1. ¿Ndáaña sana xa̱a̱ ndákanixi̱níyó?

 ¿Á YÍʼVIÚN tá ndákanixi̱níún xa̱ʼa̱ tu̱ndóʼo ña̱ xa̱a̱ ku̱nu̱mí kixaa̱? Tá kúú, tá ná ndiʼi-xa̱ʼa̱ veʼe-ñu̱ʼu vatá, tá ná kixáʼa Gog ña̱ Magog ixandi̱va̱ʼaña xíʼinyó á tá ná kixaa̱ Armagedón. ¿Á xa̱a̱ ndákanixi̱níún ña̱ va̱ása nda̱kú koo iniún xíʼin Ndióxi̱ tá ná kuu ña̱yóʼo? Tá saá ndóʼún, ña̱ chindeétáʼan xíʼún kúú texto nu̱ú ka̱na artículo yóʼo. Ta̱ Jesús kúú ta̱ ni̱ka̱ʼa̱n tu̱ʼun yóʼo xíʼin na̱ discípulora: “Kǒo kundi̱ʼi̱-inindó. Kandíxandó Ndióxi̱” (Juan 14:1). Tá kándíxaníyó Ndióxi̱ kuchiñuvayó kundeé-iniyó ya̱ʼayó nu̱ú tu̱ndóʼo ña̱ kixi nu̱úyó chí nu̱únínu.

2. ¿Ndáaña xíniñúʼu keʼéyó ña̱ va̱ʼa kandíxakayó Ndióxi̱, ta ndáaña ka̱ʼa̱nyó xa̱ʼa̱ nu̱ú artículo yóʼo?

² Ña̱ va̱ʼa kandíxakayó Ndióxi̱, ta kundeé-iniyó nu̱ú tu̱ndóʼo ña̱ kixi nu̱úyó chí nu̱únínu, xíniñúʼu kotoyó ndáaña kéʼéyó tá yáʼayó nu̱ú tu̱ndóʼo tiempo vitin. Ta tá ná keʼéyó ña̱yóʼo, saá kúú ña̱ kunda̱a̱-iniyó ama kúú ña̱ xíniñúʼu kandíxaníkayó Ndióxi̱. Tá kúndeé-iniyó yáʼayó nu̱ú iin tu̱ndóʼo saá kúú ña̱ kándíxaníkayó Ndióxi̱, ta ña̱yóʼo kúú ña̱ chindeétáʼan xíʼinyó kundeé-iniyó tá ná kixi tu̱ndóʼo nu̱úyó. Nu̱ú artículo yóʼo ka̱ʼa̱nyó xa̱ʼa̱ ku̱mí tu̱ndóʼo ña̱ ni̱ya̱ʼa na̱ discípulo ta̱ Jesús nu̱ú, ta tá ni̱ya̱ʼana nu̱úña ni̱na̱ʼa̱na ña̱ xi̱niñúʼu kandíxakana Ndióxi̱. Ta saátu kotoyó ndáaña xíniñúʼu keʼéyó ña̱ va̱ʼa kundeé-iniyó nu̱ú tu̱ndóʼo ña̱ kúúmiíyó tiempo vitin, ta ndáa ki̱ʼva chindeétáʼan ña̱yóʼo xíʼinyó ña̱ koo tu̱ʼvayó ya̱ʼayó nu̱ú ña̱ kixi nu̱úyó chí nu̱únínu.

