1. ¿Ndáaña ndo̱ʼo ta̱ Adán xíʼin ñá Eva xa̱ʼa̱ ña̱ nda̱ka̱xinna ke̱ʼéna?

¿NDÁANA xíniñúʼu ndaka̱xin ndáaña kúú ña̱ va̱ʼa xíʼin ña̱ va̱ása va̱ʼa túviún? Tá xa̱xi ta̱ Adán xíʼin ñá Eva ku̱i̱ʼi ndaʼa̱ tú yitu̱n tú kúúmií ña̱ kunda̱a̱-inina xa̱ʼa̱ ña̱ va̱ʼa xíʼin ña̱ va̱ása va̱ʼa, saá ni̱na̱ʼa̱na ña̱ va̱ása kándíxana Jehová. Na̱yóʼo nda̱ka̱xin miína ndáaña kúú ña̱ va̱ʼa xíʼin ña̱ va̱ása va̱ʼa (Gén. 3:22). Soo, ¿ndáaña ndo̱ʼona xa̱ʼa̱ ña̱yóʼo? Va̱ása níkitáʼankana xíʼin Jehová ta va̱ása níkivi kutakukana ndiʼi tiempo. Saátu sa̱yáʼana ku̱a̱chi yóʼo ndaʼa̱yó ña̱kán xíʼi̱yó (Rom. 5:12). Ña̱ ke̱ʼé na̱yóʼo tu̱ndóʼova kúú ña̱ táxiña ndaʼa̱yó.

2, 3. a) ¿Ndáaña ke̱ʼé ta̱ eunuco etíope tá na̱túʼun ta̱ Felipe xíʼinra xa̱ʼa̱ Ndióxi̱? b) ¿Ndáaña va̱ʼa ndákiʼinyó tá ndákuchiyó? c) ¿Ndáa pregunta kúú ña̱ ndakuiinyó?

² Síínní íyo ña̱ ke̱ʼé ta̱ Adán xíʼin ñá Eva nu̱ú ña̱ ke̱ʼé ta̱ eunuco etíope tá na̱túʼun ta̱ Felipe xíʼinra xa̱ʼa̱ Ndióxi̱. Ta̱ ta̱a yóʼo ta̱xiníra tíxa̱ʼvi xa̱ʼa̱ ña̱ ke̱ʼé Jehová xíʼin ta̱ Jesús xa̱ʼa̱ra ta nda̱a̱ ni̱xa̱a̱ra nda̱kuchira (Hech. 8:34-38). Ta miíyó, ki̱vi̱ ndátaxi xíʼin miíyó ndaʼa̱ Ndióxi̱ táki̱ʼva ke̱ʼé ta̱ etíope ta ndákuchiyó, saá náʼa̱yó ña̱ táxiyó tíxa̱ʼvi xa̱ʼa̱ ña̱ ke̱ʼé Jehová xíʼin ta̱ Jesús xa̱ʼa̱yó. Ta saátu náʼa̱yó ña̱ kándíxayó Jehová, ña̱ iinlá miíra kúú ta̱ kúúmií yichi̱ ña̱ ndaka̱xinra ndáaña kúú ña̱ va̱ʼa xíʼin ña̱ va̱ása va̱ʼa.

³ Ná ndakanixi̱níyó xa̱ʼa̱ ña̱ va̱ʼa ña̱ ndákiʼinyó tá ndásakáʼnuyó Jehová. Kivi ndakiʼinyó ndiʼi ña̱ sa̱ndáñúʼu ta̱ Adán xíʼin ñá Eva, tá kúú ña̱ kutakuyó ndiʼi tiempo. Xa̱ʼa̱ ña̱ kándíxayó ta̱ Jesús, Ndióxi̱ va̱ʼa kúkáʼnu-inira xa̱ʼa̱ ku̱a̱chiyó tasaá vií íyo ña̱ xínitúni̱yó (Mat. 20:28; Hech. 10:43).  Saátu xáa̱yó kítáʼanyó xíʼin na̱ ndásakáʼnu Jehová, ta xa̱ʼa̱ ña̱ kítáʼan va̱ʼana xíʼinra ku̱a̱ʼá ña̱ va̱ʼa ndakiʼinna chí nu̱únínu (Juan 10:14-16; Rom. 8:20, 21). Savana ni xa̱a̱ xíni̱na xa̱ʼa̱ ña̱ va̱ʼa ña̱ táxi Jehová, íxayo̱ʼvi̱ña xíʼinna ña̱ kundiku̱nna yichi̱ ta̱ eunuco etíope. ¿Ndáaña íxayo̱ʼvi̱ xíʼinna ña̱ ndakuchina? Ta, ¿nda̱saa kivi ya̱ʼana nu̱ú ña̱yóʼo?

