1, 2. ¿Nda̱chun xíniñúʼu ndixaní kuʼvi̱-iniyó kunitáʼanyó?

 ¿NDA̱CHUN ndixaní xíniñúʼu kuʼvi̱-iniyó kunitáʼanyó? Sava proverbio ña̱ va̱xi nu̱ú Biblia káʼa̱nña xíʼinyó nda̱chun xíniñúʼu na̱ʼa̱yóña. Tá kúú ña̱yóʼo: “Ndiʼi tiempo na̱ʼún ña̱ ndixaní kúʼvi̱-iniún xíniún inkana, ta nda̱kú koo iniún xíʼinna [...] tasaá, kusi̱í-ini Ndióxi̱ xíʼin ña̱ kéʼún, ta saátu na̱ yiví kusi̱í-inina xíʼún, ta ndiʼina kunda̱a̱-ini xa̱ʼún ña̱ ndíchiníún”; “na̱ yiví na̱ ndixaní kúʼvi̱-ini xíni inkana, ku̱a̱ʼání ña̱ va̱ʼa ndákiʼinna”, ta “na̱ kéʼé ña̱ va̱ʼa ta ndixaní kúʼvi̱-inina xínina inkana, Ndióxi̱ taxira ña̱ kutakuna” (Prov. 3:3, 4; 11:17, nota; 21:21).

² Proverbio yóʼo káʼa̱nña xíʼinyó nda̱chun kúú ña̱ xíniñúʼu ndixaní kuʼvi̱-iniyó kuniyó inkana. Ña̱ nu̱ú, chi saá kúú ña̱ ndáyáʼvikayó nu̱ú Jehová. Ña̱ u̱vi̱, chi ña̱ va̱ʼa miíyó kúúña, tá kúú chíndeétáʼanña xíʼinyó ña̱ ku̱a̱ʼání tiempo kutáʼanyó xíʼin inkana. Ta ña̱ u̱ni̱, chi ku̱a̱ʼání ña̱ va̱ʼa ndakiʼinyó chí nu̱únínu, tá kúú ña̱ kutakuyó ndiʼi tiempo. Ña̱kán xíniñúʼu kandíxayó ña̱ káʼa̱n Jehová xíʼinyó nu̱ú Zacarías 7:9, ña̱ káchi: “Ndixaní kuʼvi̱-inindó kunitáʼanndó ta kundáʼvi-inindó kunitáʼanndó”.

3. ¿Ndáa pregunta ndakuiinyó nu̱ú artículo yóʼo?

³ Nu̱ú artículo yóʼo ndakuiinyó ku̱mí pregunta: ¿ndáana xíniñúʼu ndixaní kuʼvi̱-iniyó kuniyó?, ¿ndáaña sákuaʼayó xíʼin libro ña̱ nátúʼun xa̱ʼa̱ ñá Rut?, ¿ndáa ki̱ʼva ndixaní kuʼvi̱-iniyó kuniyó inkana tiempo vitin? ta, ¿ndáaña va̱ʼa ndakiʼinyó tá ndixaní ná kuʼvi̱-iniyó kunitáʼanyó?

4. ¿Ndáa ki̱ʼva kundiku̱nyó yichi̱ Jehová? (Marcos 10:29, 30).

⁴ Nda̱a̱ táki̱ʼva íyo ña̱ sa̱kúaʼayó nu̱ú artículo ña̱ ni̱ya̱ʼa, iinlá na̱ kúʼvi̱ní-ini xíni Jehová ta káchíñuna nu̱úra kúú na̱ ndixaní kúʼvi̱-inira  xínira, ta ndiʼi tiempo na̱ʼa̱ra ña̱yóʼo nu̱úna (Dan. 9:4). Ta kúni̱yó keʼéyó ña̱ káʼa̱n Efesios 5:1: “Kundiku̱nndó yichi̱ Ndióxi̱ xa̱ʼa̱ ña̱ kúúndó se̱ʼe ma̱níra”. Ña̱kán, kúni̱yó ndixaní kuʼvi̱-iniyó kuniyó na̱ hermanoyó ndiʼi tiempo (kaʼvi Marcos 10:29, 30).

