1, 2. ¿Ndáaña xíniñúʼu keʼéyó ña̱ va̱ʼa kusi̱í-ini Ndióxi̱ xíʼin ki̱ʼva ña̱ ndásakáʼnuyóra?

 ¿NDÁAÑA ndákanixi̱níún tá xíniso̱ʼún tu̱ʼun ndásakáʼnu Ndióxi̱? Sana ndákanixi̱níún xa̱ʼa̱ ku̱a̱ʼání na̱ yiví na̱ nda̱taka ti̱xin veʼe nu̱ú ndásakáʼnuyó Ndióxi̱. Á sana ndákanixi̱níún xa̱ʼa̱ iin familia na̱ káʼvi Biblia ta kúsi̱íní-inina.

² U̱vi̱ saá ejemplo ña̱ ni̱ka̱ʼa̱nyó xa̱ʼa̱ yóʼo, káʼa̱nña xa̱ʼa̱ na̱ ndásakáʼnu Jehová. ¿Á kúsi̱í-ini Jehová xíʼin ki̱ʼva ña̱ ndásakáʼnunara? Kúsi̱íva-inira tá kéʼéna ña̱yóʼo nda̱a̱ táki̱ʼva kúni̱ miíra, ta saátu tá kúʼvi̱-inina xíninara ta xíʼin ña̱ to̱ʼó kéʼénaña. Xa̱ʼa̱ ña̱ kúʼvi̱ní-iniyó xíniyó Jehová ta kúnda̱a̱-iniyó ña̱ xíniñúʼu ndasakáʼnuyóra, kúni̱yó ndasakáʼnuyóra nda̱a̱ táki̱ʼva kúni̱ miíra.

3. ¿Ndáaña sakúaʼayó nu̱ú artículo yóʼo?

³ Nu̱ú artículo yóʼo ka̱ʼa̱nyó xa̱ʼa̱ ndáa ki̱ʼva xi̱kutóo Jehová ña̱ ndasakáʼnunara tiempo xi̱naʼá ta saátu ka̱ʼa̱nyó xa̱ʼa̱ u̱na̱ ki̱ʼva ña̱ ndásakáʼnuyóra tiempo vitin. Nani káʼviyóña ná ndakanixi̱níyó ndáaña kivi keʼéyó ña̱ va̱ʼa viíka koo ña̱ ndásakáʼnuyó Ndióxi̱. Ta saátu ka̱ʼa̱nyó xa̱ʼa̱ nda̱chun ña̱ ndásakáʼnuyó Ndióxi̱ sákusi̱íña-iniyó.

4. ¿Ndáa ki̱ʼva ni̱na̱ʼa̱ na̱ xi̱ndasakáʼnu Jehová tiempo xi̱naʼá ña̱ xi̱kuʼvi̱-inina xi̱xininara ta xi̱ ixato̱ʼónara?

⁴ Tá kúma̱níka kixi ta̱ Cristo, ni̱xi̱yo na̱ xi̱ ixato̱ʼó Jehová ta xi̱kuʼvi̱-inina xi̱xininara tá kúú ta̱ Abel, ta̱ Noé, ta̱ Abrahán xíʼin ta̱ Job. Na̱yóʼo xi̱xiniso̱ʼonara, xi̱kandíxanara ta xi̱sokóna ña̱ʼa nu̱úra. Biblia va̱ása káʼa̱n káxiña ndáa ki̱ʼva xi̱ndasakáʼnuna Jehová. Soo chi̱ka̱a̱nívana ndee̱ ña̱ ixato̱ʼónara ta ku̱si̱í-inira xíʼin ki̱ʼva ña̱ nda̱sakáʼnunara. Tá ni̱ya̱ʼa tiempo Ndióxi̱ ta̱xira Ley ta̱ Moisés ndaʼa̱ na̱ se̱ʼe ta̱ Abrahán, ta nu̱ú Ley yóʼo ni̱ka̱ʼa̱n káxira xíʼinna ndáa ki̱ʼva xi̱kuni̱ra ña̱ ndasakáʼnunara.

