1. ¿Nda̱chun va̱ʼa kúnda̱a̱-iniyó ña̱ kúni̱ Jehová koo yatinra nu̱úyó?

 JEHOVÁ káʼa̱nra xíʼinyó ña̱ ná koo yatinyó xíʼinra (Sant. 4:8). Kúni̱ra koora Ndióxi̱yó, yiváyó ta saátu kúni̱ra koora migoyó. Ndákuiinra oración ña̱ kéʼéyó nu̱úra ta saátu chíndeétáʼanra xíʼinyó tá íyo tu̱ndóʼo nu̱úyó. Saátu sánáʼa̱ra miíyó ta xíniñúʼura na̱ ñuura ña̱ kundaana miíyó. Soo, ¿ndáaña xíniñúʼu keʼéyó ña̱ va̱ʼa koo yatinyó xíʼinra?

2. ¿Ndáa ki̱ʼva kuyatinkayó nu̱ú Jehová?

² Kivi kuyatinyó nu̱ú Jehová tá káʼa̱nyó xíʼinra tá káʼviyó tu̱ʼunra ta ndákanixi̱níyó xa̱ʼa̱ña. Ña̱yóʼo chindeétáʼan xíʼinyó ña̱ kuʼvi̱ka-iniyó kuniyóra ta saátu taxiyó tíxa̱ʼvi ndaʼa̱ra. Ta ña̱yóʼo chika̱a̱ña-iniyó ña̱ kuniso̱ʼoyó ndiʼi ña̱ káʼa̱nra xíʼinyó ta ndasakáʼnuyóra nda̱a̱ táki̱ʼva kúni̱ miíra (Apoc. 4:11). Tá ná kuxini̱kayó Jehová, saá kúú ña̱ kandíxakayóra ta saátu na̱ ñuura na̱ ta̱xira kuniʼi yichi̱ nu̱úyó.

3. a) ¿Ndáaña kéʼé ta̱ Ndi̱va̱ʼa ña̱ va̱ʼa sakúxíkara miíyó nu̱ú Jehová? b) ¿Ndáaña xíniñúʼu keʼéyó ña̱ va̱ása sándakooyó Jehová ta saátu na̱ ñuura? (Salmo 31:13, 14).

³ Tá íyo tu̱ndóʼo nu̱úyó saá kúú ña̱ kúni̱ ta̱ Ndi̱va̱ʼa sakúxíkara miíyó nu̱ú Jehová. ¿Ndáa ki̱ʼva kéʼéra ña̱yóʼo? Chíka̱a̱ra-iniyó ña̱ ná va̱ása kandíxakayó Jehová ta saátu na̱ ñuura. Soo íyova ña̱ kivi keʼéyó, chi tá ná kandíxaníyó Jehová xíʼin ndiʼi níma̱yó, va̱ása sandákooyóra ta saátu va̱ása sandákooyó na̱ ñuura (kaʼvi Salmo 31:13, 14). b

4. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

⁴ Nu̱ú artículo yóʼo ka̱ʼa̱nyó u̱ni̱ ña̱ kivi kundoʼoyó, ta tá ná kundoʼoyó ña̱yóʼo kivi xa̱a̱yó va̱ása kandíxakayó Jehová ta saátu na̱ ñuura. ¿Nda̱saa kivi sakúxíka ña̱yóʼo miíyó nu̱ú  Jehová? Ta, ¿ndáaña kivi keʼéyó ña̱ va̱ása kuchiñu ta̱ Ndi̱va̱ʼa keʼéra ña̱yóʼo xíʼinyó?

5. ¿Ndáaña kivi kuu tá ná kundoʼoyó iin tu̱ndóʼo?

