1, 2. a) ¿Ndáa ki̱ʼva káʼa̱n Jehová xíʼin miíyó na̱ yiví? b) ¿Ndáaña sakuaʼayó nu̱ú artículo yóʼo?

KÚTÓONÍ Jehová ka̱ʼa̱nra xíʼinyó. Kéʼéraña ña̱ va̱ʼa ná kunda̱a̱-iniyó xa̱ʼa̱ ña̱ ndákanixi̱níra xíʼin ña̱ kéʼéra. Ña̱ va̱ʼa ke̱ʼéra ña̱yóʼo tá tiempo xi̱naʼá xi̱niñúʼura na̱ profeta xíʼin na̱ ángel xíʼin se̱ʼera ta̱ Jesús (Amós 3:7; Gál. 3:19; Rev. 1:1). Ta tiempo vitin, xíniñúʼura tu̱ʼunra ña̱ Biblia ña̱ va̱ʼa káʼa̱nra xíʼinyó.

² Saátu, tá ni̱xi̱yo ta̱ Jesús nu̱ú ñuʼú yóʼo, u̱ni̱ yichi̱ xi̱niso̱ʼora ña̱ ni̱ka̱ʼa̱n Jehová chí ndiví. Ná kotoyó ndáaña ni̱ka̱ʼa̱nra, ta ndáaña sakuaʼayó xíʼin ña̱yóʼo ta saátu ndáaña va̱ʼa ndakiʼinyó xíʼinña.

3. Táki̱ʼva káchi Marcos 1:9-11, ¿ndáaña ni̱ka̱ʼa̱n Jehová tá nda̱kuchi ta̱ Jesús, ta ndáaña ni̱na̱ʼa̱ra xíʼin tu̱ʼun yóʼo?

³ (Kaʼvi Marcos 1:9-11). * Ña̱yóʼo kúú ña̱ nu̱ú yichi̱ ña̱ ni̱ka̱ʼa̱n Jehová chí ndiví. Ka̱chira: “Yóʼó kúú se̱ʼei̱, ta̱ kúni̱níi̱ xínii̱; yi̱ʼi̱ kúú ta̱ nda̱ka̱xin yóʼó”. Ni̱kusi̱íní-ini ta̱ Jesús tá xi̱niso̱ʼora ña̱ ni̱ka̱ʼa̱n yivára ña̱ kúni̱níra xínirara xíʼin ña̱ kándíxarara. Ná káʼa̱nyó xa̱ʼa̱ u̱ni̱ ña̱ ndáyáʼviní ni̱ka̱ʼa̱n Jehová: ña̱ kúú ta̱ Jesús se̱ʼera, ña̱ kúni̱níra xínirara xíʼin ña̱ nda̱ka̱xinrara.

4. Tá nda̱kuchi ta̱ Jesús, ¿nda̱saa tuku nda̱kutáʼanra xíʼin Jehová?

 ⁴ “Yóʼó kúú se̱ʼei̱”. Xíʼin tu̱ʼun yóʼo ni̱ka̱ʼa̱n Jehová ña̱ miíra xíʼin se̱ʼera tuku kítáʼanna. Tá ni̱xi̱yo ta̱ Jesús chí ndiví xi̱kuura iin espíritu, ta xi̱kuutura se̱ʼe Ndióxi̱. Soo tá nda̱kuchira nda̱kiʼinra espíritu santo. Ta ndu̱ura se̱ʼera ta̱ nda̱ka̱xinra, ta ndikó tukura chí ndiví ña̱ xa̱a̱ra koora rey saátu koora su̱tu̱ (Luc. 1:31-33; Heb. 1:8, 9; 2:17). Ña̱kán tá nda̱kuchi ta̱ Jesús, va̱ʼaní ni̱ka̱ʼa̱n yivára xa̱ʼa̱ra: “Yóʼó kúú se̱ʼei̱” (Luc. 3:22).

