ARTÍCULO ÑA̱ KAʼVIYÓ 10
Ña̱ kúʼvi̱-iniyó xíniyó Jehová chíndaʼáña miíyó ña̱ ndakuchiyó
“¿Ndáaña sási nu̱úi̱ ña̱ va̱ʼa ndakuchii̱?” (HECH. 8:36).
YAA 37 Kandíxai̱ Jehová xíʼin ndiʼi níma̱i̱
ÑA̱ KA̱ʼA̱NYÓ XA̱ʼA̱ *
1, 2. Nda̱a̱ táki̱ʼva káchi Hechos 8:27-31 xíʼin 35, 36, 38, ¿nda̱chun nda̱kuchi ta̱ xi̱kachíñu nu̱ú ñá reina ña̱ ñuu Etiopía?
¿Á KÚNI̱ÚN ndakuchiún ta xa̱ún koún discípulo ta̱ Cristo? Ku̱a̱ʼání na̱ yiví ndákuchina, xa̱ʼa̱ ña̱ kúʼvi̱-inina xínina Ndióxi̱ xíʼin xa̱ʼa̱ ña̱ kúni̱na taxina tíxa̱ʼvi ndaʼa̱ra. Ndakanixi̱ní xa̱ʼa̱ ejemplo iin ta̱ xi̱kachíñu nu̱ú ñá reina ña̱ ñuu Etiopía.
2 Tá na̱kunda̱a̱-ini ta̱ ta̱a yóʼo, ña̱ káʼa̱n tu̱ʼun Ndióxi̱ ña̱ xíniñúʼu ndakuchira, ndi̱ku̱n ke̱ʼéraña (kaʼvi Hechos 8:27-31, * 35, 36, * 38). * ¿Nda̱chun? Ta̱yóʼo xi̱chindayáʼviníra tu̱ʼun Ndióxi̱, chi tá ku̱a̱ʼa̱nra xíʼin carrora káʼvira ña̱ ka̱ʼyí ta̱ Isaías. Tá na̱túʼun ta̱ Felipe xíʼinra xa̱ʼa̱ ña̱ ke̱ʼé ta̱ Jesús xa̱ʼa̱ra, xi̱kuni̱ra taxira tíxa̱ʼvi xa̱ʼa̱ ña̱yóʼo. Saátu kúnda̱a̱-iniyó ña̱ xa̱a̱ kúʼvi̱-inira xínira Jehová, chi ni̱xa̱ʼa̱nra nda̱sakáʼnurara chí ñuu Jerusalén. Ta sa̱ndákoora veʼe-ñu̱ʼu ña̱ xi̱ndiku̱nra, ta nda̱kutáʼanra xíʼin na̱ ñuu Ndióxi̱. Ña̱ kúʼvi̱-inira xínira Jehová chi̱ndaʼáñara ña̱ ke̱ʼéra iin ña̱ ndáyáʼviní, nda̱kuchira ta ndu̱ura discípulo ta̱ Cristo (Mat. 28:19).
3. ¿Ndáaña kivi kasi nu̱ú iinna ña̱ ndakuchina? (Koto recuadro “ ¿Ndáa ñuʼú kúú ña̱ kítáʼan xíʼin níma̱ún?”).
3 Ña̱ kúʼvi̱-iniún xíniún Jehová kivi chindaʼáña yóʼó ña̱ xa̱ún ndakuchiún. Soo ña̱ kúʼvi̱-iniún xíniún inkana kivi kasiña nu̱ún ña̱ keʼún ña̱yóʼo. Tá kúú, sana kúʼvi̱ní-iniún xíniún na̱ veʼún xíʼin na̱ migoún na̱ va̱ása kúú testigo Jehová, ta yíʼviún ña̱ tá ná ndakuchiún sandákoona ña̱ kuni̱na yóʼó (Mat. 10:37). Á sanatu kéʼún sava ña̱ va̱ása va̱ʼa, ta xíni̱ún ña̱ va̱ása kútóo Ndióxi̱ ña̱yóʼo, soo íxayo̱ʼvi̱ña xíʼún ña̱ sandákoúnña (Sal. 97:10). Ta sana nda̱a̱ tá loʼoviún ki̱xáʼún kéʼún sava vikó ña̱ kítáʼan xíʼin ña̱ veʼe-ñu̱ʼu vatá, ta ku̱a̱ʼání ña̱ʼa livi ndákaʼún xa̱ʼa̱ ña̱yóʼo, ña̱kán íxayo̱ʼvi̱ña xíʼún ña̱ sandákoún keʼún vikó ña̱ va̱ása kútóo Jehová (1 Cor. 10:20, 21). Ña̱kán xíniñúʼu nda̱ka̱tu̱ʼún xíʼin miíún, ndáaña kúú ña̱ kuʼvi̱ka-iniún kuniún.
