Pregunta ña̱ kéʼé na̱ káʼvi tutu yóʼo
Ta̱ ta̱a ta̱ ni̱ka̱ʼa̱nna xíʼin tindaʼa̱ xíʼin ñá Rut, ¿nda̱chun ni̱ka̱ʼa̱nra ña̱ tá ná tindaʼa̱ra xíʼin ñáyóʼo kivi kindaana herencia ña̱ kúúmiíra? (Rut 4:1, 6).
Tá tiempo xi̱naʼá, tá iin ta̱a ni̱xi̱ʼi̱ra ta kǒo se̱ʼera níxi̱yo, ¿ndáaña kundoʼo ñuʼúra? ¿Ndáaña kuu xíʼin na̱ veʼera? Ndiʼi ña̱yóʼo nu̱ú ley ña̱ ta̱xi Ndióxi̱ ndaʼa̱ ta̱ Moisés káʼa̱nña xa̱ʼa̱ña.
Tá iin ta̱a xi̱kuma̱ní xu̱ʼún ndaʼa̱ra ta kúni̱ra xi̱kóra ñuʼúra á ni̱xi̱ʼi̱ra, iin ñanira á iin na̱ veʼe yatinra kúú na̱ kivi ndakiʼin ña̱yóʼo á ndasatánaña. Tasaá ña̱ ñuʼú yóʼo ndiʼi tiempo kooña kuenta na̱ veʼena (Lev. 25:23-28; Núm. 27:8-11).
¿Ndáaña xi̱keʼéna tiempo xi̱naʼá ña̱ va̱ása ndiʼi-xa̱ʼa̱ ki̱vi̱ ta̱ ta̱a ta̱ ni̱xi̱ʼi̱ yóʼo? Ñanira kúú ta̱ kivi tindaʼa̱ xíʼin ñá síʼira ñá ki̱ndoo ña̱ va̱ʼa kaku se̱ʼeñá ta ta̱ loʼo se̱ʼeñá ta̱ kaku yóʼo ndakiʼinra ki̱vi̱ra xíʼin herencia ña̱ ki̱ndoo. Tasaá ke̱ʼéna xíʼin ñá Rut, ñáyóʼo xi̱niñúʼu tindaʼa̱ñá xíʼin iin ñani yiíñá á iin ta̱ veʼe yatin yiíñá. Ta ña̱yóʼo chindeétáʼan xíʼin ñá ni̱xi̱ʼi̱ yií ña̱ kǒo kuma̱ní nda̱a̱ ni iin ña̱ʼa nu̱úñá (Deut. 25:5-7; Mat. 22:23-28).
Ná ndakanixi̱níyó xa̱ʼa̱ ña̱ ndo̱ʼo ñá Noemí, ñáyóʼo ni̱xi̱yoñá xíʼin ta̱ Elimélec. Soo tá ni̱xi̱ʼi̱ ta̱yóʼo xíʼin u̱vi̱ saá na̱ se̱ʼeñá, kǒoka nda̱a̱ ni iin ta̱a níxi̱yo ña̱ kundaarañá (Rut 1:1-5). Tá ndi̱kó ñá Noemí ñuu Judá, ni̱ka̱ʼa̱nñá xíʼin xa̱nuñá ñá Rut ña̱ ná ka̱ʼa̱nñá xíʼin ta̱ Boaz iin ta̱ xi̱kuu táʼan yatin ta̱ Elimélec ná ndasatára ñuʼú yiíñá (Rut 2:1, 19, 20; 3:1-4). Soo ta̱ Boaz xi̱kunda̱a̱-inira ña̱ ni̱xi̱yo iin táʼan yatinkana ta̱ xi̱kuumií derecho ña̱ ndasatá ña̱yóʼo (Rut 3:9, 12, 13). Nu̱ú Biblia káʼa̱nña xa̱ʼa̱ ta̱yóʼo.
Tá xa̱ʼa̱ nda̱kanixi̱níra ña̱ ndasatára ñuʼú yóʼo (Rut 4:1-4). Saáchi xi̱kunda̱a̱-inira ña̱ xa̱a̱ chéení ñá Noemí ta va̱ása kivika koo se̱ʼeñá ña̱ ndakiʼinna herencia ta̱ Elimélec. Ni xi̱kunda̱a̱-inira ña̱ ku̱a̱ʼání xu̱ʼún kuniñúʼura ña̱ ndasatára ñuʼú yóʼo, soo kuenta miívara xa̱a̱ña kooña.
