1, 2. a) ¿Ndáaña kúu tá ndákuchina? b) ¿Ndáaña sakúaʼayó nu̱ú artículo yóʼo?

 ¿Á XA̱A̱ xíniún iin tiʼvi na̱ yiví na̱ xa̱a̱ ku̱nu̱mí ndakuchi? Tá xa̱a̱ ku̱nu̱mí ndakuchi na̱yóʼo, ta hermano ta̱ táxi discurso kéʼéra u̱vi̱ pregunta xíʼinna ta ndinuʼukaví-inina ndákuiinna. Na̱ veʼena xíʼin na̱ migona kúsi̱íkaví-inina xa̱ʼa̱ ña̱yóʼo. Tá xa̱a̱ ndíʼi ndákuchina ta kéena ti̱xin ti̱kui̱í náʼa̱ nu̱úna ña̱ kúsi̱íkaví-inina ta ndiʼi na̱ xíto tá ndákuchina, kúsi̱íkaví-inina ta kátindaʼa̱na á kánindaʼa̱na. Iin tá iin semana ku̱a̱ʼání na̱ yiví ndákuchina, saá kúú ña̱ xáa̱na ndátaxina miína ndaʼa̱ Jehová ta xáa̱na ndúuna testigora.

² Tá ndákanixi̱níún ña̱ ndakuchiún, ña̱yóʼo kúni̱ kachiña ña̱ nándukún Jehová ta xa̱ʼa̱ ña̱yóʼo ndáyáʼviníún nu̱úra chi kǒo kéʼékaún ña̱ kini ña̱ íyo ñuyǐví yóʼo (Sal. 14:1, 2). Ña̱ artículo yóʼo chindeétáʼanña xíʼún ni kúún na̱ va̱lí á na̱ xa̱a̱ chée. Nu̱ú ña̱yóʼo ndani̱ʼún u̱ni̱ ña̱ kivi chindeétáʼan xíʼún ña̱ ndaka̱xiún ña̱ kachíñún nu̱ú Jehová. Tá xa̱a̱ nda̱kuchiún, artículo yóʼo chindeétáʼanña xíʼún ña̱ kuni̱kaún kachíñún nu̱ú Jehová ndiʼi tiempo.

3. Miíyó na̱ ndásakáʼnu Jehová, ¿nda̱chun kúʼvi̱-iniyó xíniyó ña̱ nda̱a̱ xíʼin ña̱ nda̱kú? (Salmo 119:128, 163).

³ Jehová ni̱ka̱ʼa̱nra xíʼin na̱ káchíñu nu̱úra ña̱ ná kuʼvi̱-inina kunina ña̱ nda̱a̱ (Zac. 8:19). Ta ta̱ Jesús ni̱ka̱ʼa̱nra ña̱ ndáyáʼviní nandukúyó ña̱ va̱ʼa (Mat. 5:6). Ña̱yóʼo kúni̱ kachiña ña̱ xíniñúʼu chika̱a̱níyó ndee̱ ña̱ keʼéyó ña̱ va̱ʼa nda̱a̱ táki̱ʼva kúni̱ mií  Ndióxi̱. ¿Á kúʼvi̱-iniyó xíniyó ña̱ nda̱a̱ xíʼin ña̱ va̱ʼa? Kúʼvi̱va-iniyó xíniyóña, saáchi kúndasíníyó xíniyó ña̱ vatá xíʼin ña̱ kini (kaʼvi Salmo 119:128, b 163). c Na̱ sándaʼvi kéʼéna nda̱a̱ táki̱ʼva kéʼé ta̱ Ndi̱va̱ʼa ta̱ xáʼndachíñu nu̱ú ñuʼú yóʼo (Juan 8:44; 12:31). Iin ña̱ kútóoní ta̱ Ndi̱va̱ʼa keʼéra kúú ña̱ ixaya̱ku̱a̱ra ki̱vi̱ Jehová. Nda̱a̱ tá tiempo xi̱naʼá ni̱ka̱ʼa̱nra ña̱ vatá xa̱ʼa̱ Jehová nu̱ú jardín ña̱ Edén. Ta nda̱a̱ táki̱ʼva íyo ta̱ ni̱ka̱ʼa̱n ña̱ va̱ása va̱ʼa xáʼndachíñu Jehová saá íyora, ta xi̱kuni̱ kachitura ña̱ iinlá xa̱ʼa̱ mií Jehová ndíʼi̱-inira ta káʼa̱nra ña̱ vatá xíʼin na̱ yiví chi chíse̱ʼéra ndiʼi ña̱ va̱ʼa nu̱úna (Gén. 3:1, 4, 5). Xa̱ʼa̱ ña̱ ku̱a̱ʼání ña̱ vatá ni̱ka̱ʼa̱n ta̱ Ndi̱va̱ʼa xa̱ʼa̱ Jehová, ku̱a̱ʼání na̱ yiví ndákanixi̱nína ña̱ su̱ví iin Ndióxi̱ va̱ʼa kúú Jehová. Ta na̱ yiví na̱ va̱ása xíín ndasakáʼnu Jehová, ta̱ Ndi̱va̱ʼa xíniñúʼura na̱yóʼo ña̱ keʼéna ku̱a̱ʼání ña̱ kini (Rom. 1:25-31).

