1. ¿Ndáaña ni̱ka̱ʼa̱n ta̱ profeta Isaías xíʼin na̱ ñuu Israel?

 TA̱ PROFETA Isaías ni̱ka̱ʼa̱nra xa̱ʼa̱ Jehová “ña̱ kúúra Ndióxi̱ ta̱ kúúmií ña̱ nda̱a̱”. Ña̱ tu̱ʼun hebreo ña̱ va̱xi nu̱ú texto yóʼo kúni̱ kachiña “amén” (Is. 65:16; nota). Ta ña̱ tu̱ʼun amén kúni̱ kachiña “saá koo” á “ña̱ ndixa xi̱nu”. Ku̱a̱ʼání yichi̱ xíniñúʼuna tu̱ʼun amén nu̱ú Biblia, ña̱ va̱ʼa kunda̱a̱-iniyó ña̱ ndixa kúú ña̱ káʼa̱n Jehová ta saátu ña̱ káʼa̱n ta̱ Jesús. Ña̱kán, káxiníva ni̱xi̱yo ña̱ ni̱ka̱ʼa̱n ta̱ profeta Isaías xíʼin na̱ ñuu Israel: ña̱ ndiʼi ña̱ káʼa̱n Jehová xínuvaña. Xa̱a̱ náʼa̱va Jehová nu̱úyó ña̱ ndiʼi tiempo sáxi̱nura ña̱ káʼa̱nra.

2. ¿Nda̱chun kivi kandíxayó ña̱ ndixa saxínu Jehová ña̱ káʼa̱nra keʼéra chí nu̱únínu? ¿Ndáa pregunta ndakuiinyó nu̱ú artículo yóʼo?

² Ta miíyó, ¿á kándíxayó ña̱ káʼa̱n Jehová keʼéra chí nu̱únínu? Tá xa̱a̱ ni̱ya̱ʼa 800 ku̱i̱ya̱ ña̱ ni̱xi̱ʼi̱ ta̱ profeta Isaías, ta̱ apóstol Pablo ni̱ka̱ʼa̱nra nda̱chun kúú ña̱ kivi kandíxayó ña̱ xi̱nu ndiʼi ña̱ káʼa̱n Jehová. Ta̱ Pablo ka̱chira: “Ndióxi̱ va̱ása kívi sándaʼvira” (Heb. 6:18). ¿Á su̱ví ña̱ nda̱a̱ kúúña va̱ása kivi kana ti̱kui̱í o̱ʼva̱ nu̱ú kána ti̱kui̱í vi̱si̱? Saátu íyo Jehová, xa̱ʼa̱ ña̱ káʼa̱nra nina ña̱ nda̱a̱, kǒo kívi ka̱ʼa̱nra ña̱  vatá á ña̱ to̱ʼón. Ña̱kán kivi kandíxayó ndiʼi ña̱ káʼa̱n Jehová xíʼinyó, ta saátu ña̱ káʼa̱nra keʼéra chí nu̱únínu. Nu̱ú artículo yóʼo ndakuiinyó pregunta yóʼo: ¿ndáaña ni̱ka̱ʼa̱n Jehová keʼéra chí nu̱únínu? Ta, ¿nda̱chun va̱ʼa kúnda̱a̱-iniyó ña̱ xi̱nu ña̱yóʼo?

3. a) ¿Ndáaña ndáyáʼviní nu̱ú miíyó na̱ ndásakáʼnu Ndióxi̱? b) ¿Ndáaña káʼa̱n savana tá káʼviyó Apocalipsis 21:​3, 4 nu̱úna?