5. ¿Ndáa ki̱ʼva na̱sama ña̱ xi̱ndasakáʼnuna Jehová tá xa̱a̱ ni̱xi̱ʼi̱ ta̱ Jesús ta nda̱takura?

⁵ Tá xa̱a̱ ni̱xi̱ʼi̱ ta̱ Jesús ta nda̱takura, Jehová va̱ása níka̱ʼa̱nkara xíʼin na̱ ñuura ña̱ kundiku̱nna Ley ta̱ Moisés (Rom. 10:4). Xi̱niñúʼu kundiku̱n na̱ cristiano iin ley xa̱á, ña̱yóʼo kúú “ley ta̱ Cristo” (Gál. 6:2). Ña̱ va̱ʼa kundiku̱nna ña̱yóʼo, kǒo níxiniñúʼu sakúaʼa xíʼin xi̱nína ndáaña xi̱niñúʼu keʼéna ta ndáaña va̱ása níxiniñúʼu keʼéna, saáchi ña̱ xi̱niñúʼu kundiku̱nna kúú yichi̱ ta̱ Jesús xíʼin ña̱ xi̱sanáʼa̱ra. Tiempo vitin na̱ cristiano ndíku̱nna yichi̱ ta̱ Jesús ña̱ va̱ʼa sakúsi̱ína-ini Jehová tasaá va̱ʼa kunina (Mat. 11:29).

6. ¿Ndáa ki̱ʼva chindeétáʼan artículo yóʼo xíʼinyó?

⁶ Tá ná sakúaʼayó xa̱ʼa̱ iin tá iin ki̱ʼva ña̱ ndásakáʼnuyó Jehová, ná ndakanixi̱níyó: “¿Á xa̱a̱ chíka̱i̱ ndee̱ ña̱ keʼíi̱ ña̱yóʼo? ¿Á kivi chika̱a̱kai̱ ndee̱ ña̱ viíka koo ña̱ ndasakáʼnui̱ra?”. Va̱ʼava kusi̱í-iniyó xíʼin chiñu ña̱ xa̱a̱ kéʼéyó nu̱úra, soo saátu xíniñúʼu ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ kotoyó á íyoka ña̱ xíniñúʼu keʼéyó ña̱ viíka ndasakáʼnuyóra.

7. ¿Ndáaña ndákanixi̱ní Jehová xa̱ʼa̱ oración ña̱ kéʼéyó nu̱úra xíʼin ndiʼi níma̱yó?

⁷ Ndásakáʼnuyó Jehová tá kéʼéyó oración nu̱úra. Tu̱ʼun Ndióxi̱ chítáʼanña oración xíʼin ña̱ʼa ña̱ xi̱chiʼmána ini tabernáculo ta saátu ini templo tiempo xi̱naʼá (Sal. 141:2). Ña̱ xi̱chimáʼna yóʼo va̱ʼaní xi̱xa̱ʼa̱nña ta xi̱kutóoní Ndióxi̱ ña̱yóʼo. Saátu íyo oración ña̱ kéʼéyó nu̱úra, tá xíʼin ndiʼi níma̱yó káʼa̱nyó xíʼinra kúsi̱íníva-inira (Prov. 15:8; Deut. 33:10). Jehová kútóonívara ña̱ ka̱ʼa̱nyó xíʼinra ña̱ kúʼvi̱ní-iniyó xíniyóra ta saátu kúsi̱í-inira tá táxiyó tíxa̱ʼvi ndaʼa̱ra. Saátu kúni̱ra ña̱ ná ka̱ʼa̱nyó xíʼinra xa̱ʼa̱ ña̱ kúni̱yó, ña̱ sándi̱ʼi̱-iniyó xíʼin ña̱ ndátuyó ndakiʼinyó chí nu̱únínu. Ña̱kán, tá kúma̱níka keʼéyó iin oración nu̱ú Jehová viíní ná ndakanixi̱níyó xa̱ʼa̱ ña̱ kúni̱yó ka̱ʼa̱nyó xíʼinra. Tá saá ná keʼéyó, nda̱a̱ táki̱ʼva koo na̱ chiʼmá iin ña̱ʼa ña̱ va̱ʼaní nu̱ú Jehová saá kooyó.

