1, 2. a) ¿Ndáa tu̱ndóʼo ña̱ ndóʼoyó kítáʼan xíʼin ña̱ ndo̱ʼo na̱ judío na̱ ndi̱kó ñuu Jerusalén? (Koto recuadro ña̱ naní “ Tiempo ña̱ ni̱xi̱yo ta̱ Ageo, ta̱ Zacarías xíʼin ta̱ Esdras”).

 ¿Á NDÍʼI̱-INIÚN xa̱ʼa̱ ña̱ koo chí nu̱únínu? Sana ta̱vána yóʼó nu̱ú káchíñún ta kǒoka chiñu kúúmiíún, ña̱kán ndákanixi̱níún ndáa ki̱ʼva taxiún ña̱ xíniñúʼu na̱ veʼún. Á sanatu ndíʼi̱-iniún xa̱ʼa̱ na̱ veʼún, saáchi na̱ yiví káʼa̱n kúáchina xíʼin na̱ chíñu xa̱ʼa̱ ña̱kán íyo ku̱a̱chi, á saátu mií na̱ chíñu yóʼo kǒo xíínkana taxina natúʼún xa̱ʼa̱ Ndióxi̱ ñuu nu̱ú íyoún. Tá yáʼún nu̱ú tu̱ndóʼo yóʼo, iin ña̱ kivi chindeétáʼan xíʼún kúú ña̱ ndakaʼún ndáa ki̱ʼva chi̱ndeétáʼan Jehová xíʼin na̱ ñuu Israel tá ni̱ya̱ʼana nu̱ú tu̱ndóʼo táʼan ña̱ ndóʼún.

² Sava na̱ judío kǒo níxi̱xini̱vína ñuu Jerusalén saáchi ñuu Babilonia ka̱kuna, ña̱kán xi̱niñúʼu kandíxanína Jehová ña̱ va̱ʼa ndikóna ñuu Jerusalén, saáchi ku̱a̱ʼánína xi̱kuuna na̱ ku̱i̱ká ta ku̱a̱ʼání ña̱ʼa xi̱kuumiína. Soo tá xa̱a̱ ni̱ya̱ʼa loʼo tiempo ña̱ ni̱xa̱a̱na ñuu Jerusalén ni̱ya̱ʼana nu̱ú tu̱ndóʼo, saáchi kǒoví xu̱ʼún níxi̱yo ñuu kán. Ta saátu xi̱xoʼvi̱nína xa̱ʼa̱ ña̱ va̱ása vií níxi̱keʼé na̱ chíñu, ta na̱ xi̱saa̱-ini xi̱xini miína kǒo níxiinna taxina ña̱ ndasaviína templo Jehová. Ña̱kán tá ku̱i̱ya̱ 520 tiempo xi̱naʼá, Jehová chi̱ndaʼára ta̱ profeta Ageo xíʼin ta̱ Zacarías ña̱ va̱ʼa chikaa̱ra ndee̱ xíʼin na̱ ñuura (Ageo 1:1; Zac. 1:1). Ta na̱ profeta yóʼo, va̱ʼaníva chi̱ndeétáʼanna xíʼinna. Soo tá xa̱a̱ ni̱ya̱ʼa 50 ku̱i̱ya̱ na̱ judío tuku nda̱kavaní-inina. Tiempo saá ta̱ Esdras, iin ta̱ va̱ʼaní xi̱kaʼyi Ley, ke̱era ñuu Babilonia ta ni̱xa̱a̱ra Jerusalén ña̱ va̱ʼa chikaa̱ra ndee̱ xíʼinna ta chindeétáʼanra xíʼinna ña̱ ndasakáʼnuna iinlá mií Jehová (Esd. 7:​1, 6).

3. ¿Ndáa pregunta kúú ña̱ ndakuiinyó? (Proverbios 22:19).

