1. ¿Ndáaña xíniñúʼu keʼé iin na̱ yiví tá kúma̱níka kixáʼana ixava̱ʼana iin veʼe?

NDAKANIXI̱NÍ xa̱ʼa̱ iin ta̱a ta̱ kúni̱ ixava̱ʼa iin veʼe, ta xa̱a̱ kúnda̱a̱ va̱ʼa inira ndáa ki̱ʼva kúni̱ra kooña. Tá saá, ¿á kivi xa̱a̱ ndi̱ku̱n ku̱ʼu̱nra satára ña̱ʼa ña̱ kuniñúʼura, ta xa̱a̱ kixáʼara ixava̱ʼaraña? Va̱ása. Chi tá kúma̱níka kixáʼara, íyo iin ña̱ ndáyáʼviní xíniñúʼu keʼéra, ña̱ kotora ndáaña kuniñúʼura. ¿Nda̱chun? Saáchi xíniñúʼu kotora á nani xu̱ʼúnra ña̱ ixava̱ʼaraña. Tasaá kúú ña̱ kivi saxínuraña.

2. Nda̱a̱ táki̱ʼva káchi Lucas 14:27-30, ¿ndáaña xíniñúʼu viíní ndakanixi̱níún xa̱ʼa̱ tá kúma̱níka ndakuchiún?

² ¿Á kúni̱ún ndakuchiún xa̱ʼa̱ ña̱ kúʼvi̱ní-iniún xíniún Jehová ta táxiún tíxa̱ʼvi ndaʼa̱ra? Tá saá íyoña, ña̱ kúni̱ún keʼún íyoña nda̱a̱ táki̱ʼva íyo ña̱ ke̱ʼé ta̱ ta̱a ta̱ kúni̱ ixava̱ʼa iin veʼe. ¿Nda̱chun káʼa̱nyó ña̱yóʼo? Ndakanixi̱ní xa̱ʼa̱ ña̱ ni̱ka̱ʼa̱n ta̱ Jesús nu̱ú Lucas 14:27-30 * (kaʼviña). Ta̱ Jesús ni̱ka̱ʼa̱nra ndáaña kúni̱ kachi ña̱ kooyó discípulora, ña̱ xíniñúʼu kundeé-iniyó ya̱ʼayó nu̱ú tu̱ndóʼo ta sandákooyó keʼéyó sava ña̱ʼa (Luc. 9:23-26; 12:51-53). Ña̱kán, tá kúma̱níka ndakuchiún xíniñúʼu viíní ndakanixi̱níún xa̱ʼa̱ ndiʼi ña̱ xíniñúʼu keʼún ña̱ va̱ʼa kundiku̱ún ta̱ Cristo. Saá kúú ña̱ va̱ʼaníka koo tu̱ʼvaún ña̱ ndakundeún ndasakáʼnún Ndióxi̱ xíʼin ña̱ nda̱kú-ini, tá xa̱a̱ ndi̱ʼi nda̱kuchiún.

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

³ Xa̱ʼa̱ ña̱ xa̱a̱ ku̱ndaa̱-iniún ndáaña xíniñúʼu keʼún ña̱ va̱ʼa ndakuchiún,  ¿á ndáyáʼvi keʼún ña̱yóʼo? Ndáyáʼvivaña. Tá ná ndakuchiún ku̱a̱ʼání ña̱ va̱ʼa ndakiʼún vitin ta saátu chí nu̱únínu. Nu̱ú ña̱ artículo yóʼo ka̱ʼa̱nyó xa̱ʼa̱ sava pregunta ña̱ ndáyáʼviní ña̱ káʼa̱n xa̱ʼa̱ ña̱ ndákuchiyó. Ña̱yóʼo chindeétáʼan xíʼún ña̱ kotoún á xa̱a̱ íyo tu̱ʼvaún ña̱ ndakuchiún.

4. a) ¿Ndáaña kúú ña̱ ndataxi xíʼin miíyó ndaʼa̱ Ndióxi̱? b) Nda̱a̱ táki̱ʼva káchi Mateo 16:24, ¿ndáaña kúni̱ kachi ña̱ sandákooyó keʼéyó ña̱ kúni̱ miíyó?