8. ¿Ndáa inka ña̱ kivi keʼéyó ña̱ va̱ʼa ndasakáʼnuyó Ndióxi̱?

⁸ Ndásakáʼnuyó Jehová tá nátúʼunyó xíʼin inkana xa̱ʼa̱ra (Sal. 34:1). Ta, ¿ndáa ki̱ʼva ndásakáʼnuyó Jehová? Tá káʼa̱nyó xíʼin inkana xíʼin ña̱ si̱í-ini xa̱ʼa̱ ndiʼi ña̱ va̱ʼa ña̱ kúúmiíra xíʼin ña̱ i̱xava̱ʼara. Tá táxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ kéʼéra xa̱ʼa̱yó, ku̱a̱ʼáníva ña̱ va̱ʼa ka̱ʼa̱nyó xa̱ʼa̱ra. Tá táváyó tiempo ña̱ ndakanixi̱níyó xa̱ʼa̱ ña̱ va̱ʼaní-inira xíʼinyó, kuni̱yó ndasakáʼnuyóra ndiʼi tiempo. Tá nátúʼunyó xíʼin na̱ yiví xa̱ʼa̱ Jehová, nda̱a̱ táki̱ʼva íyo ña̱ sóko̱yó iin ña̱ʼa nu̱úra saá íyoña chi xíniñúʼuyó yuʼúyó ña̱ ka̱ʼa̱nyó xa̱ʼa̱ra (Heb. 13:15). Nda̱a̱ táki̱ʼva viíní ndákanixi̱níyó tá kúma̱níka ka̱ʼa̱nyó xíʼin Jehová saa xíniñúʼu ndakanixi̱níyó tá kúma̱níka ku̱ʼu̱nyó natúʼunyó xíʼin na̱ yiví xa̱ʼa̱ra. Kúni̱yó ña̱ va̱ʼaní ná koo ña̱ ndasakáʼnuyó Jehová, ña̱kán tá  ku̱a̱ʼa̱nyó nátúʼunyó xíʼin na̱ yiví xa̱ʼa̱ra xíʼin ndinuʼu-iniyó kéʼéyóña.

9. ¿Ndáaña va̱ʼa ndákiʼin na̱ ñuu Jehová tá xáʼa̱nna reunión, ta ndáa ki̱ʼva chíndeétáʼanña xíʼún?

⁹ Ndásakáʼnuyó Jehová tá xáʼa̱nyó reunión. Tá ya̱chi̱ ni̱ka̱ʼa̱nna ña̱yóʼo xíʼin na̱ ñuu Israel: “U̱ni̱ yichi̱ nu̱ú ku̱i̱ya̱, ndiʼi na̱ ta̱a xíniñúʼu ku̱ʼu̱nna nu̱ú Jehová lugar nu̱ú ndaka̱xin miíra” (Deut. 16:16). Xi̱niñúʼu ndakoona veʼena xíʼin ñuʼúna ta ni iinna kǒo kundaa ña̱yóʼo. Soo Jehová ni̱ka̱ʼa̱nra xíʼinna: “Nda̱a̱ ni iinna va̱ása kuni̱na kindaana ñuʼúndó tá ná ku̱ʼu̱nndó nu̱ú Jehová” (Éx. 34:24). Xa̱ʼa̱ ña̱ xi̱kandíxaní na̱ ñuu Israel Jehová, xi̱xa̱ʼa̱nna vikó ña̱ xi̱xiyo ku̱i̱ya̱ tá ku̱i̱ya̱ ña̱ va̱ʼa ndasakáʼnunara. Ta ku̱a̱ʼáníva ña̱ va̱ʼa xi̱ndakiʼinna xa̱ʼa̱ ña̱yóʼo: tá kúú va̱ʼaka xi̱kundaa-inina xíʼin Ley Jehová, xi̱ndakanixi̱nína xa̱ʼa̱ ña̱ va̱ʼaní-inira, ta saátu xi̱kusi̱í-inina xi̱ndakutáʼanna xíʼin inka na̱ xi̱ndasakáʼnura (Deut. 16:15). Saátu miíyó ku̱a̱ʼání ña̱ va̱ʼa ndákiʼinyó tá chíka̱a̱yó ndee̱ ña̱ ku̱ʼu̱nyó reunión. Ta kúsi̱íní-ini Jehová tá xítora ña̱ xa̱a̱ ya̱chi̱ka viíní táváyó comentario ña̱ taxiyó ti̱xin reunión.

