ARTÍCULO ÑA̱ KAʼVIYÓ 20
YAA 67 Natúʼun xa̱ʼa tu̱ʼun Ndióxi̱
Sánáʼa̱yó na̱ yiví saáchi kúʼvi̱-iniyó xíniyóna
“Siʼna xíniñúʼu natúʼunna tu̱ʼun va̱ʼa xa̱ʼa̱ Reino Ndióxi̱ nu̱ú iníísaá ñuyǐví” (MAR. 13:10).
TEMA
Xa̱ʼa̱ ña̱ kúʼvi̱-iniyó xíniyó na̱ yiví ña̱kán nátúʼunyó xíʼinna xa̱ʼa̱ Ndióxi̱.
1. ¿Ndáaña ni̱ka̱ʼa̱nna xa̱ʼa̱ ti̱xin reunión anual ña̱ ku̱i̱ya̱ 2023?
LIVINÍ ni̱xi̱yo reunión anual ña̱ ku̱i̱ya̱ 2023. a Ti̱xin reunión yóʼo na̱ ñuu Ndióxi̱ ni̱ka̱ʼa̱nna ña̱ na̱samana sava ña̱ xi̱kandíxayó tá ya̱chi̱ ta saátu ni̱ka̱ʼa̱nna xa̱ʼa̱ ña̱ predicación. Saátu ni̱ka̱ʼa̱nna ña̱ tá xa̱a̱ ndi̱ʼi-xa̱ʼa̱ Babilonia ña̱ káʼnu sana sava na̱ yiví kuni̱na sakúaʼana xa̱ʼa̱ Jehová. Ta ni̱ka̱ʼa̱ntuna ña̱ yo̱o̱ noviembre ña̱ ku̱i̱ya̱ 2023, ndiʼi na̱ publicador kǒo ndataxikana hora ña̱ kéena predicación. ¿Á kúni̱ kachi ña̱yóʼo ña̱ va̱ása xíniñúʼuka kundi̱ʼi-iniyó ña̱ natúʼunyó xíʼin na̱ yiví xa̱ʼa̱ Ndióxi̱? Va̱ásaví.
2. ¿Nda̱chun ndáyáʼviní natúʼunyó xa̱ʼa̱ Ndióxi̱? (Marcos 13:10).
2 Ndáyáʼviníka ña̱ natúʼunyó xíʼin na̱ yiví xa̱ʼa̱ Ndióxi̱ tiempo vitin. ¿Nda̱chun? Saáchi si̱lóʼoní kúma̱ní ta kixaa̱ ki̱vi̱ káʼnu Jehová. Nu̱ú Marcos 13:10 ni̱ka̱ʼa̱n ta̱ Jesús ndáa ki̱ʼva koo ña̱ natúʼunyó xíʼin na̱ yiví ki̱vi̱ so̱ndíʼi ña̱ ndóoyó vitin (kaʼvi Marcos 13:10). Ta nu̱ú libro ña̱ Mateo ta̱ Jesús ni̱ka̱ʼa̱nra ña̱ “natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo ña̱ va̱ʼa kunda̱a̱-ini ndiʼi na̱ yiví tasaá ndiʼi-xa̱ʼa̱ ñuyǐví” (Mat. 24:14). Ña̱yóʼo kúni̱ kachiña ña̱ ndiʼi-xa̱ʼa̱ ta̱ Ndi̱va̱ʼa xíʼin ndiʼi na̱ kítáʼan xíʼinra. Xa̱a̱ nda̱kaxinva Jehová ki̱vi̱ xíʼin hora ña̱ saxínura ña̱ ni̱ka̱ʼa̱nra keʼéra (Mat. 24:36; 25:13; Hech. 1:7). Ta si̱lóʼoní kúma̱ní ña̱ keʼé Jehová ña̱yóʼo (Rom. 13:11). Nani ndátuyó kixaa̱ ki̱vi̱ yóʼo, ná chikaa̱níyó ndee̱ ña̱ natúʼunyó xíʼin na̱ yiví xa̱ʼa̱ Jehová.
