1, 2. ¿Nda̱chun va̱ása xíniñúʼu ndakava-iniún tá va̱ása íyo tu̱ʼvaún ña̱ ndakuchiún? (Koto na̱ʼná ña̱ va̱xi chí nu̱ú kíxáʼa tutu yóʼo).

 KÚSI̱ÍNÍ-ININDI̱ xíʼún tá xa̱a̱ nda̱kaxiún ña̱ ndakuchiún. Soo, ¿á xa̱a̱ íyo tu̱ʼvaún ña̱ keʼún ña̱yóʼo? Tá túviún ña̱ xa̱a̱ íyo tu̱ʼvaún ta xa̱a̱ ni̱ka̱ʼún xíʼin na̱ anciano ta na̱yóʼo ni̱ka̱ʼa̱nna ña̱ xa̱a̱ kivi ndakuchiún, xa̱a̱ kivi ndakuchivaún. Chi saá kusi̱í-iniún kachíñún nu̱ú Jehová.

² Tá ni̱ka̱ʼa̱nna xíʼún ña̱ va̱ása íyo tu̱ʼvaún ña̱ ndakuchiún á miíún túviún ña̱ va̱ása íyo tu̱ʼvaún, kǒo ndakava-iniún. Chika̱a̱ ndee̱ ña̱ sakúaʼakaún xa̱ʼa̱ Jehová tasaá va̱ʼa xa̱ún ndakuchiún ni loʼún á ni xa̱a̱ chéún.

3. ¿Ndáaña ni̱ka̱ʼa̱n iin ta̱ chíñu ta̱ ñuu Etiopía xíʼin ta̱ Felipe, ta ndáaña kivi nda̱ka̱tu̱ʼunyó miíyó? (Hechos 8:36, 38).

³ (Kaʼvi Hechos 8:36, 38). Iin ta̱ chíñu ta̱ ñuu Etiopía ni̱ka̱ʼa̱nra xíʼin ta̱ Felipe: “¿Ndáaña sási nu̱úi̱ ña̱ ndakuchii̱?”. Xíʼin ña̱ ni̱ka̱ʼa̱nra yóʼo xi̱na̱ʼa̱ ña̱ xi̱kuni̱vara ndakuchira. Soo, ¿á xa̱a̱ ni̱xi̱yo tu̱ʼvara ña̱ ndakuchira?

4. ¿Ndáa ki̱ʼva ni̱na̱ʼa̱ ta̱ ñuu Etiopía ña̱ xi̱kuni̱kara sakúaʼara xa̱ʼa̱ Ndióxi̱?

⁴ Ta̱ ñuu Etiopía ni̱xa̱ʼa̱nra Jerusalén ña̱ va̱ʼa ndasakáʼnura Ndióxi̱ (Hech. 8:27). Ta̱yóʼo ni̱xa̱a̱ra ka̱ndíxara ña̱ kándíxa na̱  judío. Ta xi̱xini̱ra ña̱ káʼa̱n Escrituras Hebreas ta nu̱ú ña̱yóʼo sa̱kuaʼara xa̱ʼa̱ Jehová, soo ta̱yóʼo xi̱kuni̱ra kunda̱a̱ka-inira. Saáchi, ¿ndáaña kéʼéra tá nda̱ni̱ʼí ta̱ Felipe ta̱yóʼo chí yichi̱? Rollo ña̱ ka̱ʼyí ta̱ profeta Isaías kúú ña̱ káʼvira (Hech. 8:28). Ta yo̱ʼvi̱va xi̱ka̱ʼa̱n ña̱yóʼo. Soo, ta̱yóʼo xi̱kuni̱kara kunda̱a̱-inira xa̱ʼa̱ Ndióxi̱.

5. ¿Ndáaña ke̱ʼé ta̱ chíñu ñuu Etiopía tá sa̱kúaʼara xa̱ʼa̱ Jehová?