4. ¿Ndáa ki̱ʼva náʼa̱ Jehová ña̱ nina ña̱ nda̱a̱ káʼa̱nra? (Koto na̱ʼná).

⁴ Jehová kúúra iin Ndióxi̱ ta̱ káʼa̱n nina ña̱ nda̱a̱, ta na̱ yiví na̱ kúʼvi̱-ini xíniñaʼá sánáʼa̱rana ña̱ nda̱a̱ (Sal. 31:5). Tasaá kúú ña̱ chíndeétáʼanra xíʼinna ña̱ kǒo kandíxana ña̱ vatá ña̱ sánáʼa̱ ta̱ Ndi̱va̱ʼa. Ta sánáʼa̱turana ña̱ ka̱ʼa̱nna ña̱ nda̱a̱ ta keʼéna ña̱ nda̱kú. Ta tá kéʼéna ña̱yóʼo saá kúú ña̱ xa̱a̱na koona na̱ yiví va̱ʼa nu̱úra ta taxira ña̱ táxi̱n koo inina (Prov. 13:5, 6). Sana kíʼún kuenta ña̱ va̱ʼaní chíndeétáʼan Jehová xíʼún ña̱ sákuaʼún xa̱ʼa̱ra. Saáchi xa̱a̱ ki̱ʼún kuenta ña̱ va̱ʼaní consejo táxira ndaʼa̱ na̱ yiví (Sal. 77:13). Xa̱ʼa̱ ña̱kán kúni̱ún keʼún ndiʼi ña̱ káʼa̱nra xíʼún nu̱ú tu̱ʼunra (Mat. 6:33). Ta saátu kúni̱ún natúʼún xíʼin ndiʼi na̱ yiví ña̱ ndiʼi ña̱ káʼa̱n ta̱ Ndi̱va̱ʼa xa̱ʼa̱ Jehová ña̱ vatá kúúña. Ná kotoyó ndáa ki̱ʼva keʼún ña̱yóʼo.

5. ¿Ndáaña kivi keʼún ña̱ va̱ʼa na̱ʼún ña̱ vatá kúú ña̱ káʼa̱n ta̱ Ndi̱va̱ʼa xa̱ʼa̱ Jehová?

⁵ Ña̱ ndaka̱xiún keʼún kúú ña̱ na̱ʼa̱ ña̱ ndiʼi ña̱ káʼa̱n ta̱ Ndi̱va̱ʼa xa̱ʼa̱ Jehová ña̱ vatá kúúña, ta kúni̱ún ña̱ iinlá mií Jehová ná kaʼndachíñu nu̱ún ta saátu kúni̱ún kuniso̱ʼún ndiʼi ña̱ káʼa̱nra xíʼún. Ta ña̱ va̱ʼa ná kiʼin inkana kuenta xíʼin ña̱ kúni̱ún keʼún, keʼé iin oración nu̱ú Jehová ta ka̱ʼa̱n xíʼinra ña̱ kúni̱ún kachíñún nu̱úra ndiʼi tiempo. Tándi̱ʼi, saá ndakuchiún ta xíʼin ña̱yóʼo na̱ʼún nu̱ú ndiʼina ña̱ kúni̱ún kachíñún nu̱ú iinlá mií Jehová. Ta iin ña̱ kivi chindeétáʼan xíʼún ña̱ xa̱ún ndakuchiún kúú ña̱  kuʼvi̱-iniún kuniún ña̱ nda̱a̱ ña̱ sákuaʼún xa̱ʼa̱ Jehová xíʼin ña̱ va̱ʼa ña̱ kéʼéra.