3. ¿Nda̱chun nátúʼunyó xíʼin na̱ yiví xa̱ʼa̱ Ndióxi̱?
3 Ná ndakanixi̱níyó xa̱ʼa̱ pregunta yóʼo: ¿Nda̱chun nátúʼunyó xíʼin na̱ yiví xa̱ʼa̱ Ndióxi̱? Saáchi kúʼvi̱-iniyó xíniyóna. Nátúʼunyó xíʼin na̱ yiví chi kúni̱yó kundaa̱-inina xa̱ʼa̱ tu̱ʼun va̱ʼa ña̱ káʼa̱n xa̱ʼa̱ reino Ndióxi̱, ta kúʼvi̱-iniyó xíniyóna, soo ña̱ ndáyáʼviníka kúú ña̱ kúʼvi̱-iniyó xíniyó Jehová xíʼin ki̱vi̱ra. Ná sakúaʼayó xa̱ʼa̱ iin tá iin ña̱yóʼo.
KÚNI̱YÓ KUNDA̱A̱-INI NA̱ YIVÍ XA̱ʼA̱ REINO NDIÓXI̱
4. ¿Ndáaña kéʼéyó tá xíniso̱ʼoyó iin noticia ña̱ va̱ʼaní?
4 ¿Ama kúú ña̱ ni̱ka̱ʼa̱nna iin noticia ña̱ va̱ʼaní xíʼún? ¿Á ni̱ka̱ʼa̱n iin na̱ veʼún xíʼún ña̱ kaku iin se̱ʼe loʼona? ¿Á ta̱xina iin chiñu ña̱ va̱ʼaní ndaʼún? Sana ni̱kusi̱íní-iniún ta xi̱kuni̱ún natúʼún xíʼin na̱ veʼún á na̱ migoún xa̱ʼa̱ ña̱yóʼo. Ta sana saátu ni̱kusi̱íní-iniún tá xi̱niso̱ʼún tu̱ʼun va̱ʼa xa̱ʼa̱ reino Ndióxi̱.
5. ¿Ndáaña ndo̱ʼún tá ki̱xáʼún sákuaʼún xa̱ʼa̱ Ndióxi̱? (Koto na̱ʼná).
5 Ndakanixi̱ní ndáaña ndo̱ʼún tá ki̱xáʼún sákuaʼún xa̱ʼa̱ Ndióxi̱. Sa̱kúaʼún ña̱ kúʼvi̱ní-ini Jehová xínira yóʼó ta kúni̱ra ña̱ kundika̱ún ti̱xin ñuura, saátu sa̱kúaʼún ña̱ sandíʼi-xa̱ʼa̱ra ndiʼi ña̱ sáxo̱ʼvi̱ miíyó ta sandátakura na̱ veʼeyó nu̱ú ñuyǐví xa̱á (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Ku̱si̱íní-iniún tá na̱kunda̱a̱-iniún xa̱ʼa̱ ña̱yóʼo (Luc. 24:32). Ta xa̱ʼa̱ ña̱ xi̱kusi̱íní-iniún xi̱kuni̱ún natúʼún xa̱ʼa̱ ña̱yóʼo xíʼin ndiʼi na̱ yiví (kivitu nandukún ña̱ káʼa̱n Jeremías 20:9).
Tá sa̱kúaʼayó ña̱ va̱xi nu̱ú Biblia ni̱kusi̱íní-iniyó, ña̱kán xi̱kuni̱yó natúʼunyó xa̱ʼa̱ ña̱yóʼo xíʼin ndiʼi na̱ yiví. (Koto párrafo 5).
6. ¿Ndáaña sákuaʼún xíʼin ña̱ ke̱ʼé ta̱ Ernest xíʼin ñá Rose?