5, 6. ¿Ndáaña kúnda̱a̱-ini na̱ yiví xíʼin tu̱ʼun ña̱ nda̱kú koo iniyó xíʼin inkana?

⁵ Tá ná xa̱a̱yó kunda̱a̱-iniyó ndáaña kúni̱ kachi ña̱ ndixaní kuʼvi̱-iniyó kuniyó inkana, saá kúú ña̱ va̱ʼaníka na̱ʼa̱yó ña̱yóʼo nu̱ú na̱ hermanoyó. Ña̱kán, ná ka̱ʼa̱nyó xa̱ʼa̱ iin ejemplo ña̱ na̱ʼa̱ nu̱úyó ndáaña kúni̱ kachi ña̱ ndixaní kuʼvi̱-iniyó kuniyó inkana, ta ndáaña kúnda̱a̱-ini na̱ yiví xíʼin tu̱ʼun ña̱ nda̱kú koo iniyó xíʼin inkana.

⁶ Tá kúú, iin ta̱a ta̱ xa̱a̱ ku̱a̱ʼání ku̱i̱ya̱ káchíñu ti̱xin iin empresa, kivi ka̱ʼa̱nyó ña̱ nda̱kúní-inira xíʼin na̱ káchíñura nu̱ú. Soo ndiʼi ku̱i̱ya̱ ña̱ xa̱a̱ káchíñura, nda̱a̱ ni iin yichi̱ ta̱ʼán kunira na̱ káchíñura nu̱ú. Sana su̱ví ndiʼi tiempo kíndo̱o-inira xíʼin ki̱ʼva ña̱ káchíñuna ti̱xin empresa yóʼo. Soo su̱ví xa̱ʼa̱ ña̱ kúʼvi̱-inira xínira na̱ yiví kán kúú ña̱ káchíñura nu̱úna, chi xa̱ʼa̱ ña̱ xíniñúʼura xu̱ʼún kúú ña̱ káchíñura. Ta ndakundeévara kachíñura nda̱a̱ ná kuchéera, soo tá ná ndani̱ʼíra inka chiñu ña̱ va̱ʼaka, kitavara ti̱xin empresa yóʼo.

7, 8. a) ¿Nda̱chun ndixaní kúʼvi̱-ini iin na̱ yiví xínina inkana? b) ¿Nda̱chun ka̱ʼa̱nyó xa̱ʼa̱ ña̱ va̱xi nu̱ú libro ña̱ nátúʼun xa̱ʼa̱ ñá Rut?

⁷ ¿Á ki̱ʼinndó kuenta ña̱ síín íyo ña̱ kéʼé ta̱ káchíñu ti̱xin iin empresa, nu̱ú ña̱ kéʼé iin na̱ yiví na̱ ndixaní kúʼvi̱-ini xíni inkana? Ta̱yóʼo nda̱kú íyo inira xíʼin na̱ empresa kán xa̱ʼa̱ ña̱ kúni̱ kuitíra kiʼinra xu̱ʼún. Soo na̱ xi̱ndasakáʼnu Ndióxi̱ tiempo xi̱naʼá ndixaní xi̱kuʼvi̱-inina xi̱xinitáʼanna, saáchi níma̱na xi̱kana ña̱yóʼo ta kǒo na̱ ní ixandúxa xíʼinna ña̱ kuʼvi̱-inina kunitáʼanna. Ná ka̱ʼa̱nyó xa̱ʼa̱ ña̱ ke̱ʼé ta̱ David. Níma̱ra chi̱ndaʼáña miíra ña̱ ndixaní kuʼvi̱-inira kunira ta̱ Jonatán ni xi̱kuni̱ yivá ta̱yóʼo kaʼnírara. Tá ni̱ya̱ʼa ku̱i̱ya̱ ña̱ ni̱xi̱ʼi̱ ta̱ Jonatán, ta̱ David va̱ʼaní ni̱xi̱yo inira xíʼin ta̱ Mefibóset se̱ʼe ta̱ Jonatán, saáchi ndixaní xi̱kuʼvi̱-inira xi̱xinirara (1 Sam. 20:9, 14, 15; 2 Sam. 4:4; 8:15; 9:1, 6, 7).

