1, 2. a) ¿Ndáaña chíndeétáʼan xíʼinyó ña̱ yáʼayó nu̱ú ña̱ ndóʼoyó ki̱vi̱ tá ki̱vi̱? Ka̱ʼa̱n xa̱ʼa̱ña. b) ¿Ndáaña sakuaʼayó nu̱ú artículo yóʼo?

TÁ XA̱A̱ yáʼayó nu̱ú iin tu̱ndóʼo, ku̱a̱ʼáníyó ndákanixi̱níyó ña̱ va̱ása kuchiñu iinlá miíyó ya̱ʼayó nu̱úña. Sana saá ni̱ka̱ʼa̱nyó tá nda̱kanixi̱níyó ndáa ki̱ʼva ni̱ya̱ʼayó nu̱ú iin kue̱ʼe̱ ña̱ ndeéní, á ña̱ ni̱xi̱ʼi̱ iin na̱ veʼeyó. Túviyó ña̱ ku̱chiñuyó ni̱ya̱ʼayó nu̱ú ndiʼi ña̱yóʼo ki̱vi̱ tá ki̱vi̱, tíxa̱ʼvi ña̱ ta̱xi espíritu santo Jehová ndee̱ ndaʼa̱yó (2 Cor. 4:7-9).

² Saátu xíniñúʼuyó ña̱ ná chindeétáʼan espíritu santo xíʼinyó, ña̱ va̱ʼa ya̱ʼayó nu̱ú ndiʼi ña̱ kini ña̱ íyo ñuyǐví yóʼo (1 Juan 5:19). Ta saátu xíniñúʼu kanitáʼanyó xíʼin na̱ ta̱chí ndi̱va̱ʼa (Efes. 6:12). Xa̱a̱ ku̱nda̱a̱-iniyó ndáaña kúú ña̱ yáʼayó nu̱ú, ta vitin ná kotoyó ndáa u̱vi̱ ki̱ʼva kivi chindeétáʼan espíritu santo xíʼinyó. Tándi̱ʼi, kunda̱a̱-iniyó ndáaña xíniñúʼu keʼéyó ña̱ ndakiʼinyó ña̱ va̱ʼa ña̱ kúúmií ña̱yóʼo.

3. ¿Ndáa ki̱ʼva chíndeétáʼan espíritu santo xíʼinyó ña̱ ya̱ʼayó nu̱ú tu̱ndóʼo?

³ Espíritu santo Jehová chíndeétáʼanña xíʼinyó, tá táxiña ndee̱ ndaʼa̱yó ña̱ va̱ʼa keʼéyó chiñuyó ni íyo tu̱ndóʼo nu̱úyó. Ta̱ apóstol Pablo nda̱kanixi̱níra, ña̱ kiviva ndakundeéra ndasakáʼnura Jehová ni íyo tu̱ndóʼo nu̱úra, tíxa̱ʼvi ndee̱ ña̱ táxi ta̱ Jesús ndaʼa̱ra (2 Cor. 12:9). Tá yichi̱ u̱vi̱ ña̱ ni̱xa̱ʼa̱nra xi̱tora na̱ congregación xa̱ʼa̱ ña̱ xi̱kuura misionero, su̱ví kuití níchika̱a̱ra ndee̱ ña̱ natúʼunra, chi saátu chi̱ka̱a̱ra ndee̱ ña̱ ka̱chíñura ña̱ va̱ʼa koo ña̱ xíniñúʼura. Ta ñuu Corinto, ki̱ndo̱ora veʼe ta̱ Áquila xíʼin ñá Priscila, na̱  xi̱kiku veʼe válí ña̱ manta. Ta xa̱ʼa̱ ña̱ inkáchi chiñu xi̱keʼé ta̱ Pablo xíʼinna, ka̱chíñura xíʼinna sava ki̱vi̱ ña̱ semana (Hech. 18:1-4). Espíritu santo kúú ña̱ ta̱xi ndee̱ ndaʼa̱ra ña̱ va̱ʼa ke̱ʼéra chiñu yóʼo, ta saátu ña̱ na̱túʼunra xa̱ʼa̱ Jehová.