 ³ Profecía ña̱ ka̱ʼyi ta̱ Ageo xíʼin ta̱ Zacarías chi̱ndeétáʼanña xíʼin na̱ xi̱ndasakáʼnu Ndióxi̱ tiempo xi̱naʼá, ña̱ kandíxakana ña̱ mií Jehová chindeétáʼan xíʼinna ni xi̱yaʼana nu̱ú tu̱ndóʼo. Ta saátu kivi chindeétáʼanña xíʼin miíyó ña̱ kandíxayó ña̱ mií Jehová kivi chindeétáʼan xíʼinyó ña̱ ya̱ʼayó nu̱ú tu̱ndóʼo (kaʼvi Proverbios 22:19). b Nu̱ú artículo yóʼo sakúaʼayó ña̱ mií Jehová xi̱niñúʼura ta̱ profeta Ageo xíʼin ta̱ Zacarías ta saátu ta̱ Esdras ña̱ ka̱ʼa̱nra xíʼin na̱ ñuura ndáaña xi̱kuni̱ra keʼéna. Ña̱yóʼo chindeétáʼan xíʼinyó ña̱ ndakuiinyó pregunta yóʼo: ¿ndáaña ndo̱ʼo na̱ judío tá ni̱ya̱ʼana nu̱ú tu̱ndóʼo?, ¿nda̱chun siʼnaka chiñu Jehová xíniñúʼu kundi̱ʼi-iniyó xa̱ʼa̱ tá yáʼayó nu̱ú tu̱ndóʼo? Ta, ¿ndáaña chindeétáʼan xíʼinyó kandíxayó ña̱ mií Jehová taxi ndee̱ ndaʼa̱yó tá yáʼayó nu̱ú tu̱ndóʼo?

4, 5. ¿Ndáa tu̱ndóʼo ni̱ya̱ʼa na̱ judío ta xa̱ʼa̱ ña̱kán kǒo níxi̱kusi̱íka-inina?

⁴ Tá ni̱xa̱a̱ na̱ judío ñuu Jerusalén, ku̱a̱ʼání chiñu ni̱xi̱yo nu̱úna. Nu̱ú loʼoní tiempo nda̱saviína altar Jehová ta saátu ki̱xáʼana i̱xava̱ʼana xa̱ʼa̱ templo (Esd. 3:​1-3, 10). Soo tá ni̱ya̱ʼa loʼo tiempo, kǒo níxi̱kusi̱íka-inina keʼéna ña̱yóʼo. ¿Ndáaña ku̱u? Xi̱ndasaviína templo, soo saátu xi̱xiniñúʼu ixava̱ʼana veʼe miína, ta saátu chiʼina ña̱ va̱ʼa taxina ña̱ kuxu na̱ veʼena (Esd. 2:​68, 70). Ta na̱ xi̱saa̱-ini xi̱xini miína ndu̱kúna ki̱ʼva ña̱ kasina nu̱úna tasaá kǒo ndasaviína templo (Esd. 4:​1-5).

⁵ Íyotu inka ña̱ xi̱sasi nu̱ú na̱ judío, ña̱ kǒo níxi̱yo xu̱ʼún ñuu kán, xíʼin ña̱ va̱ása vií níxi̱keʼé na̱ chíñu. Tiempo saá, na̱ chíñu Persia kúú na̱ xi̱kiʼin kuenta xíʼin ñuʼú ña̱ xi̱kuumií na̱ ñuu Israel. Tá xa̱a̱ ni̱xi̱ʼi̱ ta̱ rey Ciro ku̱i̱ya̱ 530 tiempo xi̱naʼá, ta̱ ki̱xáʼa xáʼndachíñu xi̱kuu ta̱ Cambises. Ta̱yóʼo nda̱kayara ku̱a̱ʼání na̱ soldado ta nda̱kiʼinra ku̱a̱ʼa̱nra chí Egipto, chi xi̱kuni̱ra sándiʼi-xa̱ʼa̱ra ñuu kán. Ta sana tá ku̱a̱ʼa̱nra kán, miíra xíʼin na̱ soldadora ni̱ya̱ʼana ñuu Jerusalén. Ta ni̱ka̱ʼa̱nna xíʼin na̱ judío ña̱ ná taxina ti̱kui̱í koʼona, ña̱ kuxuna xíʼin nu̱ú koona. Sana xa̱ʼa̱ ña̱yóʼo i̱xayo̱ʼvi̱níkaña xíʼin na̱ judío. Ta saátu tá ki̱xáʼa ta̱ rey Darío I, xáʼndachíñura ku̱a̱ʼání na̱ yiví kǒo níkutóo ña̱yóʼo ta iníí ñuu Persia ki̱xáʼa íyo tu̱ndóʼo. Xa̱ʼa̱ ña̱kán, ku̱a̱ʼání na̱ judío na̱ ndi̱kó ñuu Jerusalén kǒo níxi̱kunda̱a̱-inina ndáa ki̱ʼva kundaana na̱ veʼena. Xa̱ʼa̱ ndiʼi ña̱ ku̱u yóʼo, sana nda̱kanixi̱nína ña̱ su̱ví tiempo kán níxiniñúʼu ndasaviína templo (Ageo 1:2).

