1. ¿Ndáaña kúnda̱a̱-iniyó xíʼin, ta nda̱chun va̱ása xíka-iniyó xa̱ʼa̱ ña̱yóʼo?

 VA̱ÁSA ndákanda̱-iniyó ña̱ sava na̱ yiví sásina nu̱úyó ña̱ natúʼunyó xa̱ʼa̱ Ndióxi̱ ta loʼoka chí nu̱ú ndeéka koo ña̱yóʼo (Dan. 11:44; 2 Tim. 3:12; Apoc. 16:21). Soo kándíxayó ña̱ mií Jehová kúú ta̱ chindeétáʼan xíʼinyó. ¿Nda̱chun va̱ʼa kúnda̱a̱-iniyó ña̱yóʼo? Saáchi Jehová ndiʼi tiempo chíndeétáʼanra xíʼin na̱ ndásakáʼnu-ñaʼá ña̱ saxínuna chiñu ña̱ táxira ndaʼa̱na ni yo̱ʼvi̱níña. Ta ña̱ va̱ʼa kunda̱a̱-iniyó xa̱ʼa̱ ña̱yóʼo, ná ka̱ʼa̱nyó xa̱ʼa̱ ña̱ ndo̱ʼo ta̱ profeta Ezequiel, ta̱ na̱túʼun xa̱ʼa̱ Ndióxi̱ xíʼin na̱ judío na̱ ni̱xi̱yo chí ñuu Babilonia.

2. a) ¿Ndáa ki̱ʼva ni̱xi̱yo na̱ yiví na̱ na̱túʼun ta̱ Ezequiel xíʼin? (Ezequiel 2:3-6). b) ¿Ndáaña sakúaʼayó nu̱ú artículo yóʼo?

² ¿Ndáa ki̱ʼva ni̱xi̱yo na̱ yiví na̱ na̱túʼun ta̱ Ezequiel xíʼin? Jehová ni̱ka̱ʼa̱nra xa̱ʼa̱ na̱ judío ña̱ so̱ʼonína. Ta ndi̱va̱ʼaní-inina nda̱a̱ táki̱ʼva íyo iñú ta saátu nda̱a̱ táki̱ʼva íyo ti̱siʼma̱ tí xa̱tu̱ní saá ni̱xi̱yona. Xa̱ʼa̱ ña̱kán, ku̱a̱ʼá yichi̱ ni̱ka̱ʼa̱n Jehová xíʼin ta̱ Ezequiel: “Va̱ása yi̱ʼvíún” (kaʼvi Ezequiel 2:3-6). b Íyo u̱ni̱ ña̱ chi̱ndeétáʼan xíʼin ta̱ Ezequiel ña̱ kǒo nísandákoora ña̱ natúʼunra xa̱ʼa̱ Ndióxi̱. Ña̱ nu̱ú: Mií Jehová kúú ta̱ chi̱ndaʼá-ñaʼá. Ña̱ u̱vi̱: Espíritu santo chi̱ndeétáʼan xíʼinra ña̱ ndakú koo inira. Ña̱ u̱ni̱: Kǒo níndakoora ña̱ kaʼvira tu̱ʼun Ndióxi̱. ¿Ndáa ki̱ʼva chi̱ndeétáʼan u̱ni̱ ña̱yóʼo xíʼinra, ta  ndáa ki̱ʼva chindeétáʼanña xíʼin miíyó tiempo vitin?

3. ¿Ndáa tu̱ʼun kúú ña̱ chi̱kaa̱ní ndee̱ xíʼin ta̱ Ezequiel, ta ndáa ki̱ʼva ni̱ka̱ʼa̱n Jehová ña̱ chindeétáʼanra xíʼinra?

