1. Nda̱a̱ táki̱ʼva káchi 1 Pedro 3:8, ¿nda̱chun kúsi̱í-iniyó xíʼin na̱ ndíʼi̱-ini xa̱ʼa̱ ña̱ ndóʼoyó?

NDIʼIYÓ kúsi̱íní-iniyó tá íyoyó xíʼin na̱ yiví na̱ ndíʼi̱-ini xa̱ʼa̱ ña̱ ndóʼoyó. Na̱yóʼo chíka̱a̱na ndee̱ ña̱ kunda̱a̱-inina xíʼin ña̱ ndóʼoyó á ña̱ ndákanixi̱níyó. Xítona ndáaña ndóʼoyó ta chíndeétáʼanna xíʼinyó, ni kuma̱níka káʼa̱nyó xíʼinna. Miíyó kúʼvi̱ní-iniyó xíniyó na̱ kúnda̱a̱-ini xíʼin ña̱ ndóʼoyó ta ndíʼi̱-inina xa̱ʼa̱yó, * nda̱a̱ táki̱ʼva káchi 1 Pedro 3:8 (kaʼviña). *

2. ¿Nda̱chun kivi ixayo̱ʼvi̱ña xíʼinyó ña̱ kunda̱a̱-iniyó xíʼin ña̱ ndóʼo inkana ta kundi̱ʼi̱-iniyó xa̱ʼa̱na?

² Ndiʼi miíyó na̱ ndásakáʼnu Ndióxi̱ xíniñúʼu na̱ʼa̱yó ña̱ kúnda̱a̱-iniyó xíʼin ña̱ ndóʼo inkana ta kundi̱ʼi̱-iniyó xa̱ʼa̱na. Soo sava íxayo̱ʼvi̱ña xíʼinyó ña̱ keʼéyóña. ¿Nda̱chun? Xa̱ʼa̱ ña̱ kúúyó na̱ yiví ku̱a̱chi íxayo̱ʼvi̱ña xíʼinyó ña̱ ndakanixi̱níyó xa̱ʼa̱ ña̱ ndóʼo inkana, soo ná chika̱a̱yó ndee̱ ña̱ va̱ása ndakanixi̱níyó xa̱ʼa̱ mií kuitíyó (Rom. 3:23). Savatuyó íxayo̱ʼvi̱ña xíʼinyó xa̱ʼa̱ ña̱ saá xa̱ʼnuyó á xa̱ʼa̱ ña̱ ndo̱ʼoyó tá ya̱chi̱, á íxayo̱ʼvi̱tuña xíʼinyó xa̱ʼa̱ ña̱ xítoyó ña̱ kéʼé na̱ ñuyǐví, saáchi tiempo nu̱ú ndíʼi vitin ku̱a̱ʼání na̱ yiví kǒo ndíʼi̱-inina xa̱ʼa̱ ña̱ ndóʼo inkana, chi xa̱ʼa̱ mií kuitívana ndíʼi̱-inina (2 Tim. 3:1, 2). ¿Ndáaña kivi chindeétáʼan xíʼinyó ña̱ va̱ʼa kundi̱ʼi̱-iniyó xa̱ʼa̱ inkana?

3. a) ¿Ndáaña chindeétáʼanka xíʼinyó ña̱ va̱ʼa kunda̱a̱-iniyó xíʼin ña̱ ndóʼo inkana ta kundi̱ʼi̱-iniyó xa̱ʼa̱na? b) ¿Ndáaña sakuaʼayó nu̱ú artículo yóʼo?