⁵ Iin chiñu káʼnuní xi̱kuumií ta̱ ta̱a yóʼo, saáchi xi̱kachíñura nu̱ú ñá Candace ñá reina ña̱ ñuu Etiopía “ta xi̱kiʼinra kuenta xíʼin ndiʼi xu̱ʼún ñáyóʼo” (Hech. 8:27). Sana ku̱a̱ʼání chiñu xi̱kuumií ta̱yóʼo, soo ta̱vára tiempo ña̱ ndasakáʼnura Jehová. Soo kǒo nísakuaʼa kuitíra ña̱ nda̱a̱ xa̱ʼa̱ Ndióxi̱, chi ke̱ʼéra ña̱ sa̱kúaʼara. Ta̱yóʼo ke̱era ñuu Etiopía ta ni̱xa̱a̱ra ñuu Jerusalén ña̱ va̱ʼa ndasakáʼnura Jehová. Sana xíkání ni̱xa̱ʼa̱nra ta ku̱a̱ʼá xu̱ʼún xi̱niñúʼura, soo ke̱ʼéra ndiʼi ña̱yóʼo chi xi̱kuni̱ra ndasakáʼnura Jehová.

6, 7. ¿Ndáaña ke̱ʼé ta̱ chíñu ñuu Etiopía ña̱ va̱ʼa kuʼvi̱ka-inira kunira Jehová?

⁶ Ta̱ Felipe ni̱ka̱ʼa̱nra xíʼin ta̱ ñuu Etiopía xa̱ʼa̱ ña̱ʼa ña̱ ndáyáʼviní ña̱ kǒo xíni̱ra xa̱ʼa̱. Tá kúú, ña̱ kúú ta̱ Jesús ta̱ Mesías (Hech. 8:34, 35). Sana nda̱kanda̱níva-ini ta̱ ta̱a kán tá na̱kunda̱a̱-inira xa̱ʼa̱ ña̱ ke̱ʼé ta̱ Jesús xa̱ʼa̱ra. Ta̱ ta̱a kán kiviva ndakanixi̱níra ña̱ kǒo xíniñúʼu sakúaʼakara. Soo xa̱ʼa̱ ña̱ ni̱xa̱a̱ra ni̱kuʼvi̱ka-inira xi̱nira Jehová xíʼin ta̱ Jesús, ña̱yóʼo chi̱ndeétáʼan xíʼinra ña̱ ni̱xa̱a̱ra nda̱kuchira ta nda̱kundiku̱nra ta̱ Jesús. Ña̱kán ta̱ Felipe xi̱nira ña̱ xa̱a̱ íyo tu̱ʼva ta̱ ta̱a kán ta sa̱ndákuchirara.

⁷ Ña̱ ke̱ʼé ta̱ chíñu ñuu Etiopía chindeétáʼan xíʼún ña̱ va̱ʼa xa̱ún ndakuchiún ta kivi ka̱ʼún nda̱a̱ táki̱ʼva ni̱ka̱ʼa̱n ta̱yóʼo: “¿Ndáaña sási nu̱úi̱ ña̱ ndakuchii̱?”. Vitin ná kotoyó ndáa ki̱ʼva keʼún táʼan ña̱ ke̱ʼéra: ña̱ ndakundeún sakúaʼún ta kéʼún ña̱yóʼo ta saátu ña̱ xa̱ún kuʼvi̱ka-iniún kuniún Jehová.

8. Nda̱a̱ táki̱ʼva káchi Juan 17:3, ¿ndáaña xíniñúʼu keʼéyó?

⁸ (Kaʼvi Juan 17:3 xíʼin nota). ¿Á chi̱ndeétáʼan tu̱ʼun ña̱ ni̱ka̱ʼa̱n ta̱ Jesús xíʼún ña̱ ki̱xáʼún káʼviún Biblia? Tu̱ʼun ña̱ ni̱ka̱ʼa̱nra ku̱a̱ʼánína chi̱ndeétáʼanña xíʼin. Saátu chíndeétáʼanní tu̱ʼun yóʼo xíʼinyó ña̱ ndakundeéyó sakúaʼakayó xa̱ʼa̱ Jehová (Ecl. 3:11). Chi ndiʼi tiempova sákuaʼayó xa̱ʼa̱ra. Tá chíka̱a̱kayó ndee̱ ña̱ sákuaʼayó xa̱ʼa̱ra, saá kúú ña̱ kuyatinkayó nu̱úra (Sal. 73:28).