4, 5. ¿Ndáaña ndo̱ʼo ta̱ Avery xíʼin ñá Hannah?

⁴ Tá kǒo kándíxana ña̱ kuchiñuna. Na̱ yivá iin ta̱ loʼo ta̱ naní Avery testigo Jehová kúúna. Va̱ʼaní káʼa̱nna xa̱ʼa̱ yivá ta̱ loʼo yóʼo ña̱ kúúra anciano ta va̱ʼaní ndáara se̱ʼera. Soo ni saá, ta̱ Avery va̱ása níndakuchi kamara. Káchira: “Xi̱ndakanixi̱níi̱ ña̱ va̱ása kuchiñui̱ kooi̱ nda̱a̱ táki̱ʼva íyo yivái̱”. Saátu, xi̱ndakanixi̱ní ta̱ Avery ña̱ kǒo kuchiñura keʼéra ndiʼi chiñu ña̱ taxina ndaʼa̱ra chí nu̱únínu. Káʼa̱nkara: “Xi̱yi̱ʼvíi̱ ña̱ ka̱ʼa̱nna xíʼi̱n keʼíi̱ oración nu̱ú ndiʼina, ña̱ taxii̱ discurso á ña̱ tavái̱ na̱ ku̱ʼu̱n natúʼun xa̱ʼa̱ Ndióxi̱”.

⁵ Ñá Hannah ñá kúúmií 18 ku̱i̱ya̱, kúúñá iin ñá loʼo ñá kǒo kándíxa va̱ʼa ña̱ kuchiñuñá keʼéñá iin chiñu. Ni na̱ veʼeñá xa̱a̱ testigo Jehová kúúna ni saá xi̱ndakavaní-iniñá tá xi̱ndakanixi̱níñá ña̱ va̱ása kuchiñuñá keʼéñá ndiʼi ña̱ kúni̱ Jehová. Xa̱ʼa̱ ña̱ xi̱ndakava-iniñá sa̱tukueʼe̱ñá miíñá. Káʼa̱nñá: “Ni kǒo níxika̱ʼi̱n xíʼin nda̱a̱ ni iinna xa̱ʼa̱ ña̱ xi̱keʼíi̱, ni xíʼin na̱ yivái̱. Xi̱ndakanixi̱níi̱ ña̱ va̱ása ndakiʼin Jehová yi̱ʼi̱ xa̱ʼa̱ ndiʼi ña̱ xi̱keʼíi̱”.

6. ¿Nda̱chun va̱ása níndakuchi kama ñá Vanessa?

⁶ Tá íyo migona na̱ va̱ása chíka̱a̱ ndee̱ xíʼinna. Ñá Vanessa kúúmiíñá 22 ku̱i̱ya̱, ndákaʼánñá: “Xi̱kuumiíi̱ iin migai̱ ñá xa̱a̱ yáʼa 10 ku̱i̱ya̱ xi̱kitáʼi̱n xíʼin”. Soo ñá migañá va̱ása níndi̱ʼi̱-iniñá xa̱ʼa̱ ña̱ kándíxañá, ta va̱ása níchindeétáʼanñá xíʼinñá ñá xa̱a̱ñá ndakuchiñá, ta ña̱yóʼo sa̱xóʼvi̱ña-iniñá. Káʼa̱nña: “Íxayo̱ʼvi̱níña xíʼi̱n ña̱ koo migoi̱, ta xi̱yi̱ʼvíi̱ ña̱ ndakoi̱ ña̱ kutáʼi̱n xíʼinñá chi xi̱ndakanixi̱níi̱ ña̱ va̱ása ndani̱ʼíi̱ inka ñá koo migai̱”.

7. ¿Ndáa xa̱ʼa̱ kúú ña̱ xi̱yi̱ʼví ñá Makayla, ta nda̱chun?