³ Nu̱ú miíyó na̱ ndásakáʼnu Jehová ndáyáʼviní ña̱ káʼa̱nra keʼéra chí nu̱únínu (kaʼvi Apocalipsis 21:​3, 4). Jehová káʼa̱nra ña̱ va̱ása kuvika na̱ yiví, “ni va̱ása kusuchíka-inina, ni va̱ása kuakukana, ni va̱ása xo̱ʼvi̱kana”. Tá ku̱a̱ʼa̱nyó nátúʼunyó xíʼin na̱ yiví, káʼa̱nyó xíʼinna ndáa ki̱ʼva koo nu̱ú ñuʼú yóʼo chí nu̱únínu, ta káʼviyó versículo yóʼo nu̱úna ña̱ va̱ʼa sandíkoyó-inina. Soo, ¿ndáaña káʼa̱n sava na̱ yiví tá xíniso̱ʼona ña̱ káʼa̱n Ndióxi̱ keʼéra chí nu̱únínu? Na̱yóʼo káʼa̱nna: “Su̱ví ña̱ ndixaví kúú ña̱ káʼa̱nndó”.

4. a) ¿Ndáa u̱vi̱ ña̱ʼa xi̱kunda̱a̱-ini Jehová xa̱ʼa̱? b) ¿Ndáaka ña̱ ke̱ʼé Jehová tá ni̱ka̱ʼa̱nra xa̱ʼa̱ ña̱ koo chí nu̱únínu?

⁴ Jehová xi̱kunda̱a̱-inira ña̱ ka̱ʼa̱nyó xíʼin na̱ yiví xa̱ʼa̱ ña̱ koo chí nu̱úni̱nu, ña̱kán ni̱ka̱ʼa̱nra xíʼin ta̱ apóstol Juan ña̱ kaʼyiraña. Saátu xi̱kunda̱a̱-inira ña̱ ku̱a̱ʼání na̱ yiví kǒo kandíxana ña̱ ni̱ka̱ʼa̱nra keʼéra chí nu̱únínu (Is. 42:9; 60:2; 2 Cor. 4:​3, 4). Ña̱kán, ¿ndáaña kivi keʼéyó ña̱ chindeétáʼanyó xíʼin na̱ yiví ña̱ kandíxana ña̱ ndixa xi̱nu ña̱ káʼa̱n Apocalipsis 21:​3, 4? Ta, ¿ndáaña kivi keʼé miíyó ña̱ kandíxakayó ña̱ káʼa̱n Jehová keʼéra chí nu̱únínu? Kǒo níka̱ʼa̱n kuití Jehová xa̱ʼa̱ ña̱ keʼéra chí nu̱únínu chi saátu ni̱ka̱ʼa̱nra ndáaña keʼéra ña̱ va̱ʼa saxínura ña̱yóʼo. ¿Ndáaña kúú ña̱ náʼa̱ nu̱úyó ña̱ ndixa xi̱nu ña̱ ni̱ka̱ʼa̱nra?

5. ¿Ndáa mií va̱xi ña̱ ni̱ka̱ʼa̱n Jehová, ta ndáaña káchi ña̱yóʼo?

⁵ Nu̱ú Apocalipsis 21:​5, 6 va̱xi tu̱ʼun ña̱ chíndeétáʼan xíʼinyó ña̱ kǒo kaka-iniyó ña̱ saxínuva Jehová ña̱ ni̱ka̱ʼa̱nra, ña̱ ndasalivira nu̱ú ñuʼú yóʼo. Ña̱yóʼo káchiña: “Ta̱ íyo nu̱ú trono ni̱ka̱ʼa̱nra ña̱yóʼo: ‘Ndásaxa̱ái̱ ndiʼi ña̱ʼaʼ. Ta saátu ka̱chira: ‘Kaʼyí tu̱ʼun yóʼo, saáchi na̱ yiví kivi kandíxanaña, ta mií ña̱ nda̱a̱ kúúña’. Ta ka̱chira: ‘Xa̱a̱ ni̱xi̱nuvaña. Yi̱ʼi̱ kúú Alfa xíʼin Omega, ta̱ ki̱xáʼa xa̱ʼa̱ ta saátu ta̱ so̱ndíʼi’” (Apoc. 21:​5, 6a).

