1. ¿Ndáaña ndo̱ʼo na̱ xi̱ndasakáʼnu Ndióxi̱ tá siglo nu̱ú?

TÁ KU̱I̱YA̱ 62 xíʼin 64, ta̱ apóstol Pedro ni̱ka̱ʼa̱nra xíʼin na̱ ñuu Ponto, Galacia, Capadocia, Asia xíʼin Bitinia (1 Ped. 1:1). Na̱ hermano yóʼo xa̱a̱ síín ñuu ke̱e iin iinna. Na̱yóʼo xi̱xiniñúʼuna na̱ chindeé táʼan xíʼinna chi xi̱ndoona iin tiempo ña̱ yo̱ʼvi̱ní ni̱xi̱yo káchi ta̱ Pedro chi xi̱kundi̱va̱ʼana xíʼinna. Ta ndeéníka ki̱xaʼá tu̱ndóʼo íyoña. Ta̱ Pedro ka̱ʼyíra ña̱yóʼo: “Xa̱a̱ ku̱yatin ndiʼi-xa̱ʼa ndiʼi ña̱ʼa”. Tasaá ku̱u, va̱ása níya̱ʼa u̱xu̱ ku̱i̱ya̱ ta ndi̱ʼi-xa̱ʼa ñuu Jerusalén. ¿Ndáaña chi̱ndeé táʼan xíʼinna ti̱xin ña̱ tiempo yóʼo? (1 Ped. 4:4, 7, 12).

2, 3. ¿Nda̱chun ni̱ka̱ʼa̱n ta̱ Pedro xíʼin na̱ xi̱ndasakáʼnu Ndióxi̱ ña̱ xíniñúʼu va̱ʼa koo inina? (Koto na̱ʼná ña̱ va̱xi chí xa̱ʼa).

² Ta̱ Pedro ni̱ka̱ʼa̱nra ña̱yóʼo: “Va̱ʼa koo inindó xíʼin táʼanndó” (1 Ped. 4:9). Ña̱ va̱ʼa koo iniyó xíʼin na̱ yiví na̱ kǒo xíni̱yó náʼa̱yó ña̱ kúni̱yó xíniyóna, ta kúni̱yó keʼéyó ña̱ va̱ʼa xíʼinna. Soo ta̱ apóstol Pedro ni̱ka̱ʼa̱nra ña̱ xíniñúʼu ‘va̱ʼa koo inina xíʼin táʼannaʼ ña̱yóʼo kúni̱ kachiña va̱ʼa koo inina xíʼin na̱ xa̱a̱ xíni̱na á na̱ kítáʼanna xíʼin. ¿Ndáaña va̱ʼa ndakiʼinna tá ná keʼéna ña̱yóʼo?

 ³ Ña̱yóʼo chindeé táʼanña xíʼinna ña̱ va̱ʼaka inkáchi kutáʼanna. Vitin ná ka̱ʼa̱nyó xa̱ʼa miíyó. Tá ka̱na iin na̱ hermano miíyó ña̱ ni̱xa̱ʼa̱nyó veʼena, ¿á su̱ví nda̱a̱ vitin ndákaʼányó xa̱ʼa ña̱yóʼo? Saátu tá ka̱nayó iin na̱ hermano ña̱ ki̱xina veʼeyó, ¿á su̱ví va̱ʼaka kítáʼanyó xíʼinna vitin xa̱ʼa ña̱ ka̱nayóna ki̱xina veʼeyó? Ña̱ va̱ʼa koo iniyó xíʼin inkana chíndeé táʼanña xíʼinyó ña̱ kuxini̱kayó na̱ hermano. Tá tiempo ta̱ Pedro xa̱ʼa ña̱ ki̱xaʼá kininíka ku̱a̱ʼa̱n ndúu, tá tiempo saá xi̱xiniñúʼu inkáchi kutáʼan ndiʼina. Saátu ndóʼo miíyó chi íyoyó “tiempo nu̱ú ndíʼi” (2 Tim. 3:1).