³ Ña̱yóʼo ni̱ka̱ʼa̱n Jehová xíʼin ta̱ Ezequiel: “Chíndaʼíi̱ yóʼó” (Ezeq. 2:3, 4). Ña̱yóʼo va̱ʼaní chi̱ka̱a̱ña ndee̱ xíʼinra. Ta sana nda̱kaʼánra ña̱ táʼan tu̱ʼun yóʼo kúú ña̱ xi̱niñúʼu Jehová tá nda̱kaxinra ta̱ Moisés, ta̱ Isaías ña̱ xa̱a̱na koona profeta (Éx. 3:10; Is. 6:8). Ta̱ Ezequiel xi̱kunda̱a̱-inira ña̱ mií Jehová chi̱ndeétáʼan xíʼin na̱ profeta yóʼo ña̱ va̱ʼa saxínuna chiñu ña̱ yo̱ʼvi̱ní ta̱xira ndaʼa̱na. Ña̱kán tá u̱vi̱ yichi̱ ni̱ka̱ʼa̱n Jehová tu̱ʼun yóʼo xíʼin ta̱ Ezequiel: “Chíndaʼíi̱ yóʼó”, ta̱yóʼo xi̱kunda̱a̱-inira ña̱ chindeétáʼanva Jehová xíʼinra. Ta nu̱ú libro ña̱ Ezequiel ku̱a̱ʼá yichi̱ va̱xi ña̱ tu̱ʼun yóʼo: “Ni̱ka̱ʼa̱n Jehová xíʼi̱n” (Ezeq. 14:2). Ta saátu, tuku ta tuku va̱xi tu̱ʼun yóʼo: “Tuku ni̱ka̱ʼa̱n Jehová xíʼi̱n” (Ezeq. 6:1). Ña̱kán, ta̱ profeta Ezequiel va̱ása níxi̱ka-inira ña̱ miíva Jehová kúú ta̱ chi̱ndaʼá-ñaʼá ña̱ keʼéra chiñu yóʼo. Ta xa̱ʼa̱ ña̱ xi̱kuu yivára su̱tu̱, sana sa̱náʼa̱rara ña̱ tá ndáka̱xin Jehová iin na̱ koo profeta káʼa̱nra xíʼinna ña̱ chindeétáʼanra xíʼinna. Ta ña̱ tu̱ʼun yóʼo ni̱ka̱ʼa̱n Jehová xíʼin ta̱ Isaac, ta̱ Jacob xíʼin ta̱ Jeremías: “Yi̱ʼi̱ íyoi̱ xíʼún” (Gén. 26:24; 28:15; Jer. 1:8).

4. ¿Ndáa tu̱ʼun ña̱ ni̱ka̱ʼa̱n Ndióxi̱ kúú ña̱ va̱ʼaní chi̱kaa̱ ndee̱ xíʼin ta̱ Ezequiel?

⁴ ¿Ndáaña keʼé na̱ ñuu Israel xíʼin ña̱ natúʼun ta̱ Ezequiel xíʼinna? Jehová ni̱ka̱ʼa̱nra ña̱yóʼo xíʼinra: “Na̱ ñuu Israel va̱ása kandíxana kuniso̱ʼona yóʼó, saáchi va̱ása xíniso̱ʼona ña̱ káʼi̱n” (Ezeq. 3:7). Ña̱kán tá kǒo xíínna kuniso̱ʼona ña̱ natúʼun ta̱ profeta xíʼinna, Jehová kúú ta̱ kǒo xíínna kuniso̱ʼona. Ta ña̱yóʼo va̱ʼaní sa̱ndíkoña-ini ta̱ Ezequiel, saáchi tá ná kǒo kuniso̱ʼona ña̱ natúʼunra xíʼinna su̱ví ña̱yóʼo kúni̱ kachiña ña̱  va̱ása xíni̱ra sanáʼa̱ra. Ta saátu Jehová ni̱ka̱ʼa̱nra xíʼinra, tá ná xi̱nu tu̱ʼun ña̱ na̱túʼunra xíʼin na̱ judío saá kúú ña̱ xa̱a̱na kunda̱a̱-inina ña̱ ni̱xi̱yo iin profeta xíʼinna (Ezeq. 2:5; 33:33). Ta sana ña̱ tu̱ʼun yóʼo va̱ʼaní chi̱ka̱a̱ña ndee̱ xíʼin ta̱ Ezequiel ña̱ va̱ʼa saxínura chiñu ña̱ ta̱xi Ndióxi̱ ndaʼa̱ra.

5. ¿Nda̱chun va̱ʼaní chíka̱a̱ Isaías 44:8 ndee̱ xíʼinyó?