3. Nda̱a̱ táki̱ʼva káchi Mateo 6:30, 33, ¿ndáaña ni̱ka̱ʼa̱n ta̱ Jesús xa̱ʼa̱ ña̱ kándíxayó Ndióxi̱?

³ Ndiʼiva na̱ ta̱a kúni̱na taxina ña̱ xíniñúʼu ñá síʼina xíʼin se̱ʼena, tá kúú ña̱ kuxuna, ti̱ko̱to̱na xíʼin veʼe nu̱ú koona. Soo tiempo  vitin, ku̱a̱ʼánína íxayo̱ʼvi̱ña xíʼinna taxina ndiʼi ña̱yóʼo ndaʼa̱ na̱ veʼena. Sava na̱ hermano kǒoka chiñu kúúmiína, ta ni xíkanína nándukúnaña, kǒoña ndáni̱ʼína. Inkana va̱ása xíínna kiʼinna chiñu ña̱ táxina ndaʼa̱na, chi va̱ása kívi keʼé na̱ ndásakáʼnu Ndióxi̱ chiñu yóʼo. Tá ná kundoʼoyó ña̱yóʼo, xíniñúʼu kandíxaníyó ña̱ taxi Jehová ndiʼi ña̱ xíniñúʼuyó. Ta ña̱yóʼo kúú ña̱ ni̱ka̱ʼa̱n ta̱ Jesús xíʼin na̱ discípulora tá ta̱xira iin discurso xi̱ní yuku̱ (kaʼvi Mateo 6:30, 33). Tá ná kandíxayó ña̱ va̱ása sandákoo ndaʼa̱ Jehová miíyó saá kúú ña̱ kundi̱ʼi̱níka-iniyó xa̱ʼa̱ chiñu miíra, chi ña̱yóʼo kúú ña̱ ndáyáʼvika. Ta tá ná kuniyó ndáa ki̱ʼva táxi Jehová ndiʼi ña̱ xíniñúʼuyó, saá kúú ña̱ kuyatinyó nu̱úra ta kandíxaníkayóra.

4, 5. ¿Ndáaña chíndeétáʼan xíʼin iin na̱ familia ña̱ va̱ása kundi̱ʼi̱-inina xa̱ʼa̱ ña̱ kúma̱ní nu̱úna?

⁴ Ná ka̱ʼa̱nyó xa̱ʼa̱ ña̱ ndo̱ʼo na̱ familia Castro, na̱ íyo chí Venezuela. Na̱yóʼo xa̱a̱ kíʼinna kuenta ndáa ki̱ʼva chíndeétáʼan Jehová xíʼinna ña̱ kuumiína ndiʼi ña̱ xíniñúʼuna. Na̱ familia yóʼo xi̱chiʼina nu̱ú ñuʼú ña̱ xi̱kuumiína, ta kán xi̱kiʼinna loʼo xu̱ʼún ña̱ xi̱xiniñúʼuna. Soo iin ki̱vi̱, na̱ yiví na̱ ndi̱va̱ʼa-ini ki̱ndaana ñuʼúna ta ni̱ka̱ʼa̱nna xíʼinna ña̱ ná keena nu̱úña. Ta̱ hermano yóʼo káchira: “Vitin káchíñundi̱ nu̱ú iin ñuʼú loʼo ña̱ sa̱tátina ndi̱ʼi̱, yóʼo kíʼinndi̱ loʼo xu̱ʼún ña̱ xíniñúʼundi̱. Ndiʼi xi̱ta̱a̱n káʼi̱n xíʼin Jehová ña̱ ná taxira ña̱ kuniñúʼundi̱ ki̱vi̱ kán”. Yo̱ʼvi̱ní ña̱ yáʼa na̱ familia yóʼo nu̱ú, soo ndáa-inina Jehová ña̱ taxira ndiʼi ña̱ xíniñúʼuna. Ña̱kán ndákundeéna xáʼa̱nna reunión, ta saátu ndákundeéna nátúʼunna xa̱ʼa̱ Ndióxi̱. Siʼnaka chiñu Ndióxi̱ kúú ña̱ ndíʼi̱-inina xa̱ʼa̱, ta miíra kúú ta̱ ndáañaʼá.

⁵ Ta̱ Miguel xíʼin ñá síʼira ñá Yurai, chíka̱a̱na ndee̱ kotona ndáa ki̱ʼva ndáa Jehová miína. Sava yichi̱, Jehová xíniñúʼura na̱ hermano ña̱ taxina ña̱ xíniñúʼu na̱yóʼo, á ña̱ va̱ʼa chindeétáʼanna xíʼin ta̱ Miguel ña̱ ndani̱ʼíra iin chiñu. Ta sava yichi̱, Jehová xíniñúʼura na̱ sucursal ña̱ va̱ʼa chindeétáʼanna xíʼinna. Jehová va̱ása sándakoondaʼa̱rana. Ta xa̱ʼa̱ ña̱yóʼo, na̱ familia yóʼo kándíxaníkana Jehová. Se̱ʼena ñá nu̱ú ñá naní Yoselin, na̱túʼunñá ndáa ki̱ʼva xa̱a̱ chíndeétáʼan Jehová xíʼinna. Ta ña̱yóʼo ni̱ka̱ʼa̱nñá tá xa̱a̱ sa̱ndíʼiñá na̱túʼunñá: “Tá xítoi̱ ña̱ va̱ʼaní chíndeétáʼan Jehová xíʼinndi̱, va̱ʼaní sándi̱ko ña̱yóʼo inii̱. Migoi̱ kúúra ta kándíxai̱ ña̱ iinlá ta̱yóʼo kúú ta̱ kivi chindeétáʼan xíʼi̱n”. Ta ni̱ka̱ʼa̱nkañá: “Ndiʼi tu̱ndóʼo ña̱ yáʼandi̱ nu̱ú chíndeétáʼanña xíʼinndi̱ ña̱ koo tu̱ʼvandi̱ ya̱ʼandi̱ nu̱ú tu̱ndóʼo ña̱ yo̱ʼvi̱ka kixi nu̱úndi̱ chí nu̱únínu”.

