1. ¿Nda̱chun ni̱ka̱ʼa̱n ta̱ Jesús xíʼin Jehová ña̱ ná kundaara na̱ discípulora?

ÑUÚ tá kúma̱níka kuvi ta̱ Jesús nda̱kanixi̱níra xa̱ʼa̱ tu̱ndóʼo ña̱ ya̱ʼa na̱ discípulora nu̱ú. Xa̱ʼa̱ ña̱ xi̱kuʼvi̱-inira xi̱xinirana ni̱ka̱ʼa̱nra xíʼin yivára ña̱ ná kundaarana nu̱ú ta̱ Ndi̱va̱ʼa (Juan 17:14, 15). Xi̱kunda̱a̱-inira ña̱ tá ná ndikóra chí ndiví, ta̱ Ndi̱va̱ʼa ndakundeéra kanitáʼanra xíʼin ndiʼi na̱ kúni̱ kachíñu nu̱ú Jehová. Ña̱yóʼo náʼa̱ káxiña ña̱ xíniñúʼu kundaa Jehová na̱ ñuura.

2. ¿Nda̱chun va̱ʼa kándíxayó ña̱ ndakuiin Jehová tá káʼa̱nyó xíʼinra?

² Jehová nda̱kuiinra oración ña̱ ke̱ʼé se̱ʼera nu̱úra xa̱ʼa̱ ña̱ kúʼvi̱-inira xínirara. Ta saátu miíyó tá ná chika̱a̱yó ndee̱ ña̱ sakúsi̱íyó-ini Jehová, kuʼvi̱-inira kunira miíyó ta ndakuiinra tá ná ka̱ʼa̱nyó xíʼinra ña̱ chindeétáʼanra xíʼinyó ta kundaara miíyó. Xa̱ʼa̱ ña̱ kúʼvi̱-inira xínira ndiʼi na̱ kúú se̱ʼera, ndiʼi tiempo kundaarana. Chi tá ná kǒo keʼéra ña̱yóʼo va̱ása saxínura ña̱ kúni̱ kachi ki̱vi̱ra á ka̱ʼa̱n inkana ña̱ va̱ása va̱ʼa xa̱ʼa̱ra.

3. ¿Nda̱chun xíniñúʼuyó ña̱ ná kundaa Jehová miíyó?

³ Tiempo vitin kúú ña̱ xíniñúʼuníkayó ña̱ ná kundaa Jehová miíyó. Saáchi ta̱ ndi̱va̱ʼa va̱ása íyokara chí ndiví ta sáa̱níra xa̱ʼa̱ ña̱yóʼo (Apoc. 12:12). Ta saátu sándaʼvira na̱ yiví ña̱ kixáʼana ndakanixi̱nína ña̱ “kéʼéna iin chiñu nu̱ú Ndióxi̱” tá íxandi̱va̱ʼana xíʼinyó (Juan 16:2). Ta na̱ va̱ása kándíxa Ndióxi̱ íxandi̱va̱ʼana xíʼinyó saáchi va̱ása kéʼéyó táʼan ña̱ kéʼé na̱ ñuyǐví yóʼo. Ni nda̱a̱ ndáaka ña̱ ná keʼéna va̱ása yíʼviyó, saáchi Biblia káchiña: “Tátayó nda̱kúní-inira ta ndasandakúra-inindó ta kundaara ndóʼó nu̱ú ta̱ Ndi̱va̱ʼa” (2 Tes. 3:3). Vitin ná ka̱ʼa̱nyó xa̱ʼa̱ u̱vi̱ ki̱ʼva ña̱ ndáa Jehová miíyó.