 ³ Iin ña̱ kivi chindeétáʼan xíʼinyó ña̱ va̱ʼa kunda̱a̱-iniyó xíʼin ña̱ ndóʼo inkana ta kundi̱ʼi̱-iniyó xa̱ʼa̱na kúú ña̱ kundiku̱nyó yichi̱ Jehová xíʼin se̱ʼera ta̱ Jesús. Iin Ndióxi̱ ta̱ kúʼvi̱ní-ini xíni miíyó kúú Jehová, ta chínúura iin yichi̱ ña̱ va̱ʼaní nu̱úyó (1 Juan 4:8). Ta̱ Jesús va̱ʼaní ni̱na̱ʼa̱ra ndáa ki̱ʼva íyo yivára (Juan 14:9). Tá ni̱xi̱yora nu̱ú ñuʼú yóʼo, va̱ʼaní ni̱na̱ʼa̱ra ña̱ kiviva kunda̱a̱-ini na̱ yiví xíʼin ña̱ ndóʼo inkana. Nu̱ú ña̱ artículo yóʼo, siʼna kunda̱a̱-iniyó nda̱saa náʼa̱ Jehová xíʼin ta̱ Jesús ña̱ kúnda̱a̱-inina xíʼin ña̱ ndóʼo inkana ta ndíʼi̱-inina xa̱ʼa̱na, ta so̱ndíʼi kunda̱a̱-iniyó nda̱saa kivi kundiku̱nyó yichi̱na.

4. ¿Nda̱saa náʼa̱ Isaías 63:7-9 nu̱úyó ña̱ ndíʼi̱ní-ini Jehová xa̱ʼa̱ na̱ ndásakáʼnu-ñaʼá?

⁴ Ña̱ Biblia káʼa̱nña ña̱ ndíʼi̱ní-ini Jehová xa̱ʼa̱ ña̱ ndóʼo na̱ ndásakáʼnu-ñaʼá. Ná kotoyó ndáaña ndo̱ʼo Jehová tá xi̱nira ni̱ya̱ʼa na̱ ñuu Israel nu̱ú tu̱ndóʼo. Tu̱ʼun Ndióxi̱ káchiña: “Ndiʼi tiempo ña̱ ni̱xo̱ʼvi̱na, ni̱xo̱ʼvi̱tu ta̱yóʼo xíʼinna” (kaʼvi Isaías 63:7-9). * Tá ni̱ya̱ʼa tiempo, Jehová xi̱niñúʼura ta̱ profeta Zacarías ña̱ ni̱ka̱ʼa̱nra, tá xi̱keʼéna ña̱ va̱ása va̱ʼa xíʼin na̱ ñuura, nda̱a̱ tá íyo na̱ sáxo̱ʼvi̱ miíra saá íyona. Ni̱ka̱ʼa̱nra xíʼin na̱ nda̱sakáʼnu-ñaʼá ña̱yóʼo: “Na̱ kéʼé ndóʼó nda̱a̱ táki̱ʼva íyo na̱ kéʼé nduchúnu̱úi̱ saá íyona” (Zac. 2:8). Ña̱yóʼo náʼa̱ña ña̱ ndíʼi̱ní-ini Jehová xa̱ʼa̱ na̱ ñuura.

5. Ka̱ʼa̱n xa̱ʼa̱ iin ejemplo ña̱ náʼa̱ nda̱saa chíndeétáʼan Jehová xíʼin na̱ ndásakáʼnu-ñaʼá tá xóʼvi̱na.

⁵ Tá yáʼa na̱ ndásakáʼnu Jehová nu̱ú tu̱ndóʼo, su̱ví kuití kúndáʼvi-inira xínirana, chi ndúkúra ndáa ki̱ʼva chindeétáʼanra xíʼinna. Ná kotoyó iin ña̱ ku̱u. Tá kúúka na̱ israelita esclavo ña̱ ñuu Egipto, Jehová ni̱xo̱ʼvi̱-inira tá xi̱nira ña̱ xóʼvi̱nína, ta xa̱ʼa̱ ña̱yóʼo sa̱kǎkurana. Ni̱ka̱ʼa̱nra xíʼin ta̱ Moisés: “Xi̱ni̱i̱ ña̱ xóʼvi̱ní na̱ ñuui̱ [...] chi xíni̱i̱ va̱ʼi̱ xa̱ʼa̱ ña̱  xóʼvi̱na. Ta vitin va̱xii̱ sakǎkui̱na ndaʼa̱ na̱ ñuu Egipto” (Éx. 3:7, 8). Ku̱ndáʼviní-inira xi̱nirana, ta sa̱kǎkurana nu̱ú ña̱ xóʼvi̱na. Tá ni̱ya̱ʼa loʼo tiempo, tá íyona nu̱ú ñuʼú ña̱ ta̱xi Jehová ndaʼa̱na, ñuu na̱ sáa̱-ini xíniñaʼá ka̱nitáʼanna xíʼinna. ¿Ndáaña ke̱ʼé Jehová? Ña̱ Biblia káchiña ña̱ ni̱kusuchíní-inira, xa̱ʼa̱ ña̱ sa̱xóʼvi̱nana. Ña̱kán chi̱ndeétáʼanra xíʼinna, chi̱ndaʼára na̱ juez ña̱ sakǎkunana ndaʼa̱ na̱ sáa̱-ini xíniñaʼá (Juec. 2:16, 18).