ÑA̱ KUʼVI̱-INIYÓ KUNIYÓ NDIÓXI̱ KÚÚ ÑA̱ NDÁYÁʼVINÍ
4. ¿Ndáaña kivi chindaʼá miíyó ña̱ xa̱a̱yó ndakuchiyó?
4 Sana íyo ku̱a̱ʼá ña̱ʼa ña̱ ndáyáʼviní nu̱ún ta kúʼvi̱-iniún xíniúnña, ta iin ña̱ va̱ʼava kúú ña̱ kéʼún saá. Tá kúú, sana tá kúma̱níka kixáʼún kaʼviún Biblia xíʼin na̱ testigo Jehová, xa̱a̱ kúʼvi̱va-iniún xíniún Ndióxi̱, ta saátu kúʼvi̱-iniún xíniún ta̱ Jesús. Ta vitin kúsi̱íní-iniún ña̱ kítáʼún xíʼin na̱ testigo Jehová. Soo ña̱yóʼo va̱ása kivi chindaʼáña yóʼó, ña̱ ndataxi xíʼin miíún ndaʼa̱ Jehová ta ndakuchiún. Chi ña̱ chindaʼá yóʼó ña̱ xa̱ún ndakuchiún kúú ña̱ kúʼvi̱-iniún xíniún Ndióxi̱. Tá ná xa̱ún kuʼvi̱ka-iniún kuniúnra nu̱ú nda̱a̱ ndáaka ña̱ʼa, va̱ása taxiún ña̱ kasi nda̱a̱ ni iin ña̱ʼa nu̱ún ña̱ ndasakáʼnúnra. Ña̱ kúʼvi̱-iniyó xíniyó Jehová su̱ví nda̱saa chíndaʼáña miíyó ña̱ xa̱a̱yó ndakuchiyó, chi saátu chíndeétáʼanña xíʼinyó ña̱ nda̱kú koo iniyó xíʼinra ndiʼi tiempo.
5. ¿Ndáaña ka̱ʼa̱nyó xa̱ʼa̱ nu̱ú artículo yóʼo?
5 Ta̱ Jesús ni̱ka̱ʼa̱nra ña̱ xíniñúʼu kuʼvi̱-iniyó kuniyó Jehová xíʼin ndiʼi níma̱yó, xíʼin ndiʼi ña̱ tákuyó, xíʼin ndiʼi xi̱níyó xíʼin ndiʼi ndee̱yó (Mar. 12:30). ¿Ndáa ki̱ʼva kivi sakuaʼún kuʼvi̱-iniún kuniún Jehová ta ixato̱ʼúnra? Ña̱ ndakanixi̱níún xa̱ʼa̱ ña̱ kúʼvi̱ní-inira xínira miíyó (1 Juan 4:19). Ña̱ artículo yóʼo, ka̱ʼa̱nña xa̱ʼa̱ sava ña̱ kivi chindeétáʼan xíʼún ña̱ keʼúnña. Ta saátu ka̱ʼa̱nña xa̱ʼa̱ inkaka ña̱ʼa ña̱ kuni̱ún keʼún tá ná xa̱ún kuʼvi̱-iniún kuniúnra. *
