1. ¿Ndáa ki̱ʼva xa̱a̱yó nduuyó na̱ ndíchi, ta nda̱saa chíndeé ña̱ ndíchi yóʼo miíyó?

JEHOVÁ kúú ta̱ kúúmií ña̱ ndíchi. Ta va̱ʼaní inira chi táxiraña ndaʼa̱ ndiʼiyó. Santiago 1:5 káchiña: “Ndáa ndóʼó kúma̱ní ña̱ ndíchi nu̱ú, ndakundeékandó ndukúndóña nu̱ú Ndióxi̱, chi ta̱yóʼo taxivaraña ndaʼa̱ndó”. Iin ña̱ va̱ʼa keʼéyó ña̱ nduuyó na̱ ndíchi kúúña ña̱ ndakiʼinyó consejo Jehová. Ña̱ ndíchi yóʼo chindeéña miíyó ña̱ kǒo keʼéyó ña̱ va̱ása va̱ʼa ta saátu ña̱ xa̱a̱yó kutáʼankayó xíʼin Jehová (Prov. 2:10-12). Ta va̱ʼa xa̱a̱yó kutakuyó ndiʼi tiempo (Jud. 21).

2. ¿Ndáaña chindeé miíyó ña̱ chindayáʼviyó consejo ña̱ táxi Ndióxi̱ ndaʼa̱yó?

² Xa̱ʼa ña̱ kúúyó na̱ yiví ku̱a̱chi, xa̱ʼa ña̱ síín sa̱kuaʼnuna miíyó á xa̱ʼa inkaka ña̱ʼa, sava íxayo̱ʼvi̱ña xíʼinyó ña̱ kandíxayó consejo chi ndákanixi̱níyó ña̱ va̱ása xíniñúʼuyóña. Soo tá xítoyó ña̱ va̱ʼaka ndóoyó tá kándíxayóña, kíxaʼáyó chíndayáʼvikayóña tasaá kúnda̱a̱-iniyó ña̱ táxi Ndióxi̱ ña̱yóʼo ndaʼa̱yó xa̱ʼa ña̱ kúʼvi̱-inira xínira miíyó. Proverbios 3:11, 12 káchiña: “Se̱ʼe miíi̱, consejo ña̱ táxi Jehová kǒo kundasíúnña”. Ta káchikaña: “Saáchi Jehová táxira consejo ndaʼa̱ na̱ kúʼvi̱-inira xínira”. Ná kǒo nandosóyó Jehová  kúni̱ra ña̱ va̱ʼa ná kundooyó (kaʼvi Hebreos 12:6, 11). * Xa̱ʼa ña̱ xíni va̱ʼa Jehová miíyó, consejo ña̱ táxira ndaʼa̱yó mií ña̱ xíniñúʼuyó kúúña. Nu̱ú artículo yóʼo ka̱ʼa̱nyó xa̱ʼa ku̱mí consejo: 1) ña̱ ka̱ʼnu̱-iniyó xíʼin ña̱ kéʼéyó, 2) consejo ña̱ táxi na̱ yiváyó, 3) consejo ña̱ ndákiʼinyó congregación xíʼin 4) íyo ña̱ yo̱ʼvi̱ka nu̱ú iin consejo.

3. Na̱ íyo se̱ʼe, ¿ndáa ki̱ʼva chindeéna se̱ʼena ña̱ va̱ʼa sakuaʼana ka̱ʼnu̱-inina xíʼin ña̱ kéʼéna? Ka̱ʼa̱n xa̱ʼa iin ejemplo.