9. ¿Ndáaña xíniñúʼu keʼéyó tá ndi̱ʼi sa̱kuaʼayó xa̱ʼa̱ ña̱ʼa ña̱ va̱ása yo̱ʼvi̱ ña̱ va̱xi nu̱ú Biblia?

⁹ Tá kíxáʼayó sákuaʼayó xa̱ʼa̱ Jehová kíxáʼayó sákuaʼayó xa̱ʼa̱ ña̱ʼa ña̱ va̱ása yo̱ʼvi̱. Nu̱ú carta  ña̱ ka̱ʼyí ta̱ apóstol Pablo ku̱a̱ʼa̱n ndaʼa̱ na̱ hebreo, ni̱ka̱ʼa̱nra xa̱ʼa̱ ña̱yóʼo ña̱ íyoña nda̱a̱ táki̱ʼva íyo leche tá xíʼi na̱ va̱lí. Soo su̱ví xíʼin ña̱yóʼo níkuni̱ kachira ña̱ va̱ása ndáyáʼvi ña̱ʼa ña̱ kíxáʼayó sákuaʼayó xa̱ʼa̱ Ndióxi̱ (Heb. 5:12; 6:1). Chi ni̱ka̱ʼa̱nra xíʼin na̱ cristiano ña̱ ná chika̱a̱na ndee̱ ña̱ sakúaʼana xa̱ʼa̱ ndiʼi ña̱ʼa ña̱ ndáyáʼvi ña̱ va̱xi nu̱ú tu̱ʼun Ndióxi̱. ¿Á kúni̱ún sakúaʼún xa̱ʼa̱ ña̱ nda̱a̱ ña̱ va̱xi nu̱ú tu̱ʼun Ndióxi̱? ¿Á chíka̱a̱-iniún ña̱ ndakundeún sakúaʼún xa̱ʼa̱ Jehová xíʼin xa̱ʼa̱ ña̱ káʼa̱nra keʼéra chí nu̱únínu?

10. ¿Nda̱chun íxayo̱ʼvi̱níña xíʼin savana ña̱ kaʼvina?

¹⁰ Savana íxayo̱ʼvi̱níña xíʼinna ña̱ kaʼvina. Ta miíún, ¿á íxayo̱ʼvi̱ña xíʼún? ¿Á sa̱náʼa̱na yóʼó kaʼviún ti̱xin escuela? ¿Á xi̱kutóún keʼún ña̱yóʼo? ¿Á i̱xayo̱ʼvi̱vaña xíʼún? Tá saá ndo̱ʼún kǒo kundi̱ʼi̱-iniún chi su̱ví iinlá yóʼó ndóʼo saá. Soo íyo Jehová ña̱ chindeétáʼanra xíʼún. Ta̱kán kúú iin ta̱ va̱ʼaníka sanáʼa̱ miíyó.

11. ¿Nda̱chun va̱ʼaní sánáʼa̱ Jehová miíyó?

¹¹ Jehová va̱ʼaní sánáʼa̱ra miíyó (Is. 30:20, 21). Kúee íyo inira tá sánáʼa̱ra miíyó, va̱ʼaní-inira, kúnda̱a̱-inira xíʼinyó ta kíʼinra kuenta xíʼin ña̱ va̱ʼa ña̱ kéʼéyó (Sal. 130:3). Va̱ása káʼa̱nra xíʼinyó keʼéyó ña̱ va̱ása kuchiñuyó keʼéyó. Ná va̱ása nandósó-iniyó chi ta̱kán kúú ta̱ ke̱ʼé mekeyó ta ña̱yóʼo va̱ʼaní regalo kúúña (Sal. 139:14). Ta saátu i̱xava̱ʼara miíyó ña̱ kuni̱kayó sakúaʼakayó ta kúni̱ra ña̱ ná ndakundeéyó sakúaʼayó ndiʼi tiempo ta ná kusi̱í-iniyó xíʼin ña̱yóʼo. Ña̱kán nda̱a̱ tiempo vitin ná chika̱a̱-iniyó ña̱ sakúaʼayó xa̱ʼa̱ ña̱ nda̱a̱ (1 Ped. 2:2). ¿Ndáaña kivi chindeétáʼan xíʼún? Chinúu meta nu̱ún ña̱ kivi saxínún ta kaʼvi ni̱ʼi tu̱ʼun Ndióxi̱ ta ndakanixi̱ní xa̱ʼa̱ña (Jos. 1:8). Mií Jehová chindeétáʼan xíʼún ña̱ kutóún sakúaʼún xa̱ʼa̱ra ta saátu ña̱ ndakanixi̱níún xa̱ʼa̱ ña̱ sákuaʼún xa̱ʼa̱ra.

