Ndáa ki̱ʼva kivi ka’viyó
¿Ndáa ki̱ʼva kuniñúʼuyó nu̱ú káʼa̱nña “Lo nuevo”?
Ña̱ va̱xi nu̱ú JW Library® xíʼin nu̱ú jw.org, nu̱ú káʼa̱nña “Lo nuevo”. Ti̱xin táʼví yóʼo va̱xi ndiʼi ña̱ sa̱kán ka̱na. ¿Ndáa ki̱ʼva kuniñúʼuyó táʼví yóʼo ña̱ va̱ʼa kunda̱a̱-iniyó xa̱ʼa̱ ña̱ sa̱kán kána?
Tá ña̱ JW Library kúú ña̱ xíniñúʼún
Tá kána iin artículo xa̱á, ña̱ catálogo á nu̱ú ñúʼu ndiʼi artículo ña̱ kítáʼan xíʼinña ndúxa̱áña. Ta ña̱ catálogo yóʼo kivi kotoyóña nu̱ú káʼa̱nña “Lo nuevo”. Ta yóʼo kúú nu̱ú kivi sanún catálogo xa̱á ña̱ kána. Ta tá kúni̱ún kaʼviún iin artículo xa̱á, ¿ndáaña kivi keʼún ña̱ va̱ʼa ndani̱ʼúnña? Kuná catálogo ta ndaka̱xin ña̱ nu̱ú artículo ña̱ va̱xi nu̱úña.
Sava tutu náʼnuníña, tá kúú ña̱ revista. Sana va̱ása kívi kaʼvi ndiʼiyóña, ña̱kán chika̱a̱ va̱ʼaña nu̱ú káʼa̱nña “Favoritos”. Ta va̱ása ixayo̱ʼvi̱ña xíʼún ña̱ ndani̱ʼúnña ña̱ va̱ʼa kaʼviúnña. Ta tá xa̱a̱ sa̱ndíʼún ka̱ʼviúnña, kivi sandóúnña.
Tá ña̱ jw.org kúú ña̱ xíniñúʼún
Su̱ví ndiʼi ña̱ tává na̱ ñuu Ndióxi̱ kánaña nu̱ú ña̱ JW Library. Saáchi íyo sava ña̱ʼa ña̱ kivi kuití kotoyó nu̱ú jw.org. Tá kúú, noticia xíʼin inkaka ña̱ʼa. Chika̱a̱ ndee̱ ña̱ ki̱ʼvi ni̱ʼún nu̱ú káʼa̱nña “Lo nuevo”, ña̱ va̱ʼa kaʼviún artículo xa̱á ña̱ sa̱kán kána.