⁸ Tá ná kaʼviyó libro ña̱ káʼa̱n xa̱ʼa̱ ñá Rut, saá kúú ña̱ kunda̱a̱-iniyó ndáaña kúni̱ kachi ña̱ ndixaní kuʼvi̱-iniyó kuniyó inkana. ¿Ndáaña sákuaʼayó xíʼin ña̱ ke̱ʼé na̱ nátúʼun libro yóʼo xa̱ʼa̱? Ta, ¿ndáa ki̱ʼva na̱ʼa̱yó ña̱yóʼo ti̱xin congregación? *

9. ¿Nda̱chun ni̱ka̱ʼa̱n ñá Noemí ña̱ íyo Jehová contra xíʼinñá?

⁹ Libro ña̱ nátúʼun xa̱ʼa̱ ñá Rut nátúʼuntuña xa̱ʼa̱ si̱soñá ñá Noemí, ta saátu xa̱ʼa̱ ta̱ Boaz, iin ta̱ xi̱kuʼvi̱ní-ini xi̱xini Ndióxi̱ ta táʼan yií ñá Noemí xi̱kuura. Xa̱ʼa̱ ña̱ ndeéní xi̱ndika̱a̱ so̱ko chí ñuu Israel, ñá Noemí xíʼin yiíñá ta saátu xíʼin u̱vi̱ se̱ʼeñá nda̱kiʼinna ku̱a̱ʼa̱nna koona chí Moab. Kán ni̱xi̱ʼi̱ yiíñá, ta saátu ti̱ndaʼa̱ u̱vi̱ saá se̱ʼeñá, soo ni̱xi̱ʼi̱tu na̱yóʼova (Rut 1:3-5; 2:1). Xa̱ʼa̱ ña̱ ndo̱ʼo ñá Noemí ndiʼi ña̱yóʼo, nda̱kavaní-iniñá. Ta xa̱ʼa̱ ña̱ ndeéní ni̱xo̱ʼvi̱ñá, ni̱xa̱a̱ñá nda̱kanixi̱níñá ña̱ íyo Jehová contra xíʼinñá. Ná kotoyó ndáaña ni̱ka̱ʼa̱nñá xa̱ʼa̱ Ndióxi̱, ka̱chiñá: “Jehová kúú ta̱ íyo contra xíʼi̱n, [...] saáchi Ndióxi̱ ta̱ kúúmií ndiʼi ndee̱ ta̱xi ña̱ sákusuchíní-inii̱”. Ta saátu ni̱ka̱ʼa̱nñá ña̱yóʼo: “Jehová íyo contra xíʼi̱n. Ndióxi̱ ta̱ kúúmií ndiʼi ndee̱ sáxo̱ʼvi̱ní yi̱ʼi̱” (Rut 1:13, nota, 20, 21).

10. ¿Ndáaña ke̱ʼé Jehová xa̱ʼa̱ ña̱ ni̱ka̱ʼa̱n ñá Noemí?

¹⁰ ¿Ndáaña ke̱ʼé Jehová xa̱ʼa̱ ña̱ ni̱ka̱ʼa̱n ñá Noemí? Va̱ása níndakoondaʼa̱rañá, saáchi tá xi̱nira ña̱ xóʼvi̱níñá ku̱ndaa̱va-inira xíʼin ña̱ ndóʼoñá. Jehová kúnda̱a̱-inira ña̱ “nda̱a̱ na̱ ndíchiní kivi xa̱a̱na keʼéna iin ña̱ʼa ña̱ kíʼviní, tá  ná ixandi̱va̱ʼana xíʼinna” (Ecl. 7:7). Soo ni saá, xi̱niñúʼu chindeétáʼanvana xíʼin ñá Noemí ña̱ va̱ʼa kunda̱a̱-iniñá ña̱ va̱ása nísandákoondaʼa̱ Jehová miíñá. Ta, ¿ndáaña ke̱ʼé Jehová ña̱ va̱ʼa chi̱ndeétáʼanra xíʼinñá? (1 Sam. 2:8). Chi̱ka̱a̱ra-ini ñá Rut ña̱ va̱ʼa na̱ʼa̱ñá ña̱ ndixaní kúʼvi̱-iniñá xíniñá ñáyóʼo. Ñá Rut chi̱ndeétáʼanñá xíʼin si̱soñá ña̱ va̱ása ndakavaníka-iniñá, ta kunda̱a̱-iniñá ña̱ kúʼvi̱va-ini Jehová xínirañá. ¿Ndáaña sákuaʼayó xíʼin ña̱ ke̱ʼé ñá Rut?

