Na̱ ndásakáʼnu Ndióxi̱ xíniñúʼu ndakuchina
“Ña̱ kítáʼan xíʼin ña̱yóʼo, ña̱ ndakuchindó vitin kúú ña̱ sáka̱ku ndóʼó” (1 PED. 3:21).
YAA: 52, 41
1, 2. a) ¿Ndáaña ndóʼo sava na̱ kúúmií se̱ʼe tá káʼa̱n se̱ʼena xíʼinna ña̱ kúni̱na ndakuchina? b) ¿Nda̱chun ndáka̱tu̱ʼunna na̱ ndakuchi á xa̱a̱ nda̱taxi xíʼin miína ndaʼa̱ Jehová? (Koto na̱ʼná ña̱ va̱xi chí xa̱ʼa).
ÑÁ María nda̱kundichiñá xíʼin ndiʼi na̱ xa̱a̱ íyo tu̱ʼva ña̱ ndakuchina. Ta na̱ yiváñá xítona nu̱úñá tá ndákuiinñá u̱vi̱ pregunta ña̱ kéʼé ta̱ táxi discurso. Tándi̱ʼi nda̱kuchivañá.
2 Na̱ yiváñá kúsi̱íní-inina xa̱ʼa ña̱ nda̱taxi xíʼin miíñá ndaʼa̱ Jehová ta nda̱kuchiñá. Soo tá xa̱a̱ ku̱yatin ndakuchiñá siʼíñá ki̱xaʼá ndíʼi̱ní-iniñá, ta ndáka̱tu̱ʼunñá miíñá ña̱yóʼo: “¿Á táʼan loʼoní ñá loʼo se̱ʼi̱ ña̱ ndakuchiñá? ¿Á ndixa kúnda̱a̱-iniñá ndáaña kúni̱ kachiña ña̱ ndakuchiñá? ¿Á va̱ʼaka kundatuvañá?”. Ku̱a̱ʼání na̱ kúúmií se̱ʼe ndáka̱tu̱ʼun xíʼin miína táʼan ña̱yóʼo tá kúni̱ na̱ va̱lí se̱ʼena ndakuchina (Ecl. 5:5). Ta ndiʼivana ndóʼo ña̱yóʼo, chi ña̱ ndataxiyó miíyó ndaʼa̱ Ndióxi̱ iin ña̱ ndáyáʼviní kúúña (koto ña̱ recuadro “ ¿Á nda̱taxiún miíún ndaʼa̱ Jehová?”).
3, 4. a) ¿Ndáaña ni̱ka̱ʼa̱n ta̱ Pedro ña̱ ni̱na̱ʼa̱ra ña̱ ndáyáʼviní ña̱ ndakuchiyó? b) ¿Nda̱chun káʼa̱nyó ña̱ kítáʼan ña̱ ku̱va̱ʼa tú arca xíʼin ña̱ ndakuchiyó?
3 Ta̱ apóstol Pedro ni̱ka̱ʼa̱nra xa̱ʼa tú arca tú i̱xava̱ʼa ta̱ Noé ta ka̱chira: “Ña̱ kítáʼan xíʼin ña̱yóʼo, ña̱ ndakuchindó vitin kúú ña̱ sáka̱ku ndóʼó” (kaʼvi 1 Pedro 3:20, 21). * Tú arca yóʼo ni̱na̱ʼa̱nú nu̱ú ndiʼi na̱ yiví ña̱ xa̱a̱ nda̱taxi xíʼin mií ta̱ Noé ndaʼa̱ Ndióxi̱ ña̱ keʼéra ña̱ kúni̱ra. Va̱ʼaní xi̱kandíxara Jehová ta ke̱ʼéra ndiʼi ña̱ ni̱ka̱ʼa̱nra xíʼinra. Xa̱ʼa ña̱ ke̱ʼéra ña̱yóʼo va̱ʼa ni̱ka̱kura xíʼin na̱ veʼera tá ko̱on sa̱vi̱ kini. ¿Nda̱chun ni̱ka̱ʼa̱n ta̱ Pedro xa̱ʼa ña̱yóʼo?