6. Ka̱ʼa̱n xa̱ʼa̱ iin ña̱ ke̱ʼé Jehová ña̱ ki̱ʼinra kuenta xíʼin ña̱ ndo̱ʼo iin ta̱ va̱ása va̱ʼa níndakanixi̱ní.

⁶ Jehová kíʼinra kuenta xíʼin ña̱ ndóʼo na̱ ndásakáʼnu-ñaʼá ni sava yichi̱ va̱ása va̱ʼa ndákanixi̱nína. Ná kotoyó ña̱ ndo̱ʼo ta̱ profeta Jonás. Ndióxi̱ chi̱ndaʼárara ña̱ ku̱ʼu̱nra natúʼunra xíʼin na̱ ñuu Nínive xa̱ʼa̱ ña̱ kundoʼona. Soo tándi̱ʼi, na̱yóʼo nda̱ndikó-inina ta ku̱káʼnu-ini Jehová xa̱ʼa̱na. Xa̱ʼa̱ ña̱yóʼo ni̱sa̱a̱ní ta̱ Jonás, chi ña̱ ni̱ka̱ʼa̱nra va̱ása níxi̱nuña. Soo Jehová kúee ni̱xi̱yo inira xíʼinra ta chi̱ndeétáʼanra xíʼinra ña̱ na̱samara ña̱ ndákanixi̱níra (Jon. 3:10–4:11). Tá ni̱ya̱ʼa tiempo ku̱nda̱a̱-ini ta̱ Jonás ndáaña ku̱u, xa̱ʼa̱ ña̱yóʼo Ndióxi̱ ni̱ka̱ʼa̱nra xíʼinra ña̱ ná kaʼyíra ña̱ ke̱ʼéra ña̱ va̱ʼa chindeétáʼanña xíʼinyó (Rom. 15:4). *

7. ¿Nda̱chun va̱ʼa kúniyó tá kúnda̱a̱-iniyó xa̱ʼa̱ ña̱ ke̱ʼé Jehová xíʼin na̱ nda̱sakáʼnu-ñaʼá?

⁷ Ña̱ ke̱ʼé Jehová xíʼin na̱ nda̱sakáʼnu-ñaʼá chíndeétáʼanña xíʼinyó ña̱ kúnda̱a̱-iniyó ña̱ ndíʼi̱ní-inira xíʼin ña̱ ndóʼoyó. Kíʼinníra kuenta xíʼin ña̱ ndóʼo iin iinyó. Saáchi miíra “xíni̱ va̱ʼa ña̱ ndíka̱a̱ níma̱ na̱ ñuyǐví” (2 Crón. 6:30). Xa̱ʼa̱ ña̱yóʼo va̱ʼa kúnda̱a̱-inira xa̱ʼa̱ ña̱ ndákanixi̱níyó, ña̱ íyo níma̱yó, xíʼin ndiʼi ña̱ va̱ása kúchiñu keʼéyó. Ta káʼa̱nra xíʼinyó ña̱ va̱ása taxira xo̱ʼvi̱yó xíʼin ña̱ va̱ása kundeé-iniyó xíʼin (1 Cor. 10: 13). ¿Á su̱ví nda̱a̱ va̱ʼa kúniyó ña̱ kúnda̱a̱-iniyó xa̱ʼa̱ ña̱yóʼo?

