1, 2. a) ¿Ndáa ejemplo na̱ʼa̱ nu̱úyó ña̱ xíniñúʼu sandi̱kona-iniyó ta saátu ña̱ va̱ʼa sandi̱koyó-ini inkana? b) ¿Ndáaña ndóʼo sava na̱ va̱lí?

MIÍYÓ na̱ yiví, nda̱a̱ tá ka̱kuyó xíniñúʼuyó ña̱ sandi̱kona-iniyó ta saátu ña̱ va̱ʼa sandi̱koyó-ini inkana. Tá iin na̱ va̱lí nda̱kavana ta tu̱kue̱ʼe̱ xa̱ʼa̱na tá xíkana sásikína, xákuna ta xínuna ku̱a̱ʼa̱nna nu̱ú yivána á siʼína. Na̱yóʼo va̱ása kivi sandáʼana xa̱ʼa̱na soo kiviva sandi̱kona-inina. Ndáka̱tu̱ʼunnana ndáaña ndo̱ʼona ta númindaanana ta vií káʼa̱nna xíʼinna ta ndákatana nu̱ú tu̱kue̱ʼe̱na ta saátu súkúndáana iin ti̱ko̱to̱ nu̱úña. Saá na̱ va̱lí yóʼo va̱ása xákukana ta nda̱a̱ sana kivi ku̱ʼu̱n tukuna kusíkína. Tá ni̱ya̱ʼa tiempo ndúva̱ʼa nu̱ú tu̱kue̱ʼe̱na.

² Soo íyo na̱ va̱lí na̱ ndeéníka xóʼvi̱. Sava na̱ va̱lí yóʼo kéʼéna ña̱ kini xíʼinna, iin yichi̱ á ku̱a̱ʼá ku̱i̱ya̱. Ni loʼo a ku̱a̱ʼá kúúña, ña̱yóʼo sáxo̱ʼvi̱ña miína. Sava na̱ ke̱ʼé ña̱ kini yóʼo, táxina ku̱a̱chi xa̱ʼa̱na ta ndákiʼinna castigo, soo inkana va̱ása kúnda̱a̱-inina xa̱ʼa̱na, ta ndákanixi̱nína ña̱ kǒo ña̱ kundoʼona. Soo, ni kama ná ndakiʼinna castigo, na̱ ke̱ʼéna ña̱ kini xíʼin, xóʼvi̱na ni tá xa̱a̱ chéena.

3. a) Nda̱a̱ táki̱ʼva káchi 2 Corintios 1:3, 4, ¿ndáaña kúni̱ Jehová? b) ¿Ndáa pregunta kúú ña̱ ndakuiinyó?

³ ¿Ndáaña kivi chindeétáʼan xíʼin iin na̱ cristiano na̱ ke̱ʼéna ña̱ kini xíʼin tá válína ta nda̱a̱ vitin xóʼvi̱na? (Kaʼvi 2 Corintios 1:3, 4). * Jehová kúni̱níra ña̱ ná kuʼvi̱-iniyó kuniyó na̱yóʼo ta ná sandi̱koyó-inina. Ña̱kán ná ka̱ʼa̱nyó xa̱ʼa̱ u̱ni̱ pregunta: ¿Nda̱chun xíniñúʼu sandi̱koyó-ini  na̱ ke̱ʼéna ña̱ kini xíʼin? ¿Yukú na̱ kivi sandi̱ko-inina? Ta, ¿ndáaña kivi keʼéyó ña̱ sandi̱koyó-inina?

4, 5. a) ¿Nda̱chun ndáyáʼviní ndakaʼányó ña̱ xa̱a̱ síín íyo na̱ va̱lí nu̱ú na̱ náʼnu? b) ¿Ndáaña ndóʼo sava na̱ va̱lí ña̱kán va̱ása kándíxana inkana?