6. ¿Nda̱chun va̱ʼaní chíndeétáʼan Apocalipsis 21:​5, 6 xíʼinyó ña̱ kandíxayó ña̱ saxínu Jehová ña̱ ni̱ka̱ʼa̱nra keʼéra chí nu̱únínu?

⁶ ¿Nda̱chun va̱ʼaní chíkaa̱ tu̱ʼun yóʼo ndee̱ xíʼinyó ña̱ kandíxayó ña̱ saxínuva Jehová ña̱ káʼa̱nra keʼéra chí nu̱únínu? Ña̱ libro Apocalipsis b ndákaniña xa̱ʼa̱ versículo yóʼo: “Nda̱a̱ táki̱ʼva íyo iin trato ña̱ ke̱ʼé Jehová xíʼin na̱ yiví saá íyo ña̱yóʼo, ta nda̱a̱ táki̱ʼva íyo ña̱ chi̱kaa̱ra firmara nu̱ú iin tutu ña̱ ndáyáʼviní saá íyoña”. Nu̱ú Apocalipsis 21:​3, 4 va̱xi ña̱ ni̱ka̱ʼa̱n Jehová, ta ña̱ káʼa̱n versículo 5 xíʼin 6 náʼa̱ña nu̱úyó ña̱ ndixa xi̱nu ña̱ ni̱ka̱ʼa̱nra. Vitin ná ka̱ʼa̱nyó xa̱ʼa̱ iin tá iin ña̱ ni̱ka̱ʼa̱n Jehová.

7. ¿Ndáa ta̱ káʼa̱n nu̱ú versículo 5, ta nda̱chun ndáyáʼviní ña̱yóʼo?

⁷ Ta̱ apóstol Juan ka̱ʼyira: “Ta̱ íyo nu̱ú trono ni̱ka̱ʼa̱nra ña̱yóʼo” (Apoc. 21:5a). Tu̱ʼun yóʼo ndáyáʼviníña, saáchi u̱ni̱ yichi̱ ni̱ka̱ʼa̱n Jehová xa̱ʼa̱ ña̱ koo chí nu̱únínu nu̱ú visión ña̱ xi̱ni ta̱ apóstol Juan. Ta ña̱ káʼa̱nyó xa̱ʼa̱ yóʼo xi̱kuu iinña. Mií Jehová ni̱ka̱ʼa̱n ña̱yóʼo ta kǒo níxiniñúʼura na̱ ángel á ta̱ Jesús  ña̱ ka̱ʼa̱nnaña. Xa̱ʼa̱ ña̱yóʼo, kándíxaníyó ña̱ va̱xi nu̱ú tutu Apocalipsis chi Jehová kǒo kívi sandáʼvira (Tito 1:2). Ña̱kán kǒo xíka-iniyó ña̱ xi̱nuva ña̱ káʼa̱n Apocalipsis 21:​5, 6.   

8. ¿Ndáaña ni̱ka̱ʼa̱n Jehová ta xíʼin ña̱yóʼo kúnda̱a̱-iniyó ña̱ saxínura ña̱ ni̱ka̱ʼa̱nra? (Isaías 46:10).

⁸ Ndióxi̱ ni̱ka̱ʼa̱nra “Ndásaxa̱ái̱ ndiʼi ña̱ʼa” (Apoc. 21:5). Xa̱ʼa̱ ña̱ʼa ña̱ koo chí nu̱únínu káʼa̱n Jehová, soo nu̱ú miíra nda̱a̱ táki̱ʼva íyo ña̱ xa̱a̱ kéʼéra saá íyoña. Ta xíʼin ña̱yóʼo kúnda̱a̱-iniyó ña̱ saxínuvaraña (kaʼvi Isaías 46:10). c

9. a) ¿Ndáaña kúni̱ kachi ña̱ tu̱ʼun “Ndásaxa̱ái̱ ndiʼi ña̱ʼa”? b) ¿Ndáaña kuu xíʼin “ndiví yatá” xíʼin “ñuʼú yatá”?