4. Nda̱a̱ táki̱ʼva káchi 2 Corintios 12:7b-9, ¿ndáaña xi̱ndoʼo ta̱ Pablo?

⁴ (Kaʼvi 2 Corintios 12:7b-9). * ¿Ndáaña ku̱ni kachi ta̱ Pablo tá ni̱ka̱ʼa̱nra ña̱ xóʼvi̱níra xa̱ʼa̱ ña̱ ndíka̱a̱ “iñú ku̱ñura”? Tá ná ki̱ʼvi iin iñú ku̱ñuyó, xo̱ʼvi̱níyó xíʼinña. Ña̱kán, ña̱ ku̱ni kachi ta̱ Pablo kúú ña̱ xóʼvi̱níra xa̱ʼa̱ ña̱ kúúmiíra sava ña̱ íxayo̱ʼvi̱ xíʼinra. Ta ni̱ka̱ʼa̱nra ña̱ tá íyo iin ángel ta̱ Ndi̱va̱ʼa saá íyoña, ta nda̱a̱ tá íyo ña̱ káni xa̱ʼnda̱ nu̱úra sa̱a̱ íyoña (á ña̱ kánitáʼan xíʼinra nda̱a̱ táki̱ʼva káchi nota). Sana su̱ví ta̱ Ndi̱va̱ʼa xíʼin na̱ ta̱chí ndi̱va̱ʼa kúú na̱ níchika̱a̱ iñú kán ku̱ñura, á na̱ sándi̱ʼi̱-inira. Soo tá xi̱ni na̱ ta̱chí ndi̱va̱ʼa ña̱ ndíka̱a̱ “iñú” ku̱ñura, sana ki̱xáʼana sáxo̱ʼvi̱kanara. ¿Ndáaña ke̱ʼé ta̱ Pablo?

5. ¿Nda̱saa nda̱kuiin Jehová ña̱ ni̱ka̱ʼa̱n ta̱ Pablo xíʼinra?

⁵ Tá xa̱ʼa̱, ta̱ Pablo xi̱kuni̱ra sa̱ñára nu̱ú “iñú” ña̱ xi̱kuumiíra. Ka̱chira: “U̱ni̱ yichi̱ ni̱ka̱ʼi̱n xíʼin tátayó [Jehová] ña̱ ná kuxíka ña̱yóʼo nu̱úi̱”. Ni ni̱ka̱ʼa̱n ndáʼvira xíʼin Ndióxi̱, iñú ña̱ ndíka̱a̱ ku̱ñura va̱ása níkitaña. ¿Á kúni̱ kachi ña̱yóʼo ña̱ va̱ása níndakuiin Jehová ña̱ ni̱ka̱ʼa̱nra? Va̱ása, chi nda̱kuiinvara. Ni va̱ása níkindaara tu̱ndóʼo kán nu̱úra, soo ta̱xivara ndee̱ ndaʼa̱ra ña̱ kundeé-inira. Ta ni̱ka̱ʼa̱nra xíʼinra: “Saáchi tá ku̱a̱ʼa̱n ndákavaka-iniún yi̱ʼi̱ táxikai̱ ndee̱ ndaʼún” (2 Cor. 12:8, 9). Tíxa̱ʼvi ña̱ chi̱ndeé Ndióxi̱ ta̱ Pablo, ku̱chiñura ni̱xi̱yo si̱í-inira ta saátu táxin ni̱xi̱yo inira (Filip. 4:4-7).

6. a) ¿Nda̱saa kivi ndakuiin Jehová ña̱ káʼa̱nyó xíʼinra? b) ¿Ndáa texto ña̱ va̱xi nu̱ú párrafo yóʼo ndásandakúka-iniyó?