⁴ Sava na̱ ke̱ʼéna ña̱ kini xíʼin tá válína xíniñúʼukana ña̱ sandi̱koyó-inina ni xa̱a̱ ni̱ya̱ʼa ku̱a̱ʼání ku̱i̱ya̱. Ña̱ va̱ʼa kunda̱a̱-iniyó nda̱chun, siʼna ná ndákaʼányó chi na̱ va̱lí xa̱a̱ síín íyona nu̱ú na̱ náʼnu ña̱kán tá kéʼéna ña̱ kini xíʼinna xa̱a̱ síín ña̱ ndóʼona. Ná kotoyó nda̱chun.

⁵ Na̱ va̱lí xíniñúʼu va̱ʼaní kutáʼanna xíʼin na̱ sákuaʼnu-ñaʼá ta saátu xíniñúʼu kandíxanana. Tíxa̱ʼvi ña̱yóʼo na̱ va̱lí va̱ʼa kúnina ta saátu sákuaʼana kítáʼan va̱ʼana xíʼin na̱ kúʼvi̱-ini xíniñaʼá ta kándíxanana (Sal. 22:9). Ku̱a̱ʼání yichi̱ mií ti̱xin veʼe na̱ va̱lí yóʼo kéʼéna ña̱ kini xíʼinna, ta na̱ kéʼé ña̱yóʼo sava kúúna na̱ veʼe yatinna á na̱ migona. ¿Ndáaña ndóʼo iin na̱ va̱lí ta kúu ña̱yóʼo? Ña̱ kivi ixayo̱ʼvi̱ña xíʼin na̱ va̱lí yóʼo ña̱ kandíxana inkana, ni tá ná ya̱ʼa ku̱a̱ʼá ku̱i̱ya̱.

6. ¿Nda̱chun xóʼvi̱ na̱ va̱lí tá kéʼéna ña̱ kini xíʼinna?

⁶ Na̱ va̱lí vitání íyo inina. Ta ña̱ kéʼéna ña̱ kini xíʼinna iin ña̱ sáxo̱ʼvi̱-ñaʼá kúúña. Ki̱vi̱ íxandúxana xíʼin na̱ va̱lí ña̱ keʼéna ña̱ kini xíʼinna xóʼvi̱na xa̱ʼa̱ ña̱yóʼo, chi ta̱ʼán kuaʼnuna ta ni kǒo ndákanixi̱nína xa̱ʼa̱ ña̱ ti̱ndaʼa̱na á ña̱ ku̱su̱nna xíʼin inkana. Ña̱ kéʼéna ña̱ kini xíʼin na̱ va̱lí násamaña ña̱ ndákanixi̱nína xa̱ʼa̱ ña̱ kísi̱ na̱ yiví xíʼin táʼanna, xa̱ʼa̱ miína á xa̱ʼa̱ na̱ yiví na̱ kúni̱ kuyatin nu̱úna.

7. a) ¿Nda̱chun va̱ása íxayo̱ʼvi̱ña xíʼin na̱ kéʼé ña̱ kini ña̱ sandáʼvina na̱ va̱lí, ta nda̱saa kivi keʼénaña? b) ¿Ndáaña kivi kundoʼo na̱ va̱lí xíʼin ña̱ vatá yóʼo?