⁵ Saátu va̱ʼaní chíka̱a̱ ña̱yóʼo ndee̱ xíʼinyó, saáchi mií Jehová kúú ta̱ chíndaʼá miíyó keʼéyó chiñu nu̱úra. Saátu ta̱xira iin chiñu ña̱ ndáyáʼviní ndaʼa̱yó ña̱ kooyó testigora (Is. 43:10). Ta nda̱a̱ táki̱ʼva ni̱ka̱ʼa̱n Jehová xíʼin ta̱ Ezequiel ña̱ va̱ása yi̱ʼvíra ta saátu káʼa̱nra xíʼin miíyó tiempo vitin ña̱ va̱ása yi̱ʼvíyó. ¿Nda̱chun va̱ása xíniñúʼu yi̱ʼvíyó nu̱ú na̱ yiví na̱ sáa̱-ini xíni miíyó? Saáchi nda̱a̱ táki̱ʼva chi̱ndeétáʼanra xíʼin ta̱ Ezequiel, saátu chíndeétáʼanra xíʼinyó ña̱ keʼéyó chiñu ña̱ ta̱xira ndaʼa̱yó (kaʼvi Isaías 44:8). c

6. a) ¿Ndáa ki̱ʼva káʼa̱n Jehová ña̱ chindeétáʼanra xíʼinyó? b) ¿Ndáaña sándi̱ko-iniyó ta chíka̱a̱níña ndee̱ xíʼinyó?

⁶ Jehová káʼa̱nra ña̱ chindeétáʼanra xíʼinyó. Tá kúú, tá kúma̱níka ka̱ʼa̱nra “ndóʼó kúúndó testigoi̱”, ña̱yóʼo ni̱ka̱ʼa̱nra: “Tá ná ya̱ʼún nu̱ú ti̱kui̱í, yi̱ʼi̱ koi̱ xíʼún; tá ná ya̱ʼún nu̱ú yu̱ta va̱ása sa̱ʼvíún ti̱xinrá. Tá ná ya̱ʼún nu̱ú ñuʼu̱ va̱ása kokoún” (Is. 43:2). Sava yichi̱ tá nátúʼunyó xa̱ʼa̱ Ndióxi̱ íyo sava ña̱ sási nu̱úyó ña̱ íyo nda̱a̱ táki̱ʼva íyo yu̱ta ta saátu yáʼayó nu̱ú tu̱ndóʼo ña̱ íyo nda̱a̱ táki̱ʼva íyo ñuʼu̱. Soo mií Jehová chíndeétáʼan xíʼinyó ña̱ kǒo sandákooyó ña̱ natúʼunyó xa̱ʼa̱ra (Is. 41:13). Ta miíyó ndóʼoyó nda̱a̱ táki̱ʼva ndo̱ʼo ta̱ Ezequiel, saáchi ku̱a̱ʼání na̱ yiví va̱ása kútóona kuniso̱ʼona ña̱ nátúʼunyó. Soo su̱ví ña̱yóʼo kúni̱ kachiña ña̱ va̱ása kúchiñuyó natúʼunyó xa̱ʼa̱ Ndióxi̱. Sándi̱koníña-iniyó ta chíka̱a̱níña ndee̱ xíʼinyó xa̱ʼa̱ ña̱ kúnda̱a̱-iniyó ña̱ kúsi̱íní-ini Jehová tá nátúʼunyó xa̱ʼa̱ra. Ta̱ apóstol Pablo ka̱chira: “Ndióxi̱ taxira ña̱ va̱ʼa ndaʼa̱ iin iinna xa̱ʼa̱ chiñu ña̱ ke̱ʼévana” (1 Cor. 3:8; 4:1, 2). Iin ñá hermana ñá xa̱a̱ ku̱a̱ʼání ku̱i̱ya̱ kúú precursora káchiñá: “Kúsi̱íní-inii̱ xa̱ʼa̱ ña̱ kúnda̱a̱-inii̱, ña̱ ku̱a̱ʼání ña̱ va̱ʼa táxi Jehová ndaʼa̱ na̱ káchíñu nu̱úra”.

7. ¿Ndáaña xi̱ndoʼo ta̱ Ezequiel tá xi̱ndakanixi̱níra xa̱ʼa̱ visión ña̱ xi̱nira? (Koto dibujo ña̱ va̱xi chí sa̱tá tutu yóʼo).

