Sava na̱ levita na̱ va̱ása níxikuu su̱tu̱, xi̱keʼéna inkaka chiñu ti̱xin ña̱ templo, tá kúú ña̱ koona policía. Ta ta̱ xi̱kiʼin kuenta xíʼinna xi̱kuu ta̱ capitán ña̱ templo. Ta̱ escritor judío ta̱ naní Filón ni̱ka̱ʼa̱nra xa̱ʼa̱ chiñu ña̱ xi̱keʼéna: “Sava na̱yóʼo xi̱ndaana yéʼé nu̱ú xi̱kiʼvi na̱ yiví chí ini ña̱ templo, ta inkana xi̱ndaana chí ini nu̱ú níndichi ña̱ templo, ta xi̱kiʼinna kuenta ña̱ ná va̱ása ki̱ʼvi na̱ yiví na̱ va̱ása xíniñúʼu ku̱ʼu̱n kán, ni na̱ xi̱kiʼvi xa̱ʼa̱ ña̱ va̱ása kúnda̱a̱-inina, ta savana xi̱ndaana ñuú xíʼin káʼñu iníí sa̱táña, ta xi̱nasa̱ma na̱ xi̱keʼé ña̱yóʼo”.

Na̱ policía yóʼo xi̱kachíñuna nu̱ú na̱ Sanedrín. Ta iinlá na̱yóʼo kuití kúú na̱ xi̱taxi na̱ chíñu ña̱ ñuu Roma, ña̱ kuniʼina espada.

Iin ta̱ xíni̱ va̱ʼa ta̱ naní Joachim Jeremias ni̱ka̱ʼa̱nra: “Tá ti̱inna ta̱ Jesús, ni̱ka̱ʼa̱nra xíʼinna ña̱ ndiʼi ki̱vi̱ xi̱xiyora yéʼé ña̱ templo ña̱ xi̱sanáʼa̱ra na̱ yiví, ta nda̱a̱ ni iinna kǒo nítiinñaʼá, va̱ása ka̱ʼa̱nví ta̱ Jesús ña̱yóʼo xíʼinna tá su̱ví na̱ policía na̱ xi̱ndaa chí templo níxi̱kuuna” (Mat. 26:55). Ta̱ xíni̱ va̱ʼa yóʼo, ni̱ka̱ʼa̱nra ña̱ na̱ xi̱kuni̱ tiin ta̱ Jesús tá ya̱chi̱ka, xi̱kuuna na̱ policía ña̱ templo (Juan 7:32, 45, 46). Tá ni̱ya̱ʼa tiempo, na̱ Sanedrín ni̱ka̱ʼa̱nna xíʼin ta̱ capitán ña̱ templo xíʼin sava na̱ policía na̱ kítáʼan xíʼinra, ña̱ ná ku̱ʼu̱nna tiinna na̱ discípulo ta̱ Jesús ku̱ʼu̱n xíʼinna nu̱úna. Ta sana na̱ policía yóʼo kúútu na̱ ta̱vá ta̱ Pablo ini templo (Hech. 4:1-3; 5:17-27; 21:27-30).