1. ¿Nda̱chun xíniñúʼuníyó ña̱ ndíchi ña̱ táxi Ndióxi̱? (Proverbios 4:7).

 ¿Á XA̱A̱ ndáka̱xiún keʼún iin ña̱ ndáyáʼviní? Tá saá íyoña, sana ni̱ka̱ʼa̱nvaún xíʼin Jehová ña̱ ná taxira ña̱ ndíchi ndaʼún, saáchi xi̱kunda̱a̱-iniún ña̱ xi̱xiniñúʼuníún ña̱yóʼo (Sant. 1:5). Ta̱ Rey Salomón ka̱ʼyíra ña̱yóʼo: “Ña̱ ndíchi [...] kúú ña̱ ndáyáʼviníka” (kaʼvi Proverbios 4:7). * Ta̱yóʼo va̱ása níka̱ʼa̱nra xa̱ʼa̱ ña̱ ndíchi ña̱ sánáʼa̱ na̱ yiví, chi ña̱ ni̱ka̱ʼa̱nra xa̱ʼa̱ kúú ña̱ ndíchi ña̱ táxi Jehová (Prov. 2:6). Soo, ¿á kivi chindeétáʼan ña̱ ndíchi yóʼo xíʼinyó ña̱ ya̱ʼayó nu̱ú tu̱ndóʼo ña̱ íyo tiempo vitin? Chindeétáʼanvaña xíʼinyó. Ta nu̱ú artículo yóʼo sakúaʼayó ndáa ki̱ʼva chindeétáʼanña xíʼinyó.

2. ¿Ndáa ki̱ʼva xa̱a̱yó ndíchi kooyó?

² Kivi xa̱a̱yó ndíchiní kooyó tá ná kaʼviyó xa̱ʼa̱ u̱vi̱ na̱ ta̱a na̱ ndíchiní ni̱xi̱yo ta kundiku̱nyó ña̱ sa̱náʼa̱na. Siʼna xa̱ʼa̱ ta̱ Salomón ná sakúaʼayó. Tu̱ʼun Ndióxi̱ káʼa̱nña ña̱ ku̱a̱ʼání ña̱ ndíchi ta̱xi Jehová ndaʼa̱ ta̱ Salomón ta xi̱chindeétáʼanra xíʼinra kunda̱a̱-inira ndáaña kúú ña̱ va̱ʼa ta ndáaña kúú ña̱ va̱ása va̱ʼa (1 Rey. 4:29). Tándi̱ʼi, sakúaʼayó xa̱ʼa̱ ta̱ Jesús, iin ta̱a ta̱ ndíchiní ni̱xi̱yo nu̱ú ñuʼú yóʼo (Mat. 12:42). Ña̱yóʼo ni̱ka̱ʼa̱n iin profecía xa̱ʼa̱ra: “Espíritu Jehová kooña xíʼinra, ña̱ va̱ʼa ndíchi koora ta ku̱a̱ʼá ña̱ʼa kunda̱a̱-inira xíʼin” (Is. 11:2).

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

³ Ña̱ ndíchi ña̱ ta̱xi Ndióxi̱ ndaʼa̱ ta̱ Salomón xíʼin ta̱ Jesús,  chi̱ndeétáʼanña xíʼinna ña̱ ta̱xina consejo ña̱ ndáyáʼviní ta va̱ʼaní chíndeétáʼanña xíʼinyó tiempo vitin. Nu̱ú artículo yóʼo ka̱ʼa̱nyó xa̱ʼa̱ u̱ni̱ ña̱yóʼo: ña̱ viíní ndakanixi̱níyó xa̱ʼa̱ xu̱ʼún, xa̱ʼa̱ chiñu xíʼin xa̱ʼa̱ miíyó.

4. ¿Ndáa ki̱ʼva ni̱xi̱yo ta̱ Salomón nu̱ú ta̱ Jesús?