⁵ Sana kivi kindaana chiñu ndaʼa̱yó á saátu kivi kasi na̱ veʼeyó nu̱úyó ña̱ ndasakáʼnuyó Jehová. Ta tá ná kundoʼoyó ña̱yóʼo kivi xa̱a̱yó va̱ása kandíxakayó na̱ ñuu Jehová ta saátu nda̱a̱ kivi kuxíkáyó nu̱úra. Tá xa̱a̱ ku̱a̱ʼání tiempo íyo tu̱ndóʼo nu̱úyó sana kivi kixáʼayó ndakanixi̱níyó ña̱ kǒoka ña̱ kivi keʼéyó ta kixáʼayó ndakava-iniyó. Ta tá ndóʼoyó ña̱yóʼo, ta̱ Ndi̱va̱ʼa kúni̱ra ná ndakanixi̱níyó ña̱ va̱ása kúʼvi̱ka-ini Jehová xínira miíyó. Kúni̱ra ña̱ ná kixáʼayó ndakanixi̱níyó ña̱ mií Jehová xíʼin na̱ ñuura kúúmií ku̱a̱chi xa̱ʼa̱ ña̱ ndóʼoyó. Saá xi̱ndakanixi̱ní sava na̱ ñuu Israel na̱ xi̱ndoo ñuu Egipto. Tá xa̱ʼa̱, ka̱ndíxana ña̱ mií Jehová nda̱kaxin ta̱ Moisés xíʼin ta̱ Aarón ña̱ tavárana ti̱xin ñuu Egipto (Éx. 4:29-31). Soo tá ndeéka ki̱xáʼa ta̱ faraón sa̱xóʼvi̱rana, chi̱kaa̱na ku̱a̱chi ta̱ Moisés xíʼin ta̱ Aarón ta ka̱china: “Xa̱ʼa̱ ña̱ ke̱ʼéndó ta̱ faraón xíʼin na̱ káchíñu nu̱úra sáa̱nína xínina ndi̱ʼi ta vitin kúni̱na kaʼnína ndi̱ʼi̱” (Éx. 5:19-21). Va̱ása va̱ʼa níkeʼéna saáchi chi̱kaa̱na ku̱a̱chi na̱ xi̱ndasakáʼnu Ndióxi̱. Tá xa̱a̱ ku̱a̱ʼání tiempo kúndeé-iniún nu̱ú tu̱ndóʼo, ¿ndáaña kivi keʼún ña̱ ndakundeún kandíxaún Jehová ta saátu na̱ ñuura?

6. ¿Ndáaña sákuaʼayó xíʼin ña̱ ke̱ʼé ta̱ Habacuc? (Habacuc 3:17-19).

⁶ Kundaa-ini Jehová ta ka̱ʼa̱n xíʼinra xa̱ʼa̱ ndiʼi ña̱ ndóʼún. Ta̱ profeta Habacuc ku̱a̱ʼání tu̱ndóʼo ni̱ya̱ʼara nu̱ú. Ta nda̱a̱ sana ni̱xi̱ka-inira ña̱ va̱ása ndíʼi̱-ini Jehová xa̱ʼa̱ra. Soo ni̱ka̱ʼa̱nra xíʼin Jehová xa̱ʼa̱ ndiʼi ña̱ xi̱ndoʼora. Ka̱chira: “¿Nda̱a̱ ama kuakundáʼvii̱ nu̱ún Jehová, ña̱ chindeétáʼún xíʼi̱n ta kǒo xíniso̱ʼún? […] ¿Nda̱chun táxiún íxandi̱va̱ʼa na̱ yiví xíʼin táʼanna?” (Hab. 1:2, 3). Ta Jehová nda̱kuiinvara oración ña̱ ke̱ʼé ta̱ Habacuc nu̱úra (Hab. 2:2, 3). Ta tá nda̱kanixi̱níra xa̱ʼa̱ ki̱ʼva ña̱ sa̱kǎku Jehová na̱ ñuura, ta̱ Habacuc ki̱xáʼa tukura kúsi̱í-inira. Ta ka̱ndíxara ña̱ ndíʼi̱va-ini Jehová xa̱ʼa̱ra ta chindeétáʼanra xíʼinra ña̱ ya̱ʼara nu̱ú tu̱ndóʼo (kaʼvi Habacuc 3:17-19). c ¿Ndáaña sákuaʼayó xíʼin ña̱yóʼo? Ta íyo tu̱ndóʼo nu̱úyó, ná kundaa-iniyó Jehová ta ná ka̱ʼa̱nyó xíʼinra xa̱ʼa̱ ndiʼi ña̱ ndóʼoyó. Ná kandíxayó ña̱ taxivara ndee̱ ndaʼa̱yó ña̱ ya̱ʼayó nu̱ú tu̱ndóʼo. Ta tá ná kotoyó ndáa ki̱ʼva chíndeétáʼanra xíʼinyó saá kúúña va̱ʼaníka xa̱a̱yó kandíxayóra.