6. ¿Ndáa inka tu̱ndóʼo ni̱ya̱ʼa na̱ judío, ta ndáaña ni̱ka̱ʼa̱n ta̱ Zacarías xíʼinna? (Zacarías 4:​6, 7).

⁶ (Kaʼvi Zacarías 4:​6, 7). c Saátu ni̱ya̱ʼa na̱ judío nu̱ú inka tu̱ndóʼo, ña̱ xi̱sasi na̱ yiví nu̱úna ña̱ keʼéna chiñu Jehová. Ku̱i̱ya̱ 522 tiempo xi̱naʼá, na̱ xi̱sa̱a̱-ini xi̱xini na̱yóʼo, kǒo nítaxikana ña̱ ndasaviína templo. Soo ta̱ Zacarías ni̱ka̱ʼa̱nra xíʼin na̱ judío ña̱ mií Jehová kuniñúʼura espíritu santora ña̱ chindeétáʼanra xíʼinna ña̱ ixava̱ʼana veʼe yóʼo. Ku̱i̱ya̱ 520, ta̱ rey Darío ni̱ka̱ʼa̱nra ña̱ kixáʼa tukuna ndasaviína veʼe yóʼo, ta saátu ta̱xira xu̱ʼún ndaʼa̱ na̱ judío ña̱ va̱ʼa keʼénaña, ta ni̱ka̱ʼa̱nra xíʼin na̱ chíñu na̱ xi̱ndoo ñuu kán ña̱ chindeétáʼanna xíʼinna (Esd. 6:​1, 6-10).

7. ¿Ndáaña va̱ʼa nda̱kiʼin na̱ judío xa̱ʼa̱ ña̱ siʼna chiñu Jehová ni̱ndi̱ʼi-inina xa̱ʼa̱?

 ⁷ Jehová xi̱niñúʼura ta̱ Ageo xíʼin ta̱ Zacarías, ña̱ ka̱ʼa̱nra xíʼin na̱ káchíñu nu̱ura ña̱ tá siʼna templo ná ndasaviína miíra chindeétáʼan  xíʼinna (Ageo 1:​8, 13, 14; Zac. 1:​3, 16). Ña̱ ni̱ka̱ʼa̱n na̱ profeta yóʼo xíʼin na̱ judío chi̱ndeétáʼanña xíʼinna ña̱ ki̱xáʼa tukuna ndasaviína templo ku̱i̱ya̱ 520, ta tá kúma̱níka xi̱nu 5 ku̱i̱ya̱ xa̱a̱ sa̱ndíʼina nda̱saviínaña. Ni ni̱ya̱ʼana nu̱ú tu̱ndóʼo, soo siʼnaka chiñu Jehová ni̱ndi̱ʼi-inina xa̱ʼa̱. Ña̱kán miíra ta̱xira ndee̱ ndaʼa̱na ta saátu ta̱xira ña̱ʼa ña̱ kuniñúʼuna. Xa̱ʼa̱ ña̱kán, ku̱si̱í-inina nda̱sakáʼnuna Jehová (Esd. 6:​14-16, 22).

8. ¿Ndáa ki̱ʼva chíndeétáʼan Ageo 2:4 xíʼinyó ña̱ siʼnaka chiñu Jehová kundi̱ʼi-iniyó xa̱ʼa̱? (Koto ña̱ káʼa̱n nota).