11. ¿Nda̱chun ku̱a̱ʼání na̱ hermano chíndeétáʼanna xíʼin na̱ ndákava-ini?

¹¹ Ña̱ ndixaní kúʼvi̱-iniyó xíniyó na̱ ndákava-ini, chíndaʼáña miíyó ña̱ chindeétáʼanyó xíʼinna. Nda̱a̱ táki̱ʼva ke̱ʼé ñá Rut ña̱ chi̱ndeétáʼanñá xíʼin ñá Noemí, ki̱ʼva saá kéʼé ku̱a̱ʼání na̱ hermano chi va̱ʼaní-inina ta chíndeétáʼanna xíʼin na̱ kúsuchí-ini á na̱ ndákava-ini. Kúʼvi̱ní-inina xínina na̱ hermano, ta kúni̱na keʼéna nda̱a̱ ndáaka ña̱ʼa ña̱ va̱ʼa chindeétáʼanna xíʼinna (Prov. 12:25, nota; 24:10). Tasaá ndíku̱nna consejo ña̱ ta̱xi ta̱ apóstol Pablo, tá ka̱chira: “Sandíkondó-ini na̱ nda̱kava-ini, ta chindeétáʼanndó xíʼin na̱ vitá kúni, ta kúee koo inindó xíʼin ndiʼina” (1 Tes. 5:14).

12. ¿Ndáaña xíniñúʼu keʼéyó ña̱ va̱ʼa chindeétáʼanyó xíʼin na̱ nda̱kava-ini?

¹² Iin ki̱ʼva ña̱ chindeétáʼanyó xíʼin na̱ hermano na̱ nda̱kava-ini kúú ña̱ kuniso̱ʼoyó ña̱ káʼa̱nna, ta ka̱ʼa̱nyó xíʼinna ña̱ kúʼvi̱ní-iniyó xíniyóna. Jehová xítora ndiʼi ña̱ kéʼéyó ña̱ va̱ʼa chindeétáʼanyó xíʼin na̱ hermanoyó (Sal. 41:1). Proverbios 19:17 káchiña: “Na̱ chíndeétáʼan xíʼin na̱ nda̱ʼví, nda̱a̱ táki̱ʼva íyo na̱ sátati iin ña̱ʼa Jehová saá íyona, ta ndataxira ña̱ va̱ʼa ndaʼa̱na xa̱ʼa̱ ña̱ kéʼéna ña̱yóʼo”.

13. ¿Á inkáchi íyo ña̱ ke̱ʼé ñá Rut xíʼin ñá Orpá, ta ndáa ki̱ʼva ni̱na̱ʼa̱ ñá Rut ña̱ ndixaní ni̱kuʼvi̱-iniñá xi̱niñá si̱soñá? (Koto na̱ʼná ña̱ va̱xi chí sa̱tá tutu yóʼo).