³ Ña̱ ka̱ʼnu̱-iniyó xíʼin ña̱ kéʼéyó kúni̱ kachiña ka̱ʼnu̱yó miíyó nu̱ú ña̱ va̱ása va̱ʼa ta sakuaʼayó kuentaka kooyó xíʼin ña̱ kéʼéyó xíʼin ña̱ ndákanixi̱níyó. Nda̱a̱ ni iinyó va̱ása kákuyó ta xa̱a̱ xíniyó ka̱ʼnu̱-iniyó xíʼin ña̱ kéʼéyó, ña̱ xíniñúʼu sakuaʼayó xíʼin kúúña. Nda̱a̱ táki̱ʼva íyo iin ta̱ loʼo ta̱ sákuaʼa kosó bicicleta. Tá xa̱ʼa, sana iin na̱ yivára tíin bicicleta ña̱ va̱ʼa ná kǒo ndakavara. Soo tá xa̱a̱ ku̱a̱ʼa̱n sákuaʼa loʼora, loʼo loʼo sáñana bicicleta xíʼinra. Tá xa̱a̱ kíʼinna kuenta ña̱ va̱ása ndakavakara sáñanara. Saátu íyo na̱ sákuaʼnu se̱ʼe, tá kúee kúee sánáʼa̱nana xa̱ʼa Jehová táki̱ʼva kúni̱ miíra, na̱ va̱lí yóʼo xáa̱na ndúuna na̱ yiví ndíchi ta sakuaʼana ka̱ʼnu̱-inina xíʼin ña̱ kéʼéna (Efes. 6:4).

4, 5. a) ¿Nda̱chun ndáyáʼviní sakuaʼayó ka̱ʼnu̱-iniyó xíʼin ña̱ kéʼéyó? b) ¿Nda̱chun va̱ása xíniñúʼu ndakava-iniyó tá kéʼéyó iin ña̱ va̱ása va̱ʼa?

⁴ Ta saátu ndóʼo na̱ sákuaʼa xa̱ʼa Jehová tá xa̱a̱ chéena. Ni xa̱a̱ xíni̱na ka̱ʼnu̱ loʼo inina xíʼin ña̱ kéʼéna, soo ta̱ʼán kuaʼnu va̱ʼana xíʼin tu̱ʼun Ndióxi̱. Tá xa̱a̱ kíxaʼána násamana ña̱ kéʼéna chíka̱a̱na ndée ña̱ kundiku̱nna yichi̱ ta̱ Jesús, saá kúúña loʼo loʼo xáʼnuna ku̱a̱ʼa̱nna xíʼin tu̱ʼun Ndióxi̱ (Efes. 4:23, 24). Ndáyáʼviní ña̱ ka̱ʼnu̱-iniyó xíʼin ña̱ kéʼéyó chi chíndeéña miíyó ʻña̱ sandákooyó keʼéyó ña̱ kini xíʼin ña̱ kúni̱yó keʼéyó ña̱ íyo ñuyǐví yóʼo, chíndeétuña miíyó ña̱ vií ndakanixi̱níyó xa̱ʼa ña̱ keʼéyóʼ (Tito 2:12).

⁵ Soo ndiʼiyó kúúyó na̱ yiví ku̱a̱chi (Ecl. 7:20). Ña̱kán tá ná keʼéyó iin ña̱ va̱ása va̱ʼa kǒo kúni̱ kachiña ña̱ kǒo xíni̱yó ka̱ʼnu̱-iniyó xíʼin ña̱ kéʼéyó. Proverbios 24:16 káchiña: “Sana nda̱a̱ u̱xa̱ yichi̱ ndakava na̱ kéʼé ña̱ nda̱kú, soo ndakoovana”. ¿Nda̱chun va̱ʼa ndakoona? Su̱ví xíʼin ndée miína keʼéna ña̱yóʼo, chi espíritu santo Ndióxi̱ kúú ña̱ chindeé táʼan xíʼinna (kaʼvi Filipenses 4:13). * Iin ña̱ va̱ʼa ña̱ kúúmií espíritu santo kúú ña̱ ka̱ʼnu̱-iniyó xíʼin ña̱ kéʼéyó ta kítáʼanña xíʼin ña̱ xa̱a̱ káʼa̱nyó xa̱ʼa yóʼo.