7. ¿Ndáaña xi̱kuni̱ iin na̱ veʼe ñá Shirley keʼéna xíʼinñá, ta ndáaña chi̱ndeétáʼan xíʼinñá nda̱kundeéñá ka̱ndíxañá Jehová?

⁷ Keʼé ña̱ʼa ña̱ chindeétáʼan xíʼún koo yatiún nu̱ú Jehová. Ña̱yóʼo kúú ña̱ chi̱ndeétáʼan xíʼin iin ñá hermana ñá naní Shirley ñá íyo chí Papúa Nueva Guinea tá ni̱ya̱ʼañá nu̱ú tu̱ndóʼo. d Na̱ ndáʼvi xi̱kuu na̱ veʼeñá ta sava yichi̱ xi̱ ixayo̱ʼvi̱ña xíʼinna ni̱ʼína ña̱ kuxuna. Iin na̱ veʼeñá xi̱kuni̱na sandákavana-iniñá tasaá va̱ása kandíxakañá Jehová, ta ña̱yóʼo ni̱ka̱ʼa̱nna xíʼinñá: “Yóʼó káʼún ña̱ chíndeétáʼanva espíritu santo Ndióxi̱ xíʼún. Soo, ¿á chíndeétáʼanña xíʼún vitin? Ndákundeéndó kúúndó na̱ ndáʼviva, ¿á kǒova chiñu nu̱ún ña̱kán xíkaún nátúʼún xa̱ʼa̱ Ndióxi̱?”. Ñá Shirley sava yichi̱ xi̱ndakanixi̱níñá á xi̱ndakaʼán Jehová xa̱ʼa̱ñá ta saátu xa̱ʼa̱ na̱ veʼeñá. Ñáyóʼo káchiñá: “Kamaní ki̱xáʼíi̱ ni̱ka̱ʼi̱n xíʼin Jehová ta ni̱ka̱ʼi̱n xíʼinra  xa̱ʼa̱ ndiʼi ña̱ xi̱ndoʼi̱. Nda̱kundeéi̱ ka̱ʼvii̱ tu̱ʼunra ta saátu inkaka tutu ña̱ tává na̱ ñuura, ta kǒo nísandákoi̱ ña̱ natúʼi̱n xa̱ʼa̱ra ta saátu ña̱ ku̱i̱ʼi reunión”. Ñá Shirley ki̱ʼinñá kuenta ña̱ xi̱ndaava Jehová na̱ veʼeñá saáchi ni̱xi̱yova loʼo ña̱ xi̱xixina ta xi̱kusi̱í-inina xíʼin ña̱yóʼo. Ña̱yóʼo ni̱ka̱ʼa̱nñá: “Ki̱ʼii̱n kuenta ña̱ nda̱kuiinva Jehová oración ña̱ ke̱ʼíi̱ nu̱úra” (1 Tim. 6:6-8). Tá ná ndakundeún keʼún chiñu nu̱ú Jehová, va̱ása kuchiñu tu̱ndóʼo sakúxíkaña yóʼó nu̱úra ta saátu va̱ása kaka-iniún xa̱ʼa̱ra.

