1, 2. ¿Nda̱chun xíniñúʼu kuni̱kayó sakuaʼayó xa̱ʼa̱ libro ña̱ Levítico?

TA̱ APÓSTOL Pablo sa̱ndakaʼánra migora ta̱ Timoteo ña̱ ndiʼi tu̱ʼun Ndióxi̱ ña̱ ni̱ka̱ʼyi̱, xíʼin ta̱chí yi̱i̱ra ni̱ka̱ʼyi̱ña, ta va̱ʼaní sánáʼa̱ña (2 Tim. 3:16). Ta iin taʼví ña̱ tu̱ʼun Ndióxi̱ kúú ña̱ libro ña̱ Levítico. ¿Ndáaña ndákanixi̱níún xa̱ʼa̱ ña̱yóʼo? Nu̱ú sava na̱ yiví, kúúña iin libro ña̱ kúúmií ku̱a̱ʼání ley ña̱ va̱ása ndáyáʼvika tiempo vitin. Soo miíyó síínva íyoña nu̱úyó.

² Ña̱ Levítico ni̱ka̱ʼyi̱ña xa̱a̱ yáʼaka 3,500 ku̱i̱ya̱, soo xíniñúʼukava Jehová ña̱yóʼo ña̱ va̱ʼa sanáʼa̱ra miíyó (Rom. 15:4). Ña̱ libro yóʼo chíndeétáʼanña xíʼinyó ña̱ kunda̱a̱-iniyó ndáa ki̱ʼva ndákanixi̱ní Jehová, xa̱ʼa̱ ña̱kán xíniñúʼu kuni̱kayó sakuaʼayó xa̱ʼa̱ña. Ta ku̱a̱ʼání ña̱ kivi sakuaʼayó xíʼin ña̱ libro yóʼo. Ná kotoyó ku̱míña.

3. ¿Nda̱chun xi̱taxina sacrificio ki̱vi̱ ña̱ Expiación?

³ Ña̱ nu̱ú sákuaʼayó: xíniñúʼu keʼéyó ña̱ kúni̱ Jehová ña̱ va̱ʼa ndakiʼinra sacrificio ña̱ táxiyó ndaʼa̱ra. Ña̱ ki̱vi̱ ña̱ Expiación iin yichi̱ nu̱ú ku̱i̱ya̱ xi̱keʼénaña, ta xi̱ndakutáʼan na̱ ñuu Israel ta ta̱ su̱tu̱ xi̱xaʼníra kití nu̱ú Ndióxi̱. Ña̱yóʼo xi̱sandákaʼánña na̱ ñuu Israel ña̱ va̱ása xíniñúʼu kuumiína ku̱a̱chi. Soo ña̱ ki̱vi̱ kán, ni̱xi̱yo iin ña̱ xi̱xiniñúʼu keʼé ta̱ su̱tu̱, tá kúma̱níka ki̱ʼvira lugar ña̱ Santísimo xíʼin ni̱i̱ kití tí xa̱ʼníra, ta ña̱ xi̱keʼéra yóʼo ndáyáʼviníkaña nu̱ú ña̱ kukáʼnu-ini Ndióxi̱ xa̱ʼa̱ ku̱a̱chi na̱ ñuu.

4. Nda̱a̱ táki̱ʼva káchi Levítico 16:12, 13, ¿ndáaña xi̱keʼé ta̱ su̱tu̱ ña̱ nu̱ú yichi̱ ña̱ xi̱kiʼvira ña̱ Santísimo ña̱ ki̱vi̱ ña̱ Expiación? (Koto na̱ʼná ña̱ va̱xi chí sa̱tá tutu yóʼo).