6. ¿Ndáaña keʼéyó ña̱ va̱ʼa sakuaʼayó kaʼvi va̱ʼayó tu̱ʼun Ndióxi̱? (Koto na̱ʼná ña̱ va̱xi chí xa̱ʼa).

⁶ Ña̱ va̱ʼa sakuaʼayó ka̱ʼnu̱-iniyó xíʼin ña̱ kéʼéyó, xíniñúʼu ka̱ʼa̱nníyó xíʼin Ndióxi̱, kaʼviníyó Biblia ta ndakanixi̱níyó xa̱ʼa ña̱ káʼviyó. Soo, ¿ndáaña keʼún tá íxayo̱ʼvi̱ña xíʼún kaʼviún Biblia á kǒo kútóún kaʼviúnña? Va̱ása ndakava-iniún. Taxi ná chindeé táʼan Jehová xíʼún ña̱ xa̱ún kutóún sakuaʼún xa̱ʼa Biblia (1 Ped. 2:2). Siʼna ka̱ʼa̱n xíʼinra ña̱ ná chindeé táʼanra xíʼún ña̱ va̱ʼa kaʼvi ni̱ʼún tu̱ʼunra. Soo tándi̱ʼi ke̱ʼé ña̱ ni̱ka̱ʼún xíʼinra. Sana tá xa̱ʼa loʼo tá loʼovaña kixaʼún kaʼviún. Tasaá kúee kúee va̱ása yo̱ʼvi̱ka kooña nu̱ún ña̱ kaʼviún tu̱ʼunra, kixaʼá kutóoníún ña̱ kaʼviúnña xíʼin ña̱ ndakanixi̱níún xa̱ʼaña (1 Tim. 4:15).

7. Tá xáʼnu-iniyó xíʼin ña̱ kéʼéyó, ¿nda̱saa kivi chindeéña miíyó xa̱a̱yó ni̱ʼíyó ku̱a̱ʼáka chiñu ti̱xin ñuu Ndióxi̱?

⁷ Ña̱ ka̱ʼnu̱-iniyó xíʼin ña̱ kéʼéyó chindeé táʼanña xíʼinyó ña̱ xa̱a̱yó ni̱ʼíyó ku̱a̱ʼáka chiñu ti̱xin ñuu Ndióxi̱. Ná ka̱ʼa̱nyó xa̱ʼa iin ta̱ hermano ta̱ íyo se̱ʼe, ta̱yóʼo ki̱ʼinra kuenta ña̱ kǒo kúsi̱íka-inira natúʼunra xa̱ʼa tu̱ʼun Ndióxi̱. Ni̱ndi̱ʼi̱-inira xa̱ʼa ña̱yóʼo ta chi̱ka̱a̱-inira ña̱ xa̱a̱ra  kuura precursor regular. Ña̱ va̱ʼa keʼéra ña̱yóʼo, ki̱xaʼára káʼvira artículo ña̱ káʼa̱n xa̱ʼa na̱ precursor ta ni̱ka̱ʼa̱nra xíʼin Ndióxi̱ xa̱ʼa ña̱yóʼo. Tasaá ki̱xaʼá va̱ʼaka kítáʼanra xíʼin Ndióxi̱. Sava yichi̱ xi̱kuura precursor auxiliar. Kǒo nínandosóra xa̱ʼa ña̱ chi̱ka̱a̱ní-inira kuura precursor ta ni va̱ása nítaxira ña̱ kasi ni iin ña̱ʼa nu̱úra ña̱ xa̱a̱ra keʼéraña. ¿Ndáaña ku̱u? Ni̱ya̱ʼa tiempo ta ni̱xa̱a̱ra ku̱ura precursor regular.

8-10. a) ¿Ndáaña chindeé na̱ íyo se̱ʼe ña̱ va̱ʼa sakuaʼnuna se̱ʼena yichi̱ Jehová? b) ¿Ndáaña kivi sakuaʼa na̱ íyo se̱ʼe xíʼin ña̱ ke̱ʼé ta̱ Noé?