4 Tá xi̱xini na̱ yiví tú arca, xi̱kunda̱a̱-inina ña̱ xi̱kandíxaníra Ndióxi̱. Ta saá íyo tiempo vitin, tá xíto na̱ yiví ña̱ ndákuchiyó, xíni̱na ña̱ ndásakáʼnuyó Ndióxi̱ ta nda̱taxiyó miíyó ndaʼa̱ra ña̱ ndasakáʼnuyóra saáchi kándíxayó ta̱ Jesús. Táki̱ʼva ni̱xi̱yo ta̱ Noé, na̱ xa̱a̱ nda̱kuchi kándíxana Ndióxi̱ ta kéʼéna chiñu ña̱ táxira ndaʼa̱na. Jehová sa̱kákura ta̱ Noé tá ko̱on sa̱vi̱ kini. Ta saátu keʼéra ña̱ saka̱kura na̱ xa̱a̱ nda̱kuchi tá ná ki̱xa̱a̱ ki̱vi̱ ña̱ ndiʼi-xa̱ʼa ñuyǐví yóʼo (Mar. 13:10; Rev. 7:9, 10). Ña̱kán ndáyáʼviní ña̱ ndataxiyó miíyó ndaʼa̱ Jehová ta ndakuchiyó. Na̱ kǒo xíín ndakuchi kama, kivi xa̱a̱na kuvina ta va̱ása kutakuna ndiʼi tiempo.
5. ¿Ndáaña sakuaʼayó nu̱ú artículo yóʼo?
5 Xa̱ʼa ña̱ su̱ví iin si̱ki kúúña ndakuchiyó, xíniñúʼu nda̱ka̱tu̱ʼunyó miíyó u̱ni̱ pregunta ña̱ va̱xi yóʼo. Ña̱ nu̱ú, ¿ndáaña sánáʼa̱ Biblia xa̱ʼa ña̱ ndakuchiyó? Ña̱ u̱vi̱, ¿ndáaña xíniñúʼu keʼéyó tá kúni̱yó ndakuchiyó? Ta ña̱ u̱ni̱, tá káʼviyó xíʼin na̱ va̱lí se̱ʼeyó á inka na̱ yiví ¿nda̱chun xíniñúʼu ndakanixi̱níyó xa̱ʼa ña̱ ndakuchina?
NDÁAÑA KÁʼA̱N BIBLIA XA̱ʼA ÑA̱ NDAKUCHIYÓ
6, 7. a) ¿Nda̱chun sa̱ndákuchi ta̱ Juan na̱ yiví? b) ¿Nda̱chun síín ni̱xi̱yo ña̱ nda̱kuchi ta̱ Jesús?
6 Ña̱ yichi̱ nu̱ú ña̱ káʼa̱n Biblia xa̱ʼa ña̱ ndákuchina kúúña tá xi̱sandákuchi ta̱ Juan Bautista (Mat. 3:1-6). Na̱ yiví na̱ xi̱xa̱ʼa̱n nu̱ú ta̱ Juan ña̱ sandákuchirana, xíʼin ña̱ ke̱ʼéna ni̱na̱ʼa̱na ña̱ ndi̱kó-inina xa̱ʼa ña̱ kǒo níkandíxana ña̱ káʼa̱n ley ta̱ Moisés. Soo íyo inka ta̱ sa̱ndákuchi ta̱ Juan ta ña̱ ke̱ʼé ta̱yóʼo ndeéní ndáyáʼviña ta síínní ni̱xi̱yoña. Ta̱ Juan iin ña̱ káʼnuní kúú ña̱ ke̱ʼéra chi ni̱xa̱a̱ra sa̱ndákuchira ta̱ Jesús ta̱ kúú se̱ʼe Ndióxi̱ (Mat. 3:13-17). Ta̱ Jesús xa̱ʼa ña̱ kǒo ku̱a̱chira kǒo ña̱ʼa xíniñúʼu ndikó-inira xa̱ʼa (1 Ped. 2:22). Nda̱kuchira ña̱ na̱ʼa̱ra ña̱ xa̱a̱ íyo tu̱ʼvara ña̱ ndataxira miíra ndaʼa̱ Jehová ta keʼéra ña̱ kúni̱ yivára (Heb. 10:7).