10. ¿Nda̱chun ndáyáʼviní ña̱ katayó nu̱ú Jehová?

¹⁰ Ndásakáʼnuyó Jehová tá xítayó nu̱úra xíʼin na̱ hermanoyó (Sal. 28:7). Nu̱ú na̱ ñuu Israel xi̱ndayáʼviní ña̱ katana yaa nu̱ú Jehová chi saá kuu ña̱ xi̱ndasakáʼnunara. Tá kuu, ta̱ rey David ta̱xira chiñu ndaʼa̱ 288 na̱ levita ña̱ va̱ʼa katana ini templo (1 Crón. 25:1, 6-8). Saátu vitin kivi na̱ʼa̱yó ña̱ kúʼvi̱-iniyó xíniyó Jehová tá ná katayó yaa nu̱úra. Va̱ása xíniñúʼu liviníví katayó ña̱ va̱ʼa keʼéyó ña̱yóʼo. Ndakanixi̱níndó xa̱ʼa̱ ña̱yóʼo: sava yichi̱ va̱ása viíníví káʼa̱nyó, soo suvi xa̱ʼa̱ ña̱yóʼo sándakooyó ka̱ʼa̱nyó ti̱xin congregación á ña̱ natúʼunyó xíʼin na̱ yiví xa̱ʼa̱ Ndióxi̱ (Sant. 3:2). Ña̱kán, ni kǒo xíni̱yó katayó ná va̱ása taxiyó ña̱ kasi ña̱yóʼo nu̱úyó ña̱ ndasakáʼnuyó Jehová.

11. Nda̱a̱ táki̱ʼva káchi Salmo 48:13, ¿nda̱chun xíniñúʼu taváyó tiempo ña̱ kaʼviyó Biblia xíʼin na̱ veʼeyó?

¹¹ Ndásakáʼnuyó Jehová tá káʼviyó tu̱ʼunra ta saátu tá sánáʼa̱yó se̱ʼeyó xa̱ʼa̱ra. Na̱ ñuu Israel va̱ása níxi̱kachíñuna ki̱vi̱ sábado chi xi̱xiniñúʼuna ña̱yóʼo ña̱ va̱ʼa ndasandakúna ña̱ kándíxana Jehová (Éx. 31:16, 17). Ta na̱ nda̱kúní ni̱xi̱yo ini xíʼin Jehová xi̱sanáʼa̱na se̱ʼena xa̱ʼa̱ra saátu xa̱ʼa̱ ña̱ va̱ʼaní-inira. Saátu miíyó xíniñúʼu taváyó tiempo ña̱ va̱ʼa kaʼviyó tu̱ʼun Ndióxi̱, tá kéʼéyó ña̱yóʼo ndásakáʼnuyóra ta chíndeétáʼanña xíʼinyó ña̱ kuyatinkayó nu̱úra (Sal. 73:28). Saátu tá káʼviyó xíʼin na̱ veʼeyó chíndeétáʼanyó xíʼin se̱ʼeyó ña̱ viíníka xa̱a̱na kutáʼanna xíʼin Jehová (kaʼvi Salmo 48:13). *

12. ¿Ndáaña xi̱ndakanixi̱ní Jehová xa̱ʼa̱ chiñu ña̱ ke̱ʼéna ti̱xin tabernáculo, ta ndáaña sákuaʼayó xíʼin ña̱yóʼo?

