1, 2. ¿Nda̱chun túvi̱yó ña̱ kǒo ndákuiin Jehová oraciónyó sava yichi̱?

 “KUSI̱ÍNÍ-INIÚN xíʼin Jehová, ta ta̱yóʼo taxira ña̱ kúni̱ún” (Sal. 37:4). Liviní ña̱ káʼa̱n texto yóʼo. Soo, ¿á kúni̱ kachi ña̱yóʼo ña̱ ndi̱ku̱n taxi Jehová ndiʼi ña̱ ndúkúyó nu̱úra? Ná kotoyó sava ña̱ kúu. Iin ñá hermana kúa̱an káʼa̱nñá xíʼin Jehová ña̱ kúni̱ñá ku̱ʼu̱nñá Escuela ña̱ Evangelizadores del Reino, soo yáʼa ku̱a̱ʼá ku̱i̱ya̱ ta kǒo kánanañá. Iin ta̱ hermano káʼa̱nra xíʼin Jehová ña̱ ná sandáʼarara chi kúni̱ra kachíñukara nu̱úra, soo ndeékava ndóʼora. Iin na̱ matrimonio káʼa̱nna xíʼin Jehová ña̱ ná chindeétáʼanra xíʼin se̱ʼena ña̱ ná kǒo sandákoora ndasakáʼnura Jehová, soo ta̱ loʼo yóʼo sándakoovara Jehová.

² Sana miíún xa̱a̱ ndúkún ña̱ʼa nu̱ú Jehová soo ta̱ʼán ndakuiinra oración ña̱ ke̱ʼún nu̱úra. Ta xa̱ʼa̱ ña̱kán sana ndákanixi̱níún ña̱ ndákuiinra oración inkana, soo oración ña̱ kéʼé miíún kǒo ndákuiinraña. Á sana ndákanixi̱níún ña̱ kǒo ndákuiinra oración ña̱ ke̱ʼún nu̱úra xa̱ʼa̱ ña̱ ke̱ʼún ña̱ va̱ása va̱ʼa. Iin ñá hermana ñá naní Janice nda̱kanixi̱níñá ña̱yóʼo. b Ñá hermana yóʼo xíʼin yii̱ñá ni̱ka̱ʼa̱nna xíʼin Jehová ña̱ xi̱kuni̱na ku̱ʼu̱nna Betel. Ñá Janice káchiñá: “Xi̱kunda̱a̱ káxi inii̱ ña̱ kamaní kanana ndi̱ʼi̱ ña̱ ku̱ʼu̱nndi̱ Betel”. Soo ni̱ya̱ʼa ku̱a̱ʼá yo̱o̱ xíʼin ku̱i̱ya̱ ta kǒo níkanavínana ña̱ ku̱ʼu̱nna Betel. Ñáyóʼo káchiñá: “Nda̱kavaní-inii̱ ta kǒo xínii̱ ndáa xa̱ʼa̱ kúú ña̱ kǒo níndakuiin Jehová oración ña̱ xi̱keʼíi̱. Saáchi káxiní xi̱kaʼi̱n xíʼinra ndáa chiñu kúú ña̱ xi̱kuni̱i̱ keʼíi̱ nu̱úra, ña̱kán kǒo xínii̱ nda̱chun kǒo níndakuiinra oración ña̱ ke̱ʼíi̱ nu̱úra”.

3. ¿Ndáaña sakúaʼayó nu̱ú artículo yóʼo?

 ³ Sava yichi̱ ndákanixi̱níyó á ndixa xíniso̱ʼo Jehová oración ña̱ káʼa̱nyó xíʼinra. Ta saátu xi̱ndakanixi̱ní sava na̱ xi̱ndasakáʼnu Ndióxi̱ tiempo xi̱naʼá (Job 30:20; Sal. 22:2; Hab. 1:2). ¿Ndáaña kivi chindeétáʼan xíʼún ña̱ kandíxaún ña̱ ndákuiinva Jehová oración ña̱ kéʼún nu̱úra? (Sal. 65:2). Ná kotoyó ña̱ kivi chindeétáʼan xíʼinyó, ña̱ nu̱ú: ¿ndáaña kivi kundatuyó keʼé Jehová xa̱ʼa̱yó? Ña̱ u̱vi̱, ¿ndáaña ndátu Jehová ná keʼé miíyó? Ta ña̱ u̱ni̱, ¿nda̱chun xíniñúʼu nasamayó sava ña̱ ndúkúyó nu̱ú Jehová?