6. Nda̱a̱ táki̱ʼva káchi Romanos 1:20, ¿nda̱saa kivi sakuaʼakaún xa̱ʼa̱ Jehová?
6 Kivi sakuaʼakaún xa̱ʼa̱ Jehová tá ná kotoún ña̱ i̱xava̱ʼara (kaʼvi Romanos 1:20; * Apoc. 4:11). Ndakanixi̱ní xa̱ʼa̱ ña̱ ndíchi ña̱ kúúmií Jehová, tá xítoún ña̱ viíní i̱xava̱ʼara planta xíʼin kití. Nandukú ña̱ káʼa̱n xa̱ʼa̱ ndáa ki̱ʼva ku̱va̱ʼa na̱ yiví (Sal. 139:14). Ndakanixi̱ní ña̱ ku̱a̱ʼání ndee̱ ta̱xi Jehová ndaʼa̱ ñu̱ʼu, soo kǒo nandósóún ña̱ su̱ví iinlá ña̱yóʼo kúú ña̱ íyo, chi saátu íyo ku̱a̱ʼáníka ki̱mi (Is. 40:26). * Tá ná keʼún ña̱yóʼo, ixato̱ʼókaún Jehová. Su̱ví nda̱saa ña̱ kunda̱a̱-iniún ña̱ ndíchiní Jehová ta íyoní ndee̱ra chindeétáʼan xíʼún ña̱ kutáʼan viíkaún xíʼinra. Ña̱ va̱ʼa xa̱ún kuʼvi̱-iniún kuniúnra xíʼin ndiʼi níma̱ún, xíniñúʼu sakuaʼakaún xa̱ʼa̱ra.
7. Ña̱ va̱ʼa xa̱ún kuʼvi̱-iniún kuniún Jehová xíʼin ndiʼi níma̱ún, ¿ndáaña xíniñúʼu kandíxaún?
7 Ndáyáʼviní ña̱ ná kandíxaún ña̱ ndíʼi̱ní-ini Jehová xa̱ʼún. ¿Á íxayo̱ʼvi̱ña xíʼún ña̱ kandíxaún ña̱ ta̱ i̱xava̱ʼa ndiví xíʼin ñuʼú, kúnda̱a̱-inira ña̱ íyoún ta ndáyáʼviún nu̱úra? Tá saá íyoña, kǒo nandósóún ña̱ va̱ása xíka íyo Jehová nu̱ú iin iinyó (Hech. 17:26-28). Nda̱a̱ táki̱ʼva ni̱ka̱ʼa̱n ta̱ David xíʼin ta̱ Salomón, Ndióxi̱ “xítora ndiʼi ña̱ ndíka̱a̱ níma̱yó”. Ndióxi̱ káʼa̱nra ña̱ tá ná nandukúnra ndani̱ʼúnra (1 Crón. 28:9). Jehová kúú ta̱ ka̱na yóʼó ña̱ ná kuyatiún nu̱úra, ña̱kán kúú ña̱ káʼviún Biblia, nda̱a̱ táki̱ʼva káchi Jeremías 31:3. Tá ná kunda̱a̱ka-iniún xa̱ʼa̱ ña̱ ke̱ʼé Jehová xa̱ʼún, kuʼvi̱ka-iniún kuniúnra.
8. ¿Nda̱saa kivi na̱ʼún ña̱ táxiún tíxa̱ʼvi ndaʼa̱ Jehová xa̱ʼa̱ ña̱ kúʼvi̱-inira xínira yóʼó?
8 Tá káʼún xíʼin Jehová, saá kúú ña̱ náʼún ña̱ táxiún tíxa̱ʼvi ndaʼa̱ra xa̱ʼa̱ ña̱ kúʼvi̱-inira xínira yóʼó. Ña̱ kúʼvi̱-iniún xíniún Jehová kuaʼnukaña tá ná ka̱ʼún xíʼinra xa̱ʼa̱ ndiʼi ña̱ sándi̱ʼi̱-iniún, ta taxiún tíxa̱ʼvi ndaʼa̱ra xa̱ʼa̱ ndiʼi ña̱ kéʼéra xa̱ʼún. Ta ndundakúka ña̱ kítaʼún xíʼinra tá ná kiʼún kuenta ña̱ ndákuiinra ña̱ káʼún xíʼinra (Sal. 116:1). Ta saátu kandíxaún ña̱ kúnda̱a̱-ini Ndióxi̱ xíʼin ña̱ ndóʼún. Ta ña̱ va̱ʼa kuyatinkaún nu̱ú Jehová, xíniñúʼu kunda̱a̱-iniún ndáaña kútóora, ta ndáaña kúni̱ra ná keʼún. Ña̱ va̱ʼa kunda̱a̱-iniún xa̱ʼa̱ ña̱yóʼo xíniñúʼu kaʼviún tu̱ʼunra ña̱ Biblia.