4. Nda̱a̱ táki̱ʼva káchi Efesios 6:13-17, ¿ndáaña táxi Jehová ndaʼa̱yó ña̱ va̱ʼa kundaara miíyó?

⁴ Jehová táxira ña̱ xíniñúʼuyó ña̱ va̱ʼa kanitáʼanyó tasaá ndáara miíyó  nu̱ú ta̱ Ndi̱va̱ʼa (kaʼvi Efesios 6:13-17). * Ña̱ táxi Jehová ndaʼa̱yó ndeéníña ta va̱ʼaní chíndeétáʼanña xíʼinyó, soo kivi chindeétáʼanña xíʼinyó tá ndiʼi tiempo ná kuniñúʼuyó ndiʼi ña̱ kúúmií ña̱yóʼo. Vitin ka̱ʼa̱nyó xa̱ʼa̱ iin tá iin táʼví ña̱ táxi Jehová ndaʼa̱yó ña̱ va̱ʼa kanitáʼanyó.

5. ¿Ndáaña kúú ña̱ nda̱a̱ ña̱ íyo nda̱a̱ táki̱ʼva íyo iin cinturón, ta nda̱chun xíniñúʼu kuniñúʼuyóña?

⁵ Ña̱ nda̱a̱ ña̱ íyo nda̱a̱ táki̱ʼva íyo iin cinturón kúú ndiʼi ña̱ nda̱a̱ ña̱ va̱xi nu̱ú tu̱ʼun Ndióxi̱. ¿Nda̱chun xíniñúʼu kuniñúʼuyó cinturón yóʼo? Saáchi “ta̱ Ndi̱va̱ʼa kúú yivá na̱ káʼa̱n ña̱ vatá” (Juan 8:44). Xa̱a̱ ku̱a̱ʼání ku̱i̱ya̱ káʼa̱nra tu̱ʼun vatá, ta xa̱a̱ ku̱chiñura sa̱ndáʼvira “ndiʼi na̱ ndóo nu̱ú ñuʼú yóʼo” (Apoc. 12:9). Soo ña̱ nda̱a̱ ña̱ va̱xi nu̱ú Biblia ndáaña miíyó nu̱ú ña̱ vatá yóʼo. ¿Ndáa ki̱ʼva kuniñúʼuyó cinturón yóʼo? Sakuaʼayó ña̱ nda̱a̱ xa̱ʼa̱ Jehová ta ndasakáʼnuyóra nda̱a̱ táki̱ʼva náʼa̱ ña̱ espíritu santo yichi̱ nu̱úyó ta saátu nda̱a̱ táki̱ʼva íyo ña̱ nda̱a̱ ña̱ sa̱kuaʼayó xa̱ʼa̱ra, ta va̱ása sandáʼviyó (Juan 4:24; Efes. 4:25; Heb. 13:18).

6. ¿Ndáaña kúú ña̱ nda̱kú ña̱ íyo nda̱a̱ táki̱ʼva íyo iin ka̱a ña̱ ndákasi kándíkayó, ta nda̱chun xíniñúʼu kuniñúʼuyóña?

⁶ Ña̱ nda̱kú ña̱ íyo nda̱a̱ táki̱ʼva íyo iin ka̱a ña̱ ndákasi kándíkana, ña̱yóʼo kúú ndiʼi ña̱ káʼa̱n Jehová xíʼinyó keʼéyó. ¿Nda̱chun xíniñúʼu kuniñúʼuyóña? Saáchi nda̱a̱ táki̱ʼva ndáa ka̱a yóʼo níma̱ iin na̱ soldado, ña̱ nda̱kú ña̱ íyo nda̱a̱ táki̱ʼva íyo iin ka̱a ña̱ ndákasi kándíkayó, kivi kundaaña níma̱yó nu̱ú ña̱ va̱ása va̱ʼa íyo nu̱ú ñuyǐví yóʼo ña̱ kivi sandíʼi-xa̱ʼa̱ ña̱ va̱ʼa kúúmiíyó (Prov. 4:23). Jehová káʼa̱nra xíʼinyó ña̱ ná kuʼvi̱-iniyó kuniyóra ta ná kachíñuyó nu̱úra xíʼin ndiʼi níma̱yó (Mat. 22:36, 37). Xa̱ʼa̱ ña̱yóʼo ta̱ Ndi̱va̱ʼa kúni̱ra ná kuʼvi̱-iniyó kuniyó ña̱ʼa ña̱ íyo nu̱ú ñuyǐví yóʼo ña̱ va̱ʼa ndataʼvíra níma̱yó, ta kǒo kútóo Jehová ña̱yóʼo (Sant. 4:4; 1 Juan 2:15, 16). Soo, tá ná va̱ása kuchiñu ta̱ Ndi̱va̱ʼa keʼéra ña̱yóʼo kuni̱ra ixandúxara xíʼinyó ña̱ ya̱ʼandosóyó ña̱ káʼa̱n Jehová.