 ⁴ (Kaʼvi Levítico 16:12, 13). * Ná ndakanixi̱níyó xa̱ʼa̱ ña̱yóʼo. Ta̱ su̱tu̱ ni̱ki̱ʼvira ini ña̱ tabernáculo. Iin ndaʼa̱ra níʼira iin ña̱ʼa nu̱ú ñúʼu incienso ña̱ xáʼa̱n támi, ta inka ndaʼa̱ra níʼira iin braserillo ña̱ oro nu̱ú ñúʼu ñuʼu̱. Ta xi̱ku̱ndichira nu̱ú tíkaa cortina yéʼé ña̱ Santísimo. Ta xíʼin ña̱ to̱ʼó, kíʼvira ña̱ nu̱ú yichi̱ ña̱ ki̱vi̱ kán (soo inka u̱vi̱ yichi̱ keʼéraña) ta xi̱ku̱ndichira nu̱ú Arca ña̱ Pacto. Ta nda̱a̱ táki̱ʼva íyo ta̱ níndichi nu̱ú Jehová saá íyora. Tasaá, chíka̱a̱ra ña̱ incienso nu̱ú ñuʼu̱, ta iníí ini ña̱ veʼe kán nda̱kutú xiko̱ ña̱ xáʼa̱n támi. * Tá ni̱ya̱ʼa loʼo, tuku ni̱ki̱ʼvira ña̱ Santísimo xíʼin ni̱i̱ kití tí ni̱xi̱ʼi̱ xa̱ʼa̱ ku̱a̱china. Tá kúma̱níka ki̱ʼvira xíʼin ni̱i̱ kití tí ni̱xi̱ʼi̱ xa̱ʼa̱ ku̱a̱china, siʼnaka ña̱ incienso xa̱ʼmira.

5. ¿Ndáaña sákuaʼayó xíʼin ki̱ʼva ña̱ xi̱xiniñúʼuna incienso ña̱ ki̱vi̱ ña̱ Expiación?

⁵ ¿Ndáaña sákuaʼayó xíʼin ki̱ʼva ña̱ xi̱xiniñúʼuna incienso ña̱ ki̱vi̱ ña̱ Expiación? Ña̱ Biblia chítáʼanña ña̱ incienso xíʼin oración ña̱ káʼa̱nyó xíʼin Ndióxi̱ (Sal. 141:2; Apoc. 5:8). Ná ndakaʼányó chi ta̱ su̱tu̱ xi̱niʼira incienso xi̱xa̱ʼa̱nra nu̱ú Jehová xíʼin ña̱ to̱ʼó. Ki̱ʼva saá íyoña, tá káʼa̱nyó xíʼin Ndióxi̱ xíʼin ña̱ to̱ʼó kéʼéyóña. Táxiníyó tíxa̱ʼvi xa̱ʼa̱ ña̱ táxira kuyatinyó nu̱úra, nda̱a̱ táki̱ʼva kéʼé iin na̱ va̱lí xíʼin yivána (Sant. 4:8). Saátu táxira ña̱ ná kooyó migora (Sal. 25:14). Ña̱yóʼo ndáyáʼviníña nu̱úyó ta va̱ása kúni̱yó keʼéyó nda̱a̱ ni iin ña̱ va̱ása kútóora.

6. ¿Ndáaña sákuaʼayó xa̱ʼa̱ ña̱ siʼnaka incienso xi̱xaʼmi ta̱ su̱tu̱ tá kúma̱níka taxira sacrificio?

⁶ Ná ndakaʼányó chi ta̱ su̱tu̱ siʼnaka incienso xi̱xaʼmira tá kúma̱níka taxira sacrificio. Saá kúú ña̱ xi̱kunda̱a̱-inira ña̱ vií xi̱xiyó ña̱ xi̱keʼéra nu̱ú Jehová. ¿Ndáaña sákuaʼayó xíʼin ña̱yóʼo? Tá ni̱xi̱yo ta̱ Jesús nu̱ú ñuʼú yóʼo, xi̱niñúʼu keʼéra iin ña̱ ndáyáʼviní tá kúma̱níka taxira miíra ña̱ kuvira, iin ña̱ ndáyáʼvika nu̱ú ña̱ sakǎkura na̱ ñuyǐví. Ta ña̱ va̱ʼa vií koo ña̱ kuvira nu̱ú Jehová, xi̱niñúʼu nda̱kú koo inira ndiʼi tiempo ña̱ xi̱takura. Saá kúú ña̱ ni̱na̱ʼa̱ra ña̱ va̱ʼaníka kúú ña̱ kutakuyó nda̱a̱ táki̱ʼva kúni̱ Jehová. Ta̱ Jesús ni̱na̱ʼa̱ra ña̱ nda̱kúní íyo ña̱ xáʼndachíñu yivára.