⁹ Vitin ná ka̱ʼa̱nyó xa̱ʼa̱ ña̱ káʼa̱n Apocalipsis 21:5: “Ndásaxa̱ái̱ ndiʼi ña̱ʼa”. Xíʼin tu̱ʼun yóʼo kúnda̱a̱-iniyó ña̱ íyo u̱vi̱ ña̱ʼa ña̱ kéʼé Jehová: ña̱ sándiʼi-xa̱ʼa̱ra iin ña̱ʼa tasaá íxava̱ʼa tukuraña. Siʼna ná ka̱ʼa̱nyó xa̱ʼa̱ ndáa ña̱ʼa kúú ña̱ sandíʼi-xa̱ʼa̱ra. Apocalipsis 21:1 káchiña: “Ndiví yatá xíʼin ñuʼú yatá xa̱a̱ nda̱ñúʼuvaña”. “Ndiví yatá” ndánaʼa̱ña ndiʼi na̱ chíñu na̱ íyo nu̱ú ñuʼú yóʼo na̱ kéʼé ña̱ kúni̱ ta̱ Ndi̱va̱ʼa xí’in na̱ ta̱chí ndi̱va̱’a na̱ kítáʼan xíʼinra (Mat. 4:​8, 9; 1 Juan 5:19). Sava yichi̱ tá káʼa̱n Biblia xa̱ʼa̱ ñuʼú, káʼa̱nña xa̱ʼa̱ na̱ yiví na̱ ndóo nu̱úña (Gén. 11:1; Sal. 96:1). Ña̱kán “ñuʼú yatá” ndánaʼa̱ña ndiʼi na̱ yiví na̱ kéʼé ña̱ va̱ása va̱ʼa na̱ íyo tiempo vitin. Va̱ása ndasavií kuití Jehová ñuʼú yóʼo xíʼin ndiví, saáchi sandíʼi-xa̱ʼa̱raña ta ixava̱ʼara “iin ndiví xa̱á xíʼin iin ñuʼú xa̱á”. Ña̱yóʼo kúni̱ kachiña ña̱ koo iin gobierno xa̱á ta saátu na̱ yiví na̱ kundoo nu̱ú ñuʼú yóʼo nina ña̱ va̱ʼa keʼéna.

10. ¿Ndáa ki̱ʼva ndasaxa̱á Jehová ndiʼi ña̱ʼa?

¹⁰ ¿Ndáa inkaka ña̱ʼa ndasaxa̱á Jehová? (Apoc. 21:5). Jehová ndasaxa̱ára ñuʼú nu̱ú ndóoyó yóʼo. Ta saátu chindeétáʼanra xíʼin na̱ yiví ña̱ ndoo ku̱a̱china. Táki̱ʼva ni̱ka̱ʼa̱n ta̱ profeta Isaías, iníísaá ñuʼú yóʼo nduuña ñuyǐví xa̱á, ta liviní kooña nda̱a̱ táki̱ʼva ni̱xi̱yo jardín ña̱ Edén. Ta saátu miíyó nduxa̱á ndiʼi ku̱ñuyó. Jehová sandáʼara na̱ yiví na̱ kǒo kívi kaka, na̱ kǒo kívi koto, na̱ kǒo xíniso̱ʼo ta nda̱a̱ sandátakura na̱ ni̱xi̱ʼi̱ (Is. 25:8; 35:​1-7).

11. ¿Ndáaña ni̱ka̱ʼa̱n Jehová xíʼin ta̱ apóstol Juan keʼéra, ta nda̱chun?