⁸ Na̱ íyo se̱ʼe kúúmiína iin chiñu káʼnu ña̱ sakuaʼnuna se̱ʼena “táki̱ʼva kúni̱ mií Jehová” (Efes. 6:4). Sana yo̱ʼvi̱ní ña̱yóʼo, chí kininí káa ñuyǐví nu̱ú ndóoyó (2 Tim. 3:1-5). Kǒo na̱ va̱lí káku ta xa̱a̱ xíni̱na ndáaña kúú ña̱ va̱ʼa xíʼin ña̱ va̱ása va̱ʼa, chi ta̱ʼán sakuaʼana ndakunina ña̱yóʼo. Kivi xa̱a̱na sakuaʼana tá ná taxina consejo ndaʼa̱na (Rom. 2:14, 15). Iin ta̱ xíni̱ xa̱ʼa Biblia káchira tu̱ʼun griego ña̱ káʼa̱n xa̱ʼa “consejo” kúni̱ kachiña ña̱ sanáʼa̱na na̱ va̱lí ña̱ va̱ʼa ná kuaʼnuna ta xa̱a̱na nduuna iin na̱ yiví va̱ʼa.

⁹ Tá táxina consejo ndaʼa̱ na̱ va̱lí kúnda̱a̱-inina ña̱ ndíʼi̱-ini na̱ yivána xa̱ʼana. Ta sákuaʼana ña̱ kǒo kívi keʼéna ndiʼi ña̱ kúni̱na chi kivi kixi tu̱ndóʼo nu̱úna. Ña̱kán ndáyáʼviní ña̱ ná ndukú na̱ íyo se̱ʼe yichi̱ nu̱ú Jehová ña̱ va̱ʼa sakuaʼnuna se̱ʼena. Ná ndakaʼányó chi tá yáʼa tiempo xa̱a̱ síín síín sákuaʼnu savana se̱ʼena, ta iin iin ñuu xa̱a̱ síín síín sákuaʼnuna se̱ʼena. Ta na̱ íyo se̱ʼe tá ndíku̱nna yichi̱ Ndióxi̱, kǒo íxayo̱ʼvi̱ña xíʼinna ña̱ sánáʼa̱na se̱ʼena ta ni kǒo ndíku̱nna ña̱ káʼa̱n na̱ ñuyǐví xa̱ʼa ndáa ki̱ʼva sakuaʼnuna na̱ va̱lí.

¹⁰ Ná ka̱ʼa̱nyó xa̱ʼa ta̱ Noé. Tá xa̱ʼnda Jehová chiñu nu̱úra ña̱ keʼéra iin arca, va̱ása níxindaa-inira miíra ña̱ kuchiñura keʼéranú, chi ni iin yichi̱ ta̱ʼán keʼéranú. Ña̱ ke̱ʼéra kúúña ka̱ndíxaníra Jehová ta “míí ña̱ ni̱ka̱ʼa̱n Ndióxi̱ xíʼinra ña̱kán ke̱ʼéra” (Gén. 6:22). ¿Ndáaña ku̱u? Xa̱ʼa ña̱ na̱kuva̱ʼa tú arca yóʼo va̱ʼa ni̱ka̱kura xíʼin na̱ veʼera. Xa̱ʼa ña̱ xi̱ndiku̱nra yichi̱ Jehová va̱ʼa sa̱kuaʼnura se̱ʼera. Viíní sa̱náʼa̱rana ta va̱ʼaní yichi̱ chi̱núura nu̱úna, ni yo̱ʼvi̱ní ni̱xi̱yo tiempo ña̱ xi̱takura tá kúma̱níka koon sa̱vi̱ kini (Gén. 6:5).

11. ¿Nda̱chun xíniñúʼu chika̱a̱ní na̱ íyo se̱ʼe ndée ña̱ sánáʼa̱ viína se̱ʼena?