7. ¿Nda̱chun ku̱si̱í-ini Jehová xíʼin ndiʼi ña̱ ke̱ʼé ta̱ Jesús tá xi̱takura nu̱ú ñuʼú yóʼo?

⁷ Ta̱ Jesús xi̱niso̱ʼora ndiʼi ña̱ ni̱ka̱ʼa̱n Jehová xíʼinra, ndiʼi tiempo ña̱ xi̱takura nu̱ú ñuʼú yóʼo. Nda̱a̱ ni iin ña̱ ni̱ya̱ʼara nu̱ú, ni ña̱ xa̱a̱ ku̱nda̱a̱-inira ndáa ki̱ʼva koo ña̱ kuvira, va̱ása nítaxira ña̱ kasiña nu̱úra ña̱ na̱ʼa̱ra ña̱ viíní xáʼndachíñu yivára (Filip. 2:8). Tá ni̱ya̱ʼa ta̱ Jesús nu̱ú tu̱ndóʼo ndeéní ni̱ka̱ʼa̱nra xíʼin yivára ta nda̱a̱ xa̱kura (Heb. 5:7). Ña̱ ni̱ka̱ʼa̱nra nda̱a̱ níma̱ra ka̱naña, ta nda̱sandakúña-inira ña̱ kuniso̱ʼora ndiʼi ña̱ ni̱ka̱ʼa̱n yivára. Ña̱ ni̱ka̱ʼa̱nra nda̱a̱ táki̱ʼva ni̱xi̱yo incienso ña̱ xáʼa̱n támi saá ni̱xi̱yoña nu̱ú Jehová. Ndiʼi ña̱ ke̱ʼé ta̱ Jesús tá ni̱xi̱yora nu̱ú ñuʼú yóʼo, sa̱kusi̱íña-ini yivára ta ni̱na̱ʼa̱ra ña̱ viíní xáʼndachíñura.

8. ¿Nda̱saa kivi kundiku̱nyó yichi̱ ta̱ Jesús?

⁸ Kivi kundiku̱nyó yichi̱ ta̱ Jesús, tá ná chika̱a̱yó ndee̱ ña̱ kuniso̱ʼoyó ndiʼi ña̱ káʼa̱n Ndióxi̱ ta nda̱kú koo iniyó xíʼinra. Ki̱vi̱ yáʼayó nu̱ú tu̱ndóʼo káʼa̱nyó xíʼin Jehová ña̱ ná chindeétáʼanra xíʼinyó, chi kúni̱yó sakusi̱íyó-inira. Tá kéʼéyó ndiʼi ña̱yóʼo, náʼa̱yó ña̱ chíndeétáʼanyó xíʼinra. Kúnda̱a̱-iniyó ña̱ va̱ása kuniso̱ʼora ña̱ káʼa̱nyó xíʼinra tá kéʼéyó ña̱ va̱ása kútóora.  Soo, tá tákuyó nda̱a̱ táki̱ʼva kúni̱ra, ña̱ káʼa̱nyó xíʼinra nda̱a̱ táki̱ʼva íyo incienso ña̱ xáʼa̱n támi saá íyoña nu̱úra. Ta saátu kivi kunda̱a̱-iniyó ña̱ tá nda̱kú íyo iniyó xíʼin yiváyó Jehová ta xíniso̱ʼoyó ña̱ káʼa̱nra sakusi̱íyó-inira (Prov. 27:11).