¹¹ ¿Ndáa inka ña̱ʼa kúú ña̱ ni̱ka̱ʼa̱n Jehová? Jehová ni̱ka̱ʼa̱nra xíʼin ta̱ Juan: “Kaʼyí tu̱ʼun yóʼo, saáchi mií ña̱ nda̱a̱ kúúña” (Apoc. 21:5). Soo su̱ví ña̱yóʼo kuití níka̱ʼa̱n Jehová xíʼin ta̱ Juan kaʼyira, chi ka̱chikara: “Saáchi mií ña̱ nda̱a̱ kúúña”, ña̱yóʼo kúni̱ kachiña ña̱ ndixa xi̱nu ña̱yóʼo. Kúsi̱íní-iniyó ña̱ xi̱niso̱ʼo ta̱ Juan ña̱ ni̱ka̱ʼa̱n Jehová ta ka̱ʼyira tu̱ʼun yóʼo. Chi kivi kaʼviyó xa̱ʼa̱ ña̱ ni̱ka̱ʼa̱n Ndióxi̱ ña̱ koo iin ñuyǐví xa̱á ta saátu kivi ndakanixi̱níyó xa̱ʼa̱ ndiʼi ña̱ va̱ʼa ña̱ ndakiʼinyó chí nu̱únínu.

12. ¿Nda̱chun káʼa̱n Jehová ña̱ xa̱a̱ ni̱xi̱nu ndiʼi ña̱ kúni̱ra keʼéra?

¹² ¿Ndáaña ni̱ka̱ʼa̱nka Jehová? Jehová ka̱chira: “Xa̱a̱ ni̱xi̱nuvaña” (Apoc. 21:6). Xíʼin ña̱yóʼo kúnda̱a̱-iniyó ña̱ nu̱ú mií Jehová nda̱a̱ táki̱ʼva íyo ña̱ xa̱a̱ ni̱xi̱nu saá íyo ña̱ ni̱ka̱ʼa̱nra, ña̱ nda̱sara ñuʼú yóʼo iin paraíso. Ta kúsi̱íní-iniyó ña̱ káʼa̱nra ña̱yóʼo, saáchi ni iin ña̱ʼa kǒo kivi kasi nu̱úra ña̱ saxínura ña̱ kúni̱ra keʼéra. Soo, ¿ndáaka ña̱ ni̱ka̱ʼa̱n Jehová ña̱ va̱ʼa kandíxayó ña̱ saxínura ña̱ ni̱ka̱ʼa̱nra?

13. ¿Nda̱chun káʼa̱n Jehová ña̱ kúúra “Alfa xíʼin Omega”?

¹³ Nda̱a̱ táki̱ʼva xa̱a̱ ni̱ka̱ʼa̱nyó, u̱ni̱ yichi̱ ni̱ka̱ʼa̱n Jehová ti̱xin visión ña̱ xi̱ni ta̱ Juan (Apoc. 1:8; 21:​5, 6; 22:13). U̱ni̱ saá yichi̱ ña̱ ni̱ka̱ʼa̱nra ka̱chira: “Yi̱ʼi̱ kúú Alfa xíʼin Omega”. Ña̱ tu̱ʼun Alfa kúú letra ña̱ nu̱ú ña̱ xi̱xiniñúʼu na̱ griego, ta ña̱ omega kúú letra ña̱ so̱ndíʼi. Ña̱kán tá káʼa̱n Jehová ña̱ kúúra “Alfa xíʼin Omega”, kúni̱ kachira ña̱ tá kíxáʼara kéʼéra iin ña̱ʼa sándiʼivaraña.

14. a) Ka̱ʼa̱n ama kúú ña̱ ni̱ka̱ʼa̱n Jehová ña̱ tu̱ʼun “Alfa” ta ama kúú ña̱ ka̱ʼa̱nra tu̱ʼun “Omega”. b) ¿Ndáaña káʼa̱n Jehová xíʼinyó keʼéra nu̱ú Génesis 2:​1-3?