6. Tá kúma̱ní xu̱ʼún ndaʼún, ¿ndáaña xíniñúʼu keʼún ña̱ va̱ʼa kandíxakaún Ndióxi̱?

⁶ ¿Á kúma̱ní xu̱ʼún nu̱ún? Tá saá ndóʼún, sana xóʼvi̱nívaún. Ni yo̱ʼvi̱ní tu̱ndóʼo ña̱ ndíka̱ún nu̱ú kivi kuniñúʼún ña̱yóʼo ña̱ va̱ʼa kandíxakaún Ndióxi̱. Ka̱ʼa̱n xíʼinra, kaʼvi tu̱ʼun ña̱ ni̱ka̱ʼa̱n ta̱ Jesús nu̱ú Mateo 6:25-34, ta ndakanixi̱ní xa̱ʼa̱ña. Ta saátu ndakanixi̱ní ndáa ki̱ʼva ndáa Jehová na̱ hermano na̱ íyo tiempo vitin, na̱ ndíʼi̱-ini xa̱ʼa̱ chiñura (1 Cor. 15:58). Tá ná keʼún ña̱yóʼo saá kúú ña̱ kundaaníka-iniún Jehová. Ta nda̱a̱ táki̱ʼva xi̱ndaara na̱ ni̱ya̱ʼa nu̱ú  táʼan tu̱ndóʼo ña̱ kúúmiíún, saátu kundaara yóʼóva. Ta̱yóʼo xíni̱níra ndáaña xíniñúʼún, ta saátu xíni̱ra ndáa ki̱ʼva taxiraña ndaʼún. Tá ná kotoún ndáa ki̱ʼva chíndeétáʼan Jehová xíʼún, saá kúú ña̱ kandíxaníkaúnra, ta ña̱yóʼo chindeétáʼan xíʼún kundeé-iniún nu̱ú tu̱ndóʼo ña̱ kixi nu̱ún.

7. Nda̱a̱ táki̱ʼva káchi Mateo 8:23-26, ¿ndáaña ni̱na̱ʼa̱ na̱ discípulo ta̱ Jesús tá ndeéní ku̱un sa̱vi̱?

⁷ Iin yichi̱ tá ku̱a̱ʼa̱n ta̱ Jesús xíʼin na̱ discípulora ini iin barco, ki̱xáʼa ndeéní kúun sa̱vi̱. Ta̱ Jesús xi̱niñúʼura ña̱ ku̱u yóʼo ña̱ va̱ʼa chindeétáʼanra xíʼin na̱ discípulora ña̱ kunda̱a̱-inina ña̱ xi̱niñúʼu kandíxakana Ndióxi̱ (kaʼvi Mateo 8:23-26). Xa̱ʼa̱ ña̱ ndeéní ki̱xáʼa kúun sa̱vi̱, ki̱xáʼa ni̱ki̱ʼvi ti̱kui̱í ini tú barco soo ta̱ kísi̱va kúú ta̱ Jesús. Ta xa̱ʼa̱ ña̱ ni̱yi̱ʼvíní na̱ discípulo, ni̱xa̱ʼa̱nna sa̱ndákaxina-inira, ta ni̱ka̱ʼa̱nna xíʼinra ña̱ ná sakǎkurana. Soo ta̱ Jesús ni̱ka̱ʼa̱nra xíʼinna: “Ndóʼó na̱ kǒo kándíxa Ndióxi̱, ¿nda̱chun ndeéní yíʼvindó?”. Na̱ discípulora xi̱niñúʼu kandíxana ña̱ kuchiñuva Jehová sakǎkura ta̱ Jesús, ta saátu miína. ¿Ndáaña sákuaʼayó xíʼin ña̱yóʼo? Ña̱ kandíxaníyó Ndióxi̱ chindeétáʼanña xíʼinyó kundeé-iniyó tá ndeéní kúun sa̱vi̱ ñuu nu̱ú ndóoyó, ta saátu chindeétáʼanña xíʼinyó ya̱ʼayó nu̱ú tu̱ndóʼo ña̱ yo̱ʼvi̱ní.