¹³ Ña̱ va̱ʼa kunda̱a̱-iniyó ndáaña kéʼé iin na̱ yiví na̱ ndixaní kúʼvi̱-ini xíni inkana. Ná ka̱ʼa̱nyó xa̱ʼa̱ ña̱ ndo̱ʼo ñá Noemí tá ni̱xi̱ʼi̱ yiíñá xíʼin u̱vi̱ se̱ʼeñá. Tá kunda̱a̱-ini ñá Noemí “ña̱ nda̱kaʼán Jehová xa̱ʼa̱ na̱ ñuura, ta ta̱xira ña̱ xíxina”, chi̱ka̱a̱-iniñá ña̱ ndandikóñá ñuuñá (Rut 1:6). U̱vi̱ saá ná xa̱nu ñá Noemí nda̱kiʼinná ku̱a̱ʼa̱nná xíʼinñá. Soo tá ku̱a̱ʼa̱nná yichi̱, u̱ni̱ yichi̱ ni̱ka̱ʼa̱n ñá Noemí xíʼinná ña̱ ná ndandikóná chí ñuu Moab. ¿Ndáaña ku̱u? Ña̱ relato káchiña: “Ñá Orpá chi̱tóñá nu̱ú si̱soñá ta nda̱kiʼinñá ku̱a̱ʼa̱nñá, soo ñá Rut va̱ása níxiinñá sandákooñá si̱soñá” (Rut 1:7-14). Ñá Orpá ke̱ʼéñá ña̱ ni̱ka̱ʼa̱n ñá Noemí xíʼinñá ta nda̱ndikóñá chí ñuu Moab, soo ñá Rut va̱ása níkeʼéñá ña̱ ni̱ka̱ʼa̱n si̱soñá xíʼinñá. Ñáyóʼo kiviva ndandikóñá veʼeñá, soo xa̱ʼa̱ ña̱ ni̱kuʼvi̱ní-iniñá xi̱niñá si̱soñá ki̱ndooñá xíʼinñá ña̱ va̱ʼa chindeétáʼanñá xíʼinñá (Rut 1:16, 17). Kǒo na̱ ní ixandúxa xíʼinñá ña̱ kindo̱oñá xíʼin si̱soñá chi níma̱ miíñá ka̱naña, xa̱ʼa̱ ña̱ ndixaní xi̱kuʼvi̱-iniñá xi̱xiniñáñá. ¿Ndáaña sákuaʼayó xíʼin relato yóʼo?

14. a) ¿Ndáaña kéʼé ku̱a̱ʼání na̱ hermano? b) Nda̱a̱ táki̱ʼva káchi Hebreos 13:16, ¿ndáaña kúni̱ Ndióxi̱ ná keʼéyó xa̱ʼa̱ na̱ hermanoyó?

¹⁴ Tá ndixaní kúʼvi̱-iniyó xíniyó inkana, kéʼéyó  nda̱a̱ ndáaka ña̱ʼa ña̱ va̱ʼa chindeétáʼanyó xíʼinna. Nda̱a̱ táki̱ʼva ke̱ʼé na̱ ni̱xi̱yo tá ya̱chi̱ saátu kéʼé ku̱a̱ʼání na̱ ndásakáʼnu Ndióxi̱ tiempo vitin, chi ndixaní kúʼvi̱-inina xínina ndiʼi na̱ hermano nda̱a̱ na̱ va̱ása xíni̱na. Ta tá kúnda̱a̱-inina ña̱ ndeéní ku̱un sa̱vi̱ á tá ni̱ta̱an, kama ndáka̱tu̱ʼunna ndáa ki̱ʼva chindeétáʼanna xíʼin na̱ hermano. Á tá kúnda̱a̱-inina xa̱ʼa̱ iin na̱ hermano na̱ kúma̱ní xu̱ʼún ndaʼa̱, ndúkúna ki̱ʼva ña̱ chindeétáʼanna xíʼinna. Na̱yóʼo ndíku̱nna yichi̱ na̱ hermano na̱ xi̱ndoo tá siglo nu̱ú chí Macedonia, saáchi na̱kán “ta̱xina ndiʼi ña̱ kúúmiína ta nda̱a̱ ku̱a̱ʼákavaña ta̱xina” ndaʼa̱ na̱ hermano (2 Cor. 8:3). Ta nda̱a̱ táki̱ʼva ke̱ʼé na̱ cristiano kán saátu kéʼé na̱ hermano tiempo vitin, chi táxina ndiʼi ña̱ kúúmiína ta nda̱a̱ ku̱a̱ʼákavaña táxina. Távána tiempo ña̱ va̱ʼa chindeétáʼanna xíʼin na̱ hermano. Ta kúsi̱íní-ini Jehová tá xítora ña̱ ndixaní kúʼvi̱-inina xínitáʼanna (kaʼvi Hebreos 13:16).

15, 16. ¿Ndáa ki̱ʼva nda̱kundeé ñá Rut chi̱ndeétáʼanñá xíʼin si̱soñá?