7. ¿Ndáa ki̱ʼva kuniñúʼuyó ña̱ nda̱kú ña̱ íyo nda̱a̱ táki̱ʼva íyo iin ka̱a ña̱ ndákasi kándíkayó?

⁷ Xíniñúʼuyó ka̱a ña̱ ndákasi kándíkayó tá tákuyó nda̱a̱ táki̱ʼva kúni̱ mií Jehová (Sal. 97:10). Sana sava na̱ yiví túvina ña̱ káʼa̱n Jehová, sásiña nu̱úyó ña̱ keʼéyó ña̱ kútóo miíyó. Soo tá ná sandákooyó keʼéyó ña̱ káʼa̱n tu̱ʼun Ndióxi̱, keʼéyó nda̱a̱ táki̱ʼva kéʼé iin ta̱ soldado ta̱ ndíka̱a̱ nu̱ú ku̱a̱chi ta távára ka̱a ña̱ ndíka̱a kándíkara chi túvira ña̱ ve̱eníña. Iin ña̱ kíʼvíní kúú ña̱ keʼéra ña̱yóʼo. Soo nu̱ú na̱ kúʼvi̱-ini xíni Jehová “chiñu ña̱ xáʼndara su̱ví ña̱ ve̱e kúúña”, saáchi ña̱ sáka̱ku miína kúúña (1 Juan 5:3).

8. ¿Ndáaña kúni̱ kachi ña̱ ndataányó ndu̱xa̱n xa̱ʼa̱yó ta koo tu̱ʼvayó ña̱ natúʼunyó xa̱ʼa̱ tu̱ʼun va̱ʼa xíʼin na̱ yiví?

⁸ Ta saátu, ta̱ Pablo ni̱ka̱ʼa̱nra ña̱ xíniñúʼu ndataányó ndu̱xa̱n xa̱ʼa̱yó ta koo tu̱ʼvayó ña̱ natúʼunyó xa̱ʼa̱ tu̱ʼun va̱ʼa xíʼin na̱ yiví. Ña̱yóʼo kúni̱ kachiña, ña̱ ndiʼi tiempo xíniñúʼu koo tu̱ʼvayó ña̱ va̱ʼa natúʼunyó xíʼin na̱ yiví xa̱ʼa̱ Reino Ndióxi̱. Tá nátúʼunyó xíʼin na̱ yiví xa̱ʼa̱ ña̱ va̱xi nu̱ú Biblia ndúndakúka ña̱ kándíxayó Ndióxi̱. Tá xítoyó ña̱ ku̱a̱ʼání na̱ káchíñu nu̱ú Jehová na̱ íyo iníísaá nu̱ú ñuʼú chíka̱a̱nína ndee̱ ña̱ natúʼunna xíʼin na̱ yiví xa̱ʼa̱ Ndióxi̱, ña̱yóʼo chíka̱a̱níña ndee̱ xíʼinyó. Tá kúú, nátúʼunna xíʼin na̱ yiví nu̱ú káchíñuna, ti̱xin escuela, ti̱xin negocio, veʼe tá veʼe, tá ku̱a̱ʼa̱nna satána, tá ku̱a̱ʼa̱nna kotona na̱ veʼena na̱ va̱ása kúú testigo Jehová á nátúʼunna xíʼin na̱ yiví na̱ xíni̱na, ta saátu nátúʼunna xa̱ʼa̱ Ndióxi̱ ni tá va̱ása kívi keena ti̱xin veʼena. Soo tá ná yi̱ʼvíyó ta sandákooyó ña̱ natúʼunyó xíʼin na̱ yiví xa̱ʼa̱ Ndióxi̱, keʼéyó nda̱a̱ táki̱ʼva kéʼé iin ta̱ soldado tá ndíka̱a̱ra nu̱ú ku̱a̱chi ta távára ndu̱xa̱nra:  ta̱yóʼo kamaní tukue̱ʼe̱ra, kǒo kivi kundaara miíra, ta saátu va̱ása kuchiñura kama keʼéra ña̱ káʼa̱n ta̱ xáʼnda chiñu nu̱úra.