12. ¿Nda̱chun ndáyáʼviní sakúaʼayó xa̱ʼa̱ ña̱ ke̱ʼé ta̱ Jesús nu̱ú ñuʼú yóʼo ta saátu xa̱ʼa̱ ña̱ na̱túʼunra xíʼin na̱ yiví?

¹² Tavá tiempo ña̱ ndakanixi̱níún xa̱ʼa̱ ña̱ xi̱taku ta̱ Jesús nu̱ú ñuʼú yóʼo ta saátu ndáa ki̱ʼva ni̱xi̱kara na̱túʼunra xíʼin na̱ yiví xa̱ʼa̱ Ndióxi̱. Ña̱ va̱ʼa ndasakáʼnuyó Jehová tiempo ña̱ yo̱ʼvi̱ní ndóoyó vitin, ndáyáʼviní kundiku̱nyó yichi̱ ta̱ Jesús (1 Ped. 2:21). Ta̱ Jesús ni̱ka̱ʼa̱nra xíʼin na̱ ndíku̱n sa̱tára ndáa tu̱ndóʼo kúú ña̱ kixi sa̱tána (Luc. 14:27, 28). Soo xi̱kunda̱a̱va-inira ña̱ nda̱kú koo inina nda̱a̱ táki̱ʼva nda̱kú ni̱xi̱yo ini miíra (Juan 16:33). Kaʼvi xa̱ʼa̱ ki̱ʼva ña̱ xi̱taku ta̱ Jesús ta chinúu meta nu̱ún ña̱ kivi chindeétáʼan xíʼún ña̱ kundiku̱ún yichi̱ra.

13. ¿Ndáaña xíniñúʼu ndukún nu̱ú Jehová, ta nda̱chun?

¹³ Miíyó ndákundeéyó sákuaʼayó xa̱ʼa̱ Jehová chi kúni̱yó kunda̱a̱ka-iniyó xa̱ʼa̱ra. Kúni̱yó kuʼvi̱ka-iniyó kuniyóra ta kandíxakayóra (1 Cor. 8:1-3). Tá ndákundeún sákuaʼún xa̱ʼa̱ Jehová ka̱ʼa̱n xíʼinra ña̱ chindeétáʼanra xíʼún ña̱ kandíxakaúnra (Luc. 17:5). Ta ta̱kán ndakuiinvara yuʼún chi va̱ʼaní-inira. Tá va̱ʼaní kándíxaún Jehová chi va̱ʼaní ni̱xa̱ún sa̱kuaʼún ña̱ va̱xi nu̱ú tu̱ʼunra, ña̱yóʼo chindeétáʼanña xíʼún ña̱ ndakundeún ndasakáʼnúnra (Sant. 2:26).

14. ¿Ndáa ki̱ʼva ni̱ka̱ʼa̱n ta̱ Pedro xa̱ʼa̱ ña̱ ndáyáʼviní keʼéyó ña̱ sákuaʼayó? (Koto na̱ʼná).