⁸ Kúnda̱a̱-iniyó ña̱ xa̱a̱ ku̱nu̱míní kixaa̱ ña̱ gran tribulación ña̱kán ndáyáʼviní ña̱ ku̱ʼu̱nyó natúʼunyó xíʼin na̱ yiví xa̱ʼa̱ tu̱ʼun va̱ʼa ña̱ káʼa̱n Ndióxi̱ (Mar. 13:10). Soo tá kǒo xu̱ʼún ndaʼa̱yó á na̱ chíñu kǒo xíínna taxina ña̱ natúʼunyó xa̱ʼa̱ Ndióxi̱ kivi ixayo̱ʼvi̱ña xíʼinyó. Tá saá ndóʼoyó, ¿ndáaña chindeétáʼan xíʼinyó ña̱ siʼnaka chiñu Jehová kundi̱ʼi-iniyó xa̱ʼa̱? Ña̱ xíniñúʼu keʼéyó kúú ña̱ ndiʼi tiempo kandíxayó ña̱ mií “Jehová ta̱ xáʼndachíñu nu̱ú na̱ ángel” d chindeétáʼan xíʼinyó. Miíra chindeétáʼan xíʼinyó tá siʼnaka chiñu miíra ndíʼi̱-iniyó xa̱ʼa̱ nu̱úka chiñu miíyó. Ña̱kán va̱ása xíniñúʼu yi̱ʼvíyó (kaʼvi Ageo 2:4). e

9, 10. ¿Ndáaña va̱ʼa nda̱kiʼin iin na̱ matrimonio xa̱ʼa̱ ña̱ ke̱ʼéna ña̱ káʼa̱n Mateo 6:33?

⁹ Ná kotoyó ña̱ ndo̱ʼo ta̱ Oleg xíʼin ñá Irina, f na̱yóʼo precursor kúúna. Tá xa̱a̱ nda̱yaʼana inka congregación ta̱vánana nu̱ú káchíñuna saáchi kǒo ku̱a̱ʼá xu̱ʼún níxi̱yo ñuu kán. Iin ku̱i̱ya̱ví kǒo chiñu níxi̱kuumiína, soo ndiʼi tiempo ki̱ʼinna kuenta ña̱ chi̱ndeétáʼan Jehová xíʼinna, ta savatu  yichi̱ chi̱ndeétáʼan na̱ hermano xíʼinna. ¿Ndáaña ke̱ʼéna tá ni̱ya̱ʼana nu̱ú tu̱ndóʼo yóʼo? Ta̱ Oleg xi̱ndakavava-inira, ta̱yóʼo káchira: “Ña̱ xi̱keendi̱ xi̱natúʼunndi̱ xíʼin na̱ yiví kúú ña̱ xi̱chindeétáʼan xíʼinndi̱ ña̱ ndakaʼánndi̱ xa̱ʼa̱ ndáaña kúúmií ña̱ ndáyáʼvika”. Na̱ hermano yóʼo xi̱nandukúvana chiñu ña̱ kachíñuna, soo saátu xi̱kee ni̱ʼina ña̱ xi̱natúʼunna xíʼin na̱ yiví xa̱ʼa̱ Ndióxi̱.

¹⁰ Iin ki̱vi̱ tá ndi̱kóna ña̱ ni̱xa̱ʼa̱nna na̱túʼunna xíʼin na̱ yiví xa̱ʼa̱ Ndióxi̱, iin ta̱ vecinona ni̱ka̱ʼa̱nra xíʼinna ña̱ iin ta̱ migona ni̱xa̱ʼa̱n ndakara u̱vi̱ bolsa ña̱ comida ndaʼa̱na, ta ki̱ʼva 160 kilómetro (100 milla) xíka ke̱era. Ta̱ Oleg káchira: “Ki̱vi̱ kán ki̱ʼinndi̱ kuenta ña̱ ndíʼi̱ní-ini Jehová xa̱ʼa̱ndi̱ ta saátu na̱ congregación. Kúnda̱a̱-inindi̱ ña̱ kǒo nándósó-ini Jehová xa̱ʼa̱ na̱ ndásakáʼnu miíra chi ndiʼi tiempova chíndeétáʼanra xíʼinna” (Mat. 6:33).