8-10. ¿Ndáaña chi̱ndeétáʼan xíʼin ta̱ Jesús ña̱ va̱ʼa ni̱ndi̱ʼi̱-inira xa̱ʼa̱ na̱ yiví?

⁸ Tá ni̱xi̱yo ta̱ Jesús nu̱ú ñuʼú yóʼo ni̱na̱ʼa̱ra ña̱ ni̱ndi̱ʼi̱-inira xa̱ʼa̱ inkana. Ke̱ʼéra ña̱yóʼo xa̱ʼa̱ u̱ni̱ ña̱ʼa. Ña̱ nu̱ú, táki̱ʼva xa̱a̱ ni̱ka̱ʼa̱nyó, ta̱ Jesús va̱ʼaní ni̱na̱ʼa̱ra ndáa ki̱ʼva íyo yivára. Xi̱kuʼvi̱-inira xi̱xinira na̱ yiví táki̱ʼva kéʼé Jehová. Ni ku̱si̱íní-inira xa̱ʼa̱ ña̱ chi̱ndeétáʼanra xíʼin yivára tá ku̱va̱ʼa ndiʼi ña̱ʼa, soo na̱ xi̱kuni̱níkara xi̱xinira kúú na̱ yiví (Prov. 8:31). Xa̱ʼa̱ ña̱ ni̱kuʼvi̱-inira xi̱nirana ni̱ndi̱ʼi̱-inira xa̱ʼa̱ ña̱ ndóʼona.

⁹ Ña̱ u̱vi̱, ta̱ Jesús va̱ʼa xi̱xitora níma̱ na̱ yiví nda̱a̱ táki̱ʼva kéʼé Jehová, va̱ʼa xi̱kunda̱a̱-inira xa̱ʼa̱ ña̱ ndóʼona xíʼin ña̱ ndákanixi̱nína (Mat. 9:4; Juan 13:10, 11). Ña̱kán tá xi̱kiʼinra kuenta ña̱ xi̱kusuchí-ini na̱ yiví á xi̱ndakava-inina, ña̱yóʼo chi̱ndeétáʼan xíʼinra ña̱ va̱ʼa sa̱ndíkoora-inina (Is. 61:1, 2; Luc. 4:17-21).

¹⁰ Ña̱ u̱ni̱, nda̱a̱ mií ta̱ Jesús ni̱ya̱ʼa nu̱ú sava tu̱ndóʼo táʼan ña̱ ndóʼo na̱ yiví. Tá kúú ta̱ Jesús xa̱ʼnura xíʼin iin familia na̱ ndáʼvi. Tá kúú ña̱ ka̱chíñura xíʼin yivá ndáʼvira ta̱ José, sa̱kuaʼara keʼéra chiñu ña̱ ve̱e (Mat. 13:55; Mar. 6:3). Saátu ku̱nda̱a̱-inira ndáaña ndóʼo savana tá xíʼi̱ iin na̱ veʼena, chi sana ta̱ José ni̱xi̱ʼi̱ra tá kuma̱níka kixáʼa ta̱ Jesús natúʼunra xa̱ʼa̱ Ndióxi̱. Saátu ku̱nda̱a̱-inira ndáaña ndóʼo savana tá va̱ása sákuaʼa na̱ veʼena xa̱ʼa̱ Ndióxi̱ (Juan 7:5). Ña̱yóʼo xíʼin inkaka ña̱ ndo̱ʼora chi̱ndeétáʼan xíʼinra ña̱ va̱ʼa ku̱nda̱a̱-inira ndáaña ndóʼo na̱ yiví.

11. ¿Ama kúú ña̱ ku̱nda̱a̱-ini ta̱ Jesús xíʼin ña̱ ndóʼo na̱ yiví ta ni̱ndi̱ʼi̱-inira xa̱ʼa̱na? (Koto na̱ʼná ña̱ va̱xi chí nu̱ú kíxáʼaña).