⁴ ¿Ndáaña kúú ña̱ ndataxi xíʼin miíyó ndaʼa̱ Ndióxi̱? Ña̱yóʼo kúú iin ña̱ xíniñúʼu keʼún tá kúma̱níka ndakuchiún. Ña̱ ndataxi xíʼin miíún ndaʼa̱ Jehová kúú ña̱ ka̱ʼún xíʼinra xíʼin ndiʼi níma̱ún, ta ka̱ʼún xíʼinra ña̱ kúni̱ún kuniñúʼún ña̱ tákún ña̱ kachíñún nu̱úra ndiʼi tiempo. Tá ndátaxi xíʼin mií iinna ndaʼa̱ Jehová, sándakoona kéʼéna ña̱ kúni̱ miína (kaʼvi Mateo 16:24). * Tasaá ndáa iinlá nu̱ú Jehová kúú ña̱ kachíñún (Rom. 14:8). Tá ndátaxi xíʼin miíún ndaʼa̱ra, káʼún xíʼinra ña̱ ndáyáʼvika nu̱ún kúú ña̱ kachíñún nu̱úra ndiʼi tiempo, ta su̱víka ña̱ keʼún ña̱ kúni̱ miíún. Ña̱ ndataxi xíʼin miíún ndaʼa̱ Ndióxi̱, kúú ña̱ kíndoún kachíñún nu̱úra. Soo Jehová va̱ása íxandúxara xíʼinyó ña̱ keʼéyó ña̱yóʼo. Soo tá ná keʼéyóña, kúni̱ra ña̱ ná saxínuyó ña̱ ni̱ka̱ʼa̱nyó (Sal. 116:12, 14).

5. ¿Á iin kítáʼan ña̱ ndataxi xíʼin miíyó ndaʼa̱ Ndióxi̱ xíʼin ña̱ ndakuchiyó?

⁵ ¿Á iin kítáʼan ña̱ ndataxi xíʼin miíyó ndaʼa̱ Ndióxi̱ xíʼin ña̱ ndakuchiyó? Ña̱ ndataxi xíʼin miíún ndaʼa̱ Jehová, kǒo inka na̱ kúnda̱a̱-ini xa̱ʼa̱ña. Soo tá ná ndakuchiún, nu̱ú ku̱a̱ʼá na̱ yiví kúú ña̱ keʼún ña̱yóʼo, tá kúú tá xíyo asamblea. Tá ná ndakuchiún, na̱ʼún nu̱ú inkana ña̱ xa̱a̱ nda̱taxi xíʼin miíún ndaʼa̱ Jehová. * Ta ña̱yóʼo na̱ʼa̱ña nu̱ú ndiʼina ña̱ kúʼvi̱ní-iniún xíniún Jehová xíʼin ndiʼi níma̱ún, xíʼin ndiʼi ña̱ tákún, xíʼin ndiʼi xi̱níún xíʼin ndiʼi ndeún, ta nda̱kaxiún ña̱ kachíñún nu̱úra ndiʼi tiempo (Mar. 12:30).

6, 7. Nda̱a̱ táki̱ʼva káchi 1 Pedro 3:18-22, ¿nda̱chun ndáyáʼviní ndakuchiyó?

⁶ ¿Á ndáyáʼviní ña̱ ndakuchiyó? Ndakanixi̱ní xa̱ʼa̱ ña̱ káʼa̱n 1 Pedro 3:18-22 * (kaʼviña). Tú arca tú i̱xava̱ʼa ta̱ Noé, ni̱na̱ʼa̱nú nu̱ú na̱ yiví ña̱ xi̱kandíxara Ndióxi̱, ta ki̱ʼva saá íyo ña̱ keʼún tá ná ndakuchiún chi na̱ʼún nu̱ú inkana ña̱ nda̱taxi xíʼin miíún ndaʼa̱ Jehová. Soo, ¿á ndáyáʼvi keʼéyó ña̱yóʼo? Ndáyáʼvivaña, ta ta̱ Pedro ni̱ka̱ʼa̱nra nda̱chun. Ña̱ nu̱ú, ni̱ka̱ʼa̱nra: “Ña̱ nda̱kuchindó kúú ña̱ sáka̱ku ndóʼó”. Ña̱ ndakuchiyó kivi sakákuña miíyó tá náʼa̱yó xíʼin ña̱ kéʼéyó ña̱ kándíxayó ta̱ Jesús, ta saátu ña̱ ni̱xi̱ʼi̱ra xa̱ʼa̱yó ta nda̱takura ta ku̱a̱ʼa̱nra chí ndiví, ta vitin íyora chí ndaʼa̱ kúaʼa Ndióxi̱.