6. Nda̱a̱ táki̱ʼva káchi Salmo 45:4, ¿ndáa xa̱ʼa̱ kúú ña̱ kúʼvi̱ní-iniyó xíniyó ta̱ Jesucristo?

⁶ ¿Nda̱chun kúʼvi̱-iniún xíniún ta̱ Jesucristo? Nu̱ú ña̱ Salmo 45:4 (kaʼviña) d káʼa̱nña ndáa xa̱ʼa̱ kúú ña̱ kúʼvi̱ní-iniyó xíniyóra. Ta̱ Jesús vitání-inira ta saátu kéʼéra ña̱ va̱ʼa, saáchi ndiʼi tiempo káʼa̱nra ña̱ nda̱a̱ xa̱ʼa̱ yivára Jehová ta ndákiʼinra tu̱ʼunra. Ña̱kán, tá kúʼvi̱-iniún xíniún ña̱ nda̱a̱ ña̱ sákuaʼún xa̱ʼa̱ Jehová xíʼin ña̱ va̱ʼa, saátu xíniñúʼu kuʼvi̱-iniún kuniún ta̱ Jesús. Ta̱yóʼo ndiʼi tiempo káʼa̱nra ña̱ nda̱a̱ xa̱ʼa̱ yivára Jehová ta saátu kéʼéra ña̱ va̱ʼa (Juan 18:37). Soo, ¿ndáa ki̱ʼva náʼa̱ra ña̱ vitá íyo inira?

7. ¿Ndáaña kéʼé ta̱ Jesús kúú ña̱ kútóokaún xa̱ʼa̱ ña̱ vitání-inira?

⁷ Ta̱ Jesús náʼa̱ra ña̱ vitání-inira xíʼin ña̱ káʼa̱nra ta saátu xíʼin ña̱ kéʼéra. Tá kúú, ndiʼi tiempo ndásakáʼnura yivára ta va̱ása kúni̱ra ndasakáʼnuna miíra (Mar. 10:17, 18; Juan 5:19). ¿Ndáaña ndákanixi̱níún xa̱ʼa̱ ña̱ vitání-ini ta̱ Jesús? ¿Á va̱ása chíndeétáʼan ña̱yóʼo xíʼún ña̱ kuʼvi̱-iniún kuniúnra ta kundiku̱ún yichi̱ra? ¿Ndáa xa̱ʼa̱ kúú ña̱ vitání-ini ta̱ Jesús? Saáchi Jehová vitání-inira, ta ta̱ Jesús ndíku̱nra yichi̱ yivára (Sal. 18:35; Heb. 1:3). ¿Á su̱ví sákuyatinka ña̱yóʼo miíún nu̱ú ta̱ Jesús?

8. ¿Nda̱chun kútóoníyó ña̱ kaʼndachíñu ta̱ Jesús nu̱úyó?

⁸ Kútóoníyó ña̱ kúú ta̱ Jesús Rey nu̱úyó chi va̱ʼaní xáʼndachíñura. Mií Jehová sa̱náʼa̱ miíra ndáa ki̱ʼva kaʼndachíñura ta saátu mií Jehová ta̱xi chiñu yóʼo ndaʼa̱ra (Is. 50:4, 5). Ná ndakanixi̱níyó xa̱ʼa̱ ndiʼi ña̱ ke̱ʼé ta̱ Jesús xa̱ʼa̱yó xa̱ʼa̱ ña̱ ni̱kuʼvi̱ní-inira xi̱nira miíyó (Juan 13:1). Ta̱ Jesús kúú ta̱ xáʼndachíñu nu̱úyó ña̱kán kúʼvi̱ní-iniyó xíniyóra. Mií ta̱ Jesús ni̱ka̱ʼa̱n ña̱ ndiʼi na̱ kúʼvi̱-ini xíni miíra ta xíniso̱ʼona ndiʼi chiñu ña̱ xáʼndara, kúúna migora (Juan 14:15; 15:14, 15). Iin ña̱ va̱ʼaní kúú ña̱ xa̱a̱yó kooyó migo se̱ʼe Jehová.

9. ¿Ndáa ki̱ʼva kítáʼan ña̱ nda̱kuchi ta̱ Jesús xíʼin ña̱ ndákuchi na̱ ndíku̱n satára?