⁷ Ta̱ Ezequiel xi̱nira ña̱ ku̱a̱ʼání ndee̱ kúúmií espíritu santo Ndióxi̱. Saáchi ti̱xin iin visión xi̱nira ndáa ki̱ʼva chíndeétáʼan espíritu santo xíʼin na̱ ángel ta saátu xi̱nira ndáa ki̱ʼva chíndeétáʼanña xíʼin carro mií Jehová tú íyo chí ndiví ña̱ va̱ʼa kánda̱ llantanú (Ezeq. 1:20, 21). Ta miíra káʼa̱nra xíʼinyó ndáaña ndo̱ʼora: “Tá xi̱nii̱ña nda̱a̱ nu̱ú ñuʼú xi̱ku̱xítii̱”. Ta xa̱ʼa̱ ña̱ nda̱kanda̱ní-inira nda̱a̱ nu̱ú ñuʼú ndu̱vara (Ezeq. 1:28). Sana tá xi̱ndakanixi̱ní ta̱ Ezequiel xa̱ʼa̱ visión ña̱ xi̱nira, xi̱kandíxara ña̱ espíritu santo Jehová kúú ña̱ chindeétáʼan xíʼinra saxínura chiñu ña̱ ta̱xira ndaʼa̱ra.

8, 9. a) ¿Ndáaña ni̱ka̱ʼa̱n Jehová xíʼin ta̱ Ezequiel keʼéra? b) ¿Ndáaña ke̱ʼéka Jehová ña̱ nda̱sandakúra-ini ta̱ Ezequiel?

⁸ Jehová ni̱ka̱ʼa̱nra xíʼin ta̱ Ezequiel: “Se̱ʼe ta̱a, ndakundichi ña̱ va̱ʼa ná ka̱ʼi̱n xíʼún”. Ña̱ ni̱ka̱ʼa̱n Jehová xíʼin ta̱ Ezequiel ta saátu ña̱ espíritu santo kúú ña̱ chi̱ndeétáʼan xíʼinra ña̱ va̱ʼa nda̱kundichira. Ta̱ Ezequiel ka̱chira: “Espíritu Ndióxi̱ ni̱ki̱ʼviña-inii̱ ta nda̱kundichii̱” (Ezeq. 2:1, 2). Ta ndiʼi tiempo ña̱ ni̱xi̱kara na̱túʼunra xa̱ʼa̱ Ndióxi̱ espíritu santo kúú ña̱ xi̱niʼi yichi̱ nu̱úra (Ezeq. 3:22; 8:1; 33:22; 37:1; 40:1). Espíritu santo yóʼo kúú ña̱ ta̱xi ndee̱ ndaʼa̱ ta̱ Ezequiel ña̱ va̱ʼa saxínura chiñu ña̱ ta̱xi Ndióxi̱ ndaʼa̱ra ña̱ natúʼunra xíʼin na̱ judío na̱ so̱ʼoní (Ezeq. 3:7). Ta ña̱yóʼo ni̱ka̱ʼa̱n Jehová xíʼinra: “Nda̱sandakúi̱-iniún nda̱a̱ táki̱ʼva ndakúní-inina. Nda̱sandakúi̱-iniún ta ndeéníkaña nda̱a̱ táki̱ʼva íyo iin diamante, á  nda̱a̱ táki̱ʼva íyo iin yu̱u̱. Va̱ása yi̱ʼvíún kuniúnna, saáchi iin ñuu na̱ so̱ʼoní kúúna” (Ezeq. 3:8, 9). Nda̱a̱ táki̱ʼva íyo ña̱ ni̱ka̱ʼa̱n Jehová xíʼinra saá íyo ña̱yóʼo: “Kǒo ndakava-iniún xa̱ʼa̱ ña̱ so̱ʼonína, saáchi yi̱ʼi̱ ndasandakúi̱-iniún”.