4. ¿Ndáaña ndakuiinyó ti̱xin artículo yóʼo?

⁴ ¿Ama kúú ña̱ va̱ʼa koo iniyó xíʼin inkana? Tá íyo ña̱ sási nu̱úyó ña̱ va̱ʼa koo iniyó xíʼin inkana, ¿ndáaña kivi keʼéyó? Ta ¿ndáaña keʼéyó ña̱ na̱ʼa̱yó ña̱ va̱ʼa iniyó tá ku̱a̱ʼa̱nyó veʼe iinna?

5. ¿Ndáaña keʼéyó ña̱ na̱ʼa̱yó ña̱ va̱ʼa iniyó xíʼin inkana tá ku̱a̱ʼa̱nyó reunión?

⁵ Tá ku̱a̱ʼa̱nyó reunión. Jehová xíʼin na̱ ñuura kánana miíyó ña̱ ku̱ʼu̱nyó reunión. Ta kúni̱yó ña̱ ndiʼi na̱ ku̱a̱ʼa̱n reunión va̱ʼa ná kunina (Rom. 15:7). Ta ndáyáʼviní keʼéyó ña̱yóʼo xíʼin na̱ ku̱a̱ʼa̱n ña̱ yichi̱ nu̱ú xíʼinyó tá íyo reunión. Vií ná keʼéyó xíʼin na̱ sa̱kán xáa̱ reunión ni va̱ása va̱ʼa ndíxina á nda̱saaka náʼa̱na chi Jehová kúú ta̱ ka̱na na̱yóʼo (Sant. 2:1-4). Tá xítoyó ña̱ kǒo na̱ chíndeé táʼan xíʼinna, ná ka̱ʼa̱nyó xíʼinna ña̱ kivi koona xíʼinyó nu̱ú ndóoyó. Kusi̱íníva-inina tá ná chindeé táʼanyó xíʼinna ña̱ kundiku̱nna ña̱ yáʼa ti̱xin reunión ta nandukúyó texto ña̱ va̱xi nu̱ú Biblia xíʼinna. Tá ná keʼéyó ña̱yóʼo saá na̱ʼa̱yó ña̱ ndíku̱nyó ña̱ consejo yóʼo: “Va̱ʼa koo inindó xíʼin táʼanndó” (Rom. 12:13).

6. ¿Ndáana xíniñúʼu kanayó kuxu xíʼinyó?

⁶ Tá kánayó iinna ña̱ ku̱ʼu̱nna kuxuna xíʼinyó. Tá xi̱naʼá iin costumbre ni̱xi̱yoña ña̱ kanana iin na̱ yiví ña̱ ku̱ʼu̱nna kuxuna veʼena chi xi̱kuni̱na koona migona (Gén. 18:1-8; Juec. 13:15; Luc. 24:28-30). Ta miíyó, ¿ndáana kivi kanayó kuxu xíʼinyó? Na̱ hermano na̱ congregación. Chi na̱yóʼo kúú na̱ kítáʼan xíʼinyó. Tá ná kixa̱a̱ tiempo yo̱ʼvi̱ na̱yóʼo kúú na̱ chindeé táʼan xíʼinyó. Xa̱ʼa ña̱yóʼo tá 2011, na̱ Cuerpo Gobernante na̱samana hora ña̱ káʼvina ña̱ Tutu Ña̱ Nátúʼun xíʼinyó ti̱xin Betel chí Estados Unidos, 6:45 xi̱ku̱aá xi̱ka̱ʼvinaña ta na̱samanaña ta ki̱xaʼána káʼvinaña 6:15 xi̱ku̱aá. ¿Nda̱chun ke̱ʼéna ña̱yóʼo? Ti̱xin iin anuncio ña̱ ta̱xina ni̱ka̱ʼa̱nna ña̱ ke̱ʼéna ña̱yóʼo xa̱ʼa ña̱ kúni̱na ña̱ ku̱a̱ʼáka tiempo ná kuumií na̱ ñúʼu Betel ña̱ natúʼun xíʼin táʼanna. Ta saátu ke̱ʼé inka na̱ Betel. Xa̱ʼa ña̱ ke̱ʼéna ña̱yóʼo na̱ ñúʼu ti̱xin Betel va̱ʼaníka kítáʼanna.