5. Nda̱a̱ táki̱ʼva ke̱ʼé Jehová, ¿ndáaña xíniñúʼu keʼéyó?

⁵ “Yóʼó kúú [...] ta̱ kúni̱níi̱ xínii̱”. Táki̱ʼva ke̱ʼé Jehová ni̱na̱ʼa̱ra ña̱ kúʼvi̱-inira xínira ta̱ Jesús ta ta̱xira ndee̱ ndaʼa̱ra, saá xíniñúʼu keʼé miíyó xíʼin inka na̱ hermano (Juan 5:20). Ki̱vi̱ táxi iin na̱ kúʼvi̱ní-iniyó xíniyó tíxa̱ʼvi ndaʼa̱yó xa̱ʼa̱ iin ña̱ va̱ʼa ke̱ʼéyó kúsi̱íní-iniyó. Saátu xíniñúʼu na̱ʼa̱yó ña̱ kúʼvi̱-iniyó xíniyó na̱ hermano ti̱xin congregación xíʼin na̱ veʼeyó ta ka̱ʼa̱nyó tu̱ʼun va̱ʼa xíʼinna. Tá saá kéʼéyó, va̱ʼaní chindeétáʼanyó xíʼinna ña̱ va̱ʼa kándíxakana Jehová, ta nda̱kúka koo inina xíʼinra. Ndáyáʼviní ña̱ ná chika̱a̱ na̱ íyo se̱ʼe ndee̱ xíʼin se̱ʼena, soo xíʼin ña̱ si̱í-ini ná keʼéna ña̱yóʼo. Saá kúú ña̱ va̱ʼaní chindeétáʼanna xíʼinna ña̱ keʼéna ña̱ va̱ʼa.

6. ¿Nda̱chun kivi kandíxayó ta̱ Jesús?

⁶ “Yi̱ʼi̱ kúú ta̱ nda̱ka̱xin yóʼó”. Xa̱ʼa̱ ña̱ ni̱ka̱ʼa̱n Jehová ña̱yóʼo ni̱na̱ʼa̱ra ña̱ keʼéva ta̱ Jesús ña̱ kúni̱ra. Tá mií Jehová va̱ʼaní ka̱ndíxara se̱ʼera, saátu xíniñúʼu kandíxayó ña̱ saxínu ta̱ Jesús ña̱ kúni̱ yivára (2 Cor. 1:20). Ki̱vi̱ ndákanixi̱níyó xa̱ʼa̱ yichi̱ ña̱ nda̱koo ta̱ Jesús ña̱ nda̱kúní ni̱xi̱yo inira, kúni̱kayó sakuaʼayó xa̱ʼa̱ra ta kundiku̱nkayó yichi̱ra. Jehová kúni̱ra ña̱  ndiʼi na̱ ndásakáʼnu-ñaʼá ná sakuaʼana xa̱ʼa̱ se̱ʼera (1 Ped. 2:21).

7. Nda̱a̱ táki̱ʼva káchi Mateo 17:1-5, ¿ndáa inka yichi̱ ni̱ka̱ʼa̱n Jehová chí ndiví, ta ndáaña ni̱ka̱ʼa̱nra?

⁷ (Kaʼvi Mateo 17:1-5). * Yichi̱ u̱vi̱ ña̱ ni̱ka̱ʼa̱n Jehová chí ndiví kúú, ña̱ tá na̱sama ta̱ Jesús. Ta̱yóʼo ni̱ka̱ʼa̱nra xíʼin ta̱ Pedro, ta̱ Santiago xíʼin ta̱ Juan ña̱ ná ku̱ʼu̱nna xíʼinra iin yuku̱ ña̱ súkun. Kán kúú nu̱ú xi̱nina iin visión. Nu̱ú ta̱ Jesús iin nda̱ye̱ʼe̱ña saátu ti̱ko̱to̱ra. Ta u̱vi̱ na̱ náʼa̱ táki̱ʼva náʼa̱ ta̱ Moisés xíʼin ta̱ Elías, ki̱xáʼana káʼa̱nna xíʼin ta̱ Jesús xa̱ʼa̱ ña̱ kuvira xíʼin ña̱ ndatakura. Ta na̱ u̱ni̱ apóstolra kúni̱nína ku̱su̱nna, soo xi̱nina ña̱ visión yóʼo tá xa̱a̱ nda̱káxin-inina (Luc. 9:29-32). Tándi̱ʼi, iin nda̱sina xíʼin vi̱kó ña̱ yéʼe̱, ta ti̱xin ña̱yóʼo ni̱ka̱ʼa̱n Ndióxi̱. Táki̱ʼva ke̱ʼéra tá nda̱kuchi ta̱ Jesús, saá ke̱ʼé tukura ña̱ ni̱na̱ʼa̱ra ña̱ kúʼvi̱ní-inira xínira se̱ʼera, ta ni̱ka̱ʼa̱nra: “Ta̱yóʼo kúú se̱ʼei̱, ta̱ kúni̱níi̱ xínii̱, ta̱yóʼo kúú ta̱ nda̱ka̱xii̱n”. Tasaá ni̱ka̱ʼa̱nkara: “Kuniso̱ʼondó ña̱ káʼa̱nra”.