⁷ Na̱ va̱lí ta̱ʼán sakuaʼana vií ndakanixi̱nína, ni ña̱ kiʼinna kuenta xa̱ʼa̱ ña̱ kivi kundoʼona (1 Cor. 13:11). Xa̱ʼa̱ ña̱yóʼo va̱ása íxayo̱ʼvi̱ña xíʼin inkana ña̱ sandáʼvina na̱ va̱lí ña̱ keʼéna ña̱ kini xíʼinna. Káʼa̱nna ña̱ vatá xíʼinna ña̱ sáxo̱ʼvi̱-ñaʼá, tá kúú ña̱ miína kúú na̱ kúúmií ku̱a̱chi xa̱ʼa̱ ña̱ ke̱ʼéna ña̱ kini xíʼinna, á kéʼéna ña̱yóʼo xíʼinna chi kúni̱níñaʼána ta va̱ása ka̱ʼa̱nna xíʼin inkana xa̱ʼa̱ña chi ni iinna va̱ása kandíxañaʼá. Ña̱kán ni ná ya̱ʼa ku̱a̱ʼá ku̱i̱ya̱, na̱ ke̱ʼéna ña̱ kini xíʼin va̱ása kunda̱a̱-inina ña̱ kúúña ña̱ vatá. Sana na̱ va̱lí yóʼo ndákanixi̱nína ña̱ íyo yaku̱a̱na, á ña̱ va̱ása ndáyáʼvina nu̱ú inkana á ña̱ nda̱a̱ ni iinna va̱ása xíniñúʼu kuʼvi̱-ini kuniñaʼá.

8. ¿Nda̱chun kivi kandíxayó ña̱ kuchiñu Jehová sandi̱kora-ini na̱ xóʼvi̱?

⁸ Xa̱ʼa̱ ña̱ kúnda̱a̱-iniyó ña̱yóʼo, va̱ása ndákanda̱-iniyó ña̱ ku̱a̱ʼání ku̱i̱ya̱ xóʼvi̱ na̱ va̱lí xa̱ʼa̱ ña̱ ke̱ʼéna ña̱ kini xíʼinna. Iin ku̱a̱chi káʼnuní kúú ña̱yóʼo. Xa̱ʼa̱ ña̱ íyoní na̱ kéʼé ña̱ kini yóʼo kúnda̱a̱-iniyó ña̱ ndóʼoyó tiempo nu̱ú ndíʼi, nu̱ú íyo na̱ yiví na̱ va̱ása kúʼvi̱ka-ini xíni inkana nu̱ú íyo ku̱a̱ʼání na̱ keʼé ña̱ kini (2 Tim. 3:1-5, 13). Nina ña̱ va̱ása va̱ʼa kúú ña̱ kéʼé ta̱ Ndi̱va̱ʼa, ta ndáʼviní na̱ kéʼé ña̱ kútóora. Soo Jehová íyoníka ndee̱ra nu̱ú ta̱ Ndi̱va̱ʼa xíʼin na̱ yiví na̱ kéʼé ña̱ kini. Saátu xíni̱ va̱ʼa Ndióxi̱ ndáaña kúú ña̱ kéʼé ta̱ Ndi̱va̱ʼa. Xa̱ʼa̱ ña̱yóʼo kúnda̱a̱-iniyó ña̱ kíʼinvara kuenta xa̱ʼa̱ ña̱ xóʼvi̱yó ta saátu ña̱ kivi sandi̱kora-iniyó. Kúsi̱íní-iniyó ña̱ ndásakáʼnuyó Ndióxi̱ “ta̱ sándi̱ko-iniyó, sándi̱kora-iniyó tá yáʼayó nu̱ú ku̱a̱ʼání tu̱ndóʼo tasaá va̱ʼatu sandi̱ko miíyó ini inka na̱ yáʼa nu̱ú nda̱a̱ ndáaka tu̱ndóʼo chi mií Ndióxi̱ chíndeé miíyó” (2 Cor. 1:3, 4). Ta, ¿ndáana xíniñúʼu Jehová ña̱ va̱ʼa sandi̱kora-iniyó?

9. Nda̱a̱ táki̱ʼva káchi ña̱ ka̱ʼyí ta̱ rey David nu̱ú Salmo 27:10, ¿ndáaña kéʼé Jehová xíʼin na̱ káchíñu nu̱úra chi na̱ veʼena sa̱ndákooñaʼána?