6 Ná ka̱’a̱nyó xa̱’a̱ iin ta̱ hermano ta̱ naní Ernest. b Ni̱ka̱ʼa̱nra ña̱ ni̱xi̱ʼi̱ yivára tá kúúmiíra 10 ku̱i̱ya̱. Ta̱yóʼo xi̱ndakanixi̱níra: “¿Á chí ndiví ku̱a̱ʼa̱n yivái̱? Xi̱kusuchíní-inii̱ tá xi̱xitoi̱ na̱ va̱lí na̱ íyo yivá”. Ndiʼi ki̱vi̱ xi̱xaʼa̱nra nu̱ú ni̱ndu̱xu̱n yivára ta xi̱kuxítira á xi̱kusítíra ta xi̱ka̱ʼa̱nra ña̱yóʼo xíʼin Ndióxi̱: “Káʼa̱n ndáʼvii̱ xíʼún Ndióxi̱, ka̱ʼa̱n xíʼi̱n ndáa míí ku̱a̱ʼa̱n yivái̱”. Tá xi̱kuumiíra 27 ku̱i̱ya̱, na̱ testigo Jehová ni̱ka̱ʼa̱nna xíʼinra á kúni̱ra sakúʼara xa̱ʼa̱ Biblia, ta ka̱ndíxavara. Ni̱kusi̱íní-inira tá ku̱ndaa̱-inira ña̱ nda̱a̱ táki̱ʼva íyo na̱ kísi̱ saá íyo na̱ ni̱xi̱ʼi̱. Saátu ku̱ndaa̱-inira ña̱ kixaa̱ iin ki̱vi̱ ña̱ sandátaku Ndióxi̱ na̱ ni̱xi̱ʼi̱ (Ecl. 9:5, 10; Hech. 24:15). Va̱ʼaní ku̱nira tá ku̱ndaa̱-inira xa̱ʼa̱ ña̱ xi̱sandíʼi̱ní-inira. Miíra xíʼin ñá síʼira ñá Rose ku̱si̱íní-inina xa̱ʼa̱ ndiʼi ña̱ ki̱xáʼana sákuaʼana. Tá ni̱ya̱ʼa tiempo, u̱vi̱ saá na̱yóʼo nda̱kuchina tá ku̱i̱ya̱ 1978. Xa̱ʼa̱ ña̱ kúsi̱íní-inina na̱túʼunna xa̱ʼa̱ ndiʼi ña̱ sa̱kúaʼana xíʼin na̱ veʼena, na̱ migona xíʼin inkaka na̱ yiví na̱ xi̱kuni̱ sakúaʼa xa̱ʼa̱ Ndióxi̱. Xa̱ʼa̱ ña̱yóʼo, xa̱a̱ yáʼaka 70 na̱ yiví chi̱ndeétáʼanna xíʼin ña̱ sakúaʼana xa̱ʼa̱ Jehová ta xa̱a̱ nda̱kuchina.
7. Tá kúsi̱íní-iniyó xa̱ʼa̱ ña̱ sákuaʼayó nu̱ú Biblia, ¿ndáaña keʼéyó? (Lucas 6:45).
7 Xa̱ʼa̱ ña̱ kúsi̱íní-iniyó xíʼin ña̱ sákuaʼayó nu̱ú Biblia, ña̱yóʼo chíndeétáʼanña xíʼinyó ña̱ natúʼunyó xíʼin na̱ yiví xa̱ʼa̱ ña̱ sákuaʼayó (kaʼvi Lucas 6:45). Kivi ka̱ʼa̱nyó nda̱a̱ táki̱ʼva ni̱ka̱ʼa̱n na̱ discípulo na̱ ni̱xi̱yo tá siglo nu̱ú: “Kǒo kívi sandákoondi̱ ka̱ʼa̱nndi̱ xa̱ʼa̱ ña̱ʼa ña̱ xi̱nindi̱ xíʼin ña̱ xi̱niso̱ʼondi̱” (Hech. 4:20). Kúsi̱íní-iniyó xíʼin ña̱ sákuaʼayó nu̱ú Biblia, xa̱ʼa̱ ña̱kán kúni̱yó natúʼunyó xíʼin ndiʼi na̱ yiví xa̱ʼa̱ ña̱yóʼo.