9. ¿Nda̱chun xíniñúʼu kuniʼiyó escudo ña̱ káʼnuní?

⁹ Ña̱ kándíxayó Ndióxi̱ íyoña nda̱a̱ táki̱ʼva íyo iin escudo ña̱ káʼnuní. Kándíxaníyó ña̱ saxínura ña̱ ni̱ka̱ʼa̱nra keʼéra. Ña̱ kándíxayó Ndióxi̱ chindeétáʼanña xíʼinyó ña̱ kuchiñuyó ndaʼvayó ndiʼi ña̱ chíndaʼá ta̱ Ndi̱va̱ʼa va̱xi nu̱úyó “ña̱ íyo nda̱a̱ táki̱ʼva íyo flecha tú xíxi̱”. Xíniñúʼu kuniʼiyó escudo yóʼo, saáchi ndáaña miíyó nu̱ú ña̱ vatá ña̱ káʼa̱n na̱ apóstata xíʼin nu̱ú ña̱ kúsi̱kindaana miíyó, ta saátu tá káʼa̱nna ña̱ va̱ása va̱ʼa xa̱ʼa̱yó ña̱ kivi sandákava-iniyó. Tá va̱ása kándíxayó Ndióxi̱ va̱ása koo ndee̱yó ña̱ kuniso̱ʼoyó ña̱ káʼa̱nra tá ná ixandúxa inkana xíʼinyó ña̱ ya̱ʼandosóyó ña̱ káʼa̱n tu̱ʼunra. Soo tá chíka̱a̱yó ndee̱ ña̱ kǒo keʼéyó ña̱ va̱ása va̱ʼa nu̱ú káchíñuyó á ti̱xin escuela, ña̱ kándíxayó Ndióxi̱ ndáaña miíyó nda̱a̱ táki̱ʼva kéʼé iin escudo (1 Ped. 3:15). Ña̱ kándíxayó Ndióxi̱ ndáaña miíyó nda̱a̱ táki̱ʼva kéʼé iin escudo tá va̱ása xíínyó kachíñuyó nu̱ú kivi kiʼinyó ku̱a̱ʼáníka xu̱ʼún, saáchi kivi kasiña nu̱úyó ña̱ viíníka kachíñuyó nu̱ú Jehová, (Heb. 13:5, 6). Ta saátu tá nda̱kú íyo iniyó ni íxandi̱va̱ʼana xíʼinyó, ña̱ kándíxayó Ndióxi̱ ndáaña miíyó nda̱a̱ táki̱ʼva kéʼé iin escudo (1 Tes. 2:2).

10. ¿Ndáaña kúú casco ña̱ sáka̱ku miíyó, ta nda̱chun xíniñúʼu kuniñúʼuyóña?

¹⁰ Ña̱ kandíxayó ña̱ sakǎku Jehová miíyó íyoña nda̱a̱ táki̱ʼva íyo iin casco, ta miíra kúú ta̱ táxi ña̱yóʼo  ndaʼa̱yó. Ña̱ káʼa̱n Jehová keʼéra kúú ña̱ sandátakura miíyó ni ná kuviyó, ta saátu ña̱ taxira ña̱ va̱ʼa ndaʼa̱yó tá ná keʼéyó ña̱ kúni̱ra (1 Tes. 5:8; 1 Tim. 4:10; Tito 1:1, 2). Nda̱a̱ táki̱ʼva kéʼé iin casco chi ndáaña xi̱ní iin ta̱ soldado, ña̱ ndátuyó sakǎku Jehová miíyó ndáaña ña̱ ndákanixi̱níyó. ¿Ndáa ki̱ʼva? Chíndeétáʼanña xíʼinyó ña̱ ndakanixi̱níyó xa̱ʼa̱ ña̱ káʼa̱n Ndióxi̱ taxira ndaʼa̱yó chí nu̱únínu ta va̱ása kundi̱ʼi̱ní-iniyó xa̱ʼa̱ tu̱ndóʼo ña̱ yáʼayó nu̱ú. ¿Ndáa ki̱ʼva xíniñúʼuyó casco yóʼo? Tá chíka̱a̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱ní Jehová xa̱ʼa̱ iin ña̱ʼa. Tá kúú, va̱ása ndáa-iniyó “ña̱ ku̱i̱ká ña̱ íyo loʼo kuití tiempo” chi Ndióxi̱ ndáa-iniyó (Sal. 26:2; 104:34; 1 Tim. 6:17).