⁹ Na̱ va̱lí na̱ ke̱ʼéna ña̱ kini xíʼin chi na̱ yivána va̱ása níxindaana na̱yóʼo, á na̱ va̱lí na̱ xóʼvi̱ chi mií na̱ veʼena ke̱ʼé ña̱ kini xíʼinna, xíniñúʼunína ña̱ sandi̱koyó-inina. Ta̱ rey David, ku̱nda̱a̱-inira ña̱ mií Jehová kivi sandi̱ko-inina (kaʼvi Salmo 27:10). * Ka̱ndíxara ña̱ mií Ndióxi̱ kíʼin kuenta xíʼin na̱ káchíñu nu̱úra chi na̱ veʼena sa̱ndákooñaʼána. ¿Nda̱saa kéʼé Jehová ña̱yóʼo? Xíniñúʼura na̱ káchíñu nu̱úra. Na̱ congregación na̱ veʼeyó kúúna. Tá kúú ta̱ Jesús ni̱ka̱ʼa̱nra ña̱ na̱ ndásakáʼnu Ndióxi̱ xíʼinra kúúna ñanira, ku̱ʼvara á siʼíra (Mat. 12:48-50).

10. ¿Nda̱saa ni̱ka̱ʼa̱n ta̱ apóstol Pablo xa̱ʼa̱ chiñu ña̱ xi̱kuura anciano?

¹⁰ Ná ka̱ʼa̱nyó xa̱ʼa̱ ña̱ kúu ti̱xin congregación. Ta̱ apóstol Pablo iin anciano ta̱ ndeéní xi̱kachíñu xi̱kuura ta nda̱kú ni̱xi̱yo inira xíʼin Ndióxi̱, ta va̱ʼaní yichi̱ chi̱núura nu̱ú inkana. Nda̱a̱ mií Ndióxi̱ ni̱ka̱ʼa̱n xíʼinra ña̱ ná ka̱ʼa̱nra xíʼin na̱ cristiano ña̱ kundiku̱nna yichi̱ra nda̱a̱ táki̱ʼva ndíku̱n miíra yichi̱ ta̱ Cristo (1 Cor. 11:1). Iin yichi̱ ni̱ka̱ʼa̱nra xa̱ʼa̱ chiñu ña̱ kúúmiíra ña̱ kúúra anciano: “Va̱ʼa ni̱xi̱yo inindi̱ xíʼinndó, ndáa táki̱ʼva íyo iin ñaʼá ñá kúni̱ní xíni se̱ʼeñá” (1 Tes. 2:7). Na̱ anciano, na̱ ndáa na̱ congregación tiempo vitin, viíní káʼa̱nna xíʼin na̱ hermano ta náʼa̱na ña̱ kúni̱nínana tá xíniñúʼuna Biblia ña̱ sándi̱kona-inina.

11. ¿Ndáaña náʼa̱ nu̱úyó ña̱ su̱ví nda̱saa na̱ anciano kuití kivi sandi̱ko-ini inkana?

¹¹ Su̱ví nda̱saa na̱ anciano kuití kivi sandi̱ko-ini na̱ ke̱ʼéna ña̱ kini xíʼin. Ndiʼivayó xíniñúʼu kundiku̱n consejo yóʼo: “Chika̱a̱kandó ndee̱ ña̱ sandi̱kondó-ini táʼanndó” (1 Tes. 4:18). Ná hermana ná nda̱kú íyo ini xíʼin Ndióxi̱ kivi sandi̱koná-ini inka ná hermana. Nda̱a̱ mií Jehová íyora táki̱ʼva íyo iin ñaʼá ñá sándi̱ko-ini se̱ʼe (Is. 66:13). Ña̱ Biblia káʼa̱nña xa̱ʼa̱ ku̱a̱ʼá ná ñaʼá  ná chi̱ndeétáʼan xíʼin inka na̱ kúsuchí-ini (Job 42:11). Jehová kúsi̱í-inira xíʼin ná ñaʼá ná chíndeétáʼan xíʼin inkaka ná xóʼvi̱-ini. Sava yichi̱, na̱ anciano kivi nda̱ka̱tu̱ʼunna iin ñá hermana ñá íyo nda̱kú-ini xíʼin Ndióxi̱, á kivi chindeétáʼanñá xíʼin inkaka ná hermana ná xóʼvi̱. *

12. ¿Ndáaña kiʼinyó kuenta xíʼin tá chíndeétáʼanyó xíʼin iin na̱ hermano?