4. Táki̱ʼva káchi Jeremías 29:​12, ¿ndáaña káʼa̱n Jehová xíʼinyó?

⁴ Jehová káʼa̱nra xíʼinyó ña̱ xíniso̱ʼovara oración ña̱ káʼa̱nyó xíʼinra (kaʼvi Jeremías 29:12). c Kúʼvi̱níva-ini Jehová xínira ndiʼi na̱ ndásakáʼnu miíra ta xíniso̱ʼora ndiʼi oración ña̱ káʼa̱nna xíʼinra (Sal. 10:17; 37:28). Soo su̱ví ña̱yóʼo kúni̱ kachiña, ña̱ ndiʼi tiempo taxira ña̱ ndúkúyó nu̱úra. Sana xíniñúʼu kundatuyó ña̱ nda̱a̱ nu̱ú ñuyǐví xa̱á taxira ndiʼi ña̱ ndúkúyó nu̱úra.

5. ¿Ndáaña kiʼin Jehová kuenta xíʼin tá xíniso̱ʼora oraciónyó?

⁵ Jehová kíʼinra kuenta ndáa ki̱ʼva xi̱nu ña̱ kúni̱ra tá kúma̱níka ndákuiinra oraciónyó (Is. 55:​8, 9). Ña̱ kúni̱ Jehová kúú ña̱ kixaa̱ iin ki̱vi̱ ña̱ ndiʼi na̱ yiví na̱ koo nu̱ú ñuʼú yóʼo iinlá reinora kaʼndachíñu nu̱úna, ta si̱íní koona ta inkáchi kutáʼanna ndasakáʼnunara. Soo ta̱ Ndi̱va̱ʼa káʼa̱nra ña̱ va̱ʼava kooyó tá ná kǒo kaʼndachíñu Ndióxi̱ nu̱úyó ta keʼéyó ña̱ kúni̱ miíyó (Gén. 3:​1-5). Ta ña̱ va̱ʼa kunda̱a̱-ini na̱ yiví ña̱ su̱ví ña̱ nda̱a̱ kúú ña̱ káʼa̱n ta̱ Ndi̱va̱ʼa, Jehová táxira ña̱ ná keʼé na̱ yiví ña̱ kúni̱ miína á ña̱ kaʼndachíñuna nu̱ú miína, ta xa̱ʼa̱ ña̱yóʼo ku̱a̱ʼání tu̱ndóʼo íyo tiempo vitin (Ecl. 8:9). Xa̱ʼa̱ ña̱kán kǒo ndásaviíví Jehová ndiʼi tu̱ndóʼo ña̱ íyo tiempo vitin. Chi tá ná keʼéraña kivi kixáʼa ndakanixi̱ní sava na̱ yiví ña̱ va̱ʼaníva xáʼndachíñuna, ta saátu ña̱ kivi ndasaviína tu̱ndóʼo ña̱ íyo nu̱ú ñuyǐví yóʼo.

6. ¿Nda̱chun kivi kandíxayó ña̱ kúʼvi̱ní-ini Jehová xínira miíyó?