⁴ Kúikání ni̱xi̱yo ta̱ Rey Salomón ta liviní veʼe nu̱ú ni̱xi̱yora (1 Rey. 10:7, 14, 15). Soo ta̱ Jesús kǒo ku̱a̱ʼá ña̱ʼa níxi̱kuumiíra ta kǒo veʼera níxi̱yo (Mat. 8:20). Ta nisaá ta̱ Salomón xíʼin ta̱ Jesús, viíní xi̱ndakanixi̱nína xa̱ʼa̱ ña̱ʼa ña̱ xi̱kuumiína, saáchi mií Jehová xi̱taxi ña̱ ndíchi ndaʼa̱na.

5. ¿Ndáa ki̱ʼva xi̱ndakanixi̱ní ta̱ Salomón xa̱ʼa̱ xu̱ʼún?

⁵ Ta̱ Salomón xi̱kunda̱a̱-inira ña̱ chíndeétáʼanva xu̱ʼún xíʼinyó (Ecl. 7:12). Xu̱ʼún ña̱ kúúmiíyó kivi chindeétáʼanña xíʼinyó satáyó ña̱ xíniñúʼuyó á satáyó ña̱ʼa ña̱ kútóoyó. Ni ku̱a̱ʼání xu̱ʼún xi̱kuumií ta̱ Salomón, soo xi̱kunda̱a̱-inira ña̱ su̱ví ña̱yóʼo kúú ña̱ ndáyáʼvi va̱ʼaka. Saáchi ña̱yóʼo kúú ña̱ ka̱ʼyíra: “Va̱ʼaníka ña̱ ná ka̱ʼa̱n va̱ʼana xa̱ʼa̱yó nu̱úka ña̱ kuumiíyó ña̱ ku̱i̱ká” (Prov. 22:1; nota). Ta saátu ni̱xa̱a̱ra ku̱ndaa̱-inira ña̱ na̱ yiví na̱ kúʼvi̱ní-ini xíni xu̱ʼún, va̱ása kúsi̱í-inina xíʼin ña̱ xa̱a̱ kúúmiína (Ecl. 5:10, 12). Ta ni̱ka̱ʼa̱nra ña̱ va̱ása xíniñúʼu kundaaní-iniyó xu̱ʼún, saáchi iin kama kuití kivi ndiʼi ña̱yóʼo ndaʼa̱yó (Prov. 23:4, 5).

6. ¿Ndáaña xi̱ndakanixi̱ní ta̱ Jesús xa̱ʼa̱ ña̱ xi̱kuumiíra? (Mateo 6:31-33).

⁶ Viíní xi̱ndakanixi̱ní ta̱ Jesús xa̱ʼa̱ ña̱ xi̱kuumiíra. Ta̱yóʼo xi̱kutóovara kuxura ta koʼo loʼora (Luc. 19:2, 6, 7). Iin yichi̱ nda̱sara ti̱kui̱í vino tá va̱ʼaní, ta ña̱yóʼo kúú ña̱ nu̱ú milagro ke̱ʼéra (Juan 2:10, 11). Ta saátu tá ni̱xi̱ʼi̱ra, iin ti̱ko̱to̱ ña̱ yaʼviní xi̱ndixira (Juan 19:23, 24). Soo su̱ví ña̱ kuumiíra ku̱a̱ʼá ña̱ʼa kúú ña̱ xi̱ndayáʼvika nu̱úra. Saáchi ña̱yóʼova ni̱ka̱ʼa̱nra xíʼin na̱ discípulora: “Kǒo ni iinna kivi kachíñu nu̱ú u̱vi̱na [...]. Kǒo kivi kachíñundó nu̱ú Ndióxi̱ ta kachíñundó nu̱ú ña̱ ku̱i̱ká” (Mat. 6:24). Ta̱ Jesús ni̱ka̱ʼa̱nra ña̱ tá siʼnaka chiñu Ndióxi̱ ná kundi̱ʼi̱-iniyó xa̱ʼa̱, Jehová taxira ña̱ xíniñúʼuyó (kaʼvi Mateo 6:31-33).

7. ¿Ndáaña va̱ʼa ndákiʼin iin ta̱ hermano xa̱ʼa̱ ña̱ viíní ndákanixi̱níra xa̱ʼa̱ xu̱ʼún?