XA̱ʼA̱ ÑA̱ KÚʼVI̱-INIYÓ XÍNIYÓ NA̱ YIVÍ NÁTÚʼUNYÓ XÍʼINNA XA̱ʼA̱ NDIÓXI̱
8. ¿Ndáaña kivi chindeétáʼan xíʼinyó ña̱ natúʼunyó xíʼin na̱ yiví xa̱ʼa̱ Ndióxi̱? (Koto recuadro ña̱ naní “ Sánáʼa̱yó na̱ yiví chi kúʼvi̱-iniyó xíniyóna”; koto na̱ʼná).
8 Ta̱ Jesús xíʼin Jehová kúʼvi̱ní-inina xínina na̱ yiví ta saátu miívayó (Prov. 8:31; Juan 3:16). Ta kúndáʼviní-iniyó xíniyó na̱ yiví na̱ ta̱ʼán sakúaʼa xa̱ʼa̱ Ndióxi̱ (Efes. 2:12). Ku̱a̱ʼání tu̱ndóʼo kúúmií na̱ yiví, soo miíyó kivi chindeétáʼanyó xíʼinna ña̱ sakúaʼana xa̱ʼa̱ Ndióxi̱ xíʼin xa̱ʼa̱ ña̱ káʼa̱nra keʼéra chí nu̱únínu. Ta xa̱ʼa̱ ña̱ kúʼvi̱-iniyó xíniyóna sánáʼa̱yóna xa̱ʼa̱ Jehová ta ña̱yóʼo chindeétáʼanña xíʼinna ña̱ kusi̱í-inina vitin ta saátu chí nu̱únínu. Ta saátu chindeétáʼanña xíʼinna ña̱ ni̱ʼína ña̱ kutakuna ndiʼi saá tiempo nu̱ú ñuyǐví xa̱á (1 Tim. 6:19).
Xíniñúʼuyó tiempoyó ña̱ natúʼunyó xíʼin na̱ yiví xa̱ʼa̱ Ndióxi̱ saáchi kúʼvi̱-iniyó xíniyóna ta kúndáʼvi-iniyó xíniyóna. (Koto párrafo 8).
9. ¿Ndáaña káʼa̱nyó xíʼin na̱ yiví, ta nda̱chun káʼa̱nyóña xíʼinna? (Ezequiel 33:7, 8).
9 Xa̱ʼa̱ ña̱ kúʼvi̱ní-iniyó xíniyó na̱ yiví káʼa̱nyó xíʼinna ña̱ ku̱yatinní kixaa̱ ña̱ ndiʼi-xa̱ʼa̱ ndiʼi ña̱ va̱ása va̱ʼa íyo nu̱ú ñuʼú yóʼo (kaʼvi Ezequiel 33:7, 8). c Kúsuchíní-iniyó tá xítoyó na̱ veʼeyó xíʼin na̱ yiví na̱ kǒo kúú testigo Jehová, chi va̱ása kíʼinna kuenta ña̱ xa̱a̱ ku̱yatinní kixaa̱ ña̱ ndiʼi-xa̱ʼa̱ ñuyǐví yóʼo. Nu̱ú Mateo 24:21 káʼa̱nña ña̱ kixi ña̱ gran tribulación ta “nda̱a̱ tá ki̱xáʼa xa̱ʼa̱ ñuyǐví nda̱a̱ vitin ta̱ʼán koo táʼan ña̱yóʼo ta ni iin ki̱vi̱ va̱ása ndikóña”. Kúni̱yó ña̱ kunda̱a̱-inina ndáaña kuu tiempo kán: siʼna sandíʼi-xa̱ʼa̱na ndiʼi veʼe-ñu̱ʼu vatá, tándi̱ʼi tá xa̱a̱ ná koo ña̱ Armagedón ndiʼi-xa̱ʼa̱ ndiʼi ña̱ va̱ása va̱ʼa íyo ñuyǐví yóʼo (Apoc. 16:14, 16; 17:16, 17; 19:11, 19, 20). Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ natúʼunyó xíʼin na̱ yiví xa̱ʼa̱ra tasaá ndasakáʼnunara. Soo, ¿ndáaña kundoʼo na̱ yiví á na̱ veʼeyó na̱ kǒo xíín sakúaʼa xa̱ʼa̱ Ndióxi̱?