⁶ ¿Á xa̱a̱ sava yichi̱ káʼa̱nyó xíʼin Jehová ña̱ ná chindeétáʼanra xíʼinyó ya̱ʼayó nu̱ú iin ña̱ íxayo̱ʼvi̱ xíʼinyó, nda̱a̱ táki̱ʼva ke̱ʼé ta̱ Pablo? Ta ni xa̱a̱ ni̱ka̱ʼa̱nyó xíʼin Jehová, soo tu̱ndóʼo ña̱ ndóʼoyó va̱ása ndíʼiña ta ndeéka kíxáʼaña, sana ndákanixi̱níyó ña̱ va̱ása chíndeétáʼankara xíʼinyó. Tá saá ndóʼoyó, ná ndakanixi̱níyó xa̱ʼa̱ ña̱ ndo̱ʼo ta̱ Pablo. Chi nda̱a̱ táki̱ʼva nda̱kuiinra oración ta̱kán, saátu ndakuiinra ña̱ káʼa̱nyó xíʼinra. Ni va̱ása sándiʼiví Jehová tu̱ndóʼo ña̱ ndóʼoyó, soo xíʼin espíritu santora taxira ndee̱ ndaʼa̱yó ña̱ kundeé-iniyó ya̱ʼayó nu̱úña (Sal. 61:3, 4). Ta ni ná ndakavayó, Jehová va̱ása sandákoo ndaʼa̱ra miíyó (2 Cor. 4:8, 9; Filip. 4:13).

7, 8. a) ¿Nda̱chun nda̱a̱ táki̱ʼva íyo ta̱chí saá íyo espíritu santo? b) ¿Ndáa ki̱ʼva ni̱ka̱ʼa̱n ta̱ Pedro xa̱ʼa̱ ña̱ kéʼé espíritu santo?

⁷ ¿Ndáa inkaka ki̱ʼva chíndeétáʼan ña̱ espíritu santo xíʼinyó? Nda̱a̱ táki̱ʼva kéʼé ta̱chí ña̱ va̱ʼa, tá chíndaʼáña barco tú ndíka̱a̱ nu̱ú ti̱kui̱í ña̱ ku̱ʼu̱nnú nda̱a̱ nu̱ú ñuʼú yi̱chí, ki̱ʼva saá chíndeétáʼan ña̱ espíritu santo xíʼinyó ña̱ ya̱ʼayó nu̱ú ña̱ ndóʼoyó ndiʼi ki̱vi̱, ña̱ va̱ʼa xa̱a̱yó nu̱ú ñuyǐví xa̱á ña̱ ni̱ka̱ʼa̱n Ndióxi̱ taxira.

⁸ Xa̱ʼa̱ ña̱ xi̱kuu ta̱ apóstol Pedro iin ta̱ xi̱tiin ti̱a̱ká, xi̱xini va̱ʼara ndáa ki̱ʼva íyo ña̱ ku̱ʼu̱nna nu̱ú ti̱kui̱í. Sana xa̱ʼa̱ ña̱kán chi̱táʼanra ña̱yóʼo xíʼin ña̱ espíritu santo, ña̱ va̱ʼa ka̱ʼa̱nra ndáa ki̱ʼva íyoña. Ka̱ʼyíra: “Chi na̱ ta̱a na̱ ka̱ʼyí ña̱yóʼo va̱ása níkaʼyína ña̱ kúni̱ miína, chi espíritu santo Ndióxi̱ chi̱ndaʼá-ñaʼá ña̱ ka̱ʼyína ña̱ ni̱ka̱ʼa̱nra”. Ta ña̱ tu̱ʼun griego “chi̱ndaʼá-ñaʼá” kúni̱ kachiña ña̱ espíritu santo xi̱niʼi yichi̱ nu̱úna (2 Ped. 1:21; nota).

9. ¿Ndáaña ku̱ni kachi ta̱ Pedro tá xi̱niñúʼura ña̱ tu̱ʼun chi̱ndaʼá?