¹² Ndásakáʼnuyó Jehová tá íxava̱ʼayó veʼe nu̱ú ndásakáʼnuyóra ta saátu tá ndáayó ña̱yóʼo. Biblia káchiña ña̱ tá ke̱ʼéna tabernáculo xíʼin ndiʼi ña̱ʼa ña̱ xi̱ñuʼu iniña, chiñu ña̱ xi̱keʼéna ña̱ yi̱i̱ xi̱kuu ña̱yóʼo (Éx. 36:1, 4). Saátu tiempo vitin tá íxava̱ʼayó veʼe nu̱ú ndásakáʼnuyó Jehová iin chiñu yi̱i̱ kúú ña̱yóʼo nu̱úra. Sava na̱ hermano ku̱a̱ʼání tiempo xíniñúʼuna ña̱ kéʼéna chiñu yóʼo. Táxinívayó tíxa̱ʼvi ndaʼa̱na xa̱ʼa̱ chiñu ña̱ kéʼéna. Na̱ hermano yóʼo távátuna tiempo ña̱ natúʼunna xa̱ʼa̱ Ndióxi̱. Savana nda̱a̱ kúni̱na koona precursor. Na̱ anciano náʼa̱na ña̱ chíndeétáʼanna xíʼin na̱ hermano yóʼo tá táxina ña̱ koo na̱yóʼo precursor ni xa̱a̱ chíka̱a̱nína ndee̱ ña̱ ixava̱ʼana veʼe nu̱ú ndásakáʼnuyó Ndióxi̱. Ni xíni̱yó á  ni va̱ása xíni̱yó keʼéyó chiñu nu̱ú kúva̱ʼa veʼe ña̱ ndásakáʼnuyó Ndióxi̱ ndiʼivayó kivi chindeétáʼan ña̱ limpio ná koo ña̱yóʼo ta vií ná kooña.

13. ¿Ndáa xa̱ʼa̱ kúú ña̱ táxiyó donación?

¹³ Ndásakáʼnuyó Jehová tá táxiyó donación. Na̱ ñuu Israel xi̱xiniñúʼu kuniʼina ña̱ʼa ña̱ taxina ndaʼa̱ Jehová (Deut. 16:16). Ña̱ xi̱kuumií kuitína kúú ña̱ xi̱sokóna nu̱ú Jehová. Saá xi̱na̱ʼa̱na ña̱ xi̱taxina tíxa̱ʼvi ndaʼa̱ Ndióxi̱ xa̱ʼa̱ ndiʼi ña̱ va̱ʼa ña̱ xi̱ndakiʼinna. Ta miíyó, ¿ndáa ki̱ʼva kivi na̱ʼa̱yó ña̱ kúʼvi̱-iniyó xíniyó Jehová ta táxiyó tíxa̱ʼvi ndaʼa̱ra xa̱ʼa̱ ndiʼi ña̱ va̱ʼa ña̱ ndákiʼinyó? Kivi taxiyó xu̱ʼún ña̱ kúúmiíyó ña̱ va̱ʼa kuniñúʼunaña ti̱xin congregación ta saátu ña̱ ku̱ʼu̱nña obra mundial. Ta̱ apóstol Pablo ni̱ka̱ʼa̱nra ña̱yóʼo: “Tá iinna kúni̱na chindeétáʼanna xíʼin inkana, ña̱ kéʼé na̱yóʼo iin ña̱ va̱ʼaní kúúña, saáchi táxina ña̱ kúúmiína ta su̱ví ña̱ kǒo kúúmiína” (2 Cor. 8:4, 12). Nu̱ú Jehová ndáyáʼviní ña̱ taxiyó donación xíʼin ndiʼi níma̱yó ni loʼo kúúña (Mar. 12:42-44; 2 Cor. 9:7).