7, 8. ¿Ndáaña kivi keʼéyó xíʼin na̱ hermano na̱ va̱xi congregaciónyó ña̱ taxina discurso?

⁷ Tá va̱xi inka na̱ hermano congregación nu̱ú ku̱a̱ʼa̱nyó á ta̱ superintendente ña̱ circuito, á na̱ va̱xi chí Betel ña̱ taxina iin discurso kuniso̱ʼoyó. Tá va̱xi na̱yóʼo saá kúú ña̱ xíniñúʼu na̱ʼa̱yó ña̱ va̱ʼa iniyó (kaʼvi 3 Juan 5, 8). * Iin ña̱ va̱ʼa keʼéyó kúúña ná ka̱ʼa̱nyó xíʼinna ná ku̱ʼu̱nna kuxuna xíʼinyó á koʼona ti̱kui̱í á távixi. ¿Á va̱ʼa saá ná keʼéyó inka yichi̱?

⁸ Iin ñá hermana ñá ñuu Estados Unidos káchiñá: “Xa̱a̱ ku̱a̱ʼání ku̱i̱ya̱ yiíi̱ xíʼin miíi̱ kánandi̱ na̱ va̱xi táxi discurso xíʼin ñá síʼína ña̱ kíxina veʼendi̱. Va̱ʼaní kúnindi̱ tá va̱xina veʼendi̱ ta kúsi̱íní-inindi̱ ta saátu xáʼnuka ña̱ kándíxandi̱ Ndióxi̱. Kúsi̱íní-inindi̱ ña̱ kéʼéndi̱ ña̱yóʼo”.

9, 10. a) ¿Ndáana kúú na̱ ku̱a̱ʼáka tiempo xíniñúʼu iin veʼe nu̱ú koona? b) Na̱ válí veʼe á na̱ kǒo ku̱a̱ʼá ña̱ʼa kúúmií ¿á kivi taxina veʼena koo inkana?

 ⁹ Tá ku̱a̱ʼání tiempo xíyo iinna veʼeyó. Tá tiempo xi̱naʼá na̱ yiví xi̱taxina veʼena ña̱ xi̱xi̱yo na̱ xi̱xini̱táʼanna xíʼin (Job 31:32; Filem. 22). Saátu vitinva, xíniñúʼu keʼéyó saá. Na̱ superintendente ña̱ circuito tá ku̱a̱ʼa̱nna xítona iin congregación xíniñúʼuna ña̱ taxina iin veʼe nu̱ú koona. Saátu na̱ xáʼa̱n escuela nu̱ú sákuaʼakana xa̱ʼa Ndióxi̱ xíʼin na̱ káchíñu nu̱ú kuva̱ʼa veʼe ña̱ ndásakáʼnuna Ndióxi̱, xíniñúʼuna iin veʼe nu̱ú koona. Tá xíyo iin tu̱ndóʼo á sa̱vi̱ kini kóon á ña̱ ni̱ta̱an kúúña, savana xíniñúʼuna iin veʼe nu̱ú koona nda̱a̱ ná ndaʼa veʼena. Ná kǒo ndakanixi̱níyó kuití na̱ kúúmií veʼe va̱ʼa á veʼe náʼnu kúú na̱ kivi chindeé táʼan xíʼinna. Sana xa̱a̱ chi̱ndeé táʼanva na̱yóʼo xíʼinna. Ta miítuyó, ¿á kivi taxiyó veʼeyó koona ni loʼoña á ni ndáʼviyó?