9. ¿Nda̱chun xi̱taxina sacrificio ña̱ kutáʼan viína xíʼin Jehová?

⁹ Ña̱ u̱vi̱ sákuaʼayó: ndásakáʼnuyó Jehová chi táxiyó tíxa̱ʼvi ndaʼa̱ra. Ná kotoyó inka ña̱ ndáyáʼviní ña̱ xi̱keʼé na̱ ñuu Israel ña̱ ndasakáʼnuna Ndióxi̱: ña̱ xi̱taxina ofrenda ña̱ va̱ʼa kutáʼan viína xíʼinra á ña̱ comunión. * Nu̱ú libro ña̱ Levítico, sákuaʼayó ña̱ na̱ ñuu Israel kivi taxina iin sacrificio xa̱ʼa̱ ña̱ kutáʼan viína xíʼin Ndióxi̱ á ña̱ náʼa̱na ña̱ táxina tíxa̱ʼvi ndaʼa̱ra (Lev. 7:11-13, 16-18). Su̱ví xíʼin ña̱ ndúxa níxitaxina ña̱ ofrenda yóʼo, chi xa̱ʼa̱ ña̱ kúni̱ miína xi̱taxinaña. Ta xi̱taxina ña̱ ofrenda yóʼo xa̱ʼa̱ ña̱ kúʼvi̱-inina xínina Jehová. Ta na̱ xi̱taxi ña̱ ofrenda, na̱ veʼena xíʼin na̱ su̱tu̱ kúú na̱ xi̱xixi ku̱ñu tí kití tí ta̱xina. Soo, sava táʼvi tí kití yóʼo kuenta mií Jehová xi̱kuuña. ¿Ndáaña kúúña?

10. ¿Nda̱saa kítáʼan sacrificio ña̱ kutáʼan viína xíʼin Jehová ña̱ káʼa̱n Levítico 3:6, 12, 14-16 xa̱ʼa̱ ña̱ xi̱kuni̱ ta̱ Jesús keʼéra ña̱ kúni̱ yivára?

¹⁰ Ña̱ u̱ni̱ sákuaʼayó: táxiyó ndiʼi ña̱ va̱ʼa ña̱ kúúmiíyó ndaʼa̱ Jehová saáchi kúʼvi̱-iniyó xíniyóra. Nu̱ú Jehová xa̱ʼan tí kití kúú ña̱ va̱ʼaníka. Ta saátu ni̱ka̱ʼa̱nra ña̱ sava ña̱ ñúʼu inirí ndáyáʼviníña, tá kúú ña̱ nduchírí (kaʼvi Levítico  3:6, * 12, * 14-16). * Xa̱ʼa̱ ña̱kán, xi̱kusi̱íní-ini Jehová tá xi̱taxi na̱ ñuu Israel xíʼin ndiʼi níma̱na ña̱ ñúʼu ini tí kití xíʼin xa̱ʼanrí ndaʼa̱ra. Tá xi̱taxi iin na̱ ñuu Israel iin ofrenda, xi̱na̱ʼa̱na ña̱ kúni̱na taxina mií ña̱ va̱ʼa ndaʼa̱ Jehová. Ki̱ʼva saá íyo ña̱ ke̱ʼé ta̱ Jesús, ña̱ ta̱xira ndiʼi ña̱ va̱ʼa ña̱ kúúmiíra ndaʼa̱ yivára, ña̱ ndasakáʼnurara xa̱ʼa̱ ña̱ kúʼvi̱ní-inira xínirara (Juan 14:31). Ta̱ Jesús xi̱kusi̱íní-inira xi̱keʼéra ña̱ kúni̱ Ndióxi̱ ta xi̱kuʼvi̱-inira xi̱xinira leyra (Sal. 40:8). Ni̱kusi̱íní-ini Jehová tá xi̱nira ndáa ki̱ʼva ka̱chíñu se̱ʼera nu̱úra.

