Tá kamaní ná kaʼviyó relato yóʼo, kivi ndakanixi̱níyó ña̱ iinlá xa̱ʼa̱ ta̱ Mefibóset káʼa̱nña. Soo mií ña̱ nda̱a̱ ni̱xi̱yo u̱vi̱ na̱ ta̱a na̱ xi̱naní Mefibóset, ta tá ná kaʼviyó xa̱ʼa̱ na̱yóʼo íyo iin ña̱ ndáyáʼviní sakúaʼayó xíʼinña.

Ta̱ rey Saúl ni̱xi̱yo u̱xa̱ se̱ʼe ta̱ara ta u̱vi̱ se̱ʼe síʼira. Ta ta̱ Jonatán xi̱kuu se̱ʼe nu̱úra. Tándi̱ʼi, iin ñaʼá ñá ni̱xi̱yo xíʼinra ñá xi̱naní Rizpá ka̱ku iin se̱ʼeñá xíʼinra ta ta̱yóʼo xi̱naníra Mefibóset. Ta ni̱xi̱yotu iin se̱ʼe ta̱ Jonatán ta̱ xi̱naní Mefibóset. Ña̱kán ni̱xi̱yo iin se̱ʼe ta̱ Saúl ta̱ xi̱naní Mefibóset, ta ni̱xi̱yotu iin se̱ʼeñánira ta̱ xi̱naní saá.

Soo, ¿nda̱chun ta̱xi ta̱ David ña̱ ná kaʼnína sava na̱ ta̱a? Ta̱ rey Saúl ki̱xáʼara ni̱sa̱a̱-inira xi̱nira na̱ ñuu Gabaón na̱ xi̱ndoo yatin xíʼinna, ta xi̱kuni̱ra sandíʼi-xa̱ʼa̱ra ndiʼi na̱yóʼo. Ña̱kán, nda̱a̱ xa̱ʼníra savana. Soo su̱ví ña̱ va̱ʼa kúú ña̱ níxi̱kuni̱ra keʼéra. Saáchi tá tiempo ña̱ ni̱xi̱yo ta̱ Josué na̱ xi̱niʼi yichi̱ nu̱ú na̱ ñuu Israel ki̱ndoona xíʼin na̱ ñuu Gabaón ña̱ va̱ása kanitáʼanna xíʼinna (Jos. 9:3-27).

Tá tiempo ña̱ ni̱xi̱yo ta̱ Saúl, ta̱ʼán ndiʼi-xa̱ʼa̱ví trato ña̱ ki̱ndoona xíʼin na̱ ñuu Gabaón. Soo nu̱úka ña̱ ixato̱ʼóra ña̱ ki̱ndoona xíʼin na̱ ñuu Gabaón, xi̱kuni̱ra sandíʼi-xa̱ʼa̱ra ndiʼina. Ta xa̱ʼa̱ ña̱ xa̱ʼníra na̱ ñuu Gabaón, miíra xíʼin na̱ veʼera ni̱ki̱ʼvina iin ku̱a̱chi ndeé (2 Sam. 21:1). Tá ni̱xa̱a̱ ta̱ David ku̱ura rey, sava na̱ ñuu Gabaón na̱ ni̱ka̱ku, na̱túʼunna xíʼinra xa̱ʼa̱ ña̱ ku̱u. Ña̱kán, ni̱nda̱ka̱tu̱ʼunrana ndáaña kivi keʼéra xa̱ʼa̱na ña̱ va̱ʼa chaʼvira xa̱ʼa̱ ña̱ ke̱ʼé ta̱ Saúl xíʼinna. Tasaá kivi sandíʼi-xa̱ʼa̱ Jehová chiʼña ta̱ ta̱xira ndaʼa̱ na̱ ñuu Israel. Soo na̱yóʼo va̱ása níndukúna xu̱ʼún nu̱úra chi ña̱ ndu̱kúna nu̱úra kúú ña̱ ná taxira u̱xa̱ se̱ʼe ta̱ Saúl ndaʼa̱na ña̱ va̱ʼa kaʼnínana (Núm. 35:30, 31). Ta ke̱ʼéva ta̱ David ña̱ ndu̱kúna nu̱úra (2 Sam. 21:2-6).