8, 9. ¿Ndáa tu̱ndóʼo ni̱ya̱ʼa ñá Anel nu̱ú, ta ndáaña chi̱ndeétáʼan xíʼinñá?

⁸ Iin ñá hermana ñá íyo chí Puerto Rico ñá naní Anel, ni̱ya̱ʼañá nu̱ú iin tu̱ndóʼo ña̱ yo̱ʼvi̱ní. Ná kotoyó ndáa ki̱ʼva chi̱ndeétáʼan ña̱yóʼo xíʼinñá ña̱ va̱ʼa kandíxakañá Ndióxi̱. Xa̱ʼa̱ ña̱ ndeéní ku̱un sa̱vi̱ chí Puerto Rico tá ku̱i̱ya̱ 2017, ndi̱ʼi̱-xa̱ʼa̱ veʼeñá ta ni kǒoka chiñu níxi̱kuumiíñá. Ñáyóʼo káchiñá: “Ni̱yi̱ʼvíníi̱ tá ndo̱ʼi̱ ña̱yóʼo, soo ni̱ka̱ʼa̱nníi̱ xíʼin Jehová ña̱ chindeétáʼanra xíʼi̱n, ta chi̱ka̱i̱ ndee̱ ña̱ va̱ása ndi̱ʼi̱ní-inii̱”.

⁹ Inka ña̱ va̱ʼaní chi̱ndeétáʼan xíʼin ñá Anel kúú ña̱ va̱ʼaní ka̱ndíxañá na̱ ñuu Ndióxi̱. Káchiñá: “Xa̱ʼa̱ ña̱ xi̱ndikui̱n ña̱ káʼa̱n na̱ ñuu Ndióxi̱, ña̱yóʼo chi̱ndeétáʼanña xíʼi̱n ña̱ va̱ása ndi̱ʼi̱ní-inii̱. Na̱ hermano chi̱ka̱a̱nína ndee̱ xíʼi̱n, ta ta̱xina ndiʼi ña̱ xi̱xiniñúʼi̱, tasaá ki̱ʼi̱n kuenta ña̱ íyova Jehová xíʼi̱n”. Ta ni̱ka̱ʼa̱nkañá: “Ku̱a̱ʼání ña̱ʼa ta̱xi Jehová ndaʼíi̱, ta ki̱xáʼíi̱ kándíxakai̱ra”.

10. ¿Ndáaña xíniñúʼu keʼún tá ndíka̱ún ndaʼa̱ iin tu̱ndóʼo ña̱ ndeéní?

¹⁰ ¿Á ndíka̱ún ndaʼa̱ iin tu̱ndóʼo ña̱ yo̱ʼvi̱ní? Sana xóʼvi̱ún xa̱ʼa̱ ña̱ ndeéní ku̱un sa̱vi̱, xa̱ʼa̱ ña̱ ni̱ta̱an á xa̱ʼa̱ ña̱ ku̱u inkaka tu̱ndóʼo. Á sanatu xóʼvi̱ún xa̱ʼa̱ ña̱ kúúmiíún iin kue̱ʼe̱ ña̱ ndeéní. Ta xa̱ʼa̱ ña̱yóʼo kúsuchíní-iniún ta va̱ása xíni̱ún ndáaña keʼún. Sana ndíʼi̱ní-iniún sava yichi̱, soo va̱ása taxiún ña̱ kasi ña̱yóʼo nu̱ún ña̱ kandíxakaún Ndióxi̱. Natúʼun xíʼinra xa̱ʼa̱ ndiʼi ña̱ ndóʼún. Ta kivi kandíxaníkaún Ndióxi̱ tá ná ndakaʼún xa̱ʼa̱ ndiʼi yichi̱ ña̱ xa̱a̱ chi̱ndeétáʼanra xíʼún (Sal. 77:11, 12). Kivi kandíxaún ña̱ va̱ása sandákoondaʼa̱ Jehová yóʼó ni tiempo vitin ta ni chí nu̱únínu.

11. ¿Nda̱chun xíniñúʼu kuniso̱ʼoyó ña̱ káʼa̱n na̱ níʼi yichi̱ nu̱úyó?