11. a) ¿Ndáa ki̱ʼva kítáʼan sacrificio ña̱ kutáʼan viína xíʼin Jehová xíʼin ña̱ ndásakáʼnuyóra? b) ¿Nda̱saa kivi sandíko ña̱yóʼo iniyó?

¹¹ Sacrificio ña̱ xi̱taxina xa̱ʼa̱ ña̱ kutáʼan viína xíʼin Jehová, xa̱ʼa̱ ña̱ kúni̱ miína xi̱taxinaña, ta xíʼin ña̱yóʼo xi̱na̱ʼa̱na ña̱ kúʼvi̱-inina xíninara. Ña̱ káchíñuyó nu̱ú Jehová nda̱a̱ táki̱ʼva íyo ña̱ sacrificio kán saá íyoña, saáchi saá náʼa̱yó ña̱ kúni̱yó xíniyóra. Ta táxiyó ndiʼi ña̱ va̱ʼa ña̱ kúúmiíyó ndaʼa̱ra, chi kúʼvi̱-iniyó xíniyóra xíʼin ndiʼi níma̱yó. Jehová kúsi̱íní-inira tá xítora ña̱ ku̱a̱ʼání na̱ yiví ndásakáʼnunara, xa̱ʼa̱ ña̱ kúʼvi̱-inina xíninara ta saátu ña̱ káʼa̱nra. Va̱ʼaní kúniyó tá kúnda̱a̱-iniyó ña̱ su̱ví nda̱saa ña̱ kéʼéyó ndáyáʼvi nu̱ú Jehová, chi nda̱chun kúú ña̱ kéʼéyóña. Tá kúú, tá xa̱a̱ ku̱chéeyó ta va̱ása kívika keʼéyó ndiʼi ña̱ kúni̱yó, Jehová va̱ása xítora ña̱ va̱ása kúchiñuyó keʼéyó. Sana ndákanixi̱níyó ña̱ loʼo kúú ña̱ kivi taxiyó ndaʼa̱ra, soo ta̱kán xítora ña̱ xa̱ʼa̱ ña̱ kúʼvi̱-iniyó xíniyóra kúú ña̱ kúni̱yó keʼéyó ndiʼi ña̱ kuchiñuyó. Kúsi̱íní-inira ndakiʼinra ndiʼi ña̱ va̱ʼa ña̱ kivi taxiyó ndaʼa̱ra.

12. ¿Nda̱saa xi̱kuni Jehová tá xi̱taxina sacrificio xa̱ʼa̱ ña̱ kutáʼan viína xíʼinra, ta ndáaña kivi kandíxayó?

¹² ¿Ndáaña sákuaʼayó xa̱ʼa̱ sacrificio ña̱ kutáʼan viína xíʼin Jehová? Va̱ʼaní xi̱kunira tá xi̱kana ñi̱ʼma̱ ña̱ xi̱xaʼmi kití tí xi̱taxina. Xa̱ʼa̱ ña̱kán, ná kandíxayó ña̱ kúsi̱íní-ini Jehová xíʼin chiñu ña̱ kéʼéyó nu̱úra xíʼin ndiʼi níma̱yó (Col. 3:23). Ná ndakanixi̱níyó ña̱ kúsi̱íní-inira. Nu̱ú ta̱kán ndiʼi ña̱ kéʼéyó xa̱ʼa̱ ña̱ kúʼvi̱-iniyó xíniyóra ni loʼo á ku̱a̱ʼá kúúña, ndáyáʼviníña nu̱úra ta ndiʼi tiempo ndákaʼánra xa̱ʼa̱ña (Mat. 6:20; Heb. 6:10).