10. ¿Nda̱chun xíniñúʼu ka̱ʼa̱nyó xíʼin na̱ yiví xa̱ʼa̱ ña̱ kuu?
10 Nda̱a̱ táki̱ʼva sa̱kúaʼayó nu̱ú artículo ña̱ ni̱ya̱ʼa, sana sáka̱ku Jehová na̱ yiví na̱ ndikó-ini tá ná kunina ndiʼi-xa̱ʼa̱ Babilonia ña̱ káʼnu. Xíʼin ña̱yóʼo sákuaʼayó ña̱ xíniñúʼu chika̱a̱níyó ndee̱ ña̱ natúʼunyó xíʼin na̱ yiví xa̱ʼa̱ Ndióxi̱ chi xa̱a̱ ku̱nu̱míní kixaa̱ ki̱vi̱ káʼnu Jehová. ¿Nda̱chun káʼa̱nyó ña̱yóʼo? Saáchi ndiʼi ña̱ nátúʼunyó xíʼin na̱ yiví tiempo vitin sananí ndakaʼánna xa̱ʼa̱ña chí nu̱únínu (kivitu nandukún ña̱ káʼa̱n Ezequiel 33:33). Sana ndakaʼánna xa̱ʼa̱ ña̱ xa̱a̱ sa̱náʼa̱yóna ta ña̱yóʼo kivi chindeétáʼanña xíʼinna ña̱ sakúaʼana xa̱ʼa̱ Jehová tasaá ka̱kuna. Nda̱a̱ táki̱ʼva ke̱ʼé iin ta̱a ta̱ xi̱ndikaa̱ veʼeka̱a ña̱ ñuu Filipos ki̱xáʼara sa̱kúaʼara xa̱ʼa̱ Ndióxi̱ tá xi̱nira ña̱ ndeéní ni̱ta̱an. Tiempo vitin íyo sava na̱ yiví na̱ kǒo xíín sakúaʼa xa̱ʼa̱ Ndióxi̱, soo tá ná kunina ña̱ ndi̱ʼi-xa̱ʼa̱ Babilonia ña̱ káʼnu kuni̱na sakúaʼana xa̱ʼa̱ Jehová (Hech. 16:25-34).
NÁTÚʼUNYÓ XÍʼIN NA̱ YIVÍ SAÁCHI KÚʼVI̱-INIYÓ XÍNIYÓ JEHOVÁ
11. ¿Ndáa ki̱ʼva ndásakáʼnuyó Jehová ta íxato̱ʼóyóra, ta ndáa ki̱ʼva táxiyó ndee̱yó ndaʼa̱ra? (Apocalipsis 4:11; koto na̱ʼná).