⁶ Kivi inkáchi koo ña̱ ndukúyó nu̱ú Jehová soo xa̱a̱ síín síínva ndakuiinraña. Tá kúú, ta̱ rey Ezequías ki̱ʼi̱n kue̱ʼe̱ra ta ni̱ka̱ʼa̱n ndáʼvira xíʼin Jehová ña̱ ná sandáʼarara ta Jehová sa̱ndáʼavarara (2 Rey. 20:​1-6). Saátu ta̱ apóstol Pablo ni̱ka̱ʼa̱n ndáʼvira xíʼin Jehová ña̱ ná sandáʼarara chi nda̱a̱ táki̱ʼva íyo iñú saá ni̱xi̱yo ña̱ xi̱ndikaa̱ ku̱ñura ta sananí ña̱yóʼo xi̱kuuña iin kue̱ʼe̱ ña̱ xi̱kuumiíra, soo kǒo nísandáʼaví Jehová ta̱ Pablo (2 Cor. 12:​7-9). Ná ndakaʼányó xa̱ʼa̱ ña̱ ndo̱ʼo ta̱ apóstol Santiago xíʼin ta̱ Pedro. Ta̱ rey Herodes xi̱kuni̱ra kaʼníra u̱vi̱ saá na̱yóʼo. Na̱ congregación ni̱ka̱ʼa̱nvana xíʼin Jehová xa̱ʼa̱ ta̱ Pedro ta saátu xa̱ʼa̱ ta̱ Santiago, soo xa̱ʼnívana ta̱ Santiago, ta ta̱ Pedro ni̱ka̱kuvara, chi Jehová ke̱ʼéra iin milagro ña̱ sa̱kákurara (Hech. 12:​1-11). Ta sana ndákanixi̱níyó nda̱chun kúú ña̱ sa̱káku Jehová iinra ta inkara kǒo nísakákurara. Kǒo káʼa̱nví Biblia xa̱ʼa̱ ña̱yóʼo, soo kivi kandíxayó ña̱ nina ña̱ nda̱kú kúú ña̱ kéʼé Jehová ta xi̱kuʼvi̱ní-inira xi̱xinira ta̱ Pedro xíʼin ta̱ Santiago (Deut. 32:4; Apoc. 21:14). d Sava yichi̱ kǒo ndákuiin Jehová ña̱ káʼa̱nyó xíʼinra nda̱a̱ táki̱ʼva kúni̱ miíyó. Soo kǒo xíniñúʼu natúʼun kúáchiyó xa̱ʼa̱ ndáa ki̱ʼva ndákuiin Jehová ña̱ káʼa̱nyó xíʼinra, saáchi kándíxayó ña̱ kúʼvi̱ní-inira xínira miíyó ta nina ña̱ nda̱kú kúú ña̱ ndáka̱xinra keʼéra (Job 33:13).

7. ¿Ndáaña kǒo xíniñúʼu keʼéyó, ta nda̱chun?

 ⁷ Ná kǒo chitáʼanyó ña̱ ndóʼoyó xíʼin ña̱ ndóʼo inkana. Tá kúú, sana kivi ka̱ʼa̱nyó xíʼin Jehová xa̱ʼa̱ iin ña̱ʼa ña̱ ndóʼoyó, soo ta̱kán kǒo níndakuiinvíra oración ña̱ ni̱ka̱ʼa̱nyó xíʼinra. Soo tándi̱ʼi ku̱ndaa̱-iniyó ña̱ inkáchi íyo ña̱ ndu̱kúyó xíʼin ña̱ ndu̱kú inkana, soo Jehová nda̱kuiinvara oración na̱kán. Ña̱yóʼo kúú ña̱ ndo̱ʼo iin ñá hermana ñá naní Anna. Yii̱ñá ta̱ Matthew xi̱kuumiíra kue̱ʼe̱ cáncer ta ñáyóʼo ni̱ka̱ʼa̱nñá xíʼin Jehová ña̱ chindeétáʼanra xíʼin yii̱ñá ña̱ ndaʼa̱ra. Ta mií tiempo saá u̱vi̱ ná hermana ná xa̱a̱ chée xi̱kuumiítu nákán cáncer. Ta ñá Anna xi̱kaʼa̱nñá xíʼin Jehová xa̱ʼa̱ u̱ni̱ saá na̱yóʼo. U̱vi̱ saá ná hermana kán nda̱ʼavaná, soo ta̱ Matthew ni̱xi̱ʼi̱vara. Ñá Anna xi̱ndakanixi̱níñá ña̱ mií Jehová chi̱ndeétáʼanra xíʼin ná hermana kán, ña̱kán va̱ʼa nda̱ʼaná. Ñá Anna nda̱kanixi̱níñá tá Jehová chi̱ndeétáʼan xíʼin ná hermana kán ña̱ nda̱ʼaná, nda̱chun kǒo níchindeétáʼanra xíʼin yii̱ñá. Kǒo kúnda̱a̱-iniyó nda̱chun va̱ʼa nda̱ʼa ná hermana kán, soo kúnda̱a̱-iniyó ña̱ nu̱ú ñuyǐví xa̱á sandáʼa Jehová ndiʼi na̱ táʼanyó na̱ kúúmií kue̱ʼe̱ ta saátu sandátakura na̱ veʼeyó na̱ ni̱xi̱ʼi̱ (Job 14:15).