8. ¿Nda̱saa chi̱ndeétáʼan ña̱ visión xíʼin ta̱ Jesús ta saátu xíʼin na̱ discípulora?

⁸ Ña̱ visión yóʼo ni̱na̱ʼa̱ña xa̱ʼa̱ ndee̱ ña̱ ndakiʼin ta̱ Jesús tá ná nduura rey ta kixáʼara kaʼndachíñura. Ña̱yóʼo nda̱sandakúña-inira ta saátu ta̱xiña ndee̱ ndaʼa̱ra ña̱ va̱ʼa kundeé-inira ya̱ʼara nu̱ú tu̱ndóʼo ña̱ ndoʼora xíʼin ña̱ kuvira. Saátu nda̱sandakúra ña̱ kándíxa na̱ discípulora, ta̱xira ndee̱ ndaʼa̱na ña̱ va̱ʼa nda̱kú koo inina chi íyo ku̱a̱ʼání chiñu ña̱ kúma̱ní keʼéna. Ta̱ apóstol Pablo ni̱ka̱ʼa̱ntura xa̱ʼa̱ ña̱yóʼo tá ni̱ya̱ʼa 30 ku̱i̱ya̱, ña̱yóʼo kúni̱ kachiña ña̱ va̱ʼaní nda̱kaʼánra xa̱ʼa̱ña (2 Ped. 1:16-18).

9. ¿Ndáa consejo ña̱ va̱ʼaní ta̱xi ta̱ Jesús ndaʼa̱ na̱ discípulora?

⁹ “Kuniso̱ʼondó ña̱ káʼa̱nra”. Jehová náʼa̱ra nu̱úyó ña̱ kúni̱ra ña̱ ná kuniso̱ʼoyó ta kandíxayó ña̱ káʼa̱n se̱ʼera. Tá ni̱xi̱yo ta̱ Jesús nu̱ú ñuʼú yóʼo, ni̱ka̱ʼa̱nra ku̱a̱ʼání ña̱ʼa ña̱ xíniñúʼu ndakaʼányó xa̱ʼa̱. Tá kúú, ña̱ ni̱ka̱ʼa̱nra xíʼin na̱ xi̱ndiku̱n-ñaʼá ña̱ xíniñúʼu ku̱ʼu̱nna natúʼunna xa̱ʼa̱ tu̱ʼun Ndióxi̱, ta saátu ni̱ka̱ʼa̱nra xíʼinna ña̱ ná kiʼinnína kuenta (Mat. 24:42; 28:19, 20). Ta saátu ni̱ka̱ʼa̱nra xíʼinna ña̱ ná chika̱a̱na ndee̱ ta va̱ása ndakava-inina (Luc. 13:24). Ni̱ka̱ʼa̱nra xíʼinna ña̱ ná kúʼvi̱-inina kuni táʼanna, ña̱ inkáchi ná kutáʼanna ta kuniso̱ʼona ña̱ káʼa̱nra (Juan 15:10, 12, 13). Va̱ʼaní consejo ña̱ ta̱xira ndaʼa̱na, ta nda̱a̱ tiempo vitin chíndeétáʼanña xíʼinyó.

10, 11. ¿Nda̱saa náʼa̱yó ña̱ xíniso̱ʼoyó ña̱ káʼa̱n ta̱ Jesús?

¹⁰ Ta̱ Jesús ni̱ka̱ʼa̱nra: “Ndiʼi na̱ ndíku̱n yi̱ʼi̱ xíniso̱ʼona ña̱ káʼi̱n” (Juan 18:37). Náʼa̱yó ña̱ xíniso̱ʼoyó ña̱ káʼa̱nra tá ndíku̱nyó consejora, tá kúndeé-iniyó xíʼin ña̱ kéʼéna xíʼinyó ta kúkáʼnu-iniyó xa̱ʼa̱na (Col. 3:13; Luc. 17:3, 4). Saátu náʼa̱yóña ki̱vi̱ ku̱a̱ʼa̱nyó nátúʼunyó xa̱ʼa̱ Ndióxi̱ xíʼin ña̱ si̱í-ini tiempo va̱ʼa xíʼin tiempo ña̱ yo̱ʼvi̱ (2 Tim. 4:2).