¹² Ña̱ ndixa kúúña, tá chíndeétáʼanyó xíʼin iin na̱ hermano, xíniñúʼu kiʼinyó kuenta ña̱ va̱ása nda̱ka̱tu̱ʼunyóna xa̱ʼa̱ iin ña̱ʼa ña̱ sana va̱ása kúni̱na ka̱ʼa̱nna xa̱ʼa̱ (1 Tes. 4:11). Ña̱kán, ¿ndáaña kivi keʼéyó ña̱ va̱ʼa sandi̱koyó-ini inka na̱ xíniñúʼuña? Ná kotoyó u̱ʼu̱n ña̱ káʼa̱n Biblia xa̱ʼa̱.

13. a) Nda̱a̱ táki̱ʼva káchi 1 Reyes 19:5-8, ¿nda̱saa chi̱ndeétáʼan ángel mií Jehová xíʼin ta̱ Elías? b) ¿Nda̱saa kivi kundiku̱nyó yichi̱ ta̱ ángel yóʼo?

¹³ Ná chindeétáʼanyó xíʼinna. Tá xi̱nu ta̱ profeta Elías chi íyo iin na̱ kúni̱ kaʼní-ñaʼá, nda̱kavaní-inira ta nda̱a̱ ni̱ka̱ʼa̱nra ña̱ kúni̱ra kuvira. Tasaá Jehová chi̱ndaʼára iin ángel ña̱ ná taxira ndeé ndaʼa̱ra. Ta̱ ángel yóʼo ta̱xira ña̱ʼa ña̱ kuxu ta̱ Elías, ta ni̱ka̱ʼa̱nra xíʼinra ná kuxura (kaʼvi 1 Reyes 19:5-8). * Ña̱ relato yóʼo íyo iin ña̱ ndáyáʼviní sánáʼa̱ña miíyó: sava yichi̱, ni iin ña̱ʼa loʼo kúú ña̱ kéʼéyó, kivi chindeétáʼanña xíʼin na̱ hermanoyó na̱ xóʼvi̱. Kivi taxiyó ña̱ kuxuna, á iin regalo á iin carta loʼo ndaʼa̱na, saá kunina ña̱ ndixa kúni̱níyóna ta ndíʼi̱-iniyó xa̱ʼa̱na. Kivi keʼéyó táʼan ña̱yóʼo tá íxayo̱ʼvi̱ña xíʼinyó ña̱ ka̱ʼa̱nyó xíʼinna xa̱ʼa̱ ña̱ xóʼvi̱na á xa̱ʼa̱ ña̱ ndóʼona.

14. ¿Ndáa inka ña̱ʼa sákuaʼayó xíʼin ña̱ ndo̱ʼo ta̱ Elías?