⁷ Ña̱ u̱vi̱, ña̱ ndakuchiyó kivi chindeétáʼanña xíʼinyó ña̱ vií koo ña̱ xínitúni̱yó nu̱ú Ndióxi̱. Tá ndátaxi xíʼin miíyó ndaʼa̱ Ndióxi̱ ta ndákuchiyó va̱ʼaníka kíxáʼayó kítáʼanyó xíʼinra. Xa̱ʼa̱ ña̱ nda̱ndikó-iniyó xa̱ʼa̱ ku̱a̱chiyó xíʼin ndiʼi níma̱yó, ta kándíxayó ña̱ ni̱xi̱ʼi̱ ta̱ Jesús xa̱ʼa̱yó, Ndióxi̱ íxakáʼnu-inira xa̱ʼa̱ ku̱a̱chiyó. Tasaá kúú ña̱ kivi kusi̱í-iniyó xa̱ʼa̱ ña̱ vií íyo ña̱ xínitúni̱yó nu̱úra.

8. ¿Ndáa xa̱ʼa̱ kúú ña̱ xíniñúʼu ndakuchiún?

 ⁸ ¿Ndáa xa̱ʼa̱ kúú ña̱ xíniñúʼu ndakuchiún? Tíxa̱ʼvi ña̱ viíní káʼviún Biblia ku̱a̱ʼání ña̱ʼa xa̱a̱ sa̱kuaʼún xa̱ʼa̱ Jehová, tá kúú xa̱ʼa̱ ki̱ʼva ña̱ íyora xíʼin ña̱ kéʼéra. Ta ndiʼi ña̱yóʼo, nda̱a̱ níma̱ún ni̱xa̱a̱ña ta xa̱ʼa̱ ña̱yóʼo kúʼvi̱ní-iniún xíniúnra. Ta xa̱ʼa̱ ña̱ kúʼvi̱-iniún xíniún Jehová kúú ña̱ xíniñúʼu ndakuchiún.

9. Nda̱a̱ táki̱ʼva káchi Mateo 28:19, 20, ¿ndáaña kúni̱ kachi ña̱ ndakuchiyó xíʼin ki̱vi̱ yiváyó, xíʼin ki̱vi̱ se̱ʼera, ta saátu xíʼin ki̱vi̱ espíritu santo?

⁹ Inka xa̱ʼa̱ ña̱ xíniñúʼu ndakuchiún kúú xa̱ʼa̱ ña̱ sa̱kuaʼún nu̱ú Biblia ta kándíxaúnña. Ndakanixi̱ní xa̱ʼa̱ ña̱ ni̱ka̱ʼa̱n ta̱ Jesús, tá xa̱ʼndara chiñu ña̱ ku̱ʼu̱nyó natúʼunyó xíʼin na̱ yiví ña̱ koona discípulora (kaʼvi Mateo 28:19, 20). * Ni̱ka̱ʼa̱nra ña̱ xíniñúʼu ndakuchi iinna “xíʼin ki̱vi̱ yiváyó xíʼin ki̱vi̱ se̱ʼera ta saátu xíʼin ki̱vi̱ espíritu santo”. ¿Ndáaña kúni̱ kachi ña̱yóʼo? Ña̱ xíniñúʼu kandíxaún xíʼin ndiʼi níma̱ún ña̱ sánáʼa̱ Biblia xa̱ʼa̱ Jehová, xa̱ʼa̱ se̱ʼera ta̱ Jesús xíʼin xa̱ʼa̱ espíritu santo. Ña̱yóʼo íyoní ndee̱ña ta kivi xa̱a̱ña nda̱a̱ níma̱ún (Heb. 4:12). Ná kotoyó savaña.

10, 11. ¿Ndáaña nda̱a̱ kúú ña̱ sa̱kuaʼún xa̱ʼa̱ yiváyó ta kándíxaúnña vitin?