¹⁰ Iin ta̱ hermano ñuu Corea del Sur ndákaʼánra tá ta̱xira veʼera ni̱xi̱yo na̱ ni̱xa̱ʼa̱n escuela nu̱ú sákuaʼakana xa̱ʼa Ndióxi̱. Káchira: “Tá xa̱ʼa ni̱xi̱ka-inii̱ á taxindi̱ veʼendi̱ koona chi na̱ sa̱kán ti̱ndaʼa̱ kúúndi̱ ta loʼoní veʼe nu̱ú ni̱xi̱yondi̱. Soo ku̱si̱íní-inindi̱ ña̱ ni̱xi̱yona veʼendi̱. Xi̱nindi̱ ña̱ si̱íní íyo na̱ ti̱ndaʼa̱ tá ndásakáʼnuna Jehová ta chíka̱a̱na ndée ña̱ inkáchi káchíñuna nu̱úra ña̱ va̱ʼa xa̱a̱na keʼéna ku̱a̱ʼáka chiñu nu̱úra”.

11. ¿Nda̱chun xíniñúʼu va̱ʼa koo iniyó xíʼin na̱ hermano na̱ kíxa̱a̱ koo xíʼinyó congregaciónyó?

¹¹ Tá kíxa̱a̱ inka na̱ hermano congregación nu̱ú ku̱a̱ʼa̱nyó. Savana kíxa̱a̱na ñuu nu̱ú ndóoyó ña̱ va̱ʼaka chindeé táʼanna xíʼinyó ña̱ natúʼunyó xa̱ʼa Ndióxi̱ á savatu na̱ precursor na̱ Betel chíndaʼá miína ña̱ va̱xina congregaciónyó. Tá xa̱ʼa ndiʼivana íxayo̱ʼvi̱ña xíʼin chi xíniñúʼu ka̱anna ñuu yóʼo, ka̱anna na̱ congregación á nda̱a̱ sakuaʼana inka tu̱ʼun. Tá ná kanayóna kixina kuxuna xíʼinyó á ña̱ kakana xíʼinyó nu̱ú xíkayó, ña̱yóʼo chindeé táʼan xíʼinna ña̱ kamaka ka̱anna.

12. ¿Ndáa experiencia kúú ña̱ náʼa̱ nu̱úyó ña̱ kǒo xíniñúʼu ku̱a̱ʼáví ña̱ʼa keʼéyó ña̱ kanayó iinna veʼeyó?

¹² Ña̱ va̱ʼa kanayó iinna xa̱a̱na veʼeyó kǒo xíniñúʼu ku̱a̱ʼání ña̱ʼa keʼéyó (kaʼvi Lucas 10:41, 42). * Iin ta̱ hermano káʼa̱nra tá ki̱xaʼára kúúra misionero xíʼin ñá síʼíra táʼan válíkavana ta xi̱ndakaʼánnína xa̱ʼa veʼena. Káchira: “Iin ki̱vi̱ ñá síʼíi̱ kúsuchíkaví-iniñá ta ni kǒo níʼíi̱ nda̱saa chindeé táʼi̱n xíʼinñá. Tasaá ki̱ʼva 7:30 xi̱ku̱aá ka̱ni ndaʼa̱na yéʼé. Iin ñá káʼvi Biblia kúúñá ta níʼiñá u̱ni̱ naranja ki̱xa̱a̱ñá ta káchiñá ña̱ va̱xiñá kotoñá ndi̱ʼi̱. Sa̱yaʼandi̱ñá veʼe ta ta̱xindi̱ iin vaso ti̱kui̱í ndaʼa̱ñá. Tándi̱ʼi ke̱ʼéndi̱ té xíʼin tá chocolate niʼní. Ta miíndi̱ va̱ása xíni̱ndi̱ tu̱ʼun suajili, ta ni ñákán va̱ása xíniñá tu̱ʼunndi̱. Ta nani saá ki̱xaʼándi̱ va̱ʼaní nda̱kutáʼanndi̱ xíʼin na̱ hermano ñuu yóʼo ta si̱íní ni̱xi̱yondi̱”.