 ⁷ Ku̱a̱ʼání ña̱ va̱ʼa xa̱a̱ ndákiʼin na̱ hermano xa̱ʼa̱ ña̱ ndíku̱nna consejo ña̱ táxi Jehová, ña̱ káʼa̱n xa̱ʼa̱ xu̱ʼún. Ná kotoyó ña̱ kéʼé iin ta̱ hermano ta̱ naní Daniel. Ta̱yóʼo káchira: “Tá ni̱xi̱yo loʼi̱ chi̱kaa̱-inii̱ ña̱ kachíñui̱ ndiʼi tiempo nu̱ú Jehová”. Xa̱ʼa̱ ña̱ chíka̱a̱níra ndee̱ ña̱ va̱ása kuumiíra ku̱a̱ʼání ña̱ʼa, va̱ʼaní xíniñúʼura tiempora ña̱ va̱ʼa chíndeétáʼanra xíʼin na̱ hermano nu̱ú kúu iin tu̱ndóʼo ta saátu káchíñura ti̱xin Betel. Ña̱yóʼo káʼa̱nkara: “Mií ña̱ nda̱a̱, va̱ása ndándikó-inii̱ xa̱ʼa̱ ña̱ chi̱ka̱a̱-inii̱ keʼíi̱. Sana ku̱a̱ʼáníva xu̱ʼún kuumiíi̱ tá níndi̱ʼi-inii̱ ña̱ kayai̱ña, soo va̱ása kuumiívíi̱ na̱ migoi̱ na̱ kúúmiíi̱ vitin. Ta saátu kúsi̱íní-inii̱ xa̱ʼa̱ ña̱ káchíñui̱ nu̱ú Ndióxi̱, ta sana va̱ása kusi̱íví-inii̱ tá nina chiñu níndi̱ʼi-inii̱ xa̱ʼa̱. Chi va̱ása kivi kitáʼan xu̱ʼún xíʼin ndiʼi ña̱ va̱ʼa ña̱ xa̱a̱ táxi Jehová ndaʼíi̱”. Ña̱yóʼo náʼa̱ña nu̱úyó ña̱ ku̱a̱ʼáníva ña̱ va̱ʼa ndákiʼinyó tá ndíʼi̱-iniyó xa̱ʼa̱ chiñu Ndióxi̱, ta va̱ása ndíʼi̱-iniyó xa̱ʼa̱ ña̱ kuumiíyó ku̱a̱ʼá xu̱ʼún.

8. ¿Nda̱chun va̱ʼa kúnda̱a̱-iniyó ña̱ viíní xi̱ndakanixi̱ní ta̱ Salomón xa̱ʼa̱ chiñu? (Eclesiastés 5:18, 19).

⁸ Ta̱ Salomón ni̱ka̱ʼa̱nra ña̱ ndiʼivayó kúsi̱í-ini xíʼin chiñu ña̱ kéʼéyó, chi iin ña̱ va̱ʼaní ña̱ táxi Ndióxi̱ ndaʼa̱yó kúú ña̱yóʼo (kaʼvi Eclesiastés 5:18, 19). * Ta saátu ka̱ʼyíra ña̱yóʼo: “Na̱ chíka̱a̱ní ndee̱ ña̱ kachíñuna ku̱a̱ʼání ña̱ va̱ʼa ndákiʼinna” (Prov. 14:23). Ta xi̱xini̱ va̱ʼavara ña̱ xi̱ka̱ʼa̱nra xa̱ʼa̱. Saáchi ndeéní ka̱chíñura, i̱xava̱ʼara ku̱a̱ʼá veʼe, chi̱ʼira tú uva, i̱xava̱ʼara ku̱a̱ʼá jardín xíʼin nu̱ú kuñuʼu ti̱kui̱í ta saátu i̱xava̱ʼara ku̱a̱ʼá ñuu (1 Rey. 9:19; Ecl. 2:4-6). Xíʼin ña̱yóʼo kúnda̱a̱-iniyó ña̱ ka̱chíñunívara. Ta sana xi̱kusi̱íva-inira xíʼin chiñu ña̱ ke̱ʼéra, soo xi̱kunda̱a̱-inira ña̱ su̱ví iinlá ña̱yóʼo kúú ña̱ taxi ña̱ si̱í koora. Ta saátu ke̱ʼéra ku̱a̱ʼání chiñu nu̱ú Jehová. Tá kúú, tá ku̱va̱ʼa templo nu̱ú ndasakáʼnuna Jehová, miíra kúú ta̱ ki̱ʼin kuenta xíʼin ña̱yóʼo ta ki̱ʼva u̱xa̱ ku̱i̱ya̱ ka̱chíñuna ña̱ va̱ʼa ku̱va̱ʼa templo yóʼo (1 Rey. 6:38; 9:1). Ni ku̱a̱ʼání chiñu ke̱ʼé ta̱ Salomón, soo ki̱ʼinra kuenta ña̱ ndáyáʼviníka kúú ña̱ kachíñura nu̱ú Jehová. Ña̱kán ka̱ʼyíra ña̱yóʼo: “Tándi̱ʼi xi̱niso̱ʼi̱ ndiʼi ña̱yóʼo, ña̱yóʼo kúú ña̱ ni̱xa̱i̱ ku̱nda̱a̱-inii̱: ixato̱ʼó Ndióxi̱ ta̱ nda̱a̱ ta keʼé ña̱ káʼa̱nra” (Ecl. 12:13).