⁹ ¿Ndáaña ku̱ni kachi ta̱ Pedro tá xi̱niñúʼura  ña̱ tu̱ʼun chi̱ndaʼá? Ta̱ Lucas ta̱ ka̱ʼyí libro ña̱ Hechos, ki̱ʼva saá íyo tu̱ʼun ña̱ xíniñúʼura, ña̱ va̱ʼa ka̱ʼa̱nra xa̱ʼa̱ iin barco tú táxi ña̱ ná chindaʼá ta̱chí miínú (Hech. 27:15). Xa̱ʼa̱ ña̱kán, tá ni̱ka̱ʼa̱n ta̱ Pedro ña̱ espíritu santo chi̱ndaʼáña na̱ ka̱ʼyí Biblia, xi̱niñúʼura ña̱ kúu nu̱ú tá mar, nda̱a̱ táki̱ʼva káchi iin ta̱ xíni̱ va̱ʼa xa̱ʼa̱ Biblia. Ta̱ Pedro ku̱ni kachira ña̱ nda̱a̱ táki̱ʼva kéʼé ta̱chí ña̱ chíndaʼáña tú barco ña̱ va̱ʼa xa̱a̱nú nu̱ú ku̱a̱ʼa̱nnú, saá chi̱ndaʼá espíritu santo na̱ profeta xíʼin inkaka na̱ ka̱ʼyí Biblia, ña̱ va̱ʼa sa̱xínuna chiñuna. Mií ta̱ xíni̱ va̱ʼa xa̱ʼa̱ Biblia ni̱ka̱ʼa̱nra: “Na̱ profeta nda̱a̱ táki̱ʼva íyo na̱ nda̱niʼi vela saá íyona”. Ta Jehová chi̱ndeétáʼanra xíʼinna ña̱ ta̱xira espíritu santora ndaʼa̱na, ta saátu na̱ ka̱ʼyí Biblia xi̱ndiku̱nna espíritu santo.

10, 11. ¿Ndáa u̱vi̱ ña̱ xíniñúʼu keʼéyó ña̱ va̱ʼa ndakiʼinyó espíritu santo Ndióxi̱? Ka̱ʼa̱n xa̱ʼa̱ iin ejemplo.

¹⁰ Ña̱ nda̱a̱ kúú ña̱ tiempo vitin, Jehová va̱ása xíniñúʼukara espíritu santora ña̱ va̱ʼa kaʼyí libro ña̱ va̱xi nu̱ú Biblia. Soo xíniñúʼuvaraña ña̱ kuniʼiña yichi̱ nu̱ú na̱ ndásakáʼnu-ñaʼá. Ña̱kán Jehová chíndeétáʼanvara xíʼinna. Soo ña̱ va̱ʼa ndakiʼinyó ña̱ va̱ʼa xa̱ʼa̱ ña̱ níʼi espíritu santo yichi̱ nu̱úyó, xíniñúʼu keʼétu miíyó sava ña̱ʼa. ¿Nda̱saa kivi keʼéyóña?

¹¹ Ná ndakanixi̱níyó xa̱ʼa̱ ejemplo yóʼo. Tá iin ta̱ xíka xíʼin barco nu̱ú ti̱kui̱í kúni̱ra kuniñúʼu viíra ta̱chí, xíniñúʼu keʼéra u̱vi̱ ña̱ʼa. Ña̱ nu̱ú, xíniñúʼu ku̱ʼu̱nra xíʼin tú barco nda̱a̱ nu̱ú káni va̱ʼa ta̱chí, saáchi túyóʼo va̱ása kanda̱nú tá ná kundichinú nda̱a̱ yuʼú tá mar. Ña̱ u̱vi̱, xíniñúʼu ndaniʼira ña̱ vela ta ndandika va̱ʼaraña, saáchi tá kíʼvi ta̱chí ti̱xin ña̱ vela, saá kúú ña̱ kivi ku̱ʼu̱n tú barco. Ki̱ʼva saá íyo miíyó, kivi ndakundeékayó ndasakáʼnuyó Jehová tá chíndeétáʼan espíritu santo xíʼinyó. Xa̱ʼa̱ ña̱yóʼo, íyo u̱vi̱ ña̱ xíniñúʼu keʼéyó. Ña̱ nu̱ú, nda̱a̱ táki̱ʼva kéʼéna xíʼin tú barco, saá xíniñúʼu kundichiyó nu̱ú káni va̱ʼa ta̱chí á ña̱ espíritu santo, ña̱ va̱ʼa chindeétáʼanña xíʼinyó ña̱ keʼéyó chiñu Ndióxi̱. Ña̱ u̱vi̱, nda̱a̱ táki̱ʼva kéʼéna xíʼin vela tú barco ña̱ va̱ʼa ku̱ʼu̱nnú, saá xíniñúʼu chika̱a̱yó ndee̱ ña̱ keʼéyó nda̱a̱ ndáaka  chiñu ña̱ kivi (Sal. 119:32). Tá ná keʼéyó ña̱yóʼo, espíritu santo chindaʼáña miíyó ña̱ ndakundeéyó ndasakáʼnuyó Jehová, ni íyo tu̱ndóʼo á ña̱ sási nu̱úyó, ña̱ va̱ʼa xa̱a̱yó ñuyǐví xa̱á.