¹⁴ Ta̱ apóstol Pedro ni̱ka̱ʼa̱nra ña̱ miíyó na̱ ndíku̱n sa̱tá ta̱ Cristo, ndáyáʼviní keʼéyó ña̱ sákuaʼayó. Ta ña̱ va̱ʼa ka̱ʼa̱nra xa̱ʼa̱ ña̱yóʼo xi̱niñúʼura ejemplo ta̱ Noé. Jehová ni̱ka̱ʼa̱nra xíʼin ta̱ Noé ña̱ ndeéní sákuunra sa̱vi̱ sa̱tá na̱ xi̱ndoo tiempo saá. Soo va̱ása níxiniñúʼu kunda̱a̱ kuití ini ta̱ Noé xa̱ʼa̱ ña̱yóʼo. Saáchi miíra xíʼin na̱ veʼera xi̱niñúʼu keʼéna sava ña̱ʼa ña̱ va̱ʼa ka̱kuna. Ta ta̱ Pedro xi̱niñúʼura tu̱ʼun “nani kúva̱ʼa tú arca” ña̱ va̱ʼa ka̱ʼa̱nra xa̱ʼa̱ tiempo  tá kúma̱ní ndeéní kuun sa̱vi̱ (1 Ped. 3:20). Ta̱ Noé xíʼin na̱ veʼera ke̱ʼéna ndiʼi ña̱ ni̱ka̱ʼa̱n Jehová xíʼinna ta ke̱ʼéna iin arca káʼnuní (Heb. 11:7). Ta̱ Pedro chi̱táʼanra ña̱ ke̱ʼé ta̱ Noé xíʼin ña̱ ndákuchiyó. Ta ña̱yóʼo ni̱ka̱ʼa̱nra: “Ta ña̱ ku̱u yóʼo kítáʼanña xíʼin ña̱ ndákuchindó chi ña̱yóʼo kúú ña̱ sakǎku ndóʼó vitin” (1 Ped. 3:21). Ña̱ kéʼún tiempo vitin ña̱ va̱ʼa ndakuchiún, íyoña nda̱a̱ táki̱ʼva íyo ña̱ ke̱ʼé ta̱ Noé xíʼin na̱ veʼera tá íxava̱ʼana tú arca. Tá saá, ¿ndáaña xíniñúʼu keʼún ña̱ va̱ʼa ndakuchiún?

15. ¿Ndáaña kúni̱ kachi ña̱ ndixa ndandikó-iniyó?

¹⁵ Iin ña̱ kivi keʼéyó kúú ña̱ ndandikó-iniyó xa̱ʼa̱ ku̱a̱chi ña̱ ni̱ki̱ʼviyó (Hech. 2:37, 38). Ta ña̱yóʼo kúni̱ kachiña ña̱ sandákooyó ña̱ va̱ása va̱ʼa kéʼéyó. ¿Á xa̱a̱ nda̱koún kéʼún ña̱ va̱ása kútóo Jehová? Tá kúú ña̱ keʼún ña̱ kini, ña̱ kaʼmiún á ña̱ ka̱ʼún tu̱ʼun kini (1 Cor. 6:9, 10; 2 Cor. 7:1; Efes. 4:29). Tá ta̱ʼán sándakoún keʼún ña̱yóʼo, chika̱a̱ ndee̱ ña̱ sandákoúnña. Kivi ka̱ʼún xíʼin iin na̱ sánáʼa̱ yóʼó xa̱ʼa̱ tu̱ʼun Ndióxi̱ á iin na̱ anciano ña̱ va̱ʼa chindeétáʼanna xíʼún. Tá iin na̱ va̱lí kúúndó tá ndóokandó xíʼin na̱ yivándó kivi ka̱ʼa̱nndó xíʼinna ña̱ ná chindeétáʼanna xíʼinndó tá íyo ña̱ sási nu̱úndó ña̱ xa̱a̱ndó ndakuchindó.

16. ¿Ndáaña xíniñúʼu keʼéyó tá kúni̱yó ndasakáʼnuyó Jehová?

¹⁶ Ta saátu ndáyáʼviní ña̱ ku̱ʼún reunión ta taxiún comentario (Heb. 10:24, 25). Ña̱kán tá na̱ ka̱ʼa̱nna xíʼún ña̱ xa̱a̱ va̱ʼa kitaún natúʼun xa̱ʼa̱ tu̱ʼun Ndióxi̱, kita ni̱ʼi natúʼun xa̱ʼa̱ra. Tá kíta ni̱ʼún nátúʼun xa̱ʼa̱ Ndióxi̱ saá kusi̱íka-iniún keʼún chiñu yóʼo (2 Tim. 4:5). Tá íyokaún xíʼin na̱ yiváún ndakanixi̱ní xa̱ʼa̱ ña̱yóʼo: “¿Á ndiʼi tiempo sándakaʼánna yi̱ʼi̱ ña̱ ku̱ʼi̱n reunión ta saátu ña̱ ku̱ʼi̱n natúʼi̱n xa̱ʼa̱ Ndióxi̱? ¿Á kéʼíi̱ña chi ini miíi̱ kána ña̱ keʼíi̱ña?”. Tá ini miíún kána ña̱ keʼún ña̱yóʼo, saá na̱ʼún ña̱ kándíxaún ña̱ káʼa̱n Ndióxi̱, kúʼvi̱-iniún xíniúnra ta táxiún tíxa̱ʼvi ndaʼa̱ra. Tá ndíʼi̱níka-iniún keʼún chiñu Ndióxi̱, saá náʼún ña̱ nda̱kúní íyo iniún xíʼinra. Nda̱a̱ táki̱ʼva íyo ña̱ táxiún regalo ndaʼa̱ra saá íyo ña̱yóʼo (2 Ped. 3:11; Heb. 13:15). Kúsi̱í-ini Jehová tá ini miíyó kána ña̱ taxiyó regalo ndaʼa̱ra ta su̱ví xíʼin ña̱ ndúxa̱ kéʼéyóña (chitáʼanña xíʼin 2 Corintios 9:7). Ta miíyó kúsi̱íní-iniyó tá táxiyó ña̱ va̱ʼa ña̱ kúúmiíyó ndaʼa̱ Jehová.

