NDIʼIYÓ kúni̱ ña̱ ná koto inkana miíyó ña̱ kúúyó na̱ yiví va̱ʼa-ini. Soo yo̱ʼvi̱ní íyo ña̱yóʼo tiempo vitin. Ku̱a̱ʼání na̱ yiví va̱ása kúʼvi̱-inina xíni táʼanna (2 Tim. 3:3). Kéʼéna ña̱ kúni̱ miína ni kúúña ña̱ va̱ʼa á ña̱ va̱ása va̱ʼa, nu̱ú na̱yóʼo ña̱ va̱ʼa kúúña ña̱ va̱ása va̱ʼa, ta ña̱ va̱ása va̱ʼa kúúña ña̱ va̱ʼa nu̱úna (Is. 5:20). Ndiʼiyó chíka̱a̱yó ndee̱ ña̱ keʼéyó ña̱ va̱ʼa chi xa̱ʼa̱ ña̱ kúúyó na̱ yiví ku̱a̱chi íxayo̱ʼvi̱ña xíʼinyó ña̱ keʼéyóña. Xa̱ʼa̱ ña̱yóʼo sana ndóʼoyó nda̱a̱ táki̱ʼva ndo̱ʼo ñá Anne, * iin ñá hermana ñá ndásakáʼnu Ndióxi̱ xa̱a̱ ku̱a̱ʼání ku̱i̱ya̱, káchiñá: “Íxayo̱ʼvi̱níña xíʼi̱n ña̱ kunda̱a̱-inii̱ ña̱ kivi xa̱a̱i̱ kooi̱ iin na̱ yiví na̱ va̱ʼa-ini”.

Kúsi̱íní-iniyó, chi ndiʼiyó kivi xa̱a̱yó va̱ʼa koo iniyó. Iin ña̱yóʼo kúú ña̱ kúúmií espíritu santo Ndióxi̱, ndeéka ña̱yóʼo nu̱ú ndiʼika ña̱ kivi kasi nu̱úyó. Ná sakuaʼayó xa̱ʼa̱ ndáaña kúú, ña̱ va̱ʼa koo iniyó ta saátu kotoyó nda̱saa kivi na̱ʼa̱yóña ndiʼi ki̱vi̱.

Ña̱ va̱ʼa koo iniyó kúú ña̱ náʼa̱ iin na̱ yiví na̱ va̱ʼaní-ini, na̱ kéʼé nina ña̱ nda̱kú. Na̱ yiví na̱ náʼa̱ ña̱ va̱ʼa íyo ini kúú na̱ ndiʼi tiempo ndúkú nda̱a̱ ki̱ʼva chindeétáʼanna xíʼin inkana ta keʼéna ña̱ va̱ʼa xíʼinna.

Sana xíni̱yó sava na̱ yiví na̱ kúni̱ní keʼé ña̱ʼa va̱ʼa xíʼin na̱ veʼena á na̱ migona. Soo na̱ yiví na̱ va̱ʼa nu̱ú Ndióxi̱ va̱ása kéʼéna ña̱yóʼo. Ni iin na̱ yiví va̱ása kuchiñu va̱ʼaní keʼé ña̱yóʼo, chi ña̱ Biblia káchiña ña̱ “kǒo nda̱a̱ ni iin na̱ yiví nu̱ú ñuʼú yóʼo na̱ kéʼé ña̱ va̱ʼa ta va̱ása kíʼvina ku̱a̱chi” (Ecl. 7:20). Ta̱ apóstol Pablo ni̱ka̱ʼa̱nra: “Kúnda̱a̱-inii̱ ña̱ kǒo ni iin ña̱ va̱ʼa ndíka̱a̱-inii̱” (Rom. 7:18). Xa̱ʼa̱ ña̱kán tá kúni̱yó va̱ʼa koo iniyó, xíniñúʼu kunda̱a̱-iniyó xa̱ʼa̱ ña̱ va̱ʼaní íyo ini Jehová.