⁷ Tá yíʼvína ki̱ʼvina iin ku̱a̱chi ña̱ ndeé. Tá xi̱ku̱umií ñá Makayla 5 ku̱i̱ya̱ ta̱vána ku̱ʼvañá ti̱xin congregación. Tá ni̱ya̱ʼa tiempo xi̱niñá nda̱saa ni̱xo̱ʼvi̱ na̱ yiváñá xa̱ʼa̱ ña̱ ke̱ʼé ku̱ʼvañá. Káchiñá: “Xi̱yi̱ʼvíi̱ ña̱ ndakuchii̱, ña̱ ki̱ʼvii̱ iin ku̱a̱chi, á ña̱ tavana yi̱ʼi̱ ti̱xin congregación ta saxo̱ʼvi̱kai̱-ini na̱ yivái̱”.

8. ¿Ndáa xa̱ʼa̱ kúú ña̱ xi̱yi̱ʼví ta̱ Miles?

⁸ Tá yíʼvína ña̱ kasi inkana nu̱úna ña̱ ndasakáʼnuna Ndióxi̱. Ná kotoyó ndáaña  ndo̱ʼo iin ta̱ loʼo ta̱ naní Miles. Yivára xíʼin siʼí ndáʼvira kúúna testigo Jehová, soo siʼí mií ta̱ loʼo yóʼo va̱ása ndásakáʼnuñá Jehová. Ta̱ Miles káchira: “Ni̱xi̱yoi̱ xíʼin siʼíi̱ 18 ku̱i̱ya̱. Soo ni loʼo kǒo ni̱ka̱ʼi̱n xíʼinñá ña̱ kúni̱i̱ ndakuchii̱. Ndákaʼíi̱n xa̱ʼa̱ ña̱ ke̱ʼéñá xíʼin yivái̱ tá ni̱xa̱a̱ra kúúra testigo Jehová. Ta xi̱yi̱ʼvíi̱ ña̱ saxo̱ʼvi̱ñá yi̱ʼi̱”.

9. ¿Ndáaña kivi kuu tá ná xa̱ún kunda̱a̱-iniún xa̱ʼa̱ ña̱ kúee íyo ini Jehová ta va̱ʼaní-inira?

⁹ Ta̱ Adán xíʼin ñá Eva nda̱ka̱xinna ña̱ va̱ása ndasakáʼnuna Jehová chi va̱ása níkuʼvi̱-inina kuninara. Soo ni saá, Ndióxi̱ ta̱xira ña̱ va̱ʼa kutakuna ta koo ku̱a̱ʼá se̱ʼená ta ndaka̱xinna ndáa ki̱ʼva sakuaʼnuna na̱yóʼo. Xa̱ʼa̱ ña̱ kǒo níkandíxa ta̱ Adán xíʼin ñá Eva Jehová ni̱xo̱ʼvi̱nína. Se̱ʼena ta̱ nu̱ú xa̱ʼníra ñanira, ta tá ni̱ya̱ʼa tiempo ndiʼi na̱ yiví ki̱xáʼa kéʼéna ku̱a̱ʼání ña̱ va̱ása va̱ʼa (Gén. 4:8; 6:11-13). Soo íyova iin ña̱ keʼé Jehová ña̱ va̱ʼa sakǎkura ndiʼi na̱ se̱ʼe ta̱ Adán xíʼin ñá Eva na̱ kúni̱ ndasakáʼnu miíra (Juan 6:38-40, 57, 58). Jehová kúee íyo inira ta va̱ʼaní-inira, ¿á su̱ví saá? Tá ná kunda̱a̱ va̱ʼa iniún xa̱ʼa̱ ña̱yóʼo, xa̱ún kuʼvi̱ka-iniún kuniúnra. Ta va̱ása kuni̱ún keʼún táʼan ña̱ ke̱ʼé ta̱ Adán xíʼin ñá Eva, chi ña̱ va̱ʼava ndaka̱xiún keʼún ña̱ ndataxi xíʼin miíún ndaʼa̱ Ndióxi̱.

10. ¿Nda̱saa kivi chindeétáʼan ña̱ káʼa̱n Salmo 19:7 xíʼún ña̱ ndasakáʼnún Jehová?