¹⁰ ¿Á ndákaʼún tá sa̱kuaʼún ña̱ nda̱a̱ xa̱ʼa̱ yiváyó? Ki̱vi̱ra kúú Jehová, ta ta̱yóʼo kúú “ta̱ káʼnu iníísaá ñuyǐví”, ta iinlá ta̱yóʼo kúú mií “Ndióxi̱ ta̱ nda̱a̱” (Sal. 83:18; Is. 37:16). Ta saátu i̱xava̱ʼara miíyó, ta sakǎkura miíyó (Sal. 3:8; 36:9). Ta ndu̱kúra ki̱ʼva ña̱ ndatavára miíyó ndaʼa̱ ku̱a̱chi xíʼin ña̱ xíʼi̱yó, ta saátu taxira ña̱ kutakuyó ndiʼi tiempo (Juan 17:3). Tá ná ndataxi xíʼin miíún ndaʼa̱ Jehová ta ndakuchiún, saá kúú ña̱ na̱ʼún nu̱ú ku̱a̱ʼá na̱ yiví ña̱ kúún testigora (Is. 43:10-12). Ta xa̱ún koún táʼan na̱ ñuura na̱ ndásakáʼnu iinlá miíra ta níʼina ki̱vi̱ra xíʼin ña̱ si̱í-ini, ta nátúʼunna xíʼin inka na̱ yiví xa̱ʼa̱ra (Sal. 86:12).

¹¹ Iin ña̱ va̱ʼaní kúú ña̱ kúnda̱a̱-iniyó xa̱ʼa̱ ña̱ sánáʼa̱ Biblia xa̱ʼa̱ yiváyó. Tá ná kandíxaún ña̱yóʼo, níma̱ún chindaʼáña yóʼó ña̱ ndataxi xíʼin miíún ndaʼa̱ Jehová, ta ndakuchiún.

12, 13. ¿Ndáaña nda̱a̱ kúú ña̱ sa̱kuaʼún xa̱ʼa̱ se̱ʼe Ndióxi̱ ta kándíxaúnña vitin?

¹² ¿Ndáaña ndo̱ʼún tá sa̱kuaʼún ña̱yóʼo xa̱ʼa̱ se̱ʼe Ndióxi̱? Ta̱ Jesús kúú inka ta̱ ndáyáʼvika iníísaá ñuyǐví. Ta ta̱yóʼo xíʼin ña̱ si̱í-ini ni̱xi̱ʼi̱ra xa̱ʼa̱yó ña̱ va̱ʼa sakǎkura miíyó. Tá náʼa̱yó xíʼin ña̱ kéʼéyó ña̱ kándíxayó ña̱ ni̱xi̱ʼi̱ra xa̱ʼa̱yó, kivi ixakáʼnu-ini Ndióxi̱ xa̱ʼa̱ ku̱a̱chiyó tasaá xa̱a̱yó kutáʼan viíyó xíʼinra, ta ni̱ʼíyó ña̱ kutakuyó ndiʼi tiempo (Juan 3:16). Ta̱ Jesús kúútura iin su̱tu̱ káʼnu, chi kúni̱ra chindeétáʼanra xíʼinyó ña̱ ndakiʼinyó ña̱ va̱ʼa xa̱ʼa̱ ña̱ ni̱xi̱ʼi̱ra xa̱ʼa̱yó, ta kutáʼan viíyó xíʼin Jehová (Heb. 4:15; 7:24, 25). Xa̱ʼa̱ ña̱ kúúra rey ti̱xin Reino Ndióxi̱, Jehová kuniñúʼurara ña̱ ndasayi̱i̱ra ki̱vi̱ra, ña̱ sandiʼi-xa̱ʼa̱ra ndiʼi ña̱ va̱ása va̱ʼa, ta taxira ku̱a̱ʼání bendición ndaʼa̱yó tá ná kooyó nu̱ú ñuyǐví xa̱á (Mat. 6:9, 10; Apoc. 11:15). Ta saátu va̱ʼaní yichi̱ sa̱ndákoo ta̱ Jesús nu̱úyó (1 Ped. 2:21). Chi̱ka̱a̱níra ndee̱ ña̱ ke̱ʼéra ña̱ kúni̱ Ndióxi̱, ta xíniñúʼu kundiku̱nyó ña̱ ke̱ʼéra (Juan 4:34).