¹⁴ Tándi̱ʼi i̱xava̱ʼa Jehová ta̱ Adán xíʼin ñá Eva, ni̱ka̱ʼa̱nra xíʼinna ndáaña xi̱kuni̱ra keʼéna. Biblia káchiña: “Tasaá ta̱xira bendición ndaʼa̱na ta ni̱ka̱ʼa̱nra xíʼinna: ‘Ná koo ku̱a̱ʼání se̱ʼendó, ku̱a̱ʼání ná xa̱a̱ndó koondó, ná kutú se̱ʼendó nu̱ú ñuʼú ta kuisochíñundó xíʼinña’” (Gén. 1:28). Yóʼo ni̱ka̱ʼa̱n Jehová ndáaña xi̱kuni̱ra keʼéra ta nda̱a̱ táki̱ʼva íyo ña̱ ni̱ka̱ʼa̱nra tu̱ʼun “Alfa” saá ni̱xi̱yoña. Tá ná ya̱ʼa tiempo na̱ se̱ʼe ta̱ Adán xíʼin ñá Eva na̱ kǒo ku̱a̱chi kúúmií, kaku se̱ʼena ta ku̱a̱ʼání koona ta ñuʼú yóʼo nduuña iin paraíso. Tá ná kuu ña̱kán Jehová ka̱ʼa̱nra ña̱ tu̱ʼun “Omega”. Tándi̱ʼi i̱xava̱ʼa Jehová ñuʼú, ndiví xí’in ndi’i ña̱ʼa ña̱ íyo nu̱úña, ke̱ʼéra inka ña̱ʼa ña̱ va̱ʼa saxínura ña̱ ni̱ka̱ʼa̱nra. ¿Ndáaña ke̱ʼéra? Ni̱ka̱ʼa̱nra ña̱ ki̱vi̱ u̱xa̱, ña̱ yi̱i̱ kúúña (kaʼvi Génesis 2:​1-3). d ¿Ndáaña kúni̱ kachi ña̱yóʼo? Kuni̱ kachiña ña̱ nda̱kaxin Jehová ki̱vi̱ u̱xa̱ ña̱ va̱ʼa xi̱nu ña̱ kúni̱ra keʼéra nu̱ú ñuʼú yóʼo.  Tá ná ndiʼi ki̱vi̱ u̱xa̱ yóʼo xi̱nuva ndiʼi ña̱ kúni̱ra.

15. ¿Ndáaña ku̱u ta sana kivi ndakanixi̱níyó ña̱ kǒo kívika saxínu Jehová ña̱ xi̱kuni̱ra keʼéra?

¹⁵ Tá i̱xaso̱ʼo ta̱ Adán xíʼin ñá Eva ndu̱una na̱ yiví ku̱a̱chi ta ndiʼi se̱ʼena na̱ ka̱ku na̱ ku̱a̱chi kúúna ta xíʼi̱na (Rom. 5:12). ¿Á xa̱ʼa̱ ña̱yóʼo va̱ása kivika xi̱nu ña̱ xi̱kuni̱ Ndióxi̱ keʼéra? ¿Á kuchiñu ta̱ Ndi̱va̱ʼa kasira nu̱ú Jehová ña̱ saxínura ña̱ xi̱kuni̱ra keʼéra? Ta̱ Ndi̱va̱ʼa nda̱kanixi̱níra ña̱ kǒokaví inka ña̱ʼa kivi keʼé Jehová. Tá kúú, iin ña̱ kivi keʼé Jehová xi̱kuu ña̱ sándiʼi-xa̱ʼa̱ra ta̱ Adán xíʼin ñá Eva tasaá ixava̱ʼara inka na̱ yiví na̱ sáxi̱nu ña̱ xi̱kuni̱ra. Soo tá níkeʼé Jehová ña̱yóʼo ta̱ Ndi̱va̱ʼa ka̱ʼa̱nra ña̱ ta̱ vatá kúú Jehová á ta̱ to̱ʼón kúúra ta kǒo sáxi̱nura ña̱ káʼa̱nra. ¿Nda̱chun? Saáchi táki̱ʼva káchi Génesis 1:​28, Jehová ni̱ka̱ʼa̱nra xíʼin ta̱ Adán xíʼin ñá Eva ña̱ ndiʼi na̱ se̱ʼe na̱yóʼo na̱ kaku sákutúna nu̱ú ñuʼú yóʼo.