 ¹¹ ¿Ndáa inkakaña chindeétáʼan xíʼún ya̱ʼún nu̱ú tu̱ndóʼo? Nda̱a̱ táki̱ʼva ni̱ka̱ʼa̱n ñá Anel, ña̱ chindeétáʼan xíʼún kúú ña̱ kandíxaún na̱ ñuu Ndióxi̱. Xíniñúʼu sakúaʼún kundaa-iniún na̱ nda̱kaxin Jehová xíʼin ta̱ Jesús, chi na̱yóʼo kúú na̱ ndáa-inina chindeétáʼan xíʼún. Ta nda̱a̱ sava yichi̱ ka̱ʼa̱nna xíʼún keʼún iin ña̱ʼa ña̱ va̱ása kúnda̱a̱- iniún xíʼin. Soo ndakaʼún ña̱ taxiva Jehová ña̱ va̱ʼa ndaʼún tá ná kuniso̱ʼún ña̱ káʼa̱nna. Tu̱ʼunra, ta saátu ña̱ ndóʼo inka na̱ hermano sánáʼa̱ña miíyó ña̱ ndáyáʼviní kuniso̱ʼoyó ña̱ káʼa̱nna xíʼinyó, chi saá kúú ña̱ ka̱kuyó (Éx. 14:1-4; 2 Crón. 20:17). Tá ná ndakanixi̱níún xa̱ʼa̱ ña̱yóʼo, chindeétáʼanña xíʼún kuniso̱ʼún ña̱ káʼa̱n na̱ ñuu Ndióxi̱ xíʼún vitin ta saátu chí nu̱únínu (Heb. 13:17). Tasaá va̱ása yi̱ʼvíún ya̱ʼún nu̱ú ña̱ gran tribulación (Prov. 3:25).

12. Ña̱ kándíxayó Ndióxi̱, ¿ndáa ki̱ʼva chindeétáʼanña xíʼinyó tá íxandi̱va̱ʼana xíʼinyó? (Lucas 18:1-8).

¹² Ta̱ Jesús xi̱kunda̱a̱-inira ña̱ tá ná ixandi̱va̱ʼana xíʼin na̱ discípulora, ixayo̱ʼvi̱ña xíʼinna kandíxana Ndióxi̱. Ta ña̱ va̱ʼa chindeétáʼanra xíʼinna na̱túʼunra iin historia xíʼinna, ta ña̱yóʼo va̱xiña nu̱ú libro ña̱ ka̱ʼyí ta̱ Lucas. Ta̱ Jesús na̱túʼunra xa̱ʼa̱ iin ñaʼá ñá ni̱xi̱ʼi̱ yií, ña̱ ni̱xa̱ʼa̱nñá ni̱ka̱ʼa̱nñá xíʼin iin juez ta̱ va̱ása nda̱kú-ini ña̱ va̱ʼa ná ndatiinra ku̱a̱chi xa̱ʼa̱ñá. Ñáyóʼo tuku ta tuku xi̱xa̱ʼa̱nñá nu̱úra, chi xi̱kunda̱a̱-iniñá ña̱ chindeétáʼanra xíʼinñá xa̱ʼa̱ ña̱ ku̱a̱ʼání yichi̱ xi̱xa̱ʼa̱nñá nu̱úra. Tasaá ke̱ʼévara. ¿Ndáaña sákuaʼayó xíʼin ña̱yóʼo? Jehová nda̱kúní-inira, ña̱kán ni̱ka̱ʼa̱n ta̱ Jesús ña̱yóʼo: “Tá saá, ¿á va̱ása chindeé Ndióxi̱ na̱ nda̱kaxinra xa̱ʼa̱ ña̱ káʼa̱nnína xíʼinra ñuú xíʼin káʼñu [...]?” (kaʼvi Lucas 18:1-8). Tándi̱ʼi, ta̱ Jesús ni̱ka̱ʼa̱nkara: “Tá ná kixaa̱ ta̱ kúú se̱ʼe ta̱a, ¿á ndani̱ʼíra na̱ kándíxaní Ndióxi̱ nu̱ú ñuʼú yóʼo?”. Tá íxandi̱va̱ʼana xíʼinyó, xíniñúʼu kúee koo iniyó. Ta ka̱ʼa̱nníyó xíʼin Ndióxi̱ ña̱ ná chindeétáʼanra xíʼinyó, tasaá na̱ʼa̱yó ña̱ kándíxaníyóra nda̱a̱ táki̱ʼva ke̱ʼé ñá ñaʼá ñá ni̱xi̱ʼi̱ yií. Ta ná kandíxayó ña̱ kuee á ya̱chi̱, chindeétáʼanva Jehová xíʼinyó. Ta ná va̱ása kaka-iniyó ña̱ kuniso̱ʼovara ndiʼi ña̱ káʼa̱nyó xíʼinra. Sava yichi̱ ndákanda̱-iniyó xíʼin ki̱ʼva ña̱ ndákuiinra oraciónyó.

13. ¿Ndáa ki̱ʼva chi̱ndeétáʼan ña̱ oración xíʼin iin na̱ familia?

¹³ Ná ka̱ʼa̱nyó xa̱ʼa̱ ña̱ ndo̱ʼo iin ñá hermana ñá naní Vero xíʼin yiíñá ta̱ va̱ása kúú testigo Jehová, ta saátu xíʼin ñá loʼo se̱ʼeñá ñá kúúmií 15 ku̱i̱ya̱. Na̱yóʼo ndóona chí República Democrática del Congo. Iin ki̱vi̱ ki̱xáʼa na̱ soldado íxandi̱va̱ʼana xíʼin na̱ ñuuna, ña̱kán xi̱nuñá xíʼin yiíñá ta saátu ñá loʼo se̱ʼeñá. Ta tá ku̱a̱ʼa̱nna chí yichi̱, nda̱ni̱ʼí-táʼanna xíʼin na̱ soldado ta va̱ása nítaxina ku̱ʼu̱nna, ta ni̱ka̱ʼa̱nna xíʼinna ña̱ kaʼnínana. Ñá Vero ki̱xáʼañá xákuñá, ta ña̱ va̱ʼa sandíko ñá loʼo se̱ʼeñá iniñá, ndeéní ki̱xáʼañá káʼa̱nñá xíʼin Jehová, ta tuku ta tuku ni̱ka̱ʼa̱nñá ki̱vi̱ra. Ta tá sa̱ndíʼiñá ni̱ka̱ʼa̱nñá, iin ta̱  ndísochíñu xíʼin na̱ soldado kán ni̱nda̱ka̱tu̱ʼunrañá: “Ñá loʼo, ¿ndáana sa̱náʼa̱ yóʼó ka̱ʼún xíʼin Ndióxi̱?”. Ta nda̱kuiinñá yuʼúra: “Siʼíi̱ sa̱náʼa̱ yi̱ʼi̱, ta saátu sa̱náʼa̱ñá yi̱ʼi̱ ña̱ ná keʼíi̱ oración nda̱a̱ táki̱ʼva sa̱náʼa̱ ta̱ Jesús miíyó nu̱ú Mateo 6:9-13”. Tasaá ni̱ka̱ʼa̱n ta̱ ta̱a yóʼo xíʼinñá: “Kúáʼan xíʼin na̱ yiváún, ta Jehová Ndióxi̱ún ná kundaa ndóʼó”.

14. ¿Ama kúú ña̱ kivi ixayo̱ʼvi̱ña xíʼinyó kandíxayó Ndióxi̱, ta ndáaña chindeétáʼan xíʼinyó kundeé-iniyó?

¹⁴ Ña̱ ndo̱ʼo na̱yóʼo sánáʼa̱ña miíyó ña̱ ndáyáʼviní ka̱ʼa̱nyó xíʼin Ndióxi̱. Soo, ¿ndáaña keʼún tá va̱ása kama ndákuiin Ndióxi̱ ña̱ káʼún xíʼinra? Nda̱a̱ táki̱ʼva ke̱ʼé ñá na̱túʼun ta̱ Jesús xa̱ʼa̱, va̱ása sandákoún ka̱ʼún xíʼin Ndióxi̱, ta kandíxaún ña̱ va̱ása sandákoondaʼa̱ra yóʼó, ta saátu kivi kandíxaún ña̱ kuee á ya̱chi̱ ndakuiinra oración ña̱ kéʼún nu̱úra. Ndakundeún ndukún espíritu santo nu̱ú Jehová (Filip. 4:13). Ta ndakaʼún ña̱ si̱lóʼo kúma̱ní ta taxi Jehová ña̱ va̱ʼa ndaʼún, tasaá nandósó-iniún xa̱ʼa̱ ndiʼi ña̱ sáxo̱ʼvi̱ yóʼó. Tá chíndeétáʼanra xíʼún yáʼún nu̱ú tu̱ndóʼo ña̱ ndeéní, saá kúú ña̱ kundeé-iniún ya̱ʼún nu̱ú tu̱ndóʼo ña̱ kixi nu̱ún chí nu̱únínu (1 Ped. 1:6, 7).

15. Nda̱a̱ táki̱ʼva káchi Mateo 17:19, 20, ¿ndáaña xi̱niñúʼu keʼéka na̱ discípulo ta̱ Jesús?

¹⁵ Ta̱ Jesús ni̱ka̱ʼa̱nra xíʼin na̱ discípulora ña̱ kandíxana Ndióxi̱ kúú ña̱ chindeétáʼan xíʼinna ya̱ʼana nu̱ú tu̱ndóʼo (kaʼvi Mateo 17:19, 20). Ku̱a̱ʼá yichi̱ ku̱chiñuna ta̱vána na̱ ta̱chí ndi̱va̱ʼa ini na̱ yiví, soo sava yichi̱ va̱ása níkuchiñuna keʼénaña. ¿Nda̱chun? Ta̱ Jesús ni̱ka̱ʼa̱nra xíʼinna ña̱ xi̱niñúʼu kandíxakana Ndióxi̱. Ta ni̱ka̱ʼa̱ntura xíʼinna ña̱ tá kándíxanína Ndióxi̱, kuchiñuna ya̱ʼana nu̱ú tu̱ndóʼo ña̱ náʼnuní, ña̱ íyo nda̱a̱ táki̱ʼva íyo yuku̱. Ta saátu tiempo vitin kuchiñuyó ya̱ʼayó nu̱ú tu̱ndóʼo ña̱ yo̱ʼvi̱ní tá ná kandíxaníyó Ndióxi̱.

16. Xa̱ʼa̱ ña̱ kándíxaní ñá Geydi Ndióxi̱, ¿ndáa ki̱ʼva chíndeétáʼanña xíʼinñá ya̱ʼañá nu̱ú tu̱ndóʼo?

¹⁶ Ná ka̱ʼa̱nyó xa̱ʼa̱ ña̱ ndo̱ʼo ñá Geydi, iin ñá hermana ñá íyo chí Guatemala. Iin ki̱vi̱ tá nda̱ndikó yiíñá ña̱ ni̱xa̱ʼa̱nra reunión, xa̱ʼnínara. Soo ña̱ chíndeétáʼanní xíʼinñá ña̱ kundeé-iniñá kúú ña̱ kándíxaníñá Jehová. Ñáyóʼo káchiñá: “Tá káʼi̱n xíʼin Jehová, nátúʼi̱n xíʼinra xa̱ʼa̱ ndiʼi ña̱ ndóʼi̱, ta ña̱yóʼo sándi̱koníña-inii̱. Ta kíʼi̱n kuenta ndáa ki̱ʼva xíniñúʼura na̱ veʼi̱ á na̱ hermano ña̱ va̱ʼa chindeétáʼanra xíʼi̱n. Ta ña̱ chíndeétáʼan xíʼi̱n ña̱ va̱ása kusuchíní-inii̱ kúú ña̱ ndíʼi̱níka-inii̱ xa̱ʼa̱ chiñura. Xíʼin ña̱ ndo̱ʼi̱ yóʼo ku̱ndaa̱-inii̱ ña̱ kuchiñui̱ ya̱ʼii̱ nu̱ú nda̱a̱ ndáaka tu̱ndóʼo, tá ná chindeétáʼan Jehová xíʼin ta̱ Jesús xíʼi̱n, ta saátu na̱ hermano”.

17. ¿Ndáaña xíniñúʼu keʼún tá yáʼún nu̱ú tu̱ndóʼo ña̱ yo̱ʼvi̱ní?

¹⁷ ¿Á xa̱a̱ ni̱xi̱ʼi̱ iin na̱ veʼún? Tavá tiempo ña̱ kaʼviún xa̱ʼa̱ na̱ nda̱taku tiempo xi̱naʼá, ta ña̱yóʼo chindeétáʼan xíʼún ña̱ kandíxaún ña̱ sandátaku Jehová na̱ veʼún. ¿Á kúsuchíní-iniún xa̱ʼa̱ ña̱ ki̱ta na̱ veʼún ti̱xin ñuu Ndióxi̱? Kaʼvi xa̱ʼa̱ ña̱ kivi chindeétáʼan xíʼún kandíxaún ña̱ va̱ʼava kúú ña̱ kíta iinna ti̱xin ñuu  Ndióxi̱ tá ni̱ki̱ʼvina ku̱a̱chi. Ta ni nda̱a̱ ndáaka tu̱ndóʼo ná kixi nu̱ún, va̱ása ndakava-iniún va̱ʼaka ndukú ki̱ʼva ña̱ kandíxakaún Ndióxi̱. Ka̱ʼa̱n xíʼin Jehová xa̱ʼa̱ ndiʼi ña̱ ndóʼún. Va̱ása kuxíkáún nu̱ú na̱ hermano, va̱ʼaka kuyatiún nu̱úna (Prov. 18:1). Ni kúsuchíní-iniún á xákún, chika̱a̱ ndee̱ keʼún ña̱ʼa ña̱ chindeétáʼan xíʼún kundeé-iniún (Sal. 126:5, 6). Ta saátu, va̱ása ndakoún ña̱ ku̱ʼún reunión, ña̱ natúʼún xa̱ʼa̱ Ndióxi̱ á ña̱ kaʼviún tu̱ʼunra. Ndakundeún ndakanixi̱níún xa̱ʼa̱ ña̱ káʼa̱n Ndióxi̱ taxira ndaʼún chí nu̱únínu. Tá xítoún ndáa ki̱ʼva chíndeétáʼan Jehová xíʼún, saá kúú ña̱ kandíxaníkaúnra.

18. Tá kíʼún kuenta ña̱ xíniñúʼu kandíxakaún Ndióxi̱, ¿ndáaña xíniñúʼu keʼún?

¹⁸ Va̱ása ndakava-iniún tá iin tu̱ndóʼo ña̱ ni̱ya̱ʼún nu̱ú á iin ña̱ yáʼún nu̱ú vitin náʼa̱ña ña̱ xíniñúʼu kandíxaníkaún Ndióxi̱. Ndukú ki̱ʼva ña̱ kandíxakaúnra. Ta ndukú táʼan ña̱ ndu̱kú na̱ apóstol nu̱ú ta̱ Jesús tá ka̱china: “Chindeétáʼan xíʼinndi̱ ña̱ ná kandíxakandi̱ Ndióxi̱” (Luc. 17:5). Ndakanixi̱ní xa̱ʼa̱ ndiʼi na̱ hermano na̱ ni̱ka̱ʼa̱nyó xa̱ʼa̱ nu̱ú artículo yóʼo. Nda̱a̱ táki̱ʼva ke̱ʼé ta̱ Miguel xíʼin ñá Yurai, ndakaʼán xa̱ʼa̱ ndiʼi yichi̱ ña̱ xa̱a̱ chíndeétáʼan Jehová xíʼún. Ta nda̱a̱ táki̱ʼva ke̱ʼé ñá loʼo se̱ʼe ñá Vero ta saátu ñá Anel, xíʼin ndinuʼu-iniún ka̱ʼún xíʼin Jehová, ta ndáyáʼviní keʼún ña̱yóʼo tá yáʼún nu̱ú tu̱ndóʼo. Ta saátu nda̱a̱ táki̱ʼva ke̱ʼé ñá Geydi taxi ná chindeétáʼan na̱ veʼún xíʼin na̱ hermano xíʼún, saáchi Jehová kúú ta̱ xíniñúʼu na̱yóʼo ña̱ va̱ʼa chindeétáʼanra xíʼún. Tá táxiún ña̱ chindeétáʼan Jehová xíʼún tá yáʼún nu̱ú tu̱ndóʼo tiempo vitin, saá kúú ña̱ kandíxaníúnra ña̱ chindeétáʼanra xíʼún kundeé-iniún ya̱ʼún nu̱ú tu̱ndóʼo ña̱ kixi nu̱ún.

19. ¿Ndáaña xi̱kandíxa ta̱ Jesús, ta ndáaña kivi kandíxaún tiempo vitin?

¹⁹ Ta̱ Jesús chi̱ndeétáʼanra xíʼin na̱ discípulora ña̱ kunda̱a̱-inina ama kúú ña̱ xíniñúʼu kandíxaníkana Ndióxi̱. Ta va̱ása níxi̱ka-inira ña̱ mií Jehová chindeétáʼan xíʼin na̱yóʼo tá ná kixi tu̱ndóʼo nu̱úna (Juan 14:1; 16:33). Saátu xi̱kandíxara ña̱ ku̱a̱ʼání na̱ yiví ka̱kuna xa̱ʼa̱ ña̱ kándíxana Ndióxi̱ tá ná kixaa̱ ña̱ gran tribulación (Apoc. 7:9, 14). ¿Á ka̱kún xíʼin na̱yóʼo? Ka̱kuvaún tá ná chindeétáʼan Jehová xíʼún, ta saátu tá ná chika̱a̱ún ndee̱ ña̱ kandíxaúnra tiempo vitin (Heb. 10:39).