8. ¿Ndáaña kivi kundoʼo na̱ hermano na̱ kúúmií chiñu ti̱xin ñuu Ndióxi̱?

⁸ Sava na̱ tává noticia nu̱ú Internet sáa̱na xínina miíyó ta káʼa̱nna ña̱ vatá xa̱ʼa̱ na̱ hermano na̱ kúúmií chiñu ti̱xin ñuu Jehová (Sal. 31:13). Chíka̱a̱na ku̱a̱chi na̱ hermanoyó ta táannana veʼeka̱a. Saá ku̱u xíʼin ta̱ Pablo tá siglo nu̱ú, chi̱kaa̱na ku̱a̱chira ta chi̱kaa̱nara veʼeka̱a. ¿Ndáaña ke̱ʼé sava na̱ cristiano tá ndo̱ʼora ña̱yóʼo?

9. ¿Ndáaña ke̱ʼé sava na̱ cristiano tá chi̱kaa̱na ta̱ apóstol Pablo veʼeka̱a?

⁹ Tá xi̱ndika̱a̱ ta̱ apóstol Pablo veʼeka̱a chí Roma, sava na̱ cristiano sa̱ndákoo ndaʼa̱nara (2 Tim. 1:8, 15). ¿Nda̱chun ke̱ʼéna saá? ¿Á xa̱ʼa̱ ña̱ xi̱kukaʼan nu̱úna kúúña chi xi̱ka̱ʼa̱nna xa̱ʼa̱ ta̱ Pablo ña̱ xi̱keʼéra ña̱ va̱ása va̱ʼa kúúña? (2 Tim. 2:8, 9). ¿Á xi̱yiʼvína ña̱ saátu kivi ixandi̱va̱ʼa na̱ yiví xíʼinna kúúña? Va̱ása xíni̱yó ndáa xa̱ʼa̱ kúúña, soo sana va̱ása va̱ʼa níkuni ta̱ Pablo xa̱ʼa̱ ña̱yóʼo. Chi miíra ni̱xo̱ʼvi̱níra xa̱ʼa̱na ta nda̱a̱ xi̱kuni̱ na̱ yiví kaʼnínara (Hech. 20:18-21; 2 Cor. 1:8). Ná va̱ása keʼéyó táki̱ʼva ke̱ʼé na̱ cristiano kán, chi sa̱ndákoo ndaʼa̱na ta̱ Pablo tá xi̱niñúʼura ña̱ chindeétáʼanna xíʼinra. ¿Ndáaña xíniñúʼu kiʼinyó kuenta xíʼin tá íxandi̱va̱ʼana xíʼin na̱ hermano na̱ kúúmií chiñu ti̱xin ñuu Ndióxi̱?

10. ¿Ndáaña xíniñúʼu ndakaʼányó tá íxandi̱va̱ʼana xíʼin na̱ hermano na̱ kúúmií chiñu ti̱xin ñuu Ndióxi̱, ta nda̱chun?

¹⁰ Ná ndakaʼányó nda̱chun kúú ña̱ íxandi̱va̱ʼana xíʼinyó ta ndáana kéʼé saá. Nu̱ú 2 Timoteo 3:12, káchiña: “Ndiʼi na̱ kúni̱ ndasakáʼnu Ndióxi̱ ta kúni̱na kutáʼanna xíʼin ta̱ Cristo  Jesús, ixandi̱va̱ʼatuna xíʼin na̱yóʼova”. Ña̱kán va̱ása xíniñúʼu ndakanda̱-iniyó ña̱ ta̱ Ndi̱va̱ʼa kúú ta̱ sáxo̱ʼvi̱ na̱ hermano na̱ kúúmií chiñu ti̱xin ñuu Ndióxi̱. Ta̱ Ndi̱va̱ʼa kúni̱ra ña̱ ná sandákoo na̱ hermano ña̱ nda̱kú koo inina xíʼin Jehová ta kúni̱ra ná yi̱ʼvíyó (1 Ped. 5:8).