⁹ Ta̱ Jesús xa̱ʼndara chiñu nu̱ú na̱ discípulora ña̱ ná xa̱a̱na ndakuchina (Mat. 28:19, 20). Va̱ʼaní yichi̱ chi̱núura nu̱úna saáchi ni̱xa̱a̱ra nda̱kuchira. Ta ni síín íyo ña̱ nda̱kuchi ta̱ Jesús nu̱ú ña̱ ndákuchi na̱ discípulora, íyova sava ña̱ kítáʼan xíʼin ña̱yóʼo (koto recuadro ña̱ naní “ Síín íyo ña̱ nda̱kuchi ta̱ Jesús nu̱ú ña̱ ndákuchi na̱ discípulora”). Tá kúú, tá nda̱kuchi ta̱ Jesús saá kúú ña̱ ni̱xi̱yo tu̱ʼvara ña̱ kachíñura nu̱ú yivára (Heb. 10:7). Ki̱ʼva saá íyo ña̱ kéʼé na̱ discípulora. Tá ndákuchina saá kúú ña̱ náʼa̱na nu̱ú ndiʼina ña̱ iinlá Jehová kúú ta̱ kúni̱na ndasakáʼnuna ta iinlá chiñu miíra kúú ña̱ ndáyáʼvika nu̱úna nu̱úka ña̱ kundi̱ʼi̱-inina xa̱ʼa̱ chiñu miína. Tá kéʼéna ña̱yóʼo saá kúú ña̱ ndíku̱nna yichi̱ ta̱ Jesús.

10. ¿Nda̱chun xíniñúʼu kuʼvi̱-iniún kuniún ta̱ Jesús, ta ndáa ki̱ʼva chindeétáʼan ña̱yóʼo xíʼún?

¹⁰ Ni̱xa̱ún ku̱ndaa̱-iniún ña̱ se̱ʼe nu̱ú Jehová kúú ta̱ Jesús ta nda̱kaxinra ta̱yóʼo ña̱ xa̱a̱ra koora Rey ta kaʼndachíñura. Ni̱xa̱a̱tún ku̱ndaa̱-iniún ña̱ vitání-ini ta̱ Jesús ta va̱ʼaní ndána̱ʼa̱ra ndiʼi ña̱ va̱ʼa ña̱ kúúmií yivára. Ta saátu sa̱kuaʼún xa̱ʼa̱ra ña̱ ta̱xira xi̱xi ku̱a̱ʼání na̱ yiví, sa̱ndíkora-ini na̱ nda̱kava-ini ta nda̱a̱ sa̱ndáʼara na̱ ndeéndóʼo (Mat. 14:14-21). Saátu ni̱xa̱ún ki̱ʼún kuenta ña̱ mií ta̱ Jesús kúú ta̱ níʼi yichi̱ nu̱ú na̱ congregación (Mat. 23:10). Ta xa̱ʼa̱ ña̱ mií Jehová nda̱kaxinñaʼá ña̱ xa̱a̱ra koora Rey ku̱a̱ʼání ña̱ va̱ʼa keʼéra chí nu̱únínu. ¿Ndáa ki̱ʼva na̱ʼún ña̱ kúʼvi̱-iniún xíniúnra? Ña̱ kundiku̱ún yichi̱ra (Juan 14:21). Ña̱kán,  iin ña̱ xíniñúʼu keʼún kúú ña̱ ndataxiún miíún ndaʼa̱ Jehová ta ndakuchiún.

11. ¿Ndáa xa̱ʼa̱ kúú ña̱ kúni̱ún ndakuchiún, ta nda̱chun?

¹¹ ¿Ndáa xa̱ʼa̱ kúú ña̱ kúni̱ún ndakuchiún? Ña̱ ni̱ka̱ʼa̱n ta̱ Jesús chindeétáʼanña xíʼún kunda̱a̱-iniún xíʼin ña̱yóʼo, ka̱chira: “Kuʼvi̱-iniún kuniún Jehová Ndióxi̱ún xíʼin ndiʼi níma̱ún, xíʼin ndiʼi ña̱ tákún, xíʼin ndiʼi xi̱níún ta xíʼin ndiʼi ndeún” (Mar. 12:30). Tu̱ʼun ña̱ ni̱ka̱ʼa̱n ta̱ Jesús yóʼo, ¿á náʼa̱ña ña̱ kúʼvi̱-iniún xíniún Jehová?