Soo tá ni̱ka̱ʼa̱nna xíʼin ta̱ ta̱a yóʼo ña̱ tindaʼa̱ra xíʼin ñá Rut, ni̱ka̱ʼa̱nra ña̱ va̱ása ndasatákara ñuʼú yóʼo saáchi ni̱ka̱ʼa̱nra xíʼinna: “Va̱ása kivi ndasatái̱ña saáchi kivi ndiʼi-xa̱ʼa̱ herencia ña̱ kúúmiíi̱” (Rut 4:5, 6). ¿Nda̱chun va̱ása níxiinkara ndasatára ñuʼú yóʼo?
Tá ta̱ ta̱a yóʼo á iin táʼan yatinna nítindaʼa̱ xíʼin ñá Rut ta kaku se̱ʼeñá, se̱ʼeñá ta̱ kaku yóʼo kúú ta̱ ndakiʼin ñuʼú ta̱ Elimélec. Ña̱kán, ¿ndáa ki̱ʼva ndiʼi-xa̱ʼa̱ herencia ta̱ ta̱a yóʼo tá ná tindaʼa̱ra xíʼin ñá Rut? Biblia va̱ása káʼa̱nvíña xa̱ʼa̱ ña̱yóʼo, soo ná kotoyó nda̱chun kǒo níxiinra tindaʼa̱ra xíʼin ñá Rut.
Ña̱ nu̱ú, sana nda̱kanixi̱níra ña̱ ku̱a̱ʼání xu̱ʼún sandíʼi-xa̱ʼa̱ra. Saáchi se̱ʼe ñá Rut na̱ kaku, na̱yóʼo kúú na̱ ndakiʼin ñuʼú ta̱ Elimélec ta su̱ví miíra ndakiʼinña.
Ña̱ u̱vi̱, xi̱niñúʼu taxira ña̱ xíniñúʼu ñá Noemí xíʼin ñá Rut.
Ña̱ u̱ni̱, tá ná kakuka se̱ʼe ñá Rut xíʼin ta̱ ta̱a yóʼo, herencia ña̱ kúúmiíra ndataʼvíña ndakiʼin na̱ se̱ʼena na̱ kaku xíʼin na̱ se̱ʼera na̱ xa̱a̱ kúúmiíra tá ya̱chi̱.
Ña̱ ku̱mí, tá ta̱ ta̱a yóʼo kǒoka inka se̱ʼera níxi̱yo soo ka̱ku se̱ʼera xíʼin ñá Rut. Ña̱ loʼo yóʼo ndakiʼinña herencia ta̱ Elimélec xíʼin herencia miíra. Ta ndiʼi herencia ña̱ kúúmiíra kindo̱oña ndaʼa̱ ta̱ loʼo ta̱ ndakiʼin ki̱vi̱ ta̱ Elimélec ta su̱ví ta̱ ndakiʼin ki̱vi̱ miíra. Ta̱ ta̱a yóʼo va̱ása níxiinra chindeétáʼanra xíʼin ñá Noemí chi va̱ása níxiinra ndiʼi-xa̱ʼa̱ herencia ña̱ kúúmiíra. Va̱ʼaka ni̱ka̱ʼa̱nra xíʼin ta̱ Boaz ta̱ kúú táʼan yatinna ña̱ ná ndasatára ñuʼú yóʼo. Ta ka̱ndíxava ta̱ Boaz keʼéra ña̱yóʼo, saáchi ta̱xira ña̱ ná kunúu ki̱vi̱ ta̱ Elimélec xíʼin herenciara (Rut 4:10).
Ta̱ ta̱a yóʼo va̱ása níxi̱kuni̱ra sandáya̱ʼara herenciara ndaʼa̱ inkana chi xi̱kuni̱ra ña̱ kuenta miíra kooña, ta xíʼin ña̱yóʼo ni̱na̱ʼa̱ra ña̱ iinlá xa̱ʼa̱ miíra xi̱ndi̱ʼi̱-inira. Soo ndiʼi ña̱ ke̱ʼéra yóʼo kǒo níchindeétáʼanvíña xíʼinra saáchi kǒo na̱ ndákaʼánka xa̱ʼa̱ra. Ta̱ ta̱a yóʼo kǒo ña̱ va̱ʼaví níndakiʼinra saáchi kǒo ki̱vi̱ra níka̱ʼyí nu̱ú Biblia. Soo nda̱kiʼinva ta̱ Boaz ña̱ va̱ʼa xa̱ʼa̱ ña̱ ke̱ʼéra, saáchi ti̱xin na̱ veʼera ki̱xi ta̱ Jesucristo. Ta̱ ta̱a yóʼo kǒo ña̱ va̱ʼaví níndakiʼinra, saáchi kǒo níxiinra chindeétáʼanra xíʼin na̱ nda̱ʼví (Mat. 1:5; Luc. 3:23, 32).