11. ¿Ndáaña kúú espada ña̱ táxi espíritu santo, ta nda̱chun xíniñúʼu kuniñúʼuyóña?

¹¹ Espada ña̱ táxi espíritu santo ndaʼa̱yó kúú tu̱ʼun Ndióxi̱. Ña̱yóʼo kúúmiíña ndee̱ ña̱ chindeétáʼanña xíʼinyó ña̱ ndakuniyó ndáaña kúú ña̱ vatá, ta saátu ndátaváñá na̱ yiví ndaʼa̱ ña̱ vatá ña̱ sánáʼa̱ inkana, ta chíndeétáʼanña xíʼinyó ña̱ sandákooyó keʼéyó ña̱ va̱ása va̱ʼa (2 Cor. 10:4, 5; 2 Tim. 3:16, 17; Heb. 4:12). Kivi sakuaʼayó vií kuniñúʼuyóña tá ná kaʼviyóña, ta saátu na̱ ñuu Ndióxi̱ sánáʼa̱na miíyó ndáa ki̱ʼva kuniñúʼuyóña (2 Tim. 2:15). Xa̱a̱ sa̱kuaʼayó ña̱ táxi Jehová ña̱ xíniñúʼuyó ña̱ va̱ʼa kanitáʼanyó, soo su̱ví iinlá ña̱yóʼo kúú ña̱ táxira ndaʼa̱yó ña̱ va̱ʼa kundaara miíyó. Ná ka̱ʼa̱nyó xa̱ʼa̱ inkaña.

12. ¿Ndáa inkaña xíniñúʼuyó, ta nda̱chun?

¹² Iin ta̱ soldado ta̱ xíni̱ní kanitáʼan kúnda̱a̱-inira ña̱ va̱ása kuchiñu iinlá miíra kanitáʼanra xíʼin ku̱a̱ʼání na̱ soldado, saáchi xíniñúʼu chindeétáʼan inkaka na̱ soldado xíʼinra. Ta saátu miíyó va̱ása kuchiñu iinlá miíyó kanitáʼanyó xíʼin ta̱ Ndi̱va̱ʼa ni xíʼin na̱ kítáʼan xíʼinra, saáchi xíniñúʼu chindeétáʼan na̱ hermanoyó xíʼinyó. Jehová táxira na̱ hermanoyó na̱ íyo iníísaá nu̱ú ñuʼú ña̱ va̱ʼa chindeétáʼanna xíʼinyó (1 Ped. 2:17).