¹¹ Tá íyo se̱ʼún, ¿nda̱saa kivi keʼún míí ña̱ káʼa̱n Ndióxi̱ xíʼún? Kuniso̱ʼo ña̱ káʼa̱n Jehová. Taxi ná chindeé táʼanra xíʼún ña̱ sakuaʼnún se̱ʼún xíʼin consejo ña̱ va̱xi nu̱ú Biblia xíʼin ña̱ kundiku̱ún ña̱ káʼa̱n na̱ ñuura. Tá ná ya̱ʼa tiempo na̱ se̱ʼún taxina tixaʼvi ndaʼún xa̱ʼa ña̱yóʼo. Iin ta̱ hermano káchira: “Táxiníi̱ tixaʼvi xa̱ʼa ña̱ sa̱náʼa̱ na̱ yivái̱ yi̱ʼi̱. Chi̱ka̱a̱nína ndée ña̱ xa̱a̱na níma̱i̱. Xa̱ʼa ña̱ xa̱ʼnui̱ xíʼin tu̱ʼun Ndióxi̱ tixaʼvi na̱yóʼo kúúña”. Sava yichi̱ ni chíka̱a̱nína ndée xíʼin se̱ʼena, na̱yóʼo xáa̱na sándákoona Jehová. Soo na̱ chi̱ka̱a̱ní ndée ña̱ sa̱náʼa̱ viína se̱ʼena xa̱ʼa Ndióxi̱ ná kǒo kundi̱ʼi̱-inina chi xa̱a̱ sa̱xínuna chiñuna. Sanatu iin ki̱vi̱ ndikóva se̱ʼena nu̱ú Jehová.

12, 13. a) ¿Ndáaña kéʼé na̱ íyo se̱ʼe ña̱ náʼa̱na ña̱ kándíxana Ndióxi̱ tá ki̱vi̱ kíta iin se̱ʼena ti̱xin ñuu Ndióxi̱? b) ¿Ndáaña va̱ʼa nda̱kiʼin iin familia xa̱ʼa ña̱ xi̱niso̱ʼona ña̱ káʼa̱n Ndióxi̱ tá ki̱ta se̱ʼena ti̱xin ñuu Ndióxi̱?

 ¹² Iin ña̱ íxayo̱ʼvi̱ní xíʼin na̱ íyo se̱ʼe kúúña tá ki̱vi̱ kée iin se̱ʼena ti̱xin ñuu Ndióxi̱. Ná ka̱ʼa̱nyó xa̱ʼa ña̱ ndo̱ʼo iin ñá hermana tá ki̱ta se̱ʼeñá ti̱xin ñuu Ndióxi̱ ta ku̱a̱ʼa̱nñá inka veʼe kooñá. Ñáyóʼo káchiña: “Xi̱nandukúi̱ nu̱ú tutu tu̱ʼun Ndióxi̱ á íyo loʼo ña̱ káʼa̱n ña̱ va̱ʼa ku̱ʼi̱n kotoi̱ se̱ʼi̱ xíʼin se̱ʼe ñánii̱”. Soo viíní ni̱ka̱ʼa̱n yiíñá xíʼinñá ña̱ va̱ása ndísokana xíʼin ñá se̱ʼena ta xíniñúʼu nda̱kú kǒo inina xíʼin Jehová tá ná taxina ndakiʼin se̱ʼena consejo.