¹⁵ Ku̱a̱ʼání ña̱ kivi sakúaʼayó xíʼin ña̱ ke̱ʼé ñá Rut ta saátu ñá Noemí. Ná ka̱ʼa̱nyó xa̱ʼa̱ sava ña̱yóʼo.

¹⁶ Ná ndakundeéyó chindeétáʼanyó xíʼinna. Tá ni̱ka̱ʼa̱n ñá Rut xíʼin si̱soñá ña̱ ku̱ʼu̱nñá xíʼinñá chí Judá, ñá Noemí va̱ása níxiinñá. Soo ñá Rut nda̱kundeévañá ni̱ka̱ʼa̱nñá ña̱ ku̱ʼu̱nñá xíʼinñá. Ta, ¿ndáaña ku̱u? “Tá xi̱ni ñá Noemí ña̱ va̱ása xíín ñá Rut sandákooñáñá, va̱ása níka̱ʼa̱nkañá xíʼinñá ña̱ ndandikóñá ñuuñá” (Rut 1:15-18).

17. ¿Ndáaña chindeétáʼan xíʼinyó ña̱ ndakundeéyó chindeétáʼanyó xíʼin inkana?

¹⁷ Ña̱ sákuaʼayó: Xíniñúʼu kúee koo iniyó xíʼin na̱ nda̱kava-ini, ta ná ndakundeéyó chindeétáʼanyó xíʼinna. Tá kúú, sana xíniñúʼu chindeétáʼanyó xíʼin iin ñá hermana ñá va̱ása xíín taxi chindeétáʼanyó xíʼin. * Soo ni saá, xa̱ʼa̱ ña̱ ndixaní kúʼvi̱-iniyó xíniyóñá chíka̱a̱vayó ndee̱ ña̱ chindeétáʼanyó xíʼinña (Gál. 6:2). Ta ndátuyó ña̱ tá ná ya̱ʼa tiempo kandíxavañá ña̱ chindeétáʼanyó xíʼinñá, ta sandíkoyó-iniñá.

18. ¿Ndáaña kúú ña̱ sa̱kúsuchíní-ini ñá Rut?

¹⁸ Ná va̱ása sa̱a̱yó. Tá ni̱xa̱a̱ ñá Noemí xíʼin ñá Rut chí Belén, ñá Noemí nda̱ni̱ʼí-táʼanñá xíʼin ná ñaʼá ná xi̱ndoo yatin xíʼinñá, ta ña̱yóʼo ni̱ka̱ʼa̱nñá xíʼinná: “Ku̱a̱ʼání ña̱ʼa xi̱kuumiíi̱ tá ki̱tai̱ ku̱a̱ʼi̱n, soo Jehová ki̱ndaaña ndaʼíi̱ ta kǒokaña níndandikó xíʼi̱n vitin” (Rut 1:21). ¿Á kivi ndakanixi̱níyó ndáaña ndo̱ʼo ñá Rut tá xi̱niso̱ʼoñá ni̱ka̱ʼa̱n si̱soñá ña̱yóʼo? Ku̱a̱ʼání ña̱ ke̱ʼé ñá Rut ña̱ va̱ʼa chindeétáʼanñá xíʼin ñá Noemí: xa̱kuñá xíʼinñá, sa̱ndíkoñá-iniñá, ta ku̱a̱ʼání ki̱vi̱ ni̱xi̱ka xáʼañá xíʼinñá. Soo ni saá, ni̱ka̱ʼa̱n ñá Noemí ña̱ ki̱ndaa Jehová ndiʼi ña̱ xi̱kuumiíñá, ta kǒokaña níndandikó xíʼinñá. Ni nda̱ndikóva ñá Rut xíʼin ñá Noemí, soo xíʼin ña̱ ni̱ka̱ʼa̱nñá ni̱na̱ʼa̱ñá ña̱ va̱ása níxi̱chindayáʼviñá ndiʼi ña̱ ke̱ʼé ñá Rut xa̱ʼa̱ñá. Sana ku̱suchíníva-ini ñá Rut tá xi̱niso̱ʼoñá ña̱yóʼo. Soo ni saá va̱ása níndakoondaʼa̱ñá ñá Noemí.