16. ¿Nda̱chun nda̱kanixi̱ní ta̱ Ndi̱va̱ʼa ña̱ kǒo xi̱nuví ña̱ ni̱ka̱ʼa̱n Jehová?

¹⁶ ¿Ndáa inka ña̱ʼa nda̱kanixi̱ní ta̱ Ndi̱va̱ʼa? Sana nda̱kanixi̱níra ña̱ taxiva Jehová ña̱ koo se̱ʼe ta̱ Adán xíʼin ñá Eva, soo na̱yóʼo ndiʼi tiempo koona na̱ yiví ku̱a̱chi (Ecl. 7:20; Rom. 3:23). Tá ní kuu ña̱yóʼo ta̱ Ndi̱va̱ʼa ka̱ʼa̱nra ña̱ kǒo xínuví ña̱ káʼa̱n Jehová. ¿Nda̱chun? Saáchi nina na̱ yiví ku̱a̱chi koo nu̱ú ñuʼú yóʼo.

17. ¿Ndáaña ke̱ʼé Jehová ña̱ va̱ʼa ndasaviíra ña̱ ke̱ʼé ta̱ Ndi̱va̱ʼa xíʼin ta̱ Adán xíʼin ñá Eva, ta ndáaña kuu tándi̱ʼi? (Koto na̱ʼná).

¹⁷ Sana nda̱kanda̱níva-ini ta̱ Ndi̱va̱ʼa tá xi̱tora ndáa ki̱ʼva nda̱savií Jehová ndiʼi ña̱ va̱ása va̱ʼa ku̱u (Sal. 92:5). Jehová ta̱xira ña̱ ka̱ku se̱ʼe ta̱ Adán xíʼin ñá Eva, xíʼin ña̱yóʼo ni̱na̱ʼa̱ra ña̱ su̱ví ta̱ sándaʼvi kúúra, saáchi ndiʼi tiempova sáxi̱nura ña̱ káʼa̱nra. Ta saátu ni̱na̱ʼa̱ Jehová ña̱ kǒo nda̱a̱ ni iin ña̱ kivi kasi nu̱úra chi ndiʼivaña kivi keʼéra. Soo, ¿ndáa ki̱ʼva ndasaviíra ña̱yóʼo? Ni̱ka̱ʼa̱nra ña̱ kaku se̱ʼe ñá ñaʼá, ta ta̱yóʼo kúú ta̱ sáka̱ku na̱ se̱ʼe ta̱ Adán xíʼin ñá Eva na̱ kandíxa ña̱ káʼa̱nra, tasaá xi̱nu ña̱ ni̱ka̱ʼa̱nra (Gén. 3:15; 22:18). Ta̱ Ndi̱va̱ʼa kǒo níndakanixi̱níra ña̱ kuniñúʼu Jehová se̱ʼera ta̱ Jesús ña̱ sakákura na̱ yiví. ¿Nda̱chun? Saáchi Jehová ke̱ʼéra ña̱yóʼo xa̱ʼa̱ ña̱ kúʼvi̱ní-inira xínira na̱ yiví (Mat. 20:28; Juan 3:16). Ta̱ Ndi̱va̱ʼa ni̱nuní kúnira ta kǒo kúʼvi̱-inira xínira ni iin na̱ yiví.  Ña̱kán, ¿ndáaña va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó? Tá ná ndiʼi ña̱ 1,000 ku̱i̱ya̱, na̱ se̱ʼe ta̱ Adán xíʼin ñá Eva na̱ kándíxa ña̱ káʼa̱n Ndióxi̱, kǒoka ku̱a̱chi kuumiína tasaá kundoona nu̱ú ñuʼú yóʼo tá ná nduuña iin paraíso, nda̱a̱ táki̱ʼva xi̱kuni̱ Jehová tá xa̱ʼa̱. Tiempo saá kúú ña̱ ka̱ʼa̱n Jehová ña̱ tu̱ʼun “Omega”.