13. Nda̱a̱ táki̱ʼva káchi Hebreos 10:24, 25, ¿ndáa ki̱ʼva chíndeétáʼan reunión xíʼinyó?

¹³ Tá xáʼa̱nyó reunión saá kúú ña̱ chíndeétáʼan na̱ hermanoyó xíʼinyó (kaʼvi Hebreos 10:24, 25). * Ndiʼiyó ndákava-iniyó sava yichi̱. Soo, ¿á su̱ví ña̱ nda̱a̱ kúú ña̱ tá xáʼa̱nyó reunión va̱ʼaníka kúniyó? Comentario ña̱ táxi na̱ hermano chíka̱a̱níña ndee̱ xíʼinyó, ta saátu tá yáʼana nu̱ú plataforma ña̱ va̱ʼa na̱ʼa̱na ndáa ki̱ʼva natúʼunyó xíʼin na̱ yiví á tá táxina discurso, chíka̱a̱na ndee̱ xíʼinyó ña̱ va̱ʼa ndakundeéyó kachíñuyó nu̱ú Jehová. Ta saátu tá nátúʼunyó xíʼin na̱ hermano tá kúma̱ní kixáʼa reunión á tá xa̱a̱ ndíʼiña ndásandakúnína-iniyó (1 Tes. 5:14). Ta saátu tá xáʼa̱nyó reunión kivi chindeétáʼanyó xíʼin inkana, ta ña̱yóʼo sákusi̱íña-iniyó (Hech. 20:35; Rom. 1:11, 12). Ta ti̱xin reunión sákuaʼayó ña̱ viíníka natúʼunyó xíʼin na̱ yiví xa̱ʼa̱ Ndióxi̱ ta sanáʼa̱yóna. Tá kúú, sánáʼa̱na miíyó ña̱ viíníka kuniñúʼuyó tutu xíʼin video ña̱ xíniñúʼuyó ña̱ va̱ʼa sanáʼa̱yó na̱ yiví. Ña̱kán xa̱a̱ ná kaʼvi kúeeyó ña̱ sakuaʼayó ti̱xin reunión, ta tá xáʼa̱nyó reunión viíní ná kuniso̱ʼoyó ña̱ káʼa̱nna ta ná keʼéyó ña̱ sákuaʼayó. Tá ná keʼéyó ndiʼi ña̱yóʼo, iin tá iinyó koo tu̱ʼvayó ña̱ kanitáʼanyó ta kooyó “soldado ta̱ Cristo” (2 Tim. 2:3).

14. ¿Ndáa inkaka na̱ chíndeétáʼan xíʼinyó?

¹⁴ Ta saátu ku̱a̱ʼání na̱ ángel na̱ íyoní ndee̱ chíndeétáʼanna xíʼinyó. Xa̱a̱ kúnda̱a̱va-iniyó ndáaña kivi keʼé iinlá kuití ángel, ¿á kivi ndakanixi̱níyó ndáaña kuchiñu ku̱a̱ʼání na̱ ángel keʼéna? (Is. 37:36). Kǒo nda̱a̱ ni iin na̱ yiví ni na̱ ta̱chí ndi̱va̱ʼa na̱ kuchiñu kanitáʼan xíʼin ndiʼi na̱ ángel na̱ káchíñu nu̱ú Jehová. Ña̱kán kivi kandíxayó ña̱ ni íyo mitúʼunyó soo tá kítáʼan Jehová xíʼinyó, ndakúníkava kooyó nu̱ú na̱ kánitáʼan xíʼinyó ni ku̱a̱ʼání kúúna (Juec. 6:16). Ná ndakanixi̱níyó xa̱ʼa̱ ña̱yóʼo tá túviyó ña̱ kǒo ndee̱yó xa̱ʼa̱ ña̱ kéʼé á káʼa̱n na̱ káchíñu xíʼinyó, na̱ káʼvi xíʼinyó á iin na̱ veʼeyó na̱ va̱ása kúú testigo Jehová. Ná ndakaʼányó ña̱ va̱ása kánitáʼan iinlá miíyó, Jehová kúú ta̱ níʼi yichi̱ nu̱úyó.

15. Nda̱a̱ táki̱ʼva káchi Isaías 54:15, 17, ¿nda̱chun va̱ása kuchiñu nda̱a̱ ni iinna kasina nu̱úyó ña̱ natúʼunyó xa̱ʼa̱ Ndióxi̱?