13. ¿Nda̱chun kúú ña̱ xíniñúʼu va̱ʼa koo iniyó?

¹³ ¿Á íxayo̱ʼvi̱ña xíʼinyó ña̱ va̱ʼa koo iniyó? Tá saá ndóʼoyó, sana xa̱ʼa ña̱ ta̱ʼán kanayóna xa̱a̱na veʼeyó, ta̱ʼán ndani̱ʼíyó na̱ xa̱a̱ koo migoyó ndiʼi tiempo. Tá va̱ʼaní ná koo iniyó, ku̱a̱ʼánína xa̱a̱ kutáʼan va̱ʼa xíʼinyó. ¿Ndáa xa̱ʼa kúúña savana va̱ása va̱ʼa inina? Yóʼo ka̱ʼa̱nyó xa̱ʼa ndáaña sási nu̱ú savana ña̱ va̱ása va̱ʼa inina.

14. Tá kúma̱ní tiempo nu̱úyó á kúnaaníyó túviyó ña̱ kanayó na̱ hermano kixina veʼeyó á ña̱ ku̱ʼu̱nyó veʼena, ¿ndáaña va̱ʼa keʼéyó?

¹⁴ Ña̱ tiempoyó xíʼin ndée ña̱ kúúmiíyó. Miíyó na̱ ndásakáʼnu Jehová íyoní chiñu nu̱úyó. Ña̱kán savana ndákanixi̱nína ña̱ kǒo tiempo nu̱úna á kúnaanína ña̱ keʼéna ña̱yóʼo.  Tá saá ndákanixi̱níyó xíniñúʼu koto va̱ʼayó ndáa ki̱ʼva kuniñúʼuyó tiempoyó. ¿Á kivi nasa̱mayó sava ña̱ kéʼéyó ña̱ va̱ʼa koo tiempoyó ta va̱ása kunaaníyó ña̱ va̱ʼa kanayó sava na̱ hermano ña̱ kixina veʼeyó á ña̱ va̱ʼa ku̱ʼu̱nyó veʼena tá kánana miíyó? Ña̱ Biblia káʼa̱nña ña̱ ná kǒo nandosóyó ña̱ va̱ʼa koo iniyó xíʼin inkana (Heb. 13:2). Va̱ʼaníva tá ná taváyó tiempoyó ña̱ kooyó xíʼin na̱ hermano. Sana loʼova tiempo xíniñúʼu kuniñúʼuyó xíʼin sava ña̱ kéʼéyó.

15. ¿Nda̱chun kǒo xíín savayó kanayó inkana xa̱a̱na veʼeyó?

¹⁵ Ña̱ ndákanixi̱níyó xa̱ʼa miíyó. ¿Á sava yichi̱ kúni̱yó kanayó iinna xa̱a̱na veʼeyó ta kǒo níkanayóna? Sana kúkaʼanní nu̱úyó natúʼunyó xíʼin inkana á yíʼviyó ña̱ va̱ása xíni̱yó ndáaña ka̱ʼa̱nyó xíʼinna tá ná kixina veʼeyó ta sana kixaʼá kuxuxanna. Á sanatu kǒo ku̱a̱ʼá xu̱ʼúnyó ta ndákanixi̱níyó ña̱ va̱ása kívi taxiyó ndaʼa̱na ña̱ táxi inka na̱ congregación ndaʼa̱na. Ná ndakaʼányó chi kǒo xíniñúʼu koo iin veʼe va̱ʼavíyó ña̱ kanayóna kixina veʼeyó. Ña̱ xíniñúʼu keʼéyó kúúña vií ná kooña, limpio ná kooña ña̱kán va̱ʼa kusi̱í-inina koona xíʼinyó.