11. ¿Ndáaña taxi Jehová ndaʼa̱yó tá siʼnaka chiñu miíra ndíʼi̱-iniyó xa̱ʼa̱?

¹¹ Jehová kúni̱ra ña̱ natúʼunyó xa̱ʼa̱ra xíʼin na̱ yiví ña̱ va̱ʼa xa̱a̱na ndasakáʼnunara, tasaá ka̱kuna. Nda̱a̱ táki̱ʼva sa̱kúaʼayó nu̱ú  párrafo 7, ta̱ Ageo chi̱kaa̱ra ndee̱ xíʼin na̱ judío ña̱ va̱ʼa kixáʼa tukuna ndasaviína templo. Nda̱a̱ táki̱ʼva íyo ta̱ ni̱ka̱ʼa̱n xíʼinna ña̱ kixáʼa tukuna ixava̱ʼana templo saá ni̱xi̱yora. Ta ná kǒo ndakaʼánkana xa̱ʼa̱ ni iin ku̱i̱ya̱ ña̱ kǒo nda̱a̱ ni iin ña̱ʼa níkeʼéna. Jehová ni̱ka̱ʼa̱nra xíʼinna ña̱ tá kándíxanara taxira bendición ndaʼa̱na (Ageo 2:​18, 19). Ta saátu miíyó kivi kandíxayó ña̱ ku̱a̱ʼání bendición taxi Jehová ndaʼa̱yó tá siʼnaka chiñu miíra ndíʼi̱-iniyó xa̱ʼa̱.

12. ¿Nda̱chun xi̱niñúʼu kandíxaní ta̱ Esdras xíʼin na̱ ku̱a̱ʼa̱n xíʼinra ña̱ chindeétáʼan Jehová xíʼinna?

¹² Ku̱i̱ya̱ 468 tiempo xi̱naʼá, ta̱ Esdras ke̱era ñuu Babilonia ta ni̱xa̱a̱ra ñuu Jerusalén xíʼin iin tiʼvi loʼo na̱ judío. Ta xi̱niñúʼu na̱ʼa̱na ña̱ kándíxanína Jehová, saáchi yichi̱ nu̱ú ku̱ʼu̱nna i̱yoní ni̱xi̱yoña, ta xa̱ʼa̱ ña̱ ku̱a̱ʼání oro xíʼin plata ta̱xina ku̱a̱ʼa̱n xíʼinna ña̱ nduvií templo, kivi kindaa na̱ kui̱ʼná ña̱yóʼo ndaʼa̱na chí yichi̱ (Esd. 7:​12-16; 8:31). Ta saátu ki̱ʼinna kuenta ña̱ ndi̱ʼi̱-xa̱ʼa̱ nama̱ xíʼin yéʼé ña̱ xi̱kuumií Jerusalén ta kǒo ku̱a̱ʼá na̱ yiví níxi̱yo ñuu kán, xa̱ʼa̱ ña̱yóʼo kivi kixi ku̱a̱ʼá tu̱ndóʼo nu̱úna. Tásaá, ¿ndáa ki̱ʼva chíndeétáʼan ña̱ ke̱ʼé ta̱ Esdras xíʼinyó ña̱ kandíxakayó Jehová?

13. ¿Ndáaña chi̱ndeétáʼan xíʼin ta̱ Esdras ña̱ kandíxakara Jehová? (Koto ña̱ káʼa̱n nota).