11. ¿Ndáaña sákuaʼayó xíʼin ña̱ ke̱ʼé ta̱ Onesíforo? (2 Timoteo 1:16-18).

¹¹ Ndakundeé nda̱kú koo iniún xíʼin na̱ hermano na̱ kúúmií chiñu ti̱xin ñuu Ndióxi̱ (kaʼvi 2 Timoteo 1:16-18). Tá siglo nu̱ú, ni̱xi̱yo iin ta̱ cristiano ta̱ va̱ʼaní chi̱ndeétáʼan xíʼin ta̱ Pablo tá xi̱ndika̱a̱ra veʼeka̱a, ta̱yóʼo xi̱naníra Onesíforo. Ña̱yóʼo ni̱ka̱ʼa̱n ta̱ Pablo xa̱ʼa̱ra: “Kǒo níkukaʼan nu̱úra kunira yi̱ʼi̱ ni núʼni cadena ndaʼíi̱ ndíka̱i̱ veʼeka̱a”. Ta̱ Onesíforo na̱ndukúra ta̱ Pablo, ta tá nda̱ni̱ʼírara chi̱ndeétáʼanra xíʼinra. Nda̱a̱ kivi kaʼnívana ta̱ Onesíforo xa̱ʼa̱ ña̱ ke̱ʼéra ña̱yóʼo. ¿Ndáaña sákuaʼayó xíʼin ña̱yóʼo? Ña̱ sákuaʼayó kúú ña̱ ná va̱ása yi̱ʼvíyó nu̱ú inkana ña̱ va̱ʼa chindeétáʼanyó xíʼin na̱ hermanoyó na̱ íxandi̱va̱ʼana xíʼin. Ná chika̱a̱yó ndee̱ ña̱ ndakiʼinyó tu̱ʼunna ta chindeétáʼanyó xíʼinna (Prov. 17:17). Ná na̱ʼa̱yó ña̱ kúʼvi̱-iniyó xíniyóna ta ná chindeétáʼanyó xíʼinna.

12. ¿Ndáaña sákuaʼayó xíʼin ña̱ kéʼé na̱ hermano xíʼin ná hermana ñuu Rusia?

¹² Kotondó ndáaña kéʼé na̱ hermanoyó xíʼin ná hermanayó na̱ ñuu Rusia tá chika̱a̱na iin na̱yóʼo veʼeka̱a. Tá xáʼa̱n iin na̱yóʼo nu̱ú na̱ chíñu, ndiʼi na̱ hermano xáʼa̱n ña̱ chindeétáʼanna xíʼinna. ¿Ndáaña sákuaʼayó xíʼin ña̱yóʼo? Tá káʼa̱nna ña̱ vatá xa̱ʼa̱ na̱ hermanoyó na̱ kúúmií chiñu ti̱xin ñuu Ndióxi̱, tá táannana veʼeka̱a á íxandi̱va̱ʼana xíʼinna, ná va̱ása yi̱ʼvíyó. Ná ka̱ʼa̱nyó xa̱ʼa̱na xíʼin Ndióxi̱, ná chindeétáʼanyó xíʼin na̱ veʼena ta saátu ná ndukúyó ki̱ʼva ña̱ chindeétáʼanyó xíʼin miína (Hech. 12:5; 2 Cor. 1:10, 11).