¹³ Tá ni̱ya̱ʼa tiempo, ndi̱kóñá congregación. Siʼíñá káchiñá: “Vitin káʼa̱nñá xíʼi̱n xíʼin teléfono á chíndaʼáña mensaje nu̱úi̱ ndiʼi ki̱vi̱. Ta íxato̱ʼóníñá yi̱ʼi̱ xíʼin yiíi̱ chi xíni̱ñá ña̱ ka̱ndíxandi̱ ña̱ káʼa̱n Ndióxi̱. Va̱ʼaní kítáʼanndi̱ xíʼin táʼanndi̱”. Tá íyo iin se̱ʼún na̱ ki̱ta ti̱xin ñuu Ndióxi̱, ¿á kandíxaún Jehová xíʼin ndiʼi níma̱ún ta kǒo keʼún ña̱ kúni̱ miíún? (Prov. 3:5, 6). Ndakaʼán chi consejo ña̱ táxi Jehová náʼa̱ña nu̱úyó ña̱ ndíchiníra ta kúʼvi̱ní-inira xínira miíyó. Kǒo nandosóún ña̱ ta̱xi Jehová ta̱ Jesús ña̱ va̱ʼa saka̱kura ndiʼiyó, nda̱a̱ se̱ʼún kúni̱ra saka̱kura, chi kǒo kúni̱ra ndiʼi-xa̱ʼa ni iin na̱ yiví (kaʼvi 2 Pedro 3:9). * Ña̱kán, ndóʼó na̱ íyo se̱ʼe, kandíxaníndó consejo Jehová ta kundiku̱nndó yichi̱ra ni íxayo̱ʼvi̱ña xíʼinndó ña̱ kuniso̱ʼondó ña̱ káʼa̱nra. Kundiku̱nndó consejo Jehová ta kǒo ndakanixi̱níndó ña̱ va̱ása va̱ʼaña.

14. ¿Nda̱saa chíndeé táʼan yichi̱ ña̱ táxi Jehová nu̱úyó tá xíniñúʼura na̱ mayordomo?

¹⁴ Jehová ni̱ka̱ʼa̱nra kundaara na̱ ñuura ta sánáʼa̱rana, tasaá kúú ña̱ íxaara. Nda̱ka̱xinra se̱ʼera ña̱ kunda̱a̱ra na̱ congregación. Ta̱ Jesús nda̱ka̱xinra iin na̱ mayordomo ña̱ taxina tu̱ʼun Ndióxi̱ ndaʼa̱yó míí tiempo ña̱ xíniñúʼuyóña (Luc. 12:42). Na̱ mayordomo yóʼo kúú na̱ táxi yichi̱ nu̱úyó ta táxina consejo ndaʼa̱yó. Sana xi̱niso̱ʼún iin discurso á ka̱ʼviún iin artículo ña̱ revista ña̱ chi̱ndeé táʼan xíʼún ña̱ na̱samaún ña̱ ndákanixi̱níún á ña̱ kéʼún. Tá saá íyoña, kusi̱íní-iniún chi kúni̱ kachiña ña̱ táxiún taxi Jehová consejo ndaʼún (Prov. 2:1-5).

15, 16. a) ¿Ndáaña keʼéyó ña̱ ndakiʼinyó ña̱ va̱ʼa xa̱ʼa chiñu ña̱ kéʼé na̱ anciano? b) ¿Ndáaña keʼéyó ña̱ va̱ʼa ná kusi̱í-ini na̱ anciano keʼéna chiñuna?

¹⁵ Ta̱ Jesús nda̱ka̱xinra na̱ anciano ña̱ kundaana congregación. Ña̱ Biblia káchiña mií Jehová táxi na̱yóʼo ña̱ va̱ʼa chindeé táʼanna xíʼinyó (Efes. 4:8, 11-13). ¿Ndáaña ke̱ʼéyó ña̱ ndakiʼinyó ña̱ va̱ʼa xa̱ʼa chiñuna? Ná kundiku̱nyó yichi̱na ta ná kandíxayó Ndióxi̱ táki̱ʼva kándíxa na̱yóʼo miíra, ta ná kuniso̱ʼoyó consejo ña̱ Biblia ña̱ táxina ndaʼa̱yó (kaʼvi Hebreos 13:7, 17). * Ná ndakaʼányó chi na̱ anciano kúni̱na xínina miíyó ta kúni̱na ná kutáʼan va̱ʼayó xíʼin Jehová. Ña̱kán tá xítona ña̱ kǒo ku̱a̱ʼa̱nkayó reunión á ña̱ kǒo kúsi̱íka-iniyó xíʼin ña̱ kéʼéyó, ndi̱ku̱n chíndeé táʼanna xíʼinyó. Xíniso̱ʼona ña̱ káʼa̱nyó xíʼinna, ta chíka̱a̱na ndéeyó ta táxina consejo ña̱ va̱xi nu̱ú Biblia ndaʼa̱yó. ¿Á kíʼún kuenta xa̱ʼa ña̱ kúʼvi̱-ini Jehová xínira yóʼó ña̱kán táxirana chindeé táʼanna xíʼún?