¹¹ Ta̱ Jesús ni̱ka̱ʼa̱nra ña̱ tí ndikachi sa̱na̱ra va̱ʼa xíniso̱ʼorí ña̱ káʼa̱nra (Juan 10:27). Náʼa̱yó ña̱ xíniso̱ʼoyó ña̱ káʼa̱nra, ta su̱ví ña̱yóʼo kúú ndiʼiña chi saátu kandíxayóra. Soo ná kǒo kundi̱ʼi̱ní-iniyó xa̱ʼa̱ ña̱ʼa  ña̱ íyo ñuyǐví yóʼo (Luc. 21:34). Va̱ʼaka ná kuniso̱ʼoyó consejo ña̱ táxi ta̱ Jesús ndaʼa̱yó, ni yáʼayó nu̱ú ña̱ íxayo̱ʼvi̱ xíʼinyó. Ku̱a̱ʼání na̱ hermano yáʼana nu̱ú tu̱ndóʼo ña̱ yo̱ʼvi̱, ña̱ va̱ása táxi na̱ yiví ña̱ natúʼunna xa̱ʼa̱ Ndióxi̱, ña̱ kǒo ña̱ kuxuna á ña̱ ndi̱ʼi-xa̱ʼa̱ veʼena xíʼin sa̱ví. Soo chíka̱a̱na ndee̱ ña̱ nda̱kú koo inina xíʼin Jehová nda̱a̱ ndáaka ña̱ ná kuu. Ta̱ Jesús káʼa̱nra xíʼin ndiʼina ña̱yóʼo: “Na̱ xíniso̱ʼo ña̱ káʼi̱n kúú na̱ kúʼvi̱-ini xíni yi̱ʼi̱. Ta yivái̱ kuʼvi̱-inira kunira na̱ kúʼvi̱-ini xíni yi̱ʼi̱” (Juan 14:21).

12. ¿Ndáa inka ki̱ʼva kivi náʼa̱yó ña̱ xíniso̱ʼoyó ña̱ káʼa̱n ta̱ Jesús?

¹² Inka ki̱ʼva ña̱ kivi náʼa̱yó ña̱ xíniso̱ʼoyó ña̱ káʼa̱n ta̱ Jesús kúú ña̱ inkáchi kachíñuyó xíʼin na̱ nda̱ka̱xinra kuniʼi yichi̱ nu̱úyó (Heb. 13:7, 17). Ku̱a̱ʼání ña̱ ku̱a̱ʼa̱n nása̱ma ti̱xin ñuu Ndióxi̱ vitin. Tá kúú ña̱ ta̱xina inkaka ña̱ kivi kuniñúʼuyó tá ku̱a̱ʼa̱nyó sánáʼa̱yó na̱ yiví xa̱ʼa̱ Ndióxi̱. Saátu na̱sa̱ma ki̱ʼva ña̱ xíyo reunión ma̱ʼñú semana, xíʼin ña̱ ndásaviína á ña̱ kúva̱ʼa iin salón. ¿Á su̱ví kúsi̱íní-iniyó xa̱ʼa̱ ña̱ va̱ʼaní níʼina yichi̱ nu̱úyó? Kúnda̱a̱-iniyó ña̱ mií Jehová taxi bendición ndaʼa̱yó xa̱ʼa̱ ña̱ xíniso̱ʼoyó ña̱ káʼa̱n na̱ ñuura xíʼinyó.

13. ¿Ndáaña va̱ʼa ndákiʼinyó tá xíniso̱ʼoyó ña̱ káʼa̱n ta̱ Jesús?