13. Tá kúsi̱kindaana miíyó, ¿á kivi sakúxíkána miíyó nu̱ú Jehová xíʼin na̱ ñuura?

¹³ Sana na̱ veʼeyó na̱ va̱ása sákuaʼa xa̱ʼa̱ Jehová, na̱ káchíñu xíʼinyó á na̱ káʼvi xíʼinyó escuela kivi kusi̱kindaana miíyó saáchi nátúʼunyó xa̱ʼa̱ Ndióxi̱ ta ndíku̱nyó ña̱ sánáʼa̱ra miíyó (1 Ped. 4:4). Ta sana ka̱ʼa̱nna xíʼinyó: “Va̱ʼava na̱ yiví kúún nu̱úi̱, soo va̱ása kútói̱ religión ña̱ ndíku̱n chi va̱ása táxiña keʼéyó ña̱ kúni̱ miíyó ta saátu yatáníña”. Savatuna kivi ka̱ʼa̱nna ña̱yóʼo xíʼinyó xa̱ʼa̱ ña̱ kéʼéyó xíʼin na̱ kée ti̱xin ñuu Ndióxi̱: “Va̱ása kiviví ka̱ʼún ña̱ kúʼvi̱-iniún xíniún na̱ yiví”. Tá kúu táʼan ña̱yóʼo kivi kixáʼayó kaka-iniyó ta ndakanixi̱níyó xa̱ʼa̱ ña̱yóʼo: “¿Á kuchiñui̱ keʼíi̱ ndiʼi ña̱ káʼa̱n Jehová? ¿Á sásiní na̱ ñuura nu̱úi̱ ña̱ keʼíi̱ ña̱ kúni̱ miíi̱?”. Tá ndóʼoyó táʼan ña̱yóʼo, ¿ndáaña kivi keʼéyó ña̱ va̱ása kuxíkáyó nu̱ú Jehová xíʼin nu̱ú na̱ ñuura?

14. ¿Ndáaña keʼéyó tá inkana kúsi̱kindaana miíyó xa̱ʼa̱ ña̱ ndíku̱nyó ley Jehová? (Salmo 119:50-52).

¹⁴ Ná kundiku̱nyó ley Jehová. Ta̱ Job va̱ʼaní xi̱ndiku̱nra ley Jehová ni inkana xi̱kusi̱kindaanara. Iin ta̱ xi̱ka̱ʼa̱n ña̱ xi̱kuura migo ta̱ Job xi̱kuni̱ra ná ndakanixi̱ní ta̱ Job ña̱ va̱ása ndáyáʼvira nu̱ú Ndióxi̱ ni ná kundiku̱nra leyra (Job 4:17, 18; 22:3). Soo va̱ása níkeʼé ta̱ Job saá, chi xi̱kunda̱a̱-inira ndáaña káʼa̱n ley Jehová xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼa ta xi̱ndiku̱nvaraña. Ta va̱ása nítaxira ña̱ sandákava inkana inira ta va̱ása nda̱kúka koo inira xíʼin Ndióxi̱ (Job 27:5, 6). ¿Ndáaña sákuaʼayó xíʼin ña̱yóʼo? Tá kúsi̱kindaana miíyó ná va̱ása kaka-iniyó xa̱ʼa̱ ley Jehová. Chi xa̱a̱ ku̱a̱ʼáníva ña̱ va̱ʼa ndákiʼinyó xa̱ʼa̱ ña̱ ndíku̱nyó ña̱ káʼa̱n Jehová xíʼinyó. Ná ndakundeéyó kutáʼanyó xíʼin na̱ ñuu Ndióxi̱ chi na̱yóʼo va̱ʼaní ndíku̱nna ña̱ káʼa̱n Jehová. Tasaá ni  kúsi̱kindaa na̱ yiví miíyó va̱ása kuxíkáyó nu̱ú Jehová (kaʼvi Salmo 119:50-52). e

15. ¿Nda̱chun xi̱niñúʼu kundeé-ini ñá Brizit xíʼin ña̱ xi̱keʼé na̱ veʼeñá xíʼinñá?