¹³ Ta̱ Esdras ki̱ʼinra kuenta ndáa ki̱ʼva xi̱chindeétáʼan Jehová xíʼin na̱ ñuura tá xi̱yaʼana nu̱ú tu̱ndóʼo. Ku̱i̱ya̱ 484 tiempo xi̱naʼá, ta̱ rey Asuero ni̱ka̱ʼa̱nra ña̱ kaʼnína ndiʼi na̱ judío na̱ xi̱ndoo chí Persia, ta sananí ñuu Babilonia ni̱xi̱yo ta̱ Esdras tá ku̱u ña̱yóʼo (Est. 3:​7, 13-15). Ta sana nda̱a̱ miíra kivi kuvi xa̱ʼa̱ ña̱yóʼo. Tá ku̱ndaa̱-ini na̱ judío xa̱ʼa̱ ña̱yóʼo, kǒo níxixina ta ku̱suchíní-inina, ta sananí ni̱ka̱ʼa̱n-ndáʼvina xíʼin Jehová ña̱ ná sáka̱kurana (Est. 4:3). Ndakanixi̱ní ndáa ki̱ʼva ndo̱ʼo ta̱ Esdras xíʼin ndiʼika na̱ judío tá ku̱ndaa̱-inina ña̱ va̱ása kuvikana, chi ta̱ rey ni̱ka̱ʼa̱nra ña̱ kaʼnína na̱ xi̱saa̱-ini xi̱xini miína (Est. 9:​1, 2). Ña̱ ndo̱ʼo ta̱ Esdras chi̱ndeétáʼanña xíʼinra ña̱ kundeé-inira ya̱ʼara nu̱ú inkaka tu̱ndóʼo, ta ña̱yóʼo chi̱ndeétáʼanña xíʼinra ña̱ kandíxakara ña̱ mií Jehová kivi sáka̱kura na̱ ñuura. g

14. ¿Ndáa ki̱ʼva chi̱ndeétáʼan Jehová xíʼin iin ñá hermana?

¹⁴ Tá xítoyó ndáa ki̱ʼva chíndeétáʼan Jehová xíʼinyó tá yáʼayó nu̱ú tu̱ndóʼo, saá kúú ña̱ va̱ʼaníka kándíxayóra. Ná kotoyó ña̱ ndo̱ʼo iin ñá hermana ñá naní Anastasia ñá íyo chí Europa del Este. Na̱ xi̱kachíñu xíʼinñá xi̱ ixandúxana xíʼinñá ña̱ ki̱ʼviñá xíʼin na̱ político, soo ña̱ va̱ʼa kǒo  ki̱ʼviñá xíʼin na̱ político sa̱ndákooñá chiñu ña̱ kúúmiíñá. Ñáyóʼo káchiñá: “Tá xi̱kachíñui̱ ni̱xi̱yova xu̱ʼún nu̱úi̱, soo tá sa̱ndákoi̱ chiñu yóʼo kǒoka xu̱ʼún níxi̱kuumiíi̱”. Ñáyóʼo káʼa̱nkañá: “Ni̱ka̱ʼi̱n xíʼin Jehová xa̱ʼa̱ ña̱ xi̱ndoʼi̱, ta ki̱ʼi̱n kuenta ña̱ kǒo ní ixama̱ní ni iin ña̱ʼa nu̱úi̱. Tá ná kixaa̱ iin ki̱vi̱ ña̱ kǒoka chiñu kuumiíi̱, kǒo yi̱ʼvíi̱ saáchi xínii̱ ña̱ mií Jehová kundaa yi̱ʼi̱”.

15. ¿Nda̱chun xi̱kandíxa ta̱ Esdras ña̱ chindeétáʼan Jehová xíʼinra? (Esdras 7:​27, 28).

¹⁵ Ta̱ Esdras xi̱nira ndáa ki̱ʼva chi̱ndeétáʼan Jehová xíʼinra. Xa̱ʼa̱ ña̱ ki̱ʼinra kuenta ña̱ ndiʼi yichi̱ xi̱chindeétáʼan Jehová xíʼinra xa̱ʼa̱ ña̱yóʼo xi̱kandíxanírara. Ta̱ Esdras ni̱ka̱ʼa̱nra: “Ndu̱ndakú-inii̱ xa̱ʼa̱ ña̱ íyo Jehová Ndióxi̱ xíʼi̱n”, ta ña̱ ni̱ka̱ʼa̱nra yóʼo va̱xiña nu̱ú Esdras 7:​27, 28 h (kaʼviña). Nu̱ú tutu ña̱ ka̱ʼyí ta̱ Esdras u̱ʼu̱n yichi̱ ni̱ka̱ʼa̱nra ña̱ chi̱ndeétáʼan Jehová xíʼinra (Esd. 7:​6, 9; 8:​18, 22, 31).