¹⁰ Chika̱a̱ ndee̱ ña̱ sakuaʼakaún xa̱ʼa̱ Jehová. Tá ku̱a̱ʼáka ná xa̱ún kunda̱a̱-iniún xa̱ʼa̱ra, va̱ʼaka kandíxaún ña̱ kuchiñún kachíñún nu̱úra. Ta̱ Avery káʼa̱nra, ña̱ va̱ʼaní nda̱sandakú-inira kúú ña̱ nda̱kanixi̱níra ta na̱ndukú va̱ʼara xa̱ʼa̱ ña̱ káʼa̱n Salmo 19:7 (kaʼviña). * Tá xi̱nira ña̱ ku̱a̱ʼa̱n xínu ndiʼi ña̱ tu̱ʼun yóʼo, ña̱ kúʼvi̱-inira xínira Jehová xa̱ʼnukaña. Ña̱ kúʼvi̱-iniyó xíniyóra su̱ví nda̱saa ndásandakúña-iniyó chi saátu chíndeétáʼanña xíʼinyó ña̱ va̱ʼa kunda̱a̱-iniyó xa̱ʼa̱ ña̱ kúni̱ra. Ñá Hannah káʼa̱nñá: “Tíxa̱ʼvi ña̱ ka̱ʼvii̱ Biblia ta nda̱kanixi̱níi̱  xa̱ʼa̱ña, ku̱nda̱a̱-inii̱ ña̱ tá sáxóʼvii̱ miíi̱, saátu sáxóʼvii̱ Jehová” (1 Ped. 5:7). Ñáyóʼo chi̱ka̱a̱ñá ndee̱ ña̱ kéʼéñá ndiʼi ña̱ káʼa̱n tu̱ʼun Ndióxi̱ (Sant. 1:22). ¿Ndáaña va̱ʼa nda̱kiʼinñá xa̱ʼa̱ ña̱yóʼo? Miíñá káʼa̱n: “Tá xi̱nii̱ ndiʼi ña̱ va̱ʼa ña̱ ndákiʼi̱n xa̱ʼa̱ ña̱ xíniso̱ʼi̱ ña̱ káʼa̱n Jehová, ña̱ kúʼvi̱-inii̱ xíni̱ra xa̱ʼnukaña. Vitin kúnda̱a̱-inii̱ ña̱ miíra kundaa yi̱ʼi̱ ndiʼi tiempo ta taxira yichi̱ nu̱úi̱ tá xíniñúʼi̱ña”. Ñá Hannah va̱ʼa ni̱ya̱ʼañá nu̱ú ndiʼi ña̱ sa̱xóʼvi̱-iniñá ta nda̱taxi xíʼin miíñá ndaʼa̱ Jehová ta nda̱kuchiñá.

11. a) ¿Ndáaña ke̱ʼé ñá Vanessa ña̱ va̱ʼa nda̱ka̱xinñá na̱ koo migoñá? b) ¿Ndáaña sánáʼa̱ ña̱yóʼo miíyó?

¹¹ Ndaka̱xin va̱ʼún na̱ koo migoún. Ñá Vanessa ku̱nda̱a̱-iniñá tá ni̱ya̱ʼa tiempo ña̱ xi̱sasi ñá migañá nu̱úñá ña̱ ndasakáʼnuñá Jehová. Xa̱ʼa̱ ña̱yóʼo va̱ása níxiinkañá kutáʼanñá xíʼinñá. Soo su̱ví ña̱yóʼo kúú ndiʼiña, chi chi̱ka̱a̱ñá ndee̱ ña̱ ndukúñá na̱ koo migoñá ti̱xin ña̱ congregación. Miíñá káʼa̱n ña̱ va̱ʼaní chi̱ndeétáʼan ejemplo ta̱ Noé xíʼin na̱ veʼera xíʼinñá: “Na̱kán ni̱xi̱yona tañu na̱ yiví na̱ va̱ása kúʼvi̱-ini xíni Jehová, soo ni saá xi̱kusi̱í-inina xíʼin táʼanna”. Tándi̱ʼi nda̱kuchiñá, ki̱xáʼañá kúúñá precursora. Vitin káʼa̱nñá: “Ña̱yóʼo chi̱ndeétáʼan xíʼi̱n ña̱ va̱ʼa kuumiíi̱ migoi̱ na̱ va̱ʼa, ta su̱ví nda̱saa ti̱xin congregación nu̱ú ndíka̱a̱i̱ chi saátu inkaña”. Saátu yóʼó va̱ʼa ndani̱ʼún migo na̱ va̱ʼa tá ná chika̱a̱ún ndee̱ ña̱ keʼún chiñu ña̱ xáʼnda Jehová nu̱úyó (Mat. 24:14).