¹⁵ Ná kotoyó ña̱ ndo̱ʼo ñá Brizit, iin ñá hermana ñá íyo chí India. Xa̱ʼa̱ ña̱ xi̱kuuñá testigo Jehová na̱ veʼeñá xi̱kusi̱kindaanañá. Nda̱chuchiñá tá ku̱i̱ya̱ 1997, ta tá ni̱ya̱ʼa loʼo tiempo, yiíñá ta̱ va̱ása kúú testigo kǒoka chiñu níxi̱kuumiíra. Ña̱kán nda̱kiʼinra ñá Brizit xíʼin ná válí se̱ʼena ta ku̱a̱ʼa̱nna koona chí nu̱ú íyo na̱ yivára. Soo ki̱xi ku̱a̱ʼáka tu̱ndóʼo nu̱ú ñá Brizit. Xi̱niñúʼu kachíñuñá ndiʼi ki̱vi̱ ña̱ va̱ʼa taxiñá ña̱ kuxu na̱ veʼeñá. Ta congregación ña̱ yatinka kíndo̱o, ki̱ʼva 350 kilómetro xi̱kindo̱oña. Ta saátu na̱ veʼe yiíñá va̱ása níxiinna kuninañá xa̱ʼa̱ ña̱ xi̱kuuñá testigo Jehová. Ta xa̱ʼa̱ ña̱ xi̱kundasínína xi̱xininañá, ñá Brizit xíʼin na̱ veʼeñá nda̱kiʼinna ku̱a̱ʼa̱nna koona inka lugar. Tasaá iin kama ni̱xi̱ʼi̱ yiíñá, ta tándi̱ʼi ni̱xi̱ʼi̱ iin ñá loʼo se̱ʼeñá ñá xi̱kuumií 12 ku̱i̱ya̱ xa̱ʼa̱ ña̱ xi̱kuumiíñá cáncer. Ta saátu ki̱xi inkaka tu̱ndóʼo nu̱úñá, na̱ veʼe miíñá chika̱a̱na ku̱a̱chiñá xa̱ʼa̱ tu̱ndóʼo ña̱ ndo̱ʼoñá. Ni̱ka̱ʼa̱nna xíʼinñá ña̱ tá va̱ása níxi̱yoñá testigo Jehová va̱ása kundoʼovíñá tu̱ndóʼo kán. Soo ñá Brizit nda̱kundeéñá ka̱ndíxañá Jehová ta va̱ása níkuxíkáñá nu̱ú na̱ ñuura.

16. ¿Ndáaña va̱ʼa nda̱kiʼin ñá Brizit xa̱ʼa̱ ña̱ nda̱kúní ni̱xi̱yo iniñá xíʼin Jehová ta saátu xíʼin na̱ ñuura?

¹⁶ Xa̱ʼa̱ ña̱ xíkání ni̱xi̱yo ñá Brizit nu̱ú íyo congregación, iin ta̱ superintendente ña̱ circuito ni̱ka̱ʼa̱nra xíʼinñá ña̱ ná natúʼunñá xa̱ʼa̱ Ndióxi̱ ñuu nu̱ú íyoñá ta saátu ná keʼéñá reunión ti̱xin veʼeñá. Tá xa̱ʼa̱, nda̱kanixi̱níñá ña̱ va̱ása kuchiñuñá keʼéñáña. Soo xi̱ndiku̱nñá ña̱ ni̱ka̱ʼa̱n ta̱ superintendente kán xíʼinñá ta ki̱xáʼañá nátúʼunñá xíʼin na̱ yiví ta saátu ki̱xáʼañá kéʼéñá reunión chí veʼeñá ta ki̱xáʼañá káʼviñá xíʼin ná válí se̱ʼeñá. ¿Ndáaña ku̱u xa̱ʼa̱ ña̱ ki̱xáʼañá kéʼéñá ña̱yóʼo? Ñá Brizit ku̱a̱ʼání na̱ yiví ki̱xáʼañá káʼviñá xíʼin ta ku̱a̱ʼá na̱yóʼo ni̱xa̱a̱na nda̱kuchina.  Ta tá ku̱i̱ya̱ 2005 ni̱xa̱a̱ñá ndu̱uñá precursora regular. Ku̱a̱ʼání ña̱ va̱ʼa nda̱kiʼin ñá Brizit xa̱ʼa̱ ña̱ ka̱ndíxañá Jehová ta saátu xa̱ʼa̱ ña̱ nda̱kú ni̱xi̱yo iniñá xíʼin na̱ ñuura. Vitin ná válí se̱ʼeñá káchíñuná nu̱ú Jehová, ta íyo u̱vi̱ congregación ñuu nu̱ú ndóoná. Ñá Brizit kándíxaníñá ña̱ chi̱ndeétáʼan Jehová xíʼinñá ku̱ndeé-iniñá ni̱ya̱ʼañá nu̱ú tu̱ndóʼo ta saátu ña̱ ku̱ndeé-iniñá nu̱ú ña̱ xi̱keʼé na̱ veʼeñá xíʼinñá.