¹¹ Ta̱ Jesús ni̱na̱ʼa̱ra ña̱ ku̱nda̱a̱-inira xíʼin ña̱ ndóʼo na̱ yiví ta ni̱ndi̱ʼi̱-inira xa̱ʼa̱na tá  xi̱keʼéra milagro. Va̱ása níkeʼéraña xíʼin ña̱ ndúxa, chi xa̱ʼa̱ ña̱ ku̱ndáʼvi-inira xi̱nira na̱ xóʼvi̱ kúú ña̱ ke̱ʼéraña (Mat. 20:29-34; Mar. 1:40-42). Ná ndakanixi̱níyó nda̱saa ndo̱ʼora tá ni̱xa̱ʼa̱n xíkara xíʼin iin ta̱a ta̱ va̱ása xíniso̱ʼo ña̱ va̱ʼa sandáʼarara, saátu tá sa̱ndátakura se̱ʼe iin ñá nána ñá ni̱xi̱ʼi̱ yií (Mar. 7:32-35; Luc. 7:12-15). Ta̱ Jesús ku̱nda̱a̱-inira xíʼin ña̱ ndóʼo na̱ yiví ta xi̱kuni̱ra chindeétáʼanra xíʼinna.

12. Nda̱a̱ táki̱ʼva káchi Juan 11:32-35, ¿nda̱saa ni̱na̱ʼa̱ ta̱ Jesús ña̱ ku̱nda̱a̱-inira xíʼin ña̱ ndo̱ʼo ñá Marta xíʼin ñá María?

¹² Tá ni̱xi̱ʼi̱ ta̱ Lázaro, ta̱ Jesús ni̱na̱ʼa̱ra ña̱ ku̱nda̱a̱-inira xíʼin ña̱ ndo̱ʼo ñá Marta xíʼin ñá María. Tá xi̱nira ña̱ xóʼvi̱ná, “saá ki̱xáʼa ta̱ Jesús xákura” (kaʼvi Juan 11:32-35). * Su̱ví kuití níxakura xa̱ʼa̱ ña̱ va̱ása íyoka migora ta̱ Lázaro. Chi xíni̱vara ña̱ kivi sandátakurara. Xa̱kura chi ni̱xo̱ʼvi̱-inira tá xi̱nira xóʼvi̱ ná Marta xíʼin ñá María.

13. ¿Nda̱saa chíndeétáʼanña xíʼinyó ña̱ sákuaʼayó xa̱ʼa̱ ña̱ ku̱nda̱a̱-ini ta̱ Jesús xíʼin ña̱ ndóʼo na̱ yiví ta ni̱ndi̱ʼi̱-inira xa̱ʼa̱na?

¹³ Miíyó xa̱a̱ síín íyoyó nu̱ú ta̱ Jesús chi na̱ yiví ku̱a̱chi kúúyó. Soo kivi sakuaʼayó ku̱a̱ʼá ña̱ʼa xíʼin ña̱ ke̱ʼéra, ta kúʼvi̱ní-iniyó xíniyóra xa̱ʼa̱ ña̱ va̱ʼaní ni̱xi̱yo inira xíʼin na̱ yiví (1 Ped. 1:8). Kúsi̱íní-iniyó xa̱ʼa̱ ña̱ kúnda̱a̱-iniyó ña̱ kúúra rey ta̱ nda̱ka̱xin Ndióxi̱ kaʼndachíñu, ta si̱lóʼo kúma̱ní ña̱ sandiʼi-xa̱ʼa̱ra ndiʼi ña̱ sáxo̱ʼvi̱ na̱ yiví. Xa̱ʼa̱ ña̱ xi̱kuu ta̱ Jesús iin na̱ yiví táʼan miíyó, xa̱ʼa̱ ña̱yóʼo kuchiñura sandiʼi-xa̱ʼa̱ra ndiʼi tu̱ndóʼo ña̱ táxi ta̱ Ndi̱va̱ʼa. Kúsi̱íní-iniyó xa̱ʼa̱ ña̱ kúú ta̱ Jesús rey nu̱úyó ta̱ kúndáʼvi-ini xíni miíyó (Heb. 2:17, 18; 4:15, 16).