16, 17. ¿Ndáaña chindeé táʼan xíʼinyó tá ndíʼi̱ní-iniyó tá kanayó iinna kixina veʼeyó?

¹⁶ Tá kánayó iinna xa̱a̱na veʼeyó ta ndíʼi̱ní-iniyó, su̱ví iinláyó ndóʼo saá. Iin ta̱ anciano ñuu Gran Bretaña káchira: “Ña̱ ndákanixi̱níyó ndáa ki̱ʼva keʼéyó tá kánayó iinna xa̱a̱na veʼeyó sana sándi̱ʼi̱ña-iniyó. Soo nda̱a̱ táki̱ʼva ndóʼoyó xíʼin ndiʼi chiñu Jehová ku̱a̱ʼání ña̱ va̱ʼa ndákiʼinyó tá kéʼéyó ña̱yóʼo. Ta su̱ví ña̱ ndeéví kúú ña̱ ndíʼi̱-iniyó chi iin rato loʼova yáʼaña. Kúsi̱íní-inii̱ tá xíʼi̱ café xíʼin na̱ hermano ta nátúʼunndi̱”. Ná ndakaʼányó chi iin ña̱ va̱ʼaní kúúña tá ná kundi̱ʼi̱-iniyó xa̱ʼa inkana (Filip. 2:4). Ku̱a̱ʼánína kútóona natúʼunna xa̱ʼa ña̱ ndo̱ʼona. Tá ndákutáʼanyó xíʼin na̱ hermanoyó saá kúú ña̱ kivi keʼéyó ña̱yóʼo. Inka ta̱ anciano káchira: “Xa̱ʼa ña̱ kánai̱ na̱ hermano na̱ congregación xáa̱na veʼi̱ saá kúúña xái̱ xínitáʼankai̱ xíʼinna, kúnda̱a̱ka-inii̱ xa̱ʼana, ta kúnda̱a̱tu-inii̱ ndáa ki̱ʼva sa̱kuaʼana xa̱ʼa Ndióxi̱”. Tá vií ná keʼéyó xíʼin na̱ kánayó kixi veʼeyó, ndiʼiyó va̱ʼaní kuniyó.

¹⁷ Iin ñá precursora ñá xi̱taxi veʼe koo na̱ xi̱xa̱ʼa̱n kaʼvi escuela nu̱ú sákuaʼakana xa̱ʼa Ndióxi̱ káchiñá: “Xi̱ndi̱ʼi̱kaví-inii̱ chi su̱ví veʼe va̱ʼa kúú veʼi̱ ta ña̱ʼa ña̱ kúúmiíi̱ ña̱ xa̱a̱ yatáva kúúña. Soo ñá síʼí iin ta̱ hermano táxi clase sa̱ndíkoñá-inii̱. Chi ni̱ka̱ʼa̱nñá xíʼi̱n, yiíñá xíʼin miíñá kúúna superintendente ña̱ circuito ta iin ña̱ kútóo va̱ʼakana kúúña kutáʼanna xíʼin hermano na̱ kúú espiritual su̱víka ña̱ koo ku̱a̱ʼá ña̱ʼana, chi saá íyo na̱yóʼo ndíʼi̱ní-inina xa̱ʼa chiñu Ndióxi̱ su̱víka ña̱ koo ku̱a̱ʼá ña̱ʼana. Ña̱yóʼo sa̱ndakaʼánña yi̱ʼi̱ xa̱ʼa ña̱ xi̱ka̱ʼa̱n siʼíi̱ xíʼinndi̱ tá ni̱xi̱yo válíndi̱: ‘Va̱ʼaka iin koʼo̱ nduchu̱ kuxuyó nu̱ú ma̱ní koo táʼanyóʼ” (Prov. 15:17). Ná kǒo kundi̱ʼi̱ní-iniyó, ña̱ xíniñúʼu keʼéyó kúúña ma̱ní na̱ kooyó xíʼin na̱ kánayó kixi veʼeyó.