9. ¿Ndáaña ke̱ʼé ta̱ Jesús ña̱ va̱ása níndi̱ʼiní-inira xa̱ʼa̱ chiñu?

⁹ Va̱ʼaní xi̱kachíñu ta̱ Jesús. Tá ni̱xi̱yo loʼora carpintero xi̱kuura (Mar. 6:3). Ta xi̱kusi̱íníva-ini na̱ yivára xíʼinra xa̱ʼa̱ ña̱ va̱ʼaní xi̱chindeétáʼanra xíʼinna ña̱ kee xu̱ʼún kuniñúʼuna chi ku̱a̱ʼání xi̱kuuna. Ta saátu, xa̱ʼa̱ ña̱ kǒo ku̱a̱chi níxikuumiíra va̱ʼaní xi̱kana ndiʼi chiñu ña̱ xi̱keʼéra, ña̱kán ku̱a̱ʼáníva na̱ yiví xi̱xa̱ʼa̱n nu̱úra ña̱ ixava̱ʼara ña̱ kuniñúʼuna. Ta kivi ndakanixi̱níyó ña̱ xi̱kusi̱íníva-ini ta̱ Jesús xíʼin chiñu ña̱ xi̱keʼéra, soo va̱ása nítaxira ña̱ kindaa ña̱yóʼo ku̱a̱ʼání tiempo ndaʼa̱ra ña̱ va̱ʼa kachíñura nu̱ú Ndióxi̱ (Juan 7:15). Ta tá ki̱xáʼara nátúʼun ni̱ʼira xa̱ʼa̱ Ndióxi̱ ta̱xira consejo yóʼo: “Va̱ása kachíñundó xa̱ʼa̱ ña̱ kuxundó ta tándi̱ʼi ndiʼi-xa̱ʼa̱ña, va̱ʼaka kachíñundó xa̱ʼa̱ ña̱ kuxundó ña̱ taxi kutakundó ndiʼi tiempo” (Juan 6:27). Ta saátu ni̱ka̱ʼa̱nra ña̱yóʼo tá ta̱xira discurso chí xi̱ní yuku̱: “Kundiku̱nndó sa̱tá ña̱ ku̱i̱ká ña̱ íyo chí ndiví” (Mat. 6:20).

10. ¿Ndáaña kivi kundoʼoyó tá va̱ʼaní káchíñuyó?