7 Tá ni̱xi̱ka ta̱ Jesús na̱túʼunra xa̱ʼa Ndióxi̱, saátu na̱ discípulora sa̱ndákuchina sava na̱ yiví (Juan 3:22; 4:1, 2). ¿Ndáa xa̱ʼa kúú ña̱ xi̱ndakuchina? Nda̱kuchina ña̱ na̱ʼa̱na ña̱ ndíkó-inina xa̱ʼa ña̱ kǒo níkandíxana ley ta̱ Moisés. Soo tándi̱ʼi ni̱xi̱ʼi̱ ta̱ Jesús ta nda̱takura, ndiʼi na̱ ndákuchi vitin xa̱ʼa inka ña̱ʼa kúú ña̱ ndákuchina.
8. a) ¿Ndáaña ni̱ka̱ʼa̱n ta̱ Jesús xíʼin na̱ discípulora tá nda̱takura? b) ¿Nda̱chun xíniñúʼu ndakuchi na̱ ndásakáʼnu Ndióxi̱?
8 Tá ku̱i̱ya̱ 33, tá xa̱a̱ nda̱taku ta̱ Jesús ki̱tara nu̱ú yáʼaka 500 ta̱a, ñaʼá xíʼin sava na̱ va̱lí. Sana saá kúú ña̱ ni̱ka̱ʼa̱nra ña̱yóʼo: “Kuaʼánndó nu̱ú ndiʼi na̱ yiví ña̱ iníísaá ñuyǐví ta sanáʼa̱ndóna, ña̱ ná kundiku̱nna yi̱ʼi̱, ta ná ndakuchina xíʼin ki̱vi̱ yiváyó xíʼin ki̱vi̱ se̱ʼera tasaá xíʼin ki̱vi̱ espíritu santo, ta sanáʼa̱ndóna ná keʼéna ndiʼi ña̱ káʼi̱n xíʼinndó. Ta kotondó, íyoi̱ xíʼinndó ndiʼi tiempo nda̱a̱ ná ndiʼi-xa̱ʼa ñuyǐví” (Mat. 28:19, 20; 1 Cor. 15:6). Sana ku̱a̱ʼání kúú na̱ yiví na̱ ni̱xi̱yo tá ni̱ka̱ʼa̱nra ña̱ ku̱ʼu̱nna natúʼunna xíʼin na̱ yiví. Ta ni̱ka̱ʼa̱nra ndiʼi na̱ kúni̱ kundiku̱n sa̱tára xíniñúʼu ndakuchina (Mat. 11:29, 30). Ndiʼi na̱ kúni̱ ndasakáʼnu Ndióxi̱ xíniñúʼu ndakunina ta̱ Jesús ña̱ kúúmiíra iin chiñu káʼnu ña̱ va̱ʼa xi̱nu ña̱ kúni̱ Ndióxi̱. Tá xa̱a̱ ndákunina ña̱yóʼo saá kúú ña̱ va̱ʼa ndakuchina. Ta ña̱ ndakuchina yóʼo kusi̱í-ini Ndióxi̱ xíʼinña. Ña̱ Biblia káʼa̱nña xa̱ʼa ku̱a̱ʼání na̱ ni̱xa̱a̱ xi̱kuu discípulo ta̱ Jesús tá siglo nu̱ú, siʼna xi̱kunda̱a̱-inina ndáaña kúni̱ kachi ña̱ ndakuchina ta va̱ása nítaxina ya̱ʼa ku̱a̱ʼá tiempo tasaá ndakuchina (Hech. 2:41; 9:18; 16:14, 15, 32, 33).
KAMA NDAKUCHIÚN
9, 10. ¿Ndáaña sákuaʼayó xa̱ʼa ña̱ nda̱kuchi ta̱ ñuu Etiopía xíʼin xa̱ʼa ña̱ nda̱kuchi ta̱ apóstol Pablo?