Jehová kúú ta̱ káʼa̱n xíʼinyó ndáaña kúú ña̱ va̱ʼa xíʼin ña̱ va̱ása va̱ʼa. Tu̱ʼun Ndióxi̱ káchiña: “Yóʼó va̱ʼaní-iniún ta kéʼún ña̱ va̱ʼa. Sanáʼa̱ yi̱ʼi̱ xa̱ʼa̱ ley miíún” (Sal. 119:68). Ná ka̱ʼa̱nyó xa̱ʼa̱ u̱vi̱ ña̱ va̱ʼa ña̱ kúúmií Jehová ña̱ va̱xi nu̱ú ña̱ versículo yóʼo.

Jehová va̱ʼaní-inira. Ña̱yóʼo kúú iin ña̱ va̱ʼaní kúúmiíra. Ná kotoyó ndáaña ku̱u tá ni̱ka̱ʼa̱nra xíʼin ta̱ Moisés: “Yi̱ʼi̱ taxii̱ ña̱ ná kuniún ña̱ va̱ʼaní-inii̱”. Tá xítokara ña̱ va̱ʼa ña̱ kúúmií Ndióxi̱, ta̱ Moisés xi̱niso̱ʼora ña̱ tu̱ʼun yóʼo: “Jehová, Jehová, iin Ndióxi̱ ta̱ ndíʼi̱-ini xa̱ʼa̱ na̱ yiví ta kúni̱ra chindeérana, ta kǒo sáa̱ kamara ta va̱ʼaní-inira ta nina ña̱ nda̱a̱ kúú ña̱ káʼa̱nra, ta̱ va̱ʼa-ini xíʼin ku̱a̱ʼánína, ta̱ kúkáʼnu-ini xa̱ʼa̱ ku̱a̱chi inkana, soo ni saá va̱ása saya̱ʼara ku̱a̱china” (Éx. 33:19; 34:6, 7). Xa̱ʼa̱ ña̱yóʼo va̱ʼa kúnda̱a̱-iniyó ña̱ va̱ʼaní-ini Jehová. Tá ni̱xi̱yo ta̱ Jesús nu̱ú ñuʼú yóʼo ni̱na̱ʼa̱ra ña̱ va̱ʼa-inira. Soo ni saá ni̱ka̱ʼa̱nra: “Nda̱a̱ ni iinna su̱ví na̱ va̱ʼa kúúna chi iinlá Ndióxi̱va kúú ta̱ va̱ʼa” (Luc. 18:19).

 Jehová kéʼéra ña̱ va̱ʼa. Ndióxi̱ náʼa̱ra ña̱ va̱ʼa-inira xíʼin ña̱ kéʼéra. Ña̱ Biblia káchiña: “Jehová va̱ʼaní-inira xíʼin ndiʼi na̱ yiví, ta náʼa̱raña xíʼin ndiʼi ña̱ʼa ña̱ kéʼéra” (Sal. 145:9). Jehová náʼa̱ra ña̱ va̱ʼa-inira xíʼin ndiʼi ña̱ʼa ña̱ táxira, ña̱ xíniñúʼu na̱ yiví ña̱ va̱ʼa kutakuna (Hech. 14:17). Ta saátu náʼa̱raña ki̱vi̱ kúkáʼnu-inira xa̱ʼa̱ ku̱a̱chiyó. Ta̱ ka̱ʼyí iin salmo ni̱ka̱ʼa̱nra: “Miíún Jehová, va̱ʼaní Ndióxi̱ kúún ta íyo tu̱ʼvaún ña̱ koo káʼnu-iniún xa̱ʼa̱ na̱ yiví” (Sal. 86:5). Kúnda̱a̱-iniyó ña̱ mií “Jehová va̱ása sandákoora ña̱ taxira ña̱ va̱ʼa ndaʼa̱ na̱ íyo nda̱kú-ini” (Sal. 84:11).