16. ¿Ama kúú ña̱ kivi kunda̱a̱-iniyó ña̱ chíndeétáʼan Jehová xíʼinyó? (Koto na̱ʼná).

¹⁶ Jehová kivi chindeétáʼanra xíʼinyó tá yáʼayó nu̱ú iin tu̱ndóʼo. Tá kúú, sana xíniñúʼu ka̱ʼa̱nyó xíʼin iin ta̱ káchíñuyó nu̱ú ña̱ ná taxira permiso ndaʼa̱yó ña̱ va̱ʼa ku̱ʼu̱nyó asamblea, á ña̱ nasamayó ki̱vi̱ ña̱ káchíñuyó ña̱ va̱ʼa ku̱ʼu̱n ni̱ʼiyó reunión. Tá xítoyó ña̱ chíndeétáʼan Jehová xíʼinyó saá kúú ña̱ kándíxaníkayóra.

17. ¿Nda̱chun va̱ʼa xíni̱yó ña̱ vitá ni̱xi̱yo ini ta̱ Esdras tá ni̱ya̱ʼara nu̱ú tu̱ndóʼo? (Koto na̱ʼná ña̱ va̱xi chí nu̱ú kíxáʼa tutu yóʼo).

¹⁷ Ta̱ Esdras vitá ni̱xi̱yo inira ta ni̱ka̱ʼa̱nra xíʼin Jehová ña̱ chindeétáʼanra xíʼinra. Tá xi̱ndakiʼin ta̱ Esdras iin chiñu ta xi̱ndakanixi̱níra ña̱ kǒo kuchiñura keʼéraña, xi̱ka̱ʼa̱nra xíʼin Jehová ña̱ chindeétáʼanra xíʼinra (Esd. 8:​21-23; 9:​3-5). Tá ki̱ʼin inkana kuenta ña̱ kándíxaní ta̱ Esdras ña̱ mií Jehová chindeétáʼan xíʼinra, saátu ke̱ʼé na̱kánva (Esd. 10:​1-4). Tá kíxáʼa ndíʼi̱ní-iniyó xa̱ʼa̱ ña̱ kǒo xu̱ʼún nu̱úyó, ndíʼi̱-iniyó xa̱ʼa̱ na̱ veʼeyó, ná ka̱ʼa̱nyó xíʼin Jehová ta ná kǒo kaka-iniyó ña̱ chindeétáʼanvara xíʼinyó.

18. ¿Ndáaña chindeétáʼan xíʼinyó ña̱ kandíxakayó Jehová?

¹⁸ Tá vitá íyo iniyó ta káʼa̱nyó xíʼin inkana ña̱ chindeétáʼanna xíʼinyó, saá kúú ña̱ kandíxaníkayó Jehová. Ñá Erika, u̱ni̱ kúú se̱ʼeñá ta kǒo nísandákooñá ña̱ kandíxañá Jehová ni ni̱ya̱ʼañá nu̱ú tu̱ndóʼo ña̱ yo̱ʼvi̱ní. Tá ni̱ya̱ʼa loʼo tiempo nu̱u se̱ʼeñá ta saátu ni̱xi̱ʼi̱ yii̱ñá. Tá ndákanixi̱níñá xa̱ʼa̱ ndiʼi ña̱ ku̱u yóʼo káchiñá: “Sava yichi̱  xi̱ndakanda̱ní-inii̱ ndáa ki̱ʼva xi̱chindeétáʼan Jehová xíʼi̱n. Saáchi ku̱a̱ʼání yichi̱ xi̱kiʼi̱n kuenta ña̱ xi̱kaʼa̱n na̱ migoi̱ á ña̱ xi̱keʼéna, kúúmií ña̱ ndu̱kúi̱ nu̱ú Jehová. Ña̱kán tá nátúʼi̱n xíʼinna xa̱ʼa̱ ña̱ ndóʼi̱ va̱ʼaníka chíndeétáʼanna xíʼi̱n”.