¹⁶ Sava íxayo̱ʼvi̱ña xíʼin na̱ anciano taxina consejo ndaʼa̱yó. Ná ndakanixi̱níyó sana yo̱ʼvi̱ní i̱xaaña xíʼin ta̱ Natán ña̱ ka̱ʼa̱nra xíʼin ta̱ David tá chi̱se̱ʼéra iin ku̱a̱chi káʼnu ña̱ ke̱ʼéra (2 Sam. 12:1-14). Ta saátu ta̱ apóstol Pablo ndakúní ni̱xi̱yo inira ña̱ ta̱xira consejo ndaʼa̱ ta̱ apóstol Pedro xa̱ʼa ña̱ iinlá na̱ Judío xi̱ndaka̱xinra  kutáʼan xíʼinra (Gál. 2:11-14). Ña̱kán, ¿ndáaña kivi keʼún ña̱ va̱ʼa chindeé táʼún xíʼin na̱ anciano ña̱ ná va̱ása yo̱ʼvi̱ keʼéna chiñuna? Vitá koo iniún, kuniso̱ʼo ña̱ káʼa̱nna xíʼún ta taxi tixaʼvi ndaʼa̱na. Consejo ña̱ táxina ndaʼún kúni̱ kachiña ña̱ kúʼvi̱-ini Ndióxi̱ xínira yóʼó. Tá saá ná keʼún ku̱a̱ʼá ña̱ va̱ʼa ndakiʼún ta na̱ anciano xíʼin ña̱ si̱í-ini keʼéna chiñuna.

17. ¿Nda̱saa chi̱ndeé táʼan na̱ anciano xíʼin iin ñá hermana?

¹⁷ Iin ñá hermana káchiñá xa̱ʼa ña̱ ke̱ʼéñá tá ya̱chi̱ i̱xayo̱ʼvi̱níña xíʼinñá ña̱ kuʼvi̱-iniñá kuniñá Jehová ta xi̱kusuchíní-iniñá. Ta káchiñá: “Xi̱kunda̱a̱-inii̱ ña̱ xíniñúʼu ka̱ʼi̱n xíʼin na̱ anciano. Na̱yóʼo va̱ása nínda̱ʼyi̱na xíʼi̱n ni kǒoña níka̱ʼa̱nna xa̱ʼíi̱. Ña̱ ke̱ʼéna kúúña chi̱ndeé táʼanna xíʼi̱n ta ta̱xina ndée ndaʼíi̱. Tá xi̱ndiʼi iin reunión, ni íyoní chiñu nu̱úna, xi̱xa̱a̱ iinna nu̱úi̱ ta xi̱nda̱ka̱tu̱ʼunna yi̱ʼi̱ á íyo va̱ʼi̱. Xa̱ʼa ña̱ ke̱ʼíi̱ xi̱naʼá i̱xayo̱ʼvi̱níña xíʼi̱n ña̱ kandíxai̱ ña̱ kivi kuʼvi̱-ini Ndióxi̱ kunira yi̱ʼi̱. Soo, tuku ta tuku Jehová xíniñúʼura na̱ congregación á na̱ anciano ña̱ náʼa̱ra ña̱ kúʼvi̱-inira xínira yi̱ʼi̱. Káʼi̱n xíʼin Jehová ña̱ ná chindeéra yi̱ʼi̱ ña̱ ni iin ki̱vi̱ ná kǒo sandákoi̱ra”.