Ña̱ kaʼviyó Biblia kúú ña̱ kivi chindeétáʼan xíʼinyó ña̱ kuyatinyó nu̱ú Ndióxi̱, ta kunda̱a̱-iniyó ndáaña kúni̱ra ná keʼéyó. (Koto párrafo 9). *
9. ¿Ndáa ki̱ʼva kivi na̱ʼún ña̱ ndáyáʼvi Biblia nu̱ún?
9 Xíniñúʼu sákuaʼún kundayáʼvi tu̱ʼun Ndióxi̱ nu̱ún. Nu̱ú Biblia va̱xi ña̱ nda̱a̱ xa̱ʼa̱ Jehová xíʼin ña̱ kúni̱ra keʼéra xa̱ʼún. ¿Ndáa ki̱ʼva kivi na̱ʼún ña̱ ndáyáʼvi ña̱yóʼo nu̱ún? Tá káʼviúnña ndiʼi ki̱vi̱, tá xa̱a̱ káʼvi kúeún xa̱ʼa̱ ña̱ sanáʼa̱na yóʼó, ta kéʼún ña̱ sákuaʼún (Sal. 119:97, 99; Juan 17:17). ¿Á xa̱a̱ ta̱váún tiempo ña̱ kaʼviúnña ndiʼi ki̱vi̱?
10. ¿Ndáaña kúú ña̱ va̱ʼa ña̱ kúúmií ña̱ Biblia?
10 Iin ña̱ va̱ʼa ña̱ kúúmií ña̱ Biblia kúú, ña̱ va̱xi relato ña̱ na̱túʼun na̱ yiví na̱ xi̱ni ta̱ Jesús nu̱úña. Iinlá ña̱ libro yóʼo kúú ña̱ nátúʼun káxi xa̱ʼa̱ ña̱ ke̱ʼéra xa̱ʼún. Tá ná sakuaʼún xa̱ʼa̱ ña̱ ke̱ʼé ta̱ Jesús xíʼin ña̱ ni̱ka̱ʼa̱nra, kuni̱ún xa̱ún koún migora.
11. ¿Ndáaña chindeétáʼan xíʼún ña̱ kuʼvi̱ka-iniún kuniún Jehová?
11 Sakuaʼún kuʼvi̱-iniún kuniún ta̱ Jesús. Ña̱yóʼo chindeétáʼan xíʼún ña̱ kuʼvi̱ka-iniún kuniún Jehová, chi ta̱ Jesús va̱ʼaní náʼa̱ra ña̱ va̱ʼa ña̱ kúúmií yivára (Juan 14:9). Ña̱kán, tá ná sakuaʼún xa̱ʼa̱ ta̱ Jesús xa̱ún kunda̱a̱ka-iniún ndáa ki̱ʼva íyo Jehová ta kuʼvi̱ka-iniún kuniúnra. Ndakanixi̱ní xa̱ʼa̱ ña̱ ku̱ndáʼvi-ini ta̱ Jesús xi̱nira na̱ yiví na̱ xi̱kundasí inkana xi̱xinina, na̱ ndáʼvi, na̱ ndeé ndóʼo xíʼin na̱ xi̱ ixandi̱va̱ʼana xíʼin. Ta saátu ndakanixi̱ní xa̱ʼa̱ consejo ña̱ táxira ndaʼún, ta ndáa ki̱ʼva chíndeétáʼanña xíʼún tá kándíxaúnña (Mat. 5:1-11; 7:24-27).