⁹ Ña̱kán espíritu santo xi̱niʼiña yichi̱ nu̱ú ta̱ Ezequiel ña̱ va̱ʼa ku̱ʼu̱nra territorio ña̱ ni̱ka̱ʼa̱n Ndióxi̱ xíʼinra ña̱ natúʼunra xíʼin na̱ yiví. Ta̱ Ezequiel ki̱ʼinra kuenta ña̱ íyoní ndee̱ Jehová ña̱ chindeétáʼanra xíʼinra. Ta ki̱ʼva iin semana xi̱niñúʼura ña̱ sákuaʼara ta kunda̱a̱-inira ndáa ki̱ʼva natúʼunra ña̱ ni̱ka̱ʼa̱n Ndióxi̱ xíʼinra (Ezeq. 3:14, 15). Tándi̱ʼi, Jehová ni̱ka̱ʼa̱nra xíʼinra ña̱ ná ku̱ʼu̱nra chí yoso̱ nu̱ú ndakiʼinra espíritu santo (Ezeq. 3:23, 24). Ta vitin xa̱a̱ íyo tu̱ʼva ta̱ Ezequiel ña̱ ku̱ʼu̱nra natúʼunra xa̱ʼa̱ Ndióxi̱.

10. ¿Ndáaña xíniñúʼuyó ña̱ va̱ʼa natúʼunyó xa̱ʼa̱ Ndióxi̱ ta nda̱chun?

¹⁰ ¿Ndáaña chindeétáʼan xíʼinyó ña̱ natúʼunyó xa̱ʼa̱ Ndióxi̱? Ña̱ va̱ʼa ndakuiinyó ña̱ pregunta yóʼo ná ndakanixi̱níyó xa̱ʼa̱ ta̱ Ezequiel. Tá kúma̱níka kixáʼara natúʼunra xa̱ʼa̱ Ndióxi̱, espíritu santo ta̱xi ndee̱ ndaʼa̱ra ña̱ keʼéra ña̱yóʼo. Ta saátu miíyó, va̱ása kuchiñuyó natúʼunyó xa̱ʼa̱ Ndióxi̱ tá kǒo espíritu santora chíndeétáʼan xíʼinyó. ¿Nda̱chun káʼa̱nyó ña̱yóʼo? Saáchi ta̱ Ndi̱va̱ʼa va̱ása táxira ña̱ natúʼunyó xa̱ʼa̱ Ndióxi̱ (Apoc. 12:17). Ku̱a̱ʼání na̱ yiví ndákanixi̱nína ña̱ íyoní ndee̱ ta̱ Ndi̱va̱ʼa ta va̱ása kuchiñuyó xíʼinra. Soo tá nátúʼunyó xa̱ʼa̱ tu̱ʼun Ndióxi̱, saá kúú ña̱ kúchiñuyó xíʼinra (Apoc. 12:9-11). Tá kǒo sándakooyó keʼéyó chiñu yóʼo, náʼa̱yó ña̱ va̱ása yíʼviyó xíniyóra ta náʼa̱tuyó ña̱ va̱ása kuchiñura kasira nu̱úyó. Ña̱kán ni íyoní ña̱ sási nu̱úyó ña̱ natúʼunyó xa̱ʼa̱ Ndióxi̱, va̱ʼa nátúʼunyó xa̱ʼa̱ra chi espíritu santora táxi ndee̱ ndaʼa̱yó, ta xíʼin ña̱ kéʼéyó sákusi̱íyó-inira (Mat. 5:10-12; 1 Ped. 4:14).

11. ¿Ndáa ki̱ʼva chindeétáʼan espíritu santo xíʼinyó, ta ndáaña xíniñúʼu keʼékayó ña̱ va̱ʼa ndakiʼinyóña?

¹¹ Jehová ta̱xira ndee̱ ndaʼa̱ ta̱ Ezequiel ña̱ va̱ʼa ndakundeéra natúʼunra xa̱ʼa̱ra. ¿Ndáaña sákuaʼayó xíʼin ña̱yóʼo? Espíritu santo kúú ña̱ chindeétáʼan xíʼinyó ña̱ kundeé-iniyó ya̱ʼayó nu̱ú nda̱a̱ ndáaka ña̱ ná kasi nu̱úyó tá nátúʼunyó xa̱ʼa̱ tu̱ʼun  Ndióxi̱ (2 Cor. 4:7-9). Ña̱kán, ¿ndáaña xíniñúʼu keʼéyó ña̱ va̱ʼa ndakiʼinyó espíritu santo Ndióxi̱? Ná ndukúyóña nu̱úra tá káʼa̱nyó xíʼinra ta ná kǒo kaka-iniyó ña̱ kuniso̱ʼovara ña̱ ka̱ʼa̱nyó xíʼinra. Ña̱yóʼo ni̱ka̱ʼa̱n ta̱ Jesús xíʼin na̱ discípulora: “Ndakundeéndó ndukúndó ña̱ va̱ʼa nu̱ú Ndióxi̱ ta taxiraña ndaʼa̱ndó, ndakundeéndó nandukúndóña ta ndani̱ʼívandóña, ndakundeéndó kani ndaʼa̱ndó yéʼé”. ¿Ndáaña keʼé Ndióxi̱ tá ná keʼéyó ña̱yóʼo? Taxivara espíritu santo ndaʼa̱yó tá ná ndukúyóña nu̱úra (Luc. 11:9, 13; Hech. 1:14; 2:4).