13. Nda̱a̱ táki̱ʼva káchi Levítico 9:23, 24, ¿ndáa ki̱ʼva ni̱na̱ʼa̱ Jehová ña̱ kúsi̱í-inira xíʼin na̱ su̱tu̱?

¹³ Ña̱ ku̱mí sákuaʼayó: Jehová táxira bendición ndaʼa̱ na̱ ñuura. Ná ka̱ʼa̱nyó xa̱ʼa̱ ña̱ ku̱u tá ku̱i̱ya̱ 1512 tá tiempo xi̱naʼá, tá i̱xava̱ʼana tabernáculo xa̱ʼa̱ yuku̱ ña̱ Sinaí (Éx. 40:17). Ta̱ Moisés kúú ta̱ ni̱ka̱ʼa̱n ña̱ koo ta̱ Aarón xíʼin na̱ se̱ʼera su̱tu̱. Ta na̱ ñuu Israel nda̱kutáʼanna ña̱ kotona ndáa ki̱ʼva taxi na̱ su̱tu̱ yóʼo, ña̱ nu̱ú yichi̱ sacrificio ndaʼa̱ Jehová (Lev. 9:1-5). ¿Ndáa ki̱ʼva ni̱na̱ʼa̱ Jehová ña̱ kúsi̱í-inira xíʼin na̱ nda̱ka̱xinna koo su̱tu̱? Tá ta̱xi ta̱ Aarón xíʼin ta̱ Moisés bendición ndaʼa̱ na̱ ñuu Israel, Jehová chi̱ndaʼára iin ñuʼu̱ chí ndiví ña̱ va̱ʼa kaʼmiña ndiʼi sacrificio ña̱ ndóo nu̱ú ña̱ altar (kaʼvi Levítico 9:23, 24). *

14. ¿Nda̱chun ndáyáʼviña nu̱úyó ña̱ ku̱si̱í-ini Ndióxi̱ xíʼin ta̱ su̱tu̱ Aarón xíʼin na̱ se̱ʼera?

 ¹⁴ Xíʼin ña̱yóʼo, ni̱na̱ʼa̱ Jehová ña̱ chíndeétáʼanra xíʼin ta̱ su̱tu̱ Aarón xíʼin na̱ se̱ʼera. Tá xi̱ni na̱ ñuu Israel ña̱ ke̱ʼé Jehová, ku̱nda̱a̱-inina ña̱ chíndeétáʼanra xíʼin na̱ su̱tu̱, ta saátu ku̱nda̱a̱-inina ña̱ xíniñúʼu chindeétáʼanna xíʼinna. Ta ña̱yóʼo ndáyáʼviña nu̱úyó, saáchi na̱ su̱tu̱ na̱ ni̱xi̱yo ñuu Israel ni̱na̱ʼa̱na ña̱ saá koo na̱ su̱tu̱ chí nu̱únínu ta na̱yóʼo ndáyáʼviníkana. Ta̱ Jesús kúú mií ta̱ su̱tu̱ káʼnu, ta na̱ kachíñu xíʼinra kúú na̱ 144,000 sava na̱yóʼo koo su̱tu̱ xíʼin rey (Heb. 4:14; 8:3-5; 10:1).

15, 16. ¿Ndáaña náʼa̱ nu̱úyó ña̱ kúsi̱í-ini Jehová xíʼin na̱ esclavo fiel y prudente?

¹⁵ Tá ku̱i̱ya̱ 1919, ta̱ Jesús nda̱ka̱xinra iin tiʼvi na̱ hermano ña̱ koona na̱ esclavo fiel y prudente. Na̱yóʼo kúú na̱ níʼi yichi̱ xíʼin ña̱ predicación, ta saátu táxina ndiʼi ña̱ xíniñúʼu na̱ ndíku̱n ta̱ Cristo (Mat. 24:45). ¿Á íyo ña̱ náʼa̱ nu̱úyó ña̱ kúsi̱í-ini Jehová xíʼin na̱ esclavo fiel y prudente?