12. Tá ná xa̱ún sakuaʼakaún xa̱ʼa̱ ta̱ Jesús, ¿ndáaña kuni̱ún keʼún?
12 Ña̱ kúʼvi̱-iniún xíniún ta̱ Jesús kuaʼnukaña tá ná ndakanixi̱níún xa̱ʼa̱ ña̱ ke̱ʼéra, ña̱ va̱ʼa ixakáʼnu-ini Ndióxi̱ xa̱ʼa̱ ku̱a̱chiyó (Mat. 20:28). Tá ná kunda̱a̱-iniún ña̱ ta̱xira miíra ña̱ ni̱xi̱ʼi̱ra xa̱ʼún, ña̱yóʼo chindaʼá yóʼó ña̱ ndandikó-iniún xa̱ʼa̱ ku̱a̱chiún ta ndukún ña̱ káʼnu-ini nu̱ú Jehová (Hech. 3:19, 20; 1 Juan 1:9). Tá ná kuʼvi̱ka-iniún kuniún Jehová xíʼin ta̱ Jesús, kuni̱ún kutáʼún xíʼin na̱ kúʼvi̱-ini xíniñaʼá.
13. ¿Ndáaña táxi Jehová ndaʼún?
13 Sakuaʼún kuʼvi̱-iniún kuniún na̱ ndásakáʼnu Jehová. Sana na̱ veʼún xíʼin na̱ xi̱kuu migoún va̱ása kúnda̱a̱-inina nda̱chun kúni̱ún ndataxi xíʼin miíún ndaʼa̱ Ndióxi̱, ta kuni̱na kasina nu̱ún ña̱ va̱ása keʼún ña̱yóʼo. Soo Jehová taxira na̱ ndásakáʼnu-ñaʼá ña̱ koona na̱ veʼún. Tá yatin ná koún xíʼin na̱yóʼo, kuʼvi̱-inina kunina yóʼó ta chindeétáʼanna xíʼún (Mar. 10:29, 30; Heb. 10:24, 25). Ta sana kivi kixaa̱ iin ki̱vi̱ ña̱ ndasakáʼnu na̱ veʼún Jehová, ta keʼéna ña̱ káʼa̱nra (1 Ped. 2:12).
14. Nda̱a̱ táki̱ʼva káchi 1 Juan 5:3, ¿ndáaña ndákanixi̱níún xa̱ʼa̱ consejo ña̱ táxi Jehová?
14 Sakuaʼún kandíxaún ña̱ káʼa̱n Ndióxi̱, ta ná kundayáʼviña nu̱ún. Tá kúma̱níka kunda̱a̱-iniún xa̱ʼa̱ Jehová sana xi̱keʼún ña̱ kúni̱ miíún, ta vitin kíʼún kuenta ña̱ va̱ʼaka ña̱ káʼa̱n Jehová (Sal. 1:1-3; kaʼvi 1 Juan 5:3). * Ndakanixi̱ní xa̱ʼa̱ consejo ña̱ táxi Biblia ndaʼa̱ na̱ xa̱a̱ ti̱ndaʼa̱, na̱ íyo se̱ʼe xíʼin na̱ va̱lí (Efes. 5:22–6:4). ¿Á si̱íka íyo na̱ veʼún xa̱ʼa̱ ña̱ ndíku̱ún consejo yóʼo? ¿Á viíka íyo ña̱ kéʼún vitin, xa̱ʼa̱ ña̱ ndíku̱ún consejo ña̱ káʼa̱n xa̱ʼa̱ ña̱ xíniñúʼu vií ndaka̱xiún na̱ koo migoún? ¿Á si̱íka kúni̱ún vitin? (Prov. 13:20; 1 Cor. 15:33). Sana viíva ndakuiún ña̱ pregunta yóʼo.
15. ¿Ndáaña kivi keʼún tá íxayo̱ʼvi̱ña xíʼún keʼún ña̱ sákuaʼún nu̱ú Biblia?