17, 18. ¿Ndáaña chindeétáʼan xíʼún ña̱ va̱ʼa xa̱ún ndakuchiún, ta nda̱chun? (Proverbios 3:3-6).

¹⁷ Nani tá chíka̱ún ndee̱ ña̱ xa̱ún ndakuchiún koova tu̱ndóʼo nu̱ún. Savana kusi̱kindaana yóʼó ta savana ixandi̱va̱ʼana xíʼún xa̱ʼa̱ ña̱ sákuaʼún xa̱ʼa̱ Ndióxi̱ (2 Tim. 3:12). Á sanatu íxayo̱ʼvi̱ña xíʼún ña̱ sandákoún keʼún ña̱ va̱ása kútóo Jehová, chi sava yichi̱ kéʼékavaúnña. Á savatu ndákanixi̱níún ña̱ va̱ása kivi xa̱ún ndakuchiún ta ña̱yóʼo kivi sandíʼi̱ña-iniún. Soo, ¿ndáaña chindeétáʼan xíʼún ña̱ va̱ása ndakava-iniún? Ña̱ kuʼvi̱-iniún kuniún Jehová.

¹⁸ Ña̱ kuʼvi̱-iniún kuniún Jehová kúú iin ña̱ va̱ʼaníka (kaʼvi Proverbios 3:3-6). b Ta ña̱yóʼo kúú ña̱ chindeétáʼan xíʼún ña̱ ya̱ʼún nu̱ú tu̱ndóʼo. Biblia káʼa̱nña ña̱ ndixaní kúʼvi̱-ini Jehová xínira na̱ ndásakáʼnu miíra. Ña̱yóʼo kúni̱ kachiña ña̱ kǒo sándakoo ndaʼa̱ Jehová miíyó ta ndiʼi tiempo kuʼvi̱-inira kunira miíyó (Sal. 100:5). Tá i̱xava̱ʼa Ndióxi̱ miíún, ta̱xira ña̱ ná kuumiíún ña̱ va̱ʼa ña̱ kúúmiíra (Gén. 1:26). Tá saá, ¿ndáa ki̱ʼva na̱ʼún ña̱ ndixaní kúʼvi̱-iniún xíniún Jehová?

19. ¿Ndáaña kivi keʼún ña̱ va̱ʼa na̱ʼún nu̱ú Jehová ña̱ táxiún tíxa̱ʼvi ndaʼa̱ra xa̱ʼa̱ ña̱ kéʼéra xa̱ʼún? (Gálatas 2:20).