 ¹⁰ Ña̱ ndíchi ña̱ táxi Jehová ndaʼa̱yó chíndeétáʼanña xíʼinyó ña̱ su̱ví iinlá xa̱ʼa̱ chiñu miíyó kundi̱ʼi-iniyó xa̱ʼa̱. Tá kúú, tu̱ʼunra káʼa̱nña xíʼinyó ña̱ ndeéní ná kachíñuyó ta viíní ná kachíñuyó (Efes. 4:28). Soo ná kachiyó, ña̱ na̱ káchíñuyó nu̱ú kíʼinna kuenta ña̱ va̱ása íxakuíʼnáyó ta va̱ʼaní káchíñuyó, ta sana káʼa̱nna xíʼinyó ña̱ kútóonína ndáa ki̱ʼva káchíñuyó. Ta xa̱ʼa̱ ña̱ kúni̱yó ña̱ ná ka̱ʼa̱n va̱ʼana xa̱ʼa̱ na̱ testigo Jehová, sana kíxáʼayó káchíñuyó ku̱a̱ʼáka hora. Soo tá kéʼéyó ña̱yóʼo va̱ása íyoka tiempo nu̱úyó ña̱ kooyó xíʼin na̱ veʼeyó ni ña̱ keʼéyó chiñu nu̱ú Jehová. Tá xítoyó ña̱ saá kíxáʼayó kéʼéyó, xíniñúʼu nasamayó ña̱ kéʼéyó ña̱ va̱ʼa kundi̱ʼi̱-iniyó xa̱ʼa̱ mií ña̱ ndáyáʼvi va̱ʼaka.

11. ¿Ndáaña sa̱kuaʼa ta̱ William xíʼin ña̱ kéʼé iin ta̱ anciano?

¹¹ Iin ta̱ hermano ta̱ naní William, tá xi̱kachíñura xíʼin iin ta̱ hermano ta̱ kúú anciano ti̱xin congregación sa̱kúaʼara ña̱ su̱ví iinlá chiñu miíra kundi̱ʼi-inira xa̱ʼa̱. Ta ña̱yóʼo kúú ña̱ káʼa̱n ta̱ William xa̱ʼa̱ra: “Va̱ʼaní yichi̱ chínúu ta̱ hermano yóʼo nu̱úyó chi su̱ví iinlá chiñu miíra ndíʼi̱-inira xa̱ʼa̱. Ndeéní káchíñura ta kúsi̱íní-ini na̱ yiví xíʼin chiñu ña̱ kéʼéra. Soo tá xa̱a̱ xi̱kuá sándakoo naʼara chiñura, ta kíxáʼara ndíʼi̱ka-inira xa̱ʼa̱ na̱ veʼera xíʼin xa̱ʼa̱ chiñu Jehová. Ta xítoi̱ ña̱ si̱íní íyo ta̱yóʼo nu̱ú inkana”. *

12. ¿Ndáa ki̱ʼva ni̱na̱ʼa̱ ta̱ Salomón ña̱ viíní xi̱ndakanixi̱níra xa̱ʼa̱ miíra, ta ndáaña ke̱ʼéra tándi̱ʼi?

¹² Nani viíní xi̱ndasakáʼnu ta̱ Salomón Jehová, viíní xi̱ndakanixi̱níra xa̱ʼa̱ miíra. Tá sa̱kán ki̱xáʼara kúúra rey iin ta̱ loʼova xi̱kuura, soo nda̱kunira ña̱ íyo sava ña̱ va̱ása kívi keʼéra, ña̱kán ni̱ka̱ʼa̱nra xíʼin Jehová ña̱ ná kuniʼira yichi̱ nu̱úra (1 Rey. 3:7-9). Ta saátu xi̱kunda̱a̱-inira ña̱ va̱ása va̱ʼa ni̱nuní kunira. Chi ña̱yóʼo ka̱ʼyíra: “Siʼnaka ni̱nuní kúnina saáví va̱xi tu̱ndóʼo nu̱úna, siʼnaka ni̱nu kúnina  saáví ndákavana” (Prov. 16:18). Soo tá ni̱ya̱ʼa tiempo na̱ndósó-inira xa̱ʼa̱ ña̱ ni̱ka̱ʼa̱nra. Chi tá xa̱a̱ ku̱a̱ʼá ku̱i̱ya̱ xáʼndachíñura ki̱xáʼara ni̱nuní kúnira ta ki̱xáʼara yáʼandosóra ña̱ káʼa̱n Ndióxi̱. Tá kúú, ña̱yóʼo kúú ña̱ xi̱ka̱ʼa̱n Ley xíʼin na̱ xi̱kuu rey: “Va̱ása xíniñúʼu koo ku̱a̱ʼání ñá síʼina, ña̱ va̱ʼa ná va̱ása kuxíkána nu̱úi̱” (Deut. 17:17). Ta̱ Salomón va̱ása níxi̱ndiku̱nra ley yóʼo, saáchi 700 xi̱kuu ná síʼira ta ni̱xi̱yo inkaka 300 ná ni̱xi̱yo kuití xíʼinra, ta ku̱a̱ʼání náyóʼo xi̱ndasakáʼnuná inka ndióxi̱ (1 Rey. 11:1-3). Sana nda̱kanixi̱níra ña̱ kǒo ña̱ kundoʼovíra. Soo tá ni̱ya̱ʼa tiempo ku̱a̱ʼání tu̱ndóʼo ki̱xi nu̱úra xa̱ʼa̱ ña̱ ku̱xíkára nu̱ú Jehová (1 Rey. 11:9-13).