Xa̱ʼa̱ ña̱ ke̱ʼé Jehová miíyó nda̱a̱ táki̱ʼva káa miíra, kivi va̱ʼa koo iniyó ta keʼéyó ña̱ va̱ʼa (Gén. 1:27). Ña̱ Biblia káʼa̱nña xíʼin miíyó na̱ ndásakáʼnu Ndióxi̱ ña̱ ná sákuaʼayó keʼéyó ña̱ va̱ʼa (Is. 1:17). Ná kotoyó ndáa u̱ni̱ ña̱ʼa kivi keʼéyó ña̱ va̱ʼa koo iniyó.

Ña̱ nu̱ú, keʼéyó oración ta ndukúyó espíritu santo, ña̱ kivi chindeétáʼan xíʼinyó ña̱ va̱ʼa kooyó nu̱ú Ndióxi̱ (Gál. 5:22). Espíritu Ndióxi̱ kúú ña̱ chíndeétáʼan xíʼinyó ña̱ kuʼvi̱-iniyó kuniyó ña̱ va̱ʼa ta kundasíyó kuniyó ña̱ va̱ása va̱ʼa (Rom. 12:9). Saátu káʼa̱n Biblia ña̱ mií Jehová taxi ndee̱ ndaʼa̱yó ña̱ kuchiñuyó keʼéyó ña̱ va̱ʼa ta ka̱ʼa̱nyó ña̱ va̱ʼa (2 Tes. 2:16, 17).

Ña̱ u̱vi̱, xíniñúʼu kaʼviyó tu̱ʼun Ndióxi̱. Ki̱vi̱ kéʼéyóña, Jehová sánáʼa̱ra miíyó nda̱a̱ ña̱ kúú ña̱ va̱ʼa ta chindeétáʼanra xíʼinyó ña̱ va̱ʼa keʼéyóña (Prov. 2:9; 2 Tim. 3:17). Tá káʼviyó tu̱ʼunra ña̱ Biblia ta ndákanixi̱níyó xa̱ʼa̱ña, saá kúú ña̱ táanyó ña̱ va̱ʼa xa̱ʼa̱ Ndióxi̱ níma̱yó. Ta ña̱yóʼo íyoña nda̱a̱ táki̱ʼva íyo tesoro ña̱ kivi chindeétáʼan xíʼinyó tá xíniñúʼuyóña (Luc. 6:45; Efes. 5:9).

Ña̱ u̱ni̱, xíniñúʼu chika̱a̱yó ndee̱ ña̱ “keʼéyó ña̱ va̱ʼa” (3 Juan 11). Nu̱ú ña̱ Biblia, va̱xi ejemplo ña̱ káʼa̱n xa̱ʼa̱ na̱ va̱ʼa-ini na̱ kivi kundiku̱nyó yichi̱. Soo ña̱ va̱ʼaka kúú yichi̱ Jehová xíʼin ta̱ Jesús. Ta saátu íyo inkakaña. Sana ndákanixi̱níyó xa̱ʼa̱ yichi̱ ñá Tabita xíʼin ta̱ Bernabé (Hech. 9:36; 11:22-24). Ná kaʼviyó ña̱ káʼa̱n Biblia xa̱ʼa̱na ta kotoyó ndáaña ke̱ʼéna ña̱ va̱ʼa chi̱ndeétáʼanna xíʼin inkana, ta ná ndakanixi̱níyó nda̱saa kivi chindeétáʼanyó xíʼin na̱ veʼeyó á na̱ hermano ti̱xin congregación. Ná kotoyó ndáaña va̱ʼa nda̱kiʼinna xa̱ʼa̱ ña̱ ke̱ʼéna. Ta saátu kivi ndakiʼin miíyó ña̱ va̱ʼa tá saá kéʼéyó xíʼin inkana.