11 Xa̱ʼa̱ ña̱ kúʼvi̱ní-iniyó xíniyó Jehová nátúʼunyó xa̱ʼa̱ra xíʼin na̱ yiví tasaá ndásakáʼnuyó ki̱vi̱ra. Ta káʼa̱nyó nda̱a̱ táki̱ʼva káʼa̱n na̱ ángel: “Yóʼó kúú ta̱ xíniñúʼu ndukáʼnu, yóʼó kúú ta̱ xíniñúʼu ixato̱ʼóna, yóʼó kúú ta̱ kúúmií ndiʼi ndee̱” (kaʼvi Apocalipsis 4:11). ¿Ndáa ki̱ʼva ndásakáʼnuyó Jehová ta íxato̱ʼóyóra? Ndásakáʼnuyóra ta íxato̱ʼóyóra tá nátúʼunyó xíʼin na̱ yiví ña̱ miíra kúú ta̱ i̱xava̱ʼa ndiʼi ña̱ʼa ña̱ íyo nu̱ú ñuʼú yóʼo ta saátu ta̱xira ña̱ tákuyó. Ta, ¿ndáa ki̱ʼva táxiyó ndee̱yó ndaʼa̱ra? Táxiyóña tá xíniñúʼuyó tiempoyó, ndee̱yó xíʼin ña̱ kúúmiíyó ña̱ va̱ʼa natúʼunyó xa̱ʼa̱ra xíʼin na̱ yíví (Mat. 6:33; Luc. 13:24; Col. 3:23). Kúsi̱íní-iniyó nátúʼunyó xa̱ʼa̱ra saáchi kúʼvi̱ní-iniyó xíniyora, ta saátu kúni̱yó natúʼunyó xíʼin na̱ yiví xa̱ʼa̱ ki̱vi̱ra ta ndáaña kúni̱ kachi ña̱yóʼo. ¿Nda̱chun?
Táxiyó ndee̱yó ndaʼa̱ Jehová tá xíniñúʼuyó tiempoyó xíʼin ña̱ kúúmiíyó ña̱ va̱ʼa natúʼunyó xa̱ʼa̱ra xíʼin na̱ yiví. (Koto párrafo 11).
12. ¿Ndáa ki̱ʼva ndásayi̱i̱yó ki̱vi̱ Jehová tá nátúʼunyó xíʼin na̱ yiví?
12 Xa̱ʼa̱ ña̱ kúʼvi̱-iniyó xíniyó Jehová kúni̱yó ña̱ ná nduyi̱i̱ ki̱vi̱ra (Mat. 6:9). Ta ndásayi̱i̱yó ki̱vi̱ Jehová tá nátúʼunyó ña̱ nda̱a̱ xa̱ʼa̱ra xíʼin na̱ yiví, saáchi ta̱ Ndi̱va̱ʼa ku̱a̱ʼání ña̱ vatá káʼa̱nra xa̱ʼa̱ Jehová (Gén. 3:1-5; Job 2:4; Juan 8:44). Ña̱kán, tá ku̱a̱ʼa̱nyó predicación ndákiʼinyó tu̱ʼun Jehová ta nátúʼunyó ña̱ nda̱a̱ xa̱ʼa̱ra xíʼin na̱ yiví na̱ kúni̱ sakúaʼa xa̱ʼa̱ra. Ta saátu kúni̱yó ña̱ ná kunda̱a̱-ini na̱ yiví ña̱ kúʼvi̱ní-inira xínirana, ta nda̱kúní ndátiinra ku̱a̱chi. Káʼa̱ntuyó xíʼinna ña̱ ti̱xin reinora sandíʼi-xa̱ʼa̱ra ndiʼi ña̱ sáxo̱ʼvi̱ miíyó ta si̱íní kundooyó ti̱xin ñuyǐví xa̱á (Sal. 37:10, 11, 29; 1 Juan 4:8). Tá kéʼéyó ndiʼi ña̱yóʼo saá kúú ña̱ ndásayi̱i̱yó ki̱vi̱ Jehová. Ta saátu sáxi̱nuyó chiñu ña̱ ta̱xi Jehová ndaʼa̱yó ña̱ kúúyó testigora. ¿Nda̱chun káʼa̱nyó ña̱yóʼo?
13. ¿Nda̱chun kúsi̱íní-iniyó ña̱ naníyó testigo Jehová? (Isaías 43:10-12).