12. ¿Ndáaña sakuaʼayó vitin?

¹² Xa̱a̱ ku̱nda̱a̱-iniyó ndáa u̱vi̱ ki̱ʼva kúú ña̱ chíndeétáʼan espíritu santo xíʼinyó. Táxiña ndee̱ ndaʼa̱yó, ta chíndeétáʼanña xíʼinyó ña̱ nda̱kú koo iniyó tá yáʼayó nu̱ú ña̱ íxayo̱ʼvi̱ xíʼinyó. Saátu chíndaʼáña miíyó ña̱ ndakundeéyó ndasakáʼnuyó Jehová, saátu chíndeéña miíyó ña̱ va̱ʼa ndakiʼinyó ña̱ kutakuyó ndiʼi tiempo. Vitin kunda̱a̱-iniyó xa̱ʼa̱ ku̱mí ña̱ʼa ña̱ xíniñúʼu keʼéyó ña̱ ndakiʼinyó ña̱ va̱ʼa ña̱ kúúmií espíritu santo.

13. a) Nda̱a̱ táki̱ʼva káchi 2 Timoteo 3:16, 17, ¿nda̱saa kivi chindeétáʼan tu̱ʼun Ndióxi̱ xíʼinyó? b) ¿Ndáaña xíniñúʼu keʼé miíyó?

¹³ Ña̱ nu̱ú, ná kaʼviyó tu̱ʼun Ndióxi̱ (kaʼvi 2 Timoteo 3:16, 17). * Ña̱ tu̱ʼun griego tá káʼa̱nña, “ña̱ ni̱ka̱ʼyi̱ xíʼin ta̱chí yi̱i̱ Ndióxi̱” kúni̱ kachiña ña̱ mií Ndióxi̱ kúú ta̱ “ni̱ka̱ʼa̱nña” á “ta̱xiña”. Jehová xi̱niñúʼura espíritu santora ña̱ chi̱ndeétáʼanra xíʼin na̱ ka̱ʼyí Biblia ña̱ ka̱ʼyína tu̱ʼunra. Ki̱vi̱ káʼviyó tu̱ʼun Ndióxi̱ ta ndákanixi̱níyó xa̱ʼa̱ña, kíʼviña xi̱níyó xíʼin níma̱yó. Ta ña̱yóʼo chíndeétáʼanña xíʼinyó ña̱ kutakuyó nda̱a̱ táki̱ʼva kúni̱ mií Jehová (Heb. 4:12). Soo ña̱ va̱ʼa ndakiʼinyó ndiʼi ña̱ va̱ʼa ña̱ kúúmií espíritu santo, xíniñúʼu taváyó tiempo ña̱ kaʼvi ni̱ʼiyó Biblia ta vií ndakanixi̱níyó xa̱ʼa̱ ña̱ káʼviyó. Saá kúú ña̱ kivi chindeétáʼan tu̱ʼun Ndióxi̱ xíʼinyó, xíʼin ña̱ ka̱ʼa̱nyó á keʼéyó.

14. a) ¿Nda̱chun káʼa̱nyó ña̱ nda̱a̱ táki̱ʼva íyo ña̱ “káni ta̱chí” saá íyo ña̱ xáʼa̱nyó reunión? b) ¿Ndáaña xíniñúʼu keʼéyó ña̱ va̱ʼa ndakiʼinyó espíritu santo ti̱xin reunión?