15 Sana kivi ixayo̱ʼvi̱ña xíʼún keʼún ña̱ sákuaʼún nu̱ú Biblia. Xa̱ʼa̱ ña̱yóʼo, Jehová xíniñúʼura na̱ ñuura ña̱ tavána tutu ña̱ kána nu̱ú Biblia, ña̱ chindeétáʼan xíʼún ña̱ kunda̱a̱-iniún ndáaña kúú ña̱ va̱ʼa xíʼin ña̱ va̱ása va̱ʼa (Heb. 5:13, 14). Tá ná kaʼviún ña̱yóʼo, kiʼún kuenta ña̱ va̱ʼaní chíndeétáʼanña xíʼún, ta kuni̱ún xa̱ún kutáʼún xíʼin na̱ ñuu Jehová.
16. ¿Ndáa ki̱ʼva nda̱taʼví Jehová na̱ ñuura?
16 Sakuaʼún kuʼvi̱-iniún kuniún na̱ ñuu Jehová ta chindeétáʼún xíʼinna. Jehová viíní nda̱taʼvíra na̱ ñuura ta nda̱sarana congregación, ta se̱ʼera ta̱ Jesús kúú ta̱ níʼi yichi̱ nu̱ú ndiʼina (Efes. 1:22; 5:23). Ta ta̱ Jesús nda̱kaxinra iin tiʼvi loʼo na̱ ta̱a na̱ ku̱ʼu̱n chí ndiví, ña̱ kiʼinna kuenta xíʼin chiñu ña̱ kúni̱ra ná keʼéyó tiempo vitin. Na̱ cristiano yóʼo, kúú na̱ ni̱ka̱ʼa̱n ta̱ Jesús kunaní “ta̱ esclavo ta̱ ndíchiní ta̱ nda̱kúní káchíñu”, ta na̱yóʼo viíní kéʼéna chiñuna ña̱ táxina ña̱ xíniñúʼún ña̱ sakuaʼún xa̱ʼa̱ Ndióxi̱ ta ndáana yóʼó (Mat. 24:45-47). Ta iin ki̱ʼva ña̱ ndáana yóʼó kúú ña̱ ndáka̱xinna sava na̱ hermano ña̱ kundaana na̱ congregación (Is. 32:1, 2; Heb. 13:17; 1 Ped. 5:2, 3). Ta na̱yóʼo íyo tu̱ʼvana ña̱ sandíkona-iniún, ta chindeétáʼanna xíʼún ña̱ kuyatinkaún nu̱ú Jehová. Soo inka ña̱ ndáyáʼviní ña̱ kivi keʼéna xa̱ʼún, kúú ña̱ chindeétáʼanna xíʼún ña̱ sanáʼún inka na̱ yiví xa̱ʼa̱ Jehová (Efes. 4:11-13).
17. Nda̱a̱ táki̱ʼva káchi Romanos 10:10, 13, 14, ¿nda̱chun nátúʼunyó xa̱ʼa̱ Jehová xíʼin na̱ yiví?
17 Chindeétáʼan xíʼin inkana ña̱ sakuaʼana kuʼvi̱-inina kunina Jehová. Ta̱ Jesús ni̱ka̱ʼa̱nra xíʼin na̱ discípulora, ña̱ ná sanáʼa̱na inkana xa̱ʼa̱ Ndióxi̱ (Mat. 28:19, 20). Kivi xa̱ún keʼún ña̱ chiñu yóʼo xíʼin ña̱ nduxa̱. Soo tá kúʼvi̱-iniún xíniún Jehová, ndoʼún nda̱a̱ táki̱ʼva ndo̱ʼo ta̱ apóstol Pedro xíʼin ta̱ Juan, na̱ ni̱ka̱ʼa̱n: “Kǒo kívi sandákoondi̱ ka̱ʼa̱nndi̱ xa̱ʼa̱ ña̱ xi̱ninu̱úndi̱ xíʼin ña̱ xi̱niso̱ʼondi̱” (Hech. 4:20). Ña̱ kivi sakusi̱í-iniún kúú ña̱ chindeétáʼún xíʼin inkana ña̱ kuʼvi̱-inina kunina Jehová. ¿Á kivi ndakanixi̱níún xa̱ʼa̱ ña̱ ni̱kusi̱íní-ini ta̱ Felipe, tá chi̱ndeétáʼanra xíʼin ta̱ eunuco etíope ña̱ sa̱kuaʼara xa̱ʼa̱ ña̱ nda̱a̱ ña̱ káʼa̱n tu̱ʼun Ndióxi̱ ta nda̱kuchira? Tá ná kundiku̱ún yichi̱ ta̱ Felipe, ta kandíxaún chiñu ña̱ xa̱ʼnda ta̱ Jesús ña̱ ku̱ʼu̱nyó natúʼunyó xíʼin na̱ yiví, saá na̱ʼún ña̱ kúni̱ún koún testigo Jehová (kaʼvi Romanos 10:10, * 13, 14). * Ña̱kán, sana kivi nda̱ka̱tu̱ʼún xíʼin miíún táʼan ña̱ ni̱nda̱ka̱tu̱ʼun ta̱ eunuco etíope: “¿Ndáaña sási nu̱úi̱ ña̱ va̱ʼa ndakuchii̱?” (Hech. 8:36).
