Sava na̱ ndásakáʼnu Ndióxi̱ xíniñúʼuna celular á tableta á inkaka ña̱ʼa ña̱ va̱ʼa natúʼunna xíʼin na̱ veʼena á inkaka na̱ hermano. Soo na̱ hermano na̱ xu̱xa-ini ndíku̱nna consejo yóʼo: “Na̱ yiví na̱ ndíchi xítona tá va̱xi tu̱ndóʼo nu̱úna ta kúxíkana nu̱úña, soo na̱ yiví na̱ kíʼvi ndákundeéna kéʼéna iin ña̱ʼa ta xóʼvi̱na xa̱ʼa̱ ña̱yóʼo” (Prov. 27:12).

Kúnda̱a̱-iniyó ña̱ kúni̱ Jehová kundaara miíyó. Xa̱ʼa̱ ña̱kán va̱ása kítáʼanyó xíʼin na̱ yiví na̱ kúni̱ ndataʼví miíyó á na̱ ta̱vána ti̱xin congregación, á na̱ sánáʼa̱ ña̱ va̱ása kítáʼan xíʼin ña̱ kándíxayó (Rom. 16:17; 1 Cor. 5:11; 2 Juan 10, 11). Sana sava na̱ xáʼa̱n reunión xíʼinyó va̱ása kéʼéna ña̱ káʼa̱n Biblia (2 Tim. 2:20, 21). Va̱ása íxayo̱ʼvi̱víña xíʼinyó ña̱ ndaka̱xinyó na̱ kutáʼanyó xíʼin tá xa̱a̱ xíninu̱úyóna, soo íxayo̱ʼvi̱vaña xíʼinyó ña̱ ndaka̱xinyóna tá xíniñúʼuyó aplicación nu̱ú chíndaʼáyó mensaje.

Tá kúni̱yó ndakutáʼanyó xíʼin iin grupo ña̱ káʼnuní nu̱ú chíndaʼána mensaje, ná ndakanixi̱níyó ndáa ki̱ʼva íyo na̱ yiví na̱ ndakutáʼanyó xíʼin. Sava na̱ hermano xa̱a̱ ndákutáʼanna xíʼin táʼan grupo yóʼo ta va̱ása va̱ʼa ña̱ níndoʼona. ¿Ndáa ki̱ʼva kivi kiʼinyó kuenta tá yáʼaka 100 á 1000 na̱ yiví ñúʼu ti̱xin iin grupo? Ixayo̱ʼvi̱níña xíʼinyó ña̱ kunda̱a̱-iniyó ndáana kúúna ta á vií íyo ña̱ kítáʼanna xíʼin Jehová. Salmo 26:4 káchiña: “Kǒo kítáʼi̱n xíʼin na̱ yiví na̱ kútóo sandáʼvi, ni kǒo kítáʼi̱n xíʼin na̱ u̱vi̱ yuʼú”. Ña̱kán va̱ʼaníka tá ná natúʼunyó xíʼin na̱ yiví na̱ xa̱a̱ xíni̱yó.

Ta ni ñúʼuyó ti̱xin grupo ña̱ válíka, xíniñúʼu kiʼinyó kuenta nda̱saa tiempo chíndaʼáyó mensaje ta saátu ndáa ña̱ʼa nátúʼunyó xa̱ʼa̱. Va̱ása xíniñúʼu ndakanixi̱níyó ña̱ xíniñúʼu ndakuiinyó ndiʼi mensaje ña̱ chíndaʼána ni nda̱a̱ ndáaka ña̱ʼa káʼa̱nna xa̱ʼa̱, ta ni ku̱a̱ʼání tiempo ndákundeéna káʼa̱nna xa̱ʼa̱ña. Ta̱ Pablo ni̱ka̱ʼa̱nra xíʼin ta̱ Timoteo ña̱ ná kiʼinra kuenta xíʼin na̱ yiví na̱ kútóo ka̱ʼa̱n ña̱ vatá ta ndíʼi̱-inina xa̱ʼa̱ ña̱ kéʼé inkana (1 Tim. 5:13). Ta tiempo vitin kivi kuu ña̱yóʼo nu̱ú Internet.