13 Jehová nda̱kaxinra miíyó ña̱ kooyó testigora (kaʼvi Isaías 43:10-12). d Sa̱kán íyo loʼo ku̱i̱ya̱ na̱ Cuerpo Gobernante ni̱ka̱ʼa̱nna ña̱yóʼo nu̱ú iin carta: “Iin chiñu ña̱ ndáyáʼviní kúú ña̱ ta̱xi Jehová ndaʼa̱yó ña̱ kúúyó testigora”. e Ná ka̱ʼa̱nyó xa̱ʼa̱ iin ejemplo. Ná kachiyó ña̱ ni̱xa̱a̱yó nu̱ú na̱ chiñu ña̱ ndatiinna ku̱a̱chi xíʼinyó, saáchi iin na̱ yiví sa̱kúísona ku̱a̱chi miíyó. Ta xíniñúʼuyó iin na̱ yiví ña̱ ndakiʼinna tu̱ʼunyó ta sana ndaka̱xinyó iin na̱ yiví na̱ va̱ʼaní xíni̱ ndáa ki̱ʼva íyoyó. Ta saátu kúni̱yó ña̱ viíní ná koo ña̱ ka̱ʼa̱n na̱yóʼo ña̱ va̱ʼa kandíxa na̱ chíñu ña̱ ka̱ʼa̱nna. Ki̱ʼva saá ke̱ʼé Jehová xíʼinyó, saáchi nda̱kaxinra miíyó ña̱ ka̱ʼa̱nyó ña̱ nda̱a̱ xa̱ʼa̱ra tasaá ndakiʼinyó tu̱ʼunra. Saáchi xíni̱ va̱ʼara ndáa ki̱ʼva íyoyó ta kándíxara miíyó. Ña̱kán, kúsi̱íní-iniyó ña̱ kúúyó testigora. Ta ndiʼi tiempo chíkaa̱yó ndee̱ ña̱ natúʼunyó xa̱ʼa̱ra xíʼin na̱ yiví. Ndásayi̱i̱yó ki̱vi̱ra tá ndákiʼinyó tu̱ʼunra saáchi ku̱a̱ʼání ña̱ vatá káʼa̱n ta̱ Ndi̱va̱ʼa xa̱ʼa̱ra tasaá sáxi̱nuyó chiñu ña̱ ta̱xira ndaʼa̱yó ña̱ kúúyó testigora (Sal. 83:18; Rom. 10:13-15).
KǑO SANDÁKOOYÓ ÑA̱ NATÚʼUNYÓ XA̱ʼA̱ NDIÓXI̱
14. ¿Ndáaña xa̱a̱ ku̱nu̱mí kuu?
14 Xa̱a̱ ku̱nu̱míní kixaa̱ tiempo ña̱ va̱ʼaní, ta kúni̱yó ña̱ ku̱a̱ʼáníka na̱ yiví sakúaʼa xa̱ʼa̱ Jehová tá kúma̱níka kixaa̱ ña̱ gran tribulación. Soo saátu kúsi̱íní-iniyó chi sana ku̱a̱ʼá na̱ yiví kuni̱na sakúaʼana xa̱ʼa̱ Jehová tá xa̱a̱ ndíkaa̱ ña̱ gran tribulación (Hech. 13:48).
15, 16. ¿Ndáaña chikaa̱yó ndee̱ keʼéyó, ta nda̱saa tiempo keʼéyóña?
15 Nani ndátuyó kixaa̱ ki̱vi̱ yóʼo ná chika̱a̱yó ndee̱ ña̱ natúʼunyó xíʼin na̱ yiví xa̱ʼa̱ Ndióxi̱. Ta saátu ná natúʼunyó xíʼin na̱ yiví ña̱ xa̱a̱ ku̱yatinní kixaa̱ ña̱ ndiʼi-xa̱ʼa̱ ndiʼi ña̱ kini ña̱ íyo nu̱ú ñuʼú yóʼo. Tá ná kixaa̱ tiempo ña̱ ndatiin Jehová ku̱a̱chi, saá kúú ña̱ kiʼinna kuenta ña̱ mií Jehová kúú ta̱ xa̱ʼnda chiñu nu̱úyó ña̱ natúʼunyó xa̱ʼa̱ra xíʼin na̱ yiví (Ezeq. 38:23).