14. Xa̱ʼa̱ ña̱ káʼa̱n Efesios 5:1, 2, ¿ndáaña kúni̱yó keʼéyó?

¹⁴ Tá sákuaʼayó xa̱ʼa̱ ña̱ kéʼé Jehová xíʼin ta̱ Jesús, kúni̱yó kundiku̱nyó yichi̱na (kaʼvi Efesios 5:1, 2). * Ña̱ nda̱a̱ kúúña miíyó va̱ása kívi kotoyó ndáaña íyo níma̱ na̱ yiví, soo kiviva kunda̱a̱-iniyó xíʼin ña̱ ndóʼona (2 Cor. 11:29). Na̱ yiví na̱ íyo tiempo vitin va̱ása ndíʼi̱-inina xa̱ʼa̱ inkana, soo miíyó chíka̱a̱yó ndee̱ ña̱ keʼéyó ña̱ ni̱ka̱ʼa̱n ta̱ Pablo: “Su̱ví xa̱ʼa̱ iinlá mií kuitíndó ndi̱ʼi̱-inindó, saátu ndi̱ʼi̱-inindó xa̱ʼa̱ inkavana” (Filip. 2:4).

15. ¿Ndáana xíniñúʼu na̱ʼa̱ka ña̱ kúnda̱a̱-inina xíʼin ña̱ ndóʼo inkana ta ndíʼi̱-inina xa̱ʼa̱na?

¹⁵ Na̱ anciano ti̱xin congregación kúú na̱ xíniñúʼu na̱ʼa̱ka ña̱ kúnda̱a̱-inina xíʼin ña̱ ndóʼo inkana. Xíni̱na ña̱ ndatiin Jehová ku̱a̱chi xíʼinna tá va̱ása ndáana ndikachi sa̱na̱ra (Heb. 13:17). Tá chíndeétáʼanna xíʼin na̱ hermano, xíniñúʼu kunda̱a̱-inina xíʼin ña̱ ndóʼona. ¿Nda̱saa náʼa̱na ña̱yóʼo?

16. ¿Ndáaña kéʼé na̱ anciano na̱ kúnda̱a̱-ini xíʼin ña̱ ndóʼo inkana, ta nda̱chun ndáyáʼviní ña̱yóʼo?

¹⁶ Na̱ anciano na̱ kúnda̱a̱-ini xíʼin ña̱ ndóʼo inkana távána tiempo ña̱ natúʼunna xíʼin na̱ hermano. Kéʼéna pregunta xíʼinna ta vií xíniso̱ʼona ña̱ káʼa̱n na̱yóʼo. Ndáyáʼviní ña̱yóʼo tá iin na̱ hermano kúni̱na natúʼunna xa̱ʼa̱ ña̱ ndóʼona xíʼinna, soo va̱ása kúnda̱a̱-inina ndáaña ka̱ʼa̱nna (Prov. 20:5). Soo tá na̱ anciano távána tiempo ña̱ va̱ʼa kuniso̱ʼona na̱ hermano yóʼo, saá kúú ña̱ va̱ʼaníka kandíxa táʼanna, va̱ʼaka kitáʼanna ta kuʼvi̱ka-inina kuni táʼanna (Hech. 20:37).

17. ¿Ndáaña kéʼé na̱ anciano kúú ña̱ ndáyáʼviníka nu̱ú na̱ hermano? Ka̱ʼa̱n xa̱ʼa̱ iin ejemplo.

¹⁷ Ku̱a̱ʼání na̱ hermano káʼa̱nna ña̱  ndáyáʼviníka nu̱úna kúú ña̱ ndíʼi̱ní-ini na̱ anciano xa̱ʼa̱ ña̱ ndóʼo inkana. ¿Nda̱chun? Ñá Adelaide káʼa̱nñá: “Va̱ása ixayo̱ʼvi̱ña xíʼinyó ña̱ ka̱ʼa̱nyó xíʼinna chi xíni̱yó ña̱ kunda̱a̱va-inina xíʼin ña̱ ndóʼoyó”. Káʼa̱nkañá: “Kíʼinyó kuenta ña̱ kúnda̱a̱-inina xíʼin ña̱ ndóʼoyó ta ndíʼi̱-inina xa̱ʼa̱yó xíʼin ña̱ kéʼéna tá káʼa̱nyó xíʼinna”. Iin ta̱ hermano ndákaʼánra: “Tá ni̱ka̱ʼi̱n xíʼin iin ta̱ anciano xa̱ʼa̱ ña̱ ndóʼi̱, iin kúni̱ kuakura. Ni va̱ása nandósó-inii̱ xa̱ʼa̱ ña̱yóʼo” (Rom. 12:15).