¹⁴ Ña̱ u̱vi̱, inkáchi ná ndasakáʼnuyó Ndióxi̱ xíʼin na̱ hermano (Sal. 22:22). Kivi ka̱ʼa̱nyó, ña̱ nda̱a̱ táki̱ʼva íyo ña̱ “káni ta̱chí” saá íyo ña̱ xáʼa̱nyó reunión, saáchi espíritu santo Jehová íyoña ti̱xin reunión (Apoc. 2:29). ¿Nda̱chun káʼa̱nyó ña̱yóʼo? Saáchi, ki̱vi̱ ndákutáʼanyó reunión, ndúkúyó espíritu santo ti̱xin ña̱ oración, ta xítayó yaa ña̱ ka̱na nu̱ú tu̱ʼun Ndióxi̱ ta saátu xíniso̱ʼoyó ña̱ káʼa̱n na̱ hermano na̱ nda̱ka̱xin espíritu. Ta saátu ña̱ espíritu yóʼo chíndeétáʼanña xíʼin ná hermana ña̱ sakuaʼaná ña̱ ya̱ʼaná ti̱xin reunión. Ña̱kán, tá kúni̱yó ndakiʼinyó espíritu santo, xíniñúʼu kaʼvi kúeeyó tutuyó ña̱ va̱ʼa ndakuiinyó ti̱xin reunión. Saá kúú ña̱ kivi ndakiʼinyó espíritu.

15. ¿Ndáaña xíniñúʼu keʼéyó ña̱ va̱ʼa chindeétáʼan espíritu santo xíʼinyó tá ku̱a̱ʼa̱nyó nátúʼunyó?

¹⁵ Ña̱ u̱ni̱, ná ku̱ʼu̱nyó natúʼunyó. Ki̱vi̱ káʼviyó Biblia tá ku̱a̱ʼa̱nyó nátúʼunyó á sánáʼa̱yó, táxiyó ña̱ ná chindeétáʼan ña̱ espíritu xíʼinyó ña̱ keʼéyóña (Rom. 15:18, 19). Soo xíniñúʼu kee ni̱ʼiyó natúʼunyó xa̱ʼa̱ Ndióxi̱ ta kuniñúʼuyó Biblia ña̱ va̱ʼa ndakiʼinyó ña̱ va̱ʼa ña̱ kúúmií espíritu santo. Iin ña̱ kivi chindeétáʼan xíʼinyó, ña̱ vií natúʼunyó xíʼin na̱ yiví kúú ña̱ kuniñúʼuyó ña̱ va̱xi nu̱ú, Tutu nu̱ú va̱xi ña̱ keʼéyó reunión Ña̱ Kéʼé na̱ Ndásakáʼnu Ndióxi̱.

16. ¿Ndáa inka ki̱ʼva kúú ña̱ kivi ndukúyó espíritu santo?

¹⁶ Ña̱ ku̱mí, ná ka̱ʼa̱nyó xíʼin Jehová (Mat. 7:7-11; Luc. 11:13). Inka ki̱ʼva ña̱ kuumiíyó espíritu santo, kúú ña̱ ndukúyóña nu̱ú Jehová ti̱xin ña̱ oración. Ni veʼeka̱a ta ni ta̱ Ndi̱va̱ʼa va̱ása kuchiñura kasira ña̱ xa̱a̱ oraciónyó nu̱ú Jehová, á ña̱ ndakiʼinyó ña̱ va̱ʼa ña̱ kúúmií espíritu santo (Sant. 1:17). ¿Nda̱saa xíniñúʼu ka̱ʼa̱nyó xíʼin Jehová ña̱ ndakiʼinyó ña̱ va̱ʼa ña̱ kúúmií espíritu santo? Ña̱ va̱ʼa ndakuiinyó pregunta yóʼo, ná ka̱ʼa̱nkayó xa̱ʼa̱ ña̱ oración, ta ná kotoyó iin ejemplo ña̱ va̱xi nu̱ú Evangelio ña̱ Lucas. *

17. Ña̱ ni̱ka̱ʼa̱n ta̱ Jesús nu̱ú Lucas 11:5-9, 13, ¿ndáaña sánáʼa̱ña miíyó xa̱ʼa̱ ña̱ oración?