12. ¿Nda̱chun kúʼvi̱-iniún xíniún Jehová? (Koto na̱ʼná).

¹² Íyo ku̱a̱ʼání xa̱ʼa̱ kúú ña̱ xíniñúʼu kuʼvi̱-iniyó kuniyó Jehová. Tá kúú, sa̱kuaʼún ña̱ miíra kúú ta̱ ta̱xi ña̱ tákuyó (Sal. 36:9; Sant. 1:17). Ta ndiʼi ña̱ va̱ʼa ña̱ kúúmiíún miíra kúú ta̱ ta̱xiña ndaʼún chi va̱ʼaní-inira xíʼún ta kúʼvi̱ní-inira xínira yóʼó.

13. Ña̱ nda̱tavá Jehová miíyó ndaʼa̱ ku̱a̱chi, ¿nda̱chun iin regalo ña̱ ndáyáʼviní kúú ña̱yóʼo?

¹³ Jehová nda̱tavára miíyó ndaʼa̱ ku̱a̱chi ta ña̱yóʼo kúú iin regalo ña̱ ndáyáʼviní ta̱xira ndaʼa̱yó. Soo, ¿nda̱chun káʼa̱nyó ña̱ va̱ʼaní regalo yóʼo? Saáchi Jehová xíʼin ta̱ Jesús kúʼvi̱ní-inina xínitáʼanna. Mií ta̱ Jesús ni̱ka̱ʼa̱n ña̱yóʼo: “Kúʼvi̱-ini yivái̱ xínira yi̱ʼi̱” ta saátu yi̱ʼi̱ “kúʼvi̱-inii̱ xínii̱ yivái̱” (Juan 10:17; 14:31). Xa̱ʼa̱ ña̱ ku̱a̱ʼání tiempo ni̱xi̱yo ta̱ Jesús xíʼin Jehová chí ndiví ndixaní ni̱xa̱a̱na kúʼvi̱-inina xínitáʼanna (Prov. 8:22, 23, 30). Ña̱kán, ku̱suchíní-ini Jehová tá xi̱nira ña̱ sa̱xóʼvi̱nína se̱ʼera ta  xa̱ʼnínara. Soo xa̱ʼa̱ ña̱ kúʼvi̱ní-ini Jehová xínira yóʼó xíʼin ndiʼika na̱ yiví, ta̱xira ña̱ ni̱xi̱ʼi̱ se̱ʼera ña̱ va̱ʼa ndatavára yóʼó ndaʼa̱ ku̱a̱chi tasaá koún ndiʼi tiempo nu̱ú ñuʼú yóʼo (Juan 3:16; Gál. 2:20). Ña̱yóʼo kúú ña̱ chíndeétáʼanní xíʼinyó ña̱ kuʼvi̱níka-iniyó kuniyó Jehová.

14. ¿Ndáaña kúú mií ña̱ va̱ʼaníka ndaka̱xiún keʼún?

¹⁴ Xa̱ʼa̱ ña̱ ndákundeún sákuaʼún xa̱ʼa̱ Jehová kúʼvi̱níka-iniún xíniúnra. Ta kúni̱ún ndiʼi tiempo va̱ʼaní kutáʼún xíʼinra, ta kiviva keʼún ña̱yóʼo. Kivi sakúsi̱íún-ini Jehová xíʼin ña̱ kéʼún ta saátu xíʼin ña̱ káʼún. Ta mií Jehová kúú ta̱ chíka̱a̱ ndee̱ xíʼún ña̱ keʼún ña̱yóʼo (Prov. 23:15, 16). Ta ña̱ ndaka̱xiún keʼún kúú ña̱ na̱ʼa̱ á ndixa kúʼvi̱-iniún xíniún Jehová (1 Juan 5:3). Ña̱ keʼéyó ña̱ kúni̱ Jehová kúú ña̱ va̱ʼaníka.

15. ¿Ndáa ki̱ʼva kivi na̱ʼún ña̱ kúʼvi̱-iniún xíniún Jehová?