¹⁴ Ná chindeétáʼanyó xíʼin na̱ ke̱ʼéna ña̱ kini xíʼin ña̱ va̱ʼa kunina ta va̱ása yi̱ʼvína. Ná ka̱ʼa̱n tukuyó xa̱ʼa̱ ta̱ Elías. Jehová ta̱xi ndee̱ ndaʼa̱ra ña̱ va̱ʼa ku̱ʼu̱nra nda̱a̱ yukú Horeb, nu̱ú ke̱ʼéra iin pacto xíʼin na̱ ñuura tiempo xi̱naʼá. Tá ni̱xa̱a̱ ta̱ Elías kán, va̱ʼaní ku̱nira ta va̱ása níyi̱ʼvíkara nu̱ú na̱ kúni̱ kaʼní-ñaʼá. ¿Ndáa inka ña̱ʼa sákuaʼayó xíʼin ña̱yóʼo? Tá kúni̱yó chindeétáʼanyó xíʼin na̱ xóʼvi̱ xa̱ʼa̱ ña̱ ke̱ʼéna ña̱ kini xíʼinna, siʼna xíniñúʼu chindeéyóna ña̱ va̱ʼa kunina ta va̱ása yi̱ʼvína. Tá kúú na̱ anciano xíniñúʼu kunda̱a̱-inina ña̱ síínva ndóʼo iin iinna. Iin ñá hermana, sana va̱ʼa kúniñá ña̱ natúʼunñá tá xíʼiñá iin té tá íyoña ti̱xin veʼeñá, ta sana inkatuñá va̱ʼaka kúniñá tá natúʼunñá xíʼin na̱ anciano ti̱xin salón nu̱ú ndákutáʼanyó.

15, 16. ¿Ndáaña keʼéyó ña̱ kuniso̱ʼoyó tá nátúʼun iinna xíʼinyó?

¹⁵ Ná sakuaʼayó kuniso̱ʼoyó ña̱ káʼa̱nna xíʼinyó. Ña̱ Biblia táxiña consejo yóʼo ndaʼa̱yó: “Ndiʼindó xíniñúʼu sakuaʼandó kuniso̱ʼondó tá káʼa̱n inkana, ta kǒo ndakuiin kamandó” (Sant. 1:19). ¿Á xíniso̱ʼo va̱ʼayó tá nátúʼun iinna xíʼinyó? Sana ndakanixi̱níyó ña̱ táxin kooyó ta kotoyó nu̱ú na̱ ka̱ʼa̱n xíʼinyó ta va̱ása ndakuiinyó. Soo íyo inka ña̱ xíniñúʼu keʼéyó. Ná kotoyó ña̱ ke̱ʼé Jehová xíʼin ta̱ Elías. Tá na̱túʼun ta̱yóʼo xa̱ʼa̱ ña̱ sándi̱ʼi̱-inira, Jehová xi̱niso̱ʼovara ña̱ ni̱ka̱ʼa̱nra. Na̱kunda̱a̱-inira ña̱ yíʼviva ta̱yóʼo saáchi nda̱kanixi̱níra ña̱ iinlá miívara  íyo ta saátu ña̱ va̱ása ndáyáʼvi ña̱ ke̱ʼéra. Soo Jehová ni̱kuʼvi̱ní-inira xi̱nirara ta ke̱ʼéra sava ña̱ʼa ña̱ chi̱ndeétáʼanra xíʼinra. Saá ni̱na̱ʼa̱ra ña̱ ndixa xi̱niso̱ʼora ndiʼi ña̱ ni̱ka̱ʼa̱nra (1 Rey. 19:9-11, 15-18).

¹⁶ Tá xíniso̱ʼoyó ña̱ káʼa̱n na̱ ndo̱ʼo tu̱ndóʼo, ¿nda̱saa kivi na̱ʼa̱yó ña̱ kúʼvi̱-iniyó xíniyóna ta kúndáʼvi-iniyó xíniyóna? Sava xíniñúʼu vií ndaka̱xinyó tu̱ʼun ña̱ ka̱ʼa̱nyó xíʼinna. Kivi ka̱ʼa̱nyó ña̱yóʼo xíʼinna: “Kúsuchíní-inii̱ xa̱ʼa̱ ña̱ ndo̱ʼún ña̱yóʼo. Su̱ví ña̱ va̱ʼa kúú ña̱ kéʼéna saá xíʼin na̱ va̱lí”. Ta, ña̱ va̱ʼa kunda̱a̱-iniyó xíʼin ña̱ nátúʼunna xíʼinyó kivi ka̱ʼa̱nyó xíʼinna: “Tá ni̱ka̱ʼún ña̱yóʼo xíʼi̱n, ña̱yóʼo na̱kunda̱a̱-inii̱, ¿á saá íyoña?”. Tá ná ka̱ʼa̱nyó ña̱yóʼo, kunda̱a̱-inina ña̱ xíniso̱ʼoyó ña̱ káʼa̱nna ta ndixa kúni̱níyóna ta kúni̱yó kunda̱a̱-iniyó xíʼin ña̱ ndóʼona (1 Cor. 13:4, 7).