16 Ña̱kán, ¿ndáaña chika̱a̱-iniyó keʼéyó? Chika̱a̱yó ndee̱ ña̱ natúʼunyó xíʼin na̱ yiví xa̱ʼa̱ Jehová nda̱a̱ ná ka̱ʼa̱n miíra xíʼinyó ña̱ kǒo natúʼunkayó xa̱ʼa̱ra.
YAA 54 “Ña̱yóʼo kúú ña̱ nda̱a̱”
a Ña̱ reunión anual ni̱xi̱yoña 7 tí octubre ña̱ ku̱i̱ya̱ 2023 ti̱xin salón ña̱ asamblea na̱ testigo Jehová ña̱ Newburgh, Nueva York (Estados Unidos). U̱vi̱ nda̱taʼvína programa yóʼo ta ka̱naña nu̱ú JW Broadcasting® táʼví nu̱ú ka̱naña yo̱o̱ noviembre ña̱ ku̱i̱ya̱ 2023 ta ña̱ táʼví u̱vi̱ ka̱naña yo̱o̱ enero ña̱ ku̱i̱ya̱ 2024.
b Koto artículo ña̱ naní “La Biblia les cambió la vida: Me impresionaron las respuestas claras y lógicas de la Biblia”, ña̱ ka̱na nu̱ú tutu La Atalaya 1 tí febrero ña̱ ku̱i̱ya̱ 2015.
c Ezequiel 33:7, 8: “Yóʼó ta̱ kúú se̱ʼe ta̱a, ta̱xii̱ chiñu ndaʼún ña̱ kundaún na̱ ñuu Israel; ta, tá ná kuniso̱ʼún tu̱ʼun ña̱ ka̱ʼi̱n xíʼún, ka̱ʼún xíʼinna xa̱ʼa̱ ña̱ kundoʼona. 8 Tá káʼi̱n xíʼin iin ta̱ ndi̱va̱ʼa-ini: ‘Yóʼó ta̱ ndi̱va̱ʼa-ini, kuvivaún’. Soo yóʼó va̱ása káʼún xíʼinra xa̱ʼa̱ ña̱ kundoʼora ta va̱ása káʼún xíʼinra ña̱ sandákoora ña̱ va̱ása va̱ʼa kéʼéra, ta̱yóʼo kuvira xa̱ʼa̱ ku̱a̱chira chi ta̱ ndi̱va̱ʼa-ini kúúra, soo yóʼó kúú ta̱ ndatii̱n ku̱a̱chi xíʼin xa̱ʼa̱ ni̱i̱ra”.
d Isaías 43:10-12: “Ndóʼó kúúndó testigoi̱, káchi Jehová, ndóʼó kúú na̱ káchíñu nu̱úi̱, na̱ nda̱kaxii̱n, ña̱ va̱ʼa kuxini̱ndó yi̱ʼi̱ ta kandíxandó yi̱ʼi̱ ta kunda̱a̱-inindó ña̱ ta̱ʼán nasa̱mavíi̱. Tá ya̱chi̱ví íyoi̱ ta kǒo nda̱a̱ ni iin Ndióxi̱ níxi̱yo siʼna nu̱úi̱, ta tándi̱’i, va̱ása níxi̱yo inkana nda̱a̱ táki̱ʼva íyo yi̱ʼi̱. 11 Yi̱ʼi̱, yi̱ʼi̱ kúú Jehová, yi̱ʼi̱ kúú ta̱ sa̱kǎku ndóʼó ta kǒoka inka na̱ kivi sakǎku ndóʼó. 12 ‘Tá ta̱ʼán koo ndióxi̱ na̱ inka ñuu xíʼinndó, yi̱ʼi̱ kúú ta̱ ni̱ka̱ʼa̱n xa̱ʼa̱ ña̱ keʼíi̱, sa̱kǎkui̱ ndóʼó ta na̱túʼi̱n xa̱ʼa̱ña ña̱ va̱ʼa kunda̱a̱-inina. Ña̱kán, ndóʼó kúúndó testigoi̱ káchi Jehová, ta yi̱ʼi̱ kúú Ndióxi̱ndó’”.