12. ¿Ndáaña va̱ása ni̱yi̱ʼví ta̱ Adán xíʼin ñá Eva keʼéna, tá ndáaña ndo̱ʼona xa̱ʼa̱ ña̱yóʼo?

¹² Chika̱a̱ ndee̱ ña̱ va̱ása yi̱ʼvíún, soo yi̱ʼví xa̱ʼa̱ ña̱ keʼún ña̱ va̱ása kútóo Ndióxi̱. Su̱ví ndiʼi ña̱ yíʼvíyó keʼéyó kúú ña̱ va̱ása va̱ʼa. Ña̱ xíniñúʼu yi̱ʼvíyó keʼéyó kúú ña̱ va̱ása kútóo Jehová (Sal. 111:10). Tá ta̱ Adán xíʼin ñá Eva níyi̱ʼvína ña̱ keʼéna ña̱ va̱ása kútóo Ndióxi̱, va̱ása ixaso̱ʼona nu̱úra. Soo tá ke̱ʼéna ña̱yóʼo “nda̱nu̱ná nu̱úna” ta ku̱nda̱a̱-inina ña̱ kúúna na̱ yiví ku̱a̱chi. Saátu ku̱nda̱a̱-inina ña̱ saya̱ʼana ku̱a̱chi yóʼo ndaʼa̱ na̱ se̱ʼena ta kuvina. ¿Nda̱chun va̱ʼa ku̱nda̱a̱-inina ña̱ kúúna na̱ yiví ku̱a̱chi? Saáchi ku̱kaʼan nu̱úna xa̱ʼa̱ ña̱ íyo chálána ta nda̱kasina miína (Gén. 3:7, 21).

13, 14. a) Nda̱a̱ táki̱ʼva káchi 1 Pedro 3:21, ¿nda̱chun va̱ása xíniñúʼu yi̱ʼvíyó nu̱ú ña̱ kuviyó? b) ¿Ndáa xa̱ʼa̱ kúú ña̱ xíniñúʼu kuʼvi̱-iniyó kuniyó Jehová?

 ¹³ Ña̱ va̱ʼa kúú ña̱ ná yi̱ʼvíyó keʼéyó ña̱ va̱ása kútóo Jehová. Soo ña̱ va̱ása yi̱ʼvíyó nu̱ú kúú ña̱ kuviyó. ¿Nda̱chun? Saáchi Ndióxi̱ ta̱xira se̱ʼera ni̱xi̱ʼi̱ xa̱ʼa̱yó ña̱ va̱ʼa kutakuyó ndiʼi tiempo. Tá ni̱ki̱ʼviyó iin ku̱a̱chi nu̱úra ta nda̱ndikó-iniyó xíʼin ndiʼi níma̱yó xa̱ʼa̱ ña̱ ke̱ʼéyó, miíra kukáʼnu-inira xa̱ʼa̱yó tá kándíxayó ña̱ ni̱xi̱ʼi̱ se̱ʼera xa̱ʼa̱yó. Soo ña̱ va̱ʼa na̱ʼa̱yó ña̱ kándíxayó ña̱yóʼo xíniñúʼu ndataxi xíʼin miíyó ndaʼa̱ra ta ndakuchiyó (kaʼvi 1 Pedro 3:21). *