18. ¿Ndáaña ka̱ʼa̱nyó xa̱ʼa̱ nu̱ú inka artículo?
18 Tá ná ndaka̱xiún ña̱ ndakuchiún, iin ña̱ ndáyáʼviní kúú ña̱yóʼo. Xa̱ʼa̱ ña̱ ndáyáʼviníña, xíniñúʼu viíní ndakanixi̱níún xa̱ʼa̱ña. Soo vitin, ¿ndáaña xíniñúʼu kunda̱a̱-iniún xa̱ʼa̱ ña̱ ndákuchiyó? Ta, ¿ndáaña xíniñúʼu keʼún tá kúma̱níka nda̱kuchiún ta saátu tá xa̱a̱ ndi̱ʼi nda̱kuchiún? Nu̱ú ña̱ inka artículo ka̱ʼa̱nyó xa̱ʼa̱ ña̱yóʼo.
YAA 2 Ki̱vi̱ún kúú Jehová
^ párr. 5 Sava na̱ yiví na̱ kúʼvi̱-ini xíni Jehová, túvina ña̱ va̱ása íyo tu̱ʼvana ña̱ ndakuchina ta koona testigo Jehová. Tá saá ndóʼún, ña̱ artículo yóʼo sandákaʼán yóʼó xa̱ʼa̱ sava ña̱ xíniñúʼu keʼún ña̱ va̱ʼa ndakuchiún.
^ párr. 2 Hechos 8:27-31: “Tasaá i̱xatu̱ʼvara miíra ta ku̱a̱ʼa̱nra. Ta nda̱ni̱ʼíra ta̱ eunuco etíope, iin ta̱a ta̱ kúúmií iin chiñu káʼnu nu̱ú ñá Candace, ñá xáʼndachíñu nu̱ú na̱ ñuu Etiopía, ta̱yóʼo kúú ta̱ kíʼin kuenta xíʼin ndiʼi ña̱ ku̱i̱ká ña̱ kúúmiíñá. Ta ni̱xa̱ʼa̱nra chí ñuu Jerusalén nda̱sakáʼnura Ndióxi̱, 28 ta xa̱a̱ nda̱ndikóra. Ta níndúʼura sa̱tá carrora ta ndeéní káʼvira ña̱ ka̱ʼyí ta̱ profeta Isaías. 29 Tasaá ña̱ espíritu ni̱ka̱ʼa̱nña xíʼin ta̱ Felipe: ‘Kúáʼan ta kuyatiún nu̱ú tú carro káaʼ. 30 Ta xínu ta̱ Felipe ni̱xa̱a̱ra nu̱úra, ta xi̱niso̱ʼora ña̱ káʼvi ta̱yóʼo ña̱ ka̱ʼyí ta̱ profeta Isaías. Tasaá ni̱nda̱ka̱tu̱ʼunrara: ‘¿Á ndixa kúnda̱a̱-iniún xíʼin ña̱ káʼviún?ʼ. 31 Ta ta̱yóʼo nda̱kuiinra: ‘¿Ndáaña keʼíi̱ ña̱ va̱ʼa kunda̱a̱-inii̱ xíʼinña, tá kǒo na̱ káʼa̱n xíʼi̱n ndáaña kúni̱ kachiña?ʼ. Tasaá ni̱ka̱ʼa̱nra xíʼin ta̱ Felipe ña̱ ná ndaara koora xíʼinra”.