¹³ Tá ná kandíxaún ña̱ sánáʼa̱ Biblia xa̱ʼa̱ ta̱ Jesús, xa̱ún kuʼvi̱-iniún kuniúnra. Ta ña̱yóʼo chindaʼáña yóʼó, ña̱ kuniñúʼún ña̱ tákún ña̱ keʼún ña̱ kúni̱ Ndióxi̱ nda̱a̱ táki̱ʼva ke̱ʼé ta̱ Jesús. Tasaá kuni̱ún ndataxi xíʼin miíún ndaʼa̱ Jehová ta ndakuchiún.

14, 15. ¿Ndáaña nda̱a̱ kúú ña̱ sa̱kuaʼún xa̱ʼa̱ espíritu santo ta kándíxaúnña vitin?

¹⁴ ¿Ndáaña nda̱kanixi̱níún tá sa̱kuaʼún ña̱ va̱xi yóʼo xa̱ʼa̱ espíritu santo? Ña̱yóʼo su̱ví iin na̱ yiví kúúña, chi ndee̱ Ndióxi̱ kúúña. Jehová xi̱niñúʼuraña ña̱ xi̱niʼiña yichi̱ nu̱ú na̱ ta̱a na̱ ka̱ʼyí Biblia, ta ña̱yóʼo kúútu ña̱ chíndeétáʼan xíʼin  miíyó ña̱ va̱ʼa kunda̱a̱-iniyó xíʼin ña̱ káʼviyó nu̱ú Biblia, ta keʼéyó ña̱ káʼa̱nña (Juan 14:26; 2 Ped. 1:21). Jehová xíniñúʼura ña̱ espíritu yóʼo ña̱ va̱ʼa taxira ndee̱ ndaʼa̱yó (2 Cor. 4:7). Ña̱ espíritu santo táxiña ndee̱ ndaʼa̱yó ña̱ va̱ʼa ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱, ña̱ va̱ása keʼéyó ña̱ kǒo kútóora, ña̱ va̱ása ndakava-iniyó, ta kundeé-iniyó ya̱ʼayó nu̱ú tu̱ndóʼo. Ta saátu chíndeétáʼanña xíʼinyó ña̱ kuumiíyó ña̱ va̱ʼa (Gál. 5:22). Xíʼin ña̱ si̱í-ini táxi Ndióxi̱ espíritu santora ndaʼa̱ na̱ kándíxañaʼá ta ndúkúnaña nu̱úra (Luc. 11:13).

¹⁵ Va̱ʼaní kúniyó tá kúnda̱a̱-iniyó, ña̱ na̱ ndásakáʼnu Jehová kivi kandíxana ña̱ chindeétáʼan espíritu santo xíʼinna ña̱ va̱ʼa kachíñuna nu̱úra. Tá ná kandíxaún ña̱ sánáʼa̱ Biblia xa̱ʼa̱ espíritu santo, xa̱ún kuni̱ún ndataxi xíʼin miíún ndaʼa̱ Ndióxi̱ ta ndakuchiún.

16. ¿Ndáaña xa̱a̱ sa̱kuaʼayó?

¹⁶ Ña̱ ndaka̱xinyó á ndataxi xíʼin miíyó ndaʼa̱ Ndióxi̱ ta ndakuchiyó, iin ña̱ ndáyáʼviní kúú ña̱yóʼo. Nda̱a̱ táki̱ʼva xa̱a̱ ku̱ndaa̱-iniyó, xíniñúʼu sandákoún keʼún sava ña̱ʼa, soo ku̱a̱ʼáníka ña̱ va̱ʼa ndakiʼún tá ná keʼún ña̱yóʼo. Ña̱ ndakuchiún kivi sakǎkuña yóʼó, ta va̱ʼa koo ña̱ xínitúni̱ún nu̱ú Ndióxi̱. Ta xíniñúʼu ndakuchiún xa̱ʼa̱ ña̱ kúʼvi̱-iniún xíniún Jehová. Ta saátu xíniñúʼu kandíxaún xíʼin ndiʼi níma̱ún ña̱ nda̱a̱ ña̱ sa̱kuaʼún xa̱ʼa̱ Ndióxi̱, xa̱ʼa̱ se̱ʼera ta̱ Jesús, xíʼin xa̱ʼa̱ espíritu santo. Xa̱ʼa̱ ndiʼi ña̱ xa̱a̱ sa̱kuaʼayó, ¿á túviún ña̱ xa̱a̱ íyo tu̱ʼvaún ña̱ ndakuchiún?