¹⁷ (Kaʼvi Lucas 11:5-9, * 13). * Ña̱ ni̱ka̱ʼa̱n ta̱ Jesús náʼa̱ña nu̱úyó ndáa ki̱ʼva xíniñúʼu ndukúyó espíritu santo. Ta̱ ta̱a kán, nda̱kiʼinra ña̱ xíniñúʼura xa̱ʼa̱ ña̱ va̱ása nísandákoora ndukúra ña̱ kúni̱ra. Va̱ása níyi̱ʼvíra ndukúra ña̱ kúni̱ra nu̱ú migora, ni xa̱a̱ ma̱ʼñú ñuú kúúña (koto nota ña̱ estudio “xa̱ʼa ña̱ kǒo níndakoora ña̱ ndukúra ña̱ kúni̱ra”, ña̱ va̱xi nu̱ú Tutu nu̱ú va̱xi ña̱ keʼéyó reunión Ña̱ Kéʼé na̱ Ndásakáʼnu Ndióxi̱ ña̱ julio 2018). ¿Nda̱saa chi̱táʼan ta̱ Jesús ña̱ ejemplo yóʼo xíʼin ña̱ oración? Ni̱ka̱ʼa̱nra: “Ka̱ʼa̱nkandó, ta taxiraña ndaʼa̱ndó; nandukúkandóña, ta ndani̱ʼíndóña; kanindaʼa̱kandó yeʼé, ta kunáraña nu̱úndó”. Ña̱kán, ña̱ sákuaʼayó xíʼin ña̱yóʼo kúú, ña̱ tá kúni̱yó ná chindeétáʼan espíritu santo xíʼinyó va̱ása sandákooyó ndukúyóña ti̱xin ña̱ oración.

18. ¿Nda̱chun kándíxaníyó ña̱ taxi Jehová espíritu santora ndaʼa̱yó?

¹⁸ Ña̱ ejemplo yóʼo chíndeétáʼantuña xíʼinyó ña̱ kunda̱a̱-iniyó, ndáa ki̱ʼva taxi Jehová espíritu santora ndaʼa̱yó. Ta̱a ta̱ ni̱ka̱ʼa̱n ta̱ Jesús xa̱ʼa̱, xi̱kuni̱ra nda̱kiʼin viíra ta̱ ki̱xaa̱ veʼera tá xa̱a̱ ñuú. Ta kúni̱ra taxira ña̱ kuxu ta̱ ta̱a kán, soo kǒo ña̱ʼa ña̱ taxira kuxura. Ta̱ Jesús ni̱ka̱ʼa̱nra ña̱ ta̱ íyo yatin xíʼinra ta̱xira ña̱ xíniñúʼura, xa̱ʼa̱ ña̱ va̱ása nísandákoora ndukúraña nu̱úra. ¿Ndáaña xi̱kuni̱ ta̱ Jesús sanáʼa̱ra miíyó? Ña̱ tá iin ta̱a ni kúúra ta̱ ku̱a̱chi, va̱ʼa chíndeétáʼanra xíʼin inkana xa̱ʼa̱ ña̱ va̱ása sándakoona ndukúnaña nu̱úra, kachikaví yiváyó ta̱ íyo chí ndiví taxivara espíritu santora ndaʼa̱ na̱ va̱ása sándakoo ndukúña nu̱úra. Xa̱ʼa̱ ña̱yóʼo, kiviva ndukúyó nu̱ú Jehová ña̱ ná taxira espíritura ndaʼa̱yó, ta va̱ása kaka-iniyó ña̱ ndakuiinra yuʼúyó (Sal. 10:17; 66:19).

19. ¿Nda̱chun va̱ʼa kúnda̱a̱-iniyó ña̱ kuchiñuvayó?

¹⁹ Kúnda̱a̱-iniyó ña̱ kuchiñuvayó ni nda̱a̱ ndáaka ña̱ ná keʼé ta̱ Ndi̱va̱ʼa xíʼinyó. ¿Nda̱chun? Saáchi u̱vi̱ ki̱ʼva kivi chindeétáʼan espíritu santo xíʼinyó. Ña̱ nu̱ú, táxiña ndee̱ ndaʼa̱yó ña̱ va̱ʼa ya̱ʼayó nu̱ú ndiʼi ña̱ íxayo̱ʼvi̱ xíʼinyó. Ta ña̱ u̱vi̱, chíndaʼáña miíyó ña̱ ndakundeéyó ndasakáʼnuyó Jehová nda̱a̱ ná ki̱xaa̱ ñuyǐví xa̱á. Xa̱ʼa̱ ña̱yóʼo, ná ndakundeéyó chika̱a̱yó ndee̱ ña̱ va̱ʼa ndakiʼinyó espíritu santo.