18, 19. ¿Nda̱saa chíndeé táʼanña xíʼinyó ña̱ va̱ʼa koo iniyó xíʼin inkana?

¹⁸ Ña̱ ndákanixi̱níyó xa̱ʼa inkana. ¿Á íyo iin na̱ congregación na̱ kǒo kútóoyó ña̱ kéʼé? Sana kǒo kúni̱yó kanayó iin na̱ hermano na̱ kǒo kútóoyó ña̱ kéʼé á na̱ i̱xaa iin ña̱ʼa xíʼinyó tá ya̱chi̱, ta kǒo kívi nandosóyó xa̱ʼaña. Soo ña̱yóʼo kivi kuaʼnuña níma̱yó tá kǒo táváyóña.

¹⁹ Ña̱ Biblia káʼa̱nña ña̱ va̱ʼa ná koo iniyó xíʼin ndiʼina, ña̱yóʼo chindeé miíyó ña̱ va̱ʼa kutáʼanyó xíʼin nda̱a̱ na̱ sáa̱-iniyó xíniyó (kaʼvi Proverbios 25:21, 22). * Tá ná kanayóna xa̱a̱na veʼeyó saá nandosóyó xa̱ʼa ku̱a̱chi ña̱ ndo̱ʼoyó xíʼinna ta va̱ʼaka xa̱a̱yó kutáʼanyó  xíʼinna. Sana xa̱a̱yó kuniyó ña̱ va̱ʼava na̱ yiví kúúna ña̱kán ka̱na Jehová miína ña̱ ki̱xa̱a̱na sa̱kuaʼana xa̱ʼara (Juan 6:44). Tá ndixa xa̱ʼa ña̱ kúʼvi̱-iniyó xíniyó na̱ hermano kánayóna xa̱a̱na veʼeyó ni kǒo ndátuna ña̱ kanayóna, va̱ʼaníka xa̱a̱yó kutáʼanyó xíʼinna. ¿Ndáaña keʼéyó ña̱ va̱ʼa kunda̱a̱-iniyó á ndixa xíʼin ndinuʼu-iniyó kánayóna? Ña̱ va̱ʼa kunda̱a̱-iniyó ná kundiku̱nyó consejo ña̱ va̱xi nu̱ú Filipenses 2:3, nu̱ú káchiña ña̱ xíniñúʼu kooyó na̱ vitá-ini ta ná kundayáʼvika inkana nu̱úyó. Ña̱ nda̱a̱ kúúña ndiʼi na̱ hermano ndáyáʼvikana nu̱úyó, chi sana kándíxakana Ndióxi̱ nu̱ú miíyó, á ndakúka-inina nu̱ú miíyó á inkaka ña̱ va̱ʼa kúúmiína. Tá ná ndákanixi̱níyó ña̱ xíni̱kana nu̱ú miíyó, kuʼvi̱ka-iniyó kuniyóna ta va̱ása yo̱ʼvi̱ kooña nu̱úyó ña̱ kanayóna xa̱a̱na veʼeyó.