9 (Kaʼvi Hechos 8:35, 36). * Ná sakuaʼayó xa̱ʼa iin ta̱a ta̱ ñuu Etiopía ni̱xa̱a̱ra ndu̱ura Judío, chí ñuu Jerusalén ni̱xa̱ʼa̱nra ña̱ nda̱sakáʼnura Ndióxi̱ ta vitin xa̱a̱ chí veʼera ku̱a̱ʼa̱nra. Iin ángel ni̱ka̱ʼa̱n xíʼin ta̱ Felipe ña̱ ná na̱túʼunra xa̱ʼa ta̱ Jesús xíʼin ta̱ ñuu Etiopía yóʼo. ¿Ndáaña ndo̱ʼo ta̱yóʼo tá na̱túʼun ta̱ Felipe xíʼinra? Na̱kunda̱a̱-inira ña̱ ndáyáʼviní chiñu kéʼé ta̱ Jesús. Xa̱ʼa ña̱ xi̱kuni̱ra keʼéra ña̱ káʼa̱n Ndióxi̱, chi̱ka̱a̱ra ndée ña̱ nda̱kuchira.
10 Vitin ná sakuaʼayó xa̱ʼa iin ta̱a ta̱ xi̱kunda̱síní xi̱xini na̱ ndásakáʼnu Ndióxi̱. Ta̱ judío xi̱kuura, na̱ judío xa̱a̱ nda̱taxina miína ndaʼa̱ Ndióxi̱. Soo xa̱ʼa ña̱ kǒo níkandíxakana keʼéna ña̱ káʼa̱n Ndióxi̱ ndi̱ʼi-xa̱ʼa ña̱ kítáʼan va̱ʼana xíʼinra. Ta̱ ta̱a yóʼo nina costumbre ña̱ xi̱keʼé na̱ judío xi̱keʼéra. Soo íyo iin ña̱ ni̱ka̱ʼa̱n ta̱ Jesús xíʼinra chí ndiví. Xa̱ʼa ña̱yóʼo ka̱ndíxara ña̱ chi̱ndeé táʼan ta̱ Ananías xíʼinra, ta nda̱kuchira (Hech. 9:17, 18; Gál. 1:14). Ta̱ káʼa̱nyó xa̱ʼa yóʼo kúú ta̱ nda̱kunaní apóstol Pablo. Ta̱yóʼo ni̱xa̱a̱ra nda̱kuchira tá nda̱kunira chiñu ña̱ kúúmií ta̱ Jesús ña̱ va̱ʼa xi̱nu ña̱ kúni̱ Ndióxi̱ (kaʼvi Hechos 22:15, 16). *
11. a) ¿Ndáaña chíndeé táʼan xíʼin na̱ káʼvi Biblia ña̱ xáa̱na ndákuchina? b) ¿Ndáaña ndóʼoyó tá xítoyó ndákuchi iin na̱ yiví?
11 Saátu kúu xíʼin na̱ káʼvi Biblia tiempo vitin, kúúna na̱ va̱lí á na̱ xa̱a̱ chée. Na̱ ndixa chíndayáʼvi ña̱ káʼa̱n Biblia kúni̱na ndataxina miína ndaʼa̱ Jehová ta ndakuchina. Ndiʼi asamblea táxina iin discurso ña̱ ku̱a̱ʼa̱n nu̱ú na̱ kúni̱ ndakuchi. Miíyó na̱ testigo Jehová kúsi̱íní-iniyó tá xítoyó ña̱ ndákuchi na̱ káʼviyó xíʼin. Na̱ íyo se̱ʼe kúsi̱íní-inina tá ndákuchi se̱ʼena. Ti̱xin ña̱ ku̱i̱ya̱ 2017, yáʼaka 284,000 na̱ yiví nda̱kuchi tasaá ni̱na̱ʼa̱na ña̱ nda̱taxina miína ndaʼa̱ Ndióxi̱ (Hech. 13:48). Na̱yóʼo na̱kunda̱a̱-inina ña̱ xíniñúʼu ndakuchina tá kúni̱na ndasakáʼnuna Ndióxi̱. Soo ¿ndáaña ke̱ʼéna ña̱ va̱ʼa ni̱xa̱a̱na nda̱kuchina?