¹⁵ Na̱ ñuyǐví ta̱ Ndi̱va̱ʼa sáa̱-inina xínina miíyó xa̱ʼa̱ ku̱a̱ʼání ña̱ʼa. Saáchi va̱ása kíʼviyó xíʼin ña̱ política ta ni va̱ása xáʼa̱nyó nu̱ú ku̱a̱chi. Sánáʼa̱yó na̱ yiví xa̱ʼa̱ ki̱vi̱ Ndióxi̱, ta káʼa̱nyó ña̱ iinlá Reinora kúú ña̱ kuchiñu taxi ña̱ táxi̱n kundoona, ta kándíxayó ña̱ káʼa̱nra. Ta saátu káʼa̱nyó ña̱ ta̱ vatá kúú ta̱ xáʼndachíñu nu̱ú ñuʼú yóʼo, ta xa̱a̱ ku̱a̱ʼání na̱ yiví xáʼníra (Juan 8:44). Saátu nátúʼunyó xíʼin na̱ yiví ña̱ si̱lóʼo kúma̱ní ta ndiʼi-xa̱ʼa̱ ñuyǐví ta̱ Ndi̱va̱ʼa. Soo ta̱ Ndi̱va̱ʼa xíʼin na̱ kítáʼan xíʼinra va̱ása kuchiñuna kasina nu̱úyó ña̱ natúʼunyó xa̱ʼa̱ ña̱yóʼo. Ta ndakundeéyó kuniñúʼuyó nda̱a̱ ndáaka ña̱ʼa ña̱ va̱ʼa natúʼunyó xa̱ʼa̱ Jehová. Ni íyoníva ndee̱ ta̱ Ndi̱va̱ʼa, soo ta̱ʼán kuchiñura kasira nu̱úyó ña̱ natúʼunyó xíʼin na̱ yiví na̱ íyo iníísaá nu̱ú ñuʼú yóʼo xa̱ʼa̱ Reino Ndióxi̱. Ña̱yóʼo náʼa̱ña nu̱úyó ña̱ ndáava Jehová miíyó (kaʼvi Isaías 54:15, * 17). *

16. ¿Ndáa ki̱ʼva sakǎku Jehová na̱ ñuura tá ná kuu ña̱ gran tribulación?

¹⁶ ¿Ndáaña kuu chí nu̱únínu? Tá ná kuu ña̱ gran tribulación, u̱vi̱ ki̱ʼva sakǎku Jehová miíyó. Ña̱ nu̱ú, sakǎkura na̱ káchíñu nu̱úra tá ná chika̱a̱ra-ini na̱ chíñu na̱ íyo nu̱ú ñuʼú yóʼo ña̱ sandíʼi-xa̱ʼa̱na Babilonia ña̱ káʼnu, ña̱yóʼo kúú ndiʼi veʼe-ñu̱ʼu vatá ña̱ íyo nu̱ú ñuʼú yóʼo (Apoc. 17:16-18; 18:2, 4). Ta ña̱ u̱vi̱, sakǎkura na̱ ñuura tá ná sandíʼi-xa̱ʼa̱ra inkaka ña̱ʼa ña̱ íyo nu̱ú ñuyǐví ta̱ Ndi̱va̱ʼa ti̱xin ña̱ Armagedón (Apoc. 7:9, 10; 16:14, 16).

17. ¿Nda̱chun iin ña̱ va̱ʼa kúú ña̱ yatin kooyó xíʼin Jehová?

¹⁷ Tá yatinka ná kooyó xíʼin Jehová, su̱ví ndiʼi tiempo saxóʼvi̱ ta̱ Ndi̱va̱ʼa miíyó. Chi ta̱yóʼo ta̱ ndiʼi-xa̱ʼa̱va kúúra (Rom. 16:20). Ña̱kán, ná kuniñúʼuyó ndiʼi ña̱ táxi Ndióxi̱ ndaʼa̱yó ña̱ va̱ʼa kanitáʼanyó ta nda̱a̱ ni iin yichi̱ ná va̱ása sandákooyóña. Ná va̱ása ndakanixi̱níyó ña̱ kuchiñu iinlá miíyó kanitáʼanyó xíʼin ta̱ Ndi̱va̱ʼa ta saátu xíʼin na̱ kítáʼan xíʼinra, ná chindeétáʼanyó xíʼin na̱ hermanoyó ta ná keʼéyó chiñu ña̱ xáʼnda Jehová. Chi tá ná keʼéyó ña̱yóʼo yiváyó ta̱ kúʼvi̱ní-ini xíni miíyó ndasandakúra-iniyó ta kundaara miíyó (Is. 41:10).