8. a) Táki̱ʼva káchi Isaías 43:​2, ¿ndáaña kéʼé Jehová ña̱ va̱ʼa chindeétáʼanra xíʼinyó? b) ¿Ndáa ki̱ʼva chíndeétáʼan oración xíʼinyó tá yáʼayó nu̱ú iin tu̱ndóʼo? (Koto video ña̱ naní Ña̱ oración chíndeétáʼanña xíʼinyó nu̱ú tu̱ndóʼo).

⁸ Ndiʼi tiempo chindeétáʼan Jehová xíʼinyó. Yiváyó Jehová kúʼvi̱ní-inira xínira miíyó ta kǒo kúni̱ra ña̱ xo̱ʼvi̱yó (Is. 63:9). Soo kǒo sáka̱kuvíra miíyó nu̱ú ndiʼi tu̱ndóʼo ña̱ yáʼayó nu̱ú. Biblia chítáʼanña tu̱ndóʼo ña̱ ndóʼoyó xíʼin yu̱ta ta saátu xíʼin ñuʼu̱ ña̱ xíxi̱ (kaʼvi Isaías 43:2). e Soo Jehová káʼa̱nra ña̱ chindeétáʼanvara xíʼinyó tá ná ya̱ʼayó nu̱ú tu̱ndóʼo, ta kǒo taxira ña̱ ndiʼi tiempo sáxo̱ʼvi̱ña miíyó. Ta saátu Jehová táxira espíritu santora ndaʼa̱yó ña̱ chindeétáʼanña xíʼinyó ña̱ ndakú koo iniyó (Luc. 11:13; Filip. 4:13). Ña̱kán, Jehová chindeétáʼanvara xíʼinyó ña̱ va̱ʼa kundeé-iniyó tasaá nda̱kú koo iniyó ña̱ ndasakáʼnuyóra. f

9. ¿Ndáa ki̱ʼva chíndeétáʼan ña̱ va̱xi nu̱ú Santiago 1:​6, 7 xíʼinyó ña̱ kandíxayó ña̱ chindeétáʼanva Jehová xíʼinyó?

⁹ Jehová kúni̱ra ña̱ ná kandíxayó ña̱ káʼa̱nra (Heb. 11:6). Sava yichi̱ tu̱ndóʼo ña̱ yáʼayó nu̱ú yo̱ʼvi̱níña ta ndákanixi̱níyó ña̱ kǒo chíndeétáʼanví Jehová xíʼinyó. Soo Biblia káʼa̱nña ña̱ ndee̱ ña̱ kúúmií Ndióxi̱ kivi chindeétáʼanña xíʼinyó ña̱ ya̱ʼayó nu̱ú tu̱ndóʼo (Sal. 18:29). Ña̱kán ná kǒo kaka-iniyó ta ná ka̱ʼa̱nyó xíʼin Jehová chi chindeétáʼanvara xíʼinyó (kaʼvi Santiago 1:​6, 7).

10. ¿Ndáaña xíniñúʼu keʼéyó tá xa̱a̱ ndi̱ʼi ni̱ka̱ʼa̱nyó xíʼin Jehová?

¹⁰ Tá xa̱a̱ ndi̱ʼi ke̱ʼéyó oración nu̱ú Jehová ná keʼéyó ña̱ ni̱ka̱ʼa̱nyó xíʼinra. Iin ta̱ hermano kúni̱ra ku̱ʼu̱nra asamblea regional, ta káʼa̱nra xíʼin Jehová ña̱ ná chindeétáʼanra xíʼinra ña̱ ná taxi ta̱ patrónra permiso ña̱ ku̱ʼu̱nra. ¿Ndáaña kivi keʼé Jehová ña̱ va̱ʼa ndakuiinra oraciónra? Sana kivi chindeétáʼanra xíʼin ta̱ hermano kán ña̱ ndakú koo inira ta ka̱ʼa̱nra xíʼin ta̱ patrónra. Soo ta̱ hermano kán xíniñúʼu ku̱ʼu̱nra ta ka̱ʼa̱nra xíʼinra. Ta sana ku̱a̱ʼá yichi̱ xíniñúʼu ku̱ʼu̱nra nu̱úra ta nda̱a̱ kivi ka̱ʼa̱nra xíʼinra ña̱ kivi nasamara ki̱vi̱ ña̱ káchíñura xíʼin inka na̱ káchíñu kán. Ta nda̱a̱ kivi ka̱ʼa̱nra xíʼinra ña̱ kǒo chaʼvirara xa̱ʼa̱ ña̱ ki̱vi̱ kán.