Saátu kivi ndakanixi̱níyó xa̱ʼa̱ na̱ kéʼé ña̱  va̱ʼa xíʼin inkana vitin. Tá kúú na̱ anciano ti̱xin congregación, na̱yóʼo káchíñunína ta kúʼvi̱ní-inina xínina ña̱ va̱ʼa. Ná kǒo nandósóyó xa̱ʼa̱ na̱ hermanoyó na̱ nda̱kúní-ini, chi na̱yóʼo va̱ʼaní kéʼéna ña̱ va̱ʼa, ta náʼa̱naña xíʼin ña̱ kéʼéna ta saátu xíʼin ña̱ káʼa̱nna (Tito 1:8; 2:3). Iin ñá hermana ñá naní Roslyn káʼa̱nñá: “Kúúmií iin migai̱ ñá kútóoní chindeétáʼan xíʼin na̱ hermano ti̱xin congregación. Ndákanixi̱níñá xa̱ʼa̱ ña̱ ndóʼona ta saátu kúúmiíñá costumbre ña̱ taxiñá regalo ndaʼa̱na á inkaka ña̱ kéʼéñá ña̱ va̱ʼa chindeétáʼanñá xíʼinna. Nu̱ú yi̱ʼi̱ va̱ʼaní na̱ yiví kúúñá”.

Jehová káʼa̱nra xíʼin na̱ ndásakáʼnu-ñaʼá ña̱ ná nandukúna ña̱ va̱ʼa (Amós 5:14). Tá saá kéʼéyó, su̱ví nda̱saa kuʼvi̱-iniyó kuniyó ña̱ va̱ʼa, chi chika̱a̱yó ndee̱ ña̱ keʼéyó ña̱ va̱ʼa nu̱úra.

Ná kǒo ndakanixi̱níyó ña̱ va̱ʼa na̱ʼa̱yó ña̱ va̱ʼa íyo iniyó xíniñúʼu keʼéyó iin ña̱ʼa ña̱ káʼnuní. Ná káʼa̱nyó xa̱ʼa̱ iin ejemplo. Iin ta̱a ta̱ sánana, va̱ása iin á u̱vi̱ yichi̱ sáya̱ʼara pincel nu̱ú ña̱ sánanara, chi ku̱a̱ʼá ña̱ʼa válí kéʼéra ña̱ va̱ʼa livi kooña. Ki̱ʼva saá íyo miíyó, ña̱ va̱ʼa na̱ʼa̱yó ña̱ va̱ʼa-iniyó xíniñúʼu keʼéyó ku̱a̱ʼá ña̱ʼa válí xa̱ʼa̱ inkana.

Ña̱ Biblia káchiña ña̱ ndiʼiyó xíniñúʼu koo tu̱ʼvayó ña̱ keʼéyó ña̱ va̱ʼa (2 Tim. 2:21; Tito 3:1). Tá íyo tu̱ʼvayó xa̱ʼa̱ ña̱ ndóʼo inka na̱ táʼanyó, kivi kunda̱a̱-iniyó ndáaña keʼéyó ña̱ va̱ʼa chindeétáʼanyó xíʼinna (Rom. 15:2). Nda̱a̱ kivi taxiyó loʼo ña̱ kúúmiíyó ndaʼa̱na (Prov. 3:27). Kivi kanayóna ña̱ ná koona natúʼunna xíʼinyó, á ña̱ kuxuna xíʼinyó. ¿Á xíni̱yó ndáana kúú iin na̱ ndeé ndóʼo? Tá xíni̱yó, ná kaʼyíyó iin carta ku̱ʼu̱n ndaʼa̱na á iin mensaje, ná ku̱ʼu̱nyó kotoyóna á ka̱ʼa̱nyó xíʼinna xíʼin teléfono. Saátu íyo ku̱a̱ʼání ña̱ kivi keʼéyó ña̱ va̱ʼa chika̱a̱yó ndee̱ inkana ta chindeétáʼanyó xíʼinna (Efes. 4:29).