18, 19. ¿Ndáaña kúú ña̱ yo̱ʼvi̱ka nu̱ú iin consejo? Ka̱ʼa̱n xa̱ʼa iin ejemplo.

¹⁸ Sana tá ndákiʼinyó iin consejo yo̱ʼvi̱ íxaaña xíʼinyó, soo tá ná kǒo kuniso̱ʼoyóña yo̱ʼvi̱ka koo tu̱ndóʼo kixi nu̱úyó (Heb. 12:11). Ná ka̱ʼa̱nyó xa̱ʼa u̱vi̱na: ta̱ Caín xíʼin ta̱ rey Sedequías. Tá xi̱ni Ndióxi̱ ña̱ ki̱xaʼá sáa̱ní-ini ta̱ Caín xínira ñanira ta kúni̱ra kaʼnírara, ni̱ka̱ʼa̱nra xíʼinra: “¿Nda̱chun sáa̱ní-iniún ta nda̱chun náʼa̱ ña̱ nda̱kavaní-iniún? Tá ná keʼún ña̱ va̱ʼa ¿á va̱ása kusi̱í-inii̱ xíʼin ña̱ kéʼún? Soo tá ná keʼún ña̱ va̱ása va̱ʼa kixi tu̱ndóʼo nu̱ún, chi xa̱a̱ íyo tu̱ʼvaña ndátuña yóʼó; ta miíún, ¿á kuchiñún xíʼinña?” (Gén. 4:6, 7). Soo ta̱ Caín kǒo níxiniso̱ʼora ña̱ ni̱ka̱ʼa̱n Jehová. Xa̱ʼníra ñanira ta xa̱ʼa ña̱yóʼo ki̱xi tu̱ndóʼo nu̱úra ndiʼi tiempo ña̱ xi̱takura (Gén. 4:11, 12). Tá níxiniso̱ʼora ña̱ ni̱ka̱ʼa̱n Jehová, kǒo tu̱ndóʼo yóʼo kixi nu̱úra.

¹⁹ Ta̱ Sedequías xi̱kuura iin rey ndi̱va̱ʼa-ini ta i̱yoní ni̱xi̱yo inira. Xa̱ʼndachíñura tá yo̱ʼvi̱ní ni̱xi̱yo tiempo ñuu Jerusalén. Ta̱ profeta Jeremías ku̱a̱ʼá yichi̱ ni̱ka̱ʼa̱nra xíʼin ta̱ Sedequías ña̱ ná sandákoora ña̱ kini kéʼéra, soo ta̱yóʼo kǒo níxiniso̱ʼora ta ku̱a̱ʼání tu̱ndóʼo ki̱xi nu̱úra (Jer. 52:8-11). Xíʼin ña̱yóʼo kúnda̱a̱-iniyó Jehová va̱ása kúni̱ra ndoʼoyó, ña̱kán táxira consejo ndaʼa̱yó (kaʼvi Isaías 48:17, 18). *

20. ¿Ndáaña ndoʼo na̱ kǒo xíín kuniso̱ʼo consejo, ta ndáaña ndoʼo na̱ kándíxaña?

²⁰ Tiempo vitin, ku̱a̱ʼání na̱ yiví kǒo xíínna kuniso̱ʼona consejo ña̱ táxi Ndióxi̱. Soo xa̱a̱ ku̱yatin, na̱ kéʼé saá kixi tu̱ndóʼo nu̱úna (Prov. 1:24-31). Ña̱kán ná kuniso̱ʼoyó consejo ña̱ va̱ʼa nduuyó na̱ ndíchi. Proverbios 4:13 káʼa̱nña xíʼinyó ndáaña xíniñúʼu keʼéyó xíʼin consejo: “Keʼé ña̱ káʼa̱nña; va̱ása sandákoúnña. Taxiva̱ʼúnña níma̱ún, chi ña̱yóʼo taxi ña̱ kutakún”.