13. ¿Ndáaña sákuaʼayó xíʼin ña̱ vitání ni̱xi̱yo ini ta̱ Jesús?

¹³ Vitání ni̱xi̱yo ini ta̱ Jesús ta viíní xi̱ndakanixi̱níra xa̱ʼa̱ miíra. Tá kúma̱níka kixira nu̱ú ñuʼú yóʼo ke̱ʼéra ku̱a̱ʼání chiñu ña̱ ndáyáʼvi nu̱ú Jehová. Ña̱yóʼo káʼa̱n Colosenses 1:16 xa̱ʼa̱ra: “Ta̱yóʼo kúú ta̱ xi̱niñúʼu Ndióxi̱ ña̱ ke̱ʼéra ndiʼika ña̱ʼa ña̱ íyo chí ndiví ta saátu ña̱ íyo nu̱ú ñuʼú”. Sana tá nda̱kuchi ta̱ Jesús saá kúú ña̱ nda̱kaʼánra xa̱ʼa̱ ndiʼi ña̱ ke̱ʼéra xíʼin yivára tá ni̱xi̱yora chí ndiví (Mat. 3:16; Juan 17:5). Soo tá nda̱kaʼánra xa̱ʼa̱ ndiʼi ña̱yóʼo va̱ása níkuta̱a-inira xíʼinña. Ta saátu va̱ása níndakanixi̱níra ña̱ ndáyáʼviníkara nu̱ú inkana. Ta ni̱ka̱ʼa̱nra xíʼin na̱ discípulora ña̱ “kǒo níkixira ña̱ kachíñuna nu̱úra, chi ki̱xira ña̱ kachíñura nu̱ú inkana tasaá kuvira xa̱ʼa̱ na̱ yiví ña̱ ndacháʼvira xa̱ʼa̱na” (Mat. 20:28). Ta saátu ni̱ka̱ʼa̱nra ña̱ va̱ása kéʼéra ña̱ kúni̱ miíra chi kéʼéra ña̱ kúni̱ yivára (Juan 5:19). Vitání ni̱xi̱yo ini ta̱ Jesús, ña̱kán ndiʼiyó kúni̱yó kundiku̱nyó yichi̱ra.

