ÑUYǏVÍ nu̱ú íyoní tu̱ndóʼo va̱ása kívi koo táxinyó. Sava yichi̱ va̱ʼa loʼo íyoyó, soo sava kíxa̱a̱ ña̱ʼa ña̱ sándi̱ʼi̱-iniyó. ¿Ndáa texto kivi chindeé miíyó ña̱ kǒo kundi̱ʼi̱ní-iniyó? ¿Ndáa ki̱ʼva va̱ʼa chindeéyó inkana ña̱ ná kǒo ndoʼona saá?

Ña̱ va̱ʼa ndixa táxin kooyó xíniñúʼu kǒo kundi̱ʼi̱ní-iniyó ta va̱ʼa kuniyó. Xíniñúʼu koo migoyó na̱ va̱ʼa ini. Soo mií ña̱ xíniñúʼu va̱ʼaka kúú ña̱ kutáʼan va̱ʼayó xíʼin Ndióxi̱ ña̱ va̱ʼa ná kǒo kundi̱ʼi̱ní-iniyó. Ná kotoyó ndáa ki̱ʼva keʼéyóña.

Tá xíniso̱ʼoyó chiñu xáʼnda Jehová, saá náʼa̱yó ña̱ kándíxayóra ta kúni̱yó vií kutáʼanyó xíʼinra (Jer. 17:7, 8; Sant. 2:22, 23). Tasaá kúú ña̱ kúyatinka Ndióxi̱ nu̱úyó ta táxira bendición ndaʼa̱yó. Isaías 32:17 káchiña: “Tá kéʼéyó ña̱ nda̱kú táxin kooyó, tá kéʼéyó ña̱ nda̱kú saá kúú ña̱ kǒo ni iin ña̱ʼa sandi̱ʼi̱-iniyó ndiʼi tiempo”. Ña̱kán tá ná kuniso̱ʼoyó ña̱ káʼa̱n Jehová xíʼin ndiʼi níma̱yó, kǒo ña̱ʼa sandi̱ʼi̱-iniyó chi va̱ʼaní kuniyó (Is. 48:18, 19).

Ña̱ va̱ʼa táxin kooyó ndiʼi tiempo, Jehová táxira inka ña̱ chindeé táʼan xíʼinyó: ña̱ espíritu santo (Hech. 9:31).

Tá ni̱ka̱ʼa̱n ta̱ Pablo xa̱ʼa ña̱ va̱ʼa ña̱ kúúmií espíritu, ña̱ u̱ni̱ ni̱ka̱ʼa̱nra xa̱ʼa kúú ña̱ táxin kooyó (Gál. 5:22, 23). Xa̱ʼa ña̱yóʼo tá ndixa kúni̱yó táxin kooyó, xíniñúʼu taxiyó ná chindeé táʼan espíritu santo xíʼinyó. Ná sakuaʼayó xa̱ʼa u̱vi̱ ña̱ʼa ña̱ xíniñúʼu keʼéyó ña̱ va̱ʼa chindeé táʼan espíritu santo xíʼinyó.

 Ña̱ nu̱ú, xíniñúʼu kaʼviyó tu̱ʼun Ndióxi̱ (Sal. 1:2, 3). Tá ndákanixi̱níyó xa̱ʼa ña̱ káʼviyó, ña̱ espíritu santo chíndeé táʼanña xíʼinyó ña̱ kúnda̱a̱-iniyó ndáaña ndákanixi̱ní Jehová xa̱ʼa ndiʼi ña̱ʼa. Tá kúú ña̱, sákuaʼayó ndáa ki̱ʼva kéʼéra ña̱ táxin íyo nu̱ú íyora, ta saátu nda̱chun ndáyáʼviní ña̱yóʼo nu̱úra. Tá ná keʼéyó ña̱ káʼa̱n tu̱ʼunra va̱ʼaníka xa̱a̱yó kundooyó (Prov. 3:1, 2).

Ña̱ u̱vi̱, xíniñúʼu ka̱ʼa̱nyó xíʼin Jehová ta ndukúyó ná taxira espíritu santo ndaʼa̱yó (Luc. 11:13). Na̱ káʼa̱n xíʼin Jehová ná chindeé táʼanra xíʼinna, káʼa̱nra ña̱yóʼo xíʼinna: “Tasaá Ndióxi̱ taxira ña̱ koo va̱ʼa inindó ta ña̱yóʼo kundaaña níma̱ndó xíʼin ña̱ ndákani-inindó, ndóʼó na̱ ndíku̱n ta̱ Jesucristo” (Filip. 4:6, 7). Ta ná ndukúníyó ña̱ taxira espíritu santo ndaʼa̱yó, taxira ña̱ va̱ʼaní kooyó chi saá kéʼéra xíʼin na̱ kúú migora (Rom. 15:13).