11. ¿Nda̱chun kǒo xíniñúʼu sandákooyó ña̱ ndukúyó ña̱ʼa nu̱ú Ndióxi̱?

¹¹ Jehová kúni̱ra ña̱ ná ka̱ʼa̱n ni̱ʼiyó xíʼinra xa̱ʼa̱ ña̱ʼa ña̱ sándi̱ʼi-iniyó (1 Tes. 5:17). Ta̱ Jesús ni̱ka̱ʼa̱nra ña̱ sava yichi̱ va̱ása ndi̱ku̱n kamaví  ndakuiin Jehová yuʼúyó (Luc. 11:9). Soo ná kǒo ndakava-iniyó. Ná chikaa̱yó ndee̱ ña̱ ka̱ʼa̱n ni̱ʼiyó xíʼin Jehová xa̱ʼa̱ ña̱ kúni̱yó (Luc. 18:​1-7). Tá tuku ta tuku káʼa̱nyó xa̱ʼa̱ iin ña̱ʼa, náʼa̱yó nu̱ú Jehová ña̱ ndixa kúni̱yó chindeétáʼanra xíʼinyó ta kándíxaníyó ña̱ kivi keʼéraña.

12. a) ¿Ndáa pregunta kivi ndakanixi̱níyó xa̱ʼa̱, ta nda̱chun? b) ¿Ndáaña kiʼinyó kuenta xíʼin ña̱ va̱ʼa to̱ʼó ka̱ʼa̱nyó xíʼin Jehová? (Koto recuadro ña̱ naní “ ¿Á to̱ʼó káʼi̱n xíʼin Jehová tá ndúkúi̱ ña̱ʼa nu̱úra?”).

¹² Tá xítoyó ña̱ kǒo ndákuiin Jehová yuʼúyó, kivi ndakanixi̱níyó xa̱ʼa̱ u̱ni̱ pregunta. Ña̱ nu̱ú, “¿Á ña̱ xíniñúʼi̱ kúú ña̱ ndúkúi̱ nu̱ú Jehová?”. Ku̱a̱ʼání yichi̱ ndákanixi̱níyó ña̱ xíni̱vayó ndáa ña̱ʼa kúú ña̱ xíniñúʼuyó. Soo sana su̱ví ña̱yóʼoví kúú ña̱ xíniñúʼuyó. Sana yáʼayó nu̱ú iin tu̱ndóʼo ta káʼa̱nyó xíʼin Jehová ña̱ ná chindeétáʼanra xíʼinyó ña̱ ndasaviíyóña, soo sana íyova inka ki̱ʼva ña̱ kivi nduvií ña̱yóʼo. Savatu ña̱ káʼa̱nyó xíʼin Jehová kǒo kítáʼanña xíʼin ña̱ kúni̱ra (1 Juan 5:14). Tá kúú, ná ka̱ʼa̱n tukuyó xa̱ʼa̱ na̱ matrimonio na̱ ni̱ka̱ʼa̱nyó xa̱ʼa̱ nu̱ú párrafo 1. Na̱yóʼo ni̱ka̱ʼa̱nna xíʼin Jehová ña̱ ná chindeétáʼanra xíʼin se̱ʼena, ña̱ ná kǒo sandákoora ña̱ ndasakáʼnurara. Sana kivi ndakanixi̱níyó ña̱ va̱ʼava kúú ña̱ ndu̱kú na̱yóʼo. Soo mií ña̱ nda̱a̱, Jehová kǒo íxandúxara xíʼin nda̱a̱ ni iin na̱ yiví ña̱ ndasakáʼnunara, chi kúni̱ra ña̱ iin tá iinyó níma̱ miíyó ná kana ña̱ kúni̱yó ndasakáʼnuyóra (Deut. 10:​12, 13; 30:​19, 20). Ña̱kán, ¿ndáaña kivi ka̱ʼa̱n na̱ íyo se̱ʼe xíʼin Jehová? Ña̱ ná chindeétáʼanra xíʼinna ña̱ kunda̱a̱-inina ndáa ki̱ʼva sánáʼa̱na na̱ va̱lí se̱ʼena, ña̱ va̱ʼa xa̱a̱ na̱yóʼo kuʼvi̱-inina kunina Jehová ta koona migora (Prov. 22:6; Efes. 6:4).