14. Nda̱a̱ táki̱ʼva káchi Proverbios 19:17, ¿ndáa ki̱ʼva kúni Jehová tá chíndeétáʼanyó xíʼin na̱ hermanoyó?

¹⁴ Ndásakáʼnuyó Jehová tá chíndeétáʼanyó xíʼin na̱ hermanoyó na̱ kúma̱ní ña̱ʼa nu̱ú. Jehová ni̱ka̱ʼa̱nra taxira bendición ndaʼa̱ na̱ ñuu Israel tá ná chindeétáʼanna xíʼin na̱ ndáʼvi (Deut. 15:7, 10). Tá chíndeétáʼanyó xíʼin na̱ hermanoyó na̱ kúma̱ní ña̱ʼa nu̱ú, nda̱a̱ táki̱ʼva íyo na̱ táxi regalo ndaʼa̱ Jehová saá íyoyó (kaʼvi Proverbios 19:17). * Tá kúú, na̱ cristiano na̱ ni̱xi̱yo ñuu Filipos chi̱ndaʼána iin regalo ku̱a̱ʼa̱n ndaʼa̱ ta̱ Pablo tá xi̱ndika̱a̱ra veʼeka̱a. Ta̱yóʼo ni̱ka̱ʼa̱nra ña̱ regalo yóʼo nda̱a̱ táki̱ʼva íyo ña̱ ni̱so̱kóna nu̱ú Ndióxi̱ saá ni̱xi̱yoña ta ku̱si̱í-ini Ndióxi̱ xíʼinña (Filip. 4:18). Ná ndakanixi̱níyó xa̱ʼa̱ na̱ hermanoyó na̱ ñúʼu ti̱xin congregaciónyó ta ná ndakanixi̱níyó xa̱ʼa̱ ña̱yóʼo: “¿Á íyo iin na̱ kivi chindeétáʼi̱n xíʼin?”. Kúsi̱íníva-ini Jehová tá xítora ña̱ xíniñúʼuyó tiempoyó, ndee̱yó, ña̱ xíni̱yó keʼéyó á inkaka ña̱ʼa ña̱ kúúmiíyó ña̱ chindeétáʼanyó xíʼin na̱ kúma̱ní ña̱ʼa nu̱ú. Tá kéʼéyó ña̱yóʼo, saá kúúña ndásakáʼnuyóra (Sant. 1:27).

15. ¿Nda̱chun va̱ása íxayo̱ʼvi̱ña xíʼinyó kuniñúʼuyó tiempoyó xíʼin ndee̱yó ña̱ ndasakáʼnuyó Jehová?

¹⁵ Ña̱ va̱ʼa ndasakáʼnuyó Jehová nda̱a̱ táki̱ʼva kúni̱ miíra, xíniñúʼu chika̱a̱yó ndee̱ ta taváyó tiempo ña̱ keʼéyó ña̱yóʼo, ta ña̱ keʼéyó ña̱yóʼo va̱ása yo̱ʼvi̱víña (1 Juan 5:3). ¿Nda̱chun va̱ása yo̱ʼvi̱ña? Saáchi kúʼvi̱-iniyó xíniyó Jehová. Ná ndakanixi̱níyó xa̱ʼa̱ ña̱yóʼo: iin ta̱ loʼo kúni̱ra taxira iin regalo ndaʼa̱ yivára, ta sana ku̱a̱ʼání hora xíniñúʼura ña̱ keʼéra iin dibujo ña̱ taxira ndaʼa̱ra, soo kúsi̱íní-inira kéʼéraña chi kúʼvi̱ní-inira xínira yivára. Saátu miíyó, xa̱ʼa̱ ña̱ kúʼvi̱ní-iniyó xíniyó Jehová, xíʼin ña̱ si̱í-ini xíniñúʼuyó tiempoyó xíʼin ndee̱yó ña̱ ndasakáʼnuyóra.