20. Tá xa̱a̱ ni̱ka̱ʼa̱nyó xíʼin iinna ña̱ ku̱ʼu̱nyó veʼena, ¿ndáaña xíniñúʼu keʼéyó?

²⁰ Ta̱ David ni̱nda̱ka̱tu̱ʼunra Jehová ndáaña xíniñúʼu keʼé iin na̱ kána Jehová ku̱ʼu̱n veʼera (Sal. 15:1). Iin ña̱ xíniñúʼu keʼéna kúú ña̱ sáxi̱nuna tu̱ʼunna ña̱ ni̱ka̱ʼa̱nna ni íxayo̱ʼvi̱ña xíʼinna (Sal. 15:4). Ña̱kán tá xa̱a̱ ni̱ka̱ʼa̱nyó xíʼin iinna ña̱ ku̱ʼu̱nyó veʼena va̱ása va̱ʼa ndikó-iniyó. Ta saá ná keʼéyó iin ña̱ ma̱ní ndo̱ʼo na̱ ka̱na miíyó (Mat. 5:37). Savana káʼa̱nna ku̱ʼu̱nna soo tándi̱ʼi kǒo xíínkana ku̱ʼu̱nna chi inkana ka̱nañaʼá ta kútóokana ku̱ʼu̱nna yóʼo. ¿Á su̱ví ña̱yóʼo kúni̱ kachiña ña̱ kǒo íxato̱ʼóna na̱ ka̱nañaʼá ta ni kǒo kúndáʼvi-inina xíninana? Ña̱ xíniñúʼu keʼéyó kúúña ná ku̱ʼu̱nyó ta xíʼin ndiʼi níma̱yó ná taxiyó tixaʼvi ndaʼa̱na xa̱ʼa nda̱a̱ ndáakaña ta̱xina ndaʼa̱yó (Luc. 10:7). Tá íyo iin ña̱ ndeéní ndo̱ʼoyó ta va̱ása kívi ku̱ʼu̱nyó ndi̱ku̱n kama ná ka̱ʼa̱nyó xíʼin na̱ ka̱na miíyó. Tasaá na̱ʼa̱yó ña̱ chíndayáʼviyó miína.

21. ¿Ndáaña keʼéyó ña̱ va̱ʼa ixato̱ʼóyó costumbre ñuu nu̱ú ndóoyó?

²¹ Saátu xíniñúʼu ixato̱ʼóyó costumbre ñuu nu̱ú ndóoyó. Sava ñuu kǒo ku̱a̱chi xa̱ʼaña tá iin kama ni̱xa̱a̱yó veʼena ta kǒo níka̱ʼa̱nyó ku̱ʼu̱nyó, ta sava ñuu siʼna xíniñúʼu ka̱ʼa̱nyó xíʼinna. Sava ñuu tá kánana iinna xáa̱na veʼena mií ña̱ va̱ʼaka ña̱ kúúmiína táxina kuxuna ta savatu ñuu inkáchi ña̱ xíxi ndiʼivana. Sava ñuu na̱ ku̱a̱ʼa̱n yóʼo níʼina loʼo ña̱ʼa ku̱a̱ʼa̱nna, savatu ñuu kǒo ña̱yóʼo kéʼéna. Sava ñuu xíniñúʼu ka̱ʼa̱nna u̱vi̱ á u̱ni̱ yichi̱ xíʼinna ta saáví ku̱ʼu̱nna ta inkatu ñuu tá ná keʼéna ña̱yóʼo su̱ví na̱ to̱ʼó kúúna. Nda̱saaka íyo costumbre ñuu nu̱ú ndóoyó vií ná keʼéyó ña̱ va̱ʼa sakusi̱íyó-ini na̱ ka̱na miíyó.

22. ¿Nda̱chun ndáyáʼviní ña̱ va̱ʼa koo iniyó xíʼin táʼanyó?

²² Vitinka kúú míí ña̱ ndixa xínu tu̱ʼun ña̱ ni̱ka̱ʼa̱n ta̱ Pedro: “Xa̱a̱ ku̱yatin ndiʼi-xa̱ʼa ndiʼi ña̱ʼa” (1 Ped. 4:7). Va̱xi iin tu̱ndóʼo káʼnu nu̱úyó ta va̱ása ndikókaña kooña. Xa̱ʼa ña̱ kinika ku̱a̱ʼa̱n ndúu, xíniñúʼu kuʼvi̱níka-iniyó kuni táʼanyó. Xíniñúʼu kundiku̱nyó consejo ña̱ ta̱xi ta̱ Pedro ña̱ va̱ʼa koo iniyó xíʼin táʼanyó (1 Ped. 4:9). Ña̱ va̱ʼa koo iniyó xíʼin táʼanyó ndáyáʼviní ña̱ keʼéyó ña̱yóʼo ndiʼi tiempo.