17. ¿Nda̱chun xíniñúʼu kuee koo iniyó ta kundatuyó ña̱ ka̱ʼa̱nna xíʼinyó ta va̱ása kama ndakuiinyó?

¹⁷ Xíniñúʼu kiʼinyó kuenta ña̱ kǒo ndakuiin kamayó. Va̱ása kama ndakuiinyó ta taxiyó consejo ndaʼa̱na tá túviyó ña̱ va̱ása va̱ʼa káʼa̱nna. Xíniñúʼu kúee koo iniyó ta kundatuyó. Tá ni̱ka̱ʼa̱n ta̱ Elías xíʼin Jehová, ni̱ka̱ʼa̱nra xa̱ʼa̱ ndiʼi ña̱ sándi̱ʼi̱-inira. Tasaá, tándi̱ʼi ta̱xi Jehová ndee̱ ndaʼa̱ra, soo tukuva ni̱ka̱ʼa̱n ta̱ Elías xíʼinra (1 Rey. 19:9, 10, 13, 14). Xíʼin ña̱yóʼo sákuaʼayó ña̱ saá ndóʼo na̱ táʼanyó, sava ku̱a̱ʼá yichi̱ xíniñúʼu ka̱ʼa̱nna xa̱ʼa̱ ña̱ sándi̱ʼi̱-inina. Tá saá kéʼéna, xíniñúʼu kúee koo iniyó ta kundatuyó ña̱ kuniso̱ʼoyó ndiʼi ña̱ kúni̱na ka̱ʼa̱nna xíʼinyó, chi saá kéʼé Jehová. Va̱ása ka̱ʼa̱nyó xíʼinna ndáaña keʼéna, va̱ʼaka ná na̱ʼa̱yó ña̱ kúndáʼvi-iniyó xíniyóna ta kúʼvi̱-iniyó xíniyóna (1 Ped. 3:8).

18. ¿Nda̱saa kivi ka̱ʼa̱nyó xíʼin Ndióxi̱ xa̱ʼa̱ na̱ xóʼvi̱, ta nda̱chun?

¹⁸ Ná ka̱ʼa̱nyó xíʼin ndiʼi níma̱yó xíʼin Ndióxi̱ xa̱ʼa̱ na̱ xóʼvi̱. Na̱ kúsuchíní-ini sana va̱ása kívi ka̱ʼa̱nna xíʼin Ndióxi̱. Sana ndákanixi̱nína ña̱ va̱ása xíniñúʼu ka̱ʼa̱nna xíʼin  Jehová. Tá kúni̱yó chindeéyóna, ná ka̱ʼa̱nyó xíʼin Jehová xa̱ʼa̱na ta ná ka̱ʼa̱nyó ki̱vi̱na. Ka̱ʼa̱nyó xíʼin Jehová ña̱ kúni̱níyóna ta saátu na̱ congregación. Ta ná ka̱ʼa̱nyó xíʼinra ña̱ ná sandi̱kora-ini na̱yóʼo. Tá ná keʼéyó táʼan oración yóʼo, chindeétáʼanña xíʼin na̱ xóʼvi̱ ña̱ ndi̱ko-inina (Sant. 5:16).

19. ¿Ndáaña chindeétáʼan xíʼinyó ña̱ sandi̱koyó-ini inkana?