12. ¿Ndáaña xíniñúʼu keʼé na̱ káʼvi Biblia tá kúma̱níka ndakuchina?
12 Tá kúma̱níka ndakuchi iinna xíniñúʼu sakuaʼana ña̱ nda̱a̱ xa̱ʼa Ndióxi̱, xa̱ʼa ña̱ kúni̱ra xíʼin xa̱ʼa ña̱ ke̱ʼéra ña̱ va̱ʼa saka̱kura miíyó (1 Tim. 2:3-6). Ña̱ sakuaʼana chindeéña miína ña̱ kandíxakana Ndióxi̱ ta sandákoona keʼéna ndiʼi ña̱ʼa ña̱ kǒo kútóo Ndióxi̱ (Hech. 3:19). Kǒo kútóo Ndióxi̱ tá ndákuchi iin na̱ yiví ta ndákundeéna kéʼéna ña̱ kini (1 Cor. 6:9, 10). Su̱ví kandíxa kuitína ña̱ káʼa̱n Ndióxi̱ ta xa̱a̱ va̱ʼaví. Xíniñúʼu ku̱ʼu̱nna reunión ta natúʼun ni̱ʼina xa̱ʼa Ndióxi̱. Ta̱ Jesús ni̱ka̱ʼa̱nra na̱ discípulora kúú na̱ keʼé chiñu yóʼo (Hech. 1:8). Tándi̱ʼi ke̱ʼéna ndiʼi ña̱yóʼo mitúʼun miína xíniñúʼu ka̱ʼa̱n xíʼin Jehová tasaá ndakuchina nu̱ú ndiʼi na̱ yiví.
NÁ CHINDEÉ TÁʼANYÓ XÍʼIN NA̱ KÁʼVIYÓ XÍʼIN ÑA̱ NDAKUCHINA
Na̱ káʼviún xíʼin, ¿á ndáyáʼvi ña̱ ndakuchina nu̱ún ta á táváún tiempo ña̱ natúʼun xíʼinna xa̱ʼa ña̱yóʼo? (Koto párrafo 13).
13. Tá káʼviyó xíʼin na̱ yiví, ¿ndáaña xíniñúʼu chika̱a̱-iniyó keʼéyó?
13 Tá káʼviyó xíʼin na̱ va̱lí se̱ʼeyó á inkaka na̱ yiví xíniñúʼu chika̱a̱-iniyó ña̱ chindeé táʼanyó xíʼinna ña̱ ndakuchina ta xa̱a̱na kundiku̱nna ta̱ Jesús. Ná ndukúyó ndáa ki̱ʼva ka̱ʼa̱nyó xíʼinna ña̱ va̱ʼa kunda̱a̱-inina ña̱ ndáyáʼviní ña̱ ndakuchina ta ndataxina miína ndaʼa̱ Ndióxi̱. Ndiʼivayó kúni̱ ná chika̱a̱na ndée ta ndakuchina.
14. ¿Nda̱chun va̱ása íxanduxayó xíʼin ni iin na̱ yiví ña̱ ndakuchina?
14 Ni iinyó va̱ása kivi ixanduxayó xíʼin na̱ yiví ña̱ ndakuchina, ni na̱ íyo se̱ʼe, ni na̱ káʼvi xíʼin iin na̱ yiví á inkakana. Chi Jehová va̱ása íxanduxara xíʼinyó ña̱ keʼéyó ña̱yóʼo (1 Juan 4:8). Ña̱ xíniñúʼu keʼéyó tá káʼviyó xíʼinna kúú ña̱ ka̱ʼa̱nyó xíʼinna ña̱ ndáyáʼviní xa̱a̱na koona migo Ndióxi̱. Ña̱ xíniñúʼu chindeé táʼan xíʼinna ña̱ ndakuchina kúú ña̱ kuʼvi̱-inina kunina Jehová xíʼin ña̱ ndixa kuni̱na ndasakáʼnunara (2 Cor. 5:14, 15).