19, 20. ¿Ndáaña sákuaʼayó xíʼin ña̱ ke̱ʼé na̱ judío na̱ ni̱ndo̱o ñuu Jerusalén?

¹⁹ Saátu kivi sákuaʼayó xí’in ña̱ ke̱ʼé na̱ judío na̱ ni̱ndo̱o ñuu Babilonia, chi kǒo níkivi ndikóna ñuu Jerusalén xa̱ʼa̱ ña̱ xa̱a̱ ku̱chéena, ña̱ xi̱ndoʼona iin kue̱ʼe̱ á ña̱ xi̱ndaana na̱ veʼena. Ni ni̱ndo̱ovana ñuu Babilonia, soo ta̱xivana ña̱ xi̱kuumiína ña̱ ku̱ʼu̱nña ñuu Jerusalén ña̱ kuniñúʼuna xíʼin ña̱ templo (Esd. 1:​5, 6). Tá ni̱ya̱ʼa 19 ku̱i̱ya̱ ña̱ ndi̱kó iin tiʼvi na̱ judío chí Jerusalén, na̱ ni̱ndo̱o chí Babilonia xi̱taxikavana donación ña̱ ku̱ʼu̱nña ñuu Jerusalén (Zac. 6:10).

²⁰ Sana kúni̱yó keʼéyó ku̱a̱ʼáka chiñu nu̱ú Jehová, soo sana kǒo kívika keʼéyó ña̱yóʼo. Ni saá, kándíxanívayó ña̱ ndáyáʼviní ña̱ kéʼéyó nu̱ú Jehová. ¿Nda̱chun va̱ʼa kúnda̱a̱-iniyó ña̱yóʼo? Jehová ni̱ka̱ʼa̱nra xíʼin ta̱ profeta Zacarías ña̱ ná keʼéra iin corona ta ná kuniñúʼura oro xíʼin plata ña̱ xi̱taxi na̱ judío na̱ ni̱ndo̱o Babilonia ña̱ keʼéra ña̱yóʼo (Zac. 6:11). Ña̱ corona yóʼo chindeétáʼanña xíʼinna ña̱ ndakaʼánna ña̱ va̱ʼaní ni̱xi̱yo ini na̱ judío na̱ ni̱ndo̱o chí ñuu Babilonia (Zac. 6:​14, nota). Ña̱kán kǒo xíka iniyó ña̱ kǒo nándósó-ini Jehová xa̱ʼa̱ ndiʼi ña̱ kéʼéyó ña̱ ndasakáʼnuyóra ni yáʼayó nu̱ú tu̱ndóʼo (Heb. 6:10).

21. ¿Ndáaña chindeétáʼan xíʼinyó ña̱ kǒo yi̱ʼvíyó?

²¹ Kúnda̱a̱-iniyó ña̱ xa̱a̱ ki̱vi̱ so̱ndíʼi kúú ña̱ ndóoyó ta xo̱ʼvi̱níkavayó xa̱ʼa̱ tu̱ndóʼo ña̱ yáʼayó nu̱ú (2 Tim. 3:​1, 13). Soo kǒo xíniñúʼu kundi̱ʼi̱ní-iniyó ta yi̱ʼvíyó. Ná ndakaʼányó ña̱ ni̱ka̱ʼa̱n Jehová xíʼin na̱ xi̱ndasakáʼnu miíra tiempo tá ni̱xi̱yo ta̱ Ageo: “Yi̱ʼi̱ íyoi̱ xíʼinndó, kǒo yi̱ʼvíndó” (Ageo 2:​4, 5). Saátu miíyó kándíxaníyó ña̱ tá siʼna chiñu Ndióxi̱ kéʼéyó, miíra chindeétáʼan xíʼinyó. Tá ná keʼéyó ña̱ sa̱kuaʼayó nu̱ú profecía ta̱ Ageo, ta̱ Zacarías xíʼin ta̱ Esdras, saá kúú ña̱ kandíxaníkayó ña̱ mií Jehová chindeétáʼan xíʼinyó ni nda̱a̱ ndáaka tu̱ndóʼo ná kixi nu̱úyó.