17. ¿Ndáaña kúú sava ña̱ xíniñúʼu keʼún ña̱ va̱ʼa ndakuchiún?

¹⁷ Tá túviún ña̱ xa̱a̱ íyo tu̱ʼvaún ña̱ ndakuchiún, sana xa̱a̱ ku̱a̱ʼá ña̱ʼa ke̱ʼún ña̱ va̱ʼa vií kutáʼún xíʼin Jehová. * Tíxa̱ʼvi ña̱ káʼvi ni̱ʼún Biblia, xa̱a̱ ku̱a̱ʼání ña̱ʼa sa̱kuaʼún xa̱ʼa̱ Jehová xíʼin ta̱ Jesús, ta vitin kándíxaúnna (Heb. 11:6). Ta saátu kándíxaún ndiʼi ña̱ káʼa̱n Jehová keʼéra ña̱ va̱xi nu̱ú Biblia, ta kándíxaún ña̱ kivi sakǎku ña̱ ni̱xi̱ʼi̱ ta̱ Jesús yóʼó, nu̱ú ku̱a̱chi xíʼin ña̱ xíʼi̱yó. Xa̱a̱ nda̱ndikó-iniún xa̱ʼa̱ ku̱a̱chiún ta ndu̱kún ña̱ káʼnu-ini nu̱ú Jehová. Ta xa̱a̱ sa̱ndákoún ña̱ xi̱keʼún tá ya̱chi̱ ta vitin kéʼún ña̱ kútóo Ndióxi̱ (Hech. 3:19). Ta kúni̱ún natúʼún xíʼin inka na̱ yiví xa̱ʼa̱ ña̱ kándíxaún. Xa̱a̱ ni̱xa̱ún ku̱ún publicador, ta kítaún xíʼin na̱ congregación ña̱ va̱ʼa natúʼunndó xíʼin na̱ yiví xa̱ʼa̱ Ndióxi̱ (Mat. 24:14). Jehová kúsi̱íní-inira xíʼún xa̱ʼa̱ ña̱ kéʼún ndiʼi ña̱yóʼo (Prov. 27:11).

18. ¿Ndáa inkaka ña̱ xíniñúʼu keʼún tá kúma̱níka ndakuchiún?

¹⁸ Tá kúma̱níka ndakuchiún, íyo inkaka ña̱ xíniñúʼu keʼún. Nda̱a̱ táki̱ʼva xa̱a̱ ku̱ndaa̱-iniyó, xíniñúʼu ndataxi xíʼin miíún ndaʼa̱ Ndióxi̱, ña̱yóʼo kúni̱ kachiña ña̱ ka̱ʼún xíʼinra xíʼin ndiʼi níma̱ún, ta ka̱ʼún xíʼinra ña̱ kúni̱ún kuniñúʼún ña̱ tákún ña̱ kachíñún nu̱úra (1 Ped. 4:2). Tándi̱ʼi ka̱ʼa̱n xíʼin ta̱ coordinador nu̱ú na̱ anciano ña̱ kúni̱ún ndakuchiún. Ta ta̱yóʼo ka̱ʼa̱nra xíʼin inkaka na̱  anciano ña̱ ka̱ʼa̱nna xíʼún. Ta kǒo kundi̱ʼi̱-iniún, chi na̱ hermano yóʼo xíni̱na yóʼó ta kúʼvi̱-inina xínina yóʼó. Na̱yóʼo nda̱ka̱tu̱ʼunna yóʼó xa̱ʼa̱ sava ña̱ xa̱a̱ sa̱kuaʼún nu̱ú Biblia, ña̱ va̱ʼa kotona á kúnda̱a̱ va̱ʼa iniún xíʼinña, ta á kándíxaún ña̱ ndáyáʼvi ña̱ ndataxi xíʼin miíún ndaʼa̱ Ndióxi̱ xíʼin ña̱ ndakuchiún. Tá túvina ña̱ xa̱a̱ íyo tu̱ʼvaún ña̱ ndakuchiún, ka̱ʼa̱nna xíʼún ña̱ kivi keʼúnña tá ná koo iin asamblea.