13. Táki̱ʼva káchi Hebreos 4:​16, ¿ama kúú ña̱ chíndeétáʼan Jehová xíʼinyó?

¹³ Pregunta ña̱ u̱vi̱ kúú ña̱yóʼo: “¿Á túvi Jehová ña̱ tiempo yóʼo kúú ña̱ xíniñúʼi̱ ña̱ʼa  ña̱ ndu̱kúi̱ nu̱úra?”. Sana ndákanixi̱níyó ña̱ xíniñúʼu kamaní ndakuiin Jehová oración ña̱ kéʼéyó nu̱úra. Soo mií ña̱ nda̱a̱, Jehová xíni̱vara ama kúú ña̱ chindeétáʼanra xíʼinyó (kaʼvi Hebreos 4:16). Tá xítoyó ña̱ va̱ása kama ndákuiin Jehová oraciónyó kivi ndakanixi̱níyó ña̱ kǒo chíndeétáʼankavíra xíʼinyó. Soo sana ndátura ta xítora ndáa ki̱ʼva keʼéra ña̱yóʼo. Ná ka̱ʼa̱n tukuyó xa̱ʼa̱ ña̱ ndo̱ʼo iin ta̱ hermano ta̱ xi̱ka̱ʼa̱n xíʼin Jehová ña̱ ná sandáʼarara. Tá nísándaʼa Jehová ta̱ hermano yóʼo, ta̱ Ndi̱va̱ʼa kivi ka̱ʼa̱nra xíʼin Jehová ña̱ ndásakáʼnurara xa̱ʼa̱ ña̱ sa̱ndáʼarara (Job 1:​9-11; 2:4). Soo Jehová xa̱a̱ ni̱ka̱ʼa̱nvara ña̱ nu̱ú ñuyǐví xa̱á sandíʼi-xa̱ʼa̱ra ndiʼi kue̱ʼe̱ (Is. 33:24; Apoc. 21:​3, 4). Ña̱kán, va̱ása kundatuvíyó ña̱ keʼé Jehová milagro ña̱ sandáʼara na̱ yiví. Tá saá, ¿ndáaña kivi ndukú ta̱ hermano yóʼo nu̱ú Jehová? Kivi ka̱ʼa̱nra xíʼinra ña̱ ná taxira ndee̱ ndaʼa̱ra ña̱ va̱ʼa kundeé-inira ta saátu ña̱ kusi̱í-inira ndasakáʼnurara ni ndóʼora iin kue̱ʼe̱ ña̱ yo̱ʼvi̱ní (Sal. 29:11).

14. ¿Ndáaña sákuaʼún xíʼin ña̱ ndo̱ʼo ñá Janice?

¹⁴ ¿Á ndákaʼún xa̱ʼa̱ ñá Janice, ñá hermana ñá ni̱ka̱ʼa̱n xíʼin Jehová ña̱ xi̱kuni̱ñá ku̱ʼu̱nñá Betel? U̱ʼu̱n ku̱i̱ya̱ ni̱ya̱ʼa saáví nda̱kuiin Jehová oraciónñá. Ñáyóʼo káchiñá: “Ndiʼi tiempo kán Jehová chi̱ndeétáʼanra xíʼi̱n ña̱ va̱ʼa viíka keʼíi̱ sava ña̱ʼa. Tá kúú, xi̱niñúʼu sákuaʼi̱ ña̱ kandíxakai̱ Jehová, ña̱ viíka kaʼvii̱ ta saátu ña̱ kunda̱a̱-inii̱ ña̱ kiviva kusi̱í-inii̱ ni kǒo kúúmiíi̱ sava ña̱ʼa”. Tándi̱ʼi, ni̱ka̱ʼa̱nna xíʼin yii̱ ñá Janice ña̱ koora superintendente ña̱ circuito. Ñáyóʼo káchiñá: “Jehová nda̱kuiinvara oración ña̱ xi̱keʼíi̱ nu̱úra soo su̱ví nda̱a̱ táki̱ʼva xi̱kuni̱ miíi̱. Ku̱a̱ʼáva tiempo ni̱ya̱ʼa ta saáví ku̱ndaa̱-inii̱ ndáaña xi̱kuni̱ Jehová keʼíi̱. Soo kúsi̱íní-inii̱ saáchi chi̱ndeétáʼanra xíʼi̱n ña̱ kunda̱a̱-inii̱ ña̱ kúʼvi̱ní-inira xínira yi̱ʼi̱ ta saátu ña̱ va̱ʼaní-inira xíʼi̱n”.