¹⁵ ¿Ndáaña kivi keʼún ña̱ va̱ʼa na̱ʼún ña̱ kúʼvi̱-iniún xíniún Jehová? Ña̱ nu̱ú, kivi keʼún iin oración nu̱úra, nu̱ú ka̱ʼún xíʼinra ña̱ ndátaxiún miíún ndaʼa̱ra (Sal. 40:8). Tándi̱ʼi, xíniñúʼu ndakuchiún ña̱ va̱ʼa na̱ʼún nu̱ú ndiʼina ña̱ xa̱a̱ nda̱taxiún miíún ndaʼa̱ Jehová. Nda̱a̱ táki̱ʼva sa̱kuaʼayó nu̱ú párrafo iin, ki̱vi̱ ña̱ ndakuchiún ndiʼina kusi̱íní-ini. Ta mií ki̱vi̱ saá kúú ña̱ na̱ʼún ña̱ va̱ása keʼékaún ña̱ kútóo miíún chi kixáʼún kéʼún ña̱ kútóo Jehová (Rom. 14:8; 1 Ped. 4:1, 2). Sana ndákanixi̱níún ña̱ iin chiñu káʼnuní kúú ña̱yóʼo, ta ña̱ ndixa kúú ña̱ ndáyáʼvinívaña soo va̱ʼaní chindeétáʼanña xíʼún ña̱ si̱í koún. Ná kotoyó nda̱chun.

16. Nda̱a̱ táki̱ʼva káchi Salmo 41:12, ¿ndáa ña̱ va̱ʼa taxi Jehová ndaʼa̱ na̱ ndásakáʼnu miíra?

¹⁶ Jehová kúú ta̱ va̱ʼaníka-ini. Ni loʼo kúú ña̱ʼa ná taxiún ndaʼa̱ra ku̱a̱ʼáníkavaña taxira ndaʼún (Mar. 10:29, 30). Ni kininí káa nu̱ú ñuyǐví yóʼo taxivara ña̱ si̱í koún. Chi tá ná ndakuchiún ña̱yóʼo kúú ña̱ chindeétáʼan xíʼún ña̱ va̱ʼa kuchiñún ndasakáʼnúnra ndiʼi tiempo. Tá ná xa̱ún kuʼvi̱ka-iniún kuniúnra, va̱ása sandákoora ña̱ kuʼvi̱-inira kunira yóʼó ta kivi xa̱ún kutakún ndiʼi tiempo nda̱a̱ táki̱ʼva tákura (kaʼvi Salmo 41:12). e

17. ¿Ndáa ña̱ʼa kúú ña̱ kivi taxiún ndaʼa̱ Jehová?

 ¹⁷ Tá ná ndataxiún miíún ndaʼa̱ Jehová ta ndakuchiún, saá kúú ña̱ kivi taxiún u̱vi̱ ña̱ ndáyáʼviní ndaʼa̱ra. Ndakaʼán chi ndiʼi ña̱ va̱ʼa ña̱ kúúmiíún xíʼin ña̱ sákusi̱í-iniún, Jehová kúú ta̱ ta̱xiña ndaʼún. Ta miíún kivi taxiún u̱vi̱ ña̱ ndáyáʼvi ndaʼa̱ Jehová ta ña̱yóʼo sakúsi̱íníña-inira. Ña̱yóʼo kúú: ña̱ nda̱kú koo iniún xíʼinra ta kachíñún nu̱úra ndiʼi tiempo (Job 1:8; 41:11; Prov. 27:11). Ña̱ kúʼvi̱-iniún xíniún Jehová kúú ña̱ chindeétáʼan xíʼún ña̱ va̱ʼa ndakuchiún. Kǒoka inka ña̱ʼa ña̱ ndáyáʼviníka ña̱ kivi keʼún.

18. ¿Ndáa pregunta kúú ña̱ kivi ndakanixi̱níún xa̱ʼa̱?