18. ¿Nda̱saa kivi na̱ʼa̱yó ña̱ kúnda̱a̱-iniyó xíʼin ña̱ ndóʼo inkana?

¹⁸ Ndiʼivayó kivi na̱ʼa̱ ña̱ kúnda̱a̱-iniyó xíʼin ña̱ ndóʼo inkana ta ndi̱ʼi̱-iniyó xa̱ʼa̱na, su̱ví nda̱saa na̱ anciano xíniñúʼu keʼé ña̱yóʼo. ¿Nda̱saa kivi keʼéyóña? Ná chika̱a̱yó ndeé ña̱ kunda̱a̱-iniyó xa̱ʼa̱ ña̱ ndóʼo na̱ veʼeyó á na̱ hermanoyó. Ná kundi̱ʼi̱-iniyó xa̱ʼa̱ na̱ va̱lí, na̱ ndeé ndóʼo, na̱ xa̱a̱ chée á na̱ xóʼvi̱ xa̱ʼa̱ ña̱ ni̱xi̱ʼi̱ iin na̱ veʼena. Ná nda̱ka̱tu̱ʼunyóna á íyo va̱ʼana ta viíní ná kuniso̱ʼoyó ña̱ ka̱ʼa̱nna xíʼinyó. Ná na̱ʼa̱yó ña̱ ndixa ndíʼi̱-iniyó xa̱ʼa̱na. Tá kúúmiíyó ña̱ kivi chindeétáʼanyó xíʼinna ná keʼéyóña. Tá kéʼéyó ña̱yóʼo náʼa̱yó ña̱ ndixa kúʼvi̱-iniyó xíniyóna (1 Juan 3:18).

19. ¿Nda̱chun va̱ása xíniñúʼu ixandúxayó xíʼin inkana tá kúni̱yó chindeétáʼanyó xíʼinna?

¹⁹ Tá kúni̱yó chindeétáʼanyó xíʼin inkana, va̱ása xíniñúʼu ixandúxayó xíʼinna chi su̱ví ndiʼina inkáchi ndákanixi̱nína xa̱ʼa̱ ña̱ ndóʼona. Savana nátúʼunvana xíʼinyó xa̱ʼa̱ ña̱ ndóʼona, soo inkana xa̱a̱ síín íyo inina. Xa̱ʼa̱ ña̱yóʼo ni kúni̱yó chindeétáʼanyó xíʼinna, ná kǒo nda̱ka̱tu̱ʼunyóna xa̱ʼa̱ ña̱ kivi kúkaʼan nu̱úna xíʼin (1 Tes. 4:11). Nda̱a̱ sava yichi̱ tá nátúʼun iinna xíʼinyó xa̱ʼa̱ ña̱ ndóʼona, sana va̱ása inkáchi ndakanixi̱níyó xíʼinna. Soo xíniñúʼu kunda̱a̱-iniyó ña̱ saá íyo ña̱ ndóʼo na̱kán. Ná kuniso̱ʼoyó ña̱ káʼa̱nna xíʼinyó ta ná kundatuyó ta saá ndakuiinyó yuʼúna (Mat. 7:1; Sant. 1:19).

20. ¿Ndáaña sakuaʼayó nu̱ú inka artículo?

²⁰ Su̱ví kuití ti̱xin congregación xíniñúʼu na̱ʼa̱yó ña̱ ndíʼi-iniyó xa̱ʼa̱ inkana chi saátu xíniñúʼu keʼéyó tá ku̱a̱ʼa̱nyó nátúʼunyó xa̱ʼa̱ Ndióxi̱. ¿Nda̱saa kivi na̱ʼa̱yó ña̱yóʼo? Nu̱ú inka artículo sakuaʼayó xa̱ʼa̱ña.