¹⁹ Ña̱ nu̱ú kivi keʼún kúú ña̱ taxiún tíxa̱ʼvi ndaʼa̱ Jehová (1 Tes. 5:18). Ta kivi ndakanixi̱níún xa̱ʼa̱ ña̱yóʼo ndiʼi ki̱vi̱: “¿Ndáa ki̱ʼva ni̱na̱ʼa̱ Jehová ña̱ kúʼvi̱-inira xínira yi̱ʼi̱ vitin?”. Ta tá ná ka̱ʼún xíʼinra, taxi tíxa̱ʼvi ndaʼa̱ra xa̱ʼa̱ ña̱ʼa ña̱ kéʼéra xa̱ʼún. Koto ndáa ki̱ʼva náʼa̱ Jehová ña̱ kúʼvi̱ní-inira xínira yóʼó nda̱a̱ táki̱ʼva ke̱ʼé ta̱ apóstol Pablo (kaʼvi Gálatas 2:20). Ta ndakanixi̱ní xa̱ʼa̱ ña̱yóʼo: “¿Á kúni̱i̱ na̱ʼi̱ nu̱ú Jehová ña̱ kúʼvi̱-inii̱ xínii̱ra?”. Tá kúʼvi̱-iniún xíniún Jehová, ña̱yóʼo chindeétáʼan xíʼún ya̱ʼún nu̱ú nda̱a̱ ndáaka tu̱ndóʼo ña̱ kivi kixi nu̱ún tasaá chika̱a̱kaún ndee̱ ña̱ ndasakáʼnúnra. Tásaá ná keʼún, na̱ʼún ña̱ kúʼvi̱-iniún xíniún Jehová ndiʼi ki̱vi̱.

20. ¿Ndáaña xíniñúʼu keʼún tá kúni̱ún ndataxiún miíún ndaʼa̱ Jehová, ta nda̱chun ndáyáʼviní ndaka̱xiún keʼún ña̱yóʼo?

²⁰ Tá ná ya̱ʼa tiempo, ña̱ kúʼvi̱ní-iniún xíniún Jehová chindeétáʼan xíʼún ña̱ xa̱ún keʼún  iin oración ña̱ ndáyáʼviní nu̱úra, nu̱ú ka̱ʼún xíʼinra ña̱ ndataxiún miíún ndaʼa̱ra ta ndasakáʼnúnra ndiʼi tiempo ni ná kixi tu̱ndóʼo nu̱ún. Ta tá ná ndataxiún miíún ndaʼa̱ Jehová, saá xa̱ún koún kuentara ndiʼi tiempo. Oración ña̱ ndáyáʼviní yóʼo, iin yichi̱ kuitíva kéʼúnña. Ta ndakaʼán chi nu̱ú ndiʼika ña̱ ndáka̱xiún keʼún, ña̱yóʼo kúú mií ña̱ ndáyáʼviníka (Sal. 50:14). Ta̱ Ndi̱va̱ʼa kuni̱ra sakúxíkára yóʼó nu̱ú Jehová tasaá sandákoún ña̱ kachíñún nu̱úra. Soo va̱ása taxiún ña̱ ná keʼé ta̱ Ndi̱va̱ʼa ña̱yóʼo (Job 27:5). Ña̱ ndixaní kúʼvi̱-iniún xíniún Jehová chindeétáʼan xíʼún ña̱ saxínún ña̱ ni̱ka̱ʼún xíʼinra tasaá kuyatinkaún nu̱úra.

21. ¿Ama kúú ña̱ kíxáʼayó káchíñu ni̱ʼikayó nu̱ú Jehová?

²¹ Tá xa̱a̱ ndi̱ʼi nda̱taxiún miíún ndaʼa̱ Jehová, ka̱ʼa̱n xíʼin na̱ anciano ña̱ xa̱a̱ kúni̱ún ndakuchiún. Tá xa̱a̱ ná ndakuchiún saá kúú ña̱ kixáʼún kachíñu ni̱ʼikaún nu̱ú Jehová ndiʼi tiempo. Ña̱kán ndáyáʼviní ña̱ xa̱a̱ ndi̱ku̱n vitin kixáʼún kuʼvi̱-iniún kuniún Jehová. Keʼé chiñu nu̱ú Jehová ña̱ kivi chindeétáʼan xíʼún ña̱ va̱ʼa xa̱ún kuʼvi̱ka-iniún kuniúnra, chi ña̱yóʼo chindeétáʼan xíʼún ña̱ xa̱ún ndakuchiún. Kusi̱íní-iniún tá ná kixaa̱ ki̱vi̱ ña̱ ndakuchiún. Soo ndakaʼún chi saá kúú ña̱ kixáʼún kachíñukaún nu̱ú Jehová. Chika̱a̱-ini ña̱ kuʼvi̱ka-iniún kuniún Jehová ta saátu se̱ʼera ta̱ Jesús.