18. ¿Ndáa u̱ni̱ ña̱ʼa kúú ña̱ náʼa̱ nu̱úyó ña̱ sáxi̱nuva Jehová ña̱ ni̱ka̱ʼa̱nra? (Koto recuadro ña̱ naní “ U̱ni̱ ña̱ʼa ña̱ náʼa̱ nu̱úyó ña̱ saxínuva Jehová ña̱ ni̱ka̱ʼa̱nra”).

¹⁸ Nu̱ú artículo yóʼo sa̱kúaʼayó sava ña̱ʼa ña̱ chíndeétáʼan xíʼinyó ña̱ kǒo kaka-iniyó ña̱ nduuva ñuʼú yóʼo iin paraíso. ¿Ndáaña kivi ka̱ʼa̱nyó xíʼin inka na̱ yiví ña̱ va̱ʼa kandíxana ña̱ sáxi̱nuva Ndióxi̱ ña̱ ni̱ka̱ʼa̱nra? Ña̱ nu̱ú, kivi ka̱ʼa̱nyó xíʼinna ña̱ mií Jehová kúú ta̱ ni̱ka̱ʼa̱n ña̱yóʼo. Apocalipsis káchiña: “Ta̱ íyo nu̱ú trono ni̱ka̱ʼa̱nra ña̱yóʼo: ‘Ndásaxa̱ái̱ ndiʼi ña̱ʼa’”. Jehová kúni̱ra sáxi̱nura ña̱ ni̱ka̱ʼa̱nra chi ndíchiníra ta íyoní ndee̱ra ña̱ keʼéra ña̱yóʼo. Ña̱ u̱vi̱, Jehová kúnda̱a̱-inira ña̱ xi̱nuvaña, saáchi ndiʼi ña̱ káʼa̱nra: “Mií ña̱ nda̱a̱ kúúña”. Ta káʼa̱nkara: “Xa̱a̱ ni̱xi̱nuvaña”. Ña̱ u̱ni̱, tá kíxáʼa Jehová kéʼéra iin ña̱ʼa sándiʼivaraña. Ta va̱ʼa kúnda̱a̱-iniyó ña̱yóʼo xíʼin tu̱ʼun ña̱ ni̱ka̱ʼa̱nra ña̱ miíra kúú “Alfa xíʼin Omega”. Jehová na̱ʼa̱ra ña̱ ta̱ Ndi̱va̱ʼa kúú ta̱ sándaʼvi ta kǒo ni iin ña̱ va̱ʼa kéʼéra.

19. ¿Ndáa texto kivi kaʼviún nu̱ú na̱ kǒo kándíxa ña̱ nduu ñuyǐví yóʼo iin paraíso?

¹⁹ Ndakaʼán ña̱ tá káʼún xíʼin na̱ yiví xa̱ʼa̱ ña̱ ni̱ka̱ʼa̱n Ndióxi̱, ña̱yóʼo chíndeétáʼanña xíʼún ña̱ kandíxakaún ña̱ ni̱ka̱ʼa̱nra. Ña̱kán, tándi̱ʼi ka̱ʼviún nu̱ú na̱ yiví ña̱ káʼa̱n Apocalipsis 21:​4, ta káʼa̱nna xíʼún “Su̱ví ña̱ ndixaví kúúña, kǒo xi̱nuvíña”, ¿ndáaña kivi keʼún? Kivi kaʼviún ña̱ káʼa̱n versículo 5 xíʼin 6 nu̱úna ta ndakaniúnña nu̱úna. Kivi ka̱ʼún xíʼinna ña̱ mií Jehová kúú ta̱ ni̱ka̱ʼa̱n ña̱ xi̱nuva ña̱yóʼo, ta nda̱a̱ táki̱ʼva íyo ña̱ chi̱kaa̱ra firmara nu̱ú iin tutu saá íyoña (Is. 65:16).