^ párr. 2 Hechos 8:35, 36: “Ta̱ Felipe ki̱xáʼara káʼa̱nra xa̱ʼa̱ tu̱ʼun Ndióxi̱, ta sa̱náʼa̱ra ta̱yóʼo tu̱ʼun va̱ʼa xa̱ʼa̱ ta̱ Jesús. 36 Tá ku̱a̱ʼa̱nna chí yichi̱, ni̱xa̱a̱na nu̱ú ndíka̱a̱ ti̱kui̱í, ta ta̱ eunuco ni̱ka̱ʼa̱nra: ‘Koto. Yóʼo ndíka̱a̱ ti̱kui̱í. ¿Ndáaña sási nu̱úi̱ ña̱ va̱ʼa ndakuchii̱?ʼ”.
^ párr. 2 Hechos 8:38: “Tasaá, ni̱ka̱ʼa̱nra ña̱ ná kundichi tú carro, ta ta̱ Felipe xíʼin ta̱ eunuco ni̱ki̱ʼvina ini ti̱kui̱í. Tasaá sa̱ndákuchi ta̱ Felipe ta̱yóʼo”.
^ párr. 5 Xa̱ʼa̱ ña̱ xa̱a̱ síín síín íyo na̱ yiví, savana xa̱a̱ síín kundiku̱nna ña̱ káʼa̱n ña̱ artículo yóʼo.
^ párr. 6 Romanos 1:20: “Saáchi ña̱ va̱ʼa ña̱ kúúmiíra ña̱ kǒo kívi kuniyó, ndee̱ra ña̱ íyo ndiʼi tiempo, ña̱ kúúra Ndióxi̱, ni̱na̱ʼa̱raña nani tá ki̱xáʼa xa̱ʼa̱ ñuyǐví, chi xítoyóña xa̱ʼa̱ ndiʼi ña̱ʼa ña̱ ke̱ʼéra, ña̱kán ni iinna va̱ása kivi ka̱ʼa̱n ña̱ su̱ví saá íyoña”.
^ párr. 6 Ndani̱ʼíkaún ña̱ káʼa̱n xa̱ʼa̱ ña̱yóʼo nu̱ú ña̱ folleto ¿Es la vida obra de un Creador? xíʼin ña̱ El origen de la vida. Cinco cuestiones dignas de análisis.
^ párr. 14 1 Juan 5:3: “Ña̱yóʼo kúni̱ kachi ña̱ kúʼvi̱-iniyó xíniyó Ndióxi̱: ña̱ ná kandíxayó chiñu ña̱ xáʼndara nu̱úyó; ta chiñu ña̱ xáʼndara su̱ví ña̱ ve̱e kúúña”.
^ párr. 17 Romanos 10:10: “Saáchi xíʼin ndiʼi níma̱yó kándíxayó Ndióxi̱ ta xa̱ʼa̱ ña̱yóʼo kéʼéyó ña̱ nda̱kú, soo xíʼin yuʼúyó káʼa̱nyó xa̱ʼa̱ ña̱ sakǎku miíyó”.
^ párr. 17 Romanos 10:13, 14: “Saáchi ‘ndiʼi na̱ ndásakáʼnu ki̱vi̱ Jehová ka̱kunaʼ. 14 Ta, ¿nda̱saa kivi ndasakáʼnuna ki̱vi̱ra tá va̱ása kándíxanara? Ta, ¿nda̱saa kivi kandíxanara tá va̱ása xíniso̱ʼona xa̱ʼa̱ra? Ta, ¿nda̱saa kivi kuniso̱ʼona xa̱ʼa̱ra tá kǒo na̱ yiví xíka nátúʼun xíʼinna?”.
^ párr. 68 ÑA̱ KÁʼA̱N XA̱ʼA̱ NA̱ʼNÁ: Iin ñá hermana ñá ku̱a̱ʼa̱n satá táxiñá iin tratado ndaʼa̱ iin ñá loʼo.