Xa̱a̱ ku̱a̱ʼání na̱ yiví chíndeé táʼan ña̱ Biblia xíʼin ta va̱ʼaní kítáʼanna xíʼin Jehová, kǒo ña̱ sándi̱ʼi̱-inina ta va̱ʼa kítáʼanna xíʼin inka na̱ yiví. Ná ka̱ʼa̱nyó xa̱ʼa savana.

Ti̱xin congregación tiempo vitin íyo na̱ yiví na̱ kamaní xi̱sa̱a̱ tá ya̱chi̱, soo vitin va̱ʼaníka na̱ yiví kúúna, kúeení-inina, kǒo kútóona kanitáʼanna ta va̱ʼaní inina * (Prov. 29:22). Ná ka̱ʼa̱nyó xa̱ʼa u̱vi̱ na̱ testigo Jehová na̱ chi̱ndeé táʼanna xíʼin ña̱ va̱ʼa na̱samana ña̱ kéʼéna ta sa̱kuaʼana ña̱ vií keʼéna xíʼin inka na̱ yiví.

Xa̱ʼa ña̱ ndeéní xi̱sa̱a̱ ta̱ David nina ña̱ va̱ása va̱ʼa xi̱ka̱ʼa̱nra xíʼin na̱ yiví. Tá kúma̱níka koora Testigo xi̱kutóoníra ka̱ʼa̱nra ña̱ va̱ása va̱ʼa xa̱ʼa na̱ hermano, ta va̱ása to̱ʼó níxi̱yora xíʼin na̱ veʼera. Soo iin ki̱vi̱ ki̱ʼinra kuenta ña̱ xíniñúʼu nasamara. ¿Ndáaña chi̱ndeé táʼan xíʼinra ña̱ na̱samara? Miíra káʼa̱n ña̱yóʼo: “Ki̱xaʼíi̱ kéʼíi̱ ña̱ káʼa̱n Biblia. Ta xa̱ʼa ña̱yóʼo, va̱ʼaníka ki̱xaʼándi̱ íxato̱ʼó táʼanndi̱ xíʼin na̱ veʼi̱”.

Táki̱ʼva xa̱ʼnu ñá Rachel veʼeñá, saá  ki̱xaʼáñá kéʼéñá. Miíñá káʼa̱n ña̱yóʼo: “Nda̱a̱ vitin íxayo̱ʼvi̱kaña xíʼi̱n ña̱ kǒo sa̱a̱ kamai̱ chi na̱ veʼi̱ nina xi̱kanitáʼanna”. ¿Ndáaña ke̱ʼéñá ña̱ va̱ʼa na̱samañá? Miíñá káʼa̱n: “Nina káʼi̱n xíʼin Jehová ña̱ ná chindeéra yi̱ʼi̱”.

Xíʼin ña̱ sa̱kuaʼayó xa̱ʼa ta̱ David xíʼin ñá Rachel náʼa̱ña nu̱úyó ña̱ va̱ʼaní tá kéʼéyó ña̱ káʼa̱n Biblia, ta káʼa̱nyó xíʼin Ndióxi̱ ña̱ ná chindeé táʼan espíritu santo xíʼinyó. Ni kininí káa ña̱ ñuyǐví ndóoyó vitin, kiviva kundoo va̱ʼayó xíʼin na̱ veʼeyó ta saátu xíʼin na̱ congregación ta kǒo ña̱ sándi̱ʼi̱-iniyó. Soo saátu Jehová káʼa̱nra xíʼinyó ña̱ ‘va̱ʼa kutáʼanyó xíʼin ndiʼi na̱ yivíʼ (Rom. 12:18). ¿Ndáa ki̱ʼva keʼéyó ña̱yóʼo? Ta ¿ndáaña va̱ʼa ndakiʼinyó tá chíka̱a̱yó ndeé ña̱ va̱ʼa kutáʼanyó xíʼin ndiʼina?

Tá ku̱a̱ʼa̱nyó nátúʼunyó veʼe tá veʼe chíndeé táʼanyó xíʼin na̱ yiví ña̱ kunda̱a̱-inina xa̱ʼa Reino Ndióxi̱ (Is. 9:6, 7; Mat. 24:14). Ta kúsi̱í-iniyó ña̱ ku̱a̱ʼá na̱ yiví kándíxa ña̱yóʼo. Ta ña̱yóʼo chíndeé táʼanña xíʼin na̱ yiví ña̱ va̱ása kundi̱ʼi̱níka-inina á sáa̱na xa̱ʼa ndiʼi ña̱ kúu. Vitin íyo iin ña̱ ndátuna koo chí nu̱únínu ta kándíxana ña̱ tu̱ʼun yóʼo: “Nandukú ña̱ va̱ʼa ta kundiku̱n sa̱tá ña̱yóʼo” (Sal. 34:14).