15, 16. a) ¿Nda̱saa ku̱i̱ya̱ xíniñúʼu kuumií na̱ kúni̱ ndakuchi? b) Na̱ káʼviyó xíʼin ni xa̱a̱ nda̱kuchina xíʼin na̱ inka religión, ¿nda̱chun xíniñúʼu tuku ndakuchina xíʼin na̱ testigo Jehová?
15 ¿Nda̱saa ku̱i̱ya̱ xíniñúʼu kuumií iin na̱ yiví ña̱ va̱ʼa ndakuchina? Kǒo kivi ka̱ʼa̱nyó nda̱saa ku̱i̱ya̱ xíniñúʼu kuumiína chi su̱ví inkáchi xúxa-ini ndiʼivíyó. Savana ndákuchina tá kúúna na̱ válí ta ndiʼi tiempo ndásakáʼnuna Ndióxi̱. Savatuna xa̱a̱ náʼnunína saá ki̱xaʼána sákuaʼana xa̱ʼa Ndióxi̱, savana nda̱a̱ yáʼaka 100 ku̱i̱ya̱ kúúmiína saáví xáa̱na kúnda̱a̱-inina ña̱ xíniñúʼu ndakuchina.
16 Na̱ kúni̱ koo testigo Jehová xíniñúʼu ndakuchina ni xa̱a̱ nda̱kuchina xíʼin inka na̱ religión. Tá xíni̱ va̱ʼana xa̱ʼara ta ndákuchina saá kúú ña̱ ndáyáʼviña nu̱ú Jehová. Saá ke̱ʼé iin ñá nána ñá kúúmií ki̱ʼva 80 ku̱i̱ya̱. Ñáyóʼo xa̱a̱ ku̱a̱ʼání yichi̱ nda̱kuchiñá xíʼin na̱ inka religión, ta ni̱nda̱ka̱tu̱ʼunñá ñá káʼvi xíʼinñá á xíniñúʼu ndakuchi tukuñá. Ñá hermana yóʼo, ka̱ʼviñá sava texto nu̱úñá ña̱ va̱ʼa kunda̱a̱-iniñá. Ñá nána yóʼo na̱kunda̱a̱-iniñá ña̱ káʼa̱n Biblia xa̱ʼa ña̱ ndakuchiyó, tá ni̱ya̱ʼa loʼo tiempo nda̱kuchivañá (kaʼvi Hechos 19:3-5). *
17. Tá ki̱vi̱ ndakuchi iinna ¿ndáaña xíniñúʼu ndakanixi̱nína xa̱ʼa?
17 Tá ndákuchi iin na̱ yiví iin ña̱ si̱íní-ini kúú ña̱yóʼo. Soo saátu xíniñúʼu ndakanixi̱nína xa̱ʼa ndiʼi ña̱ xíniñúʼu keʼéna xa̱ʼa ña̱ ndataxina miína ndaʼa̱ Ndióxi̱. Miíyó na̱ ndíku̱n ta̱ Jesús “va̱ása kutakukayó xa̱ʼa miíyó, xa̱ʼa ta̱ ni̱xi̱ʼi̱ xa̱ʼavayó kutakuyó chi nda̱takura” (2 Cor. 5:15; Mat. 16:24).
18. ¿Ndáaña sakuaʼayó nu̱ú inka artículo?