¹⁶ Ta̱ Ndi̱va̱ʼa xíʼin na̱ ñuyǐvíra kúni̱na kasina chiñu ña̱ kéʼé na̱ esclavo fiel y prudente. Ta va̱ása kuchiñuví na̱ esclavo fiel y prudente keʼéna chiñuna, tá va̱ása chíndeétáʼan Jehová xíʼinna. Xa̱a̱ ni̱xi̱yo u̱vi̱ Guerra Mundial, ta íyoní na̱ ndáʼvi iníísaá ñuyǐví, ta saátu íxandi̱va̱ʼana xíʼin na̱ ñuu Ndióxi̱. Soo ni saá, na̱ esclavo fiel y prudente ndákundeékavana táxina ña̱ xíniñúʼu na̱ ndíku̱n ta̱ Cristo na̱ ndóo nu̱ú ñuʼú yóʼo. Ná ndakanixi̱níyó xa̱ʼa̱ ndiʼi publicación ña̱ kúúmiíyó, ña̱ va̱ása cháʼviyó xa̱ʼa̱, ña̱ íyo xa̱a̱ yáʼaka 900 nu̱ú tu̱ʼun. Ña̱yóʼo náʼa̱ña nu̱úyó ña̱ mií Jehová kúú ta̱ chíndeétáʼan xíʼin na̱ ñuura. Ta ña̱ predicación inka bendición Jehová kúúña. Ta xa̱a̱ xíkana nátúʼunna xa̱ʼa̱ tu̱ʼun Ndióxi̱ iníísaá ñuyǐví (Mat. 24:14).  Ta mií Jehová kúú ta̱ níʼi yichi̱ nu̱ú na̱ ñuura ta táxira bendición ndaʼa̱na.

17. ¿Ndáa ki̱ʼva náʼa̱yó ña̱ chíndeétáʼanyó xíʼin na̱ ñuu Jehová?

¹⁷ Ná nda̱ka̱tu̱ʼun xíʼin miíyó: “¿Á kúsi̱í-inii̱ xa̱ʼa̱ ña̱ kítáʼi̱n xíʼin na̱ ñuu Ndióxi̱?”. Ña̱ náʼa̱ nu̱úyó, ña̱ chíndeétáʼan Jehová xíʼin na̱ ñuura íyoña táki̱ʼva íyo ñuʼu̱ ña̱ ki̱xi chí ndiví tá ni̱xi̱yo ta̱ Moisés xíʼin ta̱ Aarón. Íyo ku̱a̱ʼání xa̱ʼa̱ kúú ña̱ xíniñúʼu taxiyó tíxa̱ʼvi (1 Tes. 5:18, 19). ¿Ndáa ki̱ʼva náʼa̱yó ña̱ chíndeétáʼanyó xíʼin na̱ ñuu Jehová? Ña̱ keʼéyó ndiʼi ña̱ káʼa̱n consejo ña̱ va̱xi nu̱ú publicación, reunión xíʼin ña̱ asamblea, ta chika̱a̱níyó ndee̱ ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱ ña̱ koona discípulo (1 Cor. 15:58).

18. ¿Ndáaña chíka̱a̱-iniyó keʼéyó?

¹⁸ Xíniñúʼu chika̱a̱-iniyó ña̱ keʼéyó ndiʼi ña̱ káʼa̱n libro ña̱ Levítico. Xíniñúʼu chika̱a̱yó ndee̱ ña̱ sakusi̱íyó-ini Jehová xíʼin ña̱ kéʼéyó, va̱ʼa ndakiʼinra ndiʼi ña̱ táxiyó ndaʼa̱ra. Ndásakáʼnuyó Ndióxi̱ saáchi táxiyó tíxa̱ʼvi ndaʼa̱ra. Ná ndakundeéyó taxiyó ndiʼi ña̱ va̱ʼa ña̱ kúúmiíyó ndaʼa̱ra xa̱ʼa̱ ña̱ kúʼvi̱-iniyó xíniyóra xíʼin ndiʼi níma̱yó. Ta saátu xíʼin ndiʼi níma̱yó ná chindeétáʼanyó xíʼin na̱ ñuura. Tá ná keʼéyó ndiʼi ña̱yóʼo, náʼa̱yó nu̱ú Jehová ña̱ táxiyó tíxa̱ʼvi ndaʼa̱ra xa̱ʼa̱ ña̱ káchíñuyó nu̱úra.