14. Tu̱ʼun ña̱ ni̱ka̱ʼa̱n ta̱ Jesús, ¿ndáa ki̱ʼva chíndeétáʼanña xíʼinyó ña̱ viíní ndakanixi̱níyó xa̱ʼa̱yó?

¹⁴ Ta̱ Jesús sa̱náʼa̱ra na̱ discípulora ña̱ xíniñúʼu viíní ndakanixi̱nína xa̱ʼa̱ miína. Iin yichi̱ ni̱ka̱ʼa̱nra ña̱yóʼo xíʼinna: “Nda̱a̱ yixí xi̱níndó kúnda̱a̱ va̱ʼa-inira nda̱saa kúú ña̱ íyo” (Mat. 10:30). Sándi̱koní tu̱ʼun yóʼo iniyó tá va̱ása vií íyo ña̱ ndákanixi̱níyó xa̱ʼa̱ miíyó. Ña̱yóʼo sándakaʼánña miíyó ña̱ ndíʼi̱ní-ini Jehová xa̱ʼa̱yó ta ndáyáʼviníyó nu̱úra. Tá táxi Jehová ña̱  kachíñuyó nu̱úra ta kúni̱ra taxira ña̱ kutakuyó ndiʼi tiempo nu̱ú ñuyǐví xa̱á, ná kǒo ndakanixi̱níyó ña̱ va̱ása xíniñúʼu taxira ña̱yóʼo ndaʼa̱yó.

15. a) Nda̱a̱ táki̱ʼva ni̱ka̱ʼa̱n tutu La Atalaya, ¿ndáaña xíniñúʼu ndakanixi̱níyó xa̱ʼa̱ miíyó? b) Nda̱a̱ táki̱ʼva xítoyó nu̱ú na̱ʼná ña̱ va̱xi página 24, ¿ndáaña kivi kundoʼoyó tá ná kundi̱ʼi̱ní-iniyó xa̱ʼa̱ miíyó?

¹⁵ Iin artículo ña̱ ka̱na nu̱ú tutu La Atalaya ni̱ka̱ʼa̱nña xíʼinyó ña̱ xíniñúʼu viíní ndakanixi̱níyó xa̱ʼa̱ miíyó. Ña̱yóʼo ka̱chiña: “Va̱ása xíniñúʼu ndakanixi̱níyó ña̱ ndáyáʼviníyó ta kixáʼayó ni̱nu kuniyó; soo saátu va̱ása xíniñúʼu ndakanixi̱níyó ña̱ ni loʼoví va̱ása ndáyáʼviyó. Saáchi ña̱ xíniñúʼu keʼéyó kúú ña̱ viíní ndakanixi̱níyó xa̱ʼa̱ miíyó, ña̱yóʼo kúni̱ kachiña ña̱ xíniñúʼu ndakuniyó ña̱ íyo sava ña̱ va̱ʼa kéʼéyó ta íyo sava ña̱ va̱ása kívi keʼéyó. Iin ñá hermana ni̱ka̱ʼa̱nñá ña̱yóʼo: ‘Va̱ása kúi̱ iin ñaʼá ñá ndi̱va̱ʼaní-ini ta saátu va̱ása kúi̱ iin ñaʼá ñá va̱ʼaní-ini, saáchi íyo sava ña̱ vií kéʼíi̱ ta íyotu sava ña̱ va̱ása vií kéʼíi̱, nda̱a̱ táki̱ʼva ndóʼo ndiʼi na̱ yiví’”. * ¿Á kíʼinyó kuenta nda̱chun xíniñúʼu viíní ndakanixi̱níyó xa̱ʼa̱ miíyó?

16. ¿Nda̱chun va̱ʼaní consejo táxi Jehová ndaʼa̱yó?

¹⁶ Va̱ʼaní consejo táxi Jehová ndaʼa̱yó nu̱ú tu̱ʼunra. Ta táxiraña ndaʼa̱yó xa̱ʼa̱ ña̱ kúʼvi̱ní-inira xínira miíyó ta kúni̱ra ña̱ si̱íní ná kooyó (Is. 48:17, 18). Iin ña̱ va̱ʼaníka ndaka̱xinyó keʼéyó kúú ña̱ kachíñuyó nu̱ú Jehová, saáchi ña̱yóʼo kúú ña̱ ndixa sákusi̱í-iniyó. Ta tá ná keʼéyó ña̱yóʼo, va̱ása kooní tu̱ndóʼo nu̱úyó nda̱a̱ táki̱ʼva ndóʼo na̱ yiví na̱ ndíʼi̱ní-ini xa̱ʼa̱ xu̱ʼún, xa̱ʼa̱ chiñuna á xa̱ʼa̱ miína. Ña̱kán, ndíchi ná kooyó ta ná sakúsi̱íyó-ini Jehová xíʼin ña̱ kéʼéyó (Prov. 23:15).