16. Nda̱a̱ táki̱ʼva káchi Hebreos 6:10, ¿ndáa ki̱ʼva kúni Jehová tá xítora ña̱ chíka̱a̱níún ndee̱ ña̱ keʼún ña̱ kúni̱ra?

¹⁶ Na̱ íyo se̱ʼe xa̱ʼa̱ ña̱ kúʼvi̱ní-inina xíninana, va̱ása ndátuna ña̱ inkáchi koo regalo ña̱ taxi se̱ʼena ndaʼa̱na, saáchi xa̱a̱ kúnda̱a̱-inina ña̱ xa̱a̱ síín síín íyo iin iin se̱ʼena ta xa̱a̱ síín síín íyo ña̱ xíni̱na keʼéna. Saátu íyo Jehová, kúnda̱a̱-inira ndáaña kúú ña̱ kivi taxiyó ndaʼa̱ra. Sana miíún kivi keʼún ku̱a̱ʼáka chiñu nu̱úra nu̱úka ña̱ kéʼé inkana. Á sanatu xa̱ʼa̱ ña̱ ku̱chéún, xa̱ʼa̱ ña̱ kúúmiíún iin kue̱ʼe̱ á xa̱ʼa̱ ña̱ xíniñúʼu kundaún na̱ veʼún va̱ása kivi keʼún ku̱a̱ʼá chiñu nu̱úra. Soo va̱ása  ndakava-iniún (Gál. 6:4). Jehová va̱ása nandósó-inira xa̱ʼa̱ ndiʼi chiñu ña̱ kéʼún nu̱úra vitin. Tá ná chika̱ún ndee̱ ña̱ ndasakáʼnúnra xíʼin ndiʼi níma̱ún, kusi̱íníva-inira (kaʼvi Hebreos 6:10). Jehová kúnda̱a̱va-inira tá káchíñún nu̱úra xíʼin ndiʼi níma̱ún. Kúni̱ra ña̱ ná kusi̱í-iniún xíʼin chiñu ña̱ kivi keʼún nu̱úra.

17. a) ¿Ndáaña kivi keʼéyó tá íxayo̱ʼvi̱ña xíʼinyó kaʼviyó tu̱ʼun Ndióxi̱ á ña̱ natúʼunyó xíʼin na̱ yiví xa̱ʼa̱ra? b) ¿Á xa̱a̱ chíndeétáʼan ña̱ va̱xi nu̱ú káʼa̱nña “ Ña̱ kivi keʼéyó ña̱ va̱ʼa kusi̱íka-iniyó” xíʼún?

¹⁷ Soo, ¿ndáaña kivi keʼéyó tá íxayo̱ʼvi̱ña xíʼinyó ña̱ kaʼviyó tu̱ʼun Ndióxi̱ á ña̱ natúʼunyó xa̱ʼa̱ra xíʼin na̱ yiví? Kivi kuniñúʼuyó ku̱a̱ʼá tiempo ña̱ keʼéyó ña̱yóʼo tasaá ku̱a̱ʼáníka ña̱ va̱ʼa ndakiʼinyó ta kusi̱íka-iniyó. Ña̱ ndásakáʼnuyó Ndióxi̱ kivi chitáʼanyóña xíʼin ña̱ sakúaʼayó sakáʼayó iin guitarra. Tá va̱ása sákaʼa ni̱ʼiyó túyóʼo, va̱ása sakúaʼayó sakáʼayónú. Soo tá ná keʼéyóña ndiʼi ki̱vi̱, loʼo tá loʼo sakúaʼayó viíníka sakáʼayónú. Saá kúú ña̱ kixaa̱ iin ki̱vi̱ ña̱ kutóoníkayó keʼéyó ña̱yóʼo. Saátu tá ná chika̱a̱kayó ndee̱ ña̱ kaʼviyó tu̱ʼun Ndióxi̱ ndiʼi ki̱vi̱ ta saátu ña̱ natúʼunyó xa̱ʼa̱ra, kusi̱íníka-iniyó ndasakáʼnuyóra.

18. ¿Ndáaña kúú ña̱ ndáyáʼvika keʼéyó, ta ndáaña va̱ʼa ndakiʼinyó tá ná keʼéyóña?

¹⁸ Tá ndásakáʼnuyó Jehová xíʼin ndiʼi níma̱yó, va̱ʼaníva kúniyó. Ña̱yóʼo sákusi̱íníña-iniyó chi kúnda̱a̱-iniyó ña̱ ndáyáʼviní ña̱ kéʼéyó nu̱úra, ta chí nu̱únínu ndátuyó ña̱ ndasakáʼnuyó Jehová ndiʼi tiempo (Prov. 10:22). Vitin xa̱a̱ táxi̱n íyo iniyó chi kúnda̱a̱-iniyó ña̱ íyo Jehová ña̱ chindeétáʼanra xíʼinyó tá íyo tu̱ndóʼo nu̱úyó (Is. 41:9, 10). Kúsi̱íníva-iniyó tá ndásakáʼnuyó yiváyó Jehová, chi miíra kúú ta̱ xíniñúʼu ndukáʼnu ta ixato̱ʼóyóra (Apoc. 4:11).