¹³ Ña̱ xíniso̱ʼoyó ndiʼi ña̱ sa̱náʼa̱ ta̱ Jesús va̱ʼaní chíndeétáʼanña xíʼinyó. ¿Ndáa ki̱ʼva? Saáchi ta̱ Jesús ni̱ka̱ʼa̱nra xíʼin na̱ discípulora ña̱ kivi ndasandakú ña̱ sánáʼa̱ra inina. Ni̱ka̱ʼa̱nra: “Yi̱ʼi̱ sandi̱koi̱-inindó. Saáchi yugoi̱ ña̱ vitá kúúña ta va̱ása ve̱eña” (Mat. 11:28-30). Tu̱ʼun Ndióxi̱ xíʼin ña̱ ku̱mí evangelio ña̱ káʼa̱n xa̱ʼa̱ ta̱ Jesús, chíndeétáʼanña xíʼinyó ña̱ va̱ʼa ndeéka koo ña̱ kándíxayó ta ndíchika xa̱a̱yó kooyó (Sal. 19:7; 23:3). Ta̱ Jesús ni̱ka̱ʼa̱nra: “Si̱íka ndóo na̱ xíniso̱ʼo tu̱ʼun Ndióxi̱ ta kéʼéna ña̱ káʼa̱nña” (Luc. 11:28).

14, 15. a) Nda̱a̱ táki̱ʼva káchi Juan 12:27, 28, ¿ndáaña kúú ña̱ ni̱ka̱ʼa̱n Jehová chí ndiví ña̱ yichi̱ u̱ni̱? b) ¿Nda̱chun va̱ʼa sa̱ndíko tu̱ʼun ña̱ ni̱ka̱ʼa̱n Jehová ini ta̱ Jesús ta nda̱sandakúña-inira?

¹⁴ (Kaʼvi Juan 12:27, 28). * Nu̱ú evangelio ta̱ Juan káʼa̱nña xa̱ʼa̱ ña̱ yichi̱ u̱ni̱ ña̱ ni̱ka̱ʼa̱n Jehová chí ndiví. Tá si̱lóʼo kúma̱ní ña̱ kuvi ta̱ Jesús, íyora ña̱ ñuu  Jerusalén ña̱ kuxura xíʼin na̱ discípulora ña̱ so̱ndíʼi pascua. Tándi̱ʼi ni̱ka̱ʼa̱nra ña̱ ndíʼi̱ní-inira, ke̱ʼéra iin oración ta ndu̱kúra nu̱ú yivára ña̱yóʼo: “Yivá, ndasakáʼnu ki̱vi̱ún”. Tasaá ni̱ka̱ʼa̱n Jehová chí ndiví ta ka̱chira: “Nda̱sakáʼnui̱ña ta tuku ndasakáʼnui̱ña”.

¹⁵ Ña̱ xi̱ndi̱ʼi̱ní-ini ta̱ Jesús xa̱ʼa̱ kúú ña̱ koo nda̱kú-inira xíʼin Jehová. Xi̱kunda̱a̱-inira ña̱ saxo̱ʼvi̱nara ta kaʼnínara (Mat. 26:38). Soo ña̱ xi̱ndi̱ʼi̱níka-inira xa̱ʼa̱ kúú ña̱ ndasakáʼnura ki̱vi̱ yivára. Xi̱ndi̱ʼi̱ní-inira ña̱ ná va̱ása ixayaku̱a̱ra ki̱vi̱ Ndióxi̱ chi ni̱ka̱ʼa̱nna ña̱ vatá xa̱ʼa̱ra. Soo tu̱ʼun ña̱ ni̱ka̱ʼa̱n yivára xíʼinra ta̱xiña ña̱ ku̱nda̱a̱-inira ña̱ xíniñúʼu ndukáʼnu kivi Jehová. Sana ña̱yóʼo sa̱ndíkoña-inira ta nda̱sandakúña-inira ña̱ va̱ʼa kundeé-inira xa̱ʼa̱ ña̱ xo̱ʼvi̱ra. Soo sana iinlá miívara ku̱nda̱a̱-ini xíʼinña, ni saá Jehová ta̱xira ña̱ ná kaʼyínaña ña̱ va̱ʼa chindeétáʼanña xíʼinyó (Juan 12:29, 30).

16. ¿Nda̱chun sava kivi ndi̱ʼi̱ní-iniyó xa̱ʼa̱ ña̱ kuyaku̱a̱ ki̱vi̱ Jehová?