¹⁹ Ná ndaka̱xinyó tu̱ʼun va̱ʼa ña̱ kivi sandi̱ko-inina. Siʼna ná ndakanixi̱níyó tasaá ka̱ʼa̱nyó. Tá va̱ása va̱ʼa káʼa̱nyó kivi saxo̱ʼvi̱yóna, soo tá vií káʼa̱nyó kivi sandi̱koyó-inina (Prov. 12:18). Ña̱kán ná ka̱ʼa̱nyó xíʼin Jehová ná chindeétáʼanra xíʼinyó ña̱ ndani̱ʼíyó tu̱ʼun va̱ʼa ka̱ʼa̱nyó xíʼinna ña̱ va̱ʼa ndi̱ko-inina. Ná ndakaʼányó chi tu̱ʼun Jehová ña̱ va̱xi nu̱ú Biblia, íyoníka ndee̱ ña̱yóʼo ta kivi kuniñúʼuyóña (Heb. 4:12).

20. Xa̱ʼa̱ ña̱ ndo̱ʼo iinna tá ya̱chi̱, ¿ndáaña sana ndákanixi̱nína, ta ndáaña xíniñúʼu sandakaʼányóna?

²⁰ Xa̱ʼa̱ ña̱ ke̱ʼéna ña̱ kini xíʼinna tá ya̱chi̱, sana ndákanixi̱nína ña̱ kúúna na̱ yaku̱a̱ ta kǒo na̱ kúni̱ñaʼá, ta nda̱a̱ ni iinna va̱ása xíniñúʼu kuʼvi̱-ini kuniñaʼá. Iin ña̱ vatá ña̱ va̱ása va̱ʼa kúú ña̱yóʼo. Ña̱kán ná kuniñúʼuyó Biblia ña̱ sandakaʼányóna ña̱ ndáyáʼvinína nu̱ú Jehová (koto recuadro “ Texto ña̱ va̱xi nu̱ú Biblia ña̱ kivi chindeétáʼan xíʼin na̱ xóʼvi̱”). Ná ndakaʼányó chi tá nda̱kavaní-ini ta̱ profeta Daniel, Ndióxi̱ chi̱ndaʼára iin ángel ña̱ taxira ndee̱ ndaʼa̱ra, saáchi xi̱kuni̱ra ná kunda̱a̱-ini ta̱ Daniel ña̱ ndáyáʼviníra nu̱úra ta kúni̱nírara (Dan. 10:2, 11, 19). Saátu na̱ hermano na̱ xóʼvi̱ ndáyáʼvinína nu̱ú Jehová.

21. a) ¿Ndáaña kundoʼo na̱ kéʼé ña̱ kini tá va̱ása ndíkó-inina? b) Ta, ¿ndáaña chika̱a̱yó ndee̱ keʼéyó?

²¹ Tá sándi̱koyó-ini inkana, sándakaʼányóna ña̱ kúʼvi̱ní-ini Jehová xínirana. Saátu xíniñúʼu ndakaʼányó ña̱ nda̱kúní tíinra ku̱a̱chi. Ta nda̱a̱ ni iin ña̱ va̱ása va̱ʼa kǒo kívi koo se̱ʼéña nu̱úra. Xíto ndiʼivaraña ta taxira castigo ndaʼa̱ na̱ ke̱ʼé ña̱ kini tá va̱ása ndíkó-inina (Núm. 14:18). Ña̱kán ná chika̱a̱yó ndee̱ ña̱ chindeétáʼanyó xíʼin na̱ ke̱ʼéna ña̱ kini xíʼin. Va̱ʼaní kúniyó tá kúnda̱a̱-iniyó ña̱ sandi̱ko Jehová ini na̱ xóʼvi̱ xa̱ʼa̱ ña̱ ke̱ʼé ta̱ Ndi̱va̱ʼa xíʼin na̱ ñuyǐví yóʼo xíʼinna. Si̱lóʼo tiempo kúma̱ní ta ni va̱ása ndakaʼánkana xa̱ʼa̱ ña̱yóʼo (Is. 65:17).