12. Nda̱a̱ táki̱ʼva káchi Ezequiel 2:9-3:3, ¿ndáa míí ke̱e rollo yóʼo, ta ndáaña va̱xi nu̱úña?

¹² Ña̱ nda̱sandakú-ini ta̱ Ezequiel kúú espíritu santo Ndióxi̱ xíʼin ña̱ ka̱ʼvira tu̱ʼunra. Nu̱ú iin visión xi̱nira iin ndaʼa̱ ña̱ níʼi rollo (kaʼvi Ezequiel 2:9–3:3). d ¿Ndáa míí ke̱e ña̱ rollo yóʼo? ¿Ndáaña va̱xi nu̱úña? ¿Ndáa ki̱ʼva chi̱ndeétáʼanña xíʼin ta̱ Ezequiel? Rollo yóʼo chí trono Ndióxi̱ ki̱xiña. Ta̱ Ezequiel xi̱nira ku̱mí ángel nu̱ú iin visión ta sana iin na̱yóʼo kúú na̱ xi̱niñúʼu Ndióxi̱ ña̱ ta̱xira rollo ndaʼa̱ra (Ezeq. 1:8; 10:7, 20). Nu̱ú rollo yóʼo va̱xi ña̱ káʼa̱n Ndióxi̱ keʼéra xíʼin na̱ yiví na̱ so̱ʼoní ña̱ xi̱niñúʼu natúʼun ta̱ Ezequiel xa̱ʼa̱ (Ezeq. 2:7). Ta tu̱ʼun yóʼo ni̱ka̱ʼyi̱ña chí nu̱ú ña̱ rollo xíʼin sa̱táña.

13. ¿Ndáaña ni̱ka̱ʼa̱n Jehová xíʼin ta̱ Ezequiel keʼéra xíʼin rollo, ta nda̱chun vi̱xiña?

¹³ Jehová ni̱ka̱ʼa̱nra xíʼin ta̱ Ezequiel: “Kaxi rollo […] ta sakútu ti̱xiún xíʼinña”. Ta̱ Ezequiel xi̱niso̱ʼora ña̱ ni̱ka̱ʼa̱n Jehová xíʼinra ta xa̱xíra iníísaá rollo. ¿Ndáaña kúni̱ kachi visión ña̱ xi̱nira? Ta̱ Ezequiel xi̱niñúʼu kunda̱a̱ káxi inira xa̱ʼa̱ ña̱ natúʼunra xíʼin na̱ yiví. Ta saátu xi̱niñúʼu kandíxara tu̱ʼun yóʼo ña̱ va̱ʼa kusi̱í-inira natúʼunra xa̱ʼa̱ña. Ta tá xa̱xí ta̱ Ezequiel rollo yóʼo, kiʼinra kuenta ña̱ vi̱xikavíña táki̱ʼva vi̱xi ñu̱ñú (Ezeq. 3:3). ¿Nda̱chun vi̱xiña? Saáchi ña̱ ku̱ʼu̱nra natúʼunra xa̱ʼa̱ Jehová iin ña̱ ndáyáʼviní kúúña nu̱úra ta iin ña̱ va̱ʼaní kúúña (Sal. 19:8-11). Ta ta̱xiníra tíxa̱ʼvi ndaʼa̱ Jehová xa̱ʼa̱ ña̱ nda̱kaxinrara ña̱ koora profetara.

14. ¿Ndáaña chi̱ndeétáʼan xíʼin ta̱ Ezequiel ña̱ sa̱xínura chiñu ña̱ ta̱xi Ndióxi̱ ndaʼa̱ra?

