nña xa̱ʼa̱ Jehová ña̱ ndáara “iin tá iin” na̱ nda̱kú íyo ini xíʼinra nu̱ú na̱ kéʼé ña̱ kini (Sal. 12:7, 8). Ña̱ tutu tárgum arameo siaʼa sándaya̱ʼaña versículo 7: “Yóʼó, TÁTA, kundaún na̱ va̱ʼa, ndiʼi tiempo kundaúnna nu̱ú na̱ kéʼé ña̱ kini. Na̱ kéʼé ña̱ kini íyona nda̱a̱ táki̱ʼva íyo kití tí xíʼi ni̱i̱ na̱ yiví”. Xíʼin ña̱yóʼo kúnda̱a̱-iniyó ña̱ xa̱ʼa̱ na̱ yiví káʼa̱n Salmo 12:7.
Versículo yóʼo va̱ʼaní chíndeétáʼanña xíʼin “na̱ nda̱kú íyo ini” xíʼin Ndióxi̱ saáchi miíra chindeétáʼan xíʼinna.