Tá kúúyó na̱ yiví na̱ xu̱xa-ini va̱ása natúʼunyó xíʼin na̱ yiví na̱ káʼa̱n ña̱ va̱ása va̱ʼa xa̱ʼa̱ inkana á na̱ káʼa̱n xa̱ʼa̱ ña̱ʼa ña̱ va̱ása xíniñúʼu ka̱ʼa̱nna (Sal. 15:3; Prov. 20:19). Tá nátúʼunna xíʼinyó xa̱ʼa̱ iin ña̱ i̱yoní káʼa̱n á ña̱ ta̱ʼán kunda̱a̱-iniyó xa̱ʼa̱ á ña̱ ndixa kúúña, va̱ása kuniso̱ʼoyó ña̱ káʼa̱nna ta ni va̱ása natúʼunyó xíʼin inkana xa̱ʼa̱ña (Efes. 4:25). Na̱ ñuu Ndióxi̱ xíniñúʼuna sitio jw.org xíʼin programa JW Broadcasting^® ña̱ va̱ʼa taxina ña̱ xíniñúʼuyó ña̱ va̱ʼa sakuaʼayó xa̱ʼa̱ Ndióxi̱, ta nu̱ú ña̱yóʼo nátúʼunna xíʼinyó xa̱ʼa̱ ña̱ ndóʼo na̱ hermano á inkaka ña̱ʼa.

Sava na̱ hermano xíniñúʼuna aplicación ña̱ chindaʼána mensaje ña̱ va̱ʼa xi̱kóna, á satána, á ka̱ʼa̱nna xa̱ʼa̱ iin ña̱ʼa ta saátu ña̱ taxina chiñu ndaʼa̱ inkana. Na̱ hermano kéʼéna ña̱yóʼo xa̱ʼa̱ negocio, soo va̱ása xíniñúʼu kitáʼanña xíʼin ña̱ ndásakáʼnuyó Jehová. Na̱ ndásakáʼnu Ndióxi̱ na̱ kǒo kútóo kuumií ku̱a̱ʼání xu̱ʼún, va̱ása kuniñúʼuna na̱ hermano ña̱ va̱ʼa kiʼinna ku̱a̱ʼáka xu̱ʼún (Heb. 13:5).

¿Á kivi kuniñúʼuyó aplicación yóʼo ña̱ va̱ʼa ndukúyó xu̱ʼún ña̱ va̱ʼa chindeétáʼanyó xíʼin na̱ hermano na̱ kúma̱ní ña̱ʼa nu̱ú á na̱ ndo̱ʼo iin tu̱ndóʼo? Xa̱ʼa̱ ña̱ kúʼvi̱-iniyó xíniyó na̱ hermano ndíʼi̱-iniyó xa̱ʼa̱na ta kúni̱yó chika̱a̱yó ndee̱ xíʼinna á taxiyó ña̱ʼa ndaʼa̱na tá xíniñúʼunaña (Sant. 2:15, 16). Soo tá ná keʼéyó ña̱yóʼo ti̱xin iin grupo ña̱ káʼnuní nu̱ú chíndaʼána mensaje, kivi kasiyó nu̱ú na̱ Betel á na̱ anciano ña̱ congregación ña̱ keʼéna chiñu yóʼo saáchi na̱yóʼo viíníkava keʼénaña (1 Tim. 5:3, 4, 9, 10, 16). Va̱ása kúni̱yó ña̱ ná ndakanixi̱ní inkana ña̱ ta̱xina iin chiñu ña̱ ndáyáʼviní ndaʼa̱yó ña̱ kundaayó na̱ hermano.

Kúni̱yó ña̱ ndiʼi ña̱ kéʼéyó ná ndasakáʼnuña Ndióxi̱ (1 Cor. 10:31). Ña̱kán tá kúma̱níka ndaka̱xinyó á kuniñúʼuyó iin aplicación nu̱ú chíndaʼána mensaje, ná ndakanixi̱níyó ndáana ndakutáʼanyó xíʼin ta ná kiʼinyó kuenta xíʼin ña̱yóʼo.