¹⁴ Tándi̱ʼi, ña̱yóʼo ni̱ka̱ʼa̱n Jehová xíʼin ta̱ Ezequiel: “Kuniso̱ʼo ndiʼi ña̱ káʼi̱n xíʼún ta taán va̱ʼúnña níma̱ún” (Ezeq. 3:10). Jehová xi̱kuni̱ra ña̱ ná ndakaʼán ta̱ Ezequiel xa̱ʼa̱ tu̱ʼun ña̱ ni̱ka̱ʼyi̱ nu̱ú rollo ta ná ndakanixi̱níra xa̱ʼa̱ ña̱ káʼa̱nña. Ña̱yóʼo chindeétáʼankaña xíʼin ta̱ Ezequiel ña̱ kandíxakara Ndióxi̱, ta kunda̱a̱ káxi-inira ña̱ ndáyáʼviní tu̱ʼun ña̱ ku̱ʼu̱nra natúʼunra xíʼin na̱ yiví (Ezeq. 3:11). Ta tá ni̱xa̱a̱ ta̱ Ezequiel ku̱ndaa̱-inira ta ka̱ndíxara ña̱ ni̱ka̱ʼa̱n Jehová xíʼinra, ni̱xi̱yo tu̱ʼvara ña̱ ku̱ʼu̱nra natúʼunra ta saxínura chiñu ña̱ ta̱xi Ndióxi̱ ndaʼa̱ra (chitáʼanña xíʼin Salmo 19:14).

15. ¿Ndáaña xíniñúʼu keʼéyó ña̱ va̱ʼa kǒo sandákooyó natúʼunyó xa̱ʼa̱ Ndióxi̱?

¹⁵ Ña̱ va̱ʼa kǒo sandákooyó natúʼunyó xa̱ʼa̱ Ndióxi̱, xíniñúʼu ndakundeéyó kaʼviyó Biblia. Ta saátu xíniñúʼu kuniso̱ʼoyó ndiʼi ña̱ káʼa̱n Jehová xíʼinyó. Tiempo vitin Jehová xíniñúʼura Biblia ña̱ káʼa̱nra xíʼinyó. ¿Ndáaña xíniñúʼu keʼéyó ña̱ va̱ʼa taxiyó ña̱ ná chindeétáʼan tu̱ʼunra xíʼinyó xíʼin ki̱ʼva ña̱ ndákanixi̱níyó, xíʼin ña̱ kúni̱yó keʼéyó?

16. ¿Ndáaña xíniñúʼu keʼéyó xíʼin tu̱ʼun Ndióxi̱, ta ndáa ki̱ʼva keʼéyó ña̱yóʼo?

¹⁶ Tá xíxiyó ta ku̱a̱ndee ña̱yóʼo ku̱ñuyó, saá  kúú ña̱ ndúndakúkayó. Ta ki̱ʼva saá íyo ña̱ Biblia tá káʼviyóña ta ndákanixi̱níyó xa̱ʼa̱ ña̱ káʼa̱nña, ña̱yóʼo chindeétáʼankaña xíʼinyó ña̱ kandíxakayó Ndióxi̱. Ña̱yóʼo kúú ña̱ sákuaʼayó xíʼin visión ña̱ xi̱ni ta̱ Ezequiel. Jehová kúni̱ra ña̱ ná “sakútuyó ti̱xinyó” xíʼin tu̱ʼunra, ta ná kunda̱a̱-iniyó xíʼinña. Ña̱kán xíniñúʼu ka̱ʼa̱nyó xíʼinra, kaʼviyó tu̱ʼunra ta ndakanixi̱níyó xa̱ʼa̱ña. Ña̱ siʼna kéʼéyó tá kúma̱níka kaʼviyó tu̱ʼunra kúú ña̱ káʼa̱nyó xíʼinra ña̱ ná chindeétáʼanra xíʼinyó kunda̱a̱-iniyó xíʼinña. Tándi̱ʼi, saá káʼviyó ña̱ va̱xi nu̱ú Biblia. Tá xa̱a̱ ka̱ʼviyóña, kíxáʼayó ndákanixi̱níyó xa̱ʼa̱ ña̱ káʼa̱nña. ¿Ndáaña va̱ʼa ndakiʼinyó tá kéʼéyó ña̱yóʼo? Tá ndákanikaxi̱níyó xa̱ʼa̱ña, saá kúú ña̱ kunda̱a̱ káxi iniyó ndáaña káʼa̱n Jehová xíʼinyó nu̱ú tu̱ʼunra.