¹⁸ Vitin ña̱ xa̱a̱ sa̱kuaʼayó xa̱ʼa̱ yóʼo, ¿á ndakuchiún vitin? Iinlá miíún kúú na̱ kivi ndaka̱xin keʼé ña̱yóʼo. Ta iin ña̱ kivi chindeétáʼan xíʼún ña̱ xa̱ún ndakuchiún kúú ña̱ ndakanixi̱níún xa̱ʼa̱ pregunta yóʼo: “¿Á xa̱a̱ íyo tu̱ʼvai̱ ña̱ ndakuchii̱?” (Hech. 8:36). Ndakaʼán xa̱ʼa̱ u̱ni̱ ña̱ ndáyáʼviní sa̱kuaʼayó nu̱ú artículo yóʼo. Ña̱ nu̱ú, kuʼvi̱-ini kuni ña̱ nda̱a̱ ña̱ sa̱kúaʼún xa̱ʼa̱ Ndióxi̱ xíʼin ña̱ va̱ʼa. Ña̱ u̱vi̱, kuʼvi̱-ini kuni ta̱ Jesucristo. Ña̱ u̱ni̱, kuʼvi̱-ini kuni Jehová. Kivi ndakanixi̱níún xa̱ʼa̱ pregunta yóʼo: “¿Á kúni̱i̱ ña̱ ná kixaa̱ ki̱vi̱ ña̱ ndiʼi na̱ yiví ná ka̱ʼa̱nna ña̱ nda̱a̱ ta keʼéna ña̱ va̱ʼa? ¿Á kúni̱i̱ ña̱ ná kaʼndachíñu ta̱ Jesucristo nu̱úi̱ ta kundikui̱n yichi̱ra? ¿Á kúni̱i̱ kachíñui̱ nu̱ú iinlá mií Jehová ta sakúsi̱í-inira?”. Tá va̱ʼa nda̱kuiún ndiʼi pregunta yóʼo, ¿nda̱chun ta̱ʼán ndakuchiún? ¿Ndáaña sási nu̱ún ña̱ keʼún ña̱yóʼo? (Hech. 16:33).

19. ¿Nda̱chun va̱ása xíniñúʼu kaka-iniún ña̱ xa̱ún ndakuchiún? Ka̱ʼa̱n xa̱ʼa̱ iin ejemplo (Juan 4:34).

¹⁹ Iin ña̱ kivi chindeétáʼan xíʼún ña̱ xa̱ún ndakuchiún kúú ña̱ ndakanixi̱níún xa̱ʼa̱ ejemplo ña̱ ni̱ka̱ʼa̱n ta̱ Jesús xa̱ʼa̱ (kaʼvi Juan 4:34). Ta̱ Jesús ni̱ka̱ʼa̱nra ña̱ nda̱a̱ táki̱ʼva íyo ña̱ xíxira saá íyo ña̱ keʼéra chiñu nu̱ú yivára. ¿Nda̱chun ni̱ka̱ʼa̱nra ña̱yóʼo? Saáchi ña̱ xíxiyó kúú ña̱ táxi ndee̱ ndaʼa̱yó. Ta̱ Jesús xi̱kunda̱a̱-inira ña̱ ndiʼi ña̱ káʼa̱n Jehová xíʼinyó keʼéyó, ña̱ va̱ʼa miívayó kúúña. Jehová va̱ása káʼa̱nra xíʼinyó ña̱ keʼéyó ña̱ʼa ña̱ kivi sáxo̱ʼvi̱ miíyó. Saáchi ña̱ kúni̱ra kúú ña̱ ná xa̱a̱yó ndakuchiyó (Hech. 2:38). Ña̱kán, tá ná ndakuchiún saá kúú ña̱ kándíxaún chiñu ña̱ xáʼnda Ndióxi̱ ta ku̱a̱ʼání ña̱ va̱ʼa ndakiʼún. Tá ná taxina comida ña̱ ya̱si̱n va̱ʼa kuxún, ¿á su̱ví ña̱ nda̱a̱ kúú ña̱ ndi̱ku̱n kama kuxúnña? Ki̱ʼva saá xíniñúʼu keʼún xíʼi̱n ña̱ ndakuchiún.

20. ¿Ndáaña sakúaʼayó nu̱ú inka artículo?

²⁰ ¿Ndáaña sási nu̱ú savana ña̱ xa̱a̱na ndakuchina? Sana ndákanixi̱nína ña̱ ta̱ʼán koo tu̱ʼvana. Ña̱ ndataxiyó miíyó ndaʼa̱ Jehová ta ndakuchiyó, iin ña̱ ndáyáʼviní kúú ña̱yóʼo. Ña̱kán ya̱chi̱ka vií ndakanixi̱níún, ta xa̱a̱ ya̱chi̱ka chika̱ún ndee̱ ña̱ koo tu̱ʼvaún ña̱ keʼún ña̱yóʼo. Soo, tá xa̱a̱ kúni̱ún ndakuchiún, ¿ndáaña chindeétáʼan xíʼún ña̱ xa̱ún ndakuchiún? Nu̱ú inka artículo sakúaʼayó xa̱ʼa̱ ña̱yóʼo.