Nda̱a̱ táki̱ʼva kéʼé Jehová, ná chika̱a̱yó ndee̱ ña̱ keʼéyó ña̱ va̱ʼa xíʼin inkana. Iin ki̱ʼva ña̱ kivi keʼéyó ña̱yóʼo kúú ña̱ ku̱ʼu̱nyó natúʼunyó xíʼinna xa̱ʼa̱ Ndióxi̱. Nda̱a̱ tá ni̱ka̱ʼa̱n ta̱ Jesús xíʼinyó, ná keʼéyó ña̱ va̱ʼa xíʼin nda̱a̱ na̱ sáa̱-ini xíni miíyó (Luc. 6:27). Ná kǒo nandósóyó xa̱ʼa̱ ña̱ va̱ʼa koo iniyó xíʼin inkana, chi “kǒo ley káʼa̱n contra ña̱yóʼo” (Gál. 5:22, 23). Tá kéʼéyó ña̱ va̱ʼa xíʼin inkana ni íyo tu̱ndóʼo ña̱ ndeé nu̱úyó, nda̱a̱ inka na̱ yiví xa̱a̱na ndasakáʼnuna Ndióxi̱ (1 Ped. 3:16, 17).

Ña̱ Biblia káchiña ña̱ na̱ yiví na̱ keʼé ña̱ va̱ʼa ndákiʼinna ña̱ va̱ʼa xa̱ʼa̱ ña̱ kéʼéna (Prov. 14:14). ¿Ndáaña kúú sava ña̱ va̱ʼa ña̱ ndákiʼinna? Sana nda̱a̱ na̱ yiví kuni̱na keʼéna ña̱ va̱ʼa xíʼinyó (Prov. 14:22). Soo ni ná kǒo keʼénaña, miíyó chika̱a̱yó ndee̱ ña̱ na̱ʼa̱yó ña̱ va̱ʼa íyo iniyó, ta sana nda̱a̱ xa̱a̱ na̱yóʼo keʼéna ña̱ va̱ʼa (Rom. 12:20).

Ku̱a̱ʼánína kivi ka̱ʼa̱nna xíʼinyó xa̱ʼa̱ ña̱ va̱ʼa ña̱ ndákiʼinna xa̱ʼa̱ ña̱ nda̱koona ña̱ va̱ása va̱ʼa ta ki̱xáʼana kéʼéna ña̱ va̱ʼa. Ná kotoyó ña̱ ndo̱ʼo ñá Nancy. Ñáyóʼo káchiñá: “Ni̱xi̱yoi̱ iin na̱ yiví na̱ xi̱keʼé ña̱ kini, iin na̱ kǒo íxato̱ʼó. Soo tá ku̱nda̱a̱-inii̱ xa̱ʼa̱ ña̱ va̱ʼa ña̱ kúúmií Ndióxi̱, ta ki̱xáʼi̱ ke̱ʼíi̱ña nda̱a̱ ni̱kusíi̱-inii̱. Vitin va̱ʼaní kúni̱i̱”.

Soo xa̱ʼa̱ ña̱ ndáyáʼviníka va̱ʼa koo iniyó kúú, ña̱ sakusi̱íyó-ini Jehová. Ta̱yóʼo va̱ʼa xítora ña̱ kéʼéyó, ni ku̱a̱ʼána va̱ása xítonaña. Kíʼinníra kuenta xa̱ʼa̱ ña̱ ndákanixi̱níyó xíʼin xa̱ʼa̱ ña̱ kéʼéyó (Efes. 6:7, 8). ¿Ndáa ki̱ʼva kéʼéraña? Na̱ kéʼé ña̱ va̱ʼa Jehová va̱ʼa kúnira xínirana (Prov. 12:2). Ná chika̱a̱yó ndee̱ ña̱ va̱ʼa koo iniyó. Jehová káʼa̱nra xíʼinyó ña̱ taxira ña̱ va̱ʼa ndaʼa̱yó tá kéʼéyó ña̱ va̱ʼa (Rom. 2:10).