17. ¿Nda̱chun ndáyáʼviní ndakanixi̱níyó xa̱ʼa̱ ña̱ káʼviyó nu̱ú Biblia?

¹⁷ ¿Nda̱chun ndáyáʼviní kaʼviyó Biblia ta ndakanixi̱níyó xa̱ʼa̱ ña̱ káʼa̱nña? Saáchi ña̱yóʼo ndasandakúña-iniyó ña̱ natúʼunyó xa̱ʼa̱ reino Ndióxi̱ tiempo vitin, ta saátu ndasandakúña-iniyó chí nu̱únínu ña̱ natúʼunyó xíʼin na̱ yiví xa̱ʼa̱ tu̱ndóʼo ña̱ kixi nu̱úna. Ta tá ndákanixi̱níyó xa̱ʼa̱ ña̱ va̱ʼaní-ini Jehová xíʼin xa̱ʼa̱ ña̱ kúʼvi̱ní-inira xínira miíyó, saá kúú ña̱ xáa̱yó va̱ʼaka kítáʼanyó xíʼinra. Ta tá kéʼéyó ña̱yóʼo ku̱a̱ʼání ña̱ va̱ʼa taxira ndaʼa̱yó, tá kúú ña̱ táxi̱n koo iniyó ta saátu ña̱ va̱ʼa kuniyó (Sal. 119:103).

18. ¿Ndáaña kunda̱a̱-ini na̱ yiví na̱ íyo territorio ña̱ kúúmiíyó, ta nda̱chun?

¹⁸ Miíyó va̱ása kúúyó profeta nda̱a̱ táki̱ʼva ni̱xi̱yo ta̱ Ezequiel, soo kúnda̱a̱va-iniyó ña̱ káʼa̱n Jehová nu̱ú tu̱ʼunra. Ta ná chika̱a̱-iniyó ña̱ ndakundeéyó natúʼunyó xa̱ʼa̱ Ndióxi̱ nda̱a̱ ná kixaa̱ ki̱vi̱ ña̱ ka̱ʼa̱nra xíʼinyó ña̱ va̱ása natúʼunkayó xa̱ʼa̱ra. Tá ná kixaa̱ tiempo ña̱ ndatiin Jehová ku̱a̱chi, na̱ yiví na̱ íyo territorio ña̱ kúúmiíyó va̱ása ka̱ʼa̱nna ña̱ kǒo nda̱a̱ ni iin na̱ nínatúʼun xíʼinna ta va̱ása ka̱ʼa̱nna ña̱ kǒo nínatúʼun Ndióxi̱ xíʼinna xa̱ʼa̱ ña̱ keʼéra (Ezeq. 3:19; 18:23). Chi na̱kán xa̱a̱na kunda̱a̱-inina ña̱ mií Ndióxi̱ kúú ta̱ chi̱ndaʼá miíyó ña̱ natúʼunyó xíʼinna xa̱ʼa̱ra.

19. ¿Ndáaña taxi ndee̱ ndaʼa̱yó ña̱ ndakundeéyó natúʼunyó xíʼin na̱ yiví na̱ íyo territorio ña̱ kúúmiíyó?

¹⁹ ¿Ndáaña taxi ndee̱ ndaʼa̱yó ña̱ ndakundeéyó natúʼunyó xíʼin na̱ yiví na̱ íyo territorio ña̱ kúúmiíyó? U̱ni̱ ña̱ nda̱sandakú-ini ta̱ Ezequiel kivi chindeétáʼan xíʼinyó. Tá kúú ndákundeéyó nátúʼunyó xa̱ʼa̱ Jehová chi miíra kúú ta̱ chi̱ndaʼá miíyó ña̱ keʼéyó chiñu yóʼo, espíritu santora kúú ña̱ táxi ndee̱ ndaʼa̱yó ta saátu tu̱ʼunra. Jehová kúú ta̱ chíndeétáʼan xíʼinyó ña̱ kǒo sandákooyó natúʼunyó xa̱ʼa̱ra ta saátu chíndeétáʼanra xíʼinyó ña̱ ndakú koo iniyó nda̱a̱ ki̱vi̱ nu̱ú ndíʼi (Mat. 24:13).