Ñá Hulda sa̱tañá ña̱ xi̱kuni̱níñá
TÁ YÓʼÓ níxa̱ʼún isla ña̱ Sangir Besar (Indonesia) ku̱i̱ya̱ chí sa̱tá, sana kunivaún u̱ni̱ ná hermana chí yuʼú playa. Ku̱a̱ʼání na̱ yiví xi̱kaʼa̱nna xa̱ʼa̱ ná hermana yóʼo ña̱ xi̱sanáʼa̱ná na̱ yiví xa̱ʼa̱ Biblia, soo tá xi̱xaʼa̱nná yuʼú playa va̱ása níxi̱natúʼunná xa̱ʼa̱ Ndióxi̱. Ña̱kán, ¿ndáaña xi̱keʼéná?
Isla ña̱ Sangir Besar (chí norte ña̱ Indonesia).
Ña̱ siʼna xi̱keʼéná kúú, ña̱ xi̱kiʼviná ini mar ña̱ nandukúná yu̱u̱ ña̱ náʼnu ña̱ íyo nda̱a̱ táki̱ʼva íyo pelota tí fútbol, tasaá xi̱ndakiʼinnáña xi̱xaʼa̱n xíʼinná chí yuʼú playa. Tándi̱ʼi, xíʼin iin martillo xi̱taʼvína yu̱u̱ yóʼo ña̱ va̱ʼa kuachiña tasaá xi̱taváná yu̱u̱ válí. Tá xisandí’iná xi̱sakúachiná yu̱u̱ yóʼo, xi̱taánnáña ini cubeta ña̱ va̱ʼa ku̱ʼu̱nña xíʼinná chí veʼená, soo xi̱xiniñúʼu ndaaná iin escalera ña̱ va̱ʼa xa̱a̱ná veʼená. Ta xi̱nataán va̱ʼaná yu̱u̱ yóʼo ini iin costal ña̱ káʼnu. Tándi̱ʼi, xi̱yaʼa camión ta xi̱ndakiʼinnú costal yóʼo, ta ña̱ yu̱u̱ yóʼo kúú ña̱ xi̱xiniñúʼuna tá xi̱ ixava̱ʼana carretera.
Ñá Hulda, ndákiʼinñá yu̱u̱ chí yuʼú playa.
Iin ñá hermana yóʼo naníñá Hulda. Ku̱a̱ʼáka tiempo xi̱kachíñu ñáyóʼo yuʼú playa nu̱ú inka ná hermana. Xu̱ʼún ña̱ xi̱chaʼvínañá, xi̱xiniñúʼuñá ña̱yóʼo ña̱ va̱ʼa taxiñá ña̱ xíniñúʼu na̱ veʼeñá. Soo xi̱kuni̱ñá satañá iin tablet ña̱ va̱ʼa kuumiíñá aplicación JW Library® nu̱únú. Ñá Hulda xi̱kunda̱a̱-iniñá ña̱ video xíʼin ña̱ va̱xi nu̱ú aplicación yóʼo va̱ʼaní chindeétáʼanña xíʼinñá ña̱ natúʼunñá xíʼin na̱ yiví, ta saátu ña̱ kunda̱a̱-iniñá xíʼin ña̱ va̱xi nu̱ú Biblia.
Ti̱xin iin yo̱o̱ sava, ñá Hulda ka̱chíñuñá u̱vi̱ka hora ndiʼi ki̱vi̱. Ku̱a̱ʼání yu̱u̱ sa̱kúachiñá ta nda̱a̱ sa̱kútuñá sa̱tá iin tú camión loʼo xíʼin ña̱yóʼo. Ta nda̱a̱ vitinví kúúmiíñá xu̱ʼún ña̱ satáñá tablet.
Ñá Hulda xíʼin tablet tú kuumiíñá.
Ñá Hulda káchiñá: “Ku̱naaníi̱ ta saátu nda̱kuʼvi̱ní ku̱ñui̱ xa̱ʼa̱ ña̱ sa̱kúachii̱ yu̱u̱ yóʼo. Soo ni̱kusi̱íní-inii̱ tá xa̱a̱ sa̱tái̱ tablet, saáchi ki̱ʼi̱n kuenta ña̱ kivi kuniñúʼi̱ túyóʼo ña̱ natúʼi̱n xíʼin na̱ yiví ta saátu ña̱ viíka kaʼvii̱ xa̱ʼa̱ ña̱ ya̱ʼa ti̱xin reunión”. Ñá hermana yóʼo ki̱ʼinñá kuenta ña̱ va̱ʼaní chi̱ndeétáʼan tablet xíʼinñá tá ki̱xáʼa ña̱ COVID-19, chi videollamada xi̱xiniñúʼuyó ña̱ va̱ʼa koo reunión xíʼin predicación. Kúsi̱íní-iniyó saáchi ñá Hulda xa̱a̱ kúúmiíñá tablet tú xi̱kuni̱níñá.