19, 20. ¿Ndáaña xíniñúʼu keʼún tá xa̱a̱ ndi̱ʼi nda̱kuchiún, ta ndáaña kivi chindeétáʼan xíʼún?

¹⁹ Tá xa̱a̱ nda̱kuchiún, ¿ndáaña xíniñúʼu keʼún? * Ndakaʼún ña̱ tá nda̱taxi xíʼin miíún ndaʼa̱ Jehová, ke̱ʼún iin voto xíʼinra ta ndátura ña̱ ná saxínúnña. Xa̱ʼa̱ ña̱yóʼo, tá xa̱a̱ ndi̱ʼi nda̱kuchiún kúni̱ra ña̱ ná keʼún ña̱ ni̱ka̱ʼún. ¿Ndáaña chindeétáʼan xíʼún?

²⁰ Yatin koún xíʼin na̱ congregación. Tá ná ndakuchiún xa̱ún kutáʼún xíʼin ku̱a̱ʼání na̱ hermano (1 Ped. 2:17, nota). Ta na̱ hermano ti̱xin congregación koona na̱ veʼún. Tá ná ku̱ʼu̱n ni̱ʼún reunión ndakúníka koo ña̱ kítáʼún xíʼinna. Ndiʼi ki̱vi̱ kaʼviún Biblia ta taváún tiempo ña̱ ndakanixi̱níún xa̱ʼa̱ña (Sal. 1:1, 2). Ña̱yóʼo kúni̱ kachiña, ña̱ tá xa̱a̱ ndi̱ʼi ka̱ʼviún iin táʼvi loʼo ña̱ Biblia, xíniñúʼu viíní ndakanixi̱níún xa̱ʼa̱ ña̱ ka̱ʼviún, tasaá kúú ña̱ xa̱a̱ ña̱yóʼo nda̱a̱ níma̱ún. Ta saátu xíniñúʼu keʼún ña̱ ni̱ka̱ʼa̱n ta̱ Jesús: “Ka̱ʼa̱n ni̱ʼindó xíʼin Ndióxi̱” (Mat. 26:41). Ta oración ña̱ káʼún xíʼin Jehová kivi sákuyatinña yóʼó nu̱úra. Ta ndakundeún chika̱ún ndee̱ ña̱ siʼnaka Reino Ndióxi̱ nandukún (Mat. 6:33). ¿Ndáa ki̱ʼva? Ña̱ kundi̱ʼi̱ka-iniún xa̱ʼa̱ ña̱ natúʼún xa̱ʼa̱ Ndióxi̱. Tá ná natúʼún ni̱ʼún xíʼin na̱ yiví, ndakúka koo ña̱ kándíxaúnra ta sana kivi chindeétáʼún xíʼin inkana ña̱ ni̱ʼína ña̱ kutakuna ndiʼi tiempo (1 Tim. 4:16).

21. ¿Ndáaña ndakiʼún tá ná ndakuchiún?

²¹ Ña̱ ndataxi xíʼin miíún ndaʼa̱ Jehová ta ndakuchiún iin ña̱ ndáyáʼviní kúú ña̱yóʼo. Ni xíniñúʼu sandákoún keʼún sava ña̱ʼa. Soo ku̱a̱ʼáníva ña̱ va̱ʼa ndakiʼún xa̱ʼa̱ ña̱yóʼo. Ndiʼi tu̱ndóʼo ña̱ ná ya̱ʼún nu̱ú ñuyǐví yóʼo, su̱ví ndiʼi tiempo kooña (2 Cor. 4:17). Tá ná ndakuchiún, si̱íníka koo ña̱ kutakún vitin ta saátu chí nu̱únínu (1 Tim. 6:19). Xa̱ʼa̱ ña̱yóʼo, viíní ndakanixi̱níún xa̱ʼa̱ña, ka̱ʼa̱n xíʼin Jehová ta ndakuiin ña̱ pregunta yóʼo: “¿Á xa̱a̱ íyo tu̱ʼvai̱ ña̱ ndakuchii̱?”.