18 Nu̱ú ña̱ artículo yóʼo sa̱kuaʼayó ña̱ ndáyáʼviní ña̱ ndakuchiyó. Xa̱ʼa ña̱yóʼo kúú ña̱ ni̱ndi̱ʼi̱-ini siʼí ñá María ta ni̱nda̱ka̱tu̱ʼun xíʼin miíñá ña̱ xa̱a̱ ni̱ka̱ʼa̱nyó xa̱ʼa tá ki̱xaʼá ña̱ artículo yóʼo. Tá íyo se̱ʼún sana xa̱a̱ ndáka̱tu̱ʼun xíʼin miíún ña̱yóʼo: “¿Á xa̱a̱ íyo tu̱ʼva se̱ʼi̱ ña̱ ndakuchina? ¿Á xíni va̱ʼana xa̱ʼa Jehová ña̱ va̱ʼa kúsi̱í-inira xíʼin ña̱ ndakuchina? ¿Á xíniñúʼu kaʼvi va̱ʼana ta kuumiína iin chiñu ta saáví ndakuchina? ¿Ndáaña kuu tá ná ki̱ʼvina iin ku̱a̱chi káʼnu?”. Nu̱ú ña̱ inka artículo sakuaʼayó xa̱ʼa ña̱yóʼo. Saátu kunda̱a̱-iniyó ndáaña xíniñúʼu ndakanixi̱ní na̱ íyo se̱ʼe xa̱ʼa ña̱ ndakuchi se̱ʼena.
^ párr. 3 1 Pedro 3:20, 21: “Ni̱xi̱yo iin tiempo ña̱ va̱ása níkandíxana, Ndióxi̱ xi̱ndatura ña̱ nasa̱ma na̱ yiví tá tiempo ta̱ Noé, tá sa̱kán íxava̱ʼana tú arca, ta ini túyóʼo loʼova kúú na̱ ni̱ka̱ku, u̱na̱ na̱ yiví xi̱kuuna, na̱yóʼo kúú na̱ ni̱ka̱ku tá ko̱on sa̱vi̱ kini. Ña̱ kítáʼan xíʼin ña̱yóʼo, ña̱ ndakuchindó vitin kúú ña̱ sáka̱ku ndóʼó (su̱ví ña̱ sandiʼi-xa̱ʼandó ña̱ yaku̱a̱ kuñundó, chi xa̱ʼa ña̱ ndúkúndó nu̱ú Ndióxi̱ ña̱ ná ndasaviíra ña̱ xíni̱túni̱ndó), xa̱ʼa ña̱ nda̱taku ta̱ Jesucristo”.
^ párr. 9 Hechos 8:35, 36: “Ta̱ Felipe ki̱xaʼára káʼvira tu̱ʼun Ndióxi̱, ta sa̱náʼa̱ra ta̱yóʼo tu̱ʼun va̱ʼa xa̱ʼa ta̱ Jesús. Tasaá, ku̱a̱ʼa̱nna yichi̱, ni̱xa̱a̱na nu̱ú ndíka̱a̱ ti̱kui̱í, ta̱ eunuco káchira: ʻKoto, yóʼo ndíka̱a̱ ti̱kui̱í; ¿nda̱chun kǒo kívi ndakuchii̱ yóʼo?ʼ”.
^ párr. 10 Hechos 22:15, 16: “Chi ka̱ʼún xíʼin ndiʼi na̱ yiví xa̱ʼa ña̱ xi̱niún xíʼin ña̱ xi̱niso̱ʼún. Ta vitin ¿nda̱chun ndátuníún? Kuaʼán ta ndakuchiún ta ndukú nu̱ú Ndióxi̱ ná koora ña̱ káʼnu-ini xa̱ʼa ku̱a̱chiún”.
^ párr. 16 Hechos 19:3-5: “Ta ni̱ka̱ʼa̱nra: ‘¿Nda̱chun nda̱kuchi ndóʼó?ʼ Na̱yóʼo ni̱ka̱ʼa̱nna: “Xa̱ʼa ña̱ sa̱náʼa̱ ta̱ Juan ndi̱ʼi̱”. Ta̱ Pablo ni̱ka̱ʼa̱nra: “Ta̱ Juan sa̱ndákuchira na̱ yiví ña̱ va̱ʼa ndukúna ña̱ káʼnu-ini nu̱ú Ndióxi̱, soo xi̱ka̱ʼa̱nra xíʼinna ña̱ ná kandíxana ta̱ kixi so̱ndíʼi, ta̱ Jesús”. Tá xi̱niso̱ʼona ña̱yóʼo, ka̱ndíxana ta̱ Jesús ta nda̱kuchina”.