¹⁴ Íyo ku̱a̱ʼání xa̱ʼa̱ kúú ña̱ kuʼvi̱-iniyó kuniyó Jehová. Chi táxira ku̱a̱ʼání ña̱ʼa va̱ʼa ndaʼa̱yó ndiʼi ki̱vi̱, sánáʼa̱ra miíyó ña̱ nda̱a̱ xa̱ʼa̱ra xíʼin xa̱ʼa̱ ña̱ kúni̱ra (Juan 8:31, 32). Táxira íyo ña̱ congregación ña̱ va̱ʼa sánáʼa̱ra yichi̱ nu̱úyó. Saátu chíndeétáʼanra xíʼinyó ña̱ va̱ʼa ya̱ʼayó nu̱ú tu̱ndóʼo ña̱ íyo nu̱úyó vitin, ta káʼa̱ntura xíʼinyó ña̱ taxira kutakuyó ndiʼi tiempo chí nu̱únínu (Sal. 68:19; Rev. 21:3, 4). Ki̱vi̱ ndákanixi̱níyó xa̱ʼa̱ ndiʼi ña̱ xa̱a̱ ke̱ʼéra kúnda̱a̱-iniyó ña̱ kúʼvi̱ní-inira xínira miíyó, saá xáa̱yó kúʼvi̱ka-iniyó xíniyóra, ta kǒo kúni̱yó keʼéyó ña̱ va̱ása va̱ʼa nu̱úra.

15. ¿Nda̱chun va̱ʼa ku̱chiñu ñá Makayla ni̱ya̱ʼañá nu̱ú ña̱ xi̱yi̱ʼvíñá ki̱ʼviñá ku̱a̱chi ña̱ ndeé?

¹⁵ Ñá Makayla ku̱chiñuñá ni̱ya̱ʼañá nu̱ú ña̱ xi̱yi̱ʼvíñá ki̱ʼviñá ku̱a̱chi ña̱ ndeé, tá ku̱nda̱a̱-iniñá ña̱ kiviva kukáʼnu-ini Jehová xa̱ʼa̱ñá. Káchiñá: “Ku̱nda̱a̱-inii̱ ña̱ ndiʼiyó kúúyó na̱ yiví ku̱a̱chi ta kéʼéyó ña̱ va̱ása va̱ʼa. Saátu ku̱nda̱a̱-inii̱ ña̱ kúʼvi̱ní-ini Jehová xínira miíyó xíʼin ña̱ va̱ʼa kúkáʼnu-inira xa̱ʼa̱yó tíxa̱ʼvi ña̱ ni̱xi̱ʼi̱ se̱ʼera xa̱ʼa̱yó”. Ña̱ kúʼvi̱-iniñá xíniñá Jehová chi̱ndeétáʼan xíʼinñá ña̱ va̱ʼa nda̱taxi xíʼin miíñá ndaʼa̱ra ta nda̱kuchiñá.

16. ¿Ndáaña chi̱ndeétáʼan xíʼin ta̱ Miles ña̱ va̱ʼa ni̱ya̱ʼara nu̱ú ña̱ xi̱yi̱ʼvíra?

¹⁶ Ta̱ Miles, ta̱ xi̱yi̱ʼví ña̱ ixandi̱va̱ʼa siʼíra xíʼinra tá ná ndakuchira, ni̱ka̱ʼa̱nra xíʼin iin ta̱ superintendente ña̱ circuito ña̱ ná chindeétáʼanra xíʼinra. Káchira: “Ta̱kán xa̱ʼnura táki̱ʼva xa̱ʼnu yi̱ʼi̱, chi siʼíra su̱ví testigo Jehová níxikuuñá. Chi̱ndeétáʼanra xíʼi̱n ña̱ va̱ʼa ndakanixi̱níi̱ ndáaña ka̱ʼi̱n xíʼin siʼíi̱ xa̱ʼa̱ ña̱ miíi̱ kúú ta̱ nda̱ka̱xin ña̱ ndakuchii̱ ta su̱ví yivái̱ íxandúxa xíʼi̱n ña̱ keʼíi̱ ña̱yóʼo”. Siʼí ta̱ Miles kǒo níkutóoñá ña̱yóʼo. Tá ni̱ya̱ʼa tiempo va̱ása ni̱xi̱yokara xíʼinñá, ña̱ va̱ʼa xa̱a̱ra ndakuchira. Miíra káʼa̱n: “Ña̱ chi̱ndaʼá yi̱ʼi̱ keʼíi̱ ña̱ kúni̱ Jehová kúú ndiʼi ña̱ ke̱ʼéra xa̱ʼíi̱. Ña̱ nda̱kanixi̱níi̱ xa̱ʼa̱ ña̱ ta̱xira se̱ʼera ni̱xi̱ʼi̱ xa̱ʼíi̱, saá ku̱nda̱a̱-inii̱ ña̱ kúʼvi̱ní-ini Jehová xínira yi̱ʼi̱. Ña̱yóʼo chi̱ndeétáʼan xíʼi̱n ña̱ va̱ʼa nda̱taxi xíʼin miíi̱ ndaʼa̱ra ta nda̱kuchii̱”.