Tá xáʼa̱nyó nu̱ú na̱ yiví ña̱ yichi̱ nu̱ú su̱ví ndiʼivína kútóo sakuaʼa xa̱ʼa Ndióxi̱ (Juan 3:19). Soo ni saá ña̱ espíritu Ndióxi̱ chíndeé táʼan xíʼinyó ña̱ viíní natúʼunyó xíʼin na̱ yiví ta to̱ʼó ka̱ʼa̱nyó xíʼinna. Tá kéʼéyó ña̱yóʼo saá kúú ña̱ ndíku̱nyó ña̱ ni̱ka̱ʼa̱n ta̱ Jesús: “Tá ni̱ki̱ʼvindó veʼena chindeéndóna; tá va̱ʼa ndákuiinna yuʼúndó, ná ndoona xíʼin tu̱ʼun va̱ʼa ña̱ ku̱a̱ʼa̱n xíʼinndó; soo tá va̱ása xíínna kuniso̱ʼona ndakiʼinndóña ku̱ʼu̱n xíʼinndó” (Mat. 10:11-13). Tá kéʼéyó ña̱ ni̱ka̱ʼa̱n ta̱ Jesús, kǒo ku̱a̱chi koo xíʼin na̱ yiví na̱ ni̱xa̱a̱yó nátúʼunyó xíʼin, ta sana nda̱a̱ kivi ndikóyó nu̱úna inka yichi̱ ña̱ chindeé táʼanyó xíʼinna.

Miíyó na̱ ndásakáʼnu Ndióxi̱ viíní káʼa̱nyó xíʼin na̱ chíñu, ni va̱ása xíínna taxina ña̱ keeyó natúʼunyó xa̱ʼa Ndióxi̱. Ná ka̱ʼa̱nyó xa̱ʼa iinña. Iin ta̱ chíñu chí ñuu África kǒo xíínra kunira na̱ táʼanyó ta kǒo xíínra taxira ña̱ kuva̱ʼa iin veʼe nu̱ú ndakutáʼanna. Xa̱ʼa ña̱ kúni̱na ndasaviína ku̱a̱chi, chi̱ndaʼána iin ta̱ xi̱kuu misionero ña̱ ku̱ʼu̱nra ka̱ʼa̱nra xíʼin iin ta̱ chíñu káʼnu xa̱ʼa ña̱ chiñu ña̱ kéʼé na̱ táʼanyó chí ñuu Londres (Inglaterra). ¿Ndáaña ku̱u?

Ta̱ hermano káchira: “Tá ni̱xa̱i̱ ta xi̱nii̱ ti̱ko̱to̱ ñá ndákiʼin na̱ yiví veʼe kán ta xi̱nii̱ ña̱ ndíxiñá ti̱ko̱to̱ ña̱ ndíxi iin na̱ sa̱kuaʼi̱ tu̱ʼun. Xa̱ʼa ña̱yóʼo chi̱ndéi̱ñá tu̱ʼun miíñá. Ta nda̱kanda̱ní-iniñá ta ni̱nda̱ka̱tu̱ʼunñá yi̱ʼi̱ nda̱chun ni̱xa̱i̱ kán. Viíní ni̱ka̱ʼi̱n xíʼinñá ña̱ kúni̱i̱ ka̱ʼi̱n xíʼin ta̱ chíñu káʼnu. Ñákán ka̱nañára xíʼin teléfono ta ta̱kán ki̱tara ta chi̱ndeéra yi̱ʼi̱ tu̱ʼun miíra. Tándi̱ʼi va̱ʼaní xi̱niso̱ʼora ña̱ ni̱ka̱ʼi̱n xíʼinra xa̱ʼa ña̱ kéʼé na̱ Testigo”.

Ña̱ to̱ʼóní ni̱ka̱ʼa̱n ta̱ hermano yóʼo xíʼin ta̱ chíñu chi̱ndeé táʼanña xíʼin ta̱ chíñu yóʼo ña̱ kǒo sáa̱ka-inira xínira na̱ hermano. Tá ni̱ya̱ʼa tiempo, ta̱ chíñu ñuu kán ki̱xaʼára táxira ña̱ keʼéna veʼe nu̱ú ndakutáʼanna. Ni̱kusi̱íní-ini na̱ hermano. Yóʼo kúnda̱a̱-iniyó tá to̱ʼó kéʼéyó xíʼin na̱ yiví kǒo ku̱a̱chi kixi nu̱úyó.

Tiempo vitin miíyó na̱ ndásakáʼnu Ndióxi̱ táki̱ʼva káa iin ñuʼú livi saá káa ña̱ tákuyó chi táxin íyoyó. Tá ndiʼiyó ná chika̱a̱ ndée ña̱ keʼéyó ña̱ kúni̱ Jehová va̱ʼaní kundooyó saá. Soo iin ña̱ ndáyáʼvika kúúña tá saá ná keʼéyó Jehová taxira bendición ndaʼa̱yó ta chí nu̱únínu si̱íní kooyó ndiʼi tiempo (2 Ped. 3:13, 14).