Tá tiempo saá xa̱a̱ ni̱xi̱ʼi̱va ta̱ Saúl xíʼin ta̱ Jonatán. Ta tákukava ta̱ Mefibóset se̱ʼe ta̱ Jonatán. Soo kǒoví ku̱a̱chi níxi̱kuumiíra xa̱ʼa̱ ña̱ ke̱ʼé xi̱íra. Saáchi tá ni̱xi̱yo loʼora, íyo iin ña̱ ndo̱ʼora xa̱ʼa̱ ña̱kán va̱ása níkivika kakara, ña̱kán va̱ása níxa̱ʼa̱nvíra xíʼin xi̱íra ta̱ Saúl tá ni̱xa̱ʼa̱nra sa̱ndíʼi-xa̱ʼa̱ra sava na̱ ñuu Gabaón. Ta saátu, ta̱ David ki̱ndoora xíʼin ta̱ Jonatán ña̱ viíní kutáʼanna, ta nda̱a̱ na̱ se̱ʼena viíní kutáʼanna (1 Sam. 18:1; 20:42). Ta ña̱yóʼo káʼa̱n tu̱ʼun Ndióxi̱ xa̱ʼa̱ ña̱ ke̱ʼé ta̱ David: “Ta̱ rey David ku̱ndáʼviní-inira xi̱nira ta̱ Mefibóset, se̱ʼe ta̱ Jonatán, saáchi ke̱ʼéra iin trato nu̱ú Jehová xíʼin ta̱ Jonatán, se̱ʼe ta̱ Saúl” (2 Sam. 21:7).

Soo ni saá, ke̱ʼéva ta̱ David ña̱ ndu̱kú na̱ ñuu Gabaón nu̱úra. Chi ta̱xira u̱vi̱ se̱ʼe ta̱ Saúl ndaʼa̱na, ta iin ta̱yóʼo xi̱kuu ta̱ Mefibóset, ta saátu ta̱xira u̱ʼu̱n se̱ʼeñáni ta̱ Saúl ndaʼa̱na (2 Sam. 21:8, 9). Tasaá ku̱chiñu ta̱ David sa̱ndíʼi-xa̱ʼa̱ra chiʼña ta̱ ta̱xi Jehová ndaʼa̱ na̱ ñuu Israel xa̱ʼa̱ ña̱ xa̱ʼní ta̱ Saúl na̱ ñuu Gabaón.

Íyo iin ña̱ ndáyáʼviní sákuaʼayó xíʼin relato yóʼo. Tá kǒo ku̱a̱chi níxi̱kuumií na̱ se̱ʼe ta̱ Saúl ta saátu na̱ se̱ʼeñánira, va̱ása taxiví Jehová ña̱ ná kaʼnínana. Saáchi leyra káxiní xi̱ka̱ʼa̱nña, ña̱ iin na̱ yiví va̱ása níxi̱xiniñúʼu kuvina xa̱ʼa̱ ku̱a̱chi ña̱ ni̱ki̱ʼvi na̱ yivána. Ta ley yóʼo xi̱ka̱ʼa̱ntuña ña̱yóʼo: “Iin tá iinna xíniñúʼu kuvina xa̱ʼa̱ ku̱a̱chi ña̱ ni̱ki̱ʼvina” (Deut. 24:16). Xíʼin ña̱yóʼo kúnda̱a̱-iniyó ña̱ na̱ u̱vi̱ se̱ʼe ta̱ Saúl xíʼin na̱ u̱ʼu̱n se̱ʼeñánira, chi̱ndeétáʼanvana xíʼinra tá ni̱xa̱ʼa̱nra xa̱ʼníra na̱ ñuu Gabaón. Ña̱kán cha̱ʼvivana xa̱ʼa̱ ña̱ ke̱ʼéna.

Ña̱kán, ¿ndáaña sákuaʼayó xíʼin relato yóʼo? Xíʼin ña̱yóʼo sákuaʼayó ña̱ tá ke̱ʼéyó iin ña̱ va̱ása va̱ʼa, va̱ása kivi ka̱ʼa̱nyó á ndakanixi̱níyó ña̱ ke̱ʼéyóña xa̱ʼa̱ ña̱ xa̱ʼnda kuitína chiñu nu̱úyó. Saáchi iin tá iinyó xíniñúʼu ndakuiinyó xa̱ʼa̱ ku̱a̱chi ña̱ ni̱ki̱ʼviyó. Ña̱yóʼo káchi iin proverbio: “Va̱ása ku̱ʼún chí ndaʼa̱ kúaʼa ni chí ndaʼa̱ yítin. Va̱ása kakaún nu̱ú íyo ña̱ kini” (Prov. 4:24-27; Efes. 5:15).