¹⁶ Kivi kundoʼo miíyó nda̱a̱ táki̱ʼva ndo̱ʼo ta̱ Jesús ña̱ kundi̱ʼi̱ní-iniyó xa̱ʼa̱ ña̱ kivi kuyaku̱a̱ ki̱vi̱ Jehová. Sana kivi keʼéna ña̱ va̱ása va̱ʼa xíʼinyó nda̱a̱ táki̱ʼva ndo̱ʼo ta̱ Jesús, á ña̱ ndi̱ʼi̱ní-iniyó xa̱ʼa̱ ña̱ káʼa̱n na̱ sáa̱-ini xíni miíyó ña̱ vatá xa̱ʼa̱yó. Ta nda̱a̱ kivi ndakanixi̱níyó nda̱saaví íxayaku̱a̱ña ki̱vi̱ Jehová xíʼin na̱ ñuura. Soo ndiʼi ña̱yóʼo ná kǒo taxiyó sandákavaña-iniyó. Tá saá ná ndoʼoyó, ña̱ ni̱ka̱ʼa̱n  Jehová xíʼin ta̱ Jesús kivi sandi̱koña-iniyó. Jehová ndiʼi tiempo ndasakáʼnura ki̱vi̱ra. Kuniñúʼura reinora ña̱ va̱ʼa sandiʼi-xa̱ʼa̱ra ndiʼi ña̱ kéʼé ta̱ Ndi̱va̱ʼa ña̱ íyo nu̱ú ñuyǐví ña̱ sáxo̱ʼvi̱ na̱ ndásakáʼnu miíra (Sal. 94:22, 23; Is. 65:17). Kándíxaníyó ña̱ xi̱nu ña̱ tu̱ʼun yóʼo: “Tasaá Ndióxi̱ taxira ña̱ koo va̱ʼa inindó ta ña̱yóʼo kundaaña níma̱ndó xíʼin ña̱ ndákani-inindó, ndóʼó na̱ ndíku̱n ta̱ Jesucristo” (Filip. 4:6, 7).

17. Nda̱a̱ táki̱ʼva káchi Isaías 30:21, ¿nda̱saa káʼa̱n Jehová xíʼinyó vitin?

¹⁷ Jehová káʼa̱nkara xíʼinyó vitin (kaʼvi Isaías 30:21). * Ña̱ nda̱a̱ ta̱ʼán kuniso̱ʼoyó ña̱ ka̱ʼa̱nra chí ndiví. Soo táxira consejo ndaʼa̱yó nu̱ú tu̱ʼunra ña̱ Biblia. Saátu, espíritu yi̱i̱ra táxiña yichi̱ nu̱ú na̱ esclavo fiel ña̱ va̱ʼa taxina ndiʼi ña̱ xíniñúʼuyó, tá kúú publicación á ña̱ kána nu̱ú Internet, xíʼin video ta saátu audio (Luc. 12:42). ¿Á su̱ví ku̱a̱ʼání kúú ña̱ táxina ndaʼa̱yó?

18. ¿Nda̱chun chíndeétáʼanní tu̱ʼun ña̱ ni̱ka̱ʼa̱n Jehová xíʼinyó ña̱ kuaʼnu ña̱ kándíxayóra xíʼin ña̱ ndakúka koo iniyó?

¹⁸ Ná kǒo nandósóyó xa̱ʼa̱ ña̱ ni̱ka̱ʼa̱n Jehová tá ni̱xi̱yo ta̱ Jesús nu̱ú ñuʼú yóʼo. Ndiʼi tu̱ʼunra ña̱ ni̱kaʼyí nu̱ú Biblia chíndeétáʼanña xíʼinyó ña̱ va̱ása kundi̱ʼi̱ní-iniyó, chi mií Jehová ndasaviíra ndiʼi ña̱ kéʼé ta̱ Ndi̱va̱ʼa xíʼin ñuyǐvíra. Ná kuniso̱ʼoyó ña̱ káʼa̱n Jehová xíʼinyó. Tá saá kéʼéyó kundeé-iniyó ya̱ʼayó nu̱ú ndiʼi tu̱ndóʼo ña̱ íyo vitin xíʼin ña̱ kixi chí nu̱únínu. Ña̱ Biblia sándakaʼánña ña̱yóʼo miíyó: “Ndóʼó xíniñúʼu ndakú koo inindó, ña̱kán tándi̱ʼi ke̱ʼéndó chiñu nu̱ú Ndióxi̱, ndakiʼindó ña̱ ni̱ka̱ʼa̱nra taxira ndaʼa̱ndó” (Heb. 10:36).