17. ¿Ndáaña xíniñúʼu chika̱a̱-iniyó keʼéyó?

¹⁷ Tá ku̱a̱yaʼayó nu̱ú tu̱ndóʼo ta̱ Ndi̱va̱ʼa kúni̱ra ná ndakanixi̱níyó ña̱ sándakoo ndaʼa̱ Jehová miíyó ta xa̱ʼa̱ ña̱ ndíku̱nyó ña̱ káʼa̱n na̱ ñuura nina tu̱ndóʼo va̱xi nu̱úyó. Tá káʼa̱nna ña̱ vatá xa̱ʼa̱ na̱ hermano na̱ níʼi yichi̱ nu̱úyó ti̱xin ñuu Ndióxi̱, tá íxandi̱va̱ʼana xíʼinná á tá táannana veʼeka̱a, ta̱ Ndi̱va̱ʼa kúni̱ra ña̱ ná yi̱ʼvíyó. Ta saátu ta̱ Ndi̱va̱ʼa xíniñúʼura ña̱ kúsi̱kindaana miíyó ña̱ va̱ʼa kǒo kandíxakayó ña̱ káʼa̱n Jehová ni na̱ ñuura. Ta miíyó xa̱a̱ xíni̱vayó ndáaña xíniñúʼu ta̱ Ndi̱va̱ʼa ña̱ sandáʼvira miíyó, ña̱kán va̱ása kéʼéyó ña̱ kúni̱ra (2 Cor. 2:11). Ta ndiʼi ña̱ vatá ña̱ káʼa̱nra ná va̱ása kandíxayóña ta nda̱kú ná koo iniyó xíʼin Jehová ta saátu xíʼin na̱ ñuura. Ná ndakaʼányó chi Jehová va̱ása sandákoondaʼa̱ra miíyó tá ku̱a̱yaʼayó nu̱ú tu̱ndóʼo (Sal. 28:7). Ña̱kán ná va̱ása taxiyó ña̱ nda̱a̱ ni iin ña̱ʼa sakúxíkaña miíyó nu̱ú Jehová (Rom. 8:35-39).

18. ¿Ndáaña sákuaʼayó nu̱ú inka artículo?

¹⁸ Ña̱ ni̱ka̱ʼa̱nyó xa̱ʼa̱ nu̱ú artículo yóʼo su̱ví ti̱xin congregación kúuña ta tá ndóʼoyó ña̱yóʼo kivi xa̱a̱yó va̱ása kandíxakayó Jehová ta saátu na̱ ñuura. Soo saátu ti̱xin congregación kivi koo inkaka ña̱ ixayo̱ʼvi̱ xíʼinyó. ¿Ndáaña kivi keʼéyó ña̱ va̱ʼa ya̱ʼayó nu̱ú ña̱yóʼo? Nu̱ú inka artículo sakúaʼayó xa̱ʼa̱ ña̱yóʼo.