17. ¿Ndáaña kivi keʼé ndiʼiyó?

¹⁷ Tá xa̱xí ñá Eva ku̱i̱ʼi ndaʼa̱ tú yitu̱n nu̱ú jardín ña̱ Edén, i̱xaso̱ʼoñá nu̱ú Jehová. Saátu tá ke̱ʼé ta̱ Adán ña̱yóʼo, ni̱na̱ʼa̱ra ña̱ va̱ása ndáyáʼvi ndiʼi ña̱ ke̱ʼé Jehová xa̱ʼa̱ra. Ndiʼiyó kivi na̱ʼa̱yó ña̱ nda̱a̱ ni loʼo va̱ása kútóoyó ña̱ ke̱ʼéna. Ki̱vi̱ ndákuchiyó saá náʼa̱yó nu̱ú Jehová ña̱ iinlá miíra kúú ta̱ kúúmií yichi̱ ña̱ ka̱ʼa̱nra xíʼinyó ndáaña kúú ña̱ va̱ʼa xíʼin ña̱ va̱ása va̱ʼa. Saátu náʼa̱yó nu̱úra ña̱ kúʼvi̱ní-iniyó xíniyóra ta kándíxayóra.

18. ¿Ndáaña xíniñúʼu keʼún ña̱ va̱ʼa vií keʼún chiñu nu̱ú Jehová?

¹⁸ Tándi̱ʼi nda̱kuchiyó, xíniñúʼu kundiku̱nyó ndiʼi ki̱vi̱ ña̱ káʼa̱n Jehová xíʼinyó ta va̱ása keʼéyó ña̱ kúni̱ miíyó. Ña̱ nda̱a̱ kúú ña̱ íxayo̱ʼvi̱ña xíʼinyó keʼéyóña, soo ku̱a̱ʼání na̱ yiví kéʼénaña ndiʼi ku̱i̱ya̱. Yóʼó kiviva keʼún táki̱ʼva kéʼé na̱kán. Ta ña̱ va̱ʼa keʼúnña chika̱a̱ ndee̱ ña̱ kaʼviún Biblia ndiʼi ki̱vi̱ ta nandukú va̱ʼún xa̱ʼa̱ña, saátu xíniñúʼu taváún tiempo ña̱ kutáʼún xíʼin na̱ hermano, saátu xíʼin ña̱ si̱í-ini ka̱ʼún xíʼin inkana xa̱ʼa̱ ña̱ sa̱kuaʼún xa̱ʼa̱ yiváún Jehová (Heb. 10:24, 25). Ta ki̱vi̱ kúni̱ún ndaka̱xiún iin ña̱ keʼún, kuniso̱ʼo ña̱ káʼa̱n Jehová xíʼún nu̱ú tu̱ʼunra ña̱ Biblia xíʼin na̱ ñuura (Is. 30:21). Saá kúú ña̱ va̱ʼaní koún (Prov. 16:3, 20).

19. ¿Ndáaña xíniñúʼu ndakaʼún xa̱ʼa̱ ndiʼi tiempo, ta nda̱chun?

¹⁹ Tá ndiʼi tiempo ndákaʼún xa̱ʼa̱ yichi̱ ña̱ táxi Jehová nu̱ún, saá kúú ña̱ kuaʼnuka ña̱ kúʼvi̱-iniún xíniúnra xíʼin consejora. Saá, nda̱a̱ ni iin ña̱ chíndúʼú ta̱ Ndi̱va̱ʼa nu̱ún va̱ása kuchiñuña sandákavaña-iniún ña̱ ndasakáʼnún Ndióxi̱. Ta, tá ná ya̱ʼa mil ku̱i̱ya̱, tá ná ndakanixi̱níún xa̱ʼa̱ ña̱ nda̱kuchiún, ka̱ʼún: “Iin ña̱ va̱ʼaní kúú ña̱ nda̱ka̱xii̱n ña̱ ke̱ʼíi̱ ña̱yóʼo”.