15. ¿Nda̱chun sava yichi̱ xíniñúʼu nasamayó ña̱ káʼa̱nyó xíʼin Jehová? (Koto na̱ʼná).

 ¹⁵ Pregunta ña̱ u̱ni̱ kúú ña̱yóʼo: “¿Á káxiní káʼi̱n xíʼin Jehová xa̱ʼa̱ ña̱ kúnii̱?”. Xíniñúʼu káxi ka̱ʼa̱nyó xíʼin Jehová tá xa̱a̱ kéʼéyó oración. Soo sava yichi̱ xíniñúʼu nasamayó ña̱ káʼa̱nyó xíʼinra ña̱ va̱ʼa kotoyó ndáa ki̱ʼva chindeétáʼanra xíʼinyó. Ná ka̱ʼa̱n tukuyó xa̱ʼa̱ ñá hermana kúa̱an ñá xi̱kaʼa̱n xíʼin Jehová ña̱ xi̱kuni̱ñá ku̱ʼu̱nñá Escuela ña̱ Evangelizadores del Reino. Ñáyóʼo xi̱kuni̱ñá ku̱ʼu̱nñá escuela kán chi xi̱kuni̱ñá ku̱ʼu̱nñá iin congregación nu̱ú xíniñúʼuna na̱ natúʼun xa̱ʼa̱ Ndióxi̱. Ña̱ nda̱a̱, ña̱yóʼo kúú ña̱ xi̱kuni̱nívañá keʼéñá. Soo, ¿ndáaka ña̱ kivi ndukúñá nu̱ú Jehová? Kivi ka̱ʼa̱nñá xíʼinra ña̱ ná chindeétáʼanra xíʼinñá ña̱ kunda̱a̱-iniñá ndáa ki̱ʼva kachíñukañá nu̱úra (Hech. 16:​9, 10). Tándi̱ʼi, kivi nda̱ka̱tu̱ʼunñá ta̱ superintendente ña̱ circuito ndáa congregación kúú ña̱ xíniñúʼuna na̱ precursor ña̱ natúʼunna xa̱ʼa̱ Ndióxi̱. g Saátu kivi ka̱ʼa̱nñá xíʼin na̱ hermano na̱ káchíñu Betel ndáa míí xíniñúʼukana na̱ natúʼun xa̱ʼa̱ Ndióxi̱.

16. ¿Ndáaña kǒo xíniñúʼu nandósó-iniyó xa̱ʼa̱?

¹⁶ Nda̱a̱ táki̱ʼva xa̱a̱ sa̱kúaʼayó, kivi kandíxayó ña̱ mií Jehová kivi ndakuiinra oración ña̱ kéʼéyó nu̱úra, saáchi kúʼvi̱ní-inira xínira miíyó ta nina ña̱ nda̱kú kéʼéra (Sal. 4:3; Is. 30:18). Sana síínva íyo ki̱ʼva ña̱ ndákuiin Jehová yuʼúyó, soo xíniso̱ʼovara oración ña̱ káʼa̱nyó xíʼinra. Kúʼvi̱ní-inira xínira miíyó ta ni iin yichi̱ kǒo sándakoo ndaʼa̱ra miíyó (Sal. 9:10). Ña̱kán, ndiʼi tiempo ná kundaa-iniyó Jehová ta xíʼin ndiʼi níma̱yó ná ka̱ʼa̱nyó xíʼinra (Sal. 62:8).