19. ¿Ndáaña chindeétáʼan xíʼinyó ña̱ ndakundeéyó chindeétáʼanyó xíʼin na̱ nda̱kava-ini?

¹⁹ Ña̱ sákuaʼayó: Iin ñá hermana ñá nda̱kava-ini sana kivi ka̱ʼa̱nñá iin ña̱ va̱ása va̱ʼa xíʼinyó, ni chíka̱a̱nívayó ndee̱ ña̱ chindeétáʼanyó xíʼinñá. Soo va̱ása sáa̱yó xíʼinñá ta ndákundeéyó chíndeétáʼanyó xíʼinñá. Ta saátu káʼa̱nyó xíʼin Jehová ña̱ ná chindeétáʼanra xíʼinyó kunda̱a̱-iniyó ndáa ki̱ʼva sandíkoyó-iniñá (Prov. 17:17).

20. ¿Ndáaña chi̱ka̱a̱ ndee̱ xíʼin ñá Rut ña̱ va̱ʼa nda̱kundeéñá chi̱ndeétáʼanñá xíʼin ñá Noemí?

²⁰ Ná chika̱a̱yó ndee̱ xíʼin na̱ xíniñúʼuña. Ñá Rut ndixaní xi̱kuʼvi̱-iniñá xi̱xiniñá ñá Noemí,  soo saátu ñá Rut xi̱xiniñúʼu chika̱a̱na ndee̱ xíʼinñá. Ña̱kán, Jehová xi̱niñúʼura ta̱ Boaz ña̱ ni̱ka̱ʼa̱nra tu̱ʼun yóʼo xíʼinñá: “Jehová ná chaʼvi yóʼó xa̱ʼa̱ ndiʼi ña̱ ke̱ʼún. Jehová Ndióxi̱ na̱ ñuu Israel ná taxi ña̱ va̱ʼa ndaʼún, saáchi ndáa-iniúnra ña̱ chindeétáʼanra xíʼún”. Tu̱ʼun yóʼo, va̱ʼaní sa̱ndíkoña-ini ñá Rut. Ña̱kán ni̱ka̱ʼa̱nñá ña̱yóʼo xíʼinra: “Sa̱ndíkoún-inii̱ xíʼin tu̱ʼun ña̱ ni̱ka̱ʼún xíʼi̱n” (Rut 2:12, 13). Ña̱ ni̱ka̱ʼa̱n ta̱ Boaz xíʼin ñá Rut chi̱ka̱a̱níña ndee̱ xíʼinñá ña̱ va̱ʼa nda̱kundeéñá chi̱ndeétáʼanñá xíʼin ñá Noemí.

21. Nda̱a̱ táki̱ʼva káchi Isaías 32:1, 2, ¿ndáaña xíniñúʼu keʼé na̱ anciano?

²¹ Ña̱ sákuaʼayó: Xíniñúʼutu chika̱a̱yó ndee̱ xíʼin na̱ sándi̱ko-ini inkana. Ta̱ Boaz ni̱ka̱ʼa̱nra xíʼin ñá Rut ña̱ va̱ʼaní íyo ña̱ ke̱ʼéñá, chi va̱ʼaní chi̱ndeétáʼanñá xíʼin ñá Noemí. Ki̱ʼva saá íyo ña̱ kéʼé na̱ anciano tiempo vitin saáchi káʼa̱nna xíʼin na̱ hermano ña̱ va̱ʼaní íyo ña̱ kéʼéna xa̱ʼa̱ ña̱ chíndeétáʼanna xíʼin inkana, ta kúʼvi̱-inina xíninana. Ta ña̱ káʼa̱n na̱ anciano yóʼo xíʼin na̱ hermano, chika̱a̱ña ndee̱ xíʼinna ña̱ ndakundeéna chindeétáʼanna xíʼin inkana (kaʼvi Isaías 32:1, 2). *

22, 23. ¿Ndáaña ndo̱ʼo ñá Noemí ta nda̱chun? (Salmo 136:23, 26).

²² Tá ni̱ya̱ʼa tiempo, ta̱ Boaz ta̱xira ku̱a̱ʼání ña̱ kuxu ñá Rut xíʼin ñá Noemí (Rut 2:14-18). ¿Ndáaña ke̱ʼé ñá Noemí tá ta̱xi ta̱ Boaz ña̱yóʼo? Ñáyóʼo ka̱chiñá: “Jehová, ta̱ ndixaní kúʼvi̱-ini xíni na̱ táku ta saátu na̱ ni̱xi̱ʼi̱ ná taxi ña̱ va̱ʼa ndaʼa̱ra” (Rut 2:20a). Na̱samaní ñá Noemí ki̱ʼva ña̱ ndákanixi̱níñá, saáchi tá ya̱chi̱ ndeéní kúsuchí-iniñá ni̱ka̱ʼa̱nñá tu̱ʼun yóʼo: “Jehová íyo contra xíʼi̱n”. Soo ki̱xáʼañá kúsi̱íní-iniñá ta ni̱ka̱ʼa̱nñá ña̱yóʼo: “Jehová, ta̱ ndixaní kúʼvi̱-ini  xíni na̱ táku ta saátu na̱ ni̱xi̱ʼi̱”. ¿Nda̱chun na̱samañá ki̱ʼva ña̱ ndákanixi̱níñá?

²³ Ñá Noemí ki̱xáʼañá ki̱ʼinñá kuenta ndáa ki̱ʼva chíndeétáʼan Jehová xíʼinñá. Saáchi xi̱niñúʼura ñá Rut ña̱ va̱ʼa chindeétáʼanñá xíʼinñá ña̱ ndandikóñá chí Judá (Rut 1:16). Ta saátu xi̱ni ñá Noemí ndáa ki̱ʼva xi̱niñúʼu Jehová ta̱ Boaz ña̱ chi̱ndeétáʼanra xíʼinná ta viíní ke̱ʼéra xíʼinná, ta ta̱yóʼo kúú ta̱ nda̱satá * ñá Rut (Rut 2:19, 20b). Sana nda̱kanixi̱níñá: “Va̱ása nísandákoo ndaʼa̱ Jehová yi̱ʼi̱, chi ndiʼi tiempova chi̱ndeétáʼanra xíʼi̱n” (kaʼvi Salmo 136:23, * 26). * Sana ta̱xiníñá tíxa̱ʼvi ndaʼa̱ ñá Rut xíʼin ta̱ Boaz xa̱ʼa̱ ña̱ nda̱kundeéna chi̱ndeétáʼanna xíʼinñá. Na̱yóʼo ni̱kusi̱íní-inina tá xi̱nina ña̱ ki̱xáʼa tuku ñá Noemí kúsi̱í-iniñá ndásakáʼnuñá Jehová.

24. ¿Nda̱chun kúni̱yó ndakundeéyó ndixaní kuʼvi̱-iniyó kuniyó na̱ hermanoyó?

²⁴ Ña̱yóʼo kúú ña̱ sa̱kúaʼayó xíʼin libro ña̱ nátúʼun xa̱ʼa̱ ñá Rut: tá ndixaní ná kuʼvi̱-iniyó kuniyó na̱ hermanoyó, ña̱yóʼo chindaʼáña miíyó ña̱ chindeétáʼanyó xíʼin na̱ ndákava-ini, ta va̱ása sandákooyó keʼéyó ña̱yóʼo. Ta saátu keʼéyó nda̱a̱ ndáaka ña̱ʼa ña̱ va̱ʼa chindeétáʼanyó xíʼinna. Ta na̱ anciano kúú na̱ xíniñúʼu chika̱a̱ ndee̱ xíʼin na̱ hermano na̱ ndixaní kúʼvi̱-ini xíni inkana. Kúsi̱íní-iniyó tá xítoyó ña̱ kúsi̱í tuku ini na̱ hermano na̱ nda̱kava-ini káchíñuna nu̱ú Jehová (Hech. 20:35). Ta kúni̱yó ndakundeéyó ndixaní kuʼvi̱-iniyó kuniyó inkana, saáchi kúni̱yó kundiku̱nyó yichi̱ Jehová ta sakúsi̱íyó-inira chi iin Ndióxi̱ ta̱ ndixaní kúʼvi̱-ini xíni miíyó